أريد شراء سيارة بالكويت ..... أطلب مشورتكم

[darker19]

عليك نور يا مانو هوا بعينه سعيد الحرامي, ياريت يا مانو تكتبلنا عنوان المحل ولو ممكن تليفونك عشان لوحد بيعاني نفس المعاناة بتاعتي يبقى يروحلك, وأهوا ننفع القريب أحسن من الغريب.

[Muns]

مساء الخير للجميع اولاً انا عايز اديلك نصيحة :

مادام انت لسة هتتعلم السواقة يبقى ابعد تماماً عن أي عربية غالية واخرك تجيب عربية ب 500 دينار زي مانصحوك لأنك هتخبطها كتير في الآول وانت بتركن مثلاً ، وبعد سنة يكون ربنا كرمك وتمكنت من السواقة يبقى تدرس موضوع الزيرو حسب ظروف وسعرالسوق وقتها وكمان حسب ظروفك ساعتها .

ولو انت ناوي على عربية لمصر يبقى احسن حاجة لك الكورولا بس هات الـ 1300 سي سي عشان الجمارك مع أن الكبيرة منها أقوى بس هتفرق معاك كتير في الجمارك لكن الـ 1300 وبعد مرور خمس سنين طبعاً ( فترة التقسيط لأنك متعرفش تجمركها الا بعد نهاية اقساطها ) هتكون استفدت بالخصم على الجمرك وهيبقى جمركها ساعتها في حدود 30 أو 40 الف جنيه مصري .

الكامري جميلة جداً والعرض ده جميل بس انسى انك تجمركها دي جمركها مش اقل من 200 الف يعني لو معاك المبلغ ده كاش انزل هات عربية محترمة جدا في مصر .

اقساط الكورولا في حدود ال 90 د.ك بس انت ممكن تعمل دفعة مؤخرة 1500 او 2000 د.ك ودي للجميع مش الكوايتة بس ودي هتخفض القسط معاك الى 60 د.ك وممكن ساعة الدفعة المؤخرة تعملك جمعية وتدفعها ويبقى كدة قسطت الدفعة المؤخرة .

وربنا يوفقك .

[mano]

, ياريت يا مانو تكتبلنا عنوان المحل ولو ممكن تليفونك عشان لوحد بيعاني نفس المعاناة بتاعتي يبقى يروحلك

عموما انا تحت امرك و ده رقم تليفوني 7419029

وميعدنا يوم الخميس الساعه 8

[الحاج فوزى]

واحد تانى بيدور على سيارة :)

خلينى اقولك رأى عن خبرة

خبرة جاية منين ؟ اقولك

اولا مستعمل جبت ، وحوادث عملت ( بعد الشر على الجميع ) وتصليح وكالة صلحت ، تصليح بره الوكالة صلحت ، وزيرو جبت ، وقسط 60 دينار دفعت ، وقسط 140 دينار دفعت :angry2: :angry2:

ده بالاضافة ان شهدت بيع وشراء عدد لا بأس به من السيارات

يعنى من الاخر جربت كل حاجة

اقولك بقه يا سيدى

الخلاصة تجيب ايه وبالترتيب

1- زيرو

اولا الرد على من قال ان الزيرو + الجمارك اغلى من مصر .. غير صحيح واحسبها

سعر السيارة كاش كام + الجمرك كام و سعر السيارة (نفس السيارة) فى مصر

هتلاقى اوفر ، مبلغ مش كبير بس اوفر ( طبعا الزيرو اقصد بيه 1600 سى سى )

ثانيا الزيرو يعنى ضمان .. يعنى متأكد 100 % ان السيارة فى الاوك

ومتقوليش هكشف عليها ، لان فيه حدادين ( سمكريين ) بيخدو العربية شاسيه حوادث ، ويعملها ويجيبلك كشف من الرمال الذهبية (تقريبا على حد علمى اضمن مكان كشف ومعظم بائعى السيارات مبيرضاش يكشف هناك) بأن السيارة شاسيه فى الاوك

ثالثا الزيرو انت صاحبها ، بمعنى انت الى بتحافظ عليها ، بتصونها لنفسك وده بيفرق على العمر الطويل

رابعا مصاريف العربية هتكون ايه ؟ القسط + البنزين + السيرفس كل فترة .. وبس لا اصلاح لا قدر الله ولا شىء ، يعنى لو جايب مستعمل مقرف ، وصلحت مره ب 200 دينار ، وزع ال 200 على قيمة القسط هتلاقيها مش فارقه .. بل ممكن تزيد لو السيارة مقرفه زياده

اسلوب السداد : ده نقطة مهمة اوى ..

رأيى الشخصى ، ادفع مقدم محترم فى حدود الالف ، اعمل جمعية مثلا او حوش شويه قبل ما تشترى ، وقسط على حد اقصى سنتين قسط حوالى من 130 لـ 150

وهقولك ليه , انت هتدفع على 5 سنين .. 5 سنين .. 90 دينار يعنى فرق 30 ، 40 دينار وتخلى الـ 5 سنين .. 24 شهر والله ما بتفرق مصاريفك فى الشهر فرق ب 40 ينار كده كده هيتصرفو

غير الـ 24 شهر ، الفوائد .. تدفع فوائد 200 او 300 دينار .. ولا تدفع 700 ولا حتى 600 ؟!

2- مستعمل

لو مستعمل ، يبقى تجيب سيارة موديل 2 او 3 سنة فرق بحد اقصى واوعى اوعى قبل كده

تكشف عليها كشف كويس موووووووت وفى الكشف تخلى واحد يعملها تجربة قياده

طبعا فى الكشف بتكشف الاول على الشاسيه ، لو اوك الماتور والجير ، لو اوك باقى التفاصيل ، وتجربها كويس بنفسك ، ولو ماعندكش خبرة ، خلى زميل او صديق يجربها ، ويا سلام لو واحد عنده نفس نوع العربية

نوع العربية ، مش مع انك تجيب عربية صغيرة ، لانها هتخنقك وهتغيرها هتغيرها فى فترة قليلة وهتخسر معاك

ولا عربية كبيرة (او غاليه بطريق مبالغ فيها بالنسبة الى امكانياتك) هتدفع كتير والفرق مش يستاهل بالنسبه لينا (المغتربين يعنى)

يعنى عربية وسط حلوه كده

الدفع بقه : هنا عكس الزيرو تماما ، اوعى تدفع ولا 1 دينار مقدم وقلل القسط على قد ما تقدر

لانك هتبيعها هتبيعها قبل ما تخلص الاقساط

( من المشاهدة فيمن حوالى تقريبا السيارة تغير خلال اقل من 5 سنين بالذات للشباب دون 40 )

3- واخيراً الامكانيات اقل من 1 و 2 بالترتيب .. يبقى تجيب الـ " كولت " وامرك لله وربنا يزيد فى رزقك ويبارك فيه وتغيرها اول ما تقدر

اه ، بالنسبة لموضوع السواقه ما تقلقش كتير ، لان السواقه فى الكويت غير مصر خالص ، و اى خبطات هتعملها فى السيارة من الركن وخلافه ، مش هتفرق جديدة ولا مستعملة كده كده الحداد هياخد منك نفس الاجرة

نسيت اقولك ، حاول تخليك فى اليابانى .. ثم الاوربى .. واخيرا الامريكانى ، لو قطعة الغيار يابانى بـ 20 .. اوروبى بـ 40 امريكى بـ 100

حسين

تم تعديل 28 نوفمبر 2006 بواسطة Huss.

[lonly in cold night]

يا مصري انت بقالك شهر فاتح الموضوع ده

انا ح اموت و اعرف وصلت لاي قرار؟ اشتريت ولا لسه؟؟؟؟؟؟؟؟