زواج .. او صداقة .. او كثيرا من الصبر في سنين الغربة

[مصري في الكويت]

شوفوا في الأول كده بلاش حد يجيب طوب وزلط ويحدفني بيه ... بس اسمعوني للأخر

مفيش اي انسان مننا بيحب الظلم .. وكلنا بنحاول جاهدين اننا نبعد عنه ... لكن لما احيانا الظروف بتجبرنا ناخد قرار ممكن يكون فيه ظلم للطرف التاني يبقي ايه الحل

تخيلوا مثلا شاب مغترب متزوج وعنده أطفال ... وطبعا مش هيقدر يجيب زوجته واطفاله معاه لظروف السكن في البلد اللي بيشتغل فيها ... لكنه في الاول والاخر انسان له غريزة احيانا بتحركه وأحيانا بيشتاق للحظة حلوة في حياة غربته او صوت ناعم يكلمه يحس بيه أنه لسه انسان مش مربوط في ساقية ....

تفتكروا قراران يتزوج في الغربة من اي جنسية ... ظلم لزوجته .. واطفاله ولا ده حق من حقوقه ...

اكيد حد هيقول خلاص مش قادر يستحمل ينزل مصر ... اصل اللي بيقول كده ما يعرفش ظروف عيشته ايه في مصر اساسا ... يعني من الاخر فكرة نزوله واستقراره في مصر مش هتنفع ده اول شئ

ثاني شئ يا تري من حقه يكون صداقة بريئة مع الجنس الاخر بمعني انه يخرج معاها او يكلمها في التلفيون او يسئلوا عن اخبار بعض ... والمسألة مش هتتعدي الصداقة

طبعا انا عارف ان دايما عرضي للمواضيع بيكون بصياغة سخيفة .. بس معلش

اتمني اني اسمع رأيكم قوي

[مسافر زاده الخيال]

لا ميبقاش ظلم من حقه يتزوج ولا حيسقط في الحرام ولو مسقطش مع استمرار رؤيته المناظر حيفقد فحولته (الحق حق) حتى لو كان ايه (ياكل كافور ويشرب كافور)

ملحوظه:اسف على تطفلي في موضوع لا يمسني شخصيا

[أبو زياد]

واضح أخى العزيز مصرى إنك جمعت ناس كتير بترد عليك معى فى نفس الوقت و انا أكتب

إننى احب كثيرا هذه الموضوعات الحساسة التى تخرج من النفس بدون تزويق أو تزييف

فواضح أنك قد اجتذبت الكثيرين مثلى وصياغتك ليست سخيفة ولكنها صادقة

أخى الحبيب - استهلال لابد منه -وقبل أن أسترسل فى حوارى معك -

لدينا نور القرآن و السنة

نعم لا تستغرب إن كنت ارد من هذه الناحية أولا -ثم سأرد انا أو بقية الإخوة من كافة الجوانب

أيوة -آسف استهلال آخر - أردت فقط أن أخبرك أن شعورك ليس بجديد فقد مر به تقريبا كل من بالغربة - خاصة من يترك اسرته و يجد نفسه فى صحراء - نعم أنا أحس بك كثيرا

ولكن ما ليس بجديد أنه منذ حوالى 1400 عام جاء شاب إلى النبى ( ص ) وقال له ائذن لى بالزنا

فقال له النبى ( ص ) أترضاه لأمك ؟ أترضاه لأختك ؟ وهكذا أنت تعلم باقى الحديث

أخى لا ترد على بالطوب و الزلط كما قلت , لم أقصد الزنا والعياذ بالله و لكنى قصدت أنك هل ترضى بهذه العلاقة لأمك ؟ لأختك ؟ ل.....؟

نعم أخى إنى خشيت أن أقلها ووددت أن تفهمها

إفهمنى أرجوك ولا تتسرع لأنك سوف تتلقى ردودا كثيرة فلا تنسى هذا الرد حتى أستكمل معك

[النسر المصري]

يانهاااااري......انت بتقول ايه ياعم سيف!!!!

ده كلام كبير اوي ...وتبقى مصيبة لو مش مدرك حجم مخاطره وابعاده وتبعاته السيئه؟

على فكرة انا مغترب من ست سنين يا أستاذ سيف!!! والحمدلله ماحصلش اي نوع من انواع الصدقات المشبوهة دي!! ودة على الرغم تني مش متجوز!!!

كمان انا اعمل في مجال ادعاية والاعلان... يعني صباح البنات واللبنانيات والحاجات اللي توديك ف ستين داهية

وقبلها كنت مغترب ف مصر

حيث ان اهلي كانو في الكويت

وانا كنت بدرس في فنون جميله..........وبردو محصلش ولا حاجة من ده ....لاصداقه عفيفة ولا نميسه ..ولا حتى خروجة تمشايه عالنيل زي مابيقولوا

وكبيري كانت رحلات وجماعيه طبعا..!!!

طب تسألني ليه انا بعمل كده...أقولك لان الله جبار عظيم وعادل

فاذا اخطأت انا بعمل تلك الصدقات وتحت ذلك المسمى الغريب وجرجرتني الايام لحب تلك (الولية)....ماضمنش ايه يحصل اقوم واقع في الزير...يقوم ربنا منتقم مني في ولادي او مراتي المستقبليه

واحكيلك قصة سمعتها من نوادر العرب

اسمها (طقة بطقة....ولو زدت....لزاد السقا)

وتحكي عن احد التجار جائته امرأه تشتري منه ....فاغراه الشيطان وبدأ بملامستها .. وكان في نفس الوقت في منزله السقا يضع الماء في البئر لزوجته فما أن فرغ حتى بدأ بملامستها هو ايضاً وبنفس التوقيت

وتذكر التاجر فجأه العلي القدير فاستغفر الله وامتنع!!!

وفي نفس الوقت ايضآ امتنع السق... وولى هاربا من البيت!!

ولما ذهب للبيت .... حتى حكت له زوجته ماحدث

فاستعجب الرجل وقال:( طقة بطقة...ولو زدت..لزاد السقا)

هنا وانتهى حديثي عن الصداقات

اما عن الزواج من جنسيات اخرى منعاً للوقوع في الخطأ...فإن الشرع حلله....وهو أفضل في نظري من الصداقات

ولكن يجب ان يكون بحساب...وكل له ظروفه...وهو أدرى بامكانية ان يخطو تلك الخطوه ام لا...وهل ستتفهم زوجته الأولى ذلك المطلب أم لا....المهم أن يضع في اعتباراته كل النقاط..وليس فقط رغباته

ولنختم قولنا ..ونقول....ايها المحاوراتييون...ان الدنيا فانيه..... فلن تأخذ منها شيئا...إلا عملك يا ابن آدم

والسلام عليكم ورحمة الله.

تم تعديل 21 نوفمبر 2006 بواسطة النسر المصري

[ihabso]

أخي العزيز ،

عايز ترد علي نفسك ؟ أسألها : والبني أدمة (مراتي) اللي سايبها في مصر تكافح وت .....ح الكوته مع عيالي وتتحمل مسؤليتهم ، مش هي كمان أنسانه زيىّ وبتحس ؟ طيب هل أنا أرضي يبقي لها " صاحب برئ " يعينها علي عدم وجودي؟ والا هي مفروض تبقي " راجل " وتستحمل ؟ مش برضه هي لازم تتمسك بالعفة والأخلاق والقيم والشهامة و الأهم وقبل كل شئ .. رضا ربنا لحد ماربنا يجمعنا علي خير؟ وألا حلال عليّ وتولع هيّ ؟

أخي الحبيب ، الأجابةواضحة زي الشمس وماتخربش بيتك وتخسر أمانتك لأسرتك و أخلاقك و أحترامك لنفسك . مكافئة أحتمالك لظروفك أن ربنا هيفرحك بمراتك وعيالك ويبارك لك فيهم لما (أو كل ما) ترجع لهم.

وكمان أنتهزها فرصة وأستعين بالله وقوي علاقتك بيه وهو قادر أن يسمو بك فوق الغرائز ويخليك أنت اللي تسود عليها مش هي اللي تجرك وراها .

وأخيراً أنا وضعي ( ولو مؤقتا") زيّك وتعبان لكن بأجاهد ، ومش بأكتب لك أنشاء ولكن بالأمانه أتمني أن تجاهد و تصمد ولاتخسر نفسك .. في أسر كتييير في نفس الموقف و بتجاهد علي قيمها وتماسكها والله بيعينها ... ماتزعلش مني لو ماعجبكش رأيي. والله معك .

[nash]

صباح الخير

.................................................................

أخي الكريم..سأطرح عليك بضعه أسئله..بطريقه أخري ..وبما أنك فتحت موضوع حساس مثل هذا فأنا واثقه إنك ستجاوب بمنتهي الصراحه..

1. ماهو وضعك المادي الحالي..وكيف كان وضعك المادي قبل التغريب؟

2.كم عدد الأولاد والبنات..ربنا يخليهوملك؟

3. ماهو وضعك العاطفي مع زوجتك ..يعني مقدار حبك لها..وتقديرك وإحترامك..؟

4.ماهو وضع زوجتك في مصر..يعني المسؤليه تقع عليها وحدها ..أم تقوم بالنزول إليها مرتين ثلاثه أربعه علي مدار العام..أو تزورك هي ؟

5.هل تتعامل معها علي أنها أيضا بشر وكتله من المشاعر والأحاسيس...أم آله فقط لخدمتك وقت الأجازة..وخدمة أولادكم علي مدار العام بدون كلل أو ملل؟

5.هل إمكاناتك الماديه قادرة علي فتح بيتين والصرف عليهم..وإمكانياتك العقليه قادرة علي التوفيق بين ضرتين وعدد أخر من الأطفال؟؟

5. مانوع الزواج الذي تريده؟؟ هل زواج مسيار..أم زواج عرفي أم زواج فريند؟؟

6. هل زوجتك شخصيتها وطبعها ممكن يسمحوا لها بتقبل هذا الأمر بدون مشاكل وإعتراض؟

7. هل تقبل أن تقوم زوجتك...سوري .. بس لازم السؤال ده..أن يكون لها صديق تشكيله همومها مع الأولاد والوحده والوضع الصعب الذي تعيشه بدون زوج..يقوم علي خدمتها وعلي توجيه أولادكم ؟

8. هل تتقبل أن تقوم زوجتك برفع قضية خلع وترك الأطفال لتربيهم أنت بمعرفتك ومعرفة الزوجه الجديده؟

................................................................................................................................................

بناء علي ردك الصادق ساعتها ممكن نكمل الحوار

أختك ناش

[أبو زياد]

:angry: :blink: :unsure:

فتحت على نفسك طاقة جهنم

[مصري في الكويت]

ناش

انت كده جبتي عربتين نقل من الجبل محملين بالزلط

انتي فاكراني ايه ........ مجرد انسان شهواني

وانا مش بتكلم عن حالتي الشخصية ....... المسألة مجرد افكار خطرت لي

وعلي كل حال انا ظروفي ما تسمحش اني انزل علي مدار العام 3 او اربع مرات وهي مرة واحدة بالعافية في السنة

عندي بنتين وولد هما كل حياتي وطبعا متوقع سؤال هتقولي ترضي لبنتك وضع زي ده

مفيش اي راجل شرقي في الدنيا يرضي ان مراته يكون لها صديق مجرد اساسا ان الواحد يفكر في حاجة زي كده بيكون عايز يولع في الدنيا كلها ....

حياتي الشخصية ما اعتقدش انها تهم كتير منكم لكن اقول الحمد لله عايش وربنا ساترها

انا عمري ما فكرت اعمل حاجة اظلم بيها مراتي ...... وهي اساسا حياتي كلها

شكرا ليكم

[MZohairy]

وانا مش بتكلم عن حالتي الشخصية ....... المسألة مجرد افكار خطرت لي

طالما الموضوع مجرد خواطر يا مصري يا خويا فأنا رأيي ان الراجل لما يتعب في الغربه يتجوز واحده تانيه بسرعه

والست لما تتعب في مصر تتجوز واحد بسرعه هي كمان والعكس صحيح ايضا

و خير البر عاجله

وربنا يديم الأفراح :angry:

تم تعديل 21 نوفمبر 2006 بواسطة mzohairy

[مصري في الكويت]

يا عم انا مش سايبك هناك في الكنوز

ايه اللي جابك هنا

بالمرة لاقيت الاوبريت ولا لسه

[اسكندرية]

سأكتفي بردود الأخوان : النسر المصري و إيهاب وناش ، وحتى لم اقرأ بقية الردود ، وإن كنت استنتجت مضمونها بناء على الأخلاق المصرية الكريمة التي ظهرت فيها بوضوح

وسأقص عليكم ما سمعت في سياق مشابه ، ويدل بوضوح على ان مثل تلك الأخلاق ( حتى ولو بدأت على شكل صداقة ) لا تتناسب معنا ابداً ، وترفضها ضمائرنا المسلمة والمصرية و العربية :

مصري في الرياض كان في ظروف مشابهة ( تعَرَف ) على فلبينية لذات الأعذار ، ولكنه سرعان ماهوى إلى اعماق سحيقة . الطريف في الموضوع أن الزوج الفلبيني حضر للرياض لزيارة زوجته ، التي اقامت حفل بسيط لزوجها وقامت خلاله بتعريفه على ( صديقها ) المصري ، وأضافت بأنه هو الذي سبق أن حكت لزوجها عنه انه كان يمنحها اللحظات السعيدة والأوقات الممتعة اثناء إقامتها بعيداً عن زوجها !! ، فما كان من الزوج ( الحمش ) إلا ان شكر صاحبنا بكل تهذيب وذوق ( وهو يعلم ) على انه كان يمنحها ذلك الإحساس الجميل .......................!! ( والمصري في نص هدومه ) :angry: :blink:

ما ينفعش معانا الكلام ده خالص يا جماعة .............................. صدقوني مش إحنا اللي نعمل كده

يا أخي قل لصاحبك يحاول الإكثار من أجازاته خلال السنه ، بالإضافة الى بقية النصائح القيمة التي اسداها الزملاء قبلي .

[جيهان]

اخى مصرى اظن ان انت سمعت كل الاراء

بس انا ليا ملاحظة وهى مادام انت عندك المقدرة على انك تتجوز تانى وتفتح بيت وممكت تخلف وتصف طب ما تجيب مراتك واولادك معلش ممكن تتعب شوية فى الاول من المصاريف انما اظن هتكون جنبت نفسك مشاكل كتير انت فى غنى عنها .

[nash]

انت كده جبتي عربتين نقل من الجبل محملين بالزلط

انتي فاكراني ايه ........ مجرد انسان شهواني

علي أي اساس سيادتك أخذت الإنطباع ده

.............................................................

وطبعا متوقع سؤال هتقولي ترضي لبنتك وضع زي ده

لا والله أنا أكتفيت بزوجتك الكريمه كمثال علشان هي المعنيه بالأمر

............................................................

مفيش اي راجل شرقي في الدنيا يرضي ان مراته يكون لها صديق مجرد اساسا ان الواحد يفكر في حاجة زي كده بيكون عايز يولع في الدنيا كلها

ولا ست شرقيه برضه تقبل بحاجه زي كده سواء علي نفسها أو علي زوجها..وياسلام لو كانت مسلمه

............................................................

وانا مش بتكلم عن حالتي الشخصية ....... المسألة مجرد افكار خطرت لي

طالما الموضوع مجرد خواطر يا مصري يا خويا فأنا رأيي ان الراجل لما يتعب في الغربه يتجوز واحد تانيه بسرعه

والست لما تتعب في مصر تتجوز واحد بسرعه هي كمان والعكس صحيح ايضا

بيتهيألي كده معدش فيه موضوع أصلا

شوكرن

[أبو زياد]

صح يا جيهان

[النسر المصري]

ياجماعة بالراحة بس كده وصلوا عالنبي

الراجل بيتكلم وبيتشيرنا عشان بيثق فينا...مش عشان نهاجمه!! :angry:

عم سيف ....والله كل واحد اتكلم معاك هنا عشان خاف عليك مش أكتر

وفي ناس مسكت في الشطر الخاص بالصداقات والمرفوض لدى الجميع

وفي ناس مسكت في الشطر الخاص بالزواج من أخرى ...وبعضهم تقبل ونصح لك به..وبعضهم رفض الأمر لان لوقدراتك تسمح لزواج اخرى اذن فلتحضرها

ده باختصار بس

انما انت حبيبنا ياعم سيف ومنقدرش على زعلك...وناش اختنا والله بتتكلم عشان خايفة عليك كأخ محاوراتي :unsure:

صباح الروقاان......تعالى خدلك نفسين من بتوع عمك زوهيري......ده عامل المره دي خلطه انما اييه..عجب عجبب!!! :blush: :ninja:

ايوه ...خددد النفسس..اكتتتتمممممم...ايوه كدة...ابسط ياعم ...اهو مزاجك بقى رايق وميت فل وعشره :blink:

ها قولي ايه رأيك في الطوبتين اللي رميتهم عليك في الأول؟!!! :blink:

[nash]

ابو زياد والنسر..أتعلمتم فين..تهدئه النفوس؟؟

ربنا يجيب العواقب سليمه

[nancy]

شوف يا استاذ سيف

انا حاتكلم عن ان اى واحد متغرب امتة يتجوز على مراتة وامتة يكون فى حالة صداقة بريئة

الشخص لما يكون مغترب بيحس بوحدة كبيرة جدا وبيحتاج اصدقاء وده طبيعى وانا مش شايفة اى مشكلة فى ان اى راجل يكون بينة وبين اى واحدة صداقة بريئة ولو حد هنا مش مقتنع بالنقطة دى يبقى بيضحك على نفسه

لاننا هنا كلنا اصدقاء سواء ستات او رجالة

وانا شايفة ان الراجل الى بيسمح لنفسة بالصداقة لازم يسمح لزوجتة بنفس هذة الصداقة المحترمة

وانا ميفرقش معايا جنس الصديق اد ما يفرق معايا اسلوب الصداقة ومفهومة وكيفية التعامل معاها

نيجى للجواز البشر عادى عندهم احتياجات معاك بس عندهم اولويات

يعنى الى سايب اهلة فى مصر دة بيدور على استقرار الاسرة دى

امتة يتجوز تانى لازم لاسباب صريحة

ان الى فى مصر دى متستحقش الاخلاص الابدى مع انى اشك والا مش حتتحمل كل البعاد دة الا لمصلحة الاسرة

ان يكون احتياجاتة مدمرالة حياتة بس لو فكر شوية حيلاقى انة بجوازة التانى حيدمر حاجات اكبر

وحيكون انانى

فحيرجع عن الفكرة دى

طيب يعمل اية ؟؟؟؟؟

معلش لازم نبقى اقوى من نفوسنا والا منبقاش بنى ادمين

ويحط كل همه انة ينهى غربتة باسرع وقت ممكن لان احساس الراحة فى حياتنا العائلية يساوى حاجات اكبر من المال بكتير جدا

[أبو زياد]

الله ينور عليكى يا أستاذة نانسى

دايما كلامك كله عبر

الأخ تكلم عن صداقة شخصية لا أظن أنها هى التى تقصديها فهى علاقة شخصية تحمل إسم الصداقة

وهى علاقة غير مشروعة فى مجتمعنا وليست علاقة المعرفة المحترمة من خلال الانترنت

أختى ناش

مش عارف تقصدى ايه بتهدئة الأنفاس - قصدى النفوس ؟

على العموم إحنا اتعلمنا حاجات كتير فى اسكندرية - معظمها حاجات حلوة !!!

أخى النسر الطائر

إنت اديت للباشمهندس حجرين والا طوبتين ؟ أفهم بس !

نفسى اعرف إيه اللى مخليك كدة محلق دايما فوق قوى كدة ؟

[مصري في الكويت]

تصدقوا

أنا نسيت هو الموضوع كان عن ايه

[إسلام طلعت]

شوف يا استاذ سيف

انا حاتكلم عن ان اى واحد متغرب امتة يتجوز على مراتة وامتة يكون فى حالة صداقة بريئة

الشخص لما يكون مغترب بيحس بوحدة كبيرة جدا وبيحتاج اصدقاء وده طبيعى وانا مش شايفة اى مشكلة فى ان اى راجل يكون بينة وبين اى واحدة صداقة بريئة ولو حد هنا مش مقتنع بالنقطة دى يبقى بيضحك على نفسه

لاننا هنا كلنا اصدقاء سواء ستات او رجالة

وانا شايفة ان الراجل الى بيسمح لنفسة بالصداقة لازم يسمح لزوجتة بنفس هذة الصداقة المحترمة

وانا ميفرقش معايا جنس الصديق اد ما يفرق معايا اسلوب الصداقة ومفهومة وكيفية التعامل معاها

يارب

انا لسه مغترب جديد

يارب

ميبقاش مخي وعقلي زي التفكير ده

يارب

احمني من شر نفسي

يارب

احفظ لي ديني وعقلي

آآآآآآآآآآآآآآآآآآآآآآآآآآآآآآآآمين