يوميات عاطله

[Tafshan]

وربنا يوفقك يا مانو والله الشغل مش عيب ربنا معاك وان شاء الله تقدر في يوم تشتغل في مكانك الصحيح -_-

و مين قال لك انه مش مكانه الصحيح ؟؟

سيبك من الفلكلور الشعبي عن قيمة الوظائف .. انا اعتقد ان ميكانيكى شاطر امين في عمله ابرك من الف خريج تجاره قاعد ع القهوه :happy:

ربنا يوفقه و يبقى صاحب ورشه يقدر فيها يطبق ما درس في كلية تجاره لرفع مستوى مهنته التى يجيدها .. هذا هو دور التعليم الحقيقي : اكتساب مهارات جديده لتحسين نوعية العمل و ليس بالضروره التعليم = وظيفه على المقاس سابقة التجيهز B)

[أبو زياد]

مين دة اللى بيبص لك يا مانو ؟

والله يعلم أنى من ساعة ماعرفت بعملك إنى لم انظر لك إلا إلى فوق

فانت اخترت لنفسك مجالا و مكانا تبنى منه نفسك و انا شخصيا معجب بك ولأنك قدوة لمن مثلك

إن الله إن كان فضل أحدا فقد فضله بالتقوى أولا ثم بحسن الخلق و الحكمة ولا اظن ان إحداها ينقصك و لا ازكيك على الله و لكن لزم القول من جانب الإنصاف

[رمضان]

صباح العسل يا مانو

فينك يا راجل

على فكرة ان دائما وجهة نظري اعمل الشيء الذي تجد نفسك فيه

وصدقني هتنج وهتبدع فيه

واللي مش عاجبه يشرب من البحر

[inas]

هو انا قلت حاجه يا طفشان انت عايز توقعني في مانو ليه احنا كلنا هنا اخوات بنحترم بعض انا بالعكس قلت يمكن هو بيحلم في يوم يشتغل مسئول حسابات ولا محاسب ولا اي حاجه من دي انا اخويا كان بيغسل عربيات مش بيصلحها ودا شيء افخر بيه لانو مكافح

وانا قلت ان الشغل مش عيب لو رجعت لردودو ومنادتش بان الناس تعد على القهاوي في انتظار وظيفه على القد بس انت ماخدتش بالك اظاهر -_-

الاختلاف لا يفسد للود قضيه B)

معلش احنا بنتكلم :happy:

[mano]

ياجماعه انا فعلا بحب شغلى جدااااااا

لكن انا بتكلم على نظره المجتمع للمهن الحرفيه انا شوفت وحسيت

الموضوع ده بنفسي من خلال تجربتي وانا

في الشغل بس هو ده قصدى من ان اننا

عيشيين في مجتمع متخلف

[Tafshan]

هو انا قلت حاجه يا طفشان انت عايز توقعني في مانو ليه احنا كلنا هنا اخوات بنحترم بعض انا بالعكس قلت يمكن هو بيحلم في يوم يشتغل مسئول حسابات ولا محاسب ولا اي حاجه من دي انا اخويا كان بيغسل عربيات مش بيصلحها ودا شيء افخر بيه لانو مكافح

وانا قلت ان الشغل مش عيب لو رجعت لردودو ومنادتش بان الناس تعد على القهاوي في انتظار وظيفه على القد بس انت ماخدتش بالك اظاهر -_-

الاختلاف لا يفسد للود قضيه B)

معلش احنا بنتكلم :happy:

انا لا اقصد ان كلامك فيه اسائه و انما اقصد القاء الضوء على مشكلة طبقية الشهادات التى نعانى منها .. فمثلاً لو كنت احب ميكانيكا السيارات و اردت ان اتعلمها .. فهل هناك مكان لاتعلم فيه ميكانيكا السيارات بطريقه محترفه غير الورش التى في الاغلب يديرها اشخاص اكتسبوا الصنعه عن خبره و ليس عن علم ؟؟

المشكله هى ان مثل هذا المكان اذا بدأ لن يرتاده احد خوفاً من النظره الاجتماعيه الغبيه التى تحدث عنها مانو ..

اسف ان كنت قد فهمتِ من حديثى عكس ذلك مع العلم انه لا خلاف في الرأي بيننا

[inas]

ياجماعه انا فعلا بحب شغلى جدااااااا

لكن انا بتكلم على نظره المجتمع للمهن الحرفيه انا شوفت وحسيت

الموضوع ده بنفسي من خلال تجربتي وانا

في الشغل بس هو ده قصدى من ان اننا

عيشيين في مجتمع متخلف

فعلا متخلف صدقني لك مني كل الاحترام والتقدير

اسف ان كنت قد فهمتِ من حديثى عكس ذلك مع العلم انه لا خلاف في الرأي بيننا

لا داعي للاسف ربنا ميجيب خلاف :happy:

[salma]

بصراحه الموضوع شدني جدا و انا لسه شايفاه حالا

والله يا جماعه انا الشهاده بتاعتي لسه في الكليه و مستخسره اروح اجيبها عشان مدفعش المواصلات

اه والله و كمان تعب المشوار

ده غير تكلفه البرواز للشهاده :closedeyes:

اصل بصراحه انا وقعت في حته قسم مش موجود اساسا في مصر

قسم العلاقات العامه و المشهور مصريا بانه بتاع الحفلات والرحلات و الترفييييييييه

بينما هو في الدول المتحضره ؛؛؛؛؛؛؛؛ حاشا لله ان نكون منهم :D

هو اهم قسم في اي بنك او شركه او وكاله اعلان

ياما كنا بنحلم زمان

صحفيه لامعه

مذيعه مشهوره

اوحتي شغاله في قسم علاقات عامه في شركه محترمه

مفيش واسطه

يبقي مفيش شغل

و الحلم اتداس

كان نفسي اثبت ذاتي

اعمل حاجه

اغير شويه من نفسي

بس الشباب نفسهم مش لاقيين شغل

احنا هنلاقي؟؟؟؟؟؟؟؟؟؟؟

اقولكم حلم بس مكسوفه؟

كان نفسي اشتغل في بيع الفاكهه و الخضار

شغله لذيذه واهو الواحد يقزقز في الفاكهه لحد ماتفرج

خلي الحيتان مبسوطين

والرصيد بيعلي في البنوك

ولا اقوللكم بلاش نكد

اللي يلقي شغلانه يدورلي معاه والنبي :P

[inas]

ياااااااااااه باه من علاقات عامه لبائعة فاكهه

طيب انا مهندسه ابقى شغاله معقوله

مين ده الي عندو شغل يابنتي

امال فين بتوع النيابه وامن الدوله والمششارين يجو يتوصتولنا هنا

نصيحه اجوزي واعدي في البيت :closedeyes:

[nancy]

عرفة يا ايناس انا اشتغلت اول ما تخرجت زى ما قلتلك قبل كدة

وبعدين سبت الشغل واتجوزت وسافرت

ولكن كملت ماجستير ولحد دلوقت باشتغل فى الدكتوراه

باقراء كتير وعندى خبرة فى مجالات كتير

واشتغلت بس من خمس سنين هنا فى السعودية

بس خاص يعنى عملية ديكور او اتنين على كل السنة يعنى فيلا وقصر افراح كل سنة الى جانب معهد وااكادمية بادى كورس للديكور فيهم

يعنى اجمالى ساعات شغلى كل يوم حوالى 4 ساعات مش اكتر والباقى البيت والبنات

بس قبل ما اشتغل كنت باعيط بالدموع كل يوم انى مجرد ست بيت وانى طاقة مهدرة وان الى بعملة دة مش مالى حياتى

الشغل مهم مهم جدا

بس لو ملقيناش لازم تعملى حاجة خاصة بيكى حتى لو تشتغليها كام ساعة فى اليوم لازم تلاقى نفسك

حتة ان الشهادة مبقتش تساوى الحبر الى بتتكتب عليها دى لازم ننساها ونبتدى نفكر

احنا بنعرف نعمل اية ونعملة ازاى حتى لو بشغل خاص حتى لو فى اماكن خيرية

المهم نلاقى نفسنا ونحقق ذاتنا باى حاجة تسعدنا

اتمنى ان ميكونش راى كلام سفسطائى وخلاص

[inas]

بالعكس يا نانسي اسعدني عرضك لتجربتك

وفعلا انا حاليا بعمل حجات بسيطه من البيت بصمم مواقع لصديق زوجي و بدي درس لاولاد صديق لزوجي

( جوزي لقى انها هتقلب معايا باكتئاب فحب يساعدني) :D

هو بدون اجر صحيح :closedeyes:

بس انا هدفي اني اطور من نفسي و منساش الي اتعلمتو ويصاب عقلي بالركود ومحسش ان تعب السنين راح على الفاضي

شكرا ليك تاني يا عزيزتي :P

[أبو زياد]

عنوان الموضوع دائما يشدنى و اعيد التفكير فيه من وقت لآخر

لماذا تشعر المرأة فى بيتها أنها عاطلة ؟

لحظة .. فأنا لا أستنكر شيئا بل أنى أؤيد و بكامل إرادتى عمل المرأة

ولكنى أريد ان أحدد السؤال و أركز الموضوع ..

كيف تحقق المرأة وجودها و كيانها فى المجتمع بدون أن يؤثر ذلك سلبيا - و بأى صورة - على بيتها و وظيفتها الأساسية

أرجو ألا يفهم سؤالى على أنه دعوة للمراة لترك العمل و الجلوس فى البيت - فلابد أن يكون للمرأة دورها فى المجتمع فينعكس ذلك على تربيتها لأولادها و بيتها وكيانها الذى هو أساس بناء المجتمع

إنها معادلة صعبة - أرجو أن تصلوا معى إلى بعض الحلول و التجارب ..

والتى منها مثلا تجربة الأخت نانسى التى أتمنى ان يكون لها أكثر من مثيل ..

[inas]

والله يا ابو زياد عمل المرأه لو هي مستعده له نفسيا مظنش ان له تاثير كبير

انا وحده من الناس الي بتخاف اوي على عيالها ومبامنش لاي حد انو يرعاهم

اصلي وسواسه حبتين مش عارفه دا مرض ولا حرص زايد

بس بحب اكون انا الي باكلهم واهتم بنضافتهم ومش بايد ان الوحده تشتغل وتجيب حد يربلها عيالها

بس انا بقول لما العيال بيكونو في المدارس بيكون في فراغ كبير وقت النهار هي ممكن تكون بتشتغل في الوقت دا

وبعدين في نقطه هتكلم عليها الزمن معدش فيه امان فالوحده لازم يكون ليها مهنه مش تكون عاله على المجتمع لاي ظرف لا قدر الله الزوج طلقها ولا اترملت كفانا جميعا الشر يارب الست بتتبهدل هتعد تدور علي يصرف عليها هيا وعيالها ولا تروح لاهلها تقولهم اصرفو عليا انا وعيالي دا بوجه عام

اما في الحالات العاديه ليه الواحده ميبقلهاش فلوس خاصه بيها من تعبها ويوم متحب تجيب هديه لزوجها ولا لاولادها ولا حاجه للبيت تفرح بيها اهل بيتها مش تمد ايدها لجوزها تقولوا و نبي اديني 500 جنيه عشان اجبلك هدية عيد ميلادك :unsure:

والله الاسباب كتير وهو على الاقل شغل لفراغ كبير مش احسن من الفرجه على التلفزيون بالسعات وهو تتلهي عن جوزها شويه ويكون ليها كيان بدل مكل ميرجع من الشغل تبقى اعده تجري وراه عشان تتكلم معاه اهو تشغل نفسها بحاجه مفيده تتعلم تشوف ناس يوكن لها صديقات في العمل تتكلم معاهم وتخف العبء شويه عن الازواج اكيد كلكم هتايدوني في النقطه دي يا رجاله :sad:

انا بجد كنت عيزا افتح النقاش مع الاعضاء في الموضوع ده بس كويس انك فتحنو تاني يا ابو زياد وفعلا انا تجربت الاخت نانسي قمت بيها وكانت فعلا تجربه حلوه وفي امكان اي ربة منزل انها تقوم بيها ودي ابسط الحلول الوسطيه للي عيزين يشتغلو

ولا ايه رايكم :wub:

[عبده بيه]

والله يا اختي من غير ضهر ولا اي واسطة الموضوع بيتوقف علي قبولك ولباقتك واسلوبك وان شاء الله خير وفي الاول والاخر اليقين والاخلاص في الشيء وحسن التوقع يعني التفائل دائما

الاخت الفاضلة ايه اخبار اليقين ارجوا ان تقومين بمجهود شوية زيادة ان شاء الله خير واهم حاجة اليقين وحسن التوقع وربنا معاكي تحياتي

[أبو زياد]

الأخت إيناس ..

لا نريد هنا حلا وسطا

جميل جدا ان تقضى بعض اوقات فراغك لشغلها بما يفيد

ولكنى قصدت عمل .. يعنى إنتاج و عائد و تطور ودور فاعل فى المجتمع

تجربة الأخت نانسى جيدة جدا و أتمناها للجميع على أن تدوم و لا تكون مجرد شغل لأوقات الفراغ

وفى نفس الوقت لا تشغلك عن دورك فى منزلك

نريد ان نحل سويا هذه المعادلة الصعبة

[seven ages]

[quote name='inas' date='Dec 4 2006, 04:07 AM' post='( انا بس عيزه اشتغل زهقت من اعدة البيت الي جرب الشغل صعب يتنح ويعد كده يا جماعه انا حسه اني بقيت متنحه ومخي فاضي زهقت من المسلسلات و نفسي اسال ربات البيوت الي عاشو طول عمرهم كده كانو بيستحملوا ازاي، شغل البيت كده كده مبيخلصش بس فين انا ( عيزه اعرف))

-----------------------------------------------------------------------

(بس قبل ما اشتغل كنت باعيط بالدموع كل يوم انى مجرد ست بيت وانى طاقة مهدرة وان الى بعملة دة مش مالى حياتى

الشغل مهم مهم جدا )

-----------------------------------------------------------------------

(والله الاسباب كتير وهو على الاقل شغل لفراغ كبير مش احسن من الفرجه على التلفزيون بالسعات وهو تتلهي عن جوزها شويه ويكون ليها كيان بدل مكل ميرجع من الشغل تبقى اعده تجري وراه عشان تتكلم معاه اهو تشغل نفسها بحاجه مفيده تتعلم تشوف ناس يوكن لها صديقات في العمل تتكلم معاهم وتخف العبء شويه عن الازواج )

===========================================================

سيدتى لقد اثرت بالفعل قضية هامة . فبعد سنوات طويلة مرهقة من الدراسة و المذاكرة

تشعر الفتاة أو السيدة المتعلمة بأنه ينبغى بالفعل أن تكون فردا منتجا نافعا فى المجتمع فتحقق ذاتها وتصل الى

ما تستحقه من مكانة فى المجتمع وأيضا أن تتمتع ببعض الأستقلال المادى الذى يوفره لها العمل

فينعكس هذا على شخصيتها فتزداد ثقة بالنفس وسعة أفق وقدرة على أدارة حياتها وحياة أسرتها

ولكن لى مداخلة بسيطة ... هل ينبغى دائما عند الحديث عن المرأة العاملة أن تعقد مقارنة بينها وبين ربة البيت

فتكون المرأة العاملة هى المرأةالمتعلمة المثقفة الممتلئة بالنشاط والحيوية والديناميكية

والرغبة فى خدمة المجتمع

وبالمقابل ربة البيت هى امرأة كسولة ضيقة الأفق غير مثقفة تضيع وقتها فى مشاهدة المسلسلات وثرثرة الهاتف

حسنا!! لماذا تلك الصورة النمطية التى تستهين بدور الأم والزوجة ربة البيت وتقلل من قدره

أليس فى هذا ظلم لهؤلاء السيدات اللاتى اخترن الأكتفاء بتلك المسؤلية الكبرى

تحياتى.