مصر حلوة وزي الفل..بجد مش تريقة!!!!

[المدهش]

هل مصر بهذا السوء الذي يتحدثون عنه في الصحف المعارضة والمستقلة والفضائيات والمنتديات والمدونات..

إنهم يهللون الآن للتحرش الجنسي في وسط البلد رغم أن الواقعة كلها غير مؤكدة وليس هناك شهود حقيقيون عليها والبنات تمشي كل يوم في شوارع وسط البلد دون أن يتعرض لهم أحد بسوء ..والشباب والبنات آخر روقان والمقاهي مليانة حتى آخر مقعد والشيشة في فم كل شاب وكل فتاة..

إنهم يتحدثون عن الفقر والغلاء وكأن الناس اقتربت من أكل الطوب في مصر ..رغم أن كل محلات الهايبر والسوبر ماركت لا مكان فيها لقدم ولا موضوع لسيارة..السينمات كامل العدد والمطاعم شغالة على ودنه وناس كتير جدا معها فلوس وتنفق ببذخ..المحمول في يد الجميع وهناك طفرة في نوعية الملابس التي يرتديها الناس في مصر..

يعني ايه الكلام ده..يعني الناس المبسوطين في مصر لا يقلون عن عشرة ملايين شخص يعني سبع عدد السكان..

والباقي..حوالي عشرة ملايين كمان مستورين ممن يسمونهم بالطبقة المتوسطة تجار ومدرسين ومهندسين ودكاترة وصحفيين وغيرهم وهؤلاء يرقصون على السلم لا فوق ولا تحت..وهم يشكون لكن يعيشون حياة كريمة ولا غبار عليها..

طيب والباقيين..دول لهم ربنا نقول عشرة ملايين كمان من الطبقة المتوسطة الدنيا، وهؤلاء على وشك السقوط في جب الفقر..عايشين بالجمعيات ويحسون بالاختناق من الارتفاع الجنوني في الاسعار ويعانون في الاعياد وعند دخول المدارس وعند زواج الولاد والبنات..لكن عندهم الحد الأدنى من كل شئ..

دلوقت بقينا 30 مليون..وأضف عشرة ملايين آخرين من الفقراء الصرحاء..يعني هؤلاء الذين يعرفون اللحوم سوى يوم واحد في الشهر ويعتمدون بشكل أساسي على الفول والطعمية والباذنجان والبطاطس في غذائهم ويعيشون في شقق ضيقة معظمها مساكن شعبية بنتها الدولة في الستينات..وأفرادها محبطون ويائسون ومرشحون لدخول عالم الجريمة في أي لحظة..

كويس.. كده 40 مليون ..وماذا عن ال24 مليون الباقين..هؤلاء يا حبيبي يعيشون تحت خط الفقر ويشترون أرجل الفراخ ورؤوس السمك بالكيلو حتى يطبخوها للعيال ويعيشون في العشوائيات ولامكان لهم في دولة جيمي وابوه..يعني هؤلاء هم الذين سقطوا من كل الحسابات ..

لكن هل هذا الوضع غريب على مصر..طبعا لا ..فالطبقية والفجوة البشعة بين الأغنياء والفقراء موجودة منذ سنين طويلة ولا أبالغ اذا قلت من ايام الفراعنة ومصر القديمة..وتتغير فقط الاسماء..

يعني ايه برضه..يعني مصر ليست مصر واحدة ..هناك أكثر من مصر وأكثر من شعب مصري..

[Salwa]

يعنى الصراحة الصراحة ..

.رغم ان كلامك مش غريب وواقعى لكنى فضلت اعادة قراءة ماهو مكتوب مرة ثانية وثالثة ..

ولعلنا نصل الى معرفة اصل الداء ومنذ متى بدأ يتغلغل بهذه الوحشية فى الجسد القوى ولا يتركه ولن يتركه الا حطاما ...

ايوة صح مصر طول عمرها كدة ............بس الفجوة مكانتش بالعمق ده ....اقصد بالعمق المتغلغل للقاع بالشكل المؤلم ده ....والاخلاق مكانتش وصلت لهذا الانحدار ....وبرضه كنا نرى على وجوه الناس فقراءها واغنياءها على ارض مصر لمحة من الحياء ....ولم يكن الغنى يتباهى بما يملك بهذه الصورة وبهذا السفه ..

اعتقد انه من الصعب ان اصف ما اقصد ....وسأحاول ذلك ..

لم يكن اغلب الاغنياء سفهاء ....كما هو الحال الآن ...

بل كان الجميع يتفانى فى تقديم مشاريع للاصلاح والرقى بالبلد ....وكانت توجد جمعيات للبر والتقوى منتشرة بشكل مكثف ...وعلى الاقل كان فيه امن وامان حقيقى ....

اما الفجار .....فكانوا على الاقل يعملوا بمبدأ اذا بليتم فاستتروا ...(( طبعا كان فيه فساد لكن مش بالشكل ده ))

الآن ....يفتخر كل منهم بالكم من فضائحه وكأنه عنترة ...

وانعدم الحياء واصبح التباهى بالبلطجة .....فروسية العصر الحديث فى المحروسة ...

فى وقت من الاوقات كنا بنشوف افلام عن عمال التراحيل ونشوف ازاى عايشين تحت خط الفقر ....كنا بنسمع او نشوف عن سكان العشوائيات وكنا بنسمع عن عزب من الصفيح ...

لكن ؟؟..... برضه كان فيه حماس من ناس اغنياء وناس من متوسطى الحال وحتى من ناس معاها معاها اقل القليل

انهم يساعدوا المحتاج ويوجهوا الآخرين للخير او للصح ....لكن ؟؟ دلوقت حتى اكثر الناس اللى كانت بتوهب وقتها للآخرين اصابهم الاكتئاب وكأنهم بيملوا فى قربة مخرومة ...

بالامس كنت اتابع ريبورتاج عن العدوان الثلاثى ...فى قناة اجنبية ....بالضبط اسمه حقيقة تأميم قناة السويس ودوافع العدوان ....ما لم يذكره التاريخ .

وكان يتحدث سامى شرف....وسمير غانم ...وشيمون بيريز...وكتاب امريكان وكتاب ومسئولين بريطانيين وفرنسيين ....ومقاطع من احاديث لخروشوف وايدن وايزنهاور ودى موليه ....وغيرهم كثيرون ...

كانوا يتحدثون عن العدوان الثلاثى من وجهة نظر كل دولة على حدة ...

اذا حكمنا العقل فممكن نقول العدوان الرباعى .....لو حسبنا اميركا ايضا ...

الجميع بدون اى استثناء ....من كان يكره عبد الناصر ومن كان يحبه ....بدون اى استثناء ...حتى كتاب المقالات فى هذه الحقبة ...

يعترفون ويؤكدون ان ناصر كان بقوته الوطنية وتأثيره فى شعبه وحبه لبلده و....شرفه ...الذى لايستطيع مخلوق ان يطعن فيه ...

جعل مصر جوهرة الشرق الاوسط ...وكان الجميع يخشى دائما هذه القوة الشعبية الوطنية ...

قالوا ان مصر بشعبها فى هذه الفترة كانت قادرة ان ارادت ان تكون فى مصاف الدول الكبرى ...لكن كان لابد من كسر شوكتها ....وكسر شوكة ناصر ...

قالوا ان بامكان الجيوش ان تنتصر على الجيوش ....لكن من الصعب ان ينتصر جيش اى دولة مهما كانت قوية ...على شعب باكمله ..

شعب ناصر كان شعب ثقافة واخلاق ومبادئ .....الا قلة قليلة ..

الابداع الفنى والثقافى والحماسة الوطنية .......

اعترف الجميع ان من شوه تاريخ ناصر .....(( اللى كانوا حواليه )) ...

اعترفوا ان مهمتهم كانت بث الفرقة بين الشعب ودس الجواسيس ...

لا اتذكر اسمه الآن ....لكن تحدث ايضا الضابط الذى تحرك باول باخرة تمر من قناة السويس وهى تحت قيادة المصريين وقال ان المفاجأة كانت ان الكل مترقب ويدعو الله ان ينجح فى المرور ....ونظر على الرصيف المقابل ووجد الرئيس يشجعه ....

اذن.....هذا رئيس يشعر بشعبه ....يشعر بما يحدث ....

لم يسكن القصور ويهدى القلادات الفرعونية لحريم زعماء اليهود وغيرهن ..

.لم تعتلى زوجته منصة وتلقى خطابا بوصفها صاحبة العزبة ...وصاحبة الفضل فى رقى هذا ....الشعب ...

اذن...

شعب ناصر....

غير شعب السادات ...غير شعب مبارك ...

اذن....

من يعطى دفعة قوية وطنية للاصلاح.....هو دائما رب البيت ....لكن ؟؟

اذا كان رب البيت بالدف ضارب ....!!!....فشيمة اهل البيت ( ايه ؟؟ )...الطبل والزمر ...

على فكرة ...

مش شرط تكون ناصرى علشان تفخر بنفسك وبانك مصرى لما تشوف ريبورتاج زى ده....

بس بتقول لنفسك ......وشهد شاهد من اهلهم ...

وللحديث بقية ....

[المدهش]

الاستاذة /سلوى

تحليلك وكلامك أكثر من رائع..عبد الناصر فعلا كان شريف ووطني لكنه أيضا كان طاغية..ودولته كانت دولة بوليسية..وهو الذي أدخل كل أطياف مصر المعتقل..الاخوان مع الشيوعيين مع أي حد له رأي مخالف بحجة أنهم أعداء الثورة..وعبد الناصر كان اشتراكي..على طريقة توزيع الفقر على الناس..يعني حجز الثلاجة الايديال الصغيرة يستغرقك 10 سنوات لتتسلميها وكذلك بوتاجاز المصانع والتليفون تحجزيه ويدخل البيت بعد 15 سنة..والجاز يتم توزيعه بالكوبونات على الطريقة الشيوعية والقماش اما كستور أو دبلان وكل الموظفين ينتظرون ملابس الكساء الشعبي وعمر افندي وهانو،ولذلك الفجوة الطبقية لم تكن كبيرة فعلا بالشكل الذي حدث بعد الانفتاح لان 90% من الناس كنوا فقراء..أما الان فمستوى معيشة الناس أفضل وهم يشكون لان تطلعاتهم زادت..والدنيا تطورت لكن عقول الناس لم تتطور بالشكل الكافي ..لازالت المظهرية والسطحية تعكنن حياة المصريين وتعطلهم وهي السبب في طوابير العنوسة بسبب المغالاة في الشبكة والمهور والفرح وغيرها من الاشياء الشكلية التي نتمسك بها ونركن بها بناتنا وشبابنا حتى كادوا ينفجرون جنسيا..

صدقيني أحوال الناس الآن أفضل مما كانت عليه ايام عبد الناصر..الكل عنده ما كان يسمى زمان بالكماليات الثلاجة والتليفزيون والدش والموبايل وكل متطلبات العصر موجودة في البيوت والناس تأكل وتشرب وتلبس بشكل أفضل فيما عدا النسبة التي تحدثت عنها وتعيش تحت خط الفقر وهي نسبة أقل مما كانت عليه ايام عبد الناصر وبالتأكيد ما قبل الثورة..

أما الأخلاق فهي الآن أفضل أيضا..وهناك شباب وبنات متدينون ومهذبون كثيرون في مصر..لكن القلة المنحرفة صوتها أعلى والعين ترصدها بسرعة..وأعرف شباب كثيرين يساهمون في فعل الخير ..لن أقول من محبي عمرو خالد فقط ..لكن غيرهم كثيرون ومن طبقات مختلفة والانترنت زاد هذه المسألة وساعد عليها..وهناك ظواهر جديدة طيبة على المجتمع المصري مثل حرص السيدات والبنات على الصلاة في المساجد بما فيها صلاة الفجر وخصوصا في رمضان وبعضهن تعتكف في المساجد..

والملابس قارني بينها وبين الستينات ايام الميني جيب والكات..شوفي ليلى رستم كانت بتلبس ايه وشوفي افلام الستينات والسبعينات مسخرة بكل المقاييس ..طبعا هناك انحراف وفساد ومنحرفون ..لكن النسبة لم تتغير..قارني بين شتيمة مبارك وعائلته في الصحف..وبين الحرية في عصر عبد الناصر..لم يكن أحد يجرؤ على انتقاد الزعيم الأب الملهم..أنا معك أن مبارك كان يجب أن يترك الحكم على الأقل من 12 سنة وكان كفاية عليه مدتين لكن عبد الناصر لو كان كتب له الحياة وعاش كان سيظل يحكمنا هو الآخر الى الآن وكذلك السادات ..فهي عادة فرعونية قديمة ونحن لدينا فقط الرئيس الراحل ولا نعرف مسمى الرئيس السابق..

[abo 3ali]

لم استطيع ان امنع نفسى من الكتابه و اتعليق على هذا الموضوع ..خصوصا انه جاب سيره مصر و احوالها . و ما ادراك ماهيه هذه السيره فى نفس مصر مغترب . اعتقد انى شديد الحساسيه تجاه كل مايخصها خصوصا و انا خارجها .

اما بالنسبه للاخ المدهش فتحليلك اكثر من رائع بالنسبه لما يحدث الان و الحقيقه ان تركيبه شعبنا غريبه و تستعصى على الفهم على مدار العصور . دائمى الشكوى من الفقر و مع ذلك يعتبرون الكماليات و المحمول و الهايفه من الاساسيات . ينفقون على الكلام فى الهواء و المنشطات الجنسيه و المخدارات مايكفى لسداد ديون البلد ..

المشكله هى اى شعب عباره عن تلات طبقات ( بس من غير استك ) غنيه و متوسطه و فقيره و الطبقه المتوسطه اكثرهم اهميه و اللى فى رايى هى اللى بتشيل البلد و هى اكثرهم ثقافه و تمسكا بالقيم و التقاليد غير الاغنياء الذين يتطلعون للمزيد و بغض النظر عن المصدر ( و هنا لا اقصد كل الاغنياء او التعميم ) و الطبقه الفقيره التى تتوقع منها ان تنشا كل الجرائم بدافع الحقد و البطاله و اشياء اخرى ( و هنا ايضا لا اعمم )

ماريد ان اقوله انه منذ سنوات و هذه الطبقه ( اللى بتعمل التوازن ) اخذه فى الانقراض السريع و بحيث سوف يصبح الشعب اغنياء و فقراء فقط و هنا الخطر..

و لكن و العجيب ان هذا الشعب لم يبدى اى امتعاض من سنين طويله على مايحدث . لم يثور ضد غلاء الاسعاء الفاحش الذى يكتويهم يوما بعد يوم ..لم يسعوا الى تغير الحاكم منذ اكثر من ربع قرن . زى مايكون ماشين بالمثل الشعبى . اصبر على جار السوء ..و اعتقد انهم لن يفعلوا ...

و لكن هل يستحق هذا الشعب .. انا و انت و هى و هما و كلنا .. ان يفعل بنا هذا ؟؟ اعتقد نعم لاننا ابدا لما نسعى للتغير بايدينا بل قل نحن مشاركين فيما يحدث

اسعار بتغلى . شغال مش مشكله . بطاله .. عادى مش لوحدنا . انفلات و تسيب اخلاقى .. و ايه يعنى .. كل واحد يقول يايلا نفسى و انا حاعمل ايه يعنى انا اللى حاغير الكون ..و ... و.. و ..

لا اكذبك القول انى بين نارين . نار الغربه و نار العوده الى الوطن و لكن الاخبار الوارده لا تبشر باى خير . اصبحت بلدنا طارده و كانها مش بلدنا .. و كمان مش ناقصك ترجع و شكلها مش عاوزاك ..طيب هل نربى اولادنا فى مجتمعات غريبه و ننزل مصر نفرجهم على الهرم و ابو الهول و نقولهم هى دى مصر يا عبله و نرجع كاننا سياح .... و لا نرجع و منعرفش نعييش فى بلدنا اللى مش عاوزنا اصلا و لو قدرت تعيش حتعيش لحد امتى من غير ما تتفرم و تنزل للقاع ..

بس الغريب و العجيب اننا حنعيش و نموت بنحبها و مينفعش منحبهاش او نكرها او نسخط عليها لانها كالام بالنسبه لنا بل و اكثر ..و لكن الى متى و الى اين نسير

مصر زيها زى اى بلد فى العالم فيها الحلو و فيها الوحش .. بس برضه بنعشقها حتى لو كلها جيمى و كيمو و سوزى . بس هما ادامهم اد ايه ؟ اكيد اقل من اللى فات ... و احنا معانا المستقبل

ان واثق ان حيحصل حاجه كبيره . ايه هى معرفش بس لازم يحصل حاجه لاعاده الامور الى نصابها و نرجع تانى مصر بتاعت زمان الجميله . اى زمان مش مهم .. زمن ناصر . زمن السادات . زمن الفراعنه . زمن محمد على .. اى زمن .. بس المهم اكيد حترجع و لازم حترجع ... لانى انا كماد اكيد فى يوم من الايام حارجع .. عارف ليه لانى عايز البلد ديه تكون احسن بلد فى الدنيا و عاوز ولادى يتربوا فيها و يكبروا و يبقوا صالحين لبلدهم .

للحديث بقيه طالما فى العمر بقيه ..

[المدهش]

أبو غالي الجميل

كلامك مس قلبي ..لأنني أشعر تماما بك وأتفهم شعورك بالغربة..فقد جربتها لكني عدت الى مصر رغم كل التحذيرات من حوالي ثلاثة اشهر..واكتشفت كما سبق وكتبت في هذا الموضوع ان مصر مش حاجة واحدة أو كتلة صماء انها دول كثيرة وشعوب مختلفة تعيش تحت سقف دولة واحدة..يمكنك أن تعود وتعيش حياة كريمة لكن بشرط يكون معك فلوس أو لديك عمل يدر دخلا جيدا لأن الاسعار بالفعل أصبحت لا تطاق..لكن الشعب مغلوب على أمره وجهاز أمن الدولة هو الذي يحكم مصر..وعساكر الأمن المركزي أصبح عددهم يقترب من عدد الجيش ..ومع ذلك فأنا أتساءل مثلك لماذا ثاروا في 18 و19 يناير 77 بعد رفع الاسعار قروش معدودة ولا يثورون الآن..سؤال يحتاج الى إجابة؟!!!!!!

[abo 3ali]

اخى المدهش الجميل

مبروك قرار العوده الجرى و انا انشالله باحضرله رغم الحرب اللى مستنياينى لما انزل . بس انا مقتنع بحاجه رب هنا رب هناك و هو الرازاق .

عوده لموضوعك الشيق .. سيدى الفاضل اكاد اجزم انى اعرف عن مصر و انا خارجها اضعاف اضعاف مايعلمه اللى عايشين جواها . عارف ليه لانى كما قلت شديد الحساسيه تجاه كل او اى كلمه تكتب عنها فانا ابدا يومى بقراءه كل الجرائد و المجلات و المنتديات فى جميع المواضيع سياسيه او اقتصاديه او رياضيه و حتى الحواداث و القضايا و الفضائح . و ارى على قولك انى احنا اصبحنا دوله بوليسيه و دوله حمايه الحاكم و النظام فقط و اصبحت االلا مبالاه و الاناماليه و يا عم خلينا نربى العيال هى الشعار السائد الان .. هل علمت يا سيدى ان الشوارع اصبحت مزبله كبيره بعد اضافه تسعه جنيه على فاتوره الكهرباء و رفض الناس للدفع فحولوا شوارعهم الى مقلب زباله يرد عليهم فى الاخر بالامراض ..هل علمت ان تكلفه عمل صينيه بطاطس اورديحى بصل و بطاطس و طماطم بخمسه عشر جنيها . هل علمت و هل علمت ... و السوال الى اين

و الاجابه . الا ان يفضى الله امرا كان مفعولا . ليهلك من هلك عن بينه . و يحيى من حيا عن بينه

العيب فينا فى خمسه و سبعين مليون****يحكمهم بضعه اشخاص و لو قالهم **** بس حيدفنهم و لكنهم لم يفعلوا و لن يفعلوا ..

الشعب اللى ثار فى السبعنيات على قرش و تعرفيه مش قادر يعملها و هو كل يو بيتروق

********

و خلينا ماشين جوه الحيط مش جنبها ..

هل سمعت يا سيدى النكته بتاعه الريئيس اللى عاوز يقرف *****

معانا و معاك ربنا و هو الوحيد اللى قادر يحلها من عندنا لان احنا فقدنا القدره على التفكير و بالتالى فقدنا كل شى

تحياتى

--------------------

سيدي الفاضل

ممنوع منعا باتا توجيه إهانة من أي نوع للشعب المصري

الإدارة

تم تعديل 15 نوفمبر 2006 بواسطة صبح