يوميات عاطله

[inas]

السلام عليكم ورحمة الله وبركاته

ازيكم يا محاورين

ابدأ كلامي بقصتي حكايتي مع الزمان.........

انا اتخرجت دفعت 2001 مهندسة كمبيوتر عملت في دولة الكويت منذ ذلك التاريخ الي 2005 وعملت بتدرجات وظيفية مختلفة وشهر في شغل و 10 مفيش لحد ميأست ;)

بعد كده حنيت لبلدي الي عشت طول عمري بعيد عنها وقلت هي اولا بيا وجتلك يامصر لا ابالي

وفتحا ليكي درعاتي والامل يداعب افكاري :wub: ..........

جيت هنا عشان اشتغل ....

دورت كتير وفي النهايه اشتغلت في معهد ادي كورسات كنت بطلع في اخر الشهر بعد يوم شاق ومضني ب 90 جنيه!!!!!!

قلت مش مهم بكره اقدر الاقي فرصتي :wub:

وحبيت اتثبت في مكان فكان لازم اجد مربيه للاولاد ترعاهم في غيابي وبحثت طويلا الي ان وجدت وحده قبلت بظروفي وبشروطها:

1. مدخلش المطبخ

2. منزلش الشارع ( متجبش طلبات يعني من سوبر ماركت او خضار)

3. امشي العشاء

4. يوم اجازه في الاسبوع

5. ( ودي الكارثه ) متعلمه معاها شهاده 1200جنيه عجوزه (احنا نخدمها) 400 جنيه :o

فقلت انا مبحبش اكل من ايد حد لو هاكل طعميه كل يوم ومكرونه ( اسهل حاجه هي والبيض المقلي) :blink: تمشي العشا وايه يعني اكون جيت من الشغل او اتصرف اليوم الاجازه مش مشكله ابقى اوديهم عند حماتي مرتب 1200 او 400 !!!!!!!!!

ماشي كلو يهون نجيب العجوزه تخلي بلها بس من العيال وانا انضف وراهم (ملحوظه : مرتبي هيكون 300 جنيه )

كلوا يهون لاني مدرستش 5 سنين في هندسه وطلع عيني عشان اهندس حلت المحشي!!!! ولاحساسي باني عيزه احقق زاتي ويكون ليا وضع في المجتمع انفع اولادي.

بس لقيت ان الموضوع مهواش عملي فقلت مشتغل في الحكومه وهو اضمن معاش و اضمن ترقيا وكون متثبته و المرتب محصل بعضو على الاقل ارجع بدري يوم مهيتمعظم ارجع بتنا 3 العصر . والعيال اوديهم حضانه. :wub:

جهزت اوراقي و صحيت بدري وجريت العيال ورايا ورحت على مكتب العمل وبعد صراع في الوادي اقصد على البوابه استطعت وبكل جدارة وشجاعة الفرسان البواسل ان اصل الي مكتب احد الوظفين ودار الحوار التالي:

انا: صباح الخير

الموظفه: ............ ( مفيش رد ولا كان في جزمه وقفا ادمها)

أنا: بعد ازنك عيزه اقدم طلب وظيفه

الموظفه: معندناش

أنا: طيب انا بكالوريوس هندسة حاسب آلي ممكن اقدم فين

الموظفة: ................ ( الصمت الرهيب)

أنا: لو سمحت لو مفهاش ازعاج بس تقوليلي اقدر اقدم فين

الموظفه: بصراحه فيها ازعاج

أنا:............ ( كنت بوطي اخلع الجزمه)

لقيت وحده ورايا بتقولي انت عيزه ايه

قلت : والله قالولي ممكن اقدم هنا على طلب تعيين

هي: لا يا حبيبتي مفيش هنا تقديم ( تيها دي ولا ايه)

انا: طيب ممكن تقوليلي اقدم فين

هي: تروحي الوزارات او تتابعي الاعلانات

أنا: شكرا بس الا هي ملها الاخت الي جوه احنا برضو ولاد ناس ميصحش المعامله دي

هي: اصل عندها جداول شغاله فيها من امبارح

أنا: في سري ( الحمد لله انو مكنش من اول امبارح كان زماني في القصر العيني)

ادخت بعضي وطلعت على مجلس المدينه ............. قالو معندناش

رحت اسال في شركة الكهربا ( ملحوظه: انا من سكان احدى المحافظات وليست العاصمه فرضا بني سويف) قالوا لي التقديم في الاسكندريه قلت يا جماعه احنا في بني سويف اقدم ليه في اسكندريه قالو لي احنا تبع اسكندريه وبعدين ازم يكون معاكي واسطه لواء وكيل نيابه مششار :lol: قلت : طيب

أعزائي المحاورين ومن خلال معاناتي في البحث عن وظيف طلعت بثلاث استنتاجات وقرار موضحين ادناه

الاستنتاج:

1. لو معاك واسطه تعد وتحط رجل على رجل ويا بخت من كان المششار ابوه

2.مصر بلد الكووووووسه ( معلومه زراعية وبنصدرها كمان)

3. الموظف المصري في الهيئات الحكوميه هو سبب النكسه واليأس وهروب المواطنين وكانهم نسيو انهم في يوم من الايام كانوا عاطلين ومتشحتفين على شغلانه ووقف قدام موظف يمرمط فيه وكانوا بيثار منو في الغلابه العاطلين الي ملهمش ذنب.

القرار:

أغير السيفي بتاعي ( السيره الذاتيه)

محدش عايز شغاله!!!!!!!!!!

1. حاصله على بكالريوس هندسه حاسب آلي و عدة كورسات

2.تتحدث الانجليزيه

3.مستده لعمل اشهى المؤكولات

4.اجيب خضار

5.اكون سكرتيره

6.أرعى الأولاد

7.احفظهم القرءان واساعدهم في أداء واجباتهم المدرسيه

8. منظمه و على ذوق عالي

9. بنت ناس والله

تعاطفك لوحدو مش كفايه :blink:

مصر لسا بخير يا ولاد طول مفيها أمثال الاخت الكريمه الموظفه اللئيمه

[Simba]

بس بقي قطعتي قلبي

شوفي انتي روحي توشكي وشوفيهم لو لسه شغالين اشتغلي معاهم في اي حاجة

اما اوشاعات فشل المشروع

ابقي شوفي لك اي جبل هناك واتكني فيه .... لحد ما يحصل

هو بصراحة انا مش عارف ايه اللي هيحصل

بس يمكن في الالف سنة اللي جاية حاجة حلوة تحصل

[inas]

مرسي يا سامبا

الف سنه مش كتير اديتني دفعة امل ونظره متفائل وخلتني شايفه الدنيا بنضاره بمبي ومسخسخ كمان ;)

نسيت ارحب بيك انت عضو جديد ( قال يعني انا هنا من اول مقالو يا منتدى)

[Simba]

سمبا .......... سمبا

يا عالم سمبا مش سامبا

شوفولي حد يغير اسم الدخول

لتفتكروني رقصة السامبا

الواحد احسن يهدد يهدد بعدم الرد علي المواضيع لحد ما المشرفين يرضوا عني ويغيروه

ولا اعمل ايه

يا عاااااااااالم سمبا .. سمبا مش سامبا

[lonly in cold night]

بص يا اخ سامبا

يوووووه قصدي يا اخ سمبا

والله ما بتفرق معانا الاسماء

انا كنت فى المنتديات السابقه باكتم اسمى الحقيقي و برضه بينطقوه غلط

فكبر دماعك يا اما اكتب كل مره فى بداية الرد

" من العبد الفقير الى الله سمبا عبد الله الى ......."

اهو كده اللى حيقرا حياخد باله من اسمك

ده لو ما افتكرش انك غلطت املائيا ههههههههههههههه

اسف يا ايناس انى دخلت على موضوعك ووجهت كلامي كله لسمبا

بصي يا ستي بلاش توشكى دى لان واضح ان صاحبنا عاوز يوديكى ورا الشمس

انا رايي انك تحاولى تشوفى اى مششار لو عاوزه تشتغلى فى الحكومه

و لو ان لو مالكيش نصيب فيها مش حاتيجى برضه

لانى مره قدمت تبع مصر للطيران وكانت وسطتى حاجه كبيره قوى من الناس اللي بيمضوا فى الاخر بس قال انا حاخدمه فى اخر انترفيو بس

و هو عليه ينجح فى كل الامتحانات الخاصه بالكمبيوتر واللغات و ما الى ذلك

اتقدمنا 4652 واحد و بعد الفلتره وصلنا 140 و هما عاوزين 65

قلت كده دخلنا لانى معايا المششار الكبير

وانا رايح وقعت رجلى انكسرت ما حضرتش الانترفيو وبس ( وش واحد منحوس )

[nash]

أهلا يا أيناس منورة

الحمدلله الموضوع ده جاء في وقته..

قال وأنا كنت عايزة أدخل الواد اللي حيلتي هندسه..حاسب آلي

ليه مجنونه..ولا بايعه الواد

.........................................................................

يعني مافيش أمل لياسر..بعد كل اللي أدفع عليه....وأشي دروس خصوصيه..وأشي سات..وأشي ..مصاريف مدرسه...وأشي تحطيم أعصاب....وفي الأخر هالاقيه واقف في المنتدي .....وبيتسول...حد يعبرة..بوظيفه جرسون

...................................................................................

أنا عندي فكرة..

يا بنتي أنتي معاكي شهاده كنز..ليه ماتعمليش إعلان وتقدمي فيه نفسك وساعتها علي الأقل ممكن تكوني أسم لنفسك وخصوصا إنك في محافظه..مش في القاهرة ممكن تتوهي.....

إذا ماعجبكيش الحل ده....

أقولك........

روحي يابنتي ربنا يسهلك ;)

[inas]

شكرا يا وحيد على النصيحه وفي حديث بحبو اوي ( إن رضيت بما قسمته لك ارحت قلبك وكنت عندي محمودا ) والحمد لله انا راضيا وبحمد الله على نعمو فهي لاتعد ولا تحصى انا بس عيزه اشتغل زهقت من اعدة البيت الي جرب الشغل صعب يتنح ويعد كده يا جماعه انا حسه اني بقيت متنحه ومخي فاضي زهقت من المسلسلات و نفسي اسال ربات البيوت الي عاشو طول عمرهم كده كانو بيستحملوا ازاي، شغل البيت كده كده مبيخلصش بس فين انا ( عيزه اعرف)

الا صحيح ملقتش يوم تكسر فيه رجلك غير يوميها ده ايه الحظ ده برفع من معنوياتك بس :blink:

لا يا ناش انت فهمتيني غلط انا مش بتوسل ولا عيزا حد يشوفلي حل

انا بعرض واقع الموظفين في بلدنا ومش عيزه حد يتعب نفسو ويدور على حل لان مفيش فايدا ( حكمتي في الحياه)

انا كل الي بقولوا انا صحيت من نومي خلاص والامل انتهى

يا جماعه انا مش عيزه اشتغل عشان الفلوس الماديات دي ولا بتفرق معانا

انا عيزه احقق زاتي في العمل واحس اني ليا دور هادف في المجتمع وتعب السنين مرحش هدر

ولا يبقى ايه الفرق بيني وبين الي متعلموش

وبوضح نقطه انا نفسي مكنتش وخدا بالي منها الا لما نزلت وجربت انا حسبت ان الشغل مستنيني و هيقولولي تعالي اول الشهر تستلمي شغل بس انا ملقتش حد يرد اصلا عليا و انا مؤهل عالي امال الي معاهم اعداديه بيعملوا معاهم ايه بحدفوهم بالجزم وبعدين نقول لشبابنا متتغربوش طيب هو لقى حد يعبرو مش يشغلوا يبقى يسافر احسن يدورلو على اي حاجه بره مش احسن ميبقى حرامي اكيد في فرص عمل بس ازاي توصلها وامامك الواسطه وموظف معندوش دم الا لو مكشوف عنك الحجاب .

وبعدين سيتك بطلعيلي لسانك ليه هو انا نقصا فرسه ;)

نصيحه من اخت ليكي خلي الواد يتعلملوا صنعه احسن ليه يطلع نقاش ولا سباك ولا ميكانيكي كهربائي دول علية القوم

بلا شهادات بلا قرف انا الي زعلانه عليه وبضرب نفسي بالجزمه عشانو

ذكرا اليمه وانا في امتحانات الثانويه العامه نزلت على الارض اعيط يوم امتحان الكمياء الصبح قبل الامتحان عشان راحت عليا نومه ومزاكرتش فصل الكمياء العضويه يختي بلا نيله مش كنت دخلت صنايع احسن

[nash]

نصيحه من اخت ليكي خلي الواد يتعلملوا صنعه احسن ليه يطلع نقاش ولا سباك ولا ميكانيكي كهربائي دول علية القوم

بلا شهادات بلا قرف <<<<<<<<<<سامع يا موديست النصيحه؟؟؟

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

النصيحه دي جت متأخرة جدا يا عمري..مالقيتش حد ينصحهالي من أتناشر سنه ;) :blink:

[bentmasria]

اهلا بيكى يا ايناس فى السلك الدبلوماسى اقصد سلك العاطلات وصدقينى لو كانت اعدادية قديمة يمكن كنتى حصلتى عمل مربية هههههههههههههه اصلى بتكلم عن نفسى انا قاعدة فى البيت بربى العيال برضه هو عيل واحد ربنا يحفظه ويقدرنى عليه وبدون فضايح معاش الوالد الله يرحمه كويس اما شهاداتى بداية من البكابورتوز لاتنين ماجستير عيائه وخبرة ييجى من 15 الى 20 سنة فدول تحطيهم على الرف او تعلقيهم فى الصالون وتجارب القطاع الخاص بالنسبة لواحدة فى سنى مزرية وكبرت على التعيين فى العام ولو عينونى حيدونى بالكثير ثمن البنزين او ربما الميكروباس اللى موش حعرف اركبه لو بعت زوبة

انا موش قصدى احبطك بس خلينى اوضح لك حاجة من سوق العمل فعلا

حتى لو انتى مقيمة فى القاهرة فالفرص ضئيلة ويفضلون حديثى التخرج وبدون خبرة ليه بجى؟؟؟؟؟؟؟؟؟؟؟؟

عشان ليه تدفع اكثر لما ممكن تدفع اقل ........................وجمعية ................... بتساعد اصحاب الشركات فى توظيف الشباب اللى مرتبهم اقل من 500 جنيه بتدفع له نصف الراتب لمدة سنة وعليه بيفك الواحد مننا بحوالى عشرة ما بيعرفوش حاجة ويبقى يعلمهم براحته مفيش مشاكل

اوعى تزعلى من كلامى ابدا

فكرى بشكل مختلف تقدرى تعملى ايه من البيت

ويب ديزاين مثلا واعلان صغير فى الوسيط

تدرسى لفتيات كورسات كمبيوتر فى بيتك بالنهار

تشاركى فى واحد من مراكز الدروس الخصوصية الموجودة فى المحافظات او جمعيات خيرية بتدى اجور برضه وتبقى بتشتغلى وبتعملى خير كمان

تساعدى طالبات البكالوريوس فى مشاريع التخرج بالارشاد والاشراف مقابل مبلغ مالى

فكرى من خلال الحاجات دى يمكن تلاقى فيها مدخل حل لمشكلتك

ويارب يسر وعين

[inas]

شكرا على الافكار بتاعتك وهحاول اعمل بيها خصوصا ان عندي شهادات خبره كتير ابروزهم احسن ميحمضو و لما اروح اقدم لو عرفت اوصل يعني هتاويهم ;)

[رمضان]

السلام عليكم ورحمة الله

ايتها الاخت الفاضلة انتي بتتكلمي عن انك عاطلة وانتي ست فمابالك بالرجالة اللي قاعدين من غير شغل

وفي الاول وفي الاخر الست ملهاش غير بيتها وجوزها

[Modest]

نصيحه من اخت ليكي خلي الواد يتعلملوا صنعه احسن ليه يطلع نقاش ولا سباك ولا ميكانيكي كهربائي دول علية القوم

بلا شهادات بلا قرف <<<<<<<<<<سامع يا موديست النصيحه؟؟؟

أيوة سمعتها يا ناش :D

أحمد خلاص فلت من تحت إيدي و أتمنى يسامحني إني علّمته كويس :)

لما الحق الولدين الصغيرين أطلّعهم من المدرسة و على أي ورشة يتعلموا لهم صنعة تنفعهم.

أهلاً بيكي يا إيناس و ربنا ما يحرمنا من نصايحك :huh:

[inas]

شكرا يا رمضان بس الست برضو ليها دورها في المجتع والله عرفا ان الراجل يقع عليه الحمل الاكبر فهو المسئول عن العائلة من زوجه واولاد ولو ملقاش شغل زي حلاتي بيسحب الاولاد وامهم في نزهه الي ابواب المحسنين لكن الست لو مشتغلتش بتمد ايدها لجوزي وبتقولو جبلي جكت جبلي شنطه جبلي جزمه جبلي.........................؟؟؟ :huh:

وهي مش عرفه ان يعيني عليه طلعان عينيه :)

موديت الحق العيال وتكون انت الجاني :D

[نانو]

اسمحولي احكيلكم يوميات عاطله جديده غير ايناس

و ايه لسه طازه

شوفوا انا بقالي سنتين هنا في الكويت ...و خلاص روحي هاتطلع و بتتطلع بالفعل اهيه لو حد شايفها يعني...

و اتخنقت ..لا زهقت....

و الموضوع دخل في اكتتاب غير مطلوب ابدا....و تزامن مع بعض التطورات في حياتي الغير متوقعه و الغير منتظره علي الاطلاق

مما ادي الي اتساع الهوه بيني و بين اني احقق ذاتي....و اثبت وجودي فوق هذا الكون الفسيح

المهم علشان ما اطولش عليكم....قولت لا بقه ما بدهاش...انا هابحث بحثا جديا عن شغل

و كنت بعت قبل كده السي فس بتاعي في وزاره الصحه اكثر من مره دون اي رد

بالمناسبه هنا الاعمال في الحكومه احسن بكتير من الخاص...من ناحيه الاستقرار و طبيعه العمل و المواعيد و الدخل و كل شئ

المهم قالت لي احد صديقاتي ان هنا يوجد دكتور بدرجه وكيل وزاره شخص محترم جدا و مصري الجنسيه و خدم كتير في التعين روحيله و جربي

قولت اوكي ما فيش مشكله...حضرت اوراقي و اتكشخت(يعني لبست شيك ..)

لان الكشخه هنا من اساسيات الحياه و تتحكم في كثير من مجريات الامور....و اخدت ورقي و روحت مع صديقتي و دخلت مكتب الشخص المذكور اعلاه

لقيت عنده اتنين سكرتيرات من ابناء البلد...طبعا اول ما دخلت...رموقني بنظره تفحصيه ....و الحمد لله نجحت في اول امتحان اللي هو الكشخه

قلت خير( و انا اساسا كنت ناويه اضرب الجينس بقه و اعيش حياتي لولا واحده صاحبت يالله يكرمها قالتلي لا ما ينفعش ابدا)

المهم قالتي نعم قلت لها عايز اقابل دكتور فلان

هيا : ليه

انا: علشان شغل

هيا:ايه بس هوما لوصالح ابشغلك

صاحبتي: معلش احنا عايزين نقابله

انا : في نص هدومي طبعا اتلبشت و لا بعارف ارد ولا اصد طيب خلاص مش مشكله

صاحبتي: لا طبعا احنا عايزينه في حاجه مهمه ولازم نقابله

هيا: طيب اقعدوا هنا استنوا شويه(مش اتفضلوا طبعا)

هيا لزميلتها: عايزين يقابلوا فولان (بالاسم كده ولا دكتور ولا زفت)

زميلتها: بعد حوالي عشر دقايق لقيتها بترفع سماعه التليفون ....تعالي فيه اتنين عايزينك

انا : لا ..لا ..اكيد انا سمعت غلط.....هو تعالي ديه للدكتور ووكيل الوزاره

هو: في ثانيه واحده كان طالع بره ....وواقف جنب مكتب السكرتيره بتاعته(اقصد المديره بتاعته)

ايوه نعم يا ستي

انا: انا فولانه و معايا كذا و عايزه اشتغل

هو: في حاله عصبيه هستيريه لا لا لا لا خالص لا خالص لا لا لا مافيش صعب صعب لا لا لا

انا : بيني و بين نفسي طب يا عم مالك اهدي شويه فيه ايه...براحه براحه

صاحبتي: ازاي يادكتور ده انا سمعت انه فيه خمس مشتشفيات بتتبني و عايزين صيادله كتير

هو: لا لا لا خالص لا لا ابدا مين قال الكلام ده مستشفيات؟؟؟مسشفيات ايه و رجع تاني لنفس الحاله الهستيريه الاولي...لا لا لا خالص لا لا لا

صاحبتي: بس يا دكتور بالفعل.....

هو :مقاطع حديثها .....انسي انسي خالص و بعدين لو فيه مكان هيكون لاصحاب البلد ....كل سنه فيه دفعات بتطلع و مش لاقيين مكان يتعينوا

مش معقوله هنسيبهم و اجي اعينك و اساسا هو كان بيتكلم وهو باصص للسكرتيره زي ما يكون بيسمعهلها اللي محفظاهوله

اخدت ورقي و طلعت بره المكتب مزهوله ....و ساعتها صاحبتي قالتلي

و الكاظمين الغيظ و العافين عن الناس و الله يحب المحسنين ....هه يا نانو هتبقي من المحسنين بالعافيه مش بمزاجك

روحنا لصاحبتنا التانيه اللي بعتتنا للدكتور الموقر ده

حكينالها اللي حصل....

و قالت الاسبوع اللي فات الوزاره تعاقدت مع صيادله من مصر لانهم مش لاقيين

و الحكومه بتفكر تخلي التكليف للصيادله خمس سنين الزامي لانهم بيهربوا من شغل الحكومه

و السكرتيرات دول اللي عند الكتور هم فريق جيستافوا لمراقبه الدكتور في همساته و ما يعينش اي مصري رغم انهم محتاجين

بالمناسبه بقه الشغل في الكويت لو عندك واسطه ممكن تعين دبلوم الصنايع في وظيفه مدير ادراه هندسيه

و لا عزاء لنا داخل مصرو خاجها

[inas]

فكرتني يا نانو بالكشخه وايام الكويت

رحت في مره اقدم في احد البنوك الشامخه في مدينة الكويت وداخله بكل ثقه في نفسوياتي

وبقولها عيزه اقدم طلب وتزامن دخولي مع احد الشباب الكويتين

وجهتلي سؤال جنسيتك

بيني وبينك خفت

قلت : مصريه

قالت : اسفين احنا بنكوت ( احلال يعني)

وجهة بصرها للشاب

الجنسيه فرد : كويتي

هي: تفضل حياك الله

هي: المؤهل معك شهادات

هو: طالع من ثانيه متوسطه ( مخدش اعداديه يعني)

هي: مرحبا فيك تشرب حاجه ( اجدع ابلكيشن ينزل هنا يا جدعان)

حسيت كمان شويه هتقولو سيتك تحب تتعين فين وايه طب تحب تستلم الشغل امتى

وسيتك وصلة للمكانه العلميه دي ازاي

والله هي بلدهم وهما حرين فيها!!!!!!!!!!!!!!!!!!!!!!

الواسطه ماشيه اوي في الكويت صحيح لو معاكي اعداديه وتعرفي حد في الجيش ممكن يعينك في الصحه

ولو عمرك مشفتي عربيه يكون معاكي رخصه وانت نايما في بتكم على السرير

وفي واسطه تانيه الا وهي تكوني بت حلوه وبتعرفي تتدلعي كويس

انا اتعرف وحده لبنانيه بالمصادفه معهاش ثانويه عامه بتشتغل سكرتيرة احد مديري الشركات المشهوره بتاخد مرتب 600 دينار غير المكافآت والبدلات والحوافز وغيرو وغيرو ومش عاجبها وبدور على شغلانه تانيه مديره مثلا وكل ده عشان حلوه و مايصه حبتين يوميها كنت عيزا انتحر....................

تم تعديل 4 ديسمبر 2006 بواسطة inas

[رمضان]

السلام عليكم ورحمة الله

اشكرك يا اخت ايناس لانك تفهمتي كلامي ولم تأخذيه بعصبية

اولا انا معاكي ان الست ليها دورها في المجتمع بس فيه حاجة ايه هوه دورها ده ؟

دورها الصح انها تؤهل أولادها ان يكونوا افراد منتجين في المجتمع وتاخذ بالها من جوزها

[inas]

هزعل منك ليه يا اخ رمضان علمتني الحياه ان اتقبل الوجه والوجه الاخر بصدر رحب وانت الرجاله كلكم كده شيفين ان المكان الصحيح للست هو المطبخ تلمعلك جزمتك وتكبلك جزمتك و تجهزلك هدمتك ( شفت الصدر الرحب)

وبعدين اخد بالي ليه من جوزي مهو كده كده هيجوز عليا في يوم من الايام :)

انا بهزر انا بجد لما ببص لعيالي وبيتي بقول انا ازاي اامن وحده انها ترعاهم ياتري هتهتم بنضافتهم الشخصيه هتغسل الخضار كويس هتجري وراهم وتحطلهم الاكل في بقهم وتتحايل عليهم عشان يشربو اللبن معادلة صعبه بس الي ساعدني في قراري ان فترة الصبح الاولاد بيكونو في الحضانه وبعدها المدرسه يعني الفراغ وقت النهار كبير يعني ممكن احقق زاتي بالعمل واادي دوري وعلى اكمل وجه لزوجي واولادي في فترة ما بعد الظهر الى المساء ولا ايه رايكم يا ستات........

[رمضان]

اشكر سعة صدرك

وعلى العموم انا عملت اللي عليه ونصحتك وقلت لك على اللي فيه الخير للمجتمع

ممكن اسأل سؤال

ليه بتحبوا تتعبوا لما فيه حد بيريحكم ويقولكم اقعدوا في البيت ما تشتغلوش واحنا ملتزمين بكل شيء؟

[darker19]

يا جماعة أنا الأيام دي بديت أدور على شغل فالعملية مش ناقصة إحباااااااااااااااااااااااااااااااااط

عايز تفاؤل..... تفااااااااااااااااااااااااااااااااااؤل

منك لله يالي في بالي...

على فكرة يا نانو معروفة ان الصيادله هنا فرصتهم ضعيفة جدا, أنا عندي اتني اصحابي صيادلة حفيوا هنا بقالهم سنتين مش لاقيين شغل, وواحد منهم يوم ما الدنيا ضحكتله, عينوه مندوب يلف على الصيدليات. ربنا معاكي.

يا إيناس, مش عارف أقلك إيه, المشكلة انا مش عارف أقول ايه لنفسي بجد الموضوع يخنق, امبارح كنت عايز أكتب عن الموضوع ده, بس من كتر ماهو خانقني ما بقتش عارف اكتب ايه ولا أقول ايه, مش عارف أطلع الي جوايا, كل ما اتخيل اني ممكن يعدي عليا شهر شهرين أو أكتر وانا اعد في البيت من غير شغل بتخنق, وأرجع اقول وانا ايه الي يأعدني في البيت مانزل أشتغل أي حاجة لغاية ما الاقي حاجة تناسبني, مانا غسلت عربيات واطباق قبل كده, وارجع تاني اقول بس انا كنت بره لو عملت كده هنا او حتى اشتغلت مندوب الناس هاتقول ايه.

انا عن نفسي مستعد إني أقبل اي شغل يجي قدامي, لغاية ما ربنا يسهلها, و الي حواليا بيقولولي ما تربطش نفسك بشغلانه أي كلام, إذا ماكنتش شغلانة كويسة خليك أعد في البيت أحسن.

أنا احترت المسألة بالنسبة لي مش مسألة فلوس, الحكاية اني هاتخنق من الأعدة انا اتعودت اني اشتغل, ومجرد تخيل الموضوع بيخليني اكتئب.

[Tafshan]

الاخت ايناس ..

البحث عن وظيفه في مجال ال IT في مصر او في اي دوله عربيه كالبحث عن قشه في كوم تبن .. في مصر يفضلون الفهلوه عن المتخصص و في الدول العربيه يفضلون الهنود ..

المهم انا مش داخل احبطك ..

طالما انتِ في مصر الحل انك تعملى شغل خاص بكِ يعنى ممكن تأجرى محل و تعملى انترنت كافيه و تدخلى معاه دورات و بيع اجهزه و صيانه .. الموضوع مش محتاج رأسمال كبير و لا حاجه .. ممكن تبدأى باربع اجهزه مستعملين و خط ADSL و محل ايجار و وضبيه بنفسك .. مش لازم يبقى شيك قوى في الاول ... الميزه اللى عندك انك مش في القاهره و بالتالى المنافسه ح تبقى قليله ..

لو ما فيش رأسمال ممكن تشاركى و ح تلاقى بين اصحابك اهلك اللى عايز يعمل حاجه و مش عارف ايه هيا :)

ربنا معاكِ :D