ديوان الشاعر سمير عبد الباقى

[اشرف سمير عبد الباقى]

هتـــــاف

مصر ماهيش مبــارك

مصر..ماهيش سوزان

مصر مش عساكر أمـــن أو ليمــــــــــان

...

مصر الفلاحين

مصر الشغالين

مصــــر الإنســــانيـــــة

من فجر السنين

كانت للحضارة

وللعـــــــالم هديــــــــــــة

وضميـــــرالعـدالة الحيّ من زمـــــان .!

...

كم عــــــــدو غدرها

وخــاين بـاع ديارها

جـوع وخوف قهرها

بالفســـــاد حاصرها

وأهـــــــو آن الأوان

...

ياللي تحبوا مصــر ـ محتاجة لنصـــــــر

إيديكو ويا إيدينـــا ـ نكسّر قيودنـــــــــــا

كفاية نوم قومـــوا ـ نعدل الميــــــــزان!!

[اشرف سمير عبد الباقى]

الجـــــار السّـــــو..!

مــن حـظ أمـه ،القنـابل تحتــُه ريــش وقـــزاز

والسـّفاحـين في أمـان حُضـنه ، ملايـكة لـــذاذ

يـا واهب الكلب ديــل من غــير نغــم هــــزّاز

ومصَـبّر البـقرة عــاميـة في سـاقيـة الإنـــجاز

مــادام عطيته حجـاب.. دخـْـل الكنـال والجـاز

إبلينــا إحــنا بمصيــبة تـاخدنا نــاس فــــاترين

علي العجيـن نمشـي ولاتوبنــاش من التـلسيـن

إقطـع لسانـّا الهجيــن نخرس يســار ويميـــــن

يمــكن إذا مــــا انكتـمنــا نفــوق ونفــهم مــيـن

أهـبــل خَبــَلـْنـا وخَــيَـلـْْنـا بـــكل دي ألـغــــاز.

[اشرف سمير عبد الباقى]

الوهم المشروع

لما الصورة العامة بتسرق روحك

تلهيك عن هم الناس في جروحك

ما تشوفش في عين الأبّات العاجزين دمع الأطفال

ما تحسش باليأس القلقان ....

في قلب الخلق المليان بالشك

إنوّ لبكرة حتطلع شمس..

يغدرك الليل الغاشي عليك بالويل ..

يقتلك العجز الي بيلف علي رقاب الشبان قللات الحبل

ويسم بدنك عطن المواويل..

المتبحْترة زي السمك الميت علي وش النيل

يلهيك عن فـُحش الصورة يخدعك البرواز

ما تشوفش حقيقة التهاويل ..

إن خطوط الكرافتات السولكا – براز

وان الألوان الأكوريل الي موهوجة في خدود السادة

وعلي جبين الجنرال وإبنه ومراته

مش ألوان لكن نفايات نفط وجاز

وإنه الحبر اللي محدد شكل حروف كلماته

وبيلمع في تكاسيم تقاسيم قمصانه و ﭽاكتاته

أصلاًَ مش حبر..

زيه زي الألوان الزيت والمية مش ألوان

رغم أنها معجونة في باليتات فخمة من عاج ورخام..

دايب زيها في مية من بول الخيل

ودماء الأطفال ..

صدقني والا مش ح تصدقني

بنفسك بحلق تتحقق

جس بطرف صوابعك أطراف المنظر ..

تلاقيها عتـّة وبايشة من أنفاس الجنرالات المُغتالين غدر

ومن صرخات الأيتام المغدورين بالجوع و الفيْرس

والفلاحين المقتولين بالمَيّه مجاري ف أطراف كفر الشيخ

تتأكد إن الخلفية كلها متــّلصّقة علي هلاليل الخيش

المسروق من لوطـّات خردة (يونية) وكيماويات (يوسف والي)

وخيام حرب الإستنزاف ..أيام الجيش ..

تتحقق إن المنظر كله علي بعضه منظر وهمي ..

وإن الصورة العامة كابوس

وانه مافيش فايدة تغرق في التفاصيل

والقال والقيل ..

الحال افظع من كل التحاليل ..

والخطب الثورية والمقالات الكوميدية

عاجز عن وصفه حتي دم الشعرا في المواويل ..

الصورة أصلاَ وهمية من تحت لفوق..

إحذر تغرق في التفاصيل الجارحة

الصورة العامة كابوس ..

وما فيش فايدة غير إنك تصحي ..

وتخرج من أسر خيالك .. وتفوق !

[اشرف سمير عبد الباقى]

غنوة حب

يا واد يا عـــايق بضفيــرتك

الكـون ملـوّن في حصيـرتك

كل البلد جـايبـة في سيــرتك

وانت كما الطيـــر الرّايــق..

طاير ترفرف بالجنـاحـــات

حوالـيك ترش الحب آهـات

وكلـــنا شبــــان وبنـــــــات

متحـيرين.. طب ليه حيـرتك؟

هوّن عليــــك أحزان روحك

علينا ما تهـــــونش جروحك

بكره القمر يضْوي سطوحك

وتشوف مواسمـــها شجرتك

لحظة فرح لو مســـــروقة

في الريح ترفرف مطلــوقة

لمّا الضفـــــيرة العيـــّـــوقة

تنفــك وتنــوّر ليـــلتــك .!!

[اشرف سمير عبد الباقى]

نهايات منطقية

زمن الرجولة انتهي فا قلع هدوم المغامرة

إلبس جلود الفيران

عصر الشيلان والطرح والمجد للنسوان

لا يقة عليك الموضة يا كداب

من صغرسنك صبي سايق العبط ع الجنان

إمتي طلع لك شنب و لمين وقف لك زبان

كنت الفريد العجيب ألعن من الدبان

أفـْكه من الكتكوت وم السعدان

تنعق بصوت الغراب كلّ امّا عرْق يموت..

وتموت في جلدك لو غريمك بان

فاسكر بريق الحنان

إنعَم بعمر الشباب..

زيك عصي ع الموت وع الحرمان ..

ربك مِبارك في عمرك..

سيدك عاطيك الأمان

عاطيك هبَل من وسَع ما تشوفش غير نفسك

من تحت عقب البيبان اتسرسبت شمسك

ولا خُرم إلا اتسع..

ولا عبد إلا اتهان..

فإفسح لنفسك فرصة الملكوت ..

إنسي ذليل أمسك..

في جمر آهة الوجع إحنا اللي بنـوّح

بَهت اللئيم ع الجدع و الندل متسطـّح

إتسببت لك كافة الأسباب

وكل البدع..

تقول وتعمل كل ما بدالك

انت الوحيد اللي يملك م البطرـ قمرين

شطين ووطنين

من كل زوجين

فافرح وزقطط سكتك مش خضرا

حاشفة وناشفة كصخرة في (العلمين)

فات الميعاد ع الحساب

ما فاضلش غيره الطوفان

ما عدش فيه بكرة

إنت الوحيد اللي أدري باللي بالي بالك..

وبفرْط لايّام اللي باقية لك..

فَكرة كـَكـَف القدر ما تفوقش م السـّكرة..

تشهق ما تلحق .. تصب الخمرة لعيالك!!

[اشرف سمير عبد الباقى]

ثورة الشك

أشوف أهلي صفوف خلـْفك

ضعيفة وخايفة لا تخالفـَك

وضايعة في تفاسيرك..

وانا بجهلي البرئ شايفك

خيال وهمي ..وضل خيال..

رهين بطبول مزاميرك

في زفة من تراث الكدب

تايهة في غيم مقاديرك

لذا بأعلنها مش خايف ولا آسف

لا ح اشكي ليك ولا لغيرك

ح إقطع كل دساتيرك

ح اخطي كل محاذيرك

أحرر كل مأسيرك

وحتي آخر المشوار

لا عين ع الجّنة ولا في النار..

ح اغني غنوتي ف إصرار

و أرفض ذل تفكيرك

واعيش فرْحان قوي بنفسي

برئ من راحة الإذعان

في إيدي الجمرة حمرا موهوجة بحبيّ

تحصن قلبي م القهرة وم الإدْمان

ما تلزمنيش خطوط سيرَك

ح اموت متباهي ع الدنيا في حرية

ـ أنا الإنسان!

[اشرف سمير عبد الباقى]

أولويــّات

لا تذكروني .. واذكروه الوطن

وليه صَبح عـَوْره كشفها الزمن

وما عادش ليّه ف ذكرياته نصيب ..

ولا لـُه في ذاكرة التاريخ غير محن

من يوم ما باعني بلاش وغيري قبض التمن

ونسيتوا اسمي زي ما نسيتوه..

سيبتوه يفرفر م الشبك ويتوه..

باض الشيطان في عقولكو قهر

صابكو الوهن

الدايرة لفـّت ـ بس بالقطاعي ..

وفضّل الرأسمالي يبقي إقطاعي ..

وهرْتل العسكري صدفة لأهل العلم

وهو بيرتل بكل العَلـَن ـ مدد يا رفاعي

عمداً وداس بالجزمة علي أضلاعي

هرس صباعي نسيت السّر ورا أوجاعي

ما بقاش علي شرف العَلـَم مـُؤتمن..

مزّع خرايطه لحين أصابها العفن

دفن تاريخه الحي في رمال البحور

من أجل مايأذيش مشاعر الملك

ولا يعكر مزاج الست والأولاد ..

يدفن آماله البسيطة في هديم الزمن ..

...

لذا اذكروه واتعمّدوا نسياني ..

الكدب إحياناً يكون إنساني ..

مادام تاريخ الخوف بقي بينساني..

عطشان في قبري ولحمي من غير كفن..

وقصايدي ما قدروش يعزّوني

فانسوني لكن ـ إوعوا تنسوا الوطن !

[bentmasria]

مرحبا بك استاذ اشرف بيننا

يبدو انك ممتلىء حماس وثورة اخى الكريم محاورات المصريين ترحب بكل قلم حر وواعد ونتمنى دائما ان نرى المزيد من حرفك فى ركننا الهادىء

حروفك تحمل فى طياتها ثورة على كل الم يعانيه القلب المصرى ومصر تفخر بأبناء يكونون لسان حالها فقط اتمنى الا تنسينا الحماسة

الوزن وموسيقى الكلمات فهى تجعلها اسرع سريانا الى قلوب القارىء والمستمع ايضا

مرحبا بك مرة اخرى

دمت بكل الود

[اشرف سمير عبد الباقى]

نهـــايـــــات

لما الوطن بيشيخ

يعملها علي روحه

تنزف جروحه .. بشر وديدان

و ناس حشرات

وتنكسر نفسه منهم

يوطي بسطوحه

تخيب آماله في بكره

يحكمه الأموات.!

•

لما الوطن ينذل..

تلاقي وزنه خف

تاه في الخريطة وقل

ماء الحياه في عروقه يبقي ملح وخل

نهره من القهر جف ..

لا يرق ليه الندي و لا يراعيه الطل ..

•

لما الوطن ينهطل

ما يشوفش فين الاتجاه

ينخع علي كيفه

ينسي حدود الحياه

ريفه الحنون ينسعر

يـِكـِلّ منــّه البصر

عِداه ترقـّع قفاه

وزعيمه يصبح .. بطل !!

[اشرف سمير عبد الباقى]

سكة اللي يروح..!

غـَصَبتني ( الغولة ).. إغـْتصبتني

أخدتني سنين لتوهتها

خايلتني في سراب الرمل بالأحمر وبالأخضر

شاغلتني في بحر المية المتعكر

غشت لي عينيّه بالترتر والتوت والعنبر

للعتمة الضلة ندهتني ..

غنت لي غناوي خبلتني ..

و لا ضيّ في ضلمة عريانة سحرتني

سكرتني بدون خمرة ـ صحيت

اتهيألي إني نجيت

وعبرت حدودها وعديت..

إتاريني علي مدة إيدها مهمـَن مدّيت ..

خطوتي عنها خطوتي ليها

غنايا من شفرة ألحان أغانيها

لا صدي ليها ولا سمعتني ـ خذلتني

تحت المطرة قصايدي باشت من أنفاسها

هزمتني ..

روحي ساخت في قلبي مرار في حشايا

إنا اليتيم المتيـّم و صابني السهم في صبايا

ظنيتها حبيتني ..

لما حضنتني..

علي وش ماء النهر صوت الريح و رسمتني

أتاريها في سلاسلها طلقتني

ع الخوف ورعب الجهل ربــّّتني ..

قنعتني أقاوح ما بين العـُذر والتاني

و أنا بأراوح مكاني

أساوم الكدب وانكر صدق وجداني ..

من ما ساومتني علي أحزاني

خدعتني ..

خاصِمت سني وعشت غريب بزماني !.

يا ستنا (الغولة) ميتك باردة

رميت عليك السلام

فضِلتي ليه شاردة

وزمـّتك علي شفتك وردة

خدعني همس الرخام ..

و جناين الدخان

إحترت بين السكك واخترت بإرادتي

كإني فارس زماني ورحت لنصيبي ..

ظنيت عدوي حبيبي و سيفي كان خردة ..!

...

من يومها حد النهاردة..

ـ لســـــّّة ما رجعـــــــــتش ..!

[اشرف سمير عبد الباقى]

وبعدين.!

الخـــلق تايهة في بلاويها

باللقمة سُحـــت بتقضيـها

ولو الغمــوس لط إيديـها

تقول فجَرنا وهلـّسنــــــا

دايرين في ساقية خربـانة

تنزح في بيــر كلـّه خيانة

والأرض م الخوف عّيانة

في ضل أوهامها نعسنــا

وفوتنا ابــو الهم حكمنـــا

بقلـّة الحيلة شكمنــــــــا..

قطــع لسانــّـا وبـَكـَمنـــــا

كتـّفنــــا لابنه يـــورثنـــا

ِوولـْد ابوه طــــالع لامّه

ماحد مستجـــــري يلمّه

فارد لـــنا جنِحته وكمّه

ولا همّه اننا فلـّسنــــــــــا

...

هريتونــــا كدب كلام وحديت

وف غفلة بعتوا الغيط والبيت

ولفـّتـــونـا في التوابيـــــــــت

نهتف يطول عمر رئيسنا

دا العضم يا ابني مصمصتوه

واللـحم تــونة تبـّـلتــــــــــوه

عيــد الوطـن ـ يوم ما تفوتـوه

تنفك عقدة منــَــاحيسنــا .!

شمروخ الاراجوز نشرة شعرية مصرية علي قد الحال . ولا جريدة ولا جرنال ولا حتي مجلة . ومستقلة عن أي حزب وأي ملة عايشه بنفسكم مش بس بفلوسكم والغاوي ينقط بطاقيته . وأهلا بالأصدقاء زجالين وفنانين وشعراء

والعهده علي سميرعبد الباقي

ارجوا ارسال العنوان البريدى والبريد الالكترونى وسيتم ارسال الشمروخ اليكم

[اشرف سمير عبد الباقى]

من شر ما حسد

إفسح مجال للغيرة واقبل بالحسد

مافي حد إلا وللهوي يخضع..

وبالغرض يحتمي

أو للغرض يخشع..

ما حد إلا ولـُه أكيد عفريته

يطلع له لما يعوزه يا دوب يصفـّر له

يجوز يزمّر له ، يعينه و يغيته..

يا يرقـّصه ع الشناكل حين يصور له

جنة تجمـّل له ذل العيش وفرافيته

عايشة البشر في كـَبـَد

منذ الأزل للأبد

و كل حيّ وملـْهي في حواديته

من صنع إيده قضاه ومتقدر له

وكل قِلـّه يعوز الكل يصْغـَر له..

فكون كبير علي قد موهبتك

إفسح مجال للغيرة من طيبتك

بعض القلوب في كـَمَد

من غلّ عجز الفعل تنكرها

وشعرا يا ما زُحـَل مش زي منظرها

القرش كاسرها

والكدب من كتر ما كدبت علي روحها

وعلي غيرها

ما تشوفش في الضي أبعد من مناخيرها

فاقبل قانون الحسد

ما ح يبقي في الأرض إلا بعض ما ينفع

في الشعر أو م الزجل

كل الزوابع هـَباء.. كل التوابع زَبَد

في الريح بيذهب جُفاء ولا يحسه أحد..!

شمروخ الاراجوز نشرة شعرية مصرية علي قد الحال . ولا جريدة ولا جرنال ولا حتي مجلة . ومستقلة عن أي حزب وأي ملة عايشه بنفسكم مش بس بفلوسكم والغاوي ينقط بطاقيته . وأهلا بالأصدقاء زجالين وفنانين وشعراء

والعهده علي سميرعبد الباقي

ارجوا ارسال العنوان البريدى والبريد الالكترونى وسيتم ارسال الشمروخ اليكم

[اشرف سمير عبد الباقى]

ڤيديــو كليــب

صرصار بيغنّي علي منصّة لأنبوبة

أسمر صابغ شَعرُه أصْفرْ ـ

وسطـُه لهلوبة

وجنبه فار مزرعة في نافوخه زنوبة ..

بتغازله ميت ضفدعة..رخْصتها مسحوبة

بتنافسه في الجعجعة علي نوتة مقلوبة

لكن الغريب العجيب الشكل ـ أعجوبة

المخرج العبقري أبو قرن متزنهر

وذمة مخروبة ..

سهران يشخـّر موسيقي تهز وسط الفيلم

لجلِنْ تتم الخطة بالمسطرة

وتكمَل المسخرة ـ حسب أصول العلـْم

يرضي عليه الأديب العِرّة إبن المرَة

اللي رَباية المجاري العتمة و السراديب

علشان يجيبــْنا لورا

مُسخـة لثقــافة السّـــلم!

شمروخ الاراجوز نشرة شعرية مصرية علي قد الحال . ولا جريدة ولا جرنال ولا حتي مجلة . ومستقلة عن أي حزب وأي ملة عايشه بنفسكم مش بس بفلوسكم والغاوي ينقط بطاقيته . وأهلا بالأصدقاء زجالين وفنانين وشعراء

والعهده علي سميرعبد الباقي

ارجوا ارسال العنوان البريدى والبريد الالكترونى وسيتم ارسال الشمروخ اليكم

[اشرف سمير عبد الباقى]

نبيل الهلالي

أنا لا غنيمة غـَوَتني ..

ولا سلطة قهر احتوتني ..

لا رأسمالي كسرني ..

بدّلت له موالي ..

ولا جنس كاكي قهرني

عَدلت فيه أقوالي

وحدَك يا شعبي ـ

اللي حلمك كان دليل قلبي

وكنت صاحبي ـ

وعزوتي ودربي

في عِزسود الليالي ..

منــّك حلال قـُوتي

وليك بـِلال صوتي

لفجر بالنور يلالي ..!

..

وعشان كده موتي

يشبه في حبّك حياتي

لا قصر عالي

ولا سلطان ولا والي..

َبِـلـْبـِل لي في الحق بالي..

ومن بدايتي

لنهايتي

كنت النبيل والهلالي !!

شمروخ الاراجوز نشرة شعرية مصرية علي قد الحال . ولا جريدة ولا جرنال ولا حتي مجلة . ومستقلة عن أي حزب وأي ملة عايشه بنفسكم مش بس بفلوسكم والغاوي ينقط بطاقيته . وأهلا بالأصدقاء زجالين وفنانين وشعراء

والعهده علي سميرعبد الباقي

ارجوا ارسال العنوان البريدى والبريد الالكترونى وسيتم ارسال الشمروخ اليكم

[اشرف سمير عبد الباقى]

شمروخ الاراجوز نشرة شعرية مصرية علي قد الحال . ولا جريدة ولا جرنال ولا حتي مجلة . ومستقلة عن أي حزب وأي ملة عايشه بنفسكم مش بس بفلوسكم والغاوي ينقط بطاقيته . وأهلا بالأصدقاء زجالين وفنانين وشعراء

والعهده علي سميرعبد الباقي

ارجوا ارسال العنوان البريدى والبريد الالكترونى وسيتم ارسال الشمروخ اليكم

[اشرف سمير عبد الباقى]

فوانيس الأراجوز التعيس فى ليل المد والتوريث

* إنت النموذج ، وإحنا كلنا أشباه

لو شئت إنت نبى ملهم. أنت نص إله

قول ما بدالك واعمل ما بدا لابنك

نعيم رضاك ح يكفينا ما موتى ـ حياه

الكل دبحاه هزيمته بيبكى على ليلاه!!.

* كم للزعامات حسابات على حسب الشعوب تلاكيك

تسوق عوج رأيها لوجع القلوب تماحيك

كان لك منين كل ده وزرعك شجر عاقر

وكل عامر خربته ونفضت منه إيديك

كابس نفسنا.. هتفنا بدمنا نفديك!!

* سماحة ملك شعب مصر العزيز مطرطق ودانك لروما وباريز

عشانهم بتعزف همومنا نعم

يطول حبال اصطبارنا اللذيذ

يعشمنا لحنه برجوع لانجليز!!

* بتصبغ مشيبك بنيلة وهباب

عشان تقنع الدنيا إنك شباب

فصدّقنا ما دمّسه الكدب فينا

وطفحت علينا طباع الكلاب!

من الجوع نشمشم نفايتك كباب!!

* ضربوه على قفايته خدوه على المشم

وغرقوه عطايا.. صبح أعمى وأصم

خدعوه بالجات فصدق بحق العولمة

لو طاطى شعبه اكتر يصير هو الأهم

حفظ درس اللى حشش محبس باللى شم

* اتنين وعشرين سنة تحبى وما بلغتش

ياللى انت مصمصتها للعضم مارحمتش

والبعدا بيدلعوك ويجملوا الصورة

يكحلوا العورة رقص وكورة مافلحتش

لحقوك بقفة عيون/ بحلقت مالمحتش

* لو مؤمن ليه مش خايف تصحى قدام ربنا عريان

عوراتك كلا باينة ومخفى ملفاتك ح يبان

وساعتها ح تُعرض ع (الجماهير) بلا حوله

ولا ينفع أمن الدولة ولا يشفع خلف الصبيان

راجع نفسك واحسبها (مصري) يا غلبان!

* طول التاريخ مصر فقر وجهل عثماني

آخرتها قهر المرض كبدى وسرطاني

وعتاة جيوش الجباه ساقوا الهبل ع العبط

إيه الغلط أن تعود ملكية من تانى!

طول عمرها عباسية ولاية سلطانى!

* الدنيا ماشية معاك عشان انت فى القلعة

والمجد حواليك أمم لأن ريحك مطاوعة

ديتها طير الحوارى يطير بريش وجناح

يضيق عليك البراح وتنطفى الشمعة

بعض الشرر قد يفجرها نيران والعة!!

* من غير ما يشرب لها تفاحة ولا ينسون

شرعى ح يقعد على كرسى أبوه فرعون

لا عمره خطا قنا ـ ولا تاه فى حدوتة

وحى ياكل (التوتة) من شجر الرضا المهزوم

رضيتى ليه بالسكون؟ وكانت حركتك قانون!!

* طفل الأسد.. خبرة عصرية وإنترنت

فى جميع شئون الوطن على سلو أبوه ح يبت

والكل حامد وشاكر فضله.. ومهاود

مادام بلبدة حى يتمرن.. ويصبح حنت

دا ابن أمه بشنب، حتى لو كان بنت!!

* أفسالها ع الكرسى يبقوا من ذوات الهمم

جندرمة وبيادة أفندية وكباتن ـ رمم

لأنها ورث شرعى لكل هب ودب

نهبوها واستكتبوها صكوك براءة الذمم

وهى منذ ابتداها ـ تاريخ ضمير الأمم!

* للجن ميت حق لو خافوا يقولولك.. لأ

والنمل والطير وأسراب الجراد والبق

طول ما سيادتك على الكرسى ورب كريم

من كل زوج بهيم ـ رزقك فى غرب وشرق

واللى بيرضى المذلة يحق فيه الحرق!

* خلاص بقت مسخرة كل البلد قشلاق

حسب مقام رتبتك تتوزع الأرزاق

لبس المدير بدلة كاكى بسلسلة وضبابير

واحنا المراسلة بخبرة نزبط الأوراق!

واللى (خري) ف سينا بيبعبع فى بر بولاق!

* خُدنى على قد عقلى واشرح الجاري

دى مصر؟! والا انكشف لعدوى أسراري

عسكر على كل ناصية غير ميدان الحرب

وجنرالات مطهومين بين رقص ومجارى..

وأنا قلبى ينزف عشان أعزف بأوتارى!

* عفريت العلبة اللى مراهن على فقر خيالنا

بيسوق الهبلنة شيطنة ومبرمج سوء أحوالنا

بيشرع فينا الكدب يطوّع حق الملكية

نصبح ورث هنية للى يتموا أطفالنا

فينا اللى مكفينا. ارفعوا رجليكم عن مستقبلنا

* بالاغتيال بانتخاب بالورث باستفتاء

الابن فوق كرسى أبوه يرقد بلا استحياء

ياللى انتو فاكرينها لعبة حظ ومصادفة

على قفاكم قُليل صك ألف حذاء!!

عصر الهزايم عايزكو ضحايا مش شهداء!

* فيه ناس على نية تسرق يصبحوا محابيس

وناس علانية تلهف موقف السرفيس

تسرق رغيف م الفقر تقطع نفس

تسرق وطن بالقهر تصبح رئيس

والعقد شرعى برضاها أمة المتاعيس!!

* نص البلد عسكر على نصها

ودا اللى من بدرى قطم وسطها

لو كان بعتهم يزرعوا الصحرا

ماكانش فلاحها شحت قمحها

ولا خرس بين الأمم حسها

* ماعدتش مصدق إشارة المرور

وبايت مآمن لفتحى سرور

مجالسه وجرايده بتنهش فى قلبك

تغمى عينيك فى السواقى تدور

تعبى الهموم فوق قرونك يا تور!!

* الخلق متبعترين ما بين رصيف ورصيف

متعترين شرق غرب ما بين رغيف ورغيف

الأزمة ضاربة الخلايق ع النافوخ جزمة

ومالهش لازمة الشرف نفسه ماعادش شريف

حكم الجهالة المخيف خلا الأمل تخاريف!!

* من مرج (برج العرب) لمغانى (شرم الشيخ)

والجنة متعة بشر صدفة قدر وتاريخ

وارثينها شرعى غنيمة مهر وهزيمة

فى حروب مخيمة تفرقع للسلام صواريخ

والسلم والحرب بمبة خيارة أو بطيخ!!

* بينى وبينكم سنين من فقرى مانسيتهاش

بينكم وبينى سجون قهرى اللى ما تفناش

سجانة كتبة دكاترة مخبرين شعراء

بوشوش أليفة مخيبة غيلان وحناش

بعتوا الوطن كاش وسكرتم بدمى بلاش

* يا رازق النملة قوتها فى حجر صوان

ليه ضاقت الخية على الرزقى وع الفنان

ذو العقل زاحف ورا فتافيت رغيف العيش

والجهل متربع على القمة عمل سلطان

صايبه العما وكحلة أمه العامشة ششم زمان

* ابن الأسد له عرين الغابة مش عمه

خصوصى لو واد مخلص شبل وابن أمه

كله ح يخرس مافيش حيوان بيتكلم

واللى مسلّم أكيد له مصلحة تهمه

خدوه مثل حكمة واكفى القدر على (تمه)

* كل أما سكعوه قلم على طول يدير الخد

كإنه من يوم حبا ما صلبش حيل ولاقد

والواطى يفضل مطاطى ولو ركب مهرة

الصدفة وهبت له قدرة وشهرة مش على حد

مع الخيانة ـ الكنانة تصير وطن ع القد

* عز الظلام الجهول الجاهل الزنهار

اللى ما كفاهش ليلنا فطفى ضى النهار

بدمى ح اكتب له شعرى نجوم فى عز الضهر

تفضح أبوالعهر اللى حكم فى الوطن تجار

باعوا لنا رمق الحياة وباعوه للاستعمار

* لابد على قمة طرطوفها

بتبرطع فى جناين خوفها

فى وهم ان الحال دايمة لك

والناس م الجوع فقدت شوفها

لأ. فوق دى الأيام بظروفها

* لايق عليك هذا الهدوء الفريد

اللى يبغويك بيه شيطان عربيد

قال لك تغابى تجاهل كل ما بيضايق

ح تبقى عايق على القمة وهمه عبيد

دا اللى اشترى مصر باعها (لوّط) خردة حديد!!

* واهم تانى رجعوا بخيانة وعساكر

وانت فى غيبوبة ماانتش مذاكر

ح تحزن ح تشمت ح تفرح بإيه؟

ومهما ح تنكر عذاب جوعنا كافر

مصيرك يا بيه رهن فتح الدفاتر

* من يوم رهنها الزعيم على نسبة فى الميه

عدى يناير بليد ما انتفضوا (حرامية)

يا هلترى الخلق نسيتم الهموم الجوع

والا الجموع رقدتها سكتة قلبية..

قطعت شعوبنا الخلف من غلطة قومية!

* بيطولوا ع الكراسى دمهم يزرق

يبقى الميراث شىء طبيعى إنه يصبح حق

حتى ابن فجلة اللى أمه كان بترعى الغنم

صبح كبابجى ولا قدرنا نقول لها ـ لأ

لذا ح يحصل ـ ولو قلبك كمد ينشق

* يا اللى أنت ساحب من وشوشنا حمرة الخجل

وبجزمتك دايس فى قلب الشعر مسخت الزجل

سايق الهبل ع الشاشات تعلنا ـ تذلنا

طب دلنا لو كان لنا بحضرتك نتفة أمل

(عيان فى ميت!!) حسها ـ ما عادش يجرحنا المثل

* يا ريس الحى خفف عن ضميرك.. مات

خلق الجمال والشرف جوه البشر إخوات

طفحت معاك العيوب على الوجوه مسخرة

والجهل صار مفخرة والسمسرة درجات

م الحسرة صبح الفقير يبكى على الخواجات

* بيقولوا راح يخلفه ابنه بفكر جديد

لأنه طالع لأبوه وأمه ومش تقليد

بس انت قول لى قديمكم إيه وأنا أدركها

وافهم فباريكها ليه بعتوها خردة حديد

* كان شر بره و بعيد، أصبح بكم تقاليد!

* أوراق التين على سذاجتها بتخبى ثماره

والديك الخايف م التعلب بيدارى آثاره

وزعيم الأمة اللى مكمل بجيوش وعقول

بمزاجه بيستدعى عدوه لاستعماره

مين المستحمر؟ طب مين الجارى استحماره

* لو كنت حاسب حساب فيه حد ح يحاسبك

لم كنت تعمل ولا تقول غير مابيناسبك

خدعوك جميع اللى عدموا العزة غنوا عليك

عملوك (نوايه) سنادة وسبحوا باسمك

عزوة ندم من عدم فى الوهم بتقاسمك!

* لو.. لسه ما شبعتوا (بز) ابنى يرضعكو

وإن كنتو ما فرحتوا زماميره تدلعكو

وإذا لسه فيكم رفق للاعتراض ـ دوغري

جيش تحت أمري/ وأنا ف قبرى أركعكو

دانا اللى شخلعكو حبه ورعبه ربعكو

* الشاعر لاخرس لاعمى هو اللى حويط

لو يدى الطرشة لزوبة العامشة وأبوالنطيط

فى سوق العصر، يا يخطف رزقه يا يموت بيه

الشاطر هو اللى بيعمل ليام دى عبيط

ملعونة الخيرة، لوتبقى يا زعيط.. يا معيط!!

* بتفتى بما تجهله فى اللى ماتعرفهوش

ساعات خواجة ساعات عمة فقى وطربوش

وبر الغلابة اتنحل من كتر نتفك فيه

وأكلت مال النبى شرعا ومارحمتوش

واللى اختشوا ماتوا حين افتى اللى ماخجلوش

* يا عمى جاتكو القرف هزمتنى بلاويكم

كم عشت وهم إنى كنت بروحى أفديكم

ضحايا؟.. يادى العجب وانتو الجناة والسبب

موتى..! برغم أن قالعة الأرض رجليكم

تفتوا عيش الحرام لفطار أفنديكم

* بلّغ يا طير شكوتك للشجر

واشكى همومك يا غيطان للمطر

أما انت يا جعر فاكتم حار آهاتك

طرشة الحيطان، فاتك ميعاد السفر

امتى ح تفهم وتتعلم لغات الحجر؟!

[اشرف سمير عبد الباقى]

دعاء المغلولين

يعيش مبارك ألف عام

محمى من الموت الزؤام

ومن العَتَه ومن الفصام

من الكساح ومن الزكام

ومن الجرب ومن العجَز

ومن الجذام

عاش مستقيم

ومستديم ومستدام

فى ظل ورعاية المدام

لحين يرجّع للوطن

وجهه لأمام

يغسل له جسده

من العفونة والسخام

يوصله لمجده القديم

يفك عن بطنه الحزام ..

يعيش مبارك ألف عام

اشمعنى بورقيبه

وكيم إيل سونج

والمخفى فرانكو

والا أبو الهمّ وسخام

اشمعنى هوّ ؟! ـ بتنكروا فضله

على حفظ النظام

م البهدلة والحاقدين

والمدمنين سقط الكلام

من ربع قرنينْ

أو يزيد شغّال تمام

آمون مبارك خطوته

ومراعى زنقة أزمته ..

يحميه من السم الخفى فى لقمته

يرقيه من الكدب

اللى بتدسه الغباوة فى كلمته

ينْجيه من الغدْر

اللى فى عيون اللى عايزين يورثوه

ومن اللى عايزين بالحيَا

فى قلّة حياء يكفنوه

الناكرين فضل القمر

وبالظلام بيتهموه

العاجزين عن الغرام

وبالغوايه يظلموه

المنكرين الشمس

عاجزين م العمى أن يلمحوه

مش مدركين أنه مازال

هوّ الوحيد هو الأحد

بالعشرة عافق دفة المركب

بقوة القدر

ملئ السّمَع والشم

والذوق والبصر

ملاح فى بحر رهيب خطر

ما يدركوه

فارد شراع مصر

اللى قبله قطعوه

فلاح خطاويه ع الصحارى

ولا المطر

خضّر صحور سينا

ومارينا وتوشكا ..

ياما بالفراولة والجزر

وصّل لشرم الشيخ

مجارى من عسل ترعة دموه

يا خلق هووه

يا موتى اصحوا وحدوه ..

وادعو معايا لربنا بحق اليتامى

وبحق من فرق الحلال من الحرام

يفضل باروكه لمصرنا ماركة ودليل

زى الهرم وأبو قير

وجبل الطور ونهر النيل

ما فيش زيّه ولا غيره بديل

قابض ع الجمرة ما يفلتش اللجام

يحمى المراكب م الغرق

وقطورة السكة الحديد

من الحريق ومن الصدام

يرُمّ عضم المكسورين النفس

باللقمة الطرية والحمام

ويهد حيل الطماعين

ببنوك وشورى واحترام

إحنا قرَشنا ملحتُه

ودقنا مر قرفته

تهنا فى سراديب حكمته

وحفظنا تقاطيع طلعته

حتى آمنا من قلوبنا إنه خير من قِلّتُه

فوقوا وحسّوا يا غَجر

عجز البشر عن التمام

مع أن إنّه من خيار خير البشر

نَفَسُه فى نبض الأرض فى عروق الحجر

يسرى بإكسير السلام

*

يعيش مبارك ألف عام

لحد ما يرتاح جميع المتعبين من التعب

يشفى جميع المرضى من الأمراض

يساراً أو يمين من الغضب

يرتب الفوضى على شرع النظام

يظبط الفلتان وينعقد الديوان

شى الله يا أهل الله

وبركة حصانته

ترجع الهربان بأموال البنوك

يتعلم البرسيم معاشرة الهالوك

يرتاح قليل الأصل

تتلضم السلوك

يُشطف تاريخ مصر الملوك

م الجرسة والهذيان وإدمان الشكوك

يحتاروا فيه

يتعجبوا أعاديه

ويشتوا حساده الهوام

بفضل سحر وعبقرية

القرايب والحبايب والمدام..

السهرانين يرتبوا الصدفه لأولاده وأحفاده

إلى يوم القيام

يعيش مبارك ألف عام ..

*

* ما عادش غير النّفاية تلغْو صوافيها

على دق طبل الختام وفيها لأخفيها

لكل واحد خطيّة حمْل على كتفُه

أعمى ومن كتر همّه

بيقرا خطه فى كفّه

إنشل جدر الشجر

الخوف رَبَك صفه

النيل عجوز عاجز حزين على نفسُه

والميه حتى السم مابتفوتش على عطشان !

....

كان حلمك إيه يا خلفة الأحزان ؟

ماتت ( فهيمة ) وطفلها فى بطنها

لجل الضيوف يشبعوا ويستكفو

يوم ما خرجت كسير من الزنزان

....

يا ريتنى قلت الشهادة

كنت أخلّص نفسى

خدعنى طبعى الملاوع قالها أبو العريف

أو قول مزاجى الشريف

ما عرفتش الأيام كورق الخريف

بتموت على غصنها حين تدبل الأحلام

كان لِسّه إيه فى جرابك تنسى بيه طبعك

والا تطاوع مطامعك

ولسّه مين من صحابك ناسى ح يطاوعك

الخطوة بينكم ما كانتش عمار

الغدر فرّخ طيوره جوّه حوش الدار

الضعف صاحب القرار

والحزن ألزم له التزام الصمت

الشعر خان الريف وبلّغ فرار

وأنت بخيابْته التزمت

لما سكرت بخمر لاستقرار

وفات الوقت

هبت رياح الخريف

هيا أشربوا من كيعانكم نخب الاستعمار

ياللى عيونكم غفولة عن ملامحها

من أجل الاستمرار

عقولكم سرق الجهل مفاتيحها

ماكانش عنده الحجّة يسامحها

على عفة الثوار من كتر فضايحها

على غلطة منذ البداية فايحة روايحها

.....

السيف على رقاب الجميع بتّار

مهمن يطول لانتظار

ما باقى غيرها النهاية

واضحة خوافيها فى أنياب جوارحها

ما فاتْش ليكو سوى نفاية

تلغْوصوا فيها

وتخلطوا حزنها برزيل تفاريحها

وتخربشوا للتاريخ والذكرى أساميكم

على اللى باقى من هديم الجوار

شمروخ الاراجوز نشرة شعرية مصرية علي قد الحال . ولا جريدة ولا جرنال ولا حتي مجلة . ومستقلة عن أي حزب وأي ملة عايشه بنفسكم مش بس بفلوسكم والغاوي ينقط بطاقيته . وأهلا بالأصدقاء زجالين وفنانين وشعراء

والعهده علي سميرعبد الباقي

ارجوا ارسال العنوان البريدى والبريد الالكترونى وسيتم ارسال الشمروخ اليكم

[bentmasria]

مرحبا بك اشرف وباشعار والدك وقد سمحت لنفسى بجمعها فى موضوع واحد واخترت له هذا الاسم لنحفظ لاعماله القيمة قيمتها

ولكى لا نفقدها فى غمرة المشاركات

اتمنى ان نحظى بالمزيد منها ومرحبا بك دائما حيث يستمتع الجميع بكل ما هو جميل وحر ومعبر

[اشرف سمير عبد الباقى]

اعترافات الزعيم الأوحد

أنا مالياش وطن..

ولاعمرى حبيت بيت..

لأنى مش إنسان وعمرى ما حبيت.. ..

أنا نموذج زعيم الدولة والتنظيم..

فى صدرى شوق حنت فاجر قاطع طريق ولئيم..

لذا عمرى ما استحيت..

لأنى ع الحرمانية عاقد النية..

مضغت كبد الديابة النية واستحليت

ودقت لحم البشر أطفال فما استكفيت

وفى دموع اليتامى غرقت فاتوضيت

على رقاب المؤمنين بمواهبى أنا استعليت

عديت .. عليها حين إمام صليت

يادوب ح يلزم ليه صفين من عساكر ميتين القلب..

ينيموا الملايين من المغرب..

وصف أفندية ميتين الروح..

يصبح كلامهم حجة ع القوانين..

أرسم حدود الحرام والأدب والدين..

واحسب حساب المعارك والغنا والحرب..

أبنى صروح الوطن والحق والتقويم..

فأنا وعدكم للكرامة - المجد مهما خطيت..

أنا عزكم من عوارى ضعفكوا استقويت..

ما نمت ما اطمنت ما ونيت..

عينى مفتوحة مثل الديب إذا كنيت فافهم يا من حبيت

وحزت حسن الفطن وقسوتى الإنسانية..

وحضن عرشى وضله هو البيت..!

سمير عبد الباقى

[اشرف سمير عبد الباقى]

الوداع

الوداع ياماما نجلا

ياللي زوق إيدك عملنا

ونور عنيكي كان خيالنا

وبحنان رسم جمالنا

وعطانا شوق أمالنا

أن بكرة يبقي أحلا

.

الوداع ياماما نجلا

باللي عيشتي العمر لينا

وإحنا عيشنا العمر بيكي

لما نبكي أعذرينا

ياما كان عشمنا فيكي

نعمل الدنيا جنينة

للجمال والحب دوله

.

الوداع ياماما نجلا