مين بيتعب و يشقى أكتر الزوج العامل الشقيان

[nash]

يا جماعه أنا بيتهيألي السؤال يشمل طرفين..

الطرف الأول الزوج الذي يذهب للعمل..والزوجه التي لا تعمل..وترعي البيت والأطفال..واللذي منه.....لو قارنا هنا...الرجل مجبور إلي الذهاب للعمل..حتي مرات لو حرارته 40

الزوجه..بمنتهي البساطه..تستطيع أن تدخل حجرتها وتنام في أي وقت..وطبعا أنا بتكلم عن الزوجه والزوج الطبيعي..اللي مش هايتجن لو وجد مرة من المرات البيت غير مرتب أو الطعام غير جاهز..

الزوجه ممكن لو مش عايزة تطبخ..يعني مالهاش مزاج..وعادي ممكن تحصل أسألوا زوجي العزيز..تليفون صغير ...للزوج الحنون..هاتلاقيه جايب معاه المطعم كله. :D ..

الزوج بيصحي كل يوم في نفس الميعاد ومايقدرش يعتذرعن العمل مثلا بدعوي ماليش مزاج أشتغل النهارده :P ..ولو لف راسه الجهه

الأخري...شعر بالحقد علي زوجته لإنها بمزاجها ممكن تستيقظ معه أو تاخدلها ساعتين نوم زياده :lol:

نيجي لحتة الشارع..وبشر همج ويكون الأخ من دول غلطان وممكن بكل بجاحه يغلط عليك..إذا كانت أعصابك حديد ممكن تطنش..مع أرتفاع ضغط الدم,,وإذا أعصابك ورق ممكن ببساطه تقضي ليله في سويسرا...ماتنسوش برضه أني بتكلم عن بلد أعيش فيها وبتكلم عن نوعيه ممكن تجيب شلل مش بس إرتفاع في ضغط الدم

ما يستفاد من الدرس........

إذا كان الزوج متفهم وحنون...يبقي الزوجه هاتعمر وتخلي حياته جنه...1

2.وجود الحريه المطلقه للزوجه في أنها تقرر ماتريده في يومها ولا تنتظر الطرف الأخر من مدير أو غفير يقرر لها جدول أعمالها

3.أري أن كل واحد يصلح عربيته..ويادار مادخلك شر

[nora]

والله يا داركر اول ما قرأت مداخلتك افتكرت اغنيه المرحومه سعاد حسني الشهيره بمبي بمبي والتي مطلعها الحياه بأه لونها بمبي وانا جمبك وانت جمبي وانا جمبك يا حبيبي بمبي بمبي بمبييييييييييييييييييي الله يمسيك بالخير ده في الاحلام لكن الواقع حاجه تنيه مش تشاؤم بس ده الواقع

اما انت يا ناش الله يسمحك نوم ايه هو انا شيفاه انا بنيم سيف نور يصحى انيم نور سيف يصحى وهكذا دواليك لحد ماتهريت وشكلي في يوم هرميهم الاتنين والنهرده بعت جوزي ونمت بعد الظهر واول مرة في حياتي اعملها من ساعه متجوزت اني انام وهو صاحي وصحاني وهو شويه ويعيط من العيال !!!!!

اما انت يا س س انت راجل جدع وبتقدر وهشيلك جوز حمام من الي عملاهم على الغدا بس اوعى تقول حاجه لحد بس خليك في صف المراه وسمعنا كلمتين حلوين تاني ارفع من معنوياتي.............

اما يا نانسي والله انا معاكي انا لسه ولده من شهر ونص ومش هقولك ان بعد اسبوعين من الولاده اعدت اغسل السجاجيد لاني وللاسف مريضة نظافه ومش بثق في حد فبعمل كل حاجه لنفسي وانا بولد قيصري بس هعمل ايه قمت بعد الولاده باسبوع وعملت كل حاجه وكل ده ويقولوا الرجاله بتتعب اكتر.....

نانو انا معاكي في الي بتقوليه وراي باه ....

1- الست عليها تربي

2- تطبخ(ودي في حد زاته ملل علشان بس تقرر تعمل ايه)

3 - تنظف

4-تعلم

5-تغسل

6- تشوف طلبات جوزها قميص شراب جزمه نومه وصحيانه كرفتته ولو معملتش كده يبدا يبص برة

ويقول اصلك اهملتي طلباتي كانها بتعمل كل الي فوق للجران

الست ده بتعمله في اد ايه 24 ساعه في اليووم شغاله لا تكل ولا تمل ولا تقول تعبت ولا اجزتي ولا صحابي والقهوه ولازم تعم شويه ترفيه للعيله في مرة مرة كيكه بيتزا ايس كريم بسكوت عصاير مش في اطفال ولا ايه

نيجي باه اخر الاسبوع لازم تخرج العيال ولازم تعمل كل شغل البيت يا قبل يا بعد الرجوع من النادي وغسيل وتحضير

نيجي كل شهر لازم تعرف ايه البيت محتاجه و خضار والذي منه

ولو فيه حاجه محتاجه صيانه برضو هي المسؤوله غساله تلاجه بتجاز تلفزيون حوض نجارة سباكه كله هي المسؤوله

نيجي باه للعصافير والسمك والزرع هي برضو المسؤوله عنهم

كتيييييييييييييييييير متعدوش

امال الراجل يصحي الصبح يتحمل المواصالات يروح مكتبه ويانتخ هناك ويعمل شوية شغل يتخللها ضحك وهزار وفطار وشاي وقهوه مع الزملاء والزميلات وما ادراك الزميلات دول (اخ يانا )

والي قال ضحك ايه لاه يا سيدي بتضحكو وتهزرو متقليش انك اول متتدخل المكتب بتشمر هدومك وتبدا في شد شعور بعض وتقطيع الهدوم على الاقل بتتكلمو في اي حاجه الست مش بتلاقي غيرك تكلمه لما ترجع والاجابه المعهوده ايه الرغي ده (منتم بتكونو زهقتم من الكلام الصبح )

بس يخلصو يرجعو يلاقو كل حاجه على سنجت عشرة البيت نظيف والعيال بتبرق و الاكل جاهز ويزعلو اوي لو مكنش على السفرة وياسلام لو ناكلهلهم كمان

يخلصو ينامو وبعها يصحو على الرموت والقنوات الرياضيه (وطبعا لا انت ولا العيال تفتحو بقكم)

اخر الاسبوع يروحو الفهوه للصبح مهو تعبان طول الاسبوع ولازم يغير جو

اول الشهر يدي الفلوس واتصرفي انت باه

اه مين الي بيتعب اكتر

لا حول الله

انا سالت جوزي مين الي بيتعب اكتر الستات ولا الرجاله فقالي انت طبعا .....اقفلى النور ........................................

وبمبي بمبي

[nash]

يا جماعه أنا مش في صف صنف ضد الصنف الأخر..

أنا اللي شايفاة..مجرد أن الزوجه عندها حريه التصرف بتكون نعمه رهيييييييييبه..مايحسش بيها إلا اللي نزلوا مجال العمل وشافوا قرف الوظيفه...الراجل في جميع الحالات مجبور..للنزول للعمل..سواء قرفان أو فرحان أوزعلان أو حتي لو الدنيا بتمطر..يعني في كل وجميع الأحوال ..نازل نازل..

أنا شخصيا لو أتفرض عليه هذا النوع من الحياة ممكن أنهار..ويجيلي إكتئاب حاد...لكن مش هانهار وأنا رايحه جايه أشوف طلبات الأطفال لإننا بنفذها وأحنا مش واخدين بالنا..يعني الواد جعان بنقوم نعمل الببرونه بطريقه ديناميكيه وبدون تفكير...لو الواد عايز يشرب وبتبقي لسه فارده جسمك..برضه بكل أريحيه بتقومي تجيبيله الميه..أة بيبقي نفسك تلطشيه..لكن من قلبك سعيده وهو قاعد يشفط من الكوبايه..

وبعدين ..كام سنه يعني بيطلع عيننا...ست سنين..مثلا؟ أوكيه أول ما الطفل...يبدأ يربط رباط حذائه..بتنتهي قصه معاناة وتبدأ أخري أخف وطأة..طيب أنا والله العظيم بتكلم من واقع تجربتي.....

أكيد أول خمس سنين..كنت ماببطلش زن..ومقارنه..ويعني أنت بتتعب في أيه..وبتعمل أيه ..مانت مبسوط وبتشوف أصحابك....وكل اللي بتقولوة بحذافيرة...لكن بعد مرحله دخول المدارس ..خلاص ساعتين بيكون البيت بيلمع والغدا جاهز..وصاحباتي قاعدين بيشربوا القهوة..وأستقبل بعد كده المرحله التانيه ..بعد نومه خفيفه ..أذاكر معاهم وأستمتع بكل لحظه..محروم منها الأب..من سماعهم وهما بيغلطوا أو نوادرهم في المدرسه...أو حتي تعبيراتهم المضحكه....وكل ده بعمله وأنا عارفه أني لو ضربت الكرسي في الكلوب..ممكن أجيبلهم مدرس خصوصي..وأخلص

أما بالنسبه للغسيل وتلميع الجزم..والشرابات....فأحنا واخدين القرار..أن السوقه والدهماء..أمثالي وامثال ولادي ..يغسلوا مع بعض..أما زوج السوقه والدهماء فهو المسؤول الأول عن ملابسه من أول ما يلبسها حتي تصل إليه منورة من عند المكوجي...يعني فيه تنظيم للإدارة وزوج متفهم.... ممكن مايكونش ده حال الكثيرين منا..لكن أنا بتكلم عن تجربتي

..................................................................................................................................

نورا...هي في الأول صعبه....لكن ياختي جوزك علي ماتعوديه وتربيه ...فهميه أن كل يوم من ده...أنت ساعتين تقعدهم ..وأنا ساعتين أنامهم........وقوليلي بعد كام أسبوع جوزك عمل معاكي أيه ...أنا ماليش دعوة... :lol:

تم تعديل 26 نوفمبر 2006 بواسطة nash

[Modest]

أنا كنت كاتب كلام كتير هنا .. راح فين :P

ده أنا يادوب عدّلت كلمة واحدة و حفظت التعديل لقيت المداخلة كلها طارت :D

أنا عايز 10 ريال يا س س حق الكلام اللي راح ده.

إذا حد يا جماعة كان وصلُه الرد بإعلام بريدي على الإيميل يتكرم بإرساله لي في رسالة خاصة و هادّي لُّه العشرة ريال :lol:

تم تعديل 26 نوفمبر 2006 بواسطة Modest

[se_ Elsyed]

..................................................................................................................................

نورا...هي في الأول صعبه....لكن ياختي جوزك علي ماتعوديه وتربيه ...فهميه أن كل يوم من ده...أنت ساعتين تقعدهم ..وأنا ساعتين أنامهم........وقوليلي بعد كام أسبوع جوزك عمل معاكي أيه ...أنا ماليش دعوة... :closedeyes:

أهو هو ده اللي أنا خايف منه

إمبارح لسه حاصل معايا الموقف السخيف ده

بنحرص أنا وزوجتي على متابعة برنامج إنجليزي - تقفيل بلده بريطانيا العُظمى - إسمه Supper Nanny بيتذاع على قناة MBC 4 كل يوم سبت الساعة 9 مساءً بتوقيت القاهرة .. وهو برنامج أكثر من رائع عن فن تربية الأطفال .. ومش أي أطفال .. دول بيجيبوا عيال لو كنت انا أبوهم كنت ولعت فيهم بأقرب صفيحة بنزين 95 خالي من الرصاص ... المهم بنتنا مدام سين سين الشهيرة بست أمينة الغلبانة شافت الراجل الإنجليزي - بيغير للعيال البامبرز - لا مؤخذه يا زُهيري ياخويا أنا ما اقصدكش - فراحت فطه من فوق الكرسي وقالت لي : شوفت الرجالة يا سين سين ؟ ياللي ما بترضاش حتى تشيل الواد من الأرض وأقولك الواد هاياخد برد ....والسح الدح إمبو إدي الواد لأبوه ..

ما رديتش عليها لكن روحت لابس الوش البلاستيك وزاغر لها زاغرة كده وعامل حواجبي سبعة مقلوبة .. قامت سكتت على طول .. وأنا بأقول في نفسي : أهي برامج التليفزيون دي هي اللي خربت عقول الستات ...

موديست كتب

تتكلم لها في التليفون ست سَبَع ساعات تانيين مفيش مشكلة

الحمد لله

الحاله عامهههههههههههههههههههههه

[MZohairy]

اخواني

اسمحولي بكلمه

الحكايه مش حكاية التعب البدني بس

حكاية الكفاح النفسي اللي ورا التعب البدني

لا تغفلوا الجانب النفسي ارجوكم

الراجل اللي بيروح الشغل يهرج و يضحك ده نسبه شديدة القله

الا اذا كان شغال في حكومه و مسمار في حيط و بيروح يقضي ساعتين بالطول و بالعرض و خلاص

انما القطاع الخاص

سواء في مصر او الخليج او حتى اوروبا وامريكا

شيئ تاني

خااالص

حاولوا تحسوا بمسؤلية الراجل في المحافظه على وظيفته و بالتالي على مستوى دخله و بالتالي على مستوى معيشة اولاده

حاولوا تفكروا في كم العداءات و الصراعات و التي تكون احيانا غير انسانيه من الزملاء و الرؤساء بسبب التكالب على الفلوس و المناصب

حاولوا تفكروا في الراجل اللي عمال يدور على شغل باستمرار و ساعات شغلتين مع بعض

ده كله كوم

و مسؤليته المنزليه كوم تاني

مين اللي قال ان الراجل مش مسئول عن تربية ولاده ؟!!!!؟؟؟؟؟!!!!

ده هم كبيير من ضمن هموم الراجل الشقيان انه يلاقي ولاده ناجحين ادبيا و اخلاقيا و دراسيا و صحيا

و كتير من الأبهات بيبقالهم دور في مذاكرة ولادهم

و تربية ولادهم

و علاج ولادهم

و عندنا في السعوديه العثور على شغاله كويسه ده من ضمن هموم الزوج و الزوجه معا

فهو ايضا بالقطع مسئول عن تربية الأولاد

و ده لا يعني ان الست مبتتعبش

حاشا لله

انما تعبها في بيتها و هي المديره و مفيش اوبليجيشن صريح و محدد و شرطي

متهيألي ناش وصلالها الفكره

و نص المسؤليات اللي قالتها نوره تنتفي بوجود شغاله

خلينا نروح للجانب النفسي شويه :closedeyes:

[nash]

سي السيد باشا...

أخي في الديرة

برنامج سوبر ناني أو المربيه الخارقه بيجيبلي شلل...يبقي الطفل من دول في منتهي قلة الأدب ..والآنسه تقولك أنزلي لمستوي عنيه وكلميه....ياسلام...روعه...بس ياريت تضيف كلمه وتلطشيه. :closedeyes: ....أنا قاطعت البرنامج ..من كثر البلاهه الموجوده فيه. :blush: :blush: ..والحمدلله عدينا المرحله كلنا أنا والولاد...يعني زوجي العزيز عرف يروضنا :D

ربنا يخليه ويقدرة علي تربيتنا :ninja:

..................................................................................................................

موديست ...كله كوم والساوند سيستم كوم.....

أنت نسيت أن سيادتكم كمان بتبقوا عاملين زي الدي جيه بتوع الديسكو...كل شويه مغيرين علي أغنيه شكل...وعلي بالكم بتظبطوا السيستم..أشي أغنيه سوري ماما <<<<معرفش مين بيغنيها....علي أغنيه حياتي الروح.....للأخ المحترم فضل شاكر علي أغنيه سكن الليل ...لحبيبه قلبي فيروز...وياسلام لو عندك خمس سماعات متوزعين في البيت كله..الزوجه بتبقي عايزة تولع في البيت وكل ده في خلال خمس دقايق.لكن موضوع التليفون ..ما بنتكلمش فيه إلا ساعة الفاتورة....ويقولي يا مفتريه ساعتين مكالمه لجده.....ده لو كنتم بتناقشوا مشكله :D

.....فلسطين..كانت أتحلت وأنتم لسه بتطقوا حنك

............................................................................................................................................

أخي مسيو زوهيري...إن شاءالله أكون كتبتها صح :angry: :lol:

أنا فعلا بقصد الكفاح النفسي...التعب الجسدي مقدور عليه....

لكن الإحساس بإن الواحد مفروض عليه شيء ومجبور في أدائه...إحساس قاتل...

تم تعديل 26 نوفمبر 2006 بواسطة nash

[MZohairy]

أخي مسيو زوهيري...إن شاءالله أكون كتبتها صح :blush: :blush:

أنا فعلا بقصد الكفاح النفسي...التعب الجسدي مقدور عليه....

لكن الإحساس بإن الواحد مفروض عليه شيء ومجبور في أدائه...إحساس قاتل...

الله يباركلك في اسرتك و يباركلهم فيكي

مافيش حد فهم الموضوع قدك

ربنا يقدرنا و يقوينا

طبعا ماعدا سين سين حيث انه مرتاح و معندوش حاجه تعباه :ninja:

و على الملوك فلا تسأل :closedeyes:

[nora]

باه كده يا ناش عيزة تعمليها فيا هو انا قدرة اشوف اصلا من قلت النوم عيزه كمان اخد بوكس

بس مين قال اني بعاني انا بتكلم عن حال اغلب الي بسمعهم (شوف ازاي ) انا والله بعمل كل حاجه لاني مش ببثق ان حد يعملي حاجه حتى في عيالي مش بيجيلي نوم واسيب حد فيهم مع حد دا انا ابني مش بقبل انه يخرج او يبات بره بعيد عني لاني مش بثق في حد ده يوم ولادتي لما اخدوا سيف مني كنت هموت عليه وكان كل همي اشوفه مع انه بيعمل كل حركه والتنيه هعمله موضوع خاص باذن الله

اما انت يا س س

انا اعدت فترة اتابع البرنامج ده بس في برنامج احسن منه بس مشفكرة اسمه بيخلي الراجل يعد مكان الست في البيت لمده 24 ساعه والست يودوها منتجع للتغير والست تكون كتبه للزوج المهام وغالبا الزوج بعدها بيمشي على العجين ميلخبطوش اما سوبر ناني فده عن راي مينفعش مع عيالنا هنا لان تربيتهم بتدي الطفل حق كبير وبعدها اعتقد انه بيسبق سنه لازم الطفل ياخد على دماغه

اما رجوعا لموضعنا انا شيفه ان الست مسؤووليتها اكتر ومش هتنازل عن قراري وبتقولو انه الست مش مجبوره ازاي يعني منا مجبوره اطبخ علشان لاطفال الي معايا مش هاكلهم اي حاجه لازم اكل صحي رز وخضار ولحوم مش بينفع نظام السندوتشات وخاصة ان سنهم كده اه ممكن يوم ابلطج لكن مش كل يوم لو بلطجت يوم مهو بيطلع عليا تاني يوم فبتربا ومش بكررها

ولا ايه

[nash]

نورا يا أمورة

شوفي يا ستي أنا وجهه نظري فقط في الجانب النفسي وأنا بس هارد علي كلامك..اللي فعلا بيضحكني من قلبي وتعليقاتك اللي خارجه من القلب.. :ninja: :angry:

انا والله بعمل كل حاجه لاني مش ببثق ان حد يعملي حاجه حتى في عيالي مش بيجيلي نوم واسيب حد فيهم مع حد دا انا ابني مش بقبل انه يخرج او يبات بره بعيد عني لاني مش بثق في حد ده يوم ولادتي لما اخدوا سيف مني كنت هموت عليه وكان كل همي اشوفه مع انه بيعمل كل حركه والتنيه هعمله موضوع خاص باذن الله

شوفتي ده قصدي يعني أحنا اللي بنعمل كده بمزاجنا..يعني بدافع من الغريزة الأمويه..مش لإن فيه واحد ورانا ماسكلنا الكرباج؟؟؟

أحساسك أنه بمزاجك في حد ذاتها نعمه تتحسدي عليها..وبالتالي الضغط النفسي مش موجود..لإن الضغط ده ممكن يسبب أمراض أولها ضغط الدم الذي يؤدي لا سمح الله للجلطه القلبيه وغيرة ...

حبيبتي الست فعلا مسؤلياتها أكثر...والدليل علي كده ..إن ...إن شاء الله الجنه تحت أقدامنا....

لكن لو الزوج متفهم للظروف وبياخدها ايزي هاتلاقي أن الحياة مش صعبه وخصوصا علينا إحنا

والتعب البدني....ربنا يخليلك..سيف ونور..وبعد كام سنه ..هاتقولي ناش قالت...لإن الأب غصب عنه هايبدأ دورة في الظهور والإعلان عن نفسه.....

أنا شخصيا مش واخداها حرب..أنا واخداها متعه...لما أشوفهم كده ماشاءالله ولادي حواليا ماليين الدنيا نكد وهم وسعاده بحس بقيمتي كأم وزوجه...وياسلام لما أسمع شهادة زوجي بإني ربيت رجاله روعه في حد ذاتها......علي فكرة أنا أتجوزت وأنا طالبه في الجامعه ..وخلصت مع السنه الثانيه لإبني في الأبتدائي.....يعني أثريه...وجربت العمل برة البيت ..وربي قرف..رغم أني كنت هانم في عملي مايقدرش حد يتنطط عليه..وتخصصي مطلوب جدا سبت كل حاجه مقابل أن محدش يشوف نفسه عليه أو :closedeyes: :blush: يعمل عليه بيفهم..هل الزوج ممكن يعمل كده؟؟ويترك كل شيء وراء ظهرة...أشك؟؟

:blush: أنا كلامي يا جماعة الخير عن التعب النفسي وقرف الشارع مايعرفوش إلا اللي جربه

تم تعديل 26 نوفمبر 2006 بواسطة nash

[أبو زياد]

لقد اضطررت آسفا للدخول للموضوع مرة ثانية :blush:

ما علينا ,

بالطبع لا يمكن تعميم السؤال فالوضع يختلف من حالة إلى حالة

السؤال هنا :

من الذى يحب عمله و إلى أى درجة ؟

بالتأكيد من لا يحب عمله ولو إلى حد ما سوف يواجه كثيرا من الشقاء :closedeyes:

والشقاء أقل لمن يجد فى عمله ما يحبه وهذا ما يعوض التعب الذهنى و الجسدى

[se_ Elsyed]

أنا كنت كاتب كلام كتير هنا .. راح فين :closedeyes:

ده أنا يادوب عدّلت كلمة واحدة و حفظت التعديل لقيت المداخلة كلها طارت :blush:

أنا عايز 10 ريال يا س س حق الكلام اللي راح ده.

يا باشا عنينا ليك

13 ريال مش 10

( يعني يادوب 3 شاورما دجاج بدون كاتشاب مع واحد بيبس )

بس والله مانا اللي عطست يا معلم ..

ويمكن إيدك جت على الديليت بالغلط

او يمكن الواحد كوكو إبنك في شيء لله والكلام اللي عليه ... اللهم احفظنا .... مسح نفسه بنفسه

على العموم أنا هاعمل المستحيل عشان أردلك الـ 10 ريال

عُلم وجاري التنفيس

[MZohairy]

يعني كده وصلنا لملخص ان الراجل هو اللي بيتعب اكتر

:wub:

نشكركم على مشاركتكم :)

[عبده بيه]

الصراحة موضوعك مهم لكن لا نستطيع ان نطذب علي بعض الحقيقة هي الزوجة هي الجندي المجهول في كل شيء وبالاخص الغير موظفة هذا رائ الشخصي

[مـي]

بسم الله الرحمن الرحيم

بصراحة من واقع حياتي بشوف ان الست ((ماما )) بتتعب و بتشتغل أكثر من الراجل اللي هوا ((بابا)) :)

ليه؟؟ عشان الست و الست العاملة تحديدا بيكون عليها تروح الدوام و ترجع تطبخ و تنظف

و لو كان عندها فترة مسائية ترتاح يادوب ساعة أو أقل و بعدها

تروح الشغل تاني غير مسؤولية الأبناء و بالذات لو كان فيهم أطفال أما الراجل مش مسؤول غي عن شغله و بس

و ربنا يعين النوعية دي من الستات الشقيانه :sad:

مـــــ :sad: ـــــــي

[ahmed77]

السلام عليكم

لا قول يعلو فوق قول رسول الله صلي الله عليه وسلم حينما قال في الحديث الشريف لرجل يساله عن حق والدية"امك ثم امك ثم امك ثم ابيك"صدق رسول الله صلي الله علية وسلم

اي فضل الام = 3اضعاف فضل الاب :sad: :closedeyes:

وهناك الكثير من الاحاديث التي تشير لفضل الام علي الاب

وغير ذلك فان طلق الام ساعة الولادة لا يتحمله الرجل

غير ان النساء لم يكتمل منهم الا اربع نساء في العقل والدين وهم "اسية بنت مزاحم زوجة فروع-مريم بنت عمران - خديجة بيت خويلد زوجة الرسول صلي الله علية وسلم -فاطمة الزهراء بنت الرسول صلي الله علية وسلم " هذا بالنسبة للنساء ولكن بالنسبة للرجال فاشارات الاحاديث الشريفة الي اكتمالهم خلقا وعقلا ودينا

ويكفي للزوجة انها لاتدخل الجنة ولا تشم ريحها دون رضها زوجها

والله اعلي واعلم

[MZohairy]

ويكفي للزوجة انها لاتدخل الجنة ولا تشم ريحها دون رضها زوجها

؟؟؟!!!

[nash]

أنا عندي أقتراح

أيه رأيكم نقرأ الموضوع مرة ثانيه؟؟

لنعرف ماهو سؤال الحلقه

,,,,,,,,,,,,,,,,,,,,,,,,,,,,,,,,,,,,,,,,,

[ahmed77]

ويكفي للزوجة انها لاتدخل الجنة ولا تشم ريحها دون رضها زوجها

السلام عليكم

mzohairy

nash

دون الخروج عن الموضوع

تفسيرا لما قلته

عن أم سلمة رضي الله عنها قالت : قال رسول الله صلى الله عليه وسلم : (( أيما امرأة ماتت وزوجها عنها راض دخلت الجنة ))

وايضا قال صلى الله عليه وسلم :

والذي نفس محمد بيده ، لا تؤدي امرأة حق ربِّها حتى تؤدي حق زوجها كله ،

حتى لو سألها نفسها وهي على قـتـب لم تمنعه ( رواه ابن ماجه وحسنه الألباني) ..

خلاصة قولي ان

الطاعة تعدل الجهاد

وقد ورد في تعظيم حق الزوج عليها أخبار كثيرة، إذ روى ابن عباس أن امرأة جاءت إلى النبي صلى الله عليه وسلم فقالت : إني رسولة النساء إليك والله ما منهم امرأة علمت أو لم تعلم إلا وهي تهوي مخرجي إليك ، الله رب النساء والرجال وإلههن وأنت رسول الله إلى الرجال والنساء ، كتب الله الجهاد على الرجال فإن أصابوا أجروا وإن استشهدوا كانوا أحياء عند ربهم يرزقون فما يعدل ذلك من النساء ؟ قال : طاعتهن لأزواجهن والمعرفة بحقوقهم وقليل منكن تفعله. (رواه الطبراني و عبد الرزاق في مصنفه ).

وهنا نجد أن رسول الله يساوي بين أجر الجهاد في سبيل الله وأجر طاعة الزوجة لزوجها .كما انه صلي الله عليه وسلم اوصا بالام 3مرات

[nash]

أهلا ومرحبا بك أخي الكريم أحمد

.......................................

لا يزال ردك بعيدا تماما عن أصل الموضوع

هلا أعدت قراءته؟؟ لتفهم ماقصدي؟؟

كما أن العزف علي وتر الزوج وطاعته..

ونقص العقل والدين..فأظن أن هذا أيضا ليس محور الموضوع الإساسي

دمت لنا أخا كريما