عايز اتجوز

[رمضان]

السلام عليكم ايها الاخوان والاخوات

انا هقولكم على موقف حصلي مثلا

انا اتعرفت على واحدة عجبتني طلعت مطلقة واكبر من بخمس سنين وعندها ولد وبنت بس عجبتني وكنت عاوز اتجوزها تعرفوا كان ايه رأيها قبل ما أقول اي شيء قالت لي نتجوز في السر علشان خاطرك وبعدين لما تلاقي واحدة ابقى طلقني واتجوزها ده كلامها مش كلامي يعني مفيش مشاكل يعني لو واحد حب واحدة وهيه حبته ايه المانع من الجواز وبأي طريقة المهم نبعد عن الحرام والمهم تكون حلال جواز المسيار مثلا حلال بافتاء العلماء مش انا

[nash]

يا جماعه أخونا كان عايز نصيحه أو رأي أو طلب

أحنا طلعنا برة الموضوع خالص..

وطبعا أنا بعتذر عن هذا..لكن..بالنسبه لزواج المسيارأ وأي مسمي أخر ..ممكن نفتحله صفحه لوحده...

وكذلك بالنسبه لتجارب كل واحد فينا إذا كان عنده تجربه....

أما موضوع الحلال والحرام في الزواج...فنصيحه من قلبي..الأول نقرأ ونعرف خرجت من من الفتوي..ومن عارضها ولا نأخذ فقط مايرضينا...ونمشي علي نظام خلي بينك وبين النار مطوع

.......................................................................................................................................

[جيهان]

يااااااااااااااجماعة يا قوووووووووووووووم احنا كة خرجنا من الموضوع سبيونا من الى قالة رمضان ومن فتوى الحلال والحرام دلوقتى علشان الموضوع مش يتشعب احنا بس نقول لكاتب الموضوع الحل .

بس

[إسلام طلعت]

:blink: :wub: :P

:) :) :blush:

أنا قريت كل الردود

ومتشكر جدا جدا

بس معلش خليكو معايا واحدة واحدة ...

بس معلش مش هقدر اتكلم دلوقتي ... هرجع من الشغل واتكلم براحتي

[سهيلة]

ولكن كل ما قصدته الزواج الاقتصادي يعني الفلبينية ملهاش مطالب كتير كل اللي عاوزاه تاكل وتشرب وتنام وبس

اخواني اليست الفلبينية بشر مثلنا ولماذا هذه العنصرية والتكبر

اليس من الممكن ان يتزوج بمصرية وتكون اسوأ من اي جنسية

دعونا لا نعقد الامور ونيسر على انفسنا ايها الاخوان

انا اعرف اصدقاء لي كثيرين ومتجوزين فلبينيات وعايشن مية مية بالصلاة على النبي كده

واعرف كويتيين نفس الشيء

كلنا سواسية ايها الاخوان ولا فرق بين عربي ولا اعجمي الا بالتقوى واتقوا الله

وبالنسبة للاخت اللي بتتكلم عن الولاد

مش شرط يخلفوا ده هيكون جواز عادي جدا بس مفيش اولاد ايه المانع

ولما ربنا يفرجها عليه يتجوز له مصرية ويخلف على راحته

دة كلام الاستاذ رمضان

بقى دة كلام بردة يخرج من فم مسلم مثقف زيك

انا اتفاجات جدا من كلامك

هوة فين بقى معنى الزواج المتمثل ف الاستقرار والسكن والمودة والامان

هوة معنى الجواز عندك اية بالضبط

متعة فقط

ام ماذا

ويعنى اية ان الزوجة الفلبينية مالهاش مطالب هية بس هتاكل وتشرب وتنام

باللة عليك دة كلام او دة جواز

يعنى هية هتتجوز عشان تعيش وانت هتتجوز عشان المتعة

صدقنى الحياة دى عمرها ما هتستمر

اسود وتعالب وارنب مشاركة بتاريخ اليوم, 10:45 AM

ايه ازيك ياسهلية فينك

من زمان وحشتينا فعلا ووحشتنا معلوماتك الجميلة

ازيك يا اسود وتعالب وارانب معلش كنت مشغولة شوية الايام اللى فاتت دى بس خلاص انا معاكم من النهاردة اصلكم وحشتونى اوى

وميرسى على سؤالك

[إسلام طلعت]

نصايحكو كلها حلوة

بس كلها عناوين لنصايح

يعني مفيش حل عملي كده بالتفصيل ...

اولا الجواز بالنسبالي مهم جدا وعاجل جدا لإما هغلط وانا مش عايز اغلط وحلي الوحيد الجواز ..

ثانياً - صعب جدا اني بسرعة اتجوز واقيم في البلد اللي انا فيها لان السكن غالي جدا زي ما قولت

ثالثاً - لو نزلت مصر تاني هبقة برده في نفس المشكلة واكتر

رابعا - ممكن ااجر ايجار جديد في مصر واتجوز بعد شهور بس مقدرش انا اعيش في مكان ومراتي في مكان تاني ..

قبل كده انا قلت اني بكره مصر وكله هاجمني بالشعارات الوطنية واللي قال اهلك وناسك وانت منهم وكلنا مصر وتحيا مصر وتراب مصر ... الخ من شعارات في حب مصر وتراب مصر

بس الحقيقة ان المشكلة اللي انا بعاني منها هي بسبب اللي انا مصري واتولدت في مصر

والحمد لله على كل شئ

[nora]

معلش يا اسلام انا ادايقت من شعورك بالنقمه انك مصري ..................

سؤال امال كنت عايز تبقى ايه ؟؟؟؟؟:rolleyes:

جنسيتنا ملهاش دعوة بمستقبلنا احنا الي بنعمله ولو كل واحد شتم في بلده زيك يبقى عليه العوض كنا نبقى يهود احسن من غير وطن وانت كنت عرفت معناه انا مش بقول شعرات بس بدل متشعر بالخزي من مصرويتك حاول تعمل حاجه تفخر بيها ويمكن سعتها تقول انا مصري ولا حتى انا اسلام طلعت

:wub:

[رمضان]

كفيتي ووفيتي

[إسلام طلعت]

معلش يا اسلام انا ادايقت من شعورك بالنقمه انك مصري ..................

سؤال امال كنت عايز تبقى ايه ؟؟؟؟؟:ph34r:

جنسيتنا ملهاش دعوة بمستقبلنا احنا الي بنعمله ولو كل واحد شتم في بلده زيك يبقى عليه العوض كنا نبقى يهود احسن من غير وطن وانت كنت عرفت معناه انا مش بقول شعرات بس بدل متشعر بالخزي من مصرويتك حاول تعمل حاجه تفخر بيها ويمكن سعتها تقول انا مصري ولا حتى انا اسلام طلعت

:ph34r:

كلامك ده كله عادي جدا اي حد يقدر يقوله وانا لو اتكلمت عن الوطنية يمكن هتكلم احسن منك لان مفيش اسهل من الكلام في حب الوطن ...

بس برده مصر هي السبب في اللي انا فيه ...

لو مش فاهمة ممكن اضربلك امثلة للتوضيح لا للحصر ...

تقدري تفسري ايه لما شاب يتخرج وياخد 250 جنيه في الشهر ولو بالكتير اوي اخد 500 جنيه في الشهر ويصرف منها مش اقل من 300 جنيه ده لو كان بخيل وماسك على نفسه اوي ..

يبقة هيشيل 200 جنيه في الشهر ... يبقة عايز كام سنة عشان يجمع مبلغ اقل شقة ... وعايز كام سنة عشان يجمع مبلغ ارخص اثاث .. وياترى الاسعار هتفضل زي مهي ولا البنزين هيخلى 30% تاني ؟؟؟!!!

وياترى برده لو حصلت المعجزة واتجوز هيضطر انه يشغل زوجته عشان بالكاد يقدرو يغطو تكاليف معيشتهم ؟؟؟؟

طب الحل ايه في البلد اللي مستوى الدخل فيها غير متناسب تماما مع مستوى المعيشة ...

يبقة هي السبب في شقاء شعبها ولا لاء ؟؟؟؟

هي السبب اللي خلت ابنائها يتغربو ويتحملو سنين بعيد عن بيتهم واهلهم عشان احقر شئ في الدنيا وهو الفلوس ... بس للاسف الشباب بتسافر عشان تلاقي مقومات الحياة ... عارفة يعني ايه مقومات الحياة ... يمكن مش هتعرفي معنى الكلمة دي لانك مجربتهاش

هي السبب اللي خلت شاب خريج جامعة يشتغل في ملهى ليلي في شارع الهرم ويلم الفلوس من تحت الرقاصة لان مرتبه في الملهى حوالي 20 ضعف مرتبه لما كان محترم وبيشتغل شغلة شريفة ..

هي السبب اللي خلت الخليجي يدوس على المصري في بلده ..

هي السبب اللي خلت المسلم الملتزم على حق عايش خايف انه يترممط في يوم من الايام من ظابط امن دولة ملوش اي لازمة في الحياة غير انه يدوس على الناس ...

هي السبب اللي خلت الرقاصة اعلى مكاناً وشأنا من عالم الدين ..

هي السبب اللي خلت مخنس يكون وزيراً لثقافتنا ..

هي السبب اللي خلت قواد يكون وزير اعلام ومن ثم امين في مجلس الشعب ..

اقول ايه تاني ...

لا حصر لمسئولية مصر عن شقاء شعبها المسكين ...

من ناحية تانية رداُ على كلامك اعمل شئ لنفسك ... انا لو ربنا وفقني ووسع رزقي في الدنيا فهيكون الفضل يرجع اولا وأخيراً لله تعالى ثم لاهلي ... وليس بفضل مصر على الاطلاق ..

تحياتي للجميع واتمنى ان يتم فهم ما اقصده جيدا ولا اريد تهجمات علي بشعارات وطنية لا تضر ولا تنفع ...

[otaka]

اسلام

مش عارف انا يمكن لانى بسمع اراء كتير و مختلط بشتى الوان الطيف السياسى مش شايف كلامك فيه اى شئ غلط برغم عدم اتفاقى معاك بس حقك تقول اللى انت حاسس بيه

اعتقد كمان انك فعلا عندك صدق فى كلامك اللى بتقوله مش بس بتردده و خلاص و كلامك ده فكرنى بقصه حكاها مراسل صحيفه انجليزيه انه مسك ولد فى عمر المراهقه بيرمى طوب على السيارات اللى ماشيه فوق كوبرى قصر النيل سنه 1977 ايام انتفاضه الخبز بتاعه مصر و سائله فى حد يكسر بلده فرد الولد و قال دى مش بلدى دى بلدهم همه وشاور على اللى راكبين عربيات

برغم ان الولد ده كما كثير مننا تلقى تعليم مجانى على سبيل المثال لكن احساسه بالغبن و الظلم مسيطر عليه تماما زى ما انا حاسس انك عندك مراره فى كلامك عن الاحوال فى مصر

الفكره انه مصر مش مكان علشان يبقى له فضل عليك و لا لاء

مصر مكان عايش فيه ناس و لو واحد من الناس دى ساعدك لوجه الله فاكيد له فضل عليك لكن اكرر انا شعرت بكميه صدق كبيره فى كلامك و طبعا رائيك انت حر فيه

و بمناسبه الحريه اوعى تتجوز :ph34r:

[nora]

كلامك ده كله عادي جدا اي حد يقدر يقوله وانا لو اتكلمت عن الوطنية يمكن هتكلم احسن منك لان مفيش اسهل من الكلام في حب الوطن ...

...................................

معلش واضح جدا انك مش ممكن تتكلم في الوطنيه لان فاقد الشىء لا يعطيه

...................................

بس برده مصر هي السبب في اللي انا فيه ...

لو مش فاهمة ممكن اضربلك امثلة للتوضيح لا للحصر ...

تقدري تفسري ايه لما شاب يتخرج وياخد 250 جنيه في الشهر ولو بالكتير اوي اخد 500 جنيه في الشهر ويصرف منها مش اقل من 300 جنيه ده لو كان بخيل وماسك على نفسه اوي ..

يبقة هيشيل 200 جنيه في الشهر ... يبقة عايز كام سنة عشان يجمع مبلغ اقل شقة ... وعايز كام سنة عشان يجمع مبلغ ارخص اثاث .. وياترى الاسعار هتفضل زي مهي ولا البنزين هيخلى 30% تاني ؟؟؟!!!

..................................

مش هعلق عليه لاني مقدرش انكر وجوده بس انت بتتكلم عن طبقه قدرت تتعايش مع ده والامثله كتير ومش هقول انهم ميتين بس عيشين ويمكن كمان اسعد منك لانهم رضو بقضاء الله ومعشوش طول عمرهم يدعو على العيشه والي عايشها والي عيشنها لان ده قضاء الله لان متقدرش تقول ان 100% من اهل مصر شحتين وبيموتو من الجوع والفقر فده رزق ربنا موزعه غير كده كل واحد وحسب التخطيط الي مشيو في الحياة يعني متقلش خباز ياخد 1000 جنيه كل واحد وشغلته وايه الي درسه واتخصصو فده كان معني كلمتي انت عملت ايه لنفسك او اعمل لنفسك حاجه

.............................

وياترى برده لو حصلت المعجزة واتجوز هيضطر انه يشغل زوجته عشان بالكاد يقدرو يغطو تكاليف معيشتهم ؟؟؟؟

طب الحل ايه في البلد اللي مستوى الدخل فيها غير متناسب تماما مع مستوى المعيشة ...

يبقة هي السبب في شقاء شعبها ولا لاء ؟؟؟؟

هي السبب اللي خلت ابنائها يتغربو ويتحملو سنين بعيد عن بيتهم واهلهم عشان احقر شئ في الدنيا وهو الفلوس ... بس للاسف الشباب بتسافر عشان تلاقي مقومات الحياة ... عارفة يعني ايه مقومات الحياة ... يمكن مش هتعرفي معنى الكلمة دي لانك مجربتهاش

......................................

ليه بتقول اني معرفش مقومات الحياه انت شايف انك بتكلم وحده جهله !!!! وانا مش من سكان القصور ومش لازم اكون من سكان القبور علشان اعرفها

.....................................

هي السبب اللي خلت شاب خريج جامعة يشتغل في ملهى ليلي في شارع الهرم ويلم الفلوس من تحت الرقاصة لان مرتبه في الملهى حوالي 20 ضعف مرتبه لما كان محترم وبيشتغل شغلة شريفة ..

..........................................

محسسيسني ان كل

شباب مصر يا اما بيسرقو ياما مسكين طبله وصجات معلش في شباب كتير شرفاء ومحترمين وبيشتغلو في شركات ومرتباتهم كويسه وتعدي الالف وعندي امثله كتير جدا

....................

هي السبب اللي خلت الخليجي يدوس على المصري في بلده ..

................................

ده على حسب الي راح هناك وقبل انه يداس عليه انا عشت واتولدت في الخليج وعمر ماحد قدر يكسر منخيري لاني كنت بفخر بنفسي اني مصريه ومتعلمه ومكنتش بحسسهم اني عبده قرشي انا عبدة ربي بس وبعد كده في ستين دهيه فكان الكل بيحترمني لكن الي انت بتتكلم عليهم هما الي انحنو ليهم وباسو الايادي والجزم فيستهللو انهم يتداسو وللاسف ما اكترهم لانهم ناقمين على حياتهم ونسو ربنا خلقهم ليه

.....................

هي السبب اللي خلت المسلم الملتزم على حق عايش خايف انه يترممط في يوم من الايام من ظابط امن دولة ملوش اي لازمة في الحياة غير انه يدوس على الناس ...

..............

دي عيوب مقدرش انكرها وكل بلد في عيب ومتقدرش تقول ان بلاد الخليج والاجانب خاليه من العيوب والا تكون لابس نظارة ورديه وسعتها هطلب منك تجبلي وحده يمكن سعتها ارجع اعيش في الخليج!!!!

...........................

هي السبب اللي خلت الرقاصة اعلى مكاناً وشأنا من عالم الدين ..

......................

انا مش معاك لسبب بسيط ان من وراها بيتريقو عليها ويمكن سبب شهرتها التهكم عليها مش اكتر لكن لما يذكر اسم عالم دين بتدعيله وتقول ربنا يفتح عليه وربنا يكرمه ومحسسني ان مصر كلها رقصات !!!!

....................................

هي السبب اللي خلت مخنس يكون وزيراً لثقافتنا ..

هي السبب اللي خلت قواد يكون وزير اعلام ومن ثم امين في مجلس الشعب ..

.........................

لا تعليق لانه ده قذف وانا محبش اني اغلط في حد بس برضو لو هما كده يبقى لازم الوضع يتغير وده الي بقوله مفيش مكان خالي من العيوب ولا عايز تقولي ان مفيش حاجه كده حصلت برة واتسببت لفضيحه لرئيس اكبر دوله

................

اقول ايه تاني ...

لا حصر لمسئولية مصر عن شقاء شعبها المسكين ...

.......................

مصر ملهاش دعوه احنا الي بنعمل كده يعني لو كل الي في مصر بيسرقو او يرقصو اعمل زيهم واقول مهو كله بيعمل ومصر السبب ربنا ادانا العقل نفكر وعرفنا الغلط والصح يبقى احنا الي نختار مش تبقى مسير وتقول مهو كله بيعمل كده يبقى على كده ملهوش لزمه نعيش مهي معروفه النهايه بلاش تكون مصر شماعه لاخطائنا او اخطاء غيرنا احنا الي بنغلط ولو كل واحد اتقى ربنا صدقني مش هتلاقي النماذج دي

.....................

من ناحية تانية رداُ على كلامك اعمل شئ لنفسك ... انا لو ربنا وفقني ووسع رزقي في الدنيا فهيكون الفضل يرجع اولا وأخيراً لله تعالى ثم لاهلي ... وليس بفضل مصر على الاطلاق ..

....................

هو انت ليه اخدتها على انها ماده ممكن تكون علم وممكن تكون عمل وانا قلت ليك انك تقول سعتها انا اسلام بس كل الناس هتقول مصري زي زويل اول لما عمل حاجه قالو مصر مش قالو اهلو فمهما حاولت انك تتنكر ليها فهي لزقه ليك اقولك حاجه روح احرق البسبور احسن لان شيفه ان ده بس الي بيربطك بمصر.......................

تحياتي للجميع واتمنى ان يتم فهم ما اقصده جيدا ولا اريد تهجمات علي بشعارات وطنية لا تضر ولا تنفع ...

.....................زز

انا لاهجمت ولا قلت شعارات اهو وربنا يهدي الجميع للخير

تم تعديل 3 ديسمبر 2006 بواسطة nora

[إبن مصر]

الاستاذ الفاضل اسلام

أرجو الانتباه الى انك تكتب فى محاورات المصريين سائلا المصريين عن نصيحه تخصك فى حياتك الشخصيه ثم تفاخر أن أساس مشكلتك أنك مصرى

وولدت فى مصر.

أن نقمتك قد تكون مبرره من وجهه نظرك ولكنك ما دمت تكتب قى هذا المكان فأرجو الانتباه جيدا الى ما تم التنبيه عليه معك فى السابق أن تتخير اللغه التى تتحدث بها عن مصر وشعب مصر.

أن هذا التنبيه لهو التنبيه الاخير الذى يخص هذا الموضوع ولن يتم التساهل مع أى شخص كان مهما كان انتماءه الفكرى أو العقائدى حين يتم الحديث عن مصر.

وحفاظا على تواصلك معنا أرجو اخذ هذا التنبيه مأخذا جديا الى أقصى درجه.

الاداره

احمد محمود

[إسلام طلعت]

اولا احب بس اوضح ان تقريبا اللي فهم قصدي ومغزى كلامي هو اوتاكا

ثانيا وباختصار مفيد جدا دون التطرق للجدال الهدام كما فعلت الاخت نورا واخذت ترد على قطعة قطعة كتبتها دون ان تنتبه للرأي بشكل عام او الفكرة التي اتحدث عنها

فباختصار مع مراعاة حب الوطن كشرط من شروط المنتدى الكريم ومع الاعتذار للادارة عن سوء الفهم

فإن من لم يكره ما ذكرته سابقا فهو لا يحب مصر لان كل ما ذكرته هي سلبيات واضحة وضوح الشمس وانا لم ابالغ فيها

أما من ينكره فهو اما يعيش في وادي آخر او يلبس نظارة سوداء

وانا لست اتفاخر بانني كاره لمصر .. بل انني حزين عليها وعلى حال الشعب وحالي لاني منه

ملحوظة على تعليق الاخت نورا :

اولا مسألة الرضا بالأرزاق فالحمد لله انا راضي بكل شئ وكفاية بنعمة الاسلام نعمة - ومن الممكن ان ارضى بان اعيش في عشة فراخ واجد قوت يومي يوم بيوم مع زوجتي واولادي مفيش اي مشكلة ---- لكن المشكلة في الظلم -- هو ده الي مرضاش بيه وكل اللي انا قلته وحضرتك علقتي عليه اسمه ظلم --- البلد ظلمانا

ثانيا - احمد زويل وانا بحترمه جدا --- لم يقول ان مصر كانت لها فضل عليه ولم يردد شعارات وطنية --- بل بالعكس الراجل بكل احترام وذوق لما سئلوه عن مصر رد بلطافة وقال بمعناه ان مصر غلبته والموظفن والروتين والوساطة كادت ان تمنعه من السفر وقال ان امريكا ومساعدة الجامعات الامريكية له هي التي كانت لها الفضل عليه بعد الله عز وجل

ثالثا - آسف ان اقول لحضرتك ان نظرتك ليست واقعية وهذا ليس عيب او نقص فيكي ولكنك بكونك ولدتي في الخليج وتربيتي في الخليج وهذا يختلف تماما عن من تربى في مصر وبنى نفسه بنفسه وحاول ان يعمل في مصر وتعامل مع كافة -- وعندما ضربتي مثل انه لا يمكن للخباز ان يأخذ الف جنيه وان كل على حسب درجة تعليمه --- لان في مصر الامور لا تقاس بتلك المقاييس ولا في العالم كله اعتقد

انتهى الكلام عن مصر

نرجع لموضوعنا لو حبيته !

[وليد صفوت]

السلام عليكم ....

الأخ العزيز رمضان ... أرجو ان تنتبّه الى ما تكتبه يداك من كلمات لأن كلامك جد خطير..

النيّة فى الإستمرار فى الزواج هو شرط اساسى من شروط الزواج الشرعى ... كما ان الإشهار هو شرط اساسى من شروط الزواج الشرعى...

و لا وجود لما تسمّيه "زواج" الميسار او غيره... و من فضلك اورد لى فتوى واحدة تُحلّل اى نوع من الزيجات التى لا يتوافر فيها الشرطان اللذان قلتهما "على الأقل".

و لا اعتراض على الزواج من فلبينية او هندية او مصرية او سعودية مادامت تؤمن بالله و اليوم الآخر فلا جُناح عليه.. و لكن ان يعقد العزم الحقيقى و النيّة السليمة ان يكونا معاً الى الممات ... و أن تكون نيّته الإستمرار و بناء بيت مسلم يُذكر إسم الله فيه...

بارك الله فيك و وفّقك الى ما يحبّه و يرضاه...

تحياتى ..

[lonly in cold night]

عزيزى اسلام

معلش لو حاطول شويه فى كلامى و معلش لو حاتكلم فى امور شخصية بس هى مجرد مثل صغير

انا شاب مصرى و عندى 33 سنه و متزوج منذ 8 سنوات و لى ثلاثة ابناء والحمد لله

المقومات : والدى ووالدتى انفصلوا و انا عندى سنتين و كل نهم تزوج مرة ثانيه و انقطعت عنهم و عشت مع جدتى رحمها الله ( يعنى مش ابن ابويا ولا ابن امى اللى جوزونى و صرفوا علي جوازى )

تخرجت من كلية التجارة و كنت اعمل فى اثناء دراستى لاصرف على نفسى و اسد احتياجاتى

عندما تقدمت لخطبة زوجتى و التى كانت زميلة دراسه بالمناسبه لم اكن احتكم على قرش واحد كنت ساعتها لسه شارى جهاز كمبيوتر سنة 88 ب 4000 جنيه من تحويش العمل

يعنى ابيض يا ورد

بس لما عقدت النيه على الزواج ربنا رزقنى بالعمل و بالبركه فى الرزق و اشتريت شقه فى مايو و جبت عربيه صغيره

يعنى مش لازم اقول انا عاوز شقه تمليك ب 100الف جنيه

دفعت مقدم 15000 و ابتديت حياتى و لما ربنا اكرمنى غيرت الشقه و العربيه

اليوم انا امتلك شركتين تسويق كمبيوتر و شركة استيراد و تصدير و الحمد لله

و كل ده بتوفيق من الله

لابويا جابلى ولا امى ادتنى

بس اهلى علمونى انك على اد ما تتعب حاتلاقى

انا باسافر مرتين فى السنه علشان اعمل صفقات بره و لفيت دول العالم

و باقول اه اتقدم ده وايه الجمال ده بس ارجع و اقول عمار يا مصر

يا راجل انت حسستنى انك لازم يا تكون صبي عالمه يامّا حرامي علشان تنجح امال انا اعل ايه اللى كنت دون اب ولا ام و برضه باقول البلد دى خيرها عليا

اسف لو طولت عليكم