يا بلاااااااااااااادي.....يا احلي البلاد يا بلادي

[نانو]

فيه كتير مننا عايشين بره مصر....في بلاد يمكن تكون فيها حاجات احلي من مصر ...الراحه الماديه الاستقرار توافر متطلبات الحياه البسيطه

بشكل سهل و مباشر....معامله انسانيه...يعني ميزات كتير

لكن بتفضل مصر بلادنا غير....مش بس علشان هيا بلدنا ووطننا الحقيقي....لكن لان مصر فعلا بلد جميله و فيها خيرات و جمال طبيعي رباني فيها دفا الاهل و الاصحاب ....رغم كل اللي عايزين يدمروها

مش بس اللي عايشين بره مصرممكن يحسوا بكده ....لا كمان اللي عايشين علي ارضها

تعالو نحكي عن اي موقف حصلنا في الغربه او حتي و احنا علي ارضها...و حسينا باغنيه شاديه تقفز الي مسامعنا

يا بلاااااادي يا احلي البلاد يا بلادي

و اسمحولي ابدا

من ثلاثه ايام بس كان الجو في الكويت حر جدا و رطوبه عاليه لدرجه الاختناق سواء ان كان الصبح او بليل يعني صعب الواحد يمشي في مكان مفتوح

و اليوم التالي الصبح لقيت نسمه بروده بسيطه ..قلت الله ايوه كده اخيرا هنخلص من الحر علشان نقدر نخرج الاولاد في اماكن مفتوحه من غير معاناه

و فعلا خرجنا...و قلت احتياطي خليه الهدوم بكم طويل و في نهايه اليوم كان الولاد بيترعشوا...من البردو انا كمان

ايه ديه :o طيب امتي ..مين ..في ..ازاي

فين فصل الخريف...كان فيه عندنا في مصر مرحله انتقاليه بين الصيف و البرد لكن كده صيف و مره واحده شتاء...و شتاء الكويت شتاء شديد البروده و قليل الامطار

افتكرت ساعتها فصل الخريف في مصر و لسعه البرد الجميله علي الصبح... و شكل الشجرو اوارقه ... و ريحه البحر في الشهر ده...و الجو الرومانسي اللي بتبعثه تلك النسمات البارده الحانيه علي القلوب و اللي كنت بستناها من السنه الي السنه

و قعدت ادندن يا بلاااااااااااااااادي يا احلي البلاد يا بلادي

[أبو زياد]

أختى نانو انتى قصدتى الخميس اللى فات .

نفس اللى حصل معايا و الولاد اترعشوا بس كنا عاملين حسابنا و قمنا لعبنا شوية معاهم عشان نسخن و الموضوع انتهى - وكان اليوم جميل و الحمد لله

طبيعة المناطق الصحراوية كدة ودة منعكس يمكن حتى على أهلها - التغيرات المفاجئة - مافيش وسط

وعندنا مختلف عشان كدة احنا مختلفين عنهم

حتى الأسعار تلاقيها فجأة فوق و تنزل تحت فجأة ---- كل حاجة

بس يا اختى العزيزة إحنا حنبقى زيهم فى طبيعتنا - لأننا مع السنين تأقلمنا - ويمكن بعد كدة مش حنقدر نرجع تانى زى ما كنا -

أنا سامعك بتقولى انا مختلفة معاك فى النقطة دى - لأ يا نانو - طبيعة الإنسان إنه بيقدر يتشكل ودى أهم ميزة فيه -

محدش دمر بلدنا دى اجيال تعاقبت عليها و قعدوا يغنوا زى الأغانى بتاعتك و يقولوا احلى بلد لحد ما بقت .... بلاش أقولها

و حاكلمك تانى .....

[Folana]

السلام عليكم ورحمة الله....

صباح شريف نانو افنظم...ايه المواضيع اللى تفتح النفس دى.....

طبعا بلادنا جميلة...ومهما الانسان اتغرب وبعد..برضه بيحن لبلده ولذكرياته فيها.....مش الشيخ امام بيقول

" هواها أنفاسى...وترابها من ناسى"

بس انا عن نفسى عاملة زى جحا...لما سألوه بلدك فين ياجحا قال اللى مراتى فيها....

انا اعيش فى اى مكان انا واسرتى ..زوجى وبناتى ..باقولهم مادام احنا الاربعة مع بعض يبقى خلاص اى مكان صحرا ان كان او بستان يبقى امان.....

ولى عودة....

[أبو زياد]

فلانة كل موضوع تكتبى كلمتين و تقولى لنا عودة

إيه رايك تخليها التوقيع بتاعك ؟

إضافة للموضوع و هو توقيع أحد الإخوة فى المحاورات :

الفقر فى الوطن غربة و الغنى فى الغربة وطن

خلاص يا جماعة حتى الجو فى بلدنا بقى لازم تصريح لنا عشان نستمتع بيه

كفاية شعارات و نا اول واحد يرجع لبلده بس لو لية مكان فيها

[نانو]

ايه يا ابو زياد مالك فيه ايه.... :)

شادد حيلك علينا اوي كده ليه..... :)

اكمن احنا ....سيدات مكسورات الجناح

لا :) ....اصحي بقه ...احنا سيدات عظيمات غير مكسورات الجناح ....و فولانه هترحع لك دلوقتي رجعه مضبوطه جدا بس اصبرانت :)

يا سيدي احنا مش بنقول هتافات...و انا بقه بالذات مش بحب المواضيع اللي فيها هتافات و مشادات و خلافات....و التعلب فات :D

شوف يا سيدي ..الموضوع ده المقصود منه تفريغ شحنات الحب و الشوق الي بلدنا الحبيب مصر...و علي فكره شحنه الحب ديه ممكن تكون من اللي عايش فيها اقوي من البعيد لانه شايف حته منه و هيا بتموت قدام عينيه

شايف احلي نيل في العالم و مياه ملوثه ...شايف اخصب ارض و محصول مسمم...شايف احلي شباب بس نفسه مكسوره و احلامه مهزومه

يعني المسئله مش شعارات ....و اكيد لو نقدر نرجع مصر و نعيش فيها مرتاحين كنا كلنا رجعنا ...هو انت سمعت عن واحد كندي جه يهاجر علشان يعيش في مصر :)

الفايده التانيه من الموضوع ده ان هنا في المنتدي ...من اهلنا و اخوتنا متغربين في انحاء كتير من بلاد الله

يعني السعوديه الامارات فرنسا ايطاليا امركيا كندا و غير...

و بالتالي كل واحد ممكن يشارك معانا و يحكي لنا و يعرفنا حاجات ممكن ما نعرفهاش عن بلده ديه

و بالنسبه للتاقلم يا ابو زياد طبعا كلنا بنتاقلم ..لكن ده مالوش علاقه بالحنين لوطننا

و بعدين احنا طول النهار ...ننقد في البلد و الفساد اللي فيها و اللي بينهبوها و يسرقوهها..و (علي راي علاء ولي الدين) ايه كله ضرب ضرب ما فيش شتيمه :o

[أبو زياد]

أختى العزيزة جدا نانو

والله أنا مش شادد حيلى دانا حيلى مهدود من الصيام

ودة أول درس فى الصيام وهوالتدريب على التحكم فى النفس

المهم بكرة كمان يرجعلنا س س بالسلامة و عاللى هيحصل !!

إنتو مكسورين الجناح دانتو قادرين - امال احنا ايه ؟

بلدى حبيبتى جدا - بكاء حادي يلم الناس - بس انتى ماعلقتيش على الحكمة اللى قلتها و هى بالمناسبة اعتقد من أقوال على بن أبى طالب كرم الله وجهه

بس فعلا انا علقت على كذا نقطة و أرجو ان تحددى إطار الموضوع لو أنا مش عارف

الحنين للوطن زى الحنين للأم بس محدش يقدر يعيش على طول فى حضن أمه

وبعدين إحنا بقة بالعكس كله شتيمة مفيش ضرب - اسكندرانية بقة -

إن شاء الله هاحسن المود بتاعى ونتقابل تانى

و لنا عودة

[اسكندرية تانى]

اهلا بيكم جميعا

الحقيقة انا وصلت للمنتدى الجميل دة بالصدفة و الاجمل التواصل الجميل اللى لقيتة هنا بالذات

انا طبيب هنا فى الكويت و باقول للاخت نانو فعلا و لا يوم من ايام جوك يا مصر

فين النسمة الحلوة؟ فين جو الخريف؟

فين اللى الواحد يمشى على بحر اسكندرية و الهوا يملا صدرة و يشم ريحة اليود

على العموم لازم نبطل السادية اللى عندنا و نقعد نجلد نفسنا طول الوقت و نفتكر كل الحاجات اللى تزعلنا و تجيب لنا اكتئاب فى الغربة

لازم نبتسم للحياة و نبص لنص الكباية المليان

الجو فى الكويت روعة و مفيش حر خالص و الجليد فى كل مكان و الرغيف كبيرررررر و مدور

:o :)

انا سعيد باول مشاركة لى معاكم و اسعد بوجود ناس كتيرة حلوة هنا

اتمنى ان نتواصل دايما و فى انتظار مشاركاتكم

[Folana]

السلام عليكم ورحمة الله..........

اسكندرية تانى...بارحب بك..ونورتنا(نورتينا)....كلامك جميل بس لى ملحوظة نونو خالص...جلد الذات وتعذيب النفس واجترار الاحزان...اسمه مازوشية...اما السادية فهى حب تعذيب الغير..والله اعلى واعلم

ولى عودة ... :o

[اسكندرية تانى]

اهلا بيكى يا فلانة

شكرا على الرد بس الحقيقة انا مش متأكد من المعلومة و لكن انا متفائل ان كلامك يطلع صح

و المرات الجاية حابقى اعرض كلامى على حد دارس علم نفس او طبيب نفسى كويس :o:):)

و يا الف اهلا يا الف سهلا

[Folana]

السلام عليكم ورحمة الله ...

اسكندرية تانى...الموضوع مش محتاج تعرض كلامك على حد..احنا هنا مع بعض اسرة واحدة...بنراجع بعض ..ولا يهمك ...ده انا ممكن تطلع (تطلعى) ميت غلطة من كلامى...عادى يعنى ...

عايزة اعرف بس انت اختى العزيزة ولا اخى العزيز علشان لما اجى اتكلم معاك

اهلا بك مرة تانية ونورت المحاورات .... :o

[اسكندرية تانى]

شكرا لاهتمامك و ذوقك

و دة متوقعة من كل الناس اللى هنا

انا طبيب مش طبيبة!!

انا متفائل مش متفائلة!!!

يبقى انا ولد بشنب

و لكى عودة :o:)

تم تعديل 11 نوفمبر 2006 بواسطة اسكندرية تانى

[Folana]

السلام عليكم ورحمة الله...

:o معلش يا دكتور العتب على النظر...ست كبيرة بقى ودايما مش باشوف الكلام كويس..مش قلت لك حتطلع من كلامى ميت غلط.... :)

وبالمناسبة لى عودة دى جملة باهديها لواحد زميلى هنا واخ عزيز ..بيحب يسمعها منى ...هو حيرد لما يشوفها ... :)

[أبو زياد]

الدكتور العزيز .....؟؟؟

السلام عليكم و رحمة الله

اهلا بك ونورتنا و مش قادرين نقوم بالواجب علشان أخونا خضر متخصص الترحيب لسة ماجاش

على العموم إلى ان يحضر أنت فوق رؤوسنا و فى أعيننا

فعلا يا دكتور الرغيف أبيض و سياحى بس فى اسكندرية - فاكر طوابير العيش ؟

كل مابافتكرها بازداد حنين للوطن!!

زى ماقلت الميزة عندنا هى التواصل العائلى الراقى جدا

والمجموعة دى بالذات فى الموضوع دة خليك معانا و مش حتندم بس خللى بالك فيه أخت لنا عندها عود دايما يظهر فى مشاركاتها ياريت لو كنت جراح او أى تخصص مش مشكلة تحاول تشيلهولها

ويكون لك الأجر و الثواب.

والسلام و اهلا بك

( صورة واحد مش هيروح النهاردة !! )

[نانو]

يا اسكندريه تاني

حلو اسمك ..عجبني بجد :)

حضرتك بقه بقالك اد ايه هنا في الكويت...و دكتور في الحكومه و لاقطاع خاص علشان جوزي دكتور هنا و شكلك كده هتطلع زميله :o

و لو جديد احنا في الخدمه يا افندم

عموما انت نورتنا في الكويت و قبله و بعد الكويت انت نورت في المنتدي وسط اهلك و عيلتك التانيه

و لي عوده :)

تصدقي يا فولانه حلوه.... :)

[Folana]

:) :)

اوعى يكون ابو زياد لسه هنا :o

حاكمل معاك بعدين

لى عودة .... :) :)

[اسود وتعالب وارنب]

الو الو الو الو الامارات تناد ي طبعا اللكلام كلة الل يبتقولوه جميل ياسلام علي بلدنا و الحاجات الحلوة بتاعت زمان بس دلوقتي مافي حاجة ببلاش يعني زمان كنا نروح البحر نلعب طول اليوم ونروح البيت ونرجع تاني علي الشاطئ واحنا سايبن شمسيتنا واشايائنا تحتها ونرجع بعد ساعة ساعتين ولا الهوا مافيش اي مشكلة كنا بنات واولاد بنلعب من غير ما واحد يجرا يضايق بنت من البنات برغم اننا لابسين مايوهات وبنلعب راكيت اللعبة الشهيرة الاهالي الاسكندرية الكرام وبعد الغروب نتمشئ علي الكورنيش وناكل كلوكلو وذرة وبرضة مافيش واحد يتجرأ حتي يبص بصة مش اد كده تعالوا بقي النهاردة عاوزة لواء اركان حرب لكل بنت عشان تطماني عليها دة غير الرسوم المبالغ فيها واهمال الشاطئ بالرغم ان زمان الشواطئ انظف كتير من الان

[اسكندرية تانى]

اهلا بيكم كلكم و شكرا على الترحيب الجميل دة

انا شغال فى الحكومة و مش جديد قوى فى الكويت بقالى سنتين هنا

و لللاخ اسود و تعالب و كل الحاجات الحلوة دى بقول لة و لا يوم من ايامك يا اسكندرية!!

و لابوزياد اقول لة للاسف مش جراح كان نفسى اخدمك

و لينا كلنا جماعة انشاء اللة عودة

:ninja: :blink:

[أبو زياد]

يا دكتور حضرتك المذكر و المؤنث ضايع عندك

بعد إذن حضرتك الأخت أسود وتعالب و أرانب

يعنى قصة كبيرة كدة تبدأعاما جديدا من حياتها ونتمنى لها النجاح و التوفيق

إخوتى الأعزاء صباح الخير عليكم جميعا و لى عودة لموضوعنا بس دلوقت !!!

وطننا غالى علينا يا نانو - مصر حتفضل غالية عليا - رغم كل شىء

بلدى و إن ضاقت على عزيزة ........ وأهلى وإن ضنوا على كرام

طبعا مصر أصلنا وأمنا ولكن .... لا أريد أن أقول ولكن

حنينى إليها يقتلنى .......سأقتله

أهدرت دمه لأنه لايريدنى . يبيعنى

تنازلت له عن كل شىء. ولا زال يريدنى

كرهتها لأنها بلدى. ولا أكره فيها .. سوى حنينى إليها..سأقتله

تم تعديل 12 نوفمبر 2006 بواسطة أبو زياد