القطارات الجديده ..مش عاوزه حديده !!

[achnaton]

[size=5]بسم الله الرحمن الرحيم

الموضوع ده .. نفسى حد من اخوانا العاملين بالاعلام فى المحروسة المنحوسه ينقله لرئيس الوزراء الالكترونى .. اللى نازل فينا تصريحات زى العمده الآلى بتاع زمان .. وانا ما اعرفش إزاى الراجل ده بيحاول انه يفهم البلد انه عمدة الكمبيوتر ..وجهاز لكل تلميد ..والساعة بجنيه يابلاش .. وهونفسه ما عندوش جهاز .. ؟؟

والدليل على ذلك - ان معاليه بتاع كلام وتصريحات - ولا يدرى ايه اللى الدنيا .. انه عاوز يجدد بالكامل شيكة القضبان الحديدية للسكة الحديد المصرية ..بل ويمر خط سكةحديد جديد من شمال البلاد .. حتى حلايب وشرتين مرورا باسوان ..

صح النوم يا حاج ظريف .. وكفاية مصاريف .. دا الحديد الوقت اسعاره مولعه .. وعربات السكةالحديد بتتكلف الكثير .. واحنا مش أغنى ولا انصح من الاوربين ؟؟ ..شوف آخر خبر بعد ان تم الغاء عدة خطوط مش جايبةتمنها فى الشبكة الالمانية .. وخرجت علينا مراكز الابحاث الاهلية اول امس .. بنموذج لقطار الطرق السريعه .. اتوبيس مفصلى تم تصميمه بدقة متناهية بتكنوليا عربات قطارات السكك الحديدية .. تستوعب العربه فيه ركاب عربة قطار .. ولكن بيسير علىعجل كاوتش ..وفى الطرق العمومية ..مش محتاج لسنافور .. ولا محتاج لجرارات بالشئ الفلانى .. بص كده يا مولانا فى الصورة ..واتحسر زى حالاتى .. ربطنا الحصان وراء العربة بالغلط .. وبنقرأ مشروعات الحكومات من أيام الملك فاروق اللى مات .. بصوا يا عالم شويه لقدام .. ومدوا ايديكم لابنائكم فى الخارج ليساعدوكم ..

لواءات الجبش اللى زرعتوهم فى كل مكان .. ما ينفعوش لمواجهة التقدم التكنولوجى بتاع هذا الزمان .. ودليلى على هذا رغم أنه بعيدا عن هذا الموضوع .. الا انه يعطينا الصورة الحقيقة لفكر السادة الرديف .. صباح اليوم كان السيد اللواء بيشرح موضوع التعداد .. فقال ردا على سؤال المذيعة أنه من المستحيل تكليف السفارات لحصر المغتربين والمسافرين لأن معظهم فى سجلات السفارات مش مقيدين ..!! ومعاه حق .. ولكن التكنولوجيا الحديثة ممكن تسمح له ان يتصل بالجميع وفى كل انحاء العالم خلال يوم واحد أو اقل .. فيه حاجه اخترعوها من زمان اسمها الشبكة العنكبوتية .. ممكن بكام صفحة وكام موقع يجمع يوميا على الاقل الفين استماره من ابناء مصر المغتربين .. !! ومش حا أكمل فالواحد قرفان .. لغاية امتى حيستمر هذا الحال ؟؟؟ أمال ان ماكنش رئيس الوزراء الكترونى ..كنا حنشوف إيه ؟؟

[Sherief AbdelWahab]

ومثل تصريح رئيس الوزراء هناك تصريحات لوزير التعليم غير مفهومة على الإطلاق منها عن خطة متكاملة "لتطوير" التعليم ، وعن "نظام جديد" للثانوية العامة.. كل دة والصحافة مطنشة ع الآخر..

يا صحفيينا الأكارم ، مش كل حاجة شتيمة ، أنا عارف ، بس فكروا في التصريحات نفسها وناقشوها واعرضوها على العقل .. مش بتقولولنا ليل ونهار إن دوركم تنويري وبتصنعوا حالة من التفكير في المجتمع .. اعملوها بقى ..مرة ولو بالغلط الله لا يسيئكم!

خلص الكلام