مغتربي الإمارات

[زعلان]

اهلا بلماضة ومبروك زواج جميلة الجميلات

[DUDU]

السلام عليكم

اسمحو لي بالتعقيب علي موضوع المعيشة بالخليج عامة

اولا:

انا اشتغلت بالسعودية لمده 8 سنوات وبالتحديد بالدمام (من اجمل مدن المملكة) ثم سافرت الي احدي الدول الاوربية وسأعود ان شاء الله ولكن الي الامارات

ولاحظت ان المصريين المغتربين ينقسموا الي الاتي:

1. مجموعه قليلة منا لديها هدف وتعرف ماذا تريد وهي :

أ) من يهدف الي جمع اكبر قدر من المال في اقل مده والعودة الي مصر للعيش عيشة كريمة وهذا بالتأكيد يؤثر على مستوي معيشتة هفو يحاول التوفير على حساب كل شئ حتي صحتة واكله وفي الغالب يعيشون بدون العائلة لضمان توفير اكبر قدر من الاموال في اقل وقت.

ب) من يهدف الي العيش حياة كريمة بغض النظر عن ما سيتمكن من توفيرة وهو يحرص على وجود اسرتة معه وبالتالي التوفير يكون قليل الا اذا كان يعمل في وظيفة جيدة وذات دخل كبير.

ومع الاسف الشديد قليل جدا من يمكنة الموازنة بين الاثنين نظرا لاختلاف مستوى المعيشة بالخليج. انا كنت اقع في المجموعة ب ولكني اعتقد انه لا يوجد افضل من الوسطية فيجب ان يكون للفرد هدف معين من الناحية المادية يسعي لتأمينة فلا يعلم الغيب الا الله. ولكن اي من هاتين المجموعتين سعيد للغاية بقرارة لانه عنده هدف يسعي لتحقيقة ومع الاسف كل من المجموعتين يستنكر ما يفعلة الاخر.

2. المجموعه الثانية وهي الغالبية تعيش بلا اي هدف فقط تعيش اليوم ولا تقدر الامور بالشكل الصحيح مما يؤدي الي الكثير من المشاكل فتارة يحاول توفير المال وتارة يصرف المال كأنة عندة الملايين وهي اكثر المجموعات تعرضا للمشاكل فهو لا يدري ماذا يريد.

3. مجموعة من المصريين غاية في الذكاء والنظام والحماس والتحدي وهم من يؤسسون مشاريع خاصة بيهم او يديروا مشاريع بشراكة بعض الاخوان الخليجيين وهما في الغالب منظمون ولديهم هدف رئيسي وهو الاستقرار بالسعودية او اي دوله خليجية ولكنهم مجموعه قليلة للغاية.

لذلك كي نلخص ما تم من حوار ونستفيد منه جميعا اخواني:

1. ضع امامك اهداف قصيرة المدي وبعيدة المدي واكتب هذة الاهداف ونا قشها مع زوجتك واهل بيتك.

2. اعرف ماذا تريد خلال هذا العام وماذا ستصبح بعد خمسة اعوام و بعد عشرة اعوام.

3. انظر لما تفعلة كل يوم وكل اسبوع وكل شهر وكل عام واسأل نفسك: هل هذا سيساعدني علي الوصول الي اهدافي وتحقيقها؟ وكن صادقا مع نفسك قأذا كانت الاجابة بنعم فالحمد لله انت في الطريق الصحيح وان كانت لا فعليك ان تعيد تنظيم اوراقك وان تغير مما تفعلة كي يكون خطوة نحو تحقيق ما تريدة لانك اذا ستمريت فيما تفعل فسوف تحصل على نفس النتائج وتدور في حلقة مفرغة. لقد استغرقت 6 سنوات حتي تمكنت من احداث التغيير الذي ساعدني علب الوصول الي احد اهدافي وظلت افعل نفس الشيء لمده 8 سنوات بدون تغيير وانا لا اتحرك نحو هدفي الي ان جلست وفكرت ووجدت اني لم اغير ما افعل خلال 6 سنوات وبالتالي لا يوجد تغيير فيما اصل الية.

واخير استعن بالله في كل شئ وتذكر دوما

ان الله في عون العبد ما دام العبد في عوان اخيه

وافعل الخير في اهله وفي غير اهله فان كان في اهله فهو خير وان كان في غير اهله فأنت اهل له.

ادام عليكم الله نعمة العافية والصحة والامن ورزقكم الله الجنة اخواني الكرام

كل الشكر والتقدير

الله يفتح عليك بجد ......

كل سنة وانتم طيبين يا جماعة بمناسبة الاسراء والمعراج وياااارب السنة الجاية يكون حال المسلمين خاصة و الامة العربية عامة افضل ... او على الاقل مبشّر شوية ....

معلش يا لماضة دا فرحك يعنى ؟ اصل لو كدة يبقى احنا مستنيين عزومة بجد مش فشنك ... و مبروك يا قمر ...

حد عنده خلفية الله يخليكم عن امتحان الصيادلة فى دبى ؟ ايه نظامه و امتى و كدة يعنى ؟؟؟؟

[الرويناء]

السلام عليكم

انا زعلانه ولا حد بيسال ولا بيقول غابت ليه ولا افتقدتونى كده ولا حاجه وانت عارفين انى مسنتره قدام الشاشه على طول كنت تعبانه ولا حد سأل عليا وبعتلى زياره بس ايه مش تضحكوا عليا وتجيبوا تفاح لا انا عايزه حاجه من الغالى بطيخ مصرى ولا حاجه صحيح انا مش باكل حاجه بقالى اسبوعين وربنا يخلى المحاليل بس اهوه نشمه حته حاجه من ريحه مصر

ازيكم عاملين ايه والله لسه بقول انا من زمان مشوفتش حاجه للماضه لعل المانع خير على العموم لو فرحك الف مبروك انا كمان نازله الاسبوع الجاى مصر رحله علاج زى مبيقولوا يعنى عايزه عزومه خصوصى

وبرضه لو اى حد عايز حاجه من مصر يقول شويه بلح للخشاف ولا فانوس رمضان ولا شويه بمب لا بلاش بمب ياحسن يقفشونا بيه

[سهيلة]

الف سلامة عليكى يا رويناء

ويا رب يشفيكى

وعلى فكرة طبعا افتقدنا مشاركاتك وسالنا عليكى بس ف سرنا

الف سلامة عليكى :rolleyes: :lol: bv:-

اما بالنسبة للماضة

دة يبقى فرج اختها ان شاء اللة

والف مبروك لاخت الزميلة لماضة :D :blink:

[roby]

الف مبروك للى هيتجوزوا و عقبال اللى لسه متجوزوش و الف سلامة على العيانين كمان يا روينا و متخفيش مش هنجيب تفاح لانه اتفقس هنا خلاص و بان على اصله انا جبت تين شوكى مصرى الاسبوع اللى فات الكيلو 16 درهم غالى اهوه ( عمار يا مصر كنت اوقف الولد بالعربية و اخلص الحمولة و كمان هوه بيقطع باقل ب10 جنيه )

بس كان زى العسل فكرنى بايم الصيف فى مصر و الله .

[henhel]

السلام عليكم اخى henhel

جزاك الله كل خير على المعلومات المفيدة جدا و التى طمنئنى الى حد كبير.

بالنسبة للاولاد هيكونوا فى سنة اولى و ثانية ابتدائى .

متشكر جدا

سبحان الله و بحمده عدد خلقه و زنه عرشه و مداد كلماته.

بسم الله الرحمن الرحيم و لا حول ولا قوة الا بالله[/color]

اخى الكريم اسف جدا على التاخير عن الرد و ده لظروف خارجه عن ارادتى

شوف يا سيدى المدارس المنهج العربى تعمل حسابك على متوسط 4.000 عن كل ولد اما بالنسبة للمنهج الامريجى فحوالى 15.000 فى السنه عن كل ولد برده و العهده على الراوى لانى سالتلك واحد من اهل العين و اولاده فى المدارس برده

و ربنا يتمملك على خير

[زعلان]

حد يعرف حضانات في دبي ممتازة و ايه اسعارها

[الكريم]

السلام عليكم اخواني انا ان شاء الله ساكون في ابوظبي في شهر 10 القادم و اريد ان اسال هل فعلا الايجارات نزلت في ابوظبي و عندي سؤال اخر قريت في موقع الداخلية بابوظبي اني فقط يمكني عمل زيارة لابي و امي و لا يمكن عمل اقامة للوالدين فهل هذا صحيح وشكرا لكم

[زعلان]

بالنسبة للايجارات لا اظن انها نزلت بشكل ملموس او ملحوظ في ابو ظبي

يحق لك تعمل زيارة للوالدين او اقامة للوالدين بالانسبة للاقامة في طبعا شروط بالنسبة للمرتب و السكن ولابد طالما ان كلا الوالدين على قيد الحياة و غير منفصلين انك نعمل اقامة لكليهما وليس لأحدهما دون الاخر ده شرط للاقامة

[سهيلة]

الاخ الفاضل الكريم

الايجارات ف ابو ظبى نزلت بنسبة طفيفة جدا وف بعض الاماكن موش كلها

خاصة ف الاماكن البعيدة شوية عن ابو ظبى نفسها

الاستاذ زعلان سؤال كدة على الماشى

هوة لازم عشان ابعت زيارة لحد لازم يكون قريبى من الدرجة الاولى ولا ممكن زوج اختى مثلا

[ABO ADAM]

انا عملت قبل كدة زياة لزوج اخت زوجتى من دبى بس لازم يشوف عقد العمل لان فى حد ادنى للمرتب المسموح لة

[matzakos]

السلام عليكم

أنا نازل إن شاء الله مصر الاسبوع اللي جاي ...... و عاوز أعمل زي أولاد البهوات و أصيف لي كم يوم في مارينا أو بورتو مارينا

ما حدش يدلني على شقة إيجار بسعر كويس نسبياً في بورتو مارينا ...... شقة ياولاد الحلال وليكم الأجر و الثواب.

نفسي أعيش في الدور شوية كده وأقول " أنا طالع على شرم " أو " أنا رايح بورتو يومين "

[زعلان]

ممكن تعملي دعوة لأي احد من اقاربك بس بشروط الراتب وبيبقى في تأمين

[الكريم]

اخي العزيز زعلان انا فتحت موقع ادارة الهجرة و الجوازات لابوظبي لقيت ان من سبتمبر 2008 ان الاقامة فقط لابوين المواطن الغير مواطنين اما ابوين الاجانب للمرأة فقط في مركز حساس و التي تكون وحدها اما الالحاق بعائل فاللزوجة و الاولاد البنبن تحت 18 و البنات الغير متزوجات فهل هذا صحيح و كيف تتاكد و جزاك الله خير

[زعلان]

يمكن الوضع مختلف عن دبي بس الي ممكن يفدنا في الموضوع ده هو السندباد لأنه ادرى بامور الفيز و الاقامات في ابو ظبي

[سهيلة]

ابو ادم

الفاضل زعلان

متشكرة للاهتمام والرد

ولكن كنت عاوزة اعرف الزياررة بتتكلف كام

ويا ترى الورق بيتعمل من الجوازات ولا من شركات الطيران الخليجية؟

[ABO ADAM]

الورق بيتعمل من الجوازات

تقريبا 600 درهم و اسألى فى مكتب الطباعة

[roby]

ويا ترى الورق بيتعمل من الجوازات ولا من شركات الطيران الخليجية؟

طيران العربية عندها قسم لاستخراج الفيزات و كانت عاملة عرض 975 درهم شامل الطيران رايح جاى و كمان الفيزا بس اعتقد قرب يخلص ممكن تسألى عليه

[newcomer]

كنت عايزة اعرف اسماء مكاتب هجرة كندا فى الامارات موثوق فيها

يا ريت لو حد جرب مكتب منهم ....

معلش هاتعبكم معايا

[BONOFREEZ]

السلام عليكم

كان ليا طلب من الاخوه لو حد يقدر يدلنى على الاماكن الى اقدر اقدم فيها على شغل خاص بمجال الكمبيوتر او الشبكات وحاصل على شهادة MCSE

وكنت عاوز اسال بخصوص الفترة اللى بعد الكنسله تدور فيها على شغل بتبقى اد ايه

وجزاكم الله خيرا