ديوان الشاعر سمير عبد الباقى

[اشرف سمير عبد الباقى]

غنوة الأراجوز

دبدوب الكسلان وأبو لبدة المدهش

وحسن قرن الفول وأخوه المكرش

وأخدين علي بابا لمدينة الأحلام

شافوا رحمة فغابة والشعر منعكش

قابلني تعليبوا قولت هنبقي أصحاب

أتاري القرد كروكي سد علينا الباب

روحت لحجاج دوقة والديب بولينياب

هربم مني وجريوا أفتكروني مفتش

.

جاتلي السندريلا مع حسن الصياد

قالوا الكتكوت لأخضر تاه في بلاد وبلاد

قولت بقالي أصحابي ياما بنات وولاد

حورية ومرجانة راح نرقص ونفرفش

.

ياعرايس ماما نجلا نورتوا المسرح

بعصايتي والضحكة الزعلان يفرح

وخلو بالكوا بلدنا محتاجة مصحصح

صاحي وأرجوز زيي شاطر ميونش

[اشرف سمير عبد الباقى]

غنوة الجد

أنا جد وعاشق لبلادي

وبعلم دايما أولادي

لو يحكوا لأحفادي تاريخنا

راح نبقي في عظمة أجدادي

أنا جد وعيشت سنين أجيال

ومازال قلبي زي الأطفال

عيل مليان حواديت وخيال

بتحير بين حادي وبادي

أنا جد تعالي قرب مني

حهعطيك الحق تعلمني

وأما أصغر يلا أكبر عني

وحمامة نطير فوق الوادي

أنا جد لكين دايما أسأل

أزاي الدنيا تكون أجمل

بخيال مجنون تصبح أعقل

وتجمعنا قلوب وآيادي.

[اشرف سمير عبد الباقى]

وا اسلاماه

يارسول الله أغيثهم

جهلهم حطم نفوسهم

نسيوا مين سارق فلوسهم

مين...؟وبالجزمة دايسهم

وعلي الكلمه حاسبهم

بمقاس الخوف محاصرهم قايسهم

يحتكم فيهم خبيثهم....

يارسول الله تعالي

امتك صبحت في حالة

واقعة في شبك الهبالة

نصها فقر وبطالة

لابسة خيش أو لابسة بالة

واكلة من باقي الزبالة

ونصها التاني بيتحكم عوالة

نفط والا قحط والا زيت بقالة

ارتضي ذل العمالة

والشيطان أصبح فارسهم

يارسول الله أمانة

نظرة لدموع الارامل والحزاني

زيح عن الامة غيامات الجهالة

اللي زرعها ف اراضينا الخيانة

تدي للحكام حصانة

وللشعوب عيشة المهانة

اللصوص عسكر رئيسهم

بالاصالة وبالوكالة

يعملوه صاحب الجلالة!!

يارسول الله حنانك

ياللي كان العدل والحرية شانك

الالة م الظلم والعبودية صانك

وحفظ عزة مكانتك

كان حنانك عالفقير مجدك نيشانك

وكرامته من كرامتك

أمتك صارت إهانتك

أمتك حالتها حالة أستحالة

كيف ح تتباهي بها يوم القيامة

ظالمين راكبين حصانك

كدابين ناطقين لسانك

ولصوص واخدين مكانك

بالعساكر والكهانة

يارسول الله حنانك

بالأمانة تعالي غيثهم

خد بإيدها أمتك ارحم بائسهم

بالامل أحي يائسهم

بالأيمان طهر خبيثهم

قد يجوز وعقولها تصحي

توعي إيه معني الاهانة

ومعني ايه العقل زينه في العقل صحة

تفهم الفرق المقدس

بين رسول الله وطول قامتة

ومكانته

وبين إهانته

في رضاهم ذلهم والاستكانة

للي حابسهم في سجن الخوف

وسجن الجهل ليمان المهانة

اللي متربع علي عرش الخيانة

فقر بيحطم نفوسهم

ودايسهم تحت قهر

عساكر الاذعان

لمراسيم الوراثة

ومواريث الحصانة

[اشرف سمير عبد الباقى]

غنوة لمصر...

لولي يالاللي

ياحلوة ياللي انتي السنابل والعيدان

ياحلوة ياللي انتي الندي وحي الكيزان

لولي يا لا للي ..

ياحلوة ياللي انتي علي سطوح البيوت ..

حس المطر صوت الاذان

ياحلوة ياللي ..

انتي علي شطوط الترع ضل الكافور صفصاف مدلي ..

ياحلوة ياللي علي القنا حبة الجسور ميل يصلي..

ياحلوة ياللي انتي في ليالي الصيف حواديت السمر ..

كان يا ما كان ..

وكام يكون ليا..

ياحلوة ياللي في المواجير العجين اللي اتخمر يابنت ملي..

و ف ساعة القيالة نسماية هوي بتميل تميل لي..

و في المنادر الكلام المتعبر ..

وفي الساحات انتي العيال وانتي القمر يارب خلي ..

وفي الهجير صوت اليمام ..

فوق النخيل والسسبان ..

ياحلوة ياللي ..

للغريب الدار الحنان ساعة اللقا ..

مرحب يا خلي وللجعان ريحة الخبيز طعم الظفر ياولد ناو لي ..

للوحدانية في المنام .

ساعة هنا ساعة تجلي وللبنية انتي العريس المنتظر ...

وأربي اليبيبان ياصبية طلي ..

وانتي مواويل اللي نهدود م الشقا ..

فاحت ترع ..لافع في اكتافة معلي ..

وانتي بشاير الفرح وشوشة الدكر يا رمل قول لي ..

وانتي هديل المداحين راقص الفجر ..

يافرحة هلي ..

ياحلوة ياللي من زمان ......بزمان .....انا... عشتك انا ....

وعشقت حتي القش وحشيش القنا ..

ولعبة الدخان علي صدر السما ..

ورقصة المحرات علي ضلوع الحجر ...

وطلعت الفجرية من ساعة سحر ...

وندهة المية علي جدور النبات ...

والارض...

لما تبات شراقي ...

وتنام وتصحي ..

صابرة مستنية ...

صوت السواقي في نايات المية...

ولشمس لما تشقشق الصبحية وانا تشق اللوزة في الضهرية واما تحن ترق في العصرية ... وتلم كل الخلق في المغرب ...

يدفو قلب الجسر والزراعية ...

وفرحة الشغالة بالنقدية ...

والضحك والملاغية والمكاكية والمنادية عشتك انا بالحب ..

والحنية بنيت لنفسي في حضنك البنية من كل مكان حي وخدت منك اتر ...

م الارض ..

م المية ..

وم الطين والشجر ...

وبرضة عشتك كمان يامصر ..

في الانسان ..القادر الشقيان ....

اللي عرق جلابيتة الورد شمة فتح الاكمام حسيتة في دمي ...

ساعة شميتة ...

شلتة ف عينة...

فردت لة الاحضان ...

وف قلبي لميته... لولاك ...

ولولاة عليه....

كنت اللي عشت احلم بة ما صدقت ولا كنت حسيت الامل وقاسيته واللي قريتة يامصر ...

كنت نسيتة... !..

[اشرف سمير عبد الباقى]

ما شبعش لسه الأمريكان دمك

يابنت شيخ البلد لساك في صدرك نفس

لسانك في حلقك لسان

وقادره لسه ع الخلف والولد

وامك بتملك ملس من صوف ومن كتان

وابوكي لما يموت... لسه بيلقي الكفن

ولسه ليك أخ غايب راح يشيل همك

لذا ما أنش الأوان... لو تفهمي العقده لو... ويحسها (العربان)!

ما شعبش لسه الأمريكان من دمك..

لسه ف بلادنا مشايخ فاهمه في التواريخ

لسه مدارس بعقل تفسر القرآن..

وشطوط بتطرح عسل منجه وساعات بطيخ

ونخيل بيرمي حموله كافة الألوان

وزهور بتفهم فبتفتح علي الألحان

وشعر من نظم أمك/ وزجل (بديع) عمك

لذا ما آنش الآوان ...

ماشعبش لسه الأمريكان من دمك...

لسه الكنايس بتسهر كل دخلة عيد

وجناين العشق تطرح غله في المواعيد

والنيل في عز المجاعة القحط بيوافي .. يفيض ويزيد

وفي الجليل – الأدان من مدنه الأزهر السهرانه ع التجويد

الحافظة العهد بالتقوي وبالتجديد

لساك قديمك جديد

نهرك في نفسه وشوقه يخضر الصحراء

وأهل الربابة مازالوا بيحكوع الشهداء...

تونس بتقرأ أمهات الكتب

وأسكندرية تلون بحرها في الصيف...

وصور (جمال) لسه في صيدا علي الجدران

وفي المدينة الحمام لأخضر يقول يانبي ...

(البابا) رافض أن يزور القدس

غير وابتسامة الحر فوق فمك

لذا ما آنش الأوان...

ماشبعش لسه الأمريكان من دمك...

عايزين يشوفوك سطيحة

زي الجمال الدبيحة ملقحة ع التل ...

ينهش حشاها الديابة كل بورصة وسوق

آخر نفس – آخر حجر حي في إيدين أطفال ...

آخر قصيدة شعر لها معني

أخر اهه فى موال

آخر بريزه حلال..

عاقداها أم اليتيم للعيد في طرف الشال

آخر رغيف شمس ف بيوت الصعيد الطين.

------------------------------

عايزين يقابلك نسيم الصيف .. وما تشموش ..

ولا يحسكش

الضل ما يريحكش ..

التمره ما تشعبكش

أخرس وأطرش ومعدوم الشرف والدين

تفتح لهم بوابة المختار وحوش عابدين

وتسب ع السبحة (شهدي) و ( سعد ) و(عرابي)

وتهد لجل الشالية .. (باب توما) و (المتولي) ... وتهدم الأهرامات

ولحاجةالاعلانات تنقش حجارة الطوابي

تخضع لحكم الحصار...

تلاقي شمسك في المدار بتولي.. في حضن الغرب.

يميل معاها الناموس لما الميزان يختل

تفوز شريعة التجارة .. يحكموا التجار

الشعر يرهن حجته للبنك

النفط ينشف .. وتجيف شطوط القري...

يحل عصر الافترا والضنك ...

يسمح لنا بس قد ما يسمح السمسار .. فروق العملة والأسعار.

----------------------

مطلوب رقبتك في سلاسل حديد

وحلم امك .. في ققص من جريد..

مطلوبة مش بس راس (الحسين) وحده..

لا .. مطلوب خيانة (يزيد)!

يركع جبينك في التراب ينذل

فتنسي معني كلمة إستعمار أو استغلال

وننسي (ست الحسن) والشطار

نفتح بيبان الدار لكل شريد.... ومن المحيط للخليج .. نفضل وطن محتل!!

[اشرف سمير عبد الباقى]

داء الوفا طبع الكلاب

(رعاة الشاة تحمي الذئب عنها...

فكيف إذا الرعاة هي الذئاب ...!....)

ياسيدي قتلتني

هل من هزيمة تالتة تابته علي ايديك

تاخدني تحدفني علي فين خدتني

حولتني خصيان عبيد

حكمت فيه ملكتني شردتني ... أحزان في عيد

بين التمني والوعيد .. جوعتني ...

""أتبعك راض من بعيد..""

أخرت زمني سلبتني الدهشة من الكدب الجديد

وبضحكة باردة رعبتني بنظرة عينيك أخرستني

نطقتني

""فإن دماً أجريته بك فاخر

وأن فؤادا رعته لك حامد""

ياسيد ... ياسيدي ... رحماك سماح...

في أي شرع ورثتني ..

كرهتني حلول المسا طلوع الصباح

أكرهتني نسيتني افرح بالقمر

توهتني في سكك السفر....

وبغنوه السوس في الشجر سممتني..

براحة الضل اللي كان يشفي الجراح جرحتني

نزفتني دموع قلبي دم.. أوهام وهم عصرتني..

دفعتني تمن السلاح اللي انت بيه وبكل فخر قتلتني ...

ياسيدي يكفاك.. تاريخ يكفاك خطب

– أقلام موالي – موالد ...

ربك كريم وح نحمده ..

ياللي بك الشعرا إهتدوا..

بقت القصايد كلهن بكافة الأسواق محض فوائد

ياسيدي... يكفاك دما.. ياسيد ...

"نهبت من الإعمار مالو حويته ..

لهنئت الدنيا بأنك خالد...""

ياسيد ...

يكفاك رصايد من مصايبنا وتكفي مصايد

أحنا اكتفينا من الهزيمة بالإياب...

من الرجوله بالشناب...

من البطولة بضل شيخ أو ضل باب

ماعدش حته ف جسمنا وجسم الوطن تكفي لخنجر أو لتصريح أو حراب...

الجلد ياحجر ... ياداب...

البركة نشفت والكتاب إصفر من كتر الهباب

الحرة كان في الأصل يقتلها السباب

دلوقتي يسبيها الغراب

اللي بيغنيها بريشة عن الهدوم وعن الهموم وعن الشباب..

أيه لسه في جرابك لزوم الإغتراب ... زهقتني...

إيه باقي في صحاريك سراب خادعتني

حيرتني بين السما وبين السموم.. قطعتني

كل المدن صبحت (سادوم) ضيعتني

يكفاك حروف علي كل لون

خطب غضب وخطب جنون

خطب جدل.. وفنون علي شك الظنون..

سحر ودجل ...

من كل جدر خلعتها فخلعتني ..

يكفاك عذاب سم ف عسل

سقت العباطة علي الهبل. وبلا خجل ...

حملت قلبي الهم بدري حرمتني ضي الأمل ..

" ما ازددت حين وليت إلاخسة..

كالكلب انجس ما يكون إذا إغتسل.."

ماقدرتش انطقها زجل

فبدون زعل أرضك سماك جرذان كلاب. (هو عوعوة) .. أفزعتني...

تحت الغطا لو انام أخاف.. أحس جندك طعم جلدك في اللحاف

روحي بقت محشورة في القلب الجفاف... خنقتني..

حبة نسيم .. فهقة هوا.. دي الشمس حتي الشمس تحتاج للغياب

يادي الزعيم يادي الرئيس يادي الملك..

ياركن يا مهيب.. يامهاب..

يا من حلبت الثروة من بز الخراب

عصرتني في كاس الشراب

عميت عيوني في ساحات الحرب من أجل السلام

عرّيتني ومن غيطاني قلعتني ..

ياسيدي جميلك وصل

واللي انت ياما وعدتنا وأوعدتنا بيه قد حصل

فاسمعني دون ما عتاب ..غضبك عليّه يهدني..

"فأنت حياتهم غضبت عليهم

وهجر حياتهم لهمو .. عقاب..""

الطاعة حق علي الكلاب .. ياسيدي حبة وفا

حبالنا دابوا والى حطك فوق كتافنا ما اكتفى

لذا عندي حل فيه الشفا ترحل .. تحل عن القفا

وعن الوطن..

حتي وان تبت يدي.. ياسيدي..

من أي داهية بدون سيادتك قد يجوز .. راح نبتدي

وبأى شئ دون خبرتك ..يمكن .. يجوز .. قد ..نهتدى

" وقد يقطع العضو النفيس لغيره ...

وتدفع بالأمر الكبير .. الكبائر .."

فاعملها مره ياطويل العمر (إنك ثائر)..

واهي تبقي كفارة فدا كل الذنوب..

إرحل .. تحييك الشعوب"

..ارحل ..

نشيلك فى القلوب

رمز و امل ح نخلدك وبايدك انتى نحفظ جميلك يا بطل ونقدّرة

وبايدك انت – مش بايدهم – زيد و عمرو تآمروا

نقدرك حين نخسرك

قبل الوطن ما يطق كفرآ – من جنابه فنخسره..

[اشرف سمير عبد الباقى]

هموم علي لحن مصري

لابد من مجلس أعلي!

( قطرة من بحر بيرم )

يوم اكتفت مصر بالشكوي لخالقها

سارقها أبدع – نظام المجلس الأعلي

فكل شئ من التخليل .. للكرة

رهن بأمر ومزاج .. المجلس الأعلي

العلم والفن أرزاق مسببه

حسب سماح بنود المجلس الأعلي

العقل قفزا خطى للقرن منفتحا

وبمصر يذوى صريع المجلس الاعلى

بدل وعمم وكابات واشرطة

عجنت دماغ لجان المجلس الاعلى

ترى العواجيز اعجازا مسندة

على كتاف صبايا المجلس الاعلى

يستنسخون دوام الحال لائحة

من عهد فرعون رب المجلس الأعلي

تري البنوك التي نهبت خزائنها

رسمت خطاها خطايا المجلس الأعلي

وتري الحقول التي بارت مجرّفة

لحساب من برمجوه المجلس الأعلي

كافة جرس في البرص حين الفرص سنحت

علقت بحبل نجاة المجلس الأعلي

سقط الكلام اذا فاضت فضائحة

يبلعه رمل صحارى المجلس الاعلي

صار اليسار يمينا في تبرجه

منذ اصطفاه رئيس المجلس الأعلي

فى كل حزب جماعات مروضة

رهين شيكات أمر المجلس الأعلي

في كل حفل تراهم عصبة سهرت

يتلمسون رضاء المجلس الأعلي .

واكم سهرت علي الكورنيش أرقبهم

في كل حفل لذكر المجلس الأعلي

فشفت عجبا رؤوس الخلق قاطبة

تدور سكري كؤوس المجلس الأعلي

كبة وكفته مع الساليزون يلهطه

ابن الي سارق رغيفها المجلس الأعلي

ولأن كل الذي رفع السلاح قضي

ثمنا لأرهاب جند المجلس الأعلي

وكل من – مرة – بالحق أعلنها

أضحي ضحية غدر المجلس الأعلي

أما من فقعت بشعري مرارة الدنيا

فقع مرارتي وكادني المجلس الأعلي

إن كنت أخشي شاويشا مجرما اشرا

أذوب هلعا لذكر المجلس الأعلي

وإذا رماني الهوي فأكلت طيبة

أحسست أني سرقت المجلس الأعلي

واذا طلبت اتقاء الفر مكرمة

طلب اللئــــام دمى فى المجلس الاعلى

وإذا نصفت وحاز القلب كاعبة

قبل الزمان أتاها المجلس الإعلي

لذا سكبت مداد العمر في قرف

خوف احتياجي لحبر المجلس الأعلي ..

فلو أمنت إلي الاذعان منكفئا

لن يرض عنى صديقي المجلس الاعلي

ياقارض الشعر رعب اليأس مزقة

حتى القريض اختصاص المجلس الأعلي....!

[اشرف سمير عبد الباقى]

سم الكلمات

القلب المصرى الطيب-مات

لا عاد بيحس بعضه جوع الأيتام

ولا نهش كلاب الأيام

ولا هبش نياب الحكام..

ولا خدش حياء الستات- مات..

القلب الوطنى الحر اتحجر مات

لا بيرجف من حرقة نزف الأطفال

ولا بيتشحتف على أحوال العمال

ال-متلقحة طوابيرهم ع الأرصف

دايسة على رقابيهم جزم الخواجات..

والسم اللى بتضخه فى عروقهم

لجنة رسم السياسات.. فى جرايد السحت

ومشاريع غسل الدورلارات.. وفضائيات النفط

القلب العربى المبلى بالقحط وبالشعارات

اتسمم-مات

إتفحم فى القطر وفى المسرح

وغرق فى النيل واتملح..

لا فاكر إيه اللى جرى له من سنوات

ولا بيفكر فى اللى حيجرى له قدام

مخنوقة جواه الاحاسيس مشنوقة الأحلام

لا بينشق لطفل بفرفر فى حضن أمه يموت

ولا مستغرب وحل هوان النفس

اللى على عمة أبوه الهلفوت

ولا همة كسرة نفس أخوه المكبوت

لا سامع إسمه ف كشف الإعدام

ولا شايف صورته بتبهت ويا الأيام..

اتقص اتخلع من جدر ضلوعه

اتمزع فى صمت خضوعه-ومات

من كتر تعاطى السم المتقطر من حبر الكلمات!

[اشرف سمير عبد الباقى]

عجل البطيخ

الناس عايزينك أراجوز

علي كيفهم

ع الهادي تزغزغ مشاعرهم

وتراضي تدغدغ عواطفهم

الناس ح تحبك لو ترقص

علي دق كفوفهم

وتغني تدندن علي دوزان أوتارهم

لما يعوزوا.... مش لما انت تعوز..

الناس عايزينك علي مد الإيد

ناعم طيب لين متأين وسعيد

علي قد ما تقدر تراضيهم

وتطمن مخاوفهم

تداعبهم تلاعبهم

واما تلعب في ملاعبهم...

إوعي تفوز – تخسرهم!

الناس عايزينك يويو.....

لكن مش مهزوز

تتنطط علي شد حبالهم..

تتمرمط علي قد خيالهم..

تتزفلط في هبلهم

ميت في دباديبهم

تاخدهم كيف همة بعبلهم

فتكيفهم

لا تنكد أحوالهم ولا تنقد اعمالهم

عايزينك دادة لأطفالهم..

عادة تحفط هايف موالهم..

بصراحة الناس عايزينك

طبالهم زمارهم

أرنب ناعم قط أليف مش سيخ

تجلدهم – تفضح اسرارهم.

بقصايد شعر كئيب ومخيف...

تكشف عارهم وتكدرهم –

(وتدق علي دماغ) أفكارهم

- بالشماريخ!!

[Folana]

السلام عليكم ورحمة الله ...

الاخ الفاضل اشرف...انا شايفة ان الاخت ام مادا جمعت كل مشاركاتك فى الديوان هنا...طبعا تم نقل " حروف لبط من غير نقط " الى الارشيف...وباقى القصائد ايضا لحين مراجعتها وضمها لديوانك

برجاء انتقاء ماتعرضه على الاخوة فى المنتدى..

الادارة