مغتربي الإمارات

[زعلان]

حبيت ارفع الموضوع مرة اخرى و اعلن اني حارجع اشارك فيه قدر المستطاع مرحبا بكم في الامارات

[زعلان]

السلام عليكم

المشاركات والردود قلت كده ليه نزلتوا اجازات ولا ايه؟

على العموم انا لسه مستمره فى مسلسل الازعاج بتاعى ليكم

وكنت حابه اسأل على عياده اسنان فى دبى او دكتور تركيبات اسنان صناعيه كويس يااحسن خلاص قربت اركب طقم كامل

في عيادة اسمها عيادة الضيافة في شارع الضيافة في دبي الدكاترة عراقيين بس انا بروح هناك وفي دكتور عراقي ممتاز و بتعامل معاه بقالي 3 سنين تقريبا بس مش متذكر اسم لدكتور بالضبط بس انصحك تروحي العيادة ده لأن واضح ان كل داكاترتها ممتازين هي فوق هاجن داز الي في شارع الضيافة وقبل مطعم الطاولة الحمراء الايراني وممكن يراعيكي في الساعار لو طلبتي منه ولول مفيش تأمين يغطي يعني بيعملك تخفيض من غير تخفيض السن يكلف 300ده حشو ابيض سواء ضرس او سن ترميم بسيط وبيعملوا تركيب و ترميم و متطورين و عندهم مهارة و تقنية عالية

[زعلان]

نسيت اقول حاجة اضافية ان الكشف مجاني يعني روحي اكشفي و اتفقي معاه على العلاج و اعرفي الاسعار و وخدي موعد بعدين وقرري انت عايزه تعملي ايه و ناقشيهم في كل حاجة طرق العلاج المتاحة و احسنهم و اسهلهم و افضلهم و فرق الاسعار و الخطوات وعدد الجلسات و خدي وقتك فكري و بعدين خدي قرارك طبعا هما زحمة فالافضل انت تاخدي موعد مسبق مفيش موعد في نفس اليوم او بعده بكام يوم

ثواني ادور على البطاقة الي عملينهالي او كرت العيادة

معلش اتأخرت باين اني رميت البطاقة بتاعتهم كالعادة كل مرة يعملولي بطاقة جديدة (مجانية ) علشان رقمي و الزيارات و انا اسيبها على جنب اكيد فيالبيت بس ممكن تلاقي رقمهم في الدليل عيادة الضيافة للاسنان في شارع الضيافة حيديوكي معاد في اقرب وقت بعد خمس ايام حسب الضغط ولو عندك تأمين طبي جيبي الفورم بتاع شركة التأمين علشان يعبوهولك ويختموه

[زعلان]

وصلتني الان رسالة من عيادة الضيافة التخصصية للاسنان رقم تلفون العيادة هو 043452001

[الرويناء]

شكرا لك يااخ زعلان

انا الحمد لله التامين بيغطى الاسنان بس اكيد التركيب(زراعه الاسنان) ليه نسبه معينه لانه اغلاهم على العموم ان شاء الله اكلمهم واخد فكره عن الاسعار

شكرا لك مره تانيه

[الرويناء]

اسفه مشفتش ردك بس الحمد لله احنا عندنا كان العكس التامين فى السعوديه كان تعبان درجه سواقين باين ولا ايه ومافيش اى حاجه متغطيه

لكن خدنا بالنا من الموضوع ده فى الاتفاق على العمل فى البدايه وبالذات ان جوزى عارف انى صحتى على قد الحال والحمد لله فالتامين الصحى بالنسبه لنا كالماء والهواء حتى انه غير فى العقد و استغنى عن مميزات موجوده فى سبيل انه يدخل التغطيه الذهبيه الشامله لينا كلنا

بس زى مقولت خدمات الاسنان كلها متوفره بس التقويم والتركيب بنسبه لكل فرد

وربنا يمتعنا جميعا بالصحه والعافيه

[الرويناء]

سورى برده معرفتش اعمل اقتباس انا اقصد رد الاخ mozhariy

بس انا عايزه اسألكم رايكم فى الطب والعلاج هنا بشكل عام لانى محتاجه اعمل عمليه فى المعده بالمنظار و مش عارفه اعملها هنا ولا انزل اعملها فى مصر انا عندى امكانيه انى اعملها فى مصر على حساب التامين الصحى وفى مستشفيات كويسه يعنى المقاولين العرب والصفا فى المهندسين والنيل بدراوى ومصر الدولى

قى السعوديه الدكتور قالى لا اعمليها فى مصر احسن وارخص طبعا لانى كنت هادفع فيها كتير وقتها

وايه مستشفيات ممكن اروحها احنا شوفنا اعلان لمستشفى سليمان الحبيب وفيها دكتورين واحد لبنانى التانى تقريبا اماراتى او سعودى مش عارفه

احنا اتعاملنا مع مستشفى الامارات بس معجبتنيش خالص سواء دكتور اطفال او باطنه عام مافيش دكتور متخصص جهاز هضمى عندهم وسالت فى مستشفيات كتيره برضه مافيش التخصص ولو موجود يكون الدكتور باكستانى

فايه رايكم؟

[زعلان]

بالنسبة لتأمين الاسنان عادة بيغطي 80% ولو ذهبي ممكن يكون 100% بس أظن بتدفعي و بعدين تبعتي الفواتير للتأمين وهو يبعتليك شيك بالي دفعتيه

الافضل تعملي العملية في مصر اذا مكنتش واثقة من الدكتور الي حيعملهالك و سمعته معروفة يعني اسألي كويس عن الدكتور الاول وسمعته قبل سمعة الالمستشفى لو عرفتي الدكتور الي حيعملك العملية هاتي اسمه وانا أسألك اختيار الدكتور في الامارات مهم جدا جدا طبعا في دكاترة كويسين بس عايزة بحث وسؤال سواء من مرضى او من كادر طبي امين عمل مع الدكتةور سابقا

طالما التأمين بتاعك بيغطي مصر اعملي العملية برضه عند دكتور سمعته كويسه في مصر

[DUDU]

سورى برده معرفتش اعمل اقتباس انا اقصد رد الاخ mozhariy

بس انا عايزه اسألكم رايكم فى الطب والعلاج هنا بشكل عام لانى محتاجه اعمل عمليه فى المعده بالمنظار و مش عارفه اعملها هنا ولا انزل اعملها فى مصر انا عندى امكانيه انى اعملها فى مصر على حساب التامين الصحى وفى مستشفيات كويسه يعنى المقاولين العرب والصفا فى المهندسين والنيل بدراوى ومصر الدولى

قى السعوديه الدكتور قالى لا اعمليها فى مصر احسن وارخص طبعا لانى كنت هادفع فيها كتير وقتها

وايه مستشفيات ممكن اروحها احنا شوفنا اعلان لمستشفى سليمان الحبيب وفيها دكتورين واحد لبنانى التانى تقريبا اماراتى او سعودى مش عارفه

احنا اتعاملنا مع مستشفى الامارات بس معجبتنيش خالص سواء دكتور اطفال او باطنه عام مافيش دكتور متخصص جهاز هضمى عندهم وسالت فى مستشفيات كتيره برضه مافيش التخصص ولو موجود يكون الدكتور باكستانى

فايه رايكم؟

ألف سلامة عليكى ...

انتى تأمينك تبع شركة ايه ؟؟

يا جماعة ايه رأيكم فى طريقة تعامل المصريين مع بعض هنا ؟

انا شايفة انها سيئة بصورة مخجلة :( اكتر جنسية شفتها بينها المشاكل دى كلها :(

تفتكروا ليه ؟ وايه الحل ؟

[زعلان]

لأن المصريين شعب وحش و ما يتعاشرش حضرتك قاعد هنا ليه بقى ولا انت مش مصري لو مصري يبقى اكيد من الناس الوحشة لو مش مصري يبقى احسنلك تبعد عن الناس الوحشة

شيء عجيب الشعب ده كل واحد بينتقد بقية الشعب باعتبار انه هو ملاك نازل من السماء ولا ينتمي لهذا الشعب

[زعلان]

واضافة لذلك في مثل بيقولك دائما ابدأ بنفسك ومش حتشوف الناس حلوة وكويسة الا لو انت كنت حلو وكويس

[dongol]

شيء عجيب الشعب ده كل واحد بينتقد بقية الشعب باعتبار انه هو ملاك نازل من السماء ولا ينتمي لهذا الشعب

الضغط النفسي الناتج عن الغربه أكيد بيخلي الواحد حساس قوي مع أي مشكلة تحصله مع أبناء بلده خصوصا اذا كان لسه اول مرة يتغرب

ثانيا و ده اعتقاد شخصي بدأ يتكون عندي ان معظم المصريين في الغربه جايين لهدف واحد وهو جمع المال و في سبيل هذا الهدف ممكن يدوسوا علي علاقات الصداقه و العمل و الجيره لذلك نجد ان المصريين متنافرين في الغربه و ممكن يكونوا علي المستوي الشخصي و الانساني كويسين جدا لكن موضوع جمع المال ده بيخليهم ياخدوا مواقف متشدده حتي مع ابناء بلدهم

تحياتي

اخوكم دنجل

[DUDU]

لأن المصريين شعب وحش و ما يتعاشرش حضرتك قاعد هنا ليه بقى ولا انت مش مصري لو مصري يبقى اكيد من الناس الوحشة لو مش مصري يبقى احسنلك تبعد عن الناس الوحشة

شيء عجيب الشعب ده كل واحد بينتقد بقية الشعب باعتبار انه هو ملاك نازل من السماء ولا ينتمي لهذا الشعب

اهو دا بالظبط اللى باتكلم عنه !!

ياسيدى انت اتحمقت عليا كدة ليه ؟؟؟ انت شايف ان اللى باقوله غلط يبقى صححه وقول ان المصريين كويسين مع بعض فى الغربة

لكن انت كل اللى قدرت تعمله سيبت الموضوع و مسكت فى خناق اللى بيتكلم

لا حول ولا قوة الا بالله !

[DUDU]

شيء عجيب الشعب ده كل واحد بينتقد بقية الشعب باعتبار انه هو ملاك نازل من السماء ولا ينتمي لهذا الشعب

الضغط النفسي الناتج عن الغربه أكيد بيخلي الواحد حساس قوي مع أي مشكلة تحصله مع أبناء بلده خصوصا اذا كان لسه اول مرة يتغرب

ثانيا و ده اعتقاد شخصي بدأ يتكون عندي ان معظم المصريين في الغربه جايين لهدف واحد وهو جمع المال و في سبيل هذا الهدف ممكن يدوسوا علي علاقات الصداقه و العمل و الجيره لذلك نجد ان المصريين متنافرين في الغربه و ممكن يكونوا علي المستوي الشخصي و الانساني كويسين جدا لكن موضوع جمع المال ده بيخليهم ياخدوا مواقف متشدده حتي مع ابناء بلدهم

تحياتي

اخوكم دنجل

بس يا دنجل المفروض ان جمع المال لا يتعارض مع العلاقات الانسانية ..

والمتوقع ان الواحد لما يتغرب هايجد بعض الاحساس بالامان مع قربه من ابناء بلده..

دانا كنت بافرح لما الاقى حد مصرى اتكلم معاه مصري...

بس اتفاجئت ان سمعتنا هنا زفت !! و ان اكتر شعب بيعض فى بعضه احنا و شوفتها بعينى...

[زعلان]

انا عن نفسي ليا اصدقاء مصريين في دبي علاقتي بيهم طيبة وبصراحة بصورة شخصية لم اصادف واحد فيهم سيء لدرجة الشر و انه يؤذي غيره والي اعرفهم ناس محترمة بتقف جنب بعض و تجامل بعض

يمكن الفكرة انه ان العلاقة الانسانية هي الي بتفرض حدود التعامل لأن الانسان هو الانسان في كل مكان

وبالطبع محدش حيورط نفسه من اجل شخص ما يعرفوش او يعرفه بالكاد اي حد بيساعد الناس عموما حسب امكانياته وحسب قدراته الانسانية و الوظيفية و الاجتماعية و المالية وده لا يخص المصريين فقط

[زعلان]

يعني يا دودو انت شايف نفسك ايه وسط المصريين

و المصريين الي حواليك شايفينك ايه

[DUDU]

يعني يا دودو انت شايف نفسك ايه وسط المصريين

و المصريين الي حواليك شايفينك ايه

ها ...؟؟؟؟؟ مش فاهمة السؤال

[زعلان]

سؤال بسيط انت شايف نفسك زي المصريين الوحشيين ولا شايف نفسك مختلف

و المصريين الي حواليك بينظرولك ازاي انك وحش زيهم ولا مختلف عنهم

[DUDU]

سؤال بسيط انت شايف نفسك زي المصريين الوحشيين ولا شايف نفسك مختلف

و المصريين الي حواليك بينظرولك ازاي انك وحش زيهم ولا مختلف عنهم

لا طبعا انا مش عاجبنى اللى بيحصل يبقى ازاى اكون باعمل اللى باعترض عليه ؟!!!

واللى حوليا مش مصريين لأن شغلى جديد و مع الأغلبية اجانب لكن المصريين اللى موجودين معاهم من فترة مبهدلين بعض

خناقات و أسافين و زونب وحاجة تبكى

وعفوا ماتقلبش الحكاية لخلاف شخصى ..

ياريت يفضل الموضوع موضوع قضية بنتناقش فيها وليس حكم شخصى من حضرتك على اى حد ولا من حضرتى على اى حد

[زعلان]

المسألة مش شخصية خالص بس اصل كل المصريين الي بيذموا في المصريين التانيين الوحشيين بيقولوا نفس كلامك

علشان كده لما اسمع حد بيقول المصريين و حشيين مع بعض بعرف ان عنده مشكلة