ثورة البصل

[romy]

ثورة البصل

يا اللى البصــل في عهــــــدك الاســود وصـــــــل لخمســـة جنيه

على فين تــروح من ربنـــــا هـــــا تقول له يوم الحشــــر ايــــــه

اللحمة بتخاصنما م السنة للسنة والفاكهة بنقول للعيال دي للغني والبيه

لكن الخضار والفول ما فيش عنهم غنى من غيرهم الشعب ها ياكل ايه

بيقولوا ان الكوسة دي شعار النظام لكن جنون السعر مش قادرين عليه

ولا الفاصوليا والبسلة والبطاطس والجزر والراتب اتنزعت بركته ليه

فيه ناس بتهبش من البلد بالمليارات وناس شاغلها الطماطم سعرها بقى ايه

وناس تموت بالتخمة من دم البشرعاوزة تلاقي اي باب وتصرف فيه

وناس يعدي اليوم ساعاته مرار مشغولة تعمل سندوتش المدرسة بايه

لما قالــوا له الشعب مش لاقي البصل قال قطعوا التفـــاح وقلوا بيه

قالتها قبله انطوانيت من زمن شوف رد شعب فرنسا كان ازاي وليه

وهو طالع المقصلة ها يقول (بصل) زي ما هي قبله قالتها..(جاتوه

ما بقتش سلعة رخيصة في سوق الخضار الا الخيار الاستراتيجي وسعره ايه

بيقولوا سعر الطن منه مع العمولة والمشال وصل ف سوق الجملة ربع جنيه

هو وعبدالله وعبدالله الصغير والكبير واقفين في سوق الخزي بينادوا عليه

لكن لا اسرائيل بتطلب سلعـــته ولا حتى بوش استـــــحى ووقف يقلب فيه

ربع قرن الشعب شاف فيه الهوان والكرسي منصوب والصنم ملزوق عليه

والناس بتسأل عزرائيل ضيع خرايط المنطقة ولا اجهزة المباحث قاعدة بتشوش عليه

مجلة الإعصار

undefined

[bentmasria]

والناس بتسأل عزرائيل ضيع خرايط المنطقة ولا اجهزة المباحث قاعدة بتشوش عليه

بصراحة يا استاذ رومى موضوع ثورة البصل ده هايل وياريت ربنا يكرمك وتضم له ثورة الطماطم والفراخ واللحمة والعدس والحاجات الكثيرة اللى اصبحت اسعارها لا تصدق ولا يستطيع تحملها من كان من متوسطى الحال او فقراء وطنى الحبيب وهم نحن جميعا الآن

لسان حالك سيدى هو لسان حال اغلب مواطنى بلدك فتحيتى لك لاحساسك وكلماتك الصادقة

لكنى سأقف امام شىء واحد من اخت لك اخى الكريم

الوزن سيدى قد افلت زمامه منكم واعتقد انك اخى الفاضل لو قرأت هذه الابيات بصوت تسمعه اذناك وسجلت ما قرأت ثم استمعت اليه لاحسست اين يأتى القصور وتمكنت من تعديلها بكل يسر

وفقك الله اخى الفاضل

وننتظر جديدك