يوميات عاطله

[Diab]

طيب أنا بقي أحكلكم نكت جامدة طحن

في شهر أتنين اللي فات قدمت في هيئة النقل العام أشتغل مهندس صيانة

قلت يلا فرصة أركب الأوتوبيس ببلاش :lol: مع إني أليط ومبركبوش أصلاً

تخيلوا بعد ما جيت السعودية اهلي بيكلموني ويقولولي مش التعيين جالك

أمتي

أول شهر نوفمبر

- أخدتني حالة ضحك هيستيري و بأقول مش زماني راكب الأوتوبيس ببلاش وبقولهم أبونيه

واحد ظريف برضه صاحب شغل كان عايز يعيني في الشركة تخيلو المرتب كام

مفاجأة

عارفين كام

ببلاش

بقوله نعم ليه أن شاء الله

يقولي عشان تكتسب خبرة

:)

تم تعديل 4 ديسمبر 2006 بواسطة Diab

[alhazem12004]

السلام عليكم

مش عارف ابداء كلامى من فين لانكم بصراحه سببتوا ليها احباط ... اه نسيت ااقلكم انى عضو جديد بالمنتدى بقالى يومين بس وشكلى كده هااعتزل بدرى بدرى . انا مصرى وعايش ومتهبب بالكويت من 6 سنين وشغال فى شركه حكوميه ومش هااضحك عليكم انا جيت من مصر كرت زياره عائلى وكانت الواسطه جاهزه ووقعت العقد وخطفت رجلى الى البحرين عملت كشف طبى ولقيت البحرين حلوه طنشت الشغل وقعدت هناك 10 ايام . ورجعت اتهببت استلمت الشغل .. باختصار شديد عمر العرب ماهايقدروا يستغنوا عن الوسايط ولا هاتتمنع فى يوم من الايام . فكل واحد فيكم عايز يشتغل يجهز واسطته من الاول او يقعد بالبيت احسن :lol: -_- على فكره انا باخد شغل مقاولات لحسابى كمان بس مش دائما يعنى على حسب الاحوال النفسيه والماديه

المهم وبعد كده زهقت وقرفت ونفسى اانهى خدماتى وارجع مصر لكن كلامكم عن مصر برغم انى عارفه وحافظه سببلى احباط اكتر . لانى عايز انزل مصر وافتح مشروع خاص بيا بس بصراحه خايف على الكام مليم اللى معايا .. :)

منتظر منكم راى افادكم الله بس والنبى بلاش احباط بليززززززززززززززززززززززززززززززز

مصرى^بالكويت

[nora]

ايه كم الاحباط ده لاه مش ممكن انا شكلي هجيب دستيتين مظارات بمبي :lol:

بس والله انا شكلي هكمل عليكم انا مش هتكلم عن الماضي الاليم بتاعي بس انا هتكلم عن ماساه محدش اتكلم عنها عرفين انا لما جيت قدمت هنا في مصر لما جيت من الكويت فكرت اني هتخطف خطف وخاصه اني كنت بشتغل في معهد كبير وعالمي في الكويت

بس عرفين كنت بترفض ليه واتقالت صراحت لجوزي معلش احنا عيزنها مش محجبه -_-

وكل الي اقوله يقولي عيزة شغله كويسه بمرتب كويس صعب جدا انتي محجبه هما عيزنها بنت حركات :)

مش عرفه طب هو ايه مشكلت الحجاب مش كفايه ان تكون حسنت المظهر والمنظر ولا انا ريحه اتعين بشعري ودلعي

فقلت اعد شويه جمب العيال لحد مربنا يكرمني بحاجه جايز في يوم يتفك النحس عنا:unsure:

[صبح]

الأخت الفاضلة إيناس

العمل في مصر ليس بالصعوبة التي تتصورينها وخصوصا في مجال ال IT

يمكنك البحث في هذا الموقع وستجدي العديد من الوظائف المحترمة والمتخصصة في مجالك

وإن شئت أضع لك هنا في موضوعك كل ما وقع تحت يدي في الفترة السابقة من طلبات توظيف في نفس المجال

[inas]

يا رمضان لو قعدت اقولك عن الاسباب الي بتدفع لعمل المرأه يبقى هخرج عن الموضوع وبفضل افتحلو موضوع جديد اخر عموما شكرا على النصيحه -_-

دودو انت لسه مكملتش يومين بدور لسه المشوار طويل قدامك ( نظره بعيده للمستقبل المظلم)

انا مقصدش اسودها في وشك بس دا الواقع المرير بس نصيحه انك تشتغل اي شغلانه لحد متلاقي الي احسن منها حتى لو مش في مجالك الشغل مش عيب اي كان الشغلانه مش احسن متبقى حرامي او عاطل بس الصبر مع المثابره وتسلح بسلاح الفرسان لمواجهة طوفان الهنود العدو اللدود :lol:

شكرا يا طفشان بس اسمك واضح لو معنى انت طفشت من مصر ليه؟؟؟

وعندك حق الهنود شاطرين واجورهم قليله انا كان ليا زميلي بيشتغل في الوطنيه للاتصالات بياخد مرتب 1000 دينار رفدو وجابو هندي ويمكن احسن منو بياخد 200 بس

دياب انت الخسران مكنت تاخد خبره تنفعك ويعيني ملكش حظ تركب الاتوبيس ببلاش :)

الحازم مظنش موضوع فتح مشروع في مصر دي فكره سديده فا مثلا هنا في مصر وفي كل الجمهوريه لو واحد محل عصير قصب هتلاقي عشرا فتحو جمبو فتلاقي محل عصير محل ايس كريم محل ايشاربات محل عير ايس كريم ايشاربات وممكن تدخل تلاقي شارع باكمله مكياج وتاني ايس كريم غباء تجاري وتقليد اعمى والمصيبه محدش معاه فلوس اصلا يشتري فا انا افتحلي نت كافيه وفي المتر المربع الواحد هتلاقي 10 بالمئه نت كافيه وكلهم اعدين مشغلين اغاني ظلموه ويوم ميدخلك حد هيكون يا معرفه يا هيعد ساعه على النت بجنيه هي هي انا مش بحبطك بس لو نفسك تخسر تحويشت العمر تعالى او تجيب فكره جديده محل بيبيع لبن العصفور بس متقلقش في اقل من شهر هتلاقي كل الي حواليك بيبيعو لبن العصفور :unsure:

صح انت فكرك اني محاولتش في الواقع انا طول النهار ببعت في السي في بتاعي ومسجله في اكثر محركات البحث عن وظائف شهره وانتشار وبيجيلي اعلانات وظائف كتير جدا عن وظائف في مجال الكمبيوتر لكن بصراحه وبعد اكتر من سنتين

اما في حد عبرني ولا حياة لمن تنادي لدرجة شكيت ان الايميلات بتوصلهم اصلا طيب حتى مره يجيلي معاد انتر فيو ولا مره اقسم بالله طيب حد يتصل يقولي انت فين ولا كاني نكره في الوجود

شكرا مره اخرى

[nancy]

شوفى يا ايناس

انا حاحكيلك على واحدة لاقت شغل اول ما تخرجت الى هى انا

رحت على رئيس مجلس ادارة وقلتلة عوزة اشتغل هنا الراجل افتكر انى مقدامة اوى وراح معينى على طول

انا افتكرت فى الاول انهم عينونى علشان اتوسموا فيا انى ذكية اوى اكتشفت بعد كدة شوية حاجات

اولا مسكت حوالى 3 شغلانات فى وقت واحد واخدت مرتب بيكفى موصلاتى بس

وطلع انة الشغل نظام استنزاف

وبصراحة رئيس مجلس الادارة كان عرض عليا انى اسافر فرنسا وادرس تصميم ملابس

وانى يتعمل قسم لتصميم الملابس لزوجات الوزراء وسيدات مجلس الشعب

واستغربت لية هو عرض عليا حاجة زى دى ومن غير تفاصيل اتارى كان فية غرض فى نفسه

تعرفى فهمتة امتا لما سبت الشغل وحمدت ربنا انى خرجت من الشركا دى على رجليا ومن غير مصيبة او فضيحة

ادى الشغل الى من غير وسطة ولا ظهر يسندك

بره مصر فى البلاد العربية فى الغالب بتاخد حقك فى شغلك بالدحلبة وانت تكون مش سهر

فى العالم الاول رغم انك ممكن تتعبى اوى فى شغلك بس فى الاخر ايما كان تخصصك انتى بتتعملى باحترام

للاسف حاجة تزعل ان دة حال بلدنا

ضيفى لكدة انك فعلا لو رحتى تتعاملى مع اى مصلحة حكومية معندهمش اى استعداد يرضوا عليكى

ولازم تلاقى مروحة شغالة والسندوتشات على المكتب والفراش مش بيودى اوراق او اى شىء لا شغلتة انة يودى شاى

ولا لو شفتى موظفين مصلحة حكومية وهما عندهم زميل شغال تاجر شنطة وانت واقفة يكلموا بعض هو دة قستة كام كل شهر وقومى قيسى دى علشان مقاسك اد مراتى وكلام فارغ كتير

[bentmasria]

معليش يا ايناس حضيف مداخلة بس رد على رمضان

يا استاذ رمضان

ياترى لو الظروف اختلفت وحضرتك بمصر ومتزوج وعاوز تفتح بيت متوسط المستوى ولن اقول على اعلى مستوى ولديك طفل ولن اقول خمسة مثلا ومطلوب منك قسط المدرسة وبنزين السيارة او الباص شهريا لمدرسة الطفل وكسوة الشتاء اول الموسم والكثير من تفاصيل الحياه سيدى الكريم وتحمل زوجتك مؤهلا يؤهلها للعمل بدخل يقارب دخلك فهل ستجعلها جليسة المنزل بينما انت تعمل ليل نهار لتوفر لهم احتياجاتهم

وهل ساعتها ستتذكر ان الحياة شراكة وتطلب منها النزول الى ساحة العمل لتتعاونوا على مسئوليات الحياة

ولنأت لحكاية اخرى

لو كانت الزوجة ارملة او مطلقة ومنوطة بمسئوليات اطفال فمن سيقوم بهذا الدور

سيدى انت فى ساحة الرزق والكل يسعى له فلا تقلل من دورنا فى اثراء واعمار مجتمعنا وانشاء ابناءنا ان شاء الله لنا

شكرا واستميحك عذرا يا ايناس

[inas]

نوره و نانسي عندكم حق طبعا في الي قلتو في ستات كتير وبنات بيواجهو حجات من ددي كتير

وطبعا الي مش محجبه فرصها اكبر زي البنت اللبنانيه الي قلت عنها مع احترامي للشعب اللبناني بس كل شعب في الوحش وفي الحلو

وشكرا يا بنت مصريه على مداخلتك انا مرضتش ارد على رمضان هنا لاني حسيت انو موضوع كبير ولو فتحتو هخرج عن اساس الموضوع الي فتحتو وفضلت اعملو موضوع منفصل بذاتو

[Ahmad Farahat]

محدش عايز شغاله!!!!!!!!!!

1. حاصله على بكالريوس هندسه حاسب آلي و عدة كورسات

2.تتحدث الانجليزيه

3.مستده لعمل اشهى المؤكولات

4.اجيب خضار

5.اكون سكرتيره

6.أرعى الأولاد

7.احفظهم القرءان واساعدهم في أداء واجباتهم المدرسيه

8. منظمه و على ذوق عالي

9. بنت ناس والله

تعاطفك لوحدو مش كفايه :closedeyes:

مصر لسا بخير يا ولاد طول مفيها أمثال الاخت الكريمه الموظفه اللئيمه

عارفه يا إيناس فين المشكلة.............

المشكلة أن كل عيب في بلدنا قد صار يتحرك في اتجاهين..........

كأن يكون مثلا............

5 كجم سمنه=9 جنيه

بكره

4 كجم سمنه=13 جنيه

يقل الوزن ويزيد السعر

المصيبة الكبرى في البطالة ليست في البطالة وحدها...........

الكارثة أن يحمل المهندس أنابيبا فوق ظهره..........

والطبيب يغسل مواعين وهكذا.........

ليس احتقارا لهذه المهن ولكن.........

العيب أن تنفق الدولة على الطالب ليكون مهندسا ثم يكون زبالا........

دي كارثة قومية...........

هنتكلم كتير قوي يا إيناس.......

[inas]

ارسين لوبين في اوربا والدول المتقدمه بيهتمو بالطلاب النابغين ليكونو علماء ويوفرلهم كل مايحتاجونه من وسائل وكتب ومعامل وأدوات اما احنا بنصدر العلماء للخارج امثال احمد زويل ولما ينبغ نفتكروا ونظهرو للاعلام ونقول هو ده ابن مصر

الشغل مش عيب بس للاسف راجل فاتح بيت ياكل مراتو وعيالوا منين و يدفع ايجار ومدارس وكتب ومواصلات ووووو

الايد البطاله نجسه وعلى هذا الاساس بيطر مرغما انو يمسح بلاط عشان لقمت العيش والا هيعد ويقول شهادتي وياناس شوفولي شغلانه في مجالي ولا هيكون عاله على مراو ولا ابوه ولا مين مشكله صدقني كبيره بس هنعمل ايه

والست لو مشتغلتش ليها راجل ملزما منو لكن الراجل ينتحر ولا يروح فين انا حطيت الموضوع ده مش عشان اعرض مشكله شخصيه دي مشكله عامه ورهيبه وبتقولو الحراميه كترو ليه

النهرده شفت اعلان هلكني من الضحك

بيقول ساعدونا في التعداد عشان نحل مشكلة البطاله :closedeyes:

[Tafshan]

شكرا يا طفشان بس اسمك واضح لو معنى انت طفشت من مصر ليه؟؟؟

وعندك حق الهنود شاطرين واجورهم قليله انا كان ليا زميلي بيشتغل في الوطنيه للاتصالات بياخد مرتب 1000 دينار رفدو وجابو هندي ويمكن احسن منو بياخد 200 بس

بصى يا سيدتى ..

ان الله لا يضيع اجر من احسن عملاً ...

و مش لازم الاجر يكون في نفس العمل ...

يعنى مثلاً لو افترضنا انك شغلتِ وقتك و عملتِ مجهود جبار عشان تعملى مكتب صغير او محل تأجري فيه انترنت .. و الموضوع ما نفعش .. الناس ح يبصوا لكِ على انك صاحبة مشروع حتى لو ما نفعش + ان ده ح يديلك خبره ممكن تستخدميها في بناء ال CV بتاعك ...

اما قصة طفشانى فكانت كالتالى : كانت الدنيا بايظه كما اسهبتِ و اشتغلت ببلاش فعلاًَ بغرض الخبره عند واحد نصاب و انا عارف انى مش ح اخذ حاجه و بعدين فتحت مكتب صغير من غير ورق كنت بابيع و باعمل صيانه و بادى دورات .. كل ده لواحدى ... انتِ عارفه .. كنت بابيع الجهاز ابو 2000 جنيه و بأخذ مكسب فيه 30 جنيه .. و طبعاً كنت ما عنديش بضاعه .. كلها كنت بأجيبها من السوق و ع الباب كراتين فاضيه لبرد و سي دى روم و بروسيسور ...و كده :closedeyes:

المهم في وسط المعمعه دى جالى عرض اشتغل Document Controler في شركة استشارات في دبي.. كل شغلى انى اختم و اصور ورق .. و حبه حبه بدأت اقنعهم انهم ممكن يشتغلوا احسن من كده ... و دخلت ال IT و ده الوقت انا IT Manager :unsure:

الفضل كله لمكتب الكمبيوتر الصغير اللى علمنى احارب عشان 30 جنيه و ما استكبرش اخذهم و اقول شكراً كمان ...

الوظيفه الجاهزه فرصه و ح تيجي باذن الله لما توسعى مجالاتك .. موضوع القوى العاميه و الحاجات دى زي عدمها .. و موضوع الشهاده لواحده ما لوش لازمه .. النهارده اي واحد واخذ A+ بيقول على نفسه مهندس كمبيوتر :wub:

ابدأي و ربنا معاكِ ... و لو عايزه افكار انا في الخدمه ..

تم تعديل 5 ديسمبر 2006 بواسطة Tafshan

[inas]

شكرا يا طفشان وباحيك على تجربتك الي يارب الكل يستفاد منها وزي مقلت الشغل مش عيب وانت ادتنا مثال حي

وكان النتيجه ان ربنا عوض اخرة صبرك خير ربنا معاك :blush:

[alhazem12004]

السلام عليكم

شكرا يا اخت ايناس على الرد وتوضيحك لبعض الامور الخاصه بالمشاريع فى مصر . فعلا انا معاكى اننا بنقلد اى مشروع بيتعمل وده دليل على انه فيه ناس معاها فلوس بس للاسف تفكيرهم محدود واسهل شئ عندهم هو انه يقلد اللى جنبه حتى لو كان مش بيعرف اى شئ عن النشاط ده المهم انه يفتح مشروع والسلام وفى الاخر بيخسر .

بس الاهم من ده كله سؤال محيرنى قووووووووى ... لحد امتى الواحد هايفضل متغرب والعمر بيجرى اسرع من المواصلات ياترى هانفضل متغربين لحد مالواحد يموت هنا زى الناس اللى بشوفها ؟ عمرك جربتى الخوف من بكره وانه يجى بكره وانتى لسه مكانك وماحققتيش اى هدف او معنى فى حياتك سوى الغربه .

انا لو رجعت مصر مش هااعيش فى القاهره لا .. هااعيش فى اى مكان تانى زى الغردقه او شرم الشيخ وهاافتح مشروعى هناك . انا عاشق للعمل بالمطاعم من حوالى 15 سنه وكان عندى معطم هنا او وشريك مصرى بس للاسف اختلفنا من حوالى سنه وتركنا المطعم . المهم انى حافظ العمل ده وبحبه وبعتبره فن . وهو ده المجال اللى هااحاول العب فيه بأذن الله .

المهم عندى انى اخلص من الغربه وقرفها برغم انى موظف حكومه والحمد لله راتبى فوق الممتاز ودوامى 8 ساعات باليوم وشغلى 5 ايام بالاسبوع وبشتغل اضافى لمده 4 ساعات برضه فى نفس الشركه . بالاضافه الى شغل المقاولات اللى انا باخده لحسابى الخاص . ومع ذلك زهقتتتتتتتتت من الوحده وقرفها والايام اللى شبهه بعضها واللى الواحد مش عارف اولها من اخرها

مصرى^بالكويت :blush:

[أبو زياد]

اختى المحترمة إيناس

أنتى فتحتى الموضوع

والكثيرين شاركوا و قرأت الآن كل المشاركات

ولم أكن قد فتحته من يومين تقريبا

بصراحة .... :blush:

أبكيتونى و مزقتوا أحاسيسى و قطعتوا قلبى

أخت إيناس : حترجعى إمتى الكويت ؟ :)

ملحوظات :

- كلمة ذاتى بحرف الذال و ليس الزال (أحقق ذاتى )

أعجبتنى كلمة بنكوت على وزن .... بس الكلمة عجيبة فعلا

طبعا دة حقهم بس مش من الحق ابدا شهادة عالية زى حضرتك تتعرض لهذه المواقف

ثم تجدى من لا خبرة له ولا دراسة يشغل مكانا لا يستحقه

أمنية بسيطة : ادعو الله أن يوفقك ثم تحكى لنا تجربتك الناجحة مثل الخ طفشان و غيره

[inas]

اخي الحازم شكرا على مشاركتك وبتمنى ليك من كل قلبي النجاح والتوفيق بس نصيحه اوعى تخلي الغربه تسرقك انا سبت الكويت هربا من الغربه رغم ان اهلي هناك فالغربه وطن!!!!!!!!! ومقدرتش اعيش في بلد طول عمري بعامل على اني اجنبي دخيل بياخد قوت ولادهم رغم انو بعرقو وشقاه

شكرا يا بو زياد على امنيتك الجميله وملحوظه التكويت دي حقيقه و السعوده كمان وغلطت زاتي لزوم العاميه :blush:

ملحوظه كمان : مظنش اني هرجع تاني مش وطنيا ولا كره في الكويت بالعكس دي البلد الي عشت في طول عمري وبحبها بجد لكن خيفه الايام تسرقني ولاقي نفسي في يوم مرغمه على الرجوع واجي مصر ملقاش لنفسي مكان لكن دلوقتي انا لسه العمر امامي وممكن انحت في الصخر لكن لو كبرت ورجعت مش هيكون فيا حيل انحت واشق طريق جديد من تحت الصفر!!!!!!!!!!!!!!!

تم تعديل 5 ديسمبر 2006 بواسطة inas

[alhazem12004]

الاخت ايناس

بشكرك على ردك الرائع لانه فعلا هو ده اللى انا حاسس بيه وعايش فيه خايف انى عمرى يجرى هنا ولما ارجع مصر الاقى ان حياتى انتهت .

بحييكى على قرارك الشجاع برجوعك لمصر برغم انك مواليد هنا ... وعلى فكره انا بصراااااحه عمرى ماحبيت المصريين مواليد هنا لانى بحس ان كل حياتكم وافكارهم متغيره لانهم امتزوجا بتربيتهم على يد خدم هنود وخلافه فبلاقى الشخصيه دى متعدد الجنسيات .

فعلشان كده انا بجد مستغرب لانى لقيت انسانه مصريه مواليد هنا وقررت فجاءه الرجوع لمصر وحب مصر

لكى منى الف مليون ورده وتحيه وتقدير على قرارك ده

مصرى^بالكويت :blush:

[عبده بيه]

الاخت ايناس بعد التحية

اولا وضع بلدنا للاسف صعب جدا وموظفينا للاسف متخافين وغير اداميين بكلمك من واقع تجارب كثيرة باحتكاكي بالقطاع المتخلف اسف العام

ثانيا نحمد الله انك مازلتي عند الامل فان شاء الله خير من راي الشخصي ياريت تعملي السيرة الذاتية ومرفقة بجواب يعرف امكانياتك

وتبدئي بالاتصال علي الشركات العالمية المتواجدة في مصر والتوكيلات في كل القطاعات مثل البترول واللاكترونيات مثل كل الماركات العالمية بلاش اذكر الاسامي والشركات المتخصصة في مجال الكمبيوتر والمويبلات ايضا وهنا في خطة الفرنشيزي وانك تحضري المعارض ومن هنا تستطيعي الوصول الي المسئولين عن الشركات بسهولة ويسر وهذا غير شركات السيارت المتواجدة في مصر بصفة مستثمرين حتي شركات التعمير انتي بتخصصك مطلوبة الموضوع محتاج منك مجهود لكن اكيد هتوصلي لمكانك وكوني علي يقين بان الله لا يضيع عملك ومجهودك وان شاء الله خير اختي لا تياسي وتوكلي علي الله مع خالص دعواتي وامنياتي

[mano]

ممكن اشارك معاكو برائي

انا شايف من وجه نظري ان احنا عيشيين للاسف في مجتمع متخلف (سوا كان في الكويت او في مصر)

الناس مبيهمهاش غير الكلام على بعضيها الناس بيهمهم الظاهر فقط مشمهم انت بتشتغل اه ولا بتعمل اه في حياتك

المهم يكون معاك فلوس يرب تكون حتى تاجر مخدرات

بالنسبالي انا فعلا اكتر حاجه بتخنوني :blush: لما واحد يكون لسه متخرجش وابوه لسه بيصرف عليه ويجي يبصلي من فوق لتحت

اكمني بشتغل ميكانيكي :) . اتخرجت من كليه التجاره والحمدلله شغال ميكانيكي سيارات :)

[inas]

شكرا يا الحازم وعقبال لما نحيك على قرارك :)

الف شكرا على نصيحتك يا عبدو بيه وهحاول العمل بها ان وجدت ظهر يسندني :)

وربنا يوفقك يا مانو والله الشغل مش عيب ربنا معاك وان شاء الله تقدر في يوم تشتغل في مكانك الصحيح :blush:

[عبده بيه]

والله يا اختي من غير ضهر ولا اي واسطة الموضوع بيتوقف علي قبولك ولباقتك واسلوبك وان شاء الله خير وفي الاول والاخر اليقين والاخلاص في الشيء وحسن التوقع يعني التفائل دائما