مغتربي الإمارات

[ABO HAMADA]

الحمد لله رب العالمين

انا واحد من الاف الشباب الكانوا فاكرين الامارات بئر فلوس

بس الحمد لله انا نفدت بجلدى منها ورجعت على بلدى تانى

انا عايز انصح كل واحد بيفكر يسافر للبلد دى

واوعى تسمع كلام حد يقولك تعالى على زيارة ونعملك عقد العمل هنا انا حصل معايا كدة وسافرت على زيارة على اساس انى رايح على شغل نزلت الشغل اول اسبوعين وكل تمام وانا مطمن وخلص التدريب وجه معاد كتابة العقد وتعديل الوضع لقيت العملية كلها نصب وتهريج واستغلال - صاحب الشركة كان عايزنى امضى على شروط جزائية وبلاوى زرقة فى العقد (( هو كان فكر انى اتدبست خلاص ومش هينفع ارجع تانى ))بس انا رفضت الشرروط دى وحاولت الاقى شغل بعيد عن الراجل ده بس للاسف الهنود سبقونا فى البلد دى

والحمد لله انى رجع لبلدى انا ايوه خسر فلوس بس الواحد اتعلم كتير

نسيت اقولكم ان صاحب الشركة دى للاسف (( مصرى ))

ودى حكايتى

[mohamed awad]

اهلا يا جماعة

كلامي موجه هنا للناس اللي في مصر لان الموجودين في الامارات مش محتاجين تعريف بالبلد

اولا البلد دي جميلة جدا و معدل النمو و التطور فيها عالي جدا للاسباب التاليه:

- الادارة الواعية المدربة على اعلى مستوى

- اعطاء الفرص لمن يجيد العمل

- التخطيط بعيد المدى و الطموح لتحقيق اعلى المعدلات

- استقطاب العمالة الماهرة و الرخيصة

- فتح المجال امام الشركات للعمل بحرية و كذلك الاشخاص

- البنية الاساسية المتطورة و المتكاملة

- سن القوانين و الاليات التي تساعد على الانتاج و ضمان الحقوق

طبعا كل ده كلام جميل بس لمين؟؟؟؟

هو ده السؤال؟؟؟

من الاخر كل الناس اللي بتشتغل هنا او اغلبهم علشان مظلمش هما مجرد ادوات يحركها من هو صاحب المصلحة في الاخر يعني احنا كلنا مجرد عساكر في وش المدفع نشتغل و نتبهدل و يطلع عين ابونا وناخد الفتات و غيرنا يلم الغلة .

الفكرة اساسا قايمة على بناء دولة حضارية على اعلى مستوى و مش مهم مين اللي يتحرق وهو بيبني المهم ان البناء يخلص و بسرعة و في نفس الوقت صاخب المخل يرمي شوية للبنا علشان يعرف يعيش مش علشان انه من حقة يعيش لأ علشان بس يكمل البنا و بعدين يترمي زي العظمة الناشفة.

القصة ان الوافدين لازم ياخدو بالهم من كدة كويس انتم عمركم بيضيع علشان حاجة مش لكم حددو هدفكم كويس و اعرفو انتم عايزين ايه احسن السكينة تسرقكم و ساعتها مش هينفع الندم؟

كل واحد جاي هنا يشوف هدفة ايه و يخلص و يخلع بدري.

لان امكانية العيش باستمرار في مكان زي ده صعبة و خاصة للمصريين.( انا بتكلم عن دبي بلد الاحلام)

باقي الامارات سهله لينا نقدر نمشي حالنا فيها بس دبي صعب.

دبي عاملة زي المطحنة لازم جلدك يكون ناشف علشان متتعورش فيها.

طبعا انا بتكلم عن الفئة المطحونة او قوى الشعب العاملة .

الناس التانيين بقى عايشين و مش في دماغهم.

هو النظام هنا كدة حبة صغيرين فوق و حبه كتير تحت ومفيش حد في النص.

علشان تحب تيجي هنا اطمن على نفسك الاول علشان متحسش انك اتبهدلت و تصعب عليك نفسك.

دبي جميلة جدا بس الحياة فيها صعبة صعبة صعبة.

ما بين الهنود و المواصلات و غلاء المعيشة لو كنت متجوز صعب تحوش احسنلك تسيب اهلك في مصر.

لو مكنتش واخد على البهدلة و قلة القيمة و الشغل الطحن خليك في مصر.

لو عندك دم و بتغير على عرضك و مبتحبش تبقى قرني خليك في مصر.

لو بتحب الناس الطيبين و بتكرة تتعامل مع الاندال خليك في مصر.

لو صحتك على قدك و ممكن تتعب لو نافوخك غلي من الحر خليك في مصر.

لو قنوع و مش طماع و بترضى بالقليل خليك في مصر.

لو عايز تحوش فلوس كتير في وقت قليل تعالى هنا

لو مش مهم تخسر ناس غاليين عليك لانك بعيد عنهم تعالى

لو عايز تتغير وتاخد فرصة و تنطلق تعالى

لو تحب تشوف ناس من كل الدنيا و تشوف طباع البشر و عاداتهم تعالى

لو عايز تتفسح و تتمتع و تشوف اللي عمرك ما شفته تعالى

لو حبيت تحس بقيمتك امام القانون تعالى

لو بتحب النظام و الترتيب و الاحترام تعالى

لو بتحب تبقى في حالك و محدش يدخل في شئونك تعالى

على قد ما قدرت و ضحت رؤيتي للمكان ده وانتم احرار ممكن اكون غلط

بس احب اقولكم انا هنا عرفت ليه مصر هي ام الدنيا

[Paula]

سلام عليكم ورحمة الله وبركاته

دي أول مرة ليا أشارك في أي منتدى، بس الحقيقة إن كلام الأخوة (مغتربي الإمارات) هو اللي دفعني للمشاركة.

أنا فعلاً ماعنديش أكتر من اللي اتقال أضيفه لإنكم وضحتم الوضع بشكل جيد جداً، بخصوص نقطتين مهمين: أولاً وهم الحياة هنا، ثانياً وهو الأهم : علاقة المصريين ببعض، وده من أسوأ الأشياء فعلاً، يمكن مش عايزة أكتب كتير بس للأسف أنا ما حصلتليش أي مشكلة هنا إلا مع مصريين، ومش هتكلم عن نوع المشاكل لإنها للأسف مخجلة جداً بس حقيقي إحنا صورتنا هنا سيئة جداً، أنا في الإمارات من ثلاث سنوات، وللأسف صدمت فعلاً ف المصريين اللي هنا وأد إيه إحنا سيئين مع بعض.

وإذا كانت دي أول مرة فعلاً أتشجع في التواصل، فده لإني أول مرة ألاقي ناس بتتكلم في أشياء واقعية ملموسة وف مشكلة حقيقية.

بحييكم ودي فعلا بادرة خير.

[mesryforever]

أنا من أحد المفتربين في الإمارات من سبعة سنوات عشت فيها أحلي أيام في حياتي

وذلك لأني كنت في مكان ممتاز بس للأسف تم إغلاقه من فترة وعلشان كده نفسي أرجع مصر وكلي أمل أن مصر تكون إتغيريت ولكن مع الأسف أنا كنت في الإجازة من فترة قصيره كانت الحالة زي الزفت في مصر

المهم فيه ناس متفائلين بينصحوني إني أنزل وأعمل مشروع خاص بيه وأنا بأفكر بشكل جادي في الحكاية دي بس المشكلة فين الواحد هيعمل إيه "مشروع ولا جواز ولا المشاكل إللي ممكن هأحصلها وأنا في بداية أي مشروع إلخ إلخ إلخ " وإنتم عارفين مشاكل مصر تبتدي من سلم الطيارة في مطار القاهرة

ومن جهه أخرى عندي والحمد لله علاقات ممتازه ممكن بإذن الله أحصل عن طريقها عمل آخر بس المشكلة بالوقت لأني أنا من فترة وأنا لاأعمل وطبعاً صرفت مبالغ كبيرة وأنتم عارفين القعده هنا مصاريفها عاملة إزاي من جهة إيجار السكن والمعيشة عامة يعني

وطبعاً أنا واخد على المصاريف شويه ومش عارف أتحكم فيها إزاي

المهم أنا بصراحة فكرت بإذن الله هأقعد فترة معينه وبعدها لابد من إجتياز تجربة الذهاب إلى مصر إلى ............

وشكراً ياجماعه إنكم إستحملتوني

بس الحياه هنا رائعة للمعاه وإللي بيعرف يسيطر على مصروفاته .

[tahereyad]

الاخوه الأعزاء,,, الحقيقه ان كلامكم فعلا عن المعيشه في الامارات,, وبالذات دبي فيه كتير من الصواب من ناحيه المصاريف الزياده جدا وعدم القدره علي التحكم بالميزانيه, أنا مشكلتي أني من سنه بالضبط كنت باشتغل في مصر في شركه كويسه جدا و بمرتب كويس جدا جدا,, لكن كانت دايما بتراودني فكرة اني أسيب مصر وأشوف شغل في دول تانيه أحوالها أفضل, ومافيهاش الصراعات والشد العصبي اللي موجود في مصر (فعلا هناك دلوقتي محدش بيطيق حد),, المهم ربنا كرمني بعقد أحسن نسبيا من شغل مصر, لكن طبعا لما جيت هنا أكتشفت أن الموضوع مش مجرد أكل و شرب و سكن بس,, كل حاجه بفلوس حتي المرور فالشارع دلوقتي, غير التسوق والفسح و مصاريف الاسره.

بس الشئ اللي عاوز أقوله,, أن أنا و كلنا لازم نكون في حالة تصالح مع النفس ومع الوضع اللي احنا فيه,, هنا الحياه أبسط وايسر من مصر كتير, وفي مقدور أي واحد هنا أنه يعيش الحياه الكريمه اللي نفسه فيها في مصر (بغض البصر عن السكن طبعا), السياره الجديده الاكل الفسح التعامل المحترم, يعني, أقصد مش لازم كل شويه نقول أننا في غربه ولا تعبانين ولا الكلام اللي ممكن يكون ناتج عن حالة زهق شخصي أو حنين لأرض المحروسه, و في نفس الوقت برضه لازم نحدد هدف معقول من غربتنا, اقصد الهدف المادي, مش مطلوب نحوّش كل أو حتي نصف مرتباتنا, لكن علي الاقل يكون أعلي شويه من اللي كنا بنحوّشه في مصر (دا لو كنا بنحوّش هناك أساسا).

أتمنالكم التوفيق جميعا, وأتمني التوفيق للأخ "مصري دائما" أنه يحصل الشغل المناسب اللي يساعده أنه يمل هنا فالامارات.... و ماطوّلش عليكم,, وللحديث بقيه.

[mony]

السلام عليكم يا اخوانى

انا عاوزه اخد رايكم فى عقد عمل جايلى فى الشارقة بمرتب 2000 درهم والسكن والمواصلات علي الشركة دى كبدايه ليا اعتقد كويسة وخصوصا انى لسه متخرجة مفيش سنه تقريبا ومفيش خبره كبيره هنا فى بلدى تتدفع اللى هيجيب شغل انه يحطلى مبلغ كبير ليا و كمان هوه عقد سنتين يعنى انا كنت متخيله انى مثلا اروح هناك ااقعد كام شهر والضم شغل كويس بعدها بس صاحب الشغل قالى عقد 3 سنين بعد مفاوضات معاه قال سنتين مش عارفه اعمل ايه هوه صاحب الشغل ابن خاله بابيا و فى ناس كتير اعرفهم هناك يعنى انا ضامنه الناس بس مش عارفه كعرض نفسه ايه رايكم هقدر اعيش سنتين من عمرى ب 2000 درهم و ممكن بعد السنتين افكر فى شغل جديد ولا الحل ايه

ياريت تردوا عليا بسرعه لان الراجل عاوز رايى الاسبوع ده علشان يبعتلى الفيزا

[tahereyad]

السلام عليكم,,, الاخوه الاعزاء: الشاطر و الطاير و القرموطي و الطفشان و أ عادل,,, انتو فين و فين المشاركات الجديده,,, انا ماصدقت المجموعه رجعت تاني,,,, أرجو اقتراح موضوع معين نتشارك فيه كلنا بالرأي,,, أقوللكم,, ممن نتكلم عن السكن

هل تعتقون فعلا ان كميه البنايات و المجتمعات العمرانيه الجديده لما تخلص, أسعار السكن والايجارات فعلا هانزل,,, ولا كلام و بس؟؟؟؟

[tahereyad]

أنا زعلان قوي,,,,, فين الناس الحلوه اللي كانت هنا,, كلهم خلاص مشيو من هنا,,, أنا كان نفسي نتكلم هنا مع بعض و بالذات اننا هنا كلنا في بلد واحده و الواحد ربنا يعوضه بأصدقاء جدد يعوضوه عن أصدقاءه في مصر,, بس خلاص بأه,,, هاضطر أروح اشوف منتدي الكتكوت المرعب أو البطه العضاضه ادور علي أصحاب هناك,,,

[etihad]

تحية طيبة لكل العاملين بالإمارات من ابناء الشعب المصري وهذه الروح الطيبة التي فقدناها مع طغيان المادة والجشع والطمع الناتج عن غلاء المعيشة واقول لمن يريد ان يجمع المصريين في مكان واحد هذا حلم لأن المثل الشائع في الإمارات لكل مصري جديد اذا اردت ان تكون نفسك وتنجح ابعد عن المصريين وهذا للأسف الكلام الصحيح والذي تاكدت منه مؤخراً فالمصري لا يحقد على المواطن الذي يتقاضى اضعاف راتبة ولا على هندي ميسور الحال ولا على اي شخص من اي جنسية ةمختلفة ولكن دائما يبص ويحقد على ابن بلده ويسعى جاهدا لإستغلالة بكل الطرق فإن لم يستطع يدبر له المكائد حتى يضره في رزقة اخواني المصريين انا لست متحاملا على احد انا شخصيا اشد ماوجدته من اذى منذ ان دخلت هذه البلد من ابناء وطني فلا يساعدك لله فيقدم لك المساعدة اما مدفوعة الاجر الغالي واما لغرض سيئ يدبره لك وهذه قصة احد المهندسين بالأمارات صاحب شركة مقاولات الماسة للمقاولات سابقا مقرها دبي اشهر افلاسة وسوى اعمالة ليس من الفقر ولكن للهرب من الديون المتراكمة ومخالفات الشركة السابقة وللهرب من رواتب العمال المتراكمة علية وياكلها في كرشة الواسع ومن ثم بدا النشاط الجديد شركة مقاولات تحت عنوان قصر الروضة للمقاولات ومن ثم فتح فرعا للشركة بعجمان بعد ان تنصل من التزماتة الجديدة وذلك بمشاركة احد الشخصيات السورية العاملة باحد البنوك بالشارقة يستطيع ان يفعل اي شيئ في سبيل الفلوس الان يتاجر بالفيز عن طريق الشركة بمعاونة احد المصريين القدامى في الإمارات اخواني المصريين بالإمارات احزروا هذه الشخص يقابك ويقنعك انه ملاك ويعرف ربة وربه بريئ منه الى يوم الدين قابلته في اسوا ظروف حياتة بعد ان افلس شركته الاولى واعطاني شقتة من الباطن نظير مبلغ 25000 درهم ثمن اثاث لا يساوي سوى 1000 ووقفت معه وساندته الى ان وقف على رجليه وقدمت له الكثير حتى الاكل يوميا احضره له واطلب منزوجتي ان تعده له رغم اني عرفت مؤخرا ان لدية الاموال الطائلة بمصر من عقارات واطيان وغيرها وبعد وقفتي ومساعدتي له كنت اول ضحاياه حين تمكن لقد رجع واخذ الشقة بالقوة حيث كان عقد الايجار مازال باسمة واستولى على كل اثاثي داخل الشقة ويجلس هو وزوجتة بنت الحسب والنيب كما يسميها على اثاثي وفراشي وكل الإصلاحات التي قمت بها من دهان وكهرباء ومياة كل ذلك استولى عليه اشتكته ولمن دون جدوى هل من محامي مصري او غير مصري يعرف الله يقف بجانبي ويساعدني في استرداد نقودي وشقي غربتي 0559193954 tt22_k33@yahoo.com

[قاهرى]

يريت يا جماعة نساعد بعض احنا المصرين الى محتاج لفلوس الى محتاج لعمل الى محتاج لاى حاجة تكون كلنا معاة . انتوا عرفين فى اغلب الامارات داخل الدولة فى نادى اسموا النادى المصرى . بيسعدوا المصرين سواء الى جوزها مات ومحتاجة فلوس علشان تنقل جوزها وتسافر . الى محتاج فلوس علشان عملية .. اية الى يحصل لو احنا اتجمعنا كلنا ووقفنا كلنا جنب بعض سواء لو حد بيدور على شغل داخل الدولة او محتاج نصيحة . يا جماعة احنا الى مخلنا مظلومين فى البلد دى اننا بعاد عن بعض والى رخصنا فى البلد وخلى رواتب المصرين قليلة بردوا اننا مش جنب بعض .. الهندى باء احسن منا والله فى حجات كتير . الناس كلها بتقدم الى احنا .. انا اسمى م.احمد عايش فى راس الخيمة

[AboAsem]

السلام عليكم و رحمة الله و بركاته

شكرا لكل من شارك فى هذا الحوار ، شجعتونى أكتب معاكم.

أنا أعيش فى أبوظبى من ثلاث سنوات و نصف، حاليا تعيش مع زوجتى و إبنى عاصم و الحمد لله .

ما أريد قوله هو أن لكل شىء ثمن ، أنا هنا أشعر بالحريه و الإحترام و الأمان أكثر من مصر كتيييييير و أعيش فى مدينه جميله و هاديه و حياه سهله و نظيفه، و بالتأكيد كل ذلك ليس مجاناً و إنما يجب دفع ثمنه.

إذا الأمر كله هو : هل وضعك المالى يسمح بإستقدام الأسرة و الحياه نشكل جيد أم لا ؟ و هل الأولويه عندك لتوفير الفلوس أم الحياه بشكل جيد الأن؟

هذه البلاد ممتازة لمن معه أموال كافيه و عذاب للفقير

[قاهرى]

استاذ ابو عصام احترم رايك جدا ولكن احب ان اوضح شىء مهم وهو انك بتقول ان البلد دى بالمعنى انها جنة للى معاة فلوس وعذاب للفقير بس بيتهيالى ان الفقير الى هنا احسن مليون مرة من الفقير الى فى مصر حتى لو عامل فى الفاعل ولا اية ؟؟؟ الحياة فى مصر بقت مستحيلة فى ظل الى بيحصل فيها دة . والله انا بشوف الناس الى بيشتغلو فى الفاعل دول بيكونوا ازاى مزلزلين هنا وبينزلو مصر بهوات . لكن فى مصر هيفضل شقيان طول عمروا وفى الاخر كمان عمروا مهيحس انوا انسان ابدا . مصر بقت لابناء الوسايط والنفوذ الكبيرة والى معاة فلوس مش للغلبان

[salemhegazy]

السلام عليكم و رحمة الله

دعاء الى الله ان يصلح حال بلدنا و يجد كل شخص فيها العمل و الحياة الكريمة و نسأله تعالى ان يزيل الغمه الجاسمه على نفس البلد و اوصلتها الى هذا الحال الشباب المصر ي ياخونا عايز يهج من البلد باى شكل و اللى بيموت فى ايطاليا و فى ليبيا و ممارسات يندى لها الجبين تجاه نوعية من المصريين و الله المستعان

لكن فيه ملحوظة يا جماعة الواحد بيشوف نوعيات عماله بصراحة يجب الا تخرج من مصر و لا يسمح لها بالخروج برة البلد تصرفات مخجلة و جهل و سوء اخلاق و لا ايه ؟

انا لا ابرر لاحد اى تصرفات لكن ايه رايكم؟

[مصرى بالامارات]

انا اول مرة اشارك فى المنتدى ده انا مقيم فى الامارات وحابب اقول حاجة للاخوة اللى ذكرو عيوب الامارات او اى دولة عربية عامة ،انا مش هنكر التعب وساعات الاهانة وكل الى اتقال بس انا عاوز اسال سؤال وهو -عندكم حل بديل ؟ يعنى لو رجعنا مصر هنعمل ايه ؟ تقدرو تقولولى ؟ هنا فى تعب واهانة بس القعدة فى مصر لو جربتوها هتعرفو انها كلها ذل لان مفيش شغل- هنا اهو بتتعب وممكن تحوشلك حاجة اخر الشهر لكن فى مصر مفيش شغل وهتقعد على القهاوى وهتعيش على المصروف اللى بيدوهولك اهلك وهما متضايقين جدا من قعدتك كدة- دا اذا ادولك مصروف وعمرك هيضيع من غير ما تفتح بيت ولا تخلف ولا اى حاجة - يا جماعة نقول الحمد لله - على الاقل انتو هنا لاقيين شغل وعايشين فى بلد نضيفة وبتحوشو اى مبلغ لكن اللى فى مصر اتخرج وقاعد وكلنا لازم نتعب -معلش نستحمل العب هنا شوية ونحمد ربنا -

[seeem]

عجبني موضوعكم.

مصر هي ام الدنيا. بس بلدنا قست علينا لغاية معرقنا نستحمل اكتر . حتى الاجازات بقت صعبه قوي. انا لسه راجع من اجازة وبصراحة عايز مانزلش السنة الجاية. دماغي ورمت من مصيف للي عايزني امول مشروعه لحد تصريح السفر. الامارات مش زى السعوديه ابدا. اللى يعرف يعيش فى الامارات بصراحة جدع . بس اللى يعرف يحوش فى الامارات يبقى بطل.

[قاهر العولمة]

السلام عليكم ورحمة الله

بصراحة حاجة جميلة إن أي حاجة تجمعنا هنا أنا عايش في ابو ظبي متجوز والحمد لله مخلف بجد يشرفني التواصل معاكم في أي حاجة تعود بالنفع والخير لينا هنا والأفكار كتير وأنا عارف إن كل واحد مننا عنده طموحات كتير لنفسه ولإخوانه .. أنا نفسي بجد يكون في رابطة قوية بين المصريين العاملين في الإمارات ويكون في صندوق مشروعات مثلا نقدر نستثمر فيه أموالنا بشكل حقيقي جوا مصر .. إنتم عارفين إن الزمن ده زمن الكيانات الكبيرة وأنا أعرف إن المغتربين المصريين في الكويت مثلا عملوا مشاريع في مصر في فترة التسعينات وكانت مشروعات ضخمة زي قرى سياحية وغيره بسبب إنهم عرفوا يلاقوا بعض ويحددوا سوا هدف مشترك ..

ممكن نفكر في حاجات كتير أوي بس نتجمع الأول ...

أتمنى ليكم كل الخير وأتمنى نقدر ننفع بلدنا وأهلنا وناسنا بأي حاجة ومايشوفوش بهدلة أبدا ..

للتواصل : الهاتف :0505311354

البريد الإلأكتروني : a_samar2@hotmail.com

تم تعديل 9 سبتمبر 2007 بواسطة قاهر العولمة

[seeem]

الى قاهر العولمة وكل مصري مغترب مهتم

احيك على طلبك واقف جنبك فى المطالبة باان يكون لينا المصريين المغتربين كيان وكيان قوي كمان. انا قلت فى المشاركة السابقة ليا ان اللي يحوش يبقى بطل. بس مستحيل انه يقف عند حد التحويش والا الغلا والتضخم حايخلصوا عليه ويجي عليه وقت يحاول يستفيد من تحويشة العمر يلاقيها ماتساويش.

لازم احكي حكاية صغيرة. انا من جيل ابناء السفر كنت مع والدي اكتر من 16 سنة بالسعودية واضطريت انزل مصر للتعليم . والدي نزل بعدى بحوالى5 سنين وكان بيقول انه اكتفى وانه ممكن يبدأ شغله الخاص فى مصر . طبعا للأسف خسر فلوسه . قالى ان المشكلة انه ملاقاش حد يقف جنبه فى سنين الغربة ويستثمر له فلوسه في مشروع او عقار. المهم انا سافرت برضه علشان اللم نفسي واسد متطلبات العيش. الحمد لله الواحد بيشتغل بس حاسس بنفس الموضوع .

اطول عليكم بحكاية تانية. انا باقعد مع هنود كتير وزي مانتوا عارفين الهنود بقوا ايه فى البلد. سمعت من كتير منهم انهم بيعملوا جمعيات يوصل عدد اعضاءها لألف عضو واحيانا 3000 عضو. مهمه الجمعية هى انها تستثمر اموال المغتربين فى مشاريع استثمارية ومشاريع قومية وانسانية بالهند. كل عضو عليه انه يدفع اشتراك شهري او سنوي وبكده الجمعيه يكون لها راسمال. تبدأ الجمعيه باستثمار راس المال ده فى عده مشاريع وصناديق بهدف ايجاد عائد يصرف على الجمعيه ويحقق اهدافها الاستثمارية والاجتماعيه. الفوائد اللى بشوف الهنود ياخدوها من جمعياتهم تستحق التفكير من كل مغترب.

اسف لو طولت

تم تعديل 10 سبتمبر 2007 بواسطة seeem

[قاهر العولمة]

كلام seeem ده عين العقل والأمثلة إللي طرحها شكل من أشكال التعاون .. أنا عارف معوقات تنفيذ الفكرة لكن كل شيئ ممكن جدا يتم في إطار قانوني وشرعي .. وممكن نبدأ بجد في حاجات كتير زي الإستثمار في الأراضي أو العقارات في المدن الجديدة مثلا في مصر أو مشروعات خدمات تجميل ونظافة في المحافظات أو مشاريع إستصلاح أراضي وزراعة في مزارع زي النوبارية وغيرها .. والله يا جماعة مصر مليانه خير بس محتاجة رؤوس أموال كبيرة .. وطبعا ممكن رأي يقول والبيروقراطية والمعوقات الحكومية .. أقوله على فكرة إللي إشتغل في مصر وطلع فلوس مش أحسن مننا ولا أذكى مننا أبدا .. !!

ويارب بالتوفيق لنا جميعا ..

[seeem]

صباح الورد

ابدأ بسؤال ممكن يبقى صعب

هل ممكن ان المصريين يكونوا كتلة واحدة؟

هل ممكن يجي يوم ينزل المصري مطار دبى وهو عارف حايعمل ايه ويتصل بمين؟

هل ممكن لو وقع المصري فى مشكله يلاقى حد يقف جنبه فى الغربة؟

تخيلوا ياجماعة جمعية مصرية تساند وتساعد المصريين في الامارات. تقدم معونة واستشارة عمالية او قانونية لكل عضو فيها. تستثمر وتبنى بتحويشتنا فى بلدنا لينا ولغيرنا. تحسسنا بالامان والانتماء.

اللى شارك وقال ان المعروف فى الامارات ان المصري بيخاف ويتجنب المصري اتكلم من نقطة سليمة لكن مش عامه. كلنا مرينا بتجربة واحد مصري استلف منك و اتاخر فى الرد او مردش الفلوس من اساسه. كلنا شوفنا واحد بيحاول يركب فوق مصري زيه. كلنا نعرف مديرين مصريين كبار بيحاولوا يضغطوا على الموظفين المصؤيين علشان يقبلوا بشئ مستحيل المدير يقبل بيه (والحجه انه موظف مصري ومش حايلاقي احسن من كده).

لما بدأت افكر انى اشتغل فى الامارات بعت على الانترنت وعملت المقابلة فى مصر مع اتنين مصريين. بصراحة المقابلة دى اخرتنى سنتين ضغطوا عليا تحت اسم لما نشوف شغلك وتحت مسمى السن والخبرة والوعد بالتغير بعد مرور سته اشهر الاختبار وماحصلش حاجه. اترقيت من مهندس لمدير ورفعت من الانتاج وماحصلش حاجه. اتجوزت وماعرفتش اجيب مراتي معايه واستقلت وعرضوا عليا كل حاجه.

رفضت ونزلت مصر ورجعت بعد ما ضيعت سنتين تلطيش واهانة علشان مالقتش حد يقول ان الناس دى تمام وشغلهم مظبوط واللي وعدوك بيه حاينفذوه وايه اللى مفروض يتكتب فى العقد. ضيعت السنتين ومش ندمان بس مش عايز حد تانى يضيع سنة او اتنين او ممكن عمره فى اختيار غلط.

المهم . انا موافق ان تحت ظروف الامارت القاسية والتنافر اللى بين المصريين فى الامارات صعب تلاقى ايد بتتمد لك ساعة الزنقة .

القصد ان وجود هدف واحد ممكن بسهولة يجمع المصريين بقوة. (اذكر بالمناسبة البطولة الافريقية والمباراة النهائية وكلكم فاهمين).

اسف لو طولت

[بعد ايه]

انا مهندس مدنى جيت هنا من حوالى اربع شهور اسمى احمد وعندى 27 سنة واتمنى ان اكون صديقا لكم وتبادل الخبرات والتجارب الحياة هنا عاوزة اللمة والصحبة عشان تعدى وكل سنة وانتم جميعا بخير بمناسبة شهر رمضان الكريم اعاده الله عليكم وعلى الامة كلها بالخير وتحيا مصر