ذكريات سين سين العصري .. عن روعة الريف المصري

[se_ Elsyed]

بصراحة ده موضوع أنا كاتبه عشان أخرج من الحالة النفساوية الزبالة اللي أنا فيها اليومين دول بسبب قرف مُقرف في العمل

لكن برضوا إتكسفت أنشر الموضوع إلا لما مواضيع ظريفة تانية - بأمانة - تاخد حقها عشان ما نشتتش الزباين من كتر تلك المواضيع

أحلام اللامعقول في زمن الطعمية والفول .. للكاتبة الكبيرة - في السن - نانسي

مين السبب في الحب الراجل ولا الست ... للكاتب المتقاعد ... زُهيري عبد البر زُهيري

ولا ننسى موضوع بنتنا الغالية فُلانه هانم البيراقدار كاف " ذكريات الطفولة المُشردة "

فأوعدكم إني هاديلهم فرصة 48 ساعة يجمعوا مداخلات على قد ما يقدروا وبعض كده ابعتر مذكراتي عن الريف وأنشرها في كل ابواب المنتدى :lol:

فأنتظرونا بعد الفاصل

[nash]

أنا مسنطرة في المحاورات..ماوراييش حاجه ...

الحمدلله طبخنا وغسلنا ونمنا...اللهم دمها نعمه علينا يارب :closedeyes: :blush:

[واحد تاني]

احمدك يا رب ...

مجبش سيرة موضوع منير ... :closedeyes:

سر يا كنج على بركة الله ...

قلوبنا معاك ... :blush:

تم تعديل 26 نوفمبر 2006 بواسطة واحد تاني

[نانو]

علشان يا واحد تاني موضوع محمد منير

ده موضوع اساسي و عمره ما هيخلص و س س راجل عنده بصيره نافذه و عارف كويس ايه اللي بعيش طول العمر علي راي فولانه ده ريسنا ابو قلب كبير

س س ....نحن في انتظارك

[se_ Elsyed]

س س راجل عنده بصيره نافذه و عارف كويس ايه اللي بعيش طول العمر علي راي فولانه ده ريسنا ابو قلب كبير

س س ....نحن في انتظارك

حاسس إن نانو بتقلوظ لي السلطانية .. مع إني مديها لها تجيب فيها زبادي وترجع بسرعة

[أبو زياد]

:blush: :blush: :ninja:

ربنا مايجيب قلوظة ولا حاجة ياعم العمدة

إنت فى حالة زى الفل و الحمد لله

مش صحتك كويسة والحمد لله ؟ :closedeyes:

والمواضيع مابتأثرش على بعضها بلاش حجج

طيب ليه سايبنى مع القرد و الأسد ؟

كلنا فى انتظارك و بنحبك

قدامك 12 ساعة بس و تخش بالمفيد يابو السيد

[مصرية يعني مصرية]

إتفضل يا سي السيد

فضفض يا ضناي

قول كل إلي جواك

أنا بتديت أقلق عليك أوي....من الأمراض النفساوية

قول ......قول....و مايهمكش حاجة....

أنا مستنظرة ..الحكاية.. :P

الحمد لله ماجابش سيرت موضوعي إلي عاملي مشاكل ( الحرف الأول من إسمك يدل على شخصيتك )

[نانو]

س س

ايه ده :P .....هو انا بيبان عليا اوي كده :P

تم تعديل 26 نوفمبر 2006 بواسطة نانو

[النسر المصري]

يكونش الجدع اللي اسمه س س ده ناوي سغلوش عالموضوع بتاعي بتاع رعبX رعب ....... :lol: .....ده يبقى وقع ف شر اعماله

حبيبي واخويا ومعلمي والقائد المغوار والملك س س

كمل يا س س انا مشتاق اسمع الـــ.......

س س : انت كنت بتقول ايه ياض في دماغك يااااض انت ياااض!؟؟!

ن م : و و و و...ولا حاجة يامعلمي؟!؟!

س س : انت اتجرأت ياض!!!؟/ بتجيب ف سيرتي بالغلط ياااض!؟؟!!

ن م : لا يامعلمي ...ده ده انا كنت بهزر والله (يانهار اسود ده طلع بيسمع وزاويز بطنك بتقول ايه :wub: )

فولانه وصبح : تحب نعملهولك كفته يامعلم؟!!

س س : لا هاتولي الكوارع وخدو انتو الباقي وزعوه على الباقي.....ومانسوش نصيب زوهيري ....اصله بيحب الفشة والكبده (اهو بالمره ينزلي شويه من الميتين الف دولار اللي سالفهم منه) :)

ن م : الرحمة يامعلمي...والله انا اسفــ،ااصلـــ....اسمعـــ**&*❊)*()^)()*ـ)(ـ)(*❊

ناشنات عسكرية ....وقرآن.... والله يرحمه كان راجل ابن حلال...ده مالحقش ياعين امه يشوف المحاوراتيه يوم الخميس!!!!

[se_ Elsyed]

بمناسبة الريف والفلاحين والفطير

فأعتذر للجميع عن تمكُني من التواجد معكم لبضعة أيام قادمة لظروف العمل وشكلي كده هاعمل عجين الفلاحة ....

أسف للجميع وأشوف وشكو بخير

إلعبو سوا وما تعملوش شقاوة

[مصرية يعني مصرية]

كده؟

هتمشي من غير ما تكتب حاجة؟؟؟

إنت مش قلت 24 ساعة؟

دلوقتي بتقول بضعة أيام

يعني لسه هنستنى بضعة أيام الله أعلم بعددها ....

اااااه

اللهم طولك يا روح :wub:

روح يا شيخ

و تعالى بسرعة :excl:

عشان هتوحشنا أوي :)

[nora]

والله يا س س انت غلبت روتانا سينيما في الدعايه والفرقعه الاعلامية :sad:

كل يوم ادخل واقول في عقل بالي تلقيه كتب الاقي فيش حاجه امشي واثر الصمت ( حلو يا نيونه يا منورة المنتدى ده بكل زقاق فيه وحارة) اجي النهرده ابص الاقيك بتقول العبو مع بعض وبلاش شقاوة :sad:

انكل انكل ممكن اجي انا وعيالي وقطتي بالعجل بتعنا مش هنستعمل زمامير والله :)

[se_ Elsyed]

يا نهار مش فايت

كل الفترة دي وأنا سايب الزباين في التلاجة

لا مؤخذه يا ولاد .. السن له أحكام بقى .. واخوكم بقى عضمه كبيرة ويالا حُسن الختام

ما علينا

نرجع مرجوعنا للريف وأيامه

-----------

اخوكم الكبير وأبوكم الروحي سين سين - الـ God Father يعني - من مواليد القاهرة ونشأ وترعرع فيها منذ نزوح والده ووالدته إلى قاهرت المعز لدين الله في الستينات كده ... وعائلتنا في القاهرة كبيرة وجميعهم نزحوا برضوا من الريف وأستقروا بالقاهرة .. ولكن لم تنقطع صلتنا بأصولنا الريفية وبواقي وفُضل أهلنا اللي لسه هناك .. وإحنا بالمناسبة من محافظة الشرقية وتحديداً من مدينة الزقازيق ...

فبالتالي كان الريف بالنسبة لي يُمثل كسر لرتابة وملل المدينة الصاخبة

طبعاً أنا كُنت صغير ولا كنت أعرف رتابة ولا صاخبة ولا حاجة من دي .. لكن كان سفري للريف في إجازات المدرسة عبارة عن تغيير والتعرف على عالم جديد وغريب

عالم جديد بالفعل ومُختلف تماماً عن المدينة

المدينة هيصه والناس صاحية 24 ساعة وناس رايحه وناس جايه في الشوارع طول اليوم وبياعين بيعدوا وعيال بتلعب لبعد نُص الليل وسينيمات ومحلات وغيره وغيره .. أصل محسوبكو نشأ وترعرع فترة طفولته في منطقة تعتبر من مناطق وسط البلد وهي منطقة حدائق القُبة والعباسية وإنت داخل على رمسيس كده ... يعني الزحمة واللبش كله

فكنت لما أسافر البلد لازم أحمل معي كاميرتي الفوتوغرافية الديجيتال الخاصة المتوصلة بلاب توب تابليت 9.1 جيجا... :wub:

طبعاً واحد هايقولي وهو في الثمانينات كان في 1.9 جيجا يا هجاص .. إنت فاكرنا قُرص بعجوه هاتسرح بها :lol: :sad:

فهاقوله لأ يا فالح إنتو مش قُرص ولا بقسماط حتى .. لكت كاميرتي الخاصة كانت عيني ... وتصدقوا بقى إني كل حاجة شوفتها وأنا صغير في الريف لسه فاكرها بتفاصيلها وعاملها سبف في البيلت إن ميموري بتاعت نافوخي .. مع إن نفس الفترة ممكن أكون شوفت بلاوي في المدينة لكن الحاجات دي ممكن تتنسي لإن الواحد متعود عليها أما الحياة الريفية الغريبة فصعب تتنسي

وأنا بالمناسبة من قرية صغيرة متفرعه من مدينة الزقازيق وطوال فترة الثمانينات وأوائل التسعينات كانت مباني وبيوت قريتنا كلها مبنية بالطوب الطيني اللهم إلا المدرسة الوحيدة هناك .. والبيت الكبير بتاع العُمده ومسجد القرية فدول بس اللي كانوا مبنيين بالطوب الاحمر والأسمنت ...

وتصوروا بقى لحد دلوقت أنا مش قادر أستوعب إزاي كانت مثلاً معظم بل غالبية البيوت الريفية ما فيهاش حمام ... تخيلوا بقى حاجة زي كده ؟

ملحوظة : أنا لما بأتكلم عن شيء يبقى باتكلم عن الأكثرية .. يعني ماليش دعوة بالطبقة البرجوازية من مُلاك الأراضي ودول كانوا بيعيشوا حياة أقرب ما تكون من حياة المُدن لإن معاهم فلوس وبيصرفوا .. أما كلامي فهايبقى غالبيته عن الناس البُسطاء اللي بيمثلوا الجزء الأكبر من أي مجتمع

المهم : واحد لِمض في أخر الفصل هايقولي ... أومال الحمامات كانت عبارة عن إيه يا فالح والناس أساساً كانت بتعمل زي الناس إزاي ؟

فهاقوله أنا واحد من الناس .. زي كل الناس - وش كريم عبعزيز - .. والله الناس اللي معاها فلوس كانت بتصمم حمامات عادية زي بتاعتنا بس الصرف الصحي بقى مش بيبقى للبالوعات العمومية اللي بتعملها الحكومة .. لكن كانت بتبقى متوصلة على حُفر كبيرة مربعة محفورة في باطن الأرض ومتبطنه بالاسمنت من جميع الجهات وبممسوها " طرنش " وبتيجير عربيات كل فترة كده تشفط الحاجات دي وترميها في المصارف البعيدة ..

اما الغالبية العُظمى فكانت بقى مع نفسها وكان الحمام بتاعهم يُعتبر هو حظيرة المواشي ... طبعاً لو روحت الريف وقولت كلمة حظيرة المواشي فهايقولوا عليك ده أبو لهب بتاع قُريش وجاي في زيارة سريعة للريف .. لإن حظيرة المواشي هناك إسمها " زريبة " ... شوفتوا فيلم الزوجة الثانية لما سناء جميل قالت لصلاح منصور " في الزريبة يا ناقص ؟ "

ما علينا

أما الإستحمام بقى فكان مشكلة المشاكل .... وقعدت أكثر من 10 سنوات لحد ما فسرت سر الإقبال الشديد على مسجد القرية يوم الجمعه وما فيش عيل صغير ولا راجل كبير إلا وتلاقيه ماشي في شوارع القرية حاطط فوطه على كتفه وولي وجهه شطر المسجد وبالخطوة السريعة كمان .. وأنا أقول اللهم قوي إيمانكم ... هكذا يكون الإيمان وإلا فلا .. أتاري يوم الجُمعة ده كان بيبقى اليوم الوحيد اللي بيقدروا ياخدوا فيه حمام زي الناس .. وده لإن المسجد في حمامات كتير وفيها دُش ....

أما بقى السيدات فكانت هاتبقى صعبه إنك تلاقي واحده اشيه في الشارع وراحيه المسجد تاخد شاور مثلاً B) .. لكن دول كانوا بيتصرفوا بقى في البيت بأي طريقة .. والحاجة أم الإختراع ...

اما عن المنزل الريفي بشكل عام ... فوالله يا عم كان صحي وزي الفُل ..

فهو مبني من الطوب اللبِن أو الطين .. والذي كان يُصنع من الطين المخلوط بالماء وعشان يُعطوه صلابة وقوة فكانوا بيجيبوا القش الناتج عن محصول الأُرز ويخلطوه بالمزيج الطيني ده وبعدين يصمموا قوالب معينة من الحديد ويصبوا عليها الطين فتاخد شكل القالب ويتركوه أمام منازلهم أو في مناطق واسعة عدة أيام لحد ما يجف .. وبعيني ياخدوه ويبنوا به .. وماكانوش بيبنوا بالأسمنت .. لكن بيلزقوا الطوب الطيني بالطين برضوا .. وحتى المحارة أو التلييس الداخلي للجدران فكان بالطين برضوا ... وبعد كده إديها فُرشة دهان بالألوان مش زيت بقى ولا بلاستيك ولا ورق حائط زي فرافير مصر .. لكن كان دهان بمادة الجير اللي بيجيبوها ويخلطوها بالميه ويحطوا عليها الألوان التي يرغبونها ..

أما الأسقف فكانت عبارة عن جذوع الإشجار القوية وكانت توضع بشكل طولي أو عرضي على الحوائط وعليها نباتات البوص أو الغاب - عارفينها ؟ زي اللي بيصنع منها الناي والمزمار كده - وكانت توضع على شكل طبقات وبرضوا ما فيش مانع من وضع الطين فوق ده كله عشان يكونوا طبقة صلبة بحيث لو هايبنوا دور تاني .. وغالباً ما يكون الدور الثاني بسيط وما فيهوش غُرف كثيرة عشان ما يبقاش تُقل على البيت والغرف معظمها بتبقى في الدور الأرضي

وطبعاً مش محتاجه فكاكه ولا تفكير .. فأرضية البيت كانت الطين الطبيعي المبني عليه البيت وعشان ما يعملش عُفار وتراب خفيف كان لازم ست البيت ترُشة بمياه بسيطة مرتين تلاتة في اليوم

أما عن الأجهزة المنزلية الحديثة :D

طبعاً وقتها أبو مين اللي عنده تلاجة ... إنسى يا عمرو .. إذا كنت أنا فاكر في القاهرة ما كانش فيه في السبعينات غير التلاجة الإيديال بتاعت الحكومة وكنت تقدم عليها وتجيلك بعد عدة شهور .. يبقى الريف كانوا هايعملوا إيه ؟ ... فبالتالي الريفيين ما كانوش بقى بيطبخوا كميات كبيرة تستلزم وضع هذه الأطعمة في التلاجة .. وبالنسبة للحمه والفراخ .. فده كان بيبقى طازة بطازة .. وهات رقبة أي فرخه في البيت وخلصها في نفس اليوم وخلص الفيلم ... المياه بقى .. ما كانش فيه مياة شُرب نقية في البيوت ... يابا بأقولك ما فيش حمام .. يبقى هايكون فيه مواسير مياه نقية ... فكان كل واحد عنده طلمبة مياة لإستخراج المياة الجوفية من باطن الأرض ... وإتفرجت كذا مره على عملية دق طلمبات في باطن الأرض وكانت بتبقى عملية لذيذة جداً أشبة ما تكون بإستخراج البترول وتقريباً فيها شبه كبيرة منها ... ولكن برضوا المياة الجوفية كانت ومازالت لها مخاطر كبيرة حيث إنها مُعرضة لإختلاط مياة الصرف الصحي بها والبتالي ممكن تسبب بلاوي صحية وخصوصاً أمراض الكُلى .... لكن كان فيه في القرية حنفية مياه عمومية واحده أهالي القرية بيتزاحموا عليها عشان يملوا البلاليص - أنا شخصياً كنت قليط قوي وبأستحمى تحت الحنفية دي ... إيييييه عيل صغير ومش فاهم حاجه ... إعترضوا بقى ؟ - .. إحنا في الريف بقى ما بنسمهاش في الفلاحين بلاليص ولكن إسمها زَلعه - حد شاف فيلم " صراع في النيل " بتاع الصاروخ آنذاك هند رُستم ومجاهد الشهير بعمر الشريف ومحسب الشهير برشدي أباظه ؟ شوفتوا لما محسب دس الفلوس في زلعة من الزلع دي وفي أخر الفيلم كسروا على دمغة بعض الزلع في الخناقة ؟ :D أهي هي دي الزلعة .. فكانوا بيملوها وياخدوها البيت يطبخوا منها ويعملوا منها الشاي وكده يعني وكانت بمثابة الفريجيدير الريفي وكانت بصراحة الميه بتبقى ساقعة أوي فيها ولذيذة... ده بالنسبة لحفظ المياة طوال اليوم .. أما الحاجة البورتابل والمتنقلة بخفة ودلع فهي القُلة ... قلالاه ... ودي لسه موجوده وماحدش يقول لي مش عارف القُلة يعني إيه عشان ماجبش واحدها أكسرها على دماغه زي فيلم محمد هنيدي وأشرف عبد الباقي " صاحب صاحبة " ..لإن مش معقول عشان تشرب تروح شايل الزلعه ومقربع منها ؟ :lol:

البوتاجاز بقى الأربع عيون وفرن مع شواية كهربائية وولاعة توماتيكي ... أهو ده الوحيد بقى اللي كان موجود وبكثرة :lol:

كان عندنا نوعين من البوتاجازت :

1- بوتاجاز كريازي .. وكنا بنسميه " كانون " وده كان عبارة عن بناء من الطين على شكل مربع ناقص ضلع من فوق وبيتحط عليه قطعه من الصاج وده للتسخين ولطبخ الطبيخ ... أما انبوبة الغاز فكنا بنستعيض عنها بوقود مُكون من نداء الطبيعة الناتج عن بيبيه الحيوانات وخصوصاً البقر والجاموس وكانوا بيخلطوة برضوا بالقش ويشكلونه على هيئة أقراص ويتركونه ليجف فوق أسطح البيوت وبعد كده بيبقى وقود مالوش حل - نقول كمان .. شوفتوا فيلم الأرض بتاع يوسف شاهين لما كان في مجاعة في البلد وكانت الناس مش لايقه تاكل وجت لقطه كده على واحده ست فضلت ماشية ماشيه ورا الجاموسه اللي مش كانت لابسه بامبرز وأول ما عملت بيبيه راحت هاجمه على الأرض عشان تلمه - ياااااي - راحت مجموعة من الناس هجمت على لاست دي وفضلوا يضربوا فيها وأخدوا منها البيبيه ؟ .. أهو هو ده - ده بالإضافة طبعاً إلى إستخدام وقود من الحطب وهو عيدان الذُرة بعد ان تجف وإضافة إلى بعض الإخشاب ..

2- بتواجاز تكنو جاز كبير شوية لعمل الخُبز - ده إسمه فرن - .. وده كان مبني من الطين - الظاهر إن الفلاح المصري حياته مرتبطة بالطين بشكل مطين بطين - وكان واخد شكل قُبة كده وفيها تجويف يسمح بدخول رغيف الخبز الريفي الكبير اللي يفصل 5 أرغة من بتوعنا أو 20 رغيف كيزر :lol:

والفرن ده كان بيستحدم لخبز العيش بأنواعه والفطير المشلتت الغرقان سمنه وصواني المحمر والمشمر والرز المعمر ....

( عايز حد يساعدني وماتخلونيش أحارب لوحدي ... موديست .. إنت عليك الموسيقى التصويرية في الخلفية وخصوصاً طقطوقة عبوهاب محلاها عيشة الفلاخ ... مع شوية صور للقلل والزِلع والفرن البلدي التكنوجاز وكده ) وكفاية كده أحسن جوعت وتعبت

ونلتقي بعد الفاصل

والآن أترككم مع اغنية " الأرض لو عشاطنه .. نرويها بدمانا .. لحد ما دمنا يتصف وما يبقاش عندنا دم "

[لخبطه]

مستحيل يكون الفرق الثلاث أو الاربع سنين اللى بينا عمل كل دا ياسيد سيد بس ممكن يكون ريف الشرقية أبعد شويه أو القرية بتاعتكم محدووووووووفه جوه اوي :lol: لأني بقا عشت الريف منذ أوئل الثمنينات وكان متمدن عن كدا خالص

يعني انا صحيت لقيت حدانا :wub: تلفزيون في البيت صحيح الجيره وجيرة الجيرة :sad: B) كانوا بيجوا يتفرجوا عندنا بس اتذكر انه كان موجود في عدد مش قليل من البيوت

كل التفاصيل بقا اللى انتى حكيتها انا شوفتها عين اليقين بس في قرى كفر الشيخ في التسعينات لكن بردو كانت القرى المحدوفه أوي جوه ( بيقولوا عليها عزبه لأنها اصغر من اقرية بكتير )

القضية بقا في وجهة نظري مش غياب المدنية ولكن المشكله الكبيرة أصبحت حضور المدنية........... يتبع

المدنية اللى انتوا باعتوها لنا ياقاهريين ( ربنا ينتقم منكم :D ) افسدت علينا حياتنا

يعنى عمري ما خطر في بالي أنى اقوم الصبح ألاقي فطاري علبه زبادي(صناعي ) ومربى وجبنه ( صناعي ) وبيض (صناعي بردو ) كنا بناكل كل حاجه حلوه وكل حاجه لها طعم دا غير إنها صحيه كل حاجه معموله في البيت حتى الزبادي ( كان بيحل محله اللبن الرايب ) والمفاجاة الاسود بقا من كدا أنى الاجازه اللى فاتت لقيت امى حاطه لى عيش من بتاع وزارة التموين يانهار مش فايت ياولاد جه اليوم اللى ناكل فيه من الطابونه ( الفرن بتاع العيش )

دي المدنية ياعم سين سين اللى جات بوظت لنا الدنيا الميه بتاع الحنفيه دلوقتى حدانا في الكفر أسوء من الميه اللى كنا بنشربها من الزلعة زمان ........... صحيح الكمبيوتر بقا في البيت لكن كل دا والله اسوء بكتير من زمان

[se_ Elsyed]

يادي النور يادي النور .. سي لخبطيطه حدانا في الدار .. ده إحنا زارنا النبي يا ولاد

شوية جبنة أريش وفطيرة وكوباية شاي حبر بسرعة يا بت للضيف ... ده الود ودنا ندبح لك عيل من عيالنا يا سي لخبطيطه .. سلامات .. طيبون ... وإزيك كده وإزي الست الحاجة ( بتعطيش الجيم )

--------------

يا عمل خبطه لا أدعي إننا ومازلنا من الطبقة المتوسطة التي تمتلك قدر لا بأس به من الأراضي والحدائق الغناء وبدل البيت 4 او 5 ..

لكن الواقع اللي انا حكيت عنه ده شوفتو بعيني وعاصرته في كثير من البيوت إبان تلك الحقبة من الزمن

وبعدين قريتنا ليست عزبه ولا محدوفه والله لكن قريتنا تقع على الطريقة العام مباشرة ( الزراعية يعني ) وعالزراعية يارب أجابل حبيبي ... عالزراعية يا رب أجابل نصيبي

وخلى بالك إن لسه كثير وكثير من قُرى مصر فيها بيوت مبنية بالطين حتى الآن ..

عن إذنك بقى أحسن ورايا زيجيه لجيراطين البرسيم اللي حدايا في الحوض الجبلي

[صبح]

كنت كاتب رد فصل وبه بعض الترميمات للميموري بتاعة س س بس للأسف إتمسح قبل أما أنشره

هاكتب من الأول وأمري لله :D

أبويا س س (زي مابيجولوا حدانا في البلد لكل ذي مقام )

كل ذكرياتك من الميموري بتاعتك في الجون بس فيه حبة حاجات كده أحب أضيفها لأن ممكن يكون جالك كام باد سيكتور فمسحو حتت مهمة من الذكريات الذهبية بتاعة سعادتك :lol:

أنا بقى من المكان اللي بيقول عليه سي لخبطة أفندي إحدى القرى التابعة لكفر الشيخ مدينة دسوق مركز فوة قرية السالمية على الزراعية عدل برضه

وكل من أجدادي من هناك وما زال لي خالات وعمات هناك....

المهم نيجي لحديثك الشيق الذي ينطبق بالملي على ذكريات بلدنا

وبممسوها " طرنش " وبتيجير عربيات كل فترة كده تشفط الحاجات دي وترميها في المصارف البعيدة ..

كا يا سيدي عندنا الطرنش ده "إففففف" زكان النزح بيتم عن طريق الردالة وبييجي واحد من فوقه لتحته بيبي بينزل جوة الطرنش ما يبانش منه إلا وشه :o

ويبدأ في نزح الطرنش بالجرادل ويناولها لواحد تاني نصه بس بيبي وده بياخدها يحطها على المقطورة الفور باي فور بتاعته (الكارو بحمار) وبعدين بعد التطوير كان فيه مقطورة الجرار

أما الإستحمام بقى فكان مشكلة المشاكل ....

بما إن أحد أجدادي كان من الطبقة البرجوازية فأقدر أقولك عن الإختراعات الموجودة أيامها لزوم الحموم :lol:

كا يا سيدي في برميل نصف قطره 30 سم وإرتفاعه 60 سم يتم تعليقه في أعلى سقف الحمام ومربوط بماسورة من أسفله آخرها قطعة صفيح مخرمة "دوش بلدي ولها محبس يدوي

وكان في الأول يتم تسخين الميه على الكانون وبعدين يتم وضعها في البرميل ووو .............حمام العافية

وبعد التطور الذي لابد منه عند الطبقة البرجوازية :lol: ظهر وابور الجاز فتم عمل رف تحت البرميل يتم وضع الوابور عليه لتسخين المياه -_-

طبعاً وقتها أبو مين اللي عنده تلاجة ... إنسى يا عمرو .. إذا كنت أنا فاكر في القاهرة ما كانش فيه في السبعينات غير التلاجة الإيديال بتاعت الحكومة وكنت تقدم عليها وتجيلك بعد عدة شهور .. يبقى الريف كانوا هايعملوا إيه

لأ كان فيه :D

وكان بالأمارة إسمها سحٌارة -_- ودي عبارة عن دولاب مكعب متر في متر في متر بأرجل وفتحة في أحد جوانبه في المنتصف تماما (كوة) ويتم وضع الطعام بداخلها للحفظ من الذباب والتراب (العَفَرَة)

أهي هي دي الزلعة .. فكانوا بيملوها وياخدوها البيت يطبخوا منها ويعملوا منها الشاي وكده يعني وكانت بمثابة الفريجيدير الريفي وكانت بصراحة الميه بتبقى ساقعة أوي فيها ولذيذة...

غلط.. :sad:

كان فيه الزير -_- وده بيتم ملؤه بعدد من ست لسبع زلعات بالتمام والكمال وله قاعدة من الطين وغطاء من الخسب وفوقه كوز صفيح ... :lol: لزوم الشرب "كوباية يعني -_- "

أما انبوبة الغاز فكنا بنستعيض عنها بوقود مُكون من نداء الطبيعة الناتج عن بيبيه الحيوانات وخصوصاً البقر والجاموس وكانوا بيخلطوة برضوا بالقش ويشكلونه على هيئة أقراص ويتركونه ليجف فوق أسطح البيوت وبعد كده بيبقى وقود مالوش حل - نقول كمان ..

دي بقى ولا مؤاخذا إسمها الجلة بكسر الجيم وتشديد اللام مش الجلة بتاعة اللألمبياد المضروبة :wub:

ودي كان يتم تنشيفها فوق أسطح البيوت وفوق الفرن بتاع س س وكانت بتستخدم مع القش لزوم سرعة الإشعال B)

يسمح بدخول رغيف الخبز الريفي الكبير اللي يفصل 5 أرغة من بتوعنا أو 20 رغيف كيزر

وده بقى له مسميات كثير وتختلف من مكان لمكان حسب علام أهل البلد -_-

إحنا حدانا كان إسم العيش الرح والبتاو بتشديد التاء والبكون بتشديد الكاف والقراقيش ودي مختلفة عن المتعارف عليها هنا بتاعة أخونا حشيش ربنا يرجعه بالسلامة

والطبقة البرجوازية كانوا بيخبزوا الرقاق B)

[se_ Elsyed]

شكراً لإبننا الشيخ صُبح خريج كتاتيب الشيخ صديق مقُرى كفر الشيخ وكفر طهرممس ..

---------

نرجع مرجوعنا

مازلنا مع الاجهزة المنزلية الريفية الكهرومغناطيسية

الغسالة

إنسى وخُد البنسا

الغسالة الريفية كانت عبارة عن " الطشت " طبعاً ماحدش فيكو يا لؤمه ما شفش الست نانسي وهي قاعدة بتغسل على الطشت .. اهو هو ده

اما لما تكون الست الريفية مزاجها عِنب - العِنب العِنب العِنب - فكانت بتاخد غسيلها ولا فيش مثيلها وتطلع على الترعة أو بمعنى أصح " الجناية أو القناية " وهي ترعة صغيرة مُتفرعة من الترعة الكبيرة اللي بتغذي البلد

ليه بقى ما بيروحوش الترعة الكبيرة ؟

لإن الجناية كان مبني جنبها حاجة كده زي المصطبة - بناء من الطين بتاع مترين في متر إرتفاع - على جنب الترعة وبيقعدوا عليه الستات وينزلوا تعذيب في الهدوم عن طريق ضربها ضرباً مبرحاً بقطعة من الخشب مُعينه بطريقة مُعينة ولها إيد كده ..

وهدوم الفلاحين غير هدومنا يعني ما فيهاش سوست ولا زراير كتير اللي كانت بخبطة واحده كل ده كان يطير ...

التليفزيون الـ إل سي دي الـ 52"

ده ما كانش موجود بصراحة وكانت بيوت قليلة جداً اللي عندهم تليفزيون

فكان الأغلبية لو عايزين يعملوا دماغ أو يتفرجوا على حاجة مُعينه فكانوا بيروحوا القهوة الوحيدة اللي في القرية

وطبعاً النوم كان بعد العشا مباشرة واللي بيسهر للساعة 9 كان بيبقى إنسان فاشل وصايع كمان ...

لإن الصحيان في الريف ويمكن لحد دلوقت بيبقى في صلاة الفجر عشان يلحق يشتغل شوية في الأرض قبل الحر والسمس قصدي الشمس ..

بس اللي كان مُنتشر قوي هناك هو الراديو أبو بطارية - حجارة - وممكن لو فلاح صاحب دماغ عاليه . فكان بيلف الراديو في حطة قماش - بيدفيه - وياخدو معاه الأرض أهو يسمع قرآن ، نشرة أخبار ، أُغنية للست أم كلسون قصدي كلثوم .. كده يعني

يُتبع

[Folana]

السلام عليكم ورحمة الله ....

سير سى السيد..دى حاجة اوريجينال خالص....فعلا؟...فيه كده؟...اوه..نو... :wub:

حكيكى انا اول مرة اسمع كده....

[Eldisel]

الله يجاذيك يا س س جريت ريئي ( بالفتير المشلتت و العسل الابيض والعسل السود والمش :D أممممممم , وطاجن الرز المعمر ابو قشطة اد كدة فوقة والبط والحمام المحشي فريك ,أمممم اه ه ه ه وال المحاشي بانوعها والعيش البيتي واللبن الطازة الي بتشوفة وهو بيتحلب )

كفاية كدة انا جتلي هستيرية جوع :wub: :sad:

ولمى بنتكلم عن الريف فبنتكلم على النشاط والصحة والحيوية .. انا فاكر لما كنت بروح مع ولدي البلد كانت تيجي الساعة 8 - 9 الصبح يبدئو يذعقولنا اية التاخير دة في النوم انتوا هتصحوا امتى .. مع انك منمتش من تقريص البراغيت والناموس طول الليل وصاحب البيت نايم جمبك ولا همة .. انا فاكر مرة اومت جدي ( الله يرحمة ) من النوم في ليلة ثلاث مرات وانام مكانة اعتقادا مني ان المكان الي هو نايم فية مفهوش برغيت مانا كل ما اصحى مفزوع القية نايم وبيشخر ولا همة حاجة :lol: ولا حاسس بحاجة

وياجمالة كدة ساعت شروق الشمس وانت شايف الفلاحين وهما سحبين مواشيهم على الزراعية او جمب البجورية ورايحين الغطان . :D تحس انك عاوز تطير من النشاط وكذلك عند عودتهم في الغروب .... الله عليهم

واما قعدة الغيط وجملها وانت قاعد على الخضرة او تحت الجميزة الكبيرة الي بجورها علطول غرفة من الطين عشان البهائم وقدامك ثور او جاموسة بيلف سقية او مكنة ري شغالة بصوت مزعج بس لذيذ وانت قاعد وقدامج الجروانة ( حاجة ذي الطبق بيسوا فيها الشاي ) لنسوي الشاي علي القوالح ( اعواد الظرة بعد ان تجفف ) ونشرب الشاي واحنى نلقي السلام والتحية على المارة وتوفاجئ ان كل المارة اعمامك واخوالك.

وجرب كدة تمشي في القرية لوحدك هتلاقي اي حد ممكن يستوقفك ويسئلك انت مين ؟ وكفاية تقولة اسمك ثلاثي وهو هيعرفك علطول ويطلع عمك او سيدك فلان وهو مش قريبك من بعيد ولا حاجة دة هو يبقى ابن عم خالة الي جابو جدة ابوك بس ويعزم عليك بالجامد انك تيجي تتغدى عندة وايمنات وحلفان وميسبكش الا بعد متيديلو قائمة من الاعتذارات ولستة بالناس الي انت هتدغدى عندهم النهاردة ( كرم فطري )

ويسلام لمى الليل بيهل وتخرج تقعد مع قريبينك على المسطبة والقمراية منورة الدنيا وتعد تتسامر معهم في اي شيء وعن اي شيء ولو التلفزيون شغال فلية متعة اخرى في المشاهدة حتى لو كنت بتتفرج على نشرة الاخبار ( قبل احادث العراق وافغانستان ولبنان وبقيه الدول العربية B) ) بتبقى لليلة من اجمل ليلي العمر

يتبع

[se_ Elsyed]

السلام عليكم ورحمة الله ....

سير سى السيد..دى حاجة اوريجينال خالص....فعلا؟...فيه كده؟...اوه..نو... :lol:

حكيكى انا اول مرة اسمع كده....

الله يرحم :wub: