ذكريات سين سين العصري .. عن روعة الريف المصري

[Folana]

السلام عليكم ورحمة الله...

أمييه بقى يا اونكل...أمييه علشان الاجانب بس :lol:

نهارك جميل وزى العسل الابيض بالفطير المشلتت :wub:

[se_ Elsyed]

البجورية

ديزل

يا ديزل

يعني إيه بجوريه ؟

وبعدين

وقدامج الجروانة

البتاع اللي بنعمل عليه الشاي إسمه " منقد " يابني

جروانه دي اللي بياكلوا فيها العساكر في الجيش

[se_ Elsyed]

أمييه بقى يا اونكل...أمييه علشان الاجانب بس :happy:

نهارك جميل وزى العسل الابيض بالفطير المشلتت :angry2:

ماشي يا حاجه فُله .. هافوتها المرة دي

بالمناسبة بقى

العسل الأبيض بالفطير المشلتت .. ده اكل البرجوازيين عندنا

يعني عشان تحطي قدامك صحن مليان عسل أبيض على البريكفست يبقى لازم ما يكونش عندك أقل من 100 فدان

لأ بجد والله <_< .. الفلاح الغلبان ممكن تعدي عليه سنين ما يشوفش عسل النحل اساساً

ويادوب بيقضيها جبنة جريش - آريش أو قريش - أو جبنه قديمة - أم مش بدودو - مع شوية عيش

وأنواع العيش عندنا بقى هي :

1- عيش مرحرح : ويتكون من طبقتين وده العيش العادي اللي ممكن تغمسي وتلغوصي به في الطبيخ .. بس لازم بيتخسن الأول عشان يبقى طري .. بس فترة تحزينه بتبقى قليلة على اساس إنه معجون بميه كتيرة فبالتالي ممكن يعفن لو طالت فترة تخزينه

2- العيش الملدن : والتلدين يعني التحميص .. وهو عيش مفرود يتكون من طبقة واحده وقُطره حوالي 50 سم - نق تربيع على 2 - وبيتخزن لفترات طويلة تصل إلى أسابيع وبتاخد منه وتسخنه .. أما طعمه بقى فيا هووووووووووووووو ... أقولك على سر - في بير - أنا باطلب العيش ده مخصوص والجبنه الحادقة بتاعت الريف مخصوص .. وأول ما بأسافر مصر في الاجازت ماما بتبقى عارفه طلبي وتقوم فوراً عامله لي إذن إستيراد للحاجتين دول بالذات من البلد ... وإوعي وشك بقى .. ووعد مني لما أجي أزوركو في 6 أكتوبر ممكن أهاديكي زلعة مش من غير دود يعني بيور - لو بتحبي الحوادق - لكن عمرك ما هاتقدري تغمضي عنيكي .. ويا سلام بقى يا فُله لو كان معمول معاها ليمون أو لارنج او فلفل ... يـــــــــــــــــــــــــــاه لا تقوليل فوتشيني ولا فيرساتشي والأكل الغريب اللي بتعمليهولنا ده ..

تحياتي ،،،

أبوكي العُمده سين سين

[Folana]

السلام عليكم ورحمة الله....

عايزة اقولك حاجة جد بقى يا جناب العمدة...حيث ان لك ضهر فى الريف المصرى..يبقى لازمن حتمن ولابد..توصى اى حد يجهز لك لبن السرسوب بتاع اى حاجة من المواشى...وتسقيه لعُمر ابننا...علشان الكسور..بيقولوا مفيد جدااااا...باتكلم بجد والله....

[nash]

الله والله

أخر مرة شوفت فيها الريف كان من يمكن

عشرين سنه أو أكثر

في قريه من قري المنصورة

وياسلام علي منظر الغيطان والبنات بلبسهم الملون..وكانوا بينقوا الدوده

والله كانت لوحه خياليه من الروعه والجمال

بس عارفين

الحمدلله والله

[se_ Elsyed]

عايزة اقولك حاجة جد بقى يا جناب العمدة...حيث ان لك ضهر فى الريف المصرى..يبقى لازمن حتمن ولابد..توصى اى حد يجهز لك لبن السرسوب بتاع اى حاجة من المواشى...وتسقيه لعُمر ابننا...علشان الكسور..بيقولوا مفيد جدااااا...باتكلم بجد والله....

طب جولي لا إله إلا الله

خالة المدام عندي .. جايه تحج

المهم لقيت مراتي العزيزة حطت لنا طبق غريب كده على العشا ولا هو جبنه ولا قشطة وحاجه بين البنيين .. فبأقولها إيه ده .. فقالت لي على السرسوب ده .. اتاري خالتها جابته معاها . كادو يعني وكده

فأنتي عارفاني مواليد برج العقرب وإنف وقليط وممكن لا أقترب من اكله مُعينه عشان إسمها .. ما بالك بطعمها .. وسبحان الله الواد عمر طالع لي صورة تبك الاصل في الشكل والطباع وطبعاً عشان الولد سر أبوه .. فمحبوش ولا قرب له ...

بس الولا علي عليوه بقى طالع عبيط وبيرضى بقليله .. فبنضحك عليه وبنأكله له ... <_<

الله والله

أخر مرة شوفت فيها الريف كان من يمكن

عشرين سنه أو أكثر

في قريه من قري المنصورة

وياسلام علي منظر الغيطان والبنات بلبسهم الملون..وكانوا بينقوا الدوده

والله كانت لوحه خياليه من الروعه والجمال

بس عارفين

الحمدلله والله

بنتنا ذات العشرين ربيعاً .. ناش هانم البيراقدار

إصبري على رزقك .. هاتلاقي في الحكاوي دي كل حاجة شفتيها .. دوده ولُطع .. وأنفار ... وكلو كلو

مع سين سين مش هاتقدر تتنفس

[واحد تاني]

( عايز حد يساعدني وماتخلونيش أحارب لوحدي ... موديست .. إنت عليك الموسيقى التصويرية في الخلفية وخصوصاً طقطوقة عبوهاب محلاها عيشة الفلاخ ... مع شوية صور للقلل والزِلع والفرن البلدي التكنوجاز وكده )

بصراحة يا سين سين يا ابني موضوعك ده قطع نياط قلبي نوط نوط <_<

وقررت اني اساعدك ... :angry2:

هسيب لموديست الموسيقى ... وهاخد انا التصويرية :happy:

فهو مبني من الطوب اللبِن أو الطين .. والذي كان يُصنع من الطين المخلوط بالماء وعشان يُعطوه صلابة وقوة فكانوا بيجيبوا القش الناتج عن محصول الأُرز ويخلطوه بالمزيج الطيني ده وبعدين يصمموا قوالب معينة من الحديد ويصبوا عليها الطين فتاخد شكل القالب ويتركوه أمام منازلهم أو في مناطق واسعة عدة أيام لحد ما يجف .. وبعيني ياخدوه ويبنوا به .. ..

وماكانوش بيبنوا بالأسمنت .. لكن بيلزقوا الطوب الطيني بالطين برضوا .. وحتى المحارة أو التلييس الداخلي للجدران فكان بالطين برضوا ... وبعد كده إديها فُرشة دهان بالألوان مش زيت بقى ولا بلاستيك ولا ورق حائط زي فرافير مصر .. لكن كان دهان بمادة الجير اللي بيجيبوها ويخلطوها بالميه ويحطوا عليها الألوان التي يرغبونها ..

أما بقى السيدات فكانت هاتبقى صعبه إنك تلاقي واحده ماشيه في الشارع وراحيه المسجد تاخد شاور مثلاً .. لكن دول كانوا بيتصرفوا بقى في البيت بأي طريقة .. والحاجة أم الإختراع ...

المياه بقى .. ما كانش فيه مياة شُرب نقية في البيوت ... يابا بأقولك ما فيش حمام .. يبقى هايكون فيه مواسير مياه نقية ... فكان كل واحد عنده طلمبة مياة لإستخراج المياة الجوفية من باطن الأرض ... وإتفرجت كذا مره على عملية دق طلمبات في باطن الأرض وكانت بتبقى عملية لذيذة جداً أشبة ما تكون بإستخراج البترول وتقريباً فيها شبه كبيرة منها ... ولكن برضوا المياة الجوفية كانت ومازالت لها مخاطر كبيرة حيث إنها مُعرضة لإختلاط مياة الصرف الصحي بها والبتالي ممكن تسبب بلاوي صحية وخصوصاً أمراض الكُلى .... لكن كان فيه في القرية حنفية مياه عمومية واحده أهالي القرية بيتزاحموا عليها عشان يملوا البلاليص - أنا شخصياً كنت قليط قوي وبأستحمى تحت الحنفية دي ... إيييييه عيل صغير ومش فاهم حاجه ... إعترضوا بقى ؟

يتبع

[se_ Elsyed]

يخرب عقلك يا واحد

إوعى تكون من بلدنا ومصور الحاجات دي هناك

بصراحة برافو عليك وتسلم رجليك قصدي إيديك يابو تريكه

إوعى تكون زملكاوي أحسن أسحلك

[واحد تاني]

يخرب عقلك يا واحد

إوعى تكون من بلدنا ومصور الحاجات دي هناك

بصراحة برافو عليك وتسلم رجليك قصدي إيديك يابو تريكه

إوعى تكون زملكاوي

يا سين سين يا صديئي انت بتتعامل مع اذكى جهاز مخابرات فى العالم ...

وعشان تصضئني ...

انا هنا هعمل لاصدقائنا المحاوراتيين مسابقة صغيرة ...

على صورة لقطتها عدساتنا لك انت ولفيف من الاصدقاء اثناء احدى زياراتك المكوكية فى الريف المصري ...

طبعا الصورة من ايام الطفولة البريئة ويمكن يكون الملامح اتغيرت حبتين ... بس انا واثق فى فطنة شبابنا ...

تعرف على سين سين

ولسة هكمل معاك بقى مشوارك في الريف المصري ...

على فكرة ... اهلاوي كابر عن كابر ... :sad:

[النسر المصري]

هييييه هيييه....ااهو انا اول واحد ياواحد الاقي س س :D :D

انا عملت ريبورتاج موناتج مكساج على مكياج للصوره عشان اثبت حقي بالدليل

الجايزة من حقي طبعا :lol: :lol:

اليكم المفاجأه!!!!

انظر الى س س حيث يشير اليه السهم الأحمر

:sad: :blink: :lol: :lol: :lol: :lol:

تم تعديل 8 ديسمبر 2006 بواسطة النسر المصري

[Sherief AbdelWahab]

آبا العمدة سين سين :lol:

قبل ما أشتغل في الجريدة الإقليمية اللي سبتها كانت معلوماتي عن الريف من كتب وزارة التربية والتعليم لصاحبها رابسو اللي حينضف الوزارة كلها ، ما تنسوش إني من الجيل التاني أو التالت اللي ساب الريف واستقر في المنصورة وأصبح مدينياً منصورياً حتى النخاع..

اقتضى شغلي وقتها نزولي لعدة قرى .. خرجت منها بالخلاصة دي :

الريف - الحالي - غريب .. حاجة توحي لك إن مفيش حكومة في البلد ..

الحيوانات تمشي معنا بكل حرية وترتع ، وفضلات المواشي في الشوارع ورائحتها تزكم الأنوف ..محدش يسألني عن وزارة التنمية الريفية إن كانت لسة موجودة ..

صورة الريف المنتج القديم انتهت .. وحلت محلها صورة كيان يقف في المنتصف بين القرية والمدينة .. ادشاش في كل حتة .. أنصاف خدمات ، قهاوي كتير ..

وزارة البيئة والزراعة مرفوعين من الخدمة .. محدش بينبه على الفلاحين يتخلصوا من النفايات الحيوانية بأي طريقة تانية غير الحرق .. بعد النسيم العليل وهواء الريف اللي كنا بنشوفه في الأفلام حل حرق كل شيء محله ..

لو الفلاح المصري الحالي لديه نية التغيير ، لرأينا ريف زمان بتقفيل الآن ، ولما رأينا نصف قرية نصف مدينة ..

أجدادنا - الريفيون القدماء نسبياً - في رأيي كانوا أوعى وأكثر فهماً من كثير من الريفيين الحاليين ..

ملحوظة : ما شفتش في القرى التلاتة اللي زرتها ولا بيت عالي من البيوت الغبية اللي بيجيبوها في الأفلام ..وما اعتقدش إن القصور والسرايات اللي بنشوفها في الدراما المصرية موجودة على أرض الواقع في الريف المصري أبداً..

خلص الكلام