مشروع توشكى .. لا حس ولا خبر

[الحازم حسن]

منذ فترة ليست بعيدة كان عندنا صداع اسمه توشكى ... الريس راح توشكى ... الريس رجع من توشكى ... الريس لم الفنانين وراح يفتتح ترعة في توشكى

الاعلام المصري الرسمي كله تلفزيون وإذاعة وصحافة مسخر لقضية واحدة " المستقبل في توشكى "

وفجأة

هوس هوس :wub: :)

لا حس ولا خبر :excl:

يا ترى ليه الاعلام المصرى توقف فجأة عن صداع توشكى ؟!!!!

اخر اجازة لي في مصر كانت من حوالي 9 اشهر وسمعت اشاعات قوية "وان شاء الله تكون فعلا اشاعات" ان المشروع فشل.

كارثة بكل المقاييس لو المشروع فعلاً فشل لا يتخيل عقل بشري كم الفلوس اللي اتصرفت في المشروع ده شق طرق وتمهيد تربة واستصلاح أراضي ومساكن للعمال ودراسات وشق ترع.

يا ترى ايه آخر الاخبار عن توشكى .. هل فعلاً كان مشروع فاشل ؟؟؟

واذا فشل المشروع لماذا لا نرى محاسبة للمخطئين على غرار ما يحدث في الدنيا كله

برجاء من الاخوة اللي عنده اخبار عن مشروع توشكى ده يطلعنا عليها.

[عبده بيه]

لو حد رد عليك يا ريت تتديني خبر لاني انا التاني بحلم بالموضوع ده من زمان علشان اهاجر لتوشكي واشتغل هناك

[أبو زياد]

لابد انه توجد محاولة ( للغلوشة ) على الرأى العام حتى ينسى الموضوع

إما لأنه توقف العمل به أوووو لا توجد ( أو ) للأسف وهذه كارثة

[الحاج فوزى]

بالفعل انا سمعت نفس الاشاعة ، بس بقوة اكبر

بس اقولك ... لو تحلل الموضوع بمنطقية ، هتستنتج ان المشروع فعلا فشل

مجرد انه لا حس ولا خبر بعد الافراح والليالى الملاح نتيجة لنتيجة معروفه

وبعدين يا سيدى لو كان نجح .. تفتكر كانت الطماطم توصل سعر التفاح :)

بلاش ده .. التاريخ يعلمنا المستقبل .. صح ؟ قول صح

قولى بقه اخر مشروع مصروف عليه بحق وحقيق اتعمل ونجح امتى وفين ؟

بلاش ده .. لو كان فيه ناس تعرف تخطط (طبعا اقصد متخذى القرارات) .. فرضيه

كنا هنشوف النتيجة فى المواصلات

كنا هنشوف نتيجة فى السكة الحديد

كنا هنشوف نتيجة فى المستشفيات

كنا هنشوف نتيجة فى خدمات المواطن

كنا هنشوف نتيجة فى المساكن والشباب العزب فى سن 40

كنا هنشوف نتيجة فى الاسعار

كنا هنشوف نتيجة فى حجم الديون الداخلية والخارجية

كنا هنشوف نتيجة فى الفساد الادارى والرشاوى

كنا هنشوف نتيجة فى اسلوب التاجر المفلس الى بيبيع عفش بيته ( الخصخصة على الطريقة المصرية)

كنا هنشوف نتيجة فى سيطرة رجال الاعمال على القرارت الاقتصادية والاحتكار

كنا هنشوف نتيجة فى توزيع ممتلكات الدولة والاراضى ( العزب - جمع عزبة ) على المحاسيب

كنا هنشوف نتيجة فى مرتب الموظف مطروح منه الدروس الخصوصية و الاتاوات الضريبية و الغلاء الفاحش و.. و ... و ...

كنا هنشوف نتيجة فى خلق (بضم الخاء ) الناس الى ضاق ، واصبح الواحد بيمشى فى الشارع يخانق دبان وشه

كل ده لم يحدث .. اذا تعارض .. اذا الفرضية الاولى خطاء

اذا المشروع لم يخطط له بطريقة صحيحة .. اذا فشل ..

اسف على كم الكئابة فى المشاركة .. بس المود بتاعى النهاردة اكتئاب

حسين

[الحازم حسن]

والله وعملوها الرجالة ورفعوا راس مصر بلدنا .. ووقفوا وقفة رجالة مبروك لمصر ولبلادنا

ألف مبروك يا جماعة

[drhouba]

توشكى توشكى توشكى أنا سمعت الإسم ده فيييييين ..... دى خيبه تقيله و بالطن و لا تدل إلا على على إستخفافهم بالناس اللى فى البلد دى اللى بقت بتسكت على أى حاجه و كأنهم من بلد تانيه توشكى يا شباب توفت بالسكته القلبيه من أول يوم لأن الغرض الوحيد منها هو عمل أى إنجاز لحبيب الشعب عشان يغنوا له بيه فى التلفزيون أو يفتكروه بيه بعد عمر طويل بعد ما يدوبنا كلنا فى عرق العافيه و لكن للأسف الخيبه المره دى كانت تقيله و بالهبل لأن المليارات راحت فيه و مش حيعرف الأسرار دى إلا أحفاد أحفادنا لما تبقى تاريخ زى تاريخ الخديوى كده ده لو كان أحفاد جمال مش بيحكموا البلد بصراحه أنا لسه عند وجهة نظرى من زمان لحل أزمة الشعب المصرى المزعج ده اللى مش عاجبه العجب أنا شايف إن الشعب المصرى يلم بعضه و يشوف له مكان تانى يعزل فيه و يسيب الناس دى لوحدها تهيص من غير صداع و ناس غلسه زينا تقعد تنتف فى فروتهم و أخيرا مش عاوزكم تتعبوا نفسكم و تنتظروا أى شئ لأن ببساطه مش حيحصل حاجه و ياللا أحسن نتخانق فى الكوره بس قبل ما نتخانق تعالوا نجتمع و نبتهل إلى الله و ندعوه دعوه واحده : الله يخرب بيوتهم و يروحوا يقعدوا فى توشكى ;)

[lonly in cold night]

لو حد رد عليك يا ريت تتديني خبر لاني انا التاني بحلم بالموضوع ده من زمان علشان اهاجر لتوشكي واشتغل هناك

للاسف يا عبده بيه مش حاينفع انك تهاجر لهناك لان الواقع العملي بيقول ان اللى هناك بيتم تهجيرهم

و كل شئ بالصول

واحد صاحبي من المهندسين اللى كنوا بيشتغلوا هناك لاقيته راجع بخفى حنين

- مالك يا عم حسن

- رجعت ليه قال لى مشونى زى ما بيمشوا التانيين

- قلت يابنى ده انت المفروض شغال تبع الحكومه و عمر ما الحكومة ما بترفد حد يعنى عايشين سافوليا

- قال ان اللى بيحصل انه بيخليك تقدم استقاله

- طب ازاى ؟؟؟

- بيخفض البدلات الى النصف و بعدين الى الربع

- مع وقف الخدمات اللى موجوده حواليك فتلاقى نفسك فى لاخر قاعد فى معتقل لا عائد مادى ولا خدمات ولا دياوله و بالتالى تطلب النقل يقول لك ما ينفعش

تقوم تقدم استقاله

و بلغوا تحياتى

[Khiber]

فى عام 1995 قال مبارك فى برنامج حديث المدينه أنه يعدنا بأننا سوف نخرج من عنق الزجاجه طبعا بسسب مشروع توشكى فى عام 1996 ومن يومها لاطلعنا من الزجاجه ولاحتى عارفيين نرجع تانى للوضع القديم

شكلنا كده إتحشرنا

[الحازم حسن]

لو حد رد عليك يا ريت تتديني خبر لاني انا التاني بحلم بالموضوع ده من زمان علشان اهاجر لتوشكي واشتغل هناك

للاسف يا عبده بيه مش حاينفع انك تهاجر لهناك لان الواقع العملي بيقول ان اللى هناك بيتم تهجيرهم

و كل شئ بالصول

واحد صاحبي من المهندسين اللى كنوا بيشتغلوا هناك لاقيته راجع بخفى حنين

- مالك يا عم حسن

- رجعت ليه قال لى مشونى زى ما بيمشوا التانيين

- قلت يابنى ده انت المفروض شغال تبع الحكومه و عمر ما الحكومة ما بترفد حد يعنى عايشين سافوليا

- قال ان اللى بيحصل انه بيخليك تقدم استقاله

- طب ازاى ؟؟؟

- بيخفض البدلات الى النصف و بعدين الى الربع

- مع وقف الخدمات اللى موجوده حواليك فتلاقى نفسك فى لاخر قاعد فى معتقل لا عائد مادى ولا خدمات ولا دياوله و بالتالى تطلب النقل يقول لك ما ينفعش

تقوم تقدم استقاله

و بلغوا تحياتى

يمكن تكون دي حالة خاصة أو مثلا لضعف التمويل لكن يا جماعة العقاد النافع ... الكلام اللي يخش مخ الراجل الكبير المشروع فشل ولا لأ ؟؟؟

يعني في دليل أومقال أو حتى طلب استجواب في مجلس الشعب عن الموضوع ده

ولو المشروع فشل فين المحاسبة وفين التحقيق وفين المسئولين ؟

وفين مفيد فوزي بتاع التحقيق في حديث المدينة وفين منى الشاذلي بتاعة العاشرةمساء وعم محمود سعد بتاع البيت مش بيتك؟؟؟

[lonly in cold night]

لا يا باشا مش حاله خاصه و للاسف فيه تعتيم كامل على الموضوع

[drhouba]

مفيش تعتيم على الموضوع و لا حاجه لأن الموضوع أساسا مات و شبع موت و الناس ملهيه و لا حاسه بحاجه بس الحمد لله هم مبسوطين كده عشان دول زعلهم وحش يعنى لو كبرت فى دماغهم ممكن ينقلوا المشروع تشاد و يبعتوا الشعب وراه عشان نغنى له هناك

[lonly in cold night]

ارجو فتح المواضيع الاتية :

مناقشات حادة بالبرلمان حول توشكى واتهامات للحكومة بالفساد

مجلس الشعب يفتح ملف تعثر مشروع توشكى

مشروع توشكى يحيل الصحراء جنة.. لكن من المستفيد؟

و نلتقى لمعرفة ارائكم

[الحازم حسن]

ارجو فتح المواضيع الاتية :

مناقشات حادة بالبرلمان حول توشكى واتهامات للحكومة بالفساد

مجلس الشعب يفتح ملف تعثر مشروع توشكى

مشروع توشكى يحيل الصحراء جنة.. لكن من المستفيد؟

و نلتقى لمعرفة ارائكم

ماشي يللا بينا يا عم على هناك

[الحازم حسن]

شكراً مستر لونلي على اللينكات

حسب موقع مصراوي فان النفقات على المشروع وصلت 6 مليار جنيه لنتخيل أن هذا المبلغ قد خصص لبناء مساكن للشباب في مصر أو لدعم البعثات العلمية أو لعلاج مشكلة أطفال الشوارع او لمرضي السكر والسرطان أو أو .... مش كان بقى احسن ... حسبنا الله ونعم الوكيل

تم تعديل 5 ديسمبر 2006 بواسطة الحازم حسن

[Mohammad Abouzied]

مشروع توشكي لازال موجود والمرحلة الاولى تقريبا خلصت وبالطبع مرحلة البناء بتحتاج عمالة مختصصة بعدها لا جاجة لهم في منطقة اصبح من المفروض المقيم هناك فقط مستثمري الزراعة لانه في الاصل مشروع للتنمية الزراعية وهناك الوليد بن طلال ويدير مشروعه برجاله سواء كانو مصريين او سعوديين او اسيويين من يرغب العمل لديه يروح هناك لكن يجب ان يكون مؤهل للعمل في المزارع العملاقة المنتجة بغرض التصدير هذا من جهة

اما بالنسبة لتمويل مشروع توشكي الحكومة لم تساهم فيه بل هو هبات من الشيخ زايد والمستثمرين المالكين للاراضي ومن يريد شراء ارض هناك وزراعتها يستطيع بل ممكن يسدد ثمنها من انتاجه في المزرعة