البداية ( قصة حقيقية)

[Diab]

"أخيرا" كانت تلك أخر كلمة قلتها بعد يوم شاق من العمل ، أخذت أنظر إلي الساعة فإذا بها الرابعة و النصف، "حسنا" هكذا أخذت أردد و أنا أهييء نفسي للقائه

أخذت أفكر و أنا في طريقي للمكان المنشود ، أنها أول مرة سأراه فيها ، كل محادثاتنا كانت عبرالإنترنت هنا في المحاورات .

عندما لمحت أسمه بدأت أقلب في مواضيعة شأن كل ما أفعله مع الأعضاء ، "ما أجملهم " هكذا قلت بعد أن تصفحت مشاركاته ومواضيعه تلك التي تشبه حبات اللؤلؤ كأنها عقد فريد . مرة خلف الأخري صرت من متابعي مشاركاته الدائمين و ما أكثرهم . راسلته فأجابني بكل ود و ترحاب

تحادثنا طلويلا علي الهاتف . فدعوته للقاء قريب وهو ما تأخر قليلا لإنشغاله بالعمل وأنا أيضا .

أنتبهت علي صوت سائق التاكسي " وصلنا "

فنزلت من التاكسي متوجها للمكان منتظرا أياه

جاء بعد هينه. أوقف سيارته و توجه نحو مرحبا بإبتسامة جميلة

تبادلنا عبارات التحية وركبت في سيارته صوبنا نحو هذا المطعم الهاديء الذي أقترح به علي

دلفنا إلي المطعم و طلبنا ما سنأكله

بدأنا نتحدث كثير عن كل شيء خطر علي بالنا مصر .. المحاورات ... العائلة .. العمل ...كل شيء

معه تشعر أنك في بلدك أخوتك " دفيء المشاعر الأصيلة ترفرف حول المكان "

لما نشعر بالوقت إلا و الشمس تلملم أشعتها المنثورة معلنة الرحيل .. إفترقنا علي أمل بلقاء قريب

صديقي الجديد

أرجو أن تقبلني صديقا لك

أضف لي من خبرتك ما يزيدني عمر علي عمري

أسمعني من جعبتك موسيقي أجمل ما سمعت

أخرا وليس أخيرا

شكرا

يا مودست

أرجو أن تكون تلك بداية

لصداقة بلا نهاية

تم تعديل 19 نوفمبر 2006 بواسطة Diab

[نانو]

الله عليك يا دياب

ما اجمل احساسك الرائع و الراقي....

ما اجمل ان تجد انسان تثق به ...و تحبه و تراه قدوه لك

ما اجمل ان تصادف هذا الانسان بمحض الصدفه عبر هذا الملتقي الجميل المحاورات

ما اجمل الصداقه التي تبدا بالعقل و لا يفرضها المكان

ما اجمل الصداقه التي تنميها العاطفه و يغذيها الاعجاب بالمضمون و ليس بالقالب

و اعتقد انه ما اطول عمر هذه الصداقه باذن الله

و ما اجمل الصداقه مع اخ جميل زي مودست...الذي لم ياتي الي هذا لبيت الا بكل ما هو جميل....او كما وصفتها انت باللؤلؤ

الله يديم عليكم المحبه..و علي جميع اهلنا في المحاورات...و يجمعنا علي خير دائما

[أبو زياد]

أحسن ما فعلت أخى العزيز

هو اختيار إسم الموضوع

البداية

و أحسن شىء و من نعم هذه الدنيا الصديق

أيأل الله ان يبارك لكما فى صداقتكما و ان يجعل اجتماعكما مرحوما و تفرقكما من بعده معصوما

[صبح]

أدام الله صداقتكم وأخوتكم فيه

وأظلكم بظله يوم القيامة

ونحن معكم

آمين

مودست من أرقى الناس خلقا وأنقاهم سريرة وأفضلهم وأرقهم إحساسا

خدونيمعاكم في الشلة :blink:

[nash]

ماشاءالله

والله شيء رائع..أن تبدأ قصه صداقه علي الإنترنت..وفضائه الرحب..لتتحقق علي أرض الواقع

إن شاء الله تبقي صداقه قويه ...وبدايه لمرحله جديده...ربي يوفقكم لما فيه الخير..

[النسر المصري]

معلش يادياب سامحني الكلام اللي انت كاتبه ده مكانه مش هنا :angry: :angry:

مكانه في صفحة الأدب والشعر....في صفحة لآليء أدبيه...نجوم مضيئه من الأدب العربي :)

بعد اذن سعادتك يا دياب يا صديقي...وبعد اذن موديست باشا موسيقار المحاورات وملك الروقان....وبعد اذن الإداره الغاليه

نقل الموضوع لمكانه القيم والحقيقي

يسلم فمك يادياب...وسلمت أناملك

أن ما كتبته تحفة فنيه تفخر بها في صفحات الأدب العربي

تحياتي ليكم يا أصدقائي

[nancy]

دياب

انت فعلا كسبت صديق حقيقى

محمود من الناس المحترمة جدا والمتفاعلة جدا مع اصدقائها

[se_ Elsyed]

أنتبهت علي صوت سائق التاكسي " وصلنا "

فنزلت من التاكسي متوجها للمكان منتظرا أياه

يعني بصريح العبارة عايز حق فاتورة التاكسي من موديست ... صح ولا أنا غلطان ؟ :angry:

وإن جيتو للحق .. ماهو موديست برضوا غلطان

يعني عارف إن الراجل غلبان ومقضيها تاكاسي وأتوبيسات يقوم يسيبو في ميعاد زي ده ياخد ليموزين مش أقل من 15 ريال بدل ما يروح يجيبو بعربيته ؟

عامة حبينا نهدي النفوس ونُشارك في تلك الملحمة العاطفية

[الرافعي]

على الرغم من تقصيري الشديد في المشاركة هذه الأيام، إلا أنني أردت التواجد خصيصاً لأعبر عن رغبتين أكيدتين

الأولى .. أشكرك بشدة يا دياب على رقتك وحرفيتك العالية التي عودتنا عليها سواءً في كتاباتك الساخرة أو الجادة .. أنت رجل متميز

والثانية ... أنا متغاظ منك بشدة :angry:

لأنك سبقتني وعملت شيء أنا فعلاً في شدة الحاجة والرغبة في عمله، وهو رؤية هذا الرجل، فلا تتخيلوا كم أحب هذا الرجل وأقدره، وأرجو أن يأتي ذلك اليوم قريباً وأراه، بس مش هاروح بتاكسي :)

(البركة في الحافلة أم 5 ريال ) :angry:

محمود ... أحبك في الله

تم تعديل 20 نوفمبر 2006 بواسطة الرافعي

[صبح]

لأنك سبقتني وعملت شيء أنا فعلاً في شدة الحاجة والرغبة في عمله، وهو رؤية هذا الرجل، فلا تتخيلوا كم أحب هذا الرجل وأقدره، وأرجو أن يأتي ذلك اليوم قريباً وأراه، بس مش هاروح بتاكسي :angry:

(البركة في الحافلة أم 5 ريال ) :angry:

محمود ... أحبك في الله

أنا كده تهت منكم

ممكن كل واحد يقول بالظبط هوا في أنهي بلد

أنا كنت فاكر إن محمود مع س س في السعودية

ودياب مع الرافعي في الإمارات

؟؟

[nancy]

شوف يا صبح

الرافعى فى دبى

س س فى السعودية بس فى الرياض

مودست ودياب فى السعودية بس فى جده

واحسن حل بقى ان الكل يتقابل فى القاهرة فى الاجازة لان الكتير من المحاورين بينزلوا مصر فى الصيف

واى اساله يا صبح

[الرافعي]

شوف يا صبح

الرافعى فى دبى

س س فى السعودية بس فى الرياض

مودست ودياب فى السعودية بس فى جده

واحسن حل بقى ان الكل يتقابل فى القاهرة فى الاجازة لان الكتير من المحاورين بينزلوا مصر فى الصيف

واى اساله يا صبح

عم الشيخ صبح

زي ما قالت لك الأخت نانسي .. العبد لله في دبي .. بس أنا قعدت في جدة 3 سنوات ، فموضوع الحافلة ده هزار مع اللي موجودين في السعودية لأنها وسيلة نقل تشبه الميكروباص كده .. بس ظروفها عجيبة شوية ..

وقصدي يا سيدي إننا ممكن نتقابل أثناء عمرة أو في مصر .. أو في بطن الزير وكلمة السر ... سن الفيل على رأي شقيقي هادي ...

وبعدين يا أخي ما انت عارف ... أهل الخطوة ما تقفش قدامهم حدود :angry:

[إبن مصر]

موديست من أجمل وأرجل الشخصيات التى كان لى شرف التعرف عليها ومقابلتها هنا فى مصر.

واذا كتبت ساعات وساعات عن هذا الرجل وادبه الجم وحياءه المحمود فلن أوفيه حقه ولا يسعنى الا ما قاله عمنا الرافعى ..

انى احبه فى الله

[Folana]

السلام عليكم ورحمة الله...

الاول عايزة اقول للرافعى حمدلله على السلامة وياريت ماتحرمناش من وجودك ومداخلاتك...نورتنا

اما كل ما قيل عن موديست ..بصراحة هو يستاهل اكتر من كده...ده اخويا بالتبنى على فكرة..انا قررت اتأخاه..(زى اتبناه كده)

ولى عودة :angry:

[الرافعي]

السلام عليكم ورحمة الله...

الاول عايزة اقول للرافعى حمدلله على السلامة وياريت ماتحرمناش من وجودك ومداخلاتك...نورتنا

اما كل ما قيل عن موديست ..بصراحة هو يستاهل اكتر من كده...ده اخويا بالتبنى على فكرة..انا قررت اتأخاه..(زى اتبناه كده)

ولى عودة :angry:

ربنا يرفع قدرك يا أخت فولانة إنتي وأخي الحبيب أحمد محمود دايماً بتجبروا بخاطر المساكين ومنهم العبد لله

والله أنا ما استاهلش كرمكم الزائد ده ...

بس إيه رأيكم ... أنا عجبتني جداً

دلفنا إلي المطعم و طلبنا ما سنأكله .. وخاصةً

دلفنا

يا سلام يا دياب .... يا سلام يا محمود باشا

دلفنا

دلفنا

دلفنا

إن شاء الله يكون فيه نصيب ويجتمع كل من التقى هنا بمن أحبه محبة الأخ والصديق وربط بينهم رباط الأخوة الخالية من المصلحة والشوائب ودنايا (الدنيا)

وعقبالنا يا عم موديست لما (ندلف) قريباً إن شاء الله :angry:

[واحد تاني]

والثانية ... أنا متغاظ منك بشدة :angry:

لأنك سبقتني وعملت شيء أنا فعلاً في شدة الحاجة والرغبة في عمله، وهو رؤية هذا الرجل، فلا تتخيلوا كم أحب هذا الرجل وأقدره، وأرجو أن يأتي ذلك اليوم قريباً وأراه، بس مش هاروح بتاكسي :)

طيب تصدق بالله يا رافعي بيه ياخويا ...

ده اللى جه فى بالي اول ما قريت اللى كاتبة الاستاذ دياب ...

موديست ...

يا موديست ...

زي ما قالك الرافعي كده ... :angry:

محمود ... أحبك في الله

[Diab]

ما اجمل ان تصادف هذا الانسان بمحض الصدفه عبر هذا الملتقي الجميل المحاورات

ما اجمل الصداقه التي تبدا بالعقل و لا يفرضها المكان

ما اجمل الصداقه التي تنميها العاطفه و يغذيها الاعجاب بالمضمون و ليس بالقالب

و اعتقد انه ما اطول عمر هذه الصداقه باذن الله

كلامك حلو قوي يا نانو والله وخصوصا تاني جملة :)

هو اختيار إسم الموضوع

البداية

و أحسن شىء و من نعم هذه الدنيا الصديق

أنا كتبت الموضوع بعد ساعتين من نهاية اللقاء وطول الطريق الأسم ده هو اللي في بالي عموما شكرا جزيلا يا أبو زياد

مودست من أرقى الناس خلقا وأنقاهم سريرة وأفضلهم وأرقهم إحساسا

خدوني معاكم في الشلة

أنا حسيت بده فعلا يا صبح عموما الإنضمام للشلة دي إجرائاته طويل شوية يعني تروح مكتب العمل ومكتب التنسيق ومكتب الصحة و الضرايب والجمعية الزراعية............. وبعد كده طلبك مرفوض :P

ماشاءالله

والله شيء رائع..أن تبدأ قصه صداقه علي الإنترنت..وفضائه الرحب..لتتحقق علي أرض الواقع

إن شاء الله تبقي صداقه قويه ...وبدايه لمرحله جديده...ربي يوفقكم لما فيه الخير

متشكر قوي علي كلامك الرقيق ده ، :wub:

معلش يادياب سامحني الكلام اللي انت كاتبه ده مكانه مش هنا

مكانه في صفحة الأدب والشعر....في صفحة لآليء أدبيه...نجوم مضيئه من الأدب العربي

بعد اذن سعادتك يا دياب يا صديقي...وبعد اذن موديست باشا موسيقار المحاورات وملك الروقان....وبعد اذن الإداره الغاليه

نقل الموضوع لمكانه القيم والحقيقي

النسر المصري أهلا أهلا أخيرا حنيت علينا يا راجل يا طيب ، thanks alot علي الكلام الهايل ده ماهو أنا دلوقت بقيت عميد الأدب العربي فرع الهرم :D

دياب

انت فعلا كسبت صديق حقيقى

محمود من الناس المحترمة جدا والمتفاعلة جدا مع اصدقائها

ثكرا ثكرا يا نانثي ، كنا في سيرتك أمبارح ، بالخير طبعا كنت بسأل علي الأعضاء اللي هنا في السعودية وجات سيرتك

يعني بصريح العبارة عايز حق فاتورة التاكسي من موديست ... صح ولا أنا غلطان ؟

وإن جيتو للحق .. ماهو موديست برضوا غلطان

يعني عارف إن الراجل غلبان ومقضيها تاكاسي وأتوبيسات يقوم يسيبو في ميعاد زي ده ياخد ليموزين مش أقل من 15 ريال بدل ما يروح يجيبو بعربيته ؟

عامة حبينا نهدي النفوس ونُشارك في تلك الملحمة العاطفية

أهلا يا تعابني :) تاكسي أيه الي أنت جاي تقول عليه. أنت عارف هو خد مني أده أيه

هو أنت كده جاي تهدي النفوس ;)

والثانية ... أنا متغاظ منك بشدة

لأنك سبقتني وعملت شيء أنا فعلاً في شدة الحاجة والرغبة في عمله، وهو رؤية هذا الرجل، فلا تتخيلوا كم أحب هذا الرجل وأقدره، وأرجو أن يأتي ذلك اليوم قريباً

معلهش بس خيرها في غيرها يأبو الرافعي .. أعمل أيه لحد دلوقتي مش عايزين يدوني الرخصة.. بيقولولي روح دلة .. بقولهم أنا مش عايز أِشتري لبن

بيقولولي لبن أيه دي مدرسة المرور تروح خمسة أيام .. مدرسة تاني قولتلهم بعد ما شاب وده دلة :D

موديست من أجمل وأرجل الشخصيات التى كان لى شرف التعرف عليها ومقابلتها هنا فى مصر.

واذا كتبت ساعات وساعات عن هذا الرجل وادبه الجم وحياءه المحمود فلن أوفيه حقه ولا يسعنى الا ما قاله عمنا الرافعى ..

انى احبه فى الله

لو قالولي مين أكتر واحد مصري صميم حأشاور عليك بدون تردد

بنحبك كلنا يا أحمد :)

ولى عودة

ننتظر عودتك بفصابر الفرغ قصدي بفارغ الصبر

بس إيه رأيكم ... أنا عجبتني جداً

دلفنا إلي المطعم و طلبنا ما سنأكله .. وخاصةً

دلفنا

يا سلام يا دياب .... يا سلام يا محمود باشا

دلفنا

دلفنا

دلفنا

عمرك يا رافعي ما سمعت فعل دلف .. دلف يدلف دولفين فعل ماضي مكسور رجله مرفوع علي سقالة منصوب علي الحيطة

طيب تصدق بالله يا رافعي بيه ياخويا ...

ده اللى جه فى بالي اول ما قريت اللى كاتبة الاستاذ دياب ...

يا سبحان الله كل الناس كانت بتفكر و أنا اللي قررت .. علي كدة أنا بقي ملهم :rolleyes: ... أشتاتا أشتوت

خلي بالكم بقي لتتأذوا

أستاذ ياه هو أنا باين علي مدرس

تصدق بالله أنا كنت رايح أقابل واحد لقيته واحد تاني ههههههههه

تحياتي للجميع

[واحد تاني]

طيب تصدق بالله يا رافعي بيه ياخويا ...

ده اللى جه فى بالي اول ما قريت اللى كاتبة الاستاذ دياب ...

يا سبحان الله كل الناس كانت بتفكر و أنا اللي قررت .. علي كدة أنا بقي ملهم :) ... أشتاتا أشتوت

خلي بالكم بقي لتتأذوا

أستاذ ياه هو أنا باين علي مدرس

تصدق بالله أنا كنت رايح أقابل واحد لقيته واحد تاني ههههههههه

تحياتي للجميع

:D

:rolleyes:

;)

:wub:

تم تعديل 20 نوفمبر 2006 بواسطة واحد تاني

[النسر المصري]

النسر المصري أهلا أهلا أخيرا حنيت علينا يا راجل يا طيب ، thanks alot علي الكلام الهايل ده ماهو أنا دلوقت بقيت عميد الأدب العربي فرع الهرم :)

حنيت :rolleyes:

حنييييييت ;)

حنييييييييييييت :)

يعني ايه حنيت :wub:

انا شامم ريحة ان في حاجة عملتها غلط مع سعادتك :D

طب قولي ايه وانا اعتذرلك

حجك على راسي ...يابن الناس الطيبييين

بين قوسين (والله ووحشتنا يا معلم حلاوة ياعنتبلي....والله ووحشتنا بجد.....ياعم بجد وحشتنا.....طب والله وو...بس اسمعــــ...ياأخي عاوز ابوســـ.....طب اس......طيب طيب خلاص ماتزعلش

انا بس حبيت اقولك وحشتنا :)

[Modest]

.

لم أحلم بهذه المشاعر الجميلة التي أتمنى أن استحقها .... أنا في غاية التأثر و الإحراج في نفس الوقت :blush:

دياب صديقي العزيز :wub:

انا من أرجوك أن تُسعِدني باستمرار هذه الصداقة الجميلة و تأكد أنني أنا من شَرُف بهذا اللقاء الجميل الذي أتمنى أن يتكرر كثيراً و أن تتسع دائرة الصداقة و الحب في الله لتشمل جميع أحبائنا و إخواننا و أخواتنا في هذا البيت الجميل.

-----------------------------------------------------------------------------------------

بنتنا نانو (فاكرة؟ :P )

ليتني أستطيع التعبير عن الحب الذي أشعره تجاهكم جميعاً لكني (بصراحة و بجد) فوجئت بهذا الموضوع الجميل و أكتب بتلقائية شديدة و بدون أي تحضير .. فاتلاقيني متلخبط شوية و مش عارف أرُص كلمتين جنب بعض :unsure:

-----------------------------------------------------------------------------------------

أبو زياد الجميل .. زميل الغربة :wub:

دعائك جميل و ادعو الله سبحانه و تعالى أن يتقبله.

-----------------------------------------------------------------------------------------

مولانا الشيخ صبح :D

بلاش الكلام اللي مش عارف أرد عليه ده .... من حلاوته طبعاً :angry:

شرف لنا يا صبح أن تصبح معانا في "الشلة" :D

أحبك الله الذي أحببتني فيه :wub:

-----------------------------------------------------------------------------------------

مدام ناش

الحمد لله أفخر بكل الصداقات التي كوّنتها عن طريق النت و سعدت بلقاء العديد من الأخوة و أصبحت علاقاتنا و لله الحمد أمتن و أقوى بعد هذه اللقاءات.

و اسمحي لي بهذه المناسبة أن أعبر عن تقديري لمداخلات حضرتك في كافة المواضيع و أن أُعبر عن إعجاب خاص بتوقيعك المُمَيّز :D

.

-----------------------------------------------------------------------------------------

نسررررررررر

دياب يكتب مكان ما هو عايز .. مادام قال "موديست" يبقى يكتب في أي مكان :blink:

نفسي أجي الكويت و "أدلف" معاك يا نسّر :D

-----------------------------------------------------------------------------------------

الأخت الغالية نانسي

أحرجتيني بذوقك و إن كان الذوق ليس غريباً عليكي :)

-----------------------------------------------------------------------------------------

المعلم س س

هو علشان وصلتني بعربيتك في الرياض فاكر كل الناس جدعان زيك؟ :D

و الله يا س س أنا كنت فاكر إني رايح لدياب في مكان عملُه او بيته حسب الوصف اللي اتفقنا عليه و فوجئت به منتظرني على "قارعة" الطريق :ninja: ... غلطة و مش هاكررها تاني يا معلم :blink:

-----------------------------------------------------------------------------------------

حبيبي الرافعي

معقول تكون في جدة و أسيبك تركب حافلات من أم 5 ريال؟ .. مالها حافلات "توقف متكرر" اللي بتقف فجأة في نص الشارع و تخبط العربيات اللي وراها في بعضها.. ماهي بـ 2 ريال و زي الفل :D

أحبك الله الذي أحببتني فيه يا ابو يوسف يا جميل :wub:

-----------------------------------------------------------------------------------------

أحمد محمود

لا أستطيع أن أفيك حقك و لكني أحمد الله أنني تعرفت عن قرب على شخص بأخلاقك العالية.

.

-----------------------------------------------------------------------------------------

أختي الفاضلة مدام فولانة

شرف لي أن تتأخيني "من تتبنيني :D " و مادام دبّستي نفسك في أُخُوّتي يبقى تعملي حسابك على مصروف يومي لأخوكي -_- ... مش مهم مين فينا أكبر من التاني .. المهم أخد مصروف يكفي مصاريف دروس الأي جي

و لي عودة :P

-----------------------------------------------------------------------------------------

حبيبي "واحد تاني" :wub: .. بعد ما تشرفت بمعرفتك تمنّيت كل واحد يبقى "واحد تاني" .... غير الأولاني :D

احبك الله الذي أحببتني فيه :)

-----------------------------------------------------------------------------------------

وردة تمنيت أن تكون حقيقية لكل منكم و لكل من شَمِلَهُ هذا البيت الجميل