عندما يرتدي الأســـد ملابس القـــرد

[se_ Elsyed]

كنت ناوي أكمل موضوع الكبسولات الإدارية ..

ولكن والحق يُقال أنا أُفضل الحياة العملية عن الحياة العلمية

بمعنى إني اجلته لحد ما احكي لكم القصة دي من واقع الحياة العملية اللي أفيد مليون مرة من أي مواضيع اكاديميه سأضعها بين أيديكم ...

-----------

ترجع احداث القصة لسنتين مضتا حيث تم تعيين أحد الزملاء المصريين لدينا بوظيفة " مدير عام " أحد الشركات التابعة لنا

وكان تعيينه لابد منه لإنقاذ تلك الشركة من كارثة مُحققة تكاد تجعلها تتوقف عن العمل .. لإننا عملنا بالظبط زي اللي بيحضر نفسه لدخول سباق سيارات شرس وراح إشترى عربية أخر موديل بمليون جنيه وجه قبل السباق بكام يوم إكتشف إنه ما بيعرفش يسوق وكمان لم يقم بالتعاقد مع أي سائق محترف يقود السيارة ..

فبالظبط الشخص ده كان هو السواق الماهر اللي جاي يسوق العربية

وبالفعل جاء السواق وبدأ العمل ووجدنا شخص متفاني في عمله ولو قلت لكم إنه كان بيشتغل 24ساعة/24 مش هاتصدقوني لإن العمل كان لازم يُنجز في وقت محدد وبالتالي هو والفريق اللي بيشرف عليه كان لازم يخلصوا العمل قبل هذا الوقت

المهم إني تعرفت عليه عن قُرب عن طريق احد أصدقائي لأنهم كانوا زملاء دراسة زمان

وإحتفاءً بهذا الصديق اللي ما بأشوفوش إلا كل كام شهر أما ييجي السعودية لفترة بسيطة ينجز عمله ويرجع مصر تاني المهم كنا بنتغدا ذات مره في احد المطاعم - كل كنت ما أشوف أخينا الجديد ده أقعد أفكره بالغدوة دي وهأقولكم ليه ؟ -

ففي أثناء الغدا إتكلمنا بصراحة وقلت له : وضعك اللي إنت حطيت نفسك فيه مش عاجبني

فقال : ليه كفالنا الشر ؟

فقلت فيما معناه : إنت جاي بتأشيرة أسد .. يبقى ليه مُصر ومصمم تلعب دور القرد ... أو بمعنى أصح .. طبيعة الدنيا اللي احنا عايشين فيها أو طبيعة الحياة العملية إن في طبقة الملكات اللي هما المديرين والمشرفين ومن في مراكزهم .. وفيه طبقة النحل الشغالة .. وكلاً منهما لا يعيبه مركزه .. يعني على سبيل المثال ما أجيش للمدير اللي وظيفته التخطيط وإتخاذ القرارت واطلب منه يعمل شاي وقهوة أو أقوله إمسك فوطه وطوق المكاتب ولمع الأرضيات .. او اجي للعامل البسيط واقوله تعالى حل لنا مشكلة فنية مُعينه في العمل ...

وبالتالي أنا شايفك بتؤدي عمل من هم أقل منك .. يعني إنت راجل مدير عام وتحتك العديد من المهندسين والفنيين .. ومع ذلك انا بأشوفك شغال زيك زيهم وقالع البدلة ومتعفر ومتغبر طول الوقت ..

فكان رده : أصلي يا سين سين أنا باعشق عملي .. وأنا شخص بسيط لا أنظر للمراكز ولا للألقاب وأحب ان أؤدي العمل بنفسي ..

فقلت له : يا عزيزي " إذا كنت في الصين .. فافعل مثلما يفعل الصينيون " .. وأنت في إحدى دول الخليج اللي هي جزء من الوطن العربي اللي متأصل فيه عقدة الخواجه وعقدة المظاهر .... يعني لما تيجي داخل عمل جديد فيإما تعمل لنفسك منظر وبرستيج من الأول .. يا إما تستحمل اللي هايجرى لك والنظرة اللي هاتتنظر لك فيما بعد ..

بمعنى أخر ... إنت مش شخص لسه جاي مُبتديء هاقولك إستحمل لحد ما تكبر وخليك ماشي جنب الحيط وإشرب اللبن قبل ما تنام .. لأ

إنت شخص مدير عام .. فكان لازم من أول يوم وقبل ما تخليهم يشغلوك ليل نهار وإنت فرحان بكده .. كان لازم تعرف واجباتك وسلطاتك ومسئولياتك وتعيش في دور المدير العم

فاهمني يا حاج ولا نقول كمان ؟

الحاجة بقى اللي ما قدرتش أقولها له ولا أكلمه فيها هي " مظهره " .. فتخيلوا يا جماعة عن هذا الإنسان يكاد يكون يمتلك بدلة واحدة لا يغيرها .. وإستنوا عشان مش عايز كلام كتير .. ده مش بخيل ولا بيحط القرش على القرش .. بل عكس ده .... أنا عارف جيداً إنه يمتلك فيلا فخمه في احد المُدن الجديدة وأولادة في مدارس عالمية ويعيش عيشة ممتازة ...

وهو اللي فتح الموضوع في مرة وقال لي إنه بطبيعته متواضع ولا يهتم بمسألة الهندام او المظهر أو لبس بِدل أخر موضه ...

طب وإيه يا عم الحاج علاقة التواضع بإني اكون مدير عام او في درجة وظيفية عالية وأتعلم اعرف ألبس إزاي وإزاي الألوان تكون متناسقها مع بعضها عشان على الأقل الناس اللي بتاخد بالمظاهر ما ياخدوش إنطباع سيء عني ؟

تصدقوا بالله .

جولو لا إله إلا الله

ناس من زمايلنا ليسوا على إحتكاك به لإنه في شركة مجالها مختلف عنهم .. فلما كنا نتجمع وتيجي سيرة الشُغل وتيجي سيرته .. يقومو يقولوا .. آه مش إنت تقصد فُلان أبو بدلة زرقا .... !!!!!! والله العظيم ده كان بيحصل .. ومع إن ماحدش بيشكك في قدرته ولا عبقريته إلا إن مما لا شك فيه إن المظهر والهندام هو جزء من شخصية الإنسان ويُعبر عن شخصيته إلى حد كبير

وأنا أعرف تماماً إنه في مصر كان إنسان يُشار إليه بالبنان في مجال عمله وعلى فكره ده كان عنده شركة خاصة يمتلكها .. لكن مع وجود تكتلات وشركات عملاقة في مجاله .. إتهرس وماقدرش يكمل وخرج من السوق ....

المهم فضلت أوعيه وأفهمه وهو يقولي هاحاول أسمع الكلام

لكن الظاهر إن الطبع يغلب التطبع ...

آه بالمناسبة .... نقطة مقاطعة بسيطة

رئيس مجلس الإدارة ذهب للتعاقد بنفسه مع هذا الشخص .. وبعد إتمام التعاقد وإتفقوا على التفاصيل المادية وعلى طبيعة عمله ... ترك إنهاء التعاقد وإستكمال الإجراءات الإدارية لمدير فرعنا هناك – مصري طبعاً والمصريين أهما حيويه وعزم وهمه – فراح صاحبنا – اللي جه هنا – بكل تلقائية قاعد ومحكي في المحكي ومفضفض وقايل له على ظروفه وإن لسه قافل شركته وللأسف كان إتورط في شراء الفيلا ولسه عليه أقساط شهرية تقطم الوسط ويه تُدفع بوصلات أمانة ... راح التاني ما كدبش خبر وصو صو صو متصل برئيس مجلس الإدارة وقايله : إسكُت مش فلان طلع محتاج وضلربه السلك وعليه أقساط و و و .. نا شايف نضغط عليه ونخفض قيمة العقد ..

وقد كان يا سادة يا كرام

والكلام ده لم أسمعه من الشخص الموظف نفسه ولكن سمعته من صاحب الشركة اللي كان مستغرب من اللي بيحصل لكنه وافق على إسلوب الضغط لإنه صاحب مال وده في مصلحته

ولكن يشاء السميع العليم إن بعد ما الشخص ده أثبت جدارته في العمل أول 6 أشهر رجع له راتبه تاني اللي أتفقوا عليه في اول المفاوضات بأثر رجعي ..

يُتبع

[الرافعي]

آه بالمناسبة .... نقطة مقاطعة بسيطة

رئيس مجلس الإدارة ذهب للتعاقد بنفسه مع هذا الشخص .. وبعد إتمام التعاقد وإتفقوا على التفاصيل المادية وعلى طبيعة عمله ... ترك إنهاء التعاقد وإستكمال الإجراءات الإدارية لمدير فرعنا هناك – مصري طبعاً والمصريين أهما حيويه وعزم وهمه – فراح صاحبنا – اللي جه هنا – بكل تلقائية قاعد ومحكي في المحكي ومفضفض وقايل له على ظروفه وإن لسه قافل شركته وللأسف كان إتورط في شراء الفيلا ولسه عليه أقساط شهرية تقطم الوسط ويه تُدفع بوصلات أمانة ... راح التاني ما كدبش خبر وصو صو صو متصل برئيس مجلس الإدارة وقايله : إسكُت مش فلان طلع محتاج وضلربه السلك وعليه أقساط و و و .. نا شايف نضغط عليه ونخفض قيمة العقد ..

يُتبع

هذا يحدث فعلاً .. بس هنا هذا الشخص لبس ملابس حاجة تانية

كمل يا س.س

منتظرين

[النسر المصري]

قال متواضع قال ;)

هه :rolleyes:

ومال التواضع بأم المظهر بدي أفهم :D

أمرهم عجيب هؤلاء الناس المحترمون...فهم يفهمون الاحترام....على غير (شاكلته) :)

عن اذنكم انا رايح البس الكرافت البينك عشان عنيد مقابله بينك ف بينك :)

كمل يا س س باشا ..اطربنا

مسا الروقان :wub:

[nancy]

فعلا يا س س احنا فى عالم مظاهر

انت بتاخد نص حقك مش بعلمك ولكن بلى انت بتلبسة

بمعنى لو كان الى انت لابسة غالى وفية معاه ساعة ماركتها اية وموبيل اية

سعتها الى حتطلبة حتاخدة بمجهود اقل وشرح وتوضيح اقل

لان الى حيشوفة يقول ايوة هو فعلا بيسوى الى بيقولة

وبعدين حتة الاتكال على الى بيشتغل اكتر دة العرب كلهم اساتذه فيها

ربنا يسترها مع الراجل دة لانة واضح انة طيب زيادة عن الازم

[Folana]

السلام عليكم ورحمة الله...

الغلط مش على الرجل طبعا خالص..ده انسان عنده ضمير وعارف قدر نفسه بغض النظر عن ملابسه ..الغلط على الناس اللى تناولت مظهره وظروفه وضربته فى مقتل وتسببت فى انخفاض اجره ...ولكن عمله واجتهاده كانوا اقوى من ضغائن الغير...

طب ما انا اعرف واحد صاحب مصانع وشركات ...ومفروض انه على مستوى اجتماعى ومهنى عالى ..لكن باشوفه يشتغل بايديه مع العمال وبيقول هم كده حيختشوا...ويشتغلوا احسن منى كمان...

وعنده اكتر من عربية احدث موديل ..ومع ذلك بيفضل انه يتحرك بعربية عادية جدا ..ويقول دى بتريحينى فى المشاوير اكتر...وهو عارف انه احسن من اى حد ممكن يتكلم او ينتقد...انا متهيألى دى وجهات نظر...انا عن نفسى عمرى ما احكم على حد من مظهره ابدا..طبعا فيه حد ادنى مقبول..وانا شايفة ان الانسان طالما بيلتزم بالحد الادنى ده يبقى مش مفروض ينتقد...

الاسد بيفضل اسد ..بتصرفاته وتحمله للمسئوليات حتى لو ارتدى ملابس القرد...وفى المقابل عمر القرد ما حيبقى اسد حتى لو علقوا على ديله فانوس ....

بس يمكن فى البلاد العربية الوضع بيختلف والتقييم بيختلف برضه من بدلة الى اخرى ...انا ما اعرفش بصراحة ...

كل كلامك بنستفاد منه يا سى السيد ...سواء ادارى او عملى ...منتظرين باقى الموضوع ...

[محمد عبدالعزيز]

ولكن يشاء السميع العليم إن بعد ما الشخص ده أثبت جدارته في العمل أول 6 أشهر رجع له راتبه تاني اللي أتفقوا عليه في اول المفاوضات بأثر رجعي .

أنا شايف إن ده أعظم درس ممكن نستفيد منه كشباب يخوض غمار الحياة العملية, "إن الله لا يضيع أجر من أحسن عملاً" , "هل جزاء اﻹحسان إلا اﻹحسان".

لا أعرف كيف نطالب باﻹصلاح والتغيير ونحن نتأقلم مع أوضاع غريبة مغلوطة ونقول إنها الحياة العملية!

إذا كان هذا المدير يراعى ضميره ويحب عمله ويتقنه, فلا يهم نظرة الناس له, المهم جزاء ربنا وتقدير ربنا له, إذا كان فى ناس بتدبر عشان تؤذى ناس تانية أو تحصل على مكاسب على حساب اﻵخرين, فإن الله يراقب الجميع ويرى الجميع ويقدر أن يعطى كل ذى حق حقه, الظهور بمظهر جيد مطلوب ولكننى أرى أن الرجل يرتدى بدلة ولا يرتدى عفريته مثلاً, فماذا يعيبه فى ذلك؟

إذا كنا نريد اﻹصلاح حقاً, يجب أن نصحح المفاهيم أولاً ونعرف ما هى المعايير السليمة للحكم على اﻷمور ونقتنع بها من داخلنا ونصمم على جعلها واقعاً بدلاً من الواقع اﻷليم الذى نعيشه, هكذا يكون التغيير واﻹصلاح.

استضاف محمود سعد منذ فترة فى برنامج البيت بيتك مذيع اسمه نيشان, أنا بصراحة لا أعرفه ﻷننى لا أشاهد القناة التى يعمل بها, ولكنهم يقولون أنه مشهور جداً وسأله محمود سعد مجموعة من اﻷسئلة ظهر من خلال إجابات هذا المذيع أن له شخصية قوية جداً ومثقف ولديه مواقف يقتنع بها ويتصرف على أساسها, كان من ضمن اﻷسئلة, أن هذا المذيع دائماً ما يرتدى ملابس سوداء وغالباً نفس الملابس, فلماذ يفعل ذلك وهو مذيع مشهور؟

أجاب المذيع بقصة عن العالم أينشتاين, صاحب نظرية النسبية وما أدراك ما النسبية, كان هذا العالم يمتلك 6 أطقم سوداء, ولما سئل لماذا يفعل ذلك؟ قال ﻷنه لا يريد أن يفكر في ماذا يرتدى اليوم!

كذلك كان هذا المذيع, وهو مذيع مطلوب منه أن يظهر بمظهر جيد, ولكن رغم ذلك حصل على الشهرة والنجاح ﻷنه متقن لعمله.

لا يجب أن يكون الحكم على الناس بالمظاهر, وإذا كان هذا واقع فلابد أن نغيره, لا أن نتأقلم معه.

تم تعديل 21 نوفمبر 2006 بواسطة محمد عبدالعزيز

[nash]

.. فكان لازم من أول يوم وقبل ما تخليهم يشغلوك ليل نهار وإنت فرحان بكده .. كان لازم تعرف واجباتك وسلطاتك ومسئولياتك وتعيش في دور المدير العم

ياريتني عملت كده من أول يوم لي في مجال العمل..لكن لم أجد من ينصحني....وفين لما أتعلمت..يووووة أخدت وقت طويل

.................................................................................................................................................

إذا كنت في الصين .. فافعل مثلما يفعل الصينيون " .. وأنت في إحدى دول الخليج اللي هي جزء من الوطن العربي اللي متأصل فيه عقدة الخواجه وعقدة المظاهر .... يعني لما تيجي داخل عمل جديد فيإما تعمل لنفسك منظر وبرستيج من الأول .. يا إما تستحمل اللي هايجرى لك والنظرة اللي هاتتنظر لك فيما بعد ..

نعم هنا في الخليج ينظر لك علي مقدار ماتملك وما تلبس

وفعلا إذا لم تعمل لنفسك البرستيج من الأول هاتستغل بمعني الكلمه وبقلب بارد وبدون حتي كلمه طيبه أو شكر...كأنه واجب عليك خدمتهم..طبعا

مش الكل بس 99%بس

..............................................................................................................................................

رئيس مجلس الإدارة ذهب للتعاقد بنفسه مع هذا الشخص .. وبعد إتمام التعاقد وإتفقوا على التفاصيل المادية وعلى طبيعة عمله ... ترك إنهاء التعاقد وإستكمال الإجراءات الإدارية لمدير فرعنا هناك – مصري طبعاً والمصريين أهما حيويه وعزم وهمه – فراح صاحبنا – اللي جه هنا – بكل تلقائية قاعد ومحكي في المحكي ومفضفض وقايل له على ظروفه وإن لسه قافل شركته وللأسف كان إتورط في شراء الفيلا ولسه عليه أقساط شهرية تقطم الوسط ويه تُدفع بوصلات أمانة ... راح التاني ما كدبش خبر وصو صو صو متصل برئيس مجلس الإدارة وقايله : إسكُت مش فلان طلع محتاج وضلربه السلك وعليه أقساط و و و .. نا شايف نضغط عليه ونخفض قيمة العقد ..

النقطه دي بالذات نصحتني فيها إنسانه..وكانت الحاجه الوحيده العدله في حياتهاوالنصيحه الوحيده اللي طلعت منها لإنسان أساسا نفعتني بعد كام خبطه كده وبعد مانفذتها..

.............................................................................................................................................

المظهر مهم ... والمظهر الجميل لو رجعنا من الأول... هاقول أنه أساسا مطلب إسلامي ولما يكون المسلم جميل ومرتب ..طبعا مش جمال الشكل اللي بقصده جميل لها أكثر من معني..يعني يكون مرتب..له رائحه طيبه مهندم في مظهرة..مرتب شعرة...يعطي صورة جميله عنا...فلو أكثرنا أهتم بهذه النقطه بالذات وأصبح مظهر المسلمين مرتب هايبقي لينا شكل ولون...

نفسي مايكونش المظهر الإسلامي مختزل فقط في لحيه أو غطاء شعر ..وغيرة..لكن نفسي يشمل أشياء أخري بسيطه جدا وأولها النظافه..والنظافه وأخرها النظافه

...............................................................................................................................................

المظهر المتواضع غير المظهر الرث..بينهم مسافه كبيرة جدا..شخصيا ..لا أحترم السيده أو الرجل أصحاب المظهر المنعكش.....يعني....خمس دقايق من الوقت في الصباح تعطي إنطباع ممتاز طول اليوم

...............................................................................................................................................

تابع أخي الكريم..فكرتنا بأيام مش لطيفه أبدا ..كلها سذاجه وعبط

تم تعديل 20 نوفمبر 2006 بواسطة nash

[se_ Elsyed]

نكمل يا رجاله

-----

في بداية عمله تقدم لنا بما لا يقل عن 3 قروض نقدية شخصية .. وهنا أحسست بالخطر عليه لإنه دخل في سكة الإدمان .. يعني كنت متوقع إنه هايبقى عامل زي مدمن الهيروين اللي أول شمه التاجر بيديها له ببلاش والتانية ببلاش وييجي في التالتة يوري له العين الحمرا ويبتدي يدي له بالشلوت لإنه تمكن منه واصبح لا يستطيع الأستغناء عنه ...

ونحن لا نعمل في مجال السحر الأسود ... فقد كان ما توقعت وصاحبنا حط صباعه تحت فك الأسد وأصبحوا هم متمكنين منه بالديون اللي عليه .. وكل قرض كان بياخده كان بينتقص من قدره على الأقل الشخصي أنا لا أُشكك كما قلت في مكانته العلمية أو الحرفية ..

ولإنه لا يستمع إلى النصيحة ويتصرف بالفطرة .. فقد تقدم بطلب قرض نقدي أخر .. فأنا من حقي أسأله : ليه ؟

فقال لي : إن في حدث علمي بيُنظم كل عام في ألمانيا ولازم أحضره إن شالله على حسابي .. عشان يا سين سين أبقى " آب تو ديت "

فقلت له : بص يا يابن الحلال أنا إنسان فلاح وما أعرفش أب تو ديت ولا سفن آب .. لكن اللي أعرفه إن إنسان عليه ديون وما بيفضلش من مرتبه إلا ما يكفيه للأكل والشرب .. يبقى يسكت ولا يدور على الآب تو ديت ولا دياولو ... ولم نفسك وإسكُت أحسن تسمع ما تكره ممن كانوا يُقدروك ... ووالله يا جماعه لم يستمع واول ما قدم القرض لمديره سمع ما يكره من نوعية بقى إنت كل شويه تقرفنا وتاخد قروض إنت بقى كلامك أكثر من شغلك ... إلخ من المنقى خيار ...

فلقيته جاي لي المكتب تاني يوم وقالي كلمتين فقط : أنا أصبحت كرت محروق يا سين سين ..

فقلت له : فاكر يوم المطعم ولا مش فاكر ؟

المهم عدت الأيام وصاحبنا بدون سُلطات ويمكن أصبح المدير العام الوحيد الذي لا يُقبل توقيعه أو موافقته على أي قرار وتقريباً إتحجم وبقى في الناحية الفنية فقط .. يعني في الأخر زيه زي أي مهندس شغال تحته .. وهو حاسس بالكلام ده ..

إلى أن عينو فوقه مدير عام أخر تقريباً أصغر منه بنصف عمره .. ومن الناحية العلمية بطاطس في الفرن ومن غير صلصة كمان وده لمسينه كلنا وكان أول قرار أخده صاحبنا قريباً جداً هو " إقالة المذكور أعلاه " لإنه أصبح حاجة بيسموها بالإنجليزي Redundancy يعني ممكن نقول عمالة زايدة ....

وها هو ذا مركون على الرف إلى أن يجد له عمل أخر وطبعاً لديه شعور رهيب بالصدمة فبعد أن كانوا بيجروا وراه بالمشوار عشان يوافق وييجي ينقذهم من الكارثة .. أصبح الآن شخص منبوذ وأقسم بالله لم يتلقى حتى مُكالمة هاتفية ممن يقطنون المكتب المجاور له واللي هما كانوا شايلينه على راسهم في الأول ....

وسأقوم بالرد على مداخلات الزملاء الأعزاء تباعاً إن شاء الله

[نانو]

تسمحلي يا س س ادلي بدلوي في هذا الموضوع

و خصوصا في نقطه ان المدير بيشتغل كل حاجه بنفسه و بايده

النقطه ديه احيانا بتكون ضروريه و خصوصا لما يكون المدير ده ما عندوش خبره مباشره في المجال ده او النوع ده من خطوط الانتاج مثلا او ما شابه ذلك

بمعني انا كان ليا تجربه عصيبه في الموضوع ده

اول ما اتخرجت علي طول اشتغلت في شركه ادويه في المصنع

و طبعا الصيدلي في المصنع بيعين مدير مباشره....يعني من الدار للنار...و انا مش بس ما كانش عندي خبره في شغل المصانع لا ما كانش عندي خبره في الشغل نهائي

و كان المطلوب مني الاتي اداره قسم الاقراص اللي هو اكبر قسم في اي شركه ادويه

طبعا كان فيه مديره فوقي موجوده لكن المطلوب مني اني اكون مباشره مع الشغل

و اول حاجه عملتها اني اشتغلت كل حاجه بايدي بجد بس طبعا مع العمال الموجودين و بالمناسبه كانو كلهم دبلومات...و انا اذكر ان ما فيش ماكينه واحد في القسم كله ما شغلتهاش بنفسي و قعدت اراقب كل واحد بيعمل ايه

و كمان في الاعمال الاداريه و التعامل مع الاقسام الاخري زي المخزن او المعمل كنت بروح بنفسي و اتعمل مع الناس حتي الوناشين نفسهم في المخازن كنت بعرفهم كلهم

و العلاقات ديه كلها كانت بتنفع في مواقف صعبه و اعرف الجا لمين و اطلب منه ايه

يعني مثلا اوقات في الورديه الليليه تحصل مشكله و يكلموني في البيت اروح اطلب منهم الذهاب لشخص معين مثلا في المخز او المعمل و يحل المشكله في ثواني

و فضلت كده فتره حوالي4 او 5 شهور

و بعدها خلاص ارتحت تماما و بقت مفاتيح الشغل كلها في ايدي و من مكتبي كنت باضبط كل حاجه و ووقتها بقه ماحدش كان بيقدر يضحك عليا

لانهم عارفين اني عرفت كل خبايا الشغل...

يعني الماكينه النهارده تطلعلي كذا شريط يبقي هم ولو نقصوا يبقي الناس ديه بتهرج

نفس الحكايه ابعت واحد مشوار المخزن لو غاب عن الوقت اللي عارفاه بعرف انه كان بيتمشي و هكذا

و ده سهلي كتير جدا التحكم في الشغل بشكل عملي و مضبوط ...مش ابقي انا في وادي و الناس بتوعي في الوادي

و كمان بينفع كتير جدا في الناحيه الاداريه ...و بعرف الناس ديه بتعاني من ايه بالضبط و بقدر افهمهم واحللهم مشاكلهم

و ما كانش عيب ابدا لاني قربني جدا من الناس وبقوا يتمنوا انهم يشوفوني عندهم و فعلا كنت بحس انهم بيحبوا يشتتغلوا بضمير و بحب للشغل مش بالقهر

و بالتالي الخلاصه ....اني اششتغل بنفسي في الاول لغايه ما تمكن من كل حاجه مش عيب بالعكس مفيد

بس مع حفقظ البرستيج و الوضع و الالقاب و الاحترام

ثانيا الموضوع مش لازم يبهوء و اعرف امتي ارجع بقه مكاني و امشي الموضوع من مكتبي يعني مش زي الاخ ده اللي غرس نفسه و ما عرفش يطلع منها تاني

[Eldisel]

أأأأةةة جيت علي الوجيعة يا س س

بس انا بختلف معاك في شيء لو سمحتلي ان الشخصيات في الشغل ثلاثة مش اتنين ( اسد وقرد وحمار) ومعناهم بالنسبالي كالاتي :-

الاول وكما وضحت واحد عندة ملكة معينة وعارف يوزفة كويس ومدي لنفسة شخصية وهيبة / والاخير مش قاصد بية الاهانة لكن قاصد بية الناس الي بيتقال عليهم ( دة فلان دة حمار شغل) يعني شغل كتير ووانتاجة عالي لكن دخل اوبرستيج قليل / اما القرد فهو الانسان الحلنجي او الي بيتنطط كتير وشغلة قليل بس دة احياناً بيوصل الى بيلبس اسد .....

شكلي هدوشكوا بس استحملوني :wub:

معلش انا هتكلم دلوقتي عن نفسي ... لان القصة دي خوفتني جداً ..عشان انا لسة ببداء في حياتي المهنية في بداية حياتي في مصر...... وفي حيرة لا احسد عليها ..... وشايف حجات غلط بتتعمل قدامي وحجات صح وخايف ليتشابة علي الغلط بالصح .... شايف ان الشغل ميمشيش الا بالمصالح والمجاملات

والحقيقة عاوز ابقا اسد والبس لبس اسد ومليش دعوة بالقرود خالص بس اسد على حق مش قرد ولابس اسد .... أو اسد وبيشتغل شغل حمار مش مشكلة لكنة اسد :unsure: ولا اكون ذي صحبنا الاسد الي خلع ذي الاسد واصر على ان يرتدي لبس لحمار شغل وبس فلا اصبح اسد ولا اصبح حمار...

الشغل في مصر بيمشي بالمحسوبيات والمجاملات .. هات وخد .. هاديك Permeation ( الصلاحية ) دة عشان اخد منك المصلحة دي ..... وانا لا احب ذلك .... احب لما اشتغل اشتغل صح ومصلحة الشغل تكون هي الاصل واراعي ربنا في الاول والاخر

مرة اقول انا اعمل الصح والشغل الي يجيلي اخلصة مذبوت دون تلكع لغرد معين ..... وافوجئ بالذي انا قلتلة مثلن ملكش الصلاحية ( Permeation ) دة افوجي ان راح لموظف اخر وخد الي هو عاوزة عشان مصلحة معينة ممكن يكون الموظف دة رئيسي في العمل ... ويجي الشخص دة بعديين يبصلي من فوق لتحت ويقول لي : ماهي اتعملت اهي :blush: ... هل هي دي العلاقات ؟ .... ام دي تعتبر لاباقة ؟ ...... انا شايف ان دة اسمة استغلال ؟

من ناحية تانية اقول اشمعنا هما ماعمل ذيهم وانفع واستنفع :angry: واحسس الناس بقيمتي بدل مالشغل الي بيجي بيخلص ومحدش بيحس بية بس ارجع واقول انا لازم يكون عندي مبداء ... واديني بتفرج وبتعلم عقبال ما اكبر شوية في الشغل وتبقى تحت ايدي سلطلت فعلية واديني باخد خبرة .... لاني محتاج خبر في التعامل مع البشر الاول+ الخبرة في مجالي ودة الي انا عاوزة دلوقت

وسعات اقول انا هقول ( لا ) باعلى صوتي ومش هسمح لحد من الي حولية ان يعمل تجاوزات .......... بس كدة انا عارف ان من بعد اول ( لا ) هتيجي بعدها علطول ( برة ) وانا لسة مش جاهذ لدة

مش بقولك في حيرة .......... وعاوز النصيحة :ninja: :blink:

دوشتكم معلش :blink:

اخوكم الصغنن الديذل System administrator مبتادئ :wub:

تم تعديل 21 نوفمبر 2006 بواسطة Eldisel

[otaka]

للاسف الراجل دى بنى ادم طبيعى لا جدال فى ذلك

المشكله انه الثقافه العربيه لا تعترف بالناس الطبيعيه

و لذا نجد ان الطيب فى كل الدنيا ملهاش الا معنى طيب و عندنا معناها عبيط

[abo 3ali]

فراح صاحبنا – اللي جه هنا – بكل تلقائية قاعد ومحكي في المحكي ومفضفض وقايل له على ظروفه وإن لسه قافل شركته وللأسف كان إتورط في شراء الفيلا ولسه عليه أقساط شهرية تقطم الوسط ويه تُدفع بوصلات أمانة

انا ليا تعليق صغير بس على الحته ديه . اولا كلنا لينا ظروف و فى مراحل حياتنا المختلفه بنتعرض لازمات ماليه بتاثر على قرارنا بس ده مش معناها الاستغلال من قبل صاحب العمل او تخفيض الاجر او البرمجه اللى عاملها صاحب الصو صو صو علشان ياخد بنط على صاحبنا ادام صاحب العمل .

اللى فكرنى بكده انى قبل ماجى هنا _ اتغرب يعنى كنت ماسك بوزيشن كويس فى الشركه اللى كنت شغال فيها فى مصر . و كان عندى التزمات ماليه كبيره كان حلها الغربه او ان صاحب العمل يزود مرتبى و اقعد فى مصر . كلمته بصراحه و بوضوح و فهمته انى عندى فرصه اتغرب و اعمل فلوس بس انا مش حابب كده علشان فعلا باحب شغلى و باحب الشركه لانى بانيتها على ايدى . و فهمته ان احنا الاتنين خسرانين انا حاخسر اللى بنيته و هو حجيب واحد من اول و جديد يشيل الليله و يغلط فى وقت الشركه فيه كانت بتكبر .. مقتنعش بكلامى و زودنى زياده خايبه فقدمت استقالتى و دربت الشخص الجديد اللى هو نقاءه بايده الطاهره

و جيت على الغربه اللى هو اصلا_ صاحب العمل كان له فرع لشركتنا فيها _ و الحمد لله ربنا اكرمنى و لقيت بدل الشغلانه اتنين و كنت محتار بينهم و بمرتب اضعاف اللى كنت باخده

عارفين صاحبنا _ صاحب الشغل جراله ايه .. علشان اتبرمج و عمل فيها ناصح

الولد اللى جابه غرقله الشغل و شهرين و طفش و معرفوش يجيبوه

فكنى بعدها باتنين و برضه ماخدتش كواليتى الشغل اللى انا كنت باعمله

اخيرا عرض عليا انى ارجع بمرتب يوازى اللى باخده هنا

اللى عاوز اقوله .. ان البنى ادام بشغله و مراعاه ربنا و تركيزه ربنا بيديله و صاحب العمل محتاجنى زى مانا محتاجه و العلاقه متساويه مفهاش برمجه و لا حسنه و انا سيدك

و لو صاحب العمل _ اى صاحب عمل فاكر نفسه ذكى و اذكى من الناس كلها يبقى غلطان لان الارزاق بايد الله سبحانه و تعالى و هو سبب مش اكتر

[صبح]

وسأقوم بالرد على مداخلات الزملاء الأعزاء تباعاً إن شاء الله

يا عم س س

هوا إنت كل شوية تفتح موضوح زي الفل وتجري

كمٌل ربنا يكرمك :D

[أبو زياد]

طيب لحد ما عمدتنا يكمل

ممكن بعد إذنك أرد على أخويا وحبيبى الديزل - بعد إذنك يا س س و بالنيابة عنك

هو قال :

من ناحية تانية اقول اشمعنا هما ماعمل ذيهم وانفع واستنفع واحسس الناس بقيمتي بدل مالشغل الي بيجي بيخلص ومحدش بيحس بية بس ارجع واقول انا لازم يكون عندي مبداء ... واديني بتفرج وبتعلم عقبال ما اكبر شوية في الشغل وتبقى تحت ايدي سلطلت فعلية واديني باخد خبرة .... لاني محتاج خبر في التعامل مع البشر الاول+ الخبرة في مجالي ودة الي انا عاوزة دلوقت

طيب يا عم الشباب إنت عندك الحل اهو محتار ف إيه ؟

أكيد الناس دول خبرتهم أكتر منك - فى الخربشة - وواجبك إنك تتعلم منهم ولا تجعل حماس الشباب يكون عداوة بينك و بينهم بس علشان تتعلم منهم- يعنى لمصلحتك وهوة دة الكلام اللى قاله استاذنا س س

صح كدة يا أستاذنا ؟

[se_ Elsyed]

أنا اسف للتأخير على الرد

الرافعي كتب

.. بس هنا هذا الشخص لبس ملابس حاجة تانية

منور حاج رافعي ... بس قولي في ودني ملابس إيه هــا .. هــا ؟

-----

النسر المصري

كمل يا س س باشا ..اطربنا

إسمع وإتمزج يا سيدي وشكلك اليومين الهم صلي عالنبي دماغك عاليه ومزاجك عنب

-----

الباشمهندسة نانسي

فعلا يا س س احنا فى عالم مظاهر

وبرضوا مافيش مانع ولا هو حرام ولا عيب إني أجمع بين الإتنين .. بين المظهر وبين العلم والمكانة الإجتماعية وهو ده خُلاصة فكرتي اللي عايز أوصلها لزملائي وأصدقائي

المهم ( أخبار أسعار الأسمنت والحديد إيه دلوقت ؟ )

------

نينه فُلانه ( تِسمحي لي أقولك يا نينه .. أصلي مُغترب ومحروم من حنان الأم عشان أنا بعيد عن ماما اللي كانت بتشربني اللبن وتعملي شاندوشتات الجبنه بالقوطه كل يوم الصبح وأنا رايح الكليه ؟ )

أنا مختلف معاكي يا نينه وتعالي لي على جنب

الغلط مش على الرجل طبعا خالص..ده انسان عنده ضمير وعارف قدر نفسه بغض النظر عن ملابسه ..الغلط على الناس اللى تناولت مظهره وظروفه وضربته فى مقتل وتسببت فى انخفاض اجره ...ولكن عمله واجتهاده كانوا اقوى من ضغائن الغير...

والله يا ست فلانه اللي أعرفه إن لو المجتمع عايز كده - وهو مش عايز حاجه عيب ولا حرام - يبقى إيه المانع أبقى أشيك واد في روكسي وألبس ملابس بسيطة ومهندمة وأحط جيل على شعري او فوزلين من بتاع خضر طالما ده مطلوب عشان اكمل به شخصيتي .

طب ما انا اعرف واحد صاحب مصانع وشركات ...ومفروض انه على مستوى اجتماعى ومهنى عالى ..لكن باشوفه يشتغل بايديه مع العمال وبيقول هم كده حيختشوا...ويشتغلوا احسن منى كمان...

المثال هنا مختلف تماماً ماي ليدي .. ده صاحب الشركة يعني مش محتاج حاجه من حد أو مش محتاج برستيج من موظفينه وهو صاحب القرار وأتفق معه تماماً فيما يفعل لإن " ما حك جلدك مثل ظفرك "

الاسد بيفضل اسد ..بتصرفاته وتحمله للمسئوليات حتى لو ارتدى ملابس القرد...وفى المقابل عمر القرد ما حيبقى اسد حتى لو علقوا على ديله فانوس

لا أتفق معكي .. فالمفهوم ده كان سائد لحد منتصف القرن العشرين عندما كانت هناك مقولة مشهورة وهي " البضاعة الجيدة تُعلن عن نفسها "

أسف .. فدلوقت البضاعة الجيدة إذا لم تُعلن عن نفسها وتعمل أراجوز عشان تعرف الناس بها فسوف يعلوها التراب وتبقى زيها زي الفالصو

كل كلامك بنستفاد منه يا سى السيد ...سواء ادارى او عملى ...منتظرين باقى الموضوع

ده شرف ووسام على ضهري قصدي صدري يا كونتيسه فُلانه ( تسمحي لي أخد الكلمتين دول أوزعهم على اللي موجودين عندي في البيت وخصوصاً صاحبتك أم عمر عشان تعرف إنها متجوزة جوهرة سوداء ؟ )

وأخيراً وليس أخراً ( تسمحي لي بالرقصة دي ؟ ) :happy:

---------------

محمد عبد العزيز

لا أعرف كيف نطالب باﻹصلاح والتغيير ونحن نتأقلم مع أوضاع غريبة مغلوطة ونقول إنها الحياة العملية!

يا عم محمد أبو عبد العزيز

هناك فرق كبير بين التأقلم مع شيء غلط يسبب ضرر زي الحرام أو العيب أو ما يعاقب عليه القانون

وبين شيء غلط أخر لا يضُر وهو على فكرة غلط نسبي زي المظاهر أو عادة إجتماعية مُعينة .

-----------

لا يجب أن يكون الحكم على الناس بالمظاهر, وإذا كان هذا واقع فلابد أن نغيره, لا أن نتأقلم معه

أسف يا محمد .. مش هاتقدر لإني لا أرى داعي لتغيير ذلك طالما لا يؤثر ذلك على المجتمع نفسه ودعنا نتفرغ لتغيرر الأخطاء والبلاوي الحقيقية ..

-------

بنت ديرتي مدام / ناش كتبت

تابع أخي الكريم..فكرتنا بأيام مش لطيفه أبدا ..كلها سذاجه وعبط

ما حدش بيتعلم ببلاش با سيدتي وما فيش إنسان طلع لقى نفسه Perfect وأحسن أما اكون عبيط واتعلم وأبقى متوحش وأخد حقي من التخين .. بدل ما أفضل عبيط والعيال تجري ورايا في أزقة المدينة وتقول العبيط اهو هو

-----

سي السيد كتب

نكمل يا رجاله

كمل ياخويا وماله .. يعطيك العافية

-----

إيه النور ده .. أختشي الكبيرة الدكتورة نانو منوره دكاني المتواضع ... هات شيشة التفاح للدكتورة يالا

تسمحلي يا س س ادلي بدلوي في هذا الموضوع

الجرادل كلها تحت أمرك وخدي أي دلو منهم ودلدقيه براحتك

و بالتالي الخلاصه ....اني اششتغل بنفسي في الاول لغايه ما تمكن من كل حاجه مش عيب بالعكس مفيد

بس مع حفقظ البرستيج و الوضع و الالقاب و الاحترام

ثانيا الموضوع مش لازم يبهوء و اعرف امتي ارجع بقه مكاني و امشي الموضوع من مكتبي يعني مش زي الاخ ده اللي غرس نفسه و ما عرفش يطلع منها تاني

إنت كده جبت من الاخر .. إنت كده شُكراً عالأخر

وكما قال الشاعر أحمد بن عدوية " خلاصة ومش خُلاصة .. وسلاح من غير رصاصة "

---------

أخونا ديزل الساعة 12.30 اللي بيروح إسكندرية وما بيقفش في المحطات كتب

والحقيقة عاوز ابقا اسد والبس لبس اسد ومليش دعوة بالقرود خالص بس اسد على حق مش قرد ولابس اسد

لا تفهم كلامي بالمعنى الحرفي يا ديزل يابني .. لإن الإستئساد لا يأتي من فراغ .. ده حتى الأسد نفسه ما جاش الدنيا كده أسد .. ده كان شبل بيلعب في فريق تحت 17 وبعدين بقى في المنتخب الأولمبي وبعدين أثبت نفسه وبقى يلعب في الفريق الأول مع الكابتن الجوهري ..

فلازم تتعب يا حبيبي وتضع لنفسك هدف وتثابر وتصبر وتجتهد حتى تصله .. وساعتها ثق تماماً إنك لازم تبقى أسد في يوم من الأيام .. وما تنساش ساعتها اونكل سين سين :wub:

الشغل في مصر بيمشي بالمحسوبيات والمجاملات .. هات وخد .. هاديك Permeation ( الصلاحية ) دة عشان اخد منك المصلحة دي

فكرة غير صحيحة .. ولا تُأخد حالة فردية واحدة وتقيس عليها بقيت الحالات وهاقولك ليه

عشان لو كل الاعمال أُديرت بالطريقة دي يبقى الدنيا هاتخرب .. لإن الخطأ خطأ والصواب صواب .. حتى لو إنعكست الأية لبعض الوقت فليس معنى ذلك أنها أصبحت قاعدة مُسلم بها

من

ناحية تانية اقول اشمعنا هما ماعمل ذيهم وانفع واستنفع

إوعى تعمل كده لإنك إذا ما عشتش عشان مبدأ مُعين فستظل خطأ وبدون هدف طول عمرك ... حاول دايماً تعيش زي النخلة .. لها جذور قوية وفي نفس الوقت هامتها ورأسها عالي .. وما تبقاش زي البلاب جذورة ضعيفة لكنه عالي ومُتسلق وأي شوية هواء تقتلعه .. او زي نبات ورد النيل ضخم ومنتشر لكنه بدون جذور وضار وينجرف مع التيار ..

--------------------------

كابتن أوتاكا اللي ساب الإسماعيلي ومش عارفين فين اراضيه دلوقتي كتب

المشكله انه الثقافه العربيه لا تعترف بالناس الطبيعيه

و لذا نجد ان الطيب فى كل الدنيا ملهاش الا معنى طيب و عندنا معناها عبيط

عزيزي اوتاكا لا مانع ان تُخاطب الناس على قدر عقولهم طالما ده مش هايأثر فيك تأثير سلبي وطالما ده هايحقق هدفك وطالما ده سيُرضي ضميرك

-----------

أبو علي كتب

و لو صاحب العمل _ اى صاحب عمل فاكر نفسه ذكى و اذكى من الناس كلها يبقى غلطان لان الارزاق بايد الله سبحانه و تعالى و هو سبب مش اكتر

ده أكيد وما فيهوش شك .. لكننا يابو علي لازم ناخد بالأسباب .. مش كده ولا إيه ؟

----------

الشيخ صبح آل مصباح كتب

يا عم س س

هوا إنت كل شوية تفتح موضوح زي الفل وتجري

طب أستر عليه يسترها عليك دنيا وأخرى

--------------

أبو زياد كتب

طيب لحد ما عمدتنا يكمل

ممكن بعد إذنك أرد على أخويا وحبيبى الديزل - بعد إذنك يا س س و بالنيابة عنك

يابو زياد انا لما بأغيب بأبقى متاكد إن ورايا رداله تاكل الزلط

[محمد عبدالعزيز]

أنا مازلت مختلف معك يا سى السيد

الحكم على الناس بالمظهر يضر المجتمع بالطبع, لأنه صورة من صور تضييع الأمانة, بمعنى توسيد الأمر لغير أهله وهو بالتأكيد ضرر للمجتمع.

أنا متفق معك أن المظهر الجيد مطلوب, ولكن بشرط ألا يكون هو الفيصل فى الحكم على الناس, وأن لا يكون المطلوب المبالغة فى التجمل والتزين لدرجة تصل لحد الإسراف.

أما أن يرفع أقوام ويخفض آخرون بسبب المظاهر, فهذا بالتأكيد تضييع للأمانة وضرر للمجتمع.

ودعنى أسأل ما هو الأفيد بالنسبة لصاحب العمل؟

أن يهتم الموظفين بمظهرهم أم أن يهتموا بإتقان عملهم؟

طبعاً الأفضل أن يهتموا بالاثنين, ولكن لنتفرض أنهم لا يستطيعون أن يهتموا إلا بشئ واحد المظهر أو إتقان العمل, فماذا سيختار صاحب العمل؟

بالتأكيد صاحب العمل الذى يهتم بالربح وتنمية استثماراته سيهتم بإتقان العمل.

أما من يهتم بالمظهر على حساب إتقان العمل, فهو فى رأيى شخصية مريضة تعانى من نقص ما وتحاول أن تعوض هذا النقص بالتفوق المظهرى.

[se_ Elsyed]

إحنا لسه بنتكلم على نفس الموجه يا محمد

وأنا في كلامي لم أذكر أو أركز على المظهر فقط

لكن إنت لما بتيجي رايح مكان ماحدش يعرفك فيه .. إيه اللي بيتقدم ويأتي أولاً

شخصيتك أم مظهرك ؟

ومش إحنا بنقول بالبلدي إن الجواب بيبان من عنوانه ؟

يعني تخيل كده سين سين قاعد في يوم لقى في جواب مُسجل بعلم الوصول لكن شكله من بره كإنه ملفوف في قرطاس طعميه ... طبعاً مبدئياً كده ممكن أقرف أفتحه .. لكن فتحته واللي كان كان ولو إن زيت الطعمية بيحمى على قلبي .. المهم لقيت الجواب جاي لي من " نيكول كدمان " بتقولي إنها إطلقت من الولا توم أبو كروز وهي اساساً ما كانتش بتحبه لكن إتجوزته عشان تكيدني وتخليني أشعر بالغيرة واهلها برضوا غصبوا عليها ...

طبعاً قلبي هايزقطط من الفرح .. لكن سيبقى في القلب شيء من تأثير الجواب المزيت

[nancy]

اولا يا س س ثمن الاسمنت والحديد بقى فى العالى ابنى دلوقت احسن من بكرة

وبعدين نيكول كيدمان اطلقت من توم من زمان واتجوز واحدة تانية اول امبارح فى ايطاليا

بس انا معاك المظهر مهم جدا والبنى ادم الى متناسق فى شكلة بيكون كمان متناسق فى طبعة

الهدلة مش معناها ان الشخص عبقرينوا

بس فية حدود للمظهر المتوسط الى المفروض الانسان حتى لو صنايعى مينزلش عنة

والمفترض ان كل ما نرتقى فكريا نرتقى شوية فى الشكل

الشكل الخارجى جزء من الداخلى 100%

[otaka]

أنا مازلت مختلف معك يا سى السيد

الحكم على الناس بالمظهر يضر المجتمع بالطبع, لأنه صورة من صور تضييع الأمانة, بمعنى توسيد الأمر لغير أهله وهو بالتأكيد ضرر للمجتمع.

أنا متفق معك أن المظهر الجيد مطلوب, ولكن بشرط ألا يكون هو الفيصل فى الحكم على الناس, وأن لا يكون المطلوب المبالغة فى التجمل والتزين لدرجة تصل لحد الإسراف.

أما أن يرفع أقوام ويخفض آخرون بسبب المظاهر, فهذا بالتأكيد تضييع للأمانة وضرر للمجتمع.

ودعنى أسأل ما هو الأفيد بالنسبة لصاحب العمل؟

أن يهتم الموظفين بمظهرهم أم أن يهتموا بإتقان عملهم؟

طبعاً الأفضل أن يهتموا بالاثنين, ولكن لنتفرض أنهم لا يستطيعون أن يهتموا إلا بشئ واحد المظهر أو إتقان العمل, فماذا سيختار صاحب العمل؟

بالتأكيد صاحب العمل الذى يهتم بالربح وتنمية استثماراته سيهتم بإتقان العمل.

أما من يهتم بالمظهر على حساب إتقان العمل, فهو فى رأيى شخصية مريضة تعانى من نقص ما وتحاول أن تعوض هذا النقص بالتفوق المظهرى.

و الله يا اخ محمد كلام فعلا محترم

لما كنت طالب زمان كنت بضحك على الدكاتره فى الجامعه علشان معندهمش خلفيه عن الموضه و اللبس لكن دلوقتى ببص للناس دى على انهم اساطير ماشيه على الارض

[أبو زياد]

كمل يا أبو السيد

كلامك دولار - درر

لأنك تأتينا بالأمثلة و الردود بطريقة بلاغية جميلة - وفقك الله

قصدت أن تكمل الحديث إلى جوانب أخرى

وأن أنبهك إلى ان جميع مشاركات الإخوة مثل اخى محمد عبد العزيز هى تثرى الموضوع جدا و جزاهم الله خيرا جميعا

كلامك وكلامه كلاهما صحيح ولا تعارض بينهما

الخلاصة : يجب ان نهتم بمظهرنا و أول انطباع عنا

+ يجب ان ننمى فى مجتمعنا ان المظهر ليس هو كل شىء = نكمل جميعا فى نفس الموضوع