( مصـــر) التي رأيت .. !!

[مصرية الهوى]

السلام عليكم ورحمة الله وبركاته ....

كل سنة وانتم طيبين رغم إنها متأخرة ...

ازيكم ؟ عاملين ايه ؟ .. وحشتوووووني جدا جدا ...

يا سلام يا اولاد ده الجواز طلع جميل بشكل .. مش كنتوا تقولولي من زمان :lol: :D :ninja:

نيجي للمهم بقى أنا رجعت من أم الدنيا الأربعاء اللي فات .. قعدنا فيها اسبوعين تقريبا ..

وأخيررررررررا تحقق حلمي وشفت أم الدنيا ...

عندي تعليق كثير هأبقى أحكيلكم بعدين وعلى حسب أوقات فراغ ربة المنزل :)

حبيت بس دلوقتي اسلم عليكم ...

وللحديث بقية إن شاء الله ..

[Folana]

السلام عليكم ورحمة الله ........

جيم جيم...يعنى ج.ج...اى جى جى..بنت بنت بنتىىى ..ياه ه ده انت وحشانى بشكل وحش جدا...حمدلله على السلامة ياعروسة....

بقى الجواز حلو؟؟ عجايب...حقة بطلوا ده واسمعوا ده :ninja: :)

انت بتتكلمى عن ايه يا ماما ؟...ولا بلاش ...

وكنتى كمان فى مصر؟..ده كلام طب مش كنت تقولى لى علشان استقبلك واعزمك عندى عزومة تستاهلك وارفع رأسك قدام المستر؟...واهو انا اولى من الغريب ..بدل ما كنت تدفعى بره ..اهو كان يبقى زيتنا فى دقيقنا ونشوف الريالات المتغمسة فى البترول عاملة ازاى :D

الف مبروك وحمدلله على سلاماتك..يالا بقى احكى لنا هه...وبعدين... :P

عملت ايه فى مصر وشوفتى ايه ورحتى فين وكلتى منين ..احكى لنا كل حاجة احسن دى مصر وحشتنا جوى ياولالالاد...(وش واحدة مااتحركتش من مصر اصلا):lol:

[shahd]

جيجييييييييييييييييييي نورتي ياعرووووووووووووسة :D

يا الف الف الف مرحب ياقمر

[khedr]

جي جي

حمد الله علي السلامه

يا.....

مدام جي جي

[مصري في الكويت]

أتمني أني اشوفك بعد 4 سنين علشان تقولي لنا رأيك في الزواج

وبعد 8 سنين علشان تقولي لنا رأيك في الحياة

وبعد 16 سنة علشان تقولنا يا تري ايهما الافضل الانتحار ولا الزواج

[نانو]

يا نهار ابيض....العروسه بجلاله قدرها وصلت المحاورات

و حشتينا اوييييييييييييييييييييييييييييييييييييييييييييييييييي

يا عروسه و نورتينا ...خلاص مافيش غياب تاني بقه

قولي للاستاذ...المحاورات دول عيلتي اللي خلفوني و نسيوني :D

و اهوه يعرف برضه قيمتنا من الاول

اه يا اختشي ....و جوزك علي ما تربيه و جوزك برضه علي ما تعوديه... :)

مستنين حكاويكي الجميله عن ام الدنيا

و علي راي فولانه المتغربه من سنين....مصر وحشانه جوي جوي يا بووووووووووووووووووووي :D

تم تعديل 14 نوفمبر 2006 بواسطة نانو

[se_ Elsyed]

بييييب بييب بييب

العروسة جت .. جت

يالله بقى خلصي شوية المواعين اللي في إيدك وارجعي احكي لنا

[MZohairy]

اوعي تكوني نسيتي تجيبيلي سبحه و سجادة الصلا اللي وصيتك عليهم B)

[وليد صفوت]

جى جىىىىىىىىىىىى

يا سلاااااااااام يا ولاااااااااااد... شوفتوا جي جى اتغيرت ازاى -_-

فييييييييييييييين ايام الضفيرة ام زعرورة ...... اهى بقت عروسة اهى ....اييييييييييييييييييه c'est la vie :o

مستنيين تعليقاتك و رأيك فى مصر ...... :P

[سهيلة]

اولا الف الف الف مبروك لحبيبة قلبى جيجى

ويا رب يسعدك دايما

ومستنية اسمع رايك ف الجواز يمكن تشجعينى واعملها

ثانيا لية عتاب عليكى صغير

ازاى تنزلى مصر وموش تقوليلى يا جيجى بجد كان نفسى اشوفك واعمل اى واجب معاكى

انتى عارفة انتى غالية عندى ازاى

يا ترى اتفسحتى كويس

وشوفتى اية

واية تعليقاتك على كل حاجة شوفتيها وما شوفتيهاش

جيجى بسرعة شوية

اوعى الجواز ياخدك مننااااااااااااااااااااااااااااااااااااااااااا

[النسر المصري]

جي جي......جي جي بنت أسد قريش حلت علينا يارقوووم

والله عشنا وشوفناك من تاني يابنت ام جي جي

وانت عامله ايه بقى ياعروسة المحاورات...انجزي بقى وخلصي عشان نعرف اخبارك...واضح انك معاكي شوال كصص من اللي هم!!

حمدالله على سلامتك ...اااقصدي الف مبروك

[مريوم المصرية]

جيجي حبيبتي ألف مبروك،ربنا يوفقك :angry2:

يللا بسرعة عاوزة أسمع تعليقاتك،ونقدك ،وكل حاجة،

وهل قابلتي ناس مصريين؟وكان ايه انطباعك؟

عشان أنا الصراحة لما بروح مصر ما بشوفش مصريين خالص،معرفش بيروحو فين؟ :)

تم تعديل 23 نوفمبر 2006 بواسطة مريوم المصرية

[محمد عبدالعزيز]

هى مكسوفة تقول اللى شافته فى مصر ولا إيه؟

[مريوم المصرية]

فين؟؟

تم تعديل 6 ديسمبر 2006 بواسطة مريوم المصرية

[مصرية الهوى]

معليش يا جماعة أعذرووووني جدا على التأخير .. ربة منزل وفي بدايات الحياة وقد قالت العرب قديماً : ويل لي من المطلع !!!

عندي كلام كتييييير هأقوله من غير ترتيب ...

بصوا يا جماعة أنا هأخد راحتي في الكلام .. معليش محدش يزعل مني .. أنتو عارفين إني بأحب مصر والمصريين.. وعين الرضا عن كل عيب كليلة ... وحبيتها أكتر وأكتر لما قضيت شهر العسل وأيامه الجميلة فيها .. وإن شاء الله هأنزل مصر تاني وتالت وعاشر ...

هأتكلم عن كل حاجة شفتها سواء حلوة أو وحشة .. واهو برضه تشوفوا بلدكم بعيون السياح .. وخصوصا سياح زيي .. دي مصر نورت لما نزلتها ...

أول حاجه باختصار ..

مصر جميلة ولكن ...

احنا كانت رحلتنا يوم الجمعة 27 اكتوبر على مصر للطيران عشان الخطوط السعودية كانت زحمة والحجز اتقفل بدري .. وأنا بصراحة كنت مبسوطة عايزه اشوف الخطوط المصرية .. مستوى خدماتهم عادي جدا ... ما علينا ..

وصلنا مصر على وقت المغرب .. يا سلام .. أنا مكنتش مصدقة إني في أم الدنيا اللي اتمنيت كتير إني أشوفها .. نزلنا في المطار القديم بصراحة اتفاجأت من مستواه .. عادي جدا جدا .. على اعتبار أن مصر بلد سياحي والمطار بيعتبر واجهة للبلد .. بس بيقولوا الصالات الجديدة حلوة .. اول ما دخلنا (موقف تكرر كتير عمري ما شفته في السعودية) الضابط بيقولنا : نورتوا مصر .. نورت يا باشا نورت يا برنس .. وبيهمس لجوزي حاجه عشان الولاد .. ضابط وبيشحت موقف غريب ;) ...

بعد ما خرجنا من المطار رحنا على الفندق بعد انتظار طويل ومفاصلة في السعر على اعتبار ان احنا خليجين وعندنا بير بترول في جنينة البيت فالسعر يبقى في العلالي .. (لاحظتها كتير دي بطريقة احيانا بتخلي الواحد عايز يطفش من البلد) رحنا الفندق سكنا في هيلتون رمسيس .. كويس وجميل والمنظر من البلكونة فظيييييع .. النيل ده .. فعلا من انهار الجنة .. بس بلاش نشوفوه في النهار في الليل كفاية .. عارفين طبعا ليه ؟؟!! ..

ياخسارة بجد بأقولها من كل قلبي يا خسارة يا أم الدنيا.... مظلومة والله ..

من أول يوم في مصر اتصدمت في تلات حاجات :

معليش يا جماعة اعذروني هأتكلم عن النص الفاضي اول حاجه .. النص المليان نأجله شويه ..

الحاجات اللي اتصدمت فيها : الزبالة والحجاب والمرور ..

أنا كتير اسمع إن مصر فيها زبالة ( معليش يا جماعة اعذروني عالكلمة دي ) بس مكنتش متصورة إنها بالمستوى ده .. فعلا صعقت من مستوى النظافة .. حرام والله .. الزبالة مرمية في كل مكان .. أنا كنت فاكرة إنه الزبالة في الاحياء الشعبية والعشوائيات .. انصدمت حتى في ميدان التحرير اشهر ميادين القاهرة وواجهة مصر فيه زبالة .. كذا مرة نروح بالليل نقعد في الميدان .. بصراحة باتغاظ جدا .. حرام ليه كده .. دي بلدكم يا جماعة .. وكلها سياحة ومليانة سياح .. ليه تشوهوا جمال مصر بالزبالة .. وفي الاهرامات كمان الارض كلها زبالة .. أكتر الأماكن الأثرية شهرة في العالم .. زبالة .. خسارة والله ...

بالإضافة إلى الاماكن الشعبية زي كرداسة وصفط اللبن .. الترع هناك يا ساتر .. ده غير زبالة النيل .. منظر يحرق القلب ..

وكمان مرة نزلنا نتمشى في حي بولاق الملاصق للاوتيل طبعا المكان ده اول مكان نزوره في مصر .. يا سلام . أنا كنت مبسوطة جدا .. أنا بصراحة عايزه اشوف مصر دي .. مصر الاحياء الشعبية والحارات البيئة .. والله العظيم زي ما اكون بتفرج على مسلسل .. الناس اللي بيشيشوا عالقهاوي .. وبتاع العيش اللي راكب عجل وبيكلكس والمكوجي يااااااااه مكنتش بصراحة متخيلة إن الحاجات دي موجودة لسه .. زي ما أكون اتنقلت من عصر إلى عصر آخر .. كانت حاجه جميلة .. بس يا خسارة الزبالة بتشوه المنظر .. والشوارع كلها طين وميه .. يعني ننتقل بالنط .. فعلا كنت فاكره ان الحاجات دي اتمحت خالص ...

الحاجه التانية اللي انصدمت منها : الحجاب ..

أغلب المحجبات غطاء رأس وبس .. أنا مش بأقول كلهم .. بس يعني عدد لا بأس به .. محزق وملزق وبناطيل ضيقة جدا .. ولابسة حجاب .. أنا مش عارفة مين اللي اعطى الناس فكرة إن الحجاب غطاء للرأس وبس .. فعلا بيبقى منظرها بيكسف أنا وأنا بنت بأتكسف أشوفها .. تقاسيم جسمها باينة بطريقة مرعبة .. والشباب يا سلام .. هات يا بصبصة ... فيه بنات ماشاء الله بيحس الواحد فعلا إنها محجبة عن اقتناع تام وبيحس بنور الإيمان في وشها .. لبس واسع وساتر وشيك كمان .. الحجاب والشياكة لا تتعارض .. حتى مرة واحنا في مول سيتي ستارز دخلت الحمامات .. وكانت فيه بنت مش محجبة ولبسها يا ساتر قاعدة بتتكلم مع عاملة النظافة بعد ما البنت مشيت عاملة النظافة بتتكلم معايا وتسألني أنا من فين .. المهم قعدنا ندردش سوا .. وتكلمت معاها عن حجاب البنات فقالتلي : عشان شغلهم لازم تلبس كده عشان الزباين .. قلتلها يا حاجه عمر ما كان الرزق الحلال بيجي بالطريقة دي وكمان هي مش مانيكان بيتعرض عليه الحاجات واحنا بنتكلم دخلت بنت محجبة برضه من البائعات وقعدت تتكلم معانا قالت على الفكرة البنت اللي من شويه مسيحية وكمان احنا محجبين اهوه عاجب والا مش عاجب ؟! .. بطريقة " يمنون عليك أن أسلموا " قلتلها : يا حبيبتي الحجاب ده عشان ربنا مش عشان حد تاني ....

والمفاجأة التانية كنا في مركب في النيل وكانت فيه عروس ومعاها باين كده قريباتها محجبات .. شويه وقاموا يرقصوا .. وهز يا وز .. لا تعليق الصراحة :) !!!!!!!!!!!!!!!!

الحاجة التالتة اللي انصدمت فيها : المرور .. ياساتر .. طول ما احنا ماشيين بأحط ايدي على قلبي وبأدعي يارب نرجع لبلدنا بخير ... ايه ده ..

ناس جاية يمين وناس شمال وإشارات المرور دي أعتقد بايظة .. وفيه عسكري .. معقولة عسكري بينظم المرور منظر قديم جدا .. أكيد أي حد عايش في السعودية وشايف النظام عندنا هيعرف أنا اتصدمت ليه .. ناهيك عن الزحمة اللامعقولة في القاهرة ..

وإلى لقاء آخر ..

ايوى جايه يا خويا .. الله :sad:

[Diab]

يادي الكسوف :sad:

كان لازم يعني تروحي االقاهرة بصي ما عندكم شرم الشيخ ولا الغردقة ولامارينا

الله يجازي اللي كان السبب

[Folana]

ايوى جايه يا خويا .. الله :sad:

السلام عليكم ورحمة الله .....

أخويا؟؟؟.............أخوكى؟؟؟؟؟؟؟؟؟....أخوهااااا!!!!!!!!!!! ;) -_- ....

المهم....

حمدلله على السلامة يا جيجى ..كل دى مواعين يتغسيلها.....شوفى يا حبيبتى ويا قرة عينى ويا ابنة ..ابنة ابنة ابنتى ..بيقولوا عندنا فى الامثال ..

" هلا هلا على الجد ..والجد هلا هلا عليه..."

" اللى يتكسف من بنت خالته مايشتريش منها فراخ "

"انا ادعى على ولدى وأكره اللى يقول امين "....وهنا مربط الفرس يا جيجى...

تعالى معايا كده نراجع زيارتك لمصر...انت متأكدة ان دى كانت مصر؟....

بصى ياقمرة ..موضوع المطار ده مش حاناقشك فيه ..ممكن يكون عندك شىء من الحق على اساس ان دى اول زيارة واحتمال كان فى خيالك مثلا انك حتلاقى نفرتيتى واقفة تستقبل القادمين من الخارج.....

لكن موضوع "ظابط وبيشحت "..انا وقفت عندها شوية...ليه بقى؟..لانك ماعندكش فكرة ان ظباط الميناء الجوى دول بينقوهم بالواحد...وبيكونوا اخر تنَاكة وألاطة....يعنى احنا هنا كمصريين لنا تحفظات على تصرفات بعض رجال الشرطة..لكن لا اظن ان ظابط فى المطار يوطى على البرنس ويقوله شوف لنا حاجة للعيال :)...

بس يمكن لانك مش عارفة الرتب بتاعة الظباط فمقدرتيش تفرقى بين الظابط والعسكرى مثلا...انا برضه لما باروح السعودية واشوف الظباط الحقيقة كلهم شبه واحد..ومش باعرف الرتب وبيهيالى انهم كلهم عساكر...

يعنى لو عسكرى ..اقولك اه ممكن يعملها ..رجل غلبان وبيحاول يسترزق من وجهة نظره يعنى...لكن برضه انا باسافر كتير ..وعمرى مالاحظت اى ظابط ولا عسكرى بيوطى على برنسات الخليج يطلب صدقة ...بس جايز برضه....

بالنسبة للتاكسى اللى اقلكم للفندق...ده على فكرة عادى جدا كلنا بنعانى من هذا الموضوع ..واحنا اهل البلد .وماعندناش بير ميه حتى.مش علشان انتم ملوك البترول ولا حاجة:)..بس فعلا دى معاك حق فيها ..ولكنها مشكلة عامة ..بس واضح انك ماكنتيش جاية تبع شركة سياحة والا كانوا ارسلوا عربة خاصة لانتظاركم فى المطار ونقلكم الى الفندق...

المهم انك تكونى فاصلتى زى ما كنا موصينيك..

نجى بقى للفندق...انت نزلتى فى هيلتون رمسيس..وانا على فكرة فى ايام كتير كنت باقضى فيه الويك اند مع زوجى واولادى بدل السفر يعنى...هو يحدفنا فى اى اوتيل ويتابع شغله برضه...:) سياسة برضه..

المهم..هيلتون رمسيس ده المنظر منه رائع جدا..اولا انت بتشوفى منطقة واسعة من النيل...وفى وشك على طول "برج القاهرة... وعلى مدد الشوف بترى النيل الساحر والبواخر السياحية ...وكوبرى اكتوبر....وبتشوفى برضه المتحف المصرى وجزء من ميدان التحرير....وباقى الفنادق المطلة على النيل...

الجزء ده من النيل يا جيجى غاية فى الجمال والنظافة ليلا ونهارا ..وخصوصا نهارا واشعة الشمس تنعكس على صفحته وتتلألأ كانها حبات الماس...

ميدان تحرير فيه زبالة؟....انا ماشفتش بصراحة فى ميدان التحرير زبالة...انت رحتى فين بالظبط...؟ ده يمكن من انضف الميادين فى القاهرة على فكرة...

انت ايه اللى وداكى بولاق يا جيجى؟ ده انا ما اعرفش اروحها ..فين بولاق دى؟..على العموم المناطق الشعبية انا معاك فى انها فعلا محتاجة اعادة نظر....بس ده متهيالى فى اماكن كتير...

مرة كنت فى المدينة المنورة ...والصحبة اللى معانا اصروا يجيبوا لحمة راس ..وقالوا انها بتتكمر وحاجات كده ..ورحنا ندور على اى حد بيبعها ودخلنا حوارى وازقة ..انا ممتهيالى اصحاب البلد نفسها ما يعرفوهاش..وكانت مليانة بالزنوج..هم تقريبا بيمثلوا معظم سكانها..انا استغربت وقلت ايه ده معقولة فيه فى السعودية حتت كده؟...

لكن طبعا اللى يدور يلاقى فى اى ىمكان فى العالم....

موضوع الحجاب ...برضه عندك حق والله لان الحجاب بدأ ياخد اشكال غريبة جدا..لكن مش قاعدة طبعا...بس لى عتب عليك...انك استقيتى معلوماتك من الدادة اللى بتنضف الحمامات !..معقولة!...طبعا حتسمعك اللى انت عايزة تسمعيه..زائد مشاعر الحقد الطبقى اللى عندها..اى واحدة حتقولك عليها اصلها بتعمل كده علشان الشغل..شغل ايه هو كباريه؟..ده محل ملابس او خلافه...لكن تعرفى فعلا سيتى ستارز ده ملىء بالمتناقضات ..والملاحظ ايضا ان اهل الخليج لما بيجيوا مصر بيخلعوا العبايات ..ويلبسوا على احدث خطوط الموضة ...تعرفى انا حضرنى موقف دلوقت افتكرته..وكنت فى الطائرة فى طريقى الى جدة وكان قاعد جنبى بنتين اخر شياكة البنطلونات المرشوشة دى والبادى والشعر الغجرى المجنون..ولما قربنا من مطار جدة قاموا ودخلوا الحمام ورجعوا لابسين عبايات..وكنت اول مرة على فكرة اعرف ان الحجاب مش مفروض فى جدة...

لكن فعلا سيتى ستارز ده كأنك دخلتى كوكب تانى...بس ماقلتيش ايه رأيك فيه...؟

الزحام ده بقى مش حاقدر اتكلم معاك فيه..عندك حق وابصم بالمية كمان ..وفوضى المرور ايضا......

ياترى رحتى خان الخليلى؟.....وياترى ركبتى الكريتَة فى الهرم واخدوا منك كام مئة جنية؟...:) ماتحكى لى لنا عن المواقف دى خلينا نضحك شوية..

بس تعرفى..ده انتقام الرب لانك مارضيتش تنزلى عندى وتنفعينى :P

عايزين نسمع الحاجات الحلوة بقى ....كفانا ياقلب.............:)

على العموم حمدلله على سلامتك يا قمر ويارب ايامك كلها عسل

تيتا الحاجة فولانة....

[The Professor]

مصر جميلة ولكن ...

احنا كانت رحلتنا يوم الجمعة 27 اكتوبر على مصر للطيران عشان الخطوط السعودية كانت زحمة والحجز اتقفل بدري .. وأنا بصراحة كنت مبسوطة عايزه اشوف الخطوط المصرية .. مستوى خدماتهم عادي جدا ... ما علينا ..

وصلنا مصر على وقت المغرب .. يا سلام .. أنا مكنتش مصدقة إني في أم الدنيا اللي اتمنيت كتير إني أشوفها .. نزلنا في المطار القديم بصراحة اتفاجأت من مستواه .. عادي جدا جدا .. على اعتبار أن مصر بلد سياحي والمطار بيعتبر واجهة للبلد .. بس بيقولوا الصالات الجديدة حلوة .. اول ما دخلنا (موقف تكرر كتير عمري ما شفته في السعودية) الضابط بيقولنا : نورتوا مصر .. نورت يا باشا نورت يا برنس .. وبيهمس لجوزي حاجه عشان الولاد .. ضابط وبيشحت موقف غريب :sad: ...

ليه تعليق بسيط وده والله إحقاقا للحق ليس إلا . انا بصفتي مسافر دائم وبتردد على مطار القاهرة كتير يمكن مرتين أو اربع مرات في السنة على مدار سنين كتيرة , عمري وفي حياتي ما شفت ظابط عمل كده انما دي تصرفات العساكر والعمال الموجودين في المطار فبلاش نظلم الناس . انا باشوفهم محترمين في تصرفاتهم وجادين في عملهم دي واحدة والتانية بقى هي إني برضه سافرت على خطوط جوية مختلفة عربية وأوروبية ومنها الخطوط السعودية واحب اقولك انه كويس إنك ماسفرتيش على الخطوط السعودية لأن المصرية افضل بكتير وهذا ليس تحيزا.

ومصر والقاهرة جميلة كده زي ما هي وانا متأكد إنك حبيتيها زي ماهي ونورتي مصر وانشاء الله تزوريها مرات تانية وتستمتعي بكل شيء فيها.

تحيااااااااااااااااااااااااااااااااااااااااااااااااااااااتي

[وليد صفوت]

يادى الكسوف :sad: ... كان لازم تنزل على القاهرة على طول -_-

انتى زورتى القاهرة يا جيجى ؟

دى مش العاصمة ;) دى المدينة الثانية...

زورتى الأسكندرية ؟

طب اخبار النايل كروز ايه ؟

كملى يا جيجى و ربنا يستر :)