كيف تواجه حرب الرجوع للوطن ؟

[se_ Elsyed]

مش فاهم كلامك يابو زياد !!!!!!!

أنا شخصياً لم أُطرد من مصر او بمعنى أدق لم يكُن هناك سبب قوي دفعني للغُربة غير إني شركتنا في مصر هي فرع للشركة الأم هنا .. وعندما توفرت لي حياة كريمة هنا ومعي أسرتي فأنا مُستمر إلى أن يقضي الله أمراً كان مفعولاً

كما أنني والحمد لله لا أشعر بأي مشاكل في مصر من ناحية حرية التعبير أو الظروف الإقتصادية .. مش عشان أنا مسنود أو إني من الطبقة البرجوازية

بالعكس .. ده عشان أنا إنسان واقعي ولا أتطلع إلى ما في يد غيري .. وفكر الكماليات لا يشغلني كثيراً .. يعني أنا لو مموجود في مصر زي بقيت السبعين مليون كنت أكيد سأتكيف على الوضع وبلاها يا سيدي التصييف في الساحل الشمالي كل سنة .. او إن كل واحد من عيالي يشيل موبيل أخر موديل أو يبقى عندي سيارة حديثة أو ولادي يدرسوا في مدرسة إنترناشونال ..

الفرق بيننا وبين أهالينا زمان هو إن طموحاتهم كانت على قدر إمكانياتهم وبالتالي لم تكن هناك الشكوى اليومية الموجودة الآن واللي إحنا حطينا أنفسنا فيها ..

والله يا عم لو تحقق عُنصر الرضا والقناعة لمشاكلنا كلها تتحل

آيوه في مشاكل إقتصادية .. زيينا زي أي دولة حتى دول الخليج البترولية الآن تُعاني من بطالة وشباب كثير مرمي في الشارع من غير شغل

أما عن المعاملة والحرية الفكرية ... فاعتقد لا مجال للمقارنة بين مصر وبين جيراننا في الدول العربية ...

( مصر الأفضل طبعاً في أشياء كثيرة )

فالحمد لله لم تعُد مشكلة تكميم الأفواة والإعتقالات وزوار الفجر موجودة بذلك الزخم الذي كان موجوداً في السابق أو حتى مقارنة بباقي الدول العربية

فلا يُمكن أن يُشكك أحد في مناخ الحرية الذي تتمتع به مصر الأن - غصبٍ عن عين الحكومة - لإننا في عصر مُنفتح والعجلة أساساً دارت والحومة حتى وإن تعسفت في بعض الأحيان فمازال هناك هامش كبير من الحرية وإنزل بص بصه على كمية الرجايد اللي موجودة واللي بتلعن أبو خاش أكبر راس في الدولة ...

وبالتالي اللي عايز أقوله إن مصر مثلها مثل أي دولة ... ليست المدينة الفاضلة .. وكما أن بها مميزات .. فإن لديها عيوب ..

الناس زييهم زي بقى خلق الله ..لا يملُون من الشكوى حتى لو أمتلكوا كنوز الأرض

ثقافة الزحام أثرت علينا

الفضائيات أخترقت حياتنا

عصر الكماليات أصبح واقع واصبح محيط بنا وينادينا ويغرينا للإنغماس فيه وعلينا مقاومته او الغنجراف مع تياره وبالتالي مانرجعش نشتكي .

يا سلام على الحياة اللي لونها بامبي والدُنيا الجميلة اللي إنت مصورها لنا يا سي سين سين وكإن مصر بقت اليونايتد إستيتس ...

يا جماعة جزء من مشكلتنا برضوا هو إننا لم نعُد نرضى بالفتات علي جميع المستويات .. فبعد سنين من الكبت أيام الزعيم المُلهم والزعيم المؤمن جاء الأخ القائد الطيار محمد حسني آل مبارك ومشينا معاه في الثمانينات والتسعيننات على نفس النهج السابق .. خوف ورعب ومشي جنب الحيط وإوعى تفتح بؤلك يا أخي أحين راسك تطير ... لكن مع إنتشار ثورة التكنولوجيا في جميع المجالات منذب بداية القرن الواحد والعشرين ... الرظوف بقت أقوى من الحاكم .. والناس فهمت ووعيت وبقى أقل واحد في الأمكانيات المادية بيملك العالم عند أطراف أصابعه عن طريق النت والقنوات الفضائية وبالتالي الحرية لم تعُد هبه يمنحها لنا الحاكم وبالتالي زادت مطالبنا ومشاكلنا وتنوعت وأصبحنا نطالب بالحرية كاملة ولا نرضى بما يهبه لنا الحاكم ده في الجانب السياسي والفكري أما عن الجانب الإقتصادي فما بقيناش نقدر نعيش لا مؤخذه يعني - زي حمار الفكهاني - اللي شايل الفاكهة على ضهره لكنه محروم منها يعني برضوا بقت في إغراءات لا حد لها من ناحية الموضه والطفرة التكنولوجيه .. إلخ اللي أصابتنا بالهوس والجنون والكل بقى في سباق مع الزمن وداير في طاحونة الحياة الإقتصادية

-------------------

بنت ديرتنا ناش هانم

أنا هاختار السبب الأخير رقم 4

وهو إن سببت غربتي ... لا شيء ..

هي كده وزي ما قولت أنا كنت رايح أشتري طابع بوسطه من 10 سنين وروحت وما رجعتش ... وفي دول الخليج التي تنطق بالعربية وتقريباً نفس عادتنا وتقاليدنا لا أشعر بالغُربة .. كما أن هذا الشعور يتنامى لدي لإن مع عائلتي ولإنني اتواصل مع أهلي في مصر بشكل مستمر ..

يعني تقدري تقولي إني في مصر وشغال في مكان أنا مرتاح فيه .. يبقى ليه أغامر وأروح مكان تاني بدون سبب ...

[محمد عبدالعزيز]

حاشا لله أن أتهمك يا أبو زياد أو أتهم غيرك, أنا قلت كل واحد أدرى بظروفه وبأحواله من إى حد تانى, أرجو ألا يعتقد أحد أننى أتهمه هو شخصياً بأى شئ, كل الحكاية اننى لى تجربة مع السفر وكونت وجهة نظر منها, بالفعل قد تحتمل الصواب أو الخطأ, وهذا لأنها وجهة نظر, وأنا مقتنع بها ولا أجبر أحداً غيرى أن يقتنع بها.

أخى إن الله أمرنا بالبحث عن الرزق - و جعل ذلك غريزة فى الطيور و المخلوقات

وكذلك أمرنا بالهجرة من المكان الذى فيه اضطهاد دينى أو فكرى

إلى مكان آخر يصلح به ديننا

نعم الله أمرنا بذلك ولا تستغرب - وربما يستغرب بعض الزملاء

إننى أقول الحقيقة أمام الله و هوشاهد على ذلك

أنا لا أندهش من هذا الكلام, ولكن هناك شرط للهجرة كما أوضحت ولكننى أختلف معك فى أن يكون الاضطهاد هو الشرط, الشرط من وجهة نظرى هو أن تكون مستضعف وليس مضطهداً, وإلا فأى مختلف فى الرأى أو الفكر قد يكون مضطهدا ولكنه يدافع عن فكره ورأيه, أما المستضعف فهو الذى لا يستطيع فعل أى شئ إلا أن يهاجر, أو أن تكون هذه الهجرة فى حق المضطهد حتى يقوى نفسه ثم يعود ليدافع الظالمين الفاسدين.

لنا فى رسول الله قدوة حسنة, هو لم يترك مكة ﻷنه كان مضطهداً ولكن ليكون دولة قوية فى المدينة ثم تنتشر فى شتى بقاع الأرض تحارب الظلم والفساد وتنشر العدل واﻹسلام.

أخى العزيز, لن تكون الهجرة هى الحل الإسلامى الوحيد لمواجهة الإضطهاد, لأننا لدينا اﻷمر بالمعروف والنهى عن المنكر, وبدرجات حسب الاستطاعة كما تعلم ويعلم الجميع, فإذا استنفذنا كل هذه الدرجات ولم نستطع فعل شئ, فمرحباً بالهجرة, ولكننا لم نحاول ولم نستعمل هذه الدرجات, ونؤثر السلامة المزيفة أو الوقتية, هذا رأيى.

أما الهجرة للبحث عن الرزق فقد تحدث عنها الأستاذ أبو عمر بالكثير مما أؤمن به, وأقول لك أيضاً أنها حل من ضمن الحلول وليست الحل الوحيد بمعنى أن الله يرشدنا لحل أو طريق للبحث عن الرزق وليس أمراً, وأنا فى رأيى أنها دعوة للعمل والاجتهاد والسعى أكثر منها دعوة للهجرة فى حد ذاتها, أما إذا كانت أمراً على سبيل الوجوب فالكثير منا يعتبر عاصياً ﻷمر من أوامر الله ﻷننا لم نهاجر للبحث عن الرزق, وأنا لا أعتقد هذا.

كم من المغتربين والذين يريدون الهجرة يتفقون مع هذه الشروط واﻵراء؟ أعتقد أن اﻷغلبية لا تتفق.

[أبو زياد]

لأ الموضوع كدة عايز قعدة بكرة ان شاء الله

الظاهر كله سن سنانه .... بس دة كويس جدا

أخى س س حالتك خااااااصة جدا ونحن هنا نتكلم على وجه العموم

أنت شفت البلوتوث الأخير اللى فيه واحد بينضرب من ظابط شرطة؟!

إنت نفسك مش اعترضت على موت المعتمرين كإن هما بس اللى بيموتوا كل يوم وقيمتهم فى بلدهم لا شىء؟

إحنا مطرودين من مصر ببساطة عشان مالناش قيمة

ودة مالوش دعوة بالكماليات و الطموحات

دة ليه دعوة بإن الإنسان يعيش حياة كريمة بس ؟ دى كماليات ؟!!

مش عارف أنا ليه حاسس إنك بتستفزنى أو بتعاملنى كإنى ماشفتش مشاركاتك أو مشاركات تانية فى هذا المنتدى أو أساسا مش من مصر !!

بس معلش لينا قعدة برضه فى جميع الأحوال

أخى الغالى محمد عبد العزيز - برضة محتاجين قعدة انا لا أشرع يا أخى وعلمى بالشرع لا يزيد عن علمك

انا قصدت بس إن البحث عن الرزق غريزة فى الطيور و المخلوقات

إخوتى تعاملوا مع مقاصدى ولا تتعاملوا مع عباراتى فهى تخون أحيانا

[se_ Elsyed]

لأ

مش عارف أنا ليه حاسس إنك بتستفزنى أو بتعاملنى كإنى ماشفتش مشاركاتك أو مشاركات تانية فى هذا المنتدى أو أساسا مش من مصر !!

طب ليه كده ..

ده أنا باحبك يابو زياد

وبعدين إيه اللي وصل لك الإحساس ده ؟

----------

أنت شفت البلوتوث الأخير اللى فيه واحد بينضرب من ظابط شرطة؟!

إنت نفسك مش اعترضت على موت المعتمرين كإن هما بس اللى بيموتوا كل يوم وقيمتهم فى بلدهم لا شىء؟

إحنا مطرودين من مصر ببساطة عشان مالناش قيمة

طبعاص شفته وشفت أكتر من كده كمان

وده بيحصل من زمان قوي وخصوصاً من أيام ثورة الكاكي الغير مبروكة

لكن زي ما قلت لك ... الناس صحيت وبقت تقول لأ للظلم

ولكن ليس بالقول بس يُزال الظلم

وليس من أول محاولة تتحق الحرية والديمقراطية

ومش عشان في ناس معتمرين ماتوا نتيجة الإهمال أو حوادث الطرق زادت .. نقوم نسيب البلد ونهج

[abaomar]

السلام عليكم

اخى سى السيد (ابو عمر )

الناس لسه ما صحيتش اللى اتغير هو سياسه النظام فبعد سياسه التكميم و التجفيف من المنبع

قالوا هما تعبانين فى الكلمتين سيبوهم يقولوهم و ينفسوا عن نفسهم لكن سياسه البطش الان اشد مما هى عليه من قبل و اعداد المعتقلين و التعذيب لم تصبح سرا .

اخى ابو عمر بالتاكيد مصر بلدنا فيها حاجات حلوه كتير اهمها اهلنا و اخواتنا و اصدقائنا لكن لما بنبعد بنشوف الصوره بشكل مختلف .

انت قلت ان ماخفى كان اعظم وهذا هو الاهم انه خفى و اللى عاوزه يدور عليه اما و للاسف ما يحدث فى مصر الان و ما رايته فى اخر اجازه من التدهور الشديد فى مستوى الشارع يجعلك تصاب بالرعب مما هو ات .

عزيزى هل تصدق اننى الان اعيش لاربى اولادى حتى و لو لم استطع الادخار مثل زمان .

اعتقد انك لو جربت تخش قسم شرطه و تعرضت للاهانه بدون مبرر و لو بشكل بسيط كان رايك سيختلف و هذا ما تعرضت له شخصيا .

[nash]

أنا شخصيا..وأعوذ بالله من كلمه أنا..موضوع الشرطه وتكميم الأفواة مش حاصل أبدا لي..لإن والدي رحمه الله عليه..كان مركزة في سلك البوليس من المراكز العاليه جدا...والتخصص كان مباحث..ورب الكعبه يوم وفاته خرج الجميع من سائق التاكسي إلي مندوب رياسه الجمهوريه ليمشي في الجنازة..

والكل بيحبه ..الله يرحمه..لكن أنا عارفه اللي بيحصل في أقسام البوليس,,وكم البهدله...الموجوده..ومن ناس ممكن تظنهم أنهم من أخيار المجتمع..لكن تحت الطاوله هم أناس اخرين تماما..طيب عارفين ليه الكباتن مابيداهموش البيوت إلا الفجر..لإنهم عارفين أن المطلوب لديهم لن يسمح لزوجته..بفتح الباب وهو موجود..فيأخذوة علي طول....هذا غيض من فيض..

لكن وبرضه بالنسبه لي الحمدلله الإمكانيات الماديه جيده قبل السفر..وأفضل بعد السفر..

لكن الأن والمغترب فقط هو الذي ينظر لمصر نظرة مختلفه عن الموجود فيها..زمان لم يكن يهمنا الشوارع المكسرة والمطبات اللي بتصطاد العربيه..ولا حتي لون مياه الصنبور الأسود..

كانت أشياء متفاعلين معاها..وعايشينها..لأ وبنحبها كمان..الأن مصر بالنسبه لي مثل العجوزة اللي كانت جميله في شبابها..مصر أصبحت بلد البلطجه واللي ليه ضهر هوة اللي واكلها..غير كده لأ..

ومع ذلك وصيتي لزوجي ..إذا مت أندفن في مصر..لإنها فعلا حته من قلبي ..من ولدي.. من الموال..

الأن أستطيع أن أنزل مصر في أي وقت أريد..ولكني خائفه منها ..خائفه علي أولادي..علي مستقبلهم..رغم أن هذا في علم الغيب لكن ..لنأخذ بالأسباب..قبل الإقدام علي هذه الخطوة..

[nora]

والله ده موضوع شائك جدا ويارب اقدر افيد لان انا عانين من سنتين هذه المشكله واعدت سنه احارب نفسي والناس واهلي علشان اوصل لقرار انا مش ندمانه عليه الا وهو اني اعيش في مصر وخلي بالك انا مقلتش ارجع مصر لاني اصلا عمري ما عشت فيها ..... انا مصر كانت بالنسبه ليا عبارة عن مسرح سينما اهرامات وبحر واسكندريه والقاهرة وشويه متاحف بابا كان بيودهلنا زمان ....وكنت في الفترة دي انا صغيرة ومكنتش عرفه بابا ليه بيوديني المتحف بس لما كبرت عرفت انه كان عايز يعوض جوانا العلم الي مش بندرسه عن تاريخ مصر كان بيحاول يغرز جوا قلوبنا حب مصر وفعلا حبناها كلنا من قلبنا ....طولت عليكم ادخل باه في الموضوع لما اتخرجت اشتغلت بالكويت بس لما جيت اتجوز الصراحه انا وجوزي اشتركنا في اختيار مصر لعدة اسباب :-

1- انا وجوزي عشنا الغربه بمرارها وشفنا اتهاض (مش متاكده من الاسبلنج) الطلبه الي كانو معانا في المدرسه واد ايه نفسيتنا اتاثرت فمحبش ان عيالي تعاني زينا

2- قلنا هنسافر هنعد سنه اتنين قول عشرة طب لما نرجع هيجيب شغل منين وحط في بالك خبرت الخليج صفر على الشمال هنا يبقى انسى انه يقدر يشتغل او اشتغل في قطاع خاص والحكومه سيبك منها

3- اسافر ليه ؟؟؟ واتغرب ليه وعيش طول عمري في شنطه عمري محيت اني مستقره عمري محسيت ان ليا بيت ولا حتى صحاب لان كل حاجه بسبها فقررنا منخليش عيلنا تعاني الي عانيناه

4- عندنا شقه وفرشناها مش ضروري العربيه بكرة تيجي هو لازم كله مرة وحده نتعب شويه مفيش مشكله

5- هو مش فيه ناس عيشه في مصر ولا الي في مصر دول مش بشر زينا زيهم نعيش

دي الاسباب الي فكراها وقسما بالله انا كان عندي شغل في الكويت ومرتبي كان ممتاز وجبت لجوزي شغل في نفس الشركه وكان عندي عربيه وكل حاجة متوفره لكن مشيت وسبتها وطبعا انا اتهمت بالجنون والسفه من العيله والكل يكلمني والحمد لله انا عيشه ومش ناقصني حاجه معانا الضروريات مش كفايه لمتي انا وجوزي في بيت ...

مش عرفه ليه الناس مصورة ان الحياه في مصر جحيم معلش حط في بالك ان الغربه ليها تمنها برضوا صحتك مشاعرك وعمرك كفايه انك لوحدك كفايه انه يجي العيد تلاقي نفسك لوحدك مش تلاقي عيالك حوليك اول حاجه فكر فيها عيالك والحاجه التنيه مراتك انتم ليه كلكم نستوها ولا هي مش بشر انا لما جوزي بيبات برة يوم بحس اني هعيط من المسؤوليه والعيال الي مجنناني اه صحيح بتزيد مسؤوليتي بوجوده بس كفايه حسه في الشقه (الناس هتاخد فكرة انك زوجه مثاليه لمي الدور)

بس فياريت تحط في بالك الكلام ده وصدقني والله في شغل اه صحيح تطلع روحك لحد متلاقيه او توصله وتطلع روحك اكتر علشان تحافظ على مكانك بس مفيش حاجه سهل وصدقني ربنا هيرزقك هنا او هناك بس عيالك محتجينك اكتر مليون مرة من الفلوس هو ده دورك الاكبر ايه فيدة الفلوس في غياب الرقابه والحنان والامان......

واولا واخيرا استخير ربنا

تم تعديل 19 نوفمبر 2006 بواسطة nora

[أبو زياد]

أخى الحبيب س س

ربنا يديم المودة والمحبة اللى الله أعلم بيها

أنا كمان باحبك

وأدينى أهو بارد عليك وأنا لسة بافتح عينيا عالصبح وقبل ما أقرا مشاركات الإخوة الثانية

أخى الحبيب , ممكن ألخص كلامك فى العبارة التالية :

ومش عشان في ناس معتمرين ماتوا نتيجة الإهمال أو حوادث الطرق زادت .. نقوم نسيب البلد ونهج

لأ يا أبو عمر الناس دول وغيرهم واللى اتعذبوا واتهانوا ياريت كان نتيجة الإهمال كنا قلنا نصلح زى ما بنقول

لكن السبب الوحيد فى نظرى هو :

أن الإنسان المصرى العادى ليس له قيمة فى بلده

ودة فى نظرى سبب قوى جدا لأنى أدور على بلد لى فيها قيمة حتى لو كنت فيها مواطن ثانى

وسوف أعود للأسباب الأخرى مع أخى .محمد عبد العزيز

أنا قلت لك يا أبو السيد ( لا تأخذ عباراتى لأنها تخون أحيانا ولكن خذ فقط ما أعنيه )

عشان كدة لو فيه كلمة زعلتك - أى كلمة - أرجو أن تتجاهلها كأنها لم تكن ولو حبيت هاحذفها خالص

[se_ Elsyed]

ما تصلوا عالنبي يا جدعان

هو أنا لازم أدخل قسم شرطة واتعلق من رجلي عشان أعرف مصر على حقيقتها ؟

بالله عليكو من السبعين مليون اللي عايشين في مصر أو نضيق الحلقة شويه مننا جميعاً اللي موجودين دلوقت مين إحتك بالشرطة وضايقوه من الباب للطاق

وأكررها مره تاني أنا لا أبويا لواء ولا جوز خالتي عميد متقاعد

لكن أنا إنسان أعرف حقوقي وواجباتي وأتكلم مع التخي .. بفضل الله ... وطالما ما بعملش حاجه غلط يبقى هاخاف من شرطة ولا من سُلطه ليه ؟

[Tafshan]

الموضوع اسمه " ازاي ترجع " مش "اوعى ترجع " :unsure:

انا برضو مغترب و لا افكر في الرجوع و السبب ليس في مصر بل في الغربه نفسها : انا لم اسدد فاتورة الغربه بعد .. :rolleyes:

الغربه لها ثمن .. فمن من المغتربين صرف هذا الثمن ؟؟

العمر الذى يهدر في الغربه يجب ان يكون بفائده . .. و هذا لا يحدث ..

في نظرى ان اي مغترب قضى خارج مصر مده تزيد عن ثلاث سنوات يجب ان يعلم ان الرجوع الى مصر سيكون صعب لانه باختصار سيخوض تجربة الغربه مره اخرى داخل بلده بكل ما بها من خسائر و احباطات بل و بنفس المخاطر : ربما لا يحتمل الغربه الجديده في وطنه ..

اما عن توقيت الرجوع فلا اعرفه ..

حاولت ان اعيش تحت هذا الضغط ... ان تصبح حياتى "ترانزيت" متوقف فيها جميع عناصر الحياة من اجل هدف "اسمى " و هو الرجوع بالثروة و الخ من الارهاصات التى سافرت من اجلها و النتيجه كانت الفشل في التأقلم مع الغربه و تضيق غير مبرر على نفسي و عائلتى ..

انا حالياً اعيش هنا كما المهاجر اذهب الى مصر بغرض الاجازة و الاستجمام .. و لم يعد "التحويش" و الخ هدف على الاطلاق .. لانى باختصار فقدت اي طموح في مصر .. الحاله من سيئ الى اسوء و لم اعد اثق في قدراتى على التأقلم فيها .. و اعلل ذلك بفشلى في التأقلم فيها و نجاحى هنا في الغربه .. طبعاً انا ما بقتش زويل .. لكن بقيت انسان عادى لديه حد ادنى من الادوات لجعل حياته تسير بشكل متوازن ... و انا سعيد بذلك ..

اما عن من يعيش في مصر و استطاع فك طلاسمها فهنيئاً له .. و لن افكر فى مزاحمته اياها مطلقاً ... فان استحالت حياتى هنا سأبحث عن غربه اخرى و لن تكون مصر .. اما العوده الى الوطن فستكون عند التقاعد ... او ربما في صندوق .. و لا تدرى نفساً بأى ارض تموت ..

[abo 3ali]

اعدت قراءه التعليقات اكثر من مره و بتانى شديد و اسمحوا لى ان اعلق

اولا لاتتخيلوا كم اسعاده التى شعرت بها عند قراءه التعليقات لاننا جميعا لم نر بعض اطلاقا و ليس بيننا مصالح مشتركه و انما هو النصيحه و تبادل الخبرات لوجه الله تعالى و عندما هممت بطلب نصيحه او مشوره بحثا عن كلمه بين السطور كان هذا لهدف اضاءه مااظلم فى جوانبى و لم اراه و تاكيد على مافكر فيه و هو بالقطع يحتمل الصواب و الخطا

جلست مع نفسى اكثر من مره احاول ان استشف منها قرار نهائى اكون به مرتاح البال و قادر على المواجهه فلم استطع .. حتى جئت اليوم و قراءت الردود الدافئه النابضه بخلاصه اراء اناسا ارهم على قدر كبير من المسولئيه و الاحترام و الخبرات فاستبشرت خيرا

استخرت الله سبحانه و تعالى و من الواضح انه لم يحن الوقت بعد للعوده طبقا للحسابات الماديه و العقليه .. احاول الان ان تكون فتره غربتى اقل مايمكن .. بحثت عن عمل فى مصر من هنا ووجدته و الحمد لله .. حددت الوقت فى الصيف القادم لتكون اخر شهورى مع الغربه و لعلى اجد فى هذه الشهور مايجعل الفتره اقصر و ليس اطول عن طريق العمل بجد و اجتهاد لاخر لحظه و التركيز فى شغلى و الانشغال بذكر الله و القراءه و ممارسه الرياضه و الانشغال باحدى هواياتى القديمه . اعتبرت نفسى فى سجن مفتوح غير مقيد للحريه فى الغربه و على ان استفيد من تلك التجربه بقدر الامكان ..او بالاصح ان فى جيش تانى و لكنه مختلف

احاول التغلب على عاطفتى قدر الامكان لتحقيق التوازن النفسى ..و تحكيم العقل الذى يجب ان يغلب فى مثل تلك الظروف

بالنسبه لاولادى فانا اتمنى ان اكون معهم و لكنى واثق ان زوجتى و من حولها يقومون بكل ماهو مطلوب لكى لا يحسوا بغيابى .. و عندما اعود و كلها اشهر قليله حلفت ان لا اعود الى الغربه مهما كلفنى الثمن . فبلدى اولا و اولادى ثانيا اولى بى رغم مايعتريها من ظروف و تقلبات و لكنى واثق انها ستعود يوما كما كانت و حتى و ان لما تعد و انا اشك فنحن اولى بها لكى ننقل الى اولادنا كل مفردات الخير و الجمال و الانتماء للارض

لذا و الا ان يقضى الله امرا كان مفعولا حابتدى اعد الايام لحد مارجع زى ماكنا بنعمل فى الجيش و نقول ( ميه و عشرين يوم يا جيش . ميه و تسعاتشر يوم يا جيش ) لذا حابتدى اعد و اقول

تمانيه شهور يا غربه

و اخيرا كلمه من القلب انا سعيد جدا بكل الردود و المناقشات التى احتواها هذا الموضوع و اشكر كل اللى قال كلمه من قلبه او اللى قال نصيحيه او راى و جزاكم الله خير الجزاء

[محمد عبدالعزيز]

ربنا يوفقك يا أخ أبو على وإن شاء الله تتحقق كل أمنياتك

إن شاء الله اﻷيام تمر بسرعة وترجع تشوف أولادك وأسرتك, بس أهم حاجة فعلاً إنك تستغل الوقت صح, دى أحسن حاجة ممكن تعلمها فعلاً وماتندمش عليها

[عادل أبوزيد]

موضوع في غاية الأهمية و أعتقد أن السؤال يدور و يتردد كثيرا من المصريين في الغربة

ما سبق كان إستهلالا لابد منه

أميل شخصيا إن ثمن الغربة غالي جدا و إن لم يكن واضحا للعيان ، و مازال السؤال مطروحا