مغتربي الإمارات

[عبيد الله]

نداء عاجل إلى حكيم وشريف.. احضرا فوراً لنطمئن عليكما وإلا ذنبك على جبنك انت وهو

[د محمد]

وعليكم السلام ورحمة الله وبركاته

مرحباً بك دكتور محمد بين إخوانك وأحبّائك

أولاً: هل العقد لازم يكون مكتوب فيه ان المرتب سوف يزيد أم ليس شرط؟

لا.. ليس بشرط، وخصوصاً أنك ستلتحق بالعمل في مؤسسة حكومية، والعمل في الحكومة مرتب حسب الدرجات (البكالوريوس مثلا الدرجة الرابعة)، وكل درجة لها راتبها، ومميزاتها.. بمرور السنوات يزيد الراتب حسب نظام كل هيئة أو وزارة.. أما الزيادة الكلية للراتب لجميع العاملين مرة واحدة فغالباً تكون بقرار من مجلس الوزراء، مثل ما حدث منذ عامين أثناء أزمة الارتفاع الجنوني للأسعار

ثانياً: هل ينفع اسأل في السفارة قبل العقد للتأكد من جدية الأمر؟

جرّب واستفسر من السفارة عن كيفية التحقق من صحة العقد.. لكن ما أعرفه شخصياً هو أن السفارة لا دخل لها بهذه التعاقدات. ما سيحدث هو أن جهة العمل سترسل لك تأشيرة عمل مكتوب فيها كل التفاصيل، مثل: اسم الكفيل/ المؤسسة / الوزارة التي ستعمل معها، والمسمى الوظيفي لك عندهم (طبيب بيطري مثلا) ومعلومات أخرى ذات صلة.. ومنها تتأكد أنت من كل ما تريد

ثالثاً: هل السفارة تعرف العمل حكومي أم لا؟

نعم بالتأكيد.. لكن أصلاً التأشيرة ستصدر من دائرة الجنسية والإقامة هنا مكتوب عليها اسم الوزارة التي ستعمل معها وستصدر لك بطاقة عمل على هذا الأساس. اطمئن فهذا الموضوع ليس فيه لعب، والقانون في الإمارات أقوي مما تتخيل

رابعاً: الكلام الذي قاله لك الموظف في الملحقية الثقافية فيه شيء من الصحة لكنه ليس الغالب.. وإلا لماذا تقوم بعض لجان الهيئات الحكومية التي تزور مصر بإجراء المقابلات في عبّارات على النيل؟ أو في فنادق فخمة تطل على النهر الخالد؟.. عموماً بغض النظر عن المكان.. المهم هي التأشيرة التي ستمسكها في يدك وتذاكر الطيران التي سيرسلونها لك.. وكلها دلائل دامغة على جدية الأمر

خامساً: المبلغ الذي طلبه منك مكتب التوظيف (7 آلاف جنيه) متوقع لأن هذا هو العادي في مصر الآن.. وقد قابلت شابين مصريين منذ أشهر قليلة يعملان كعمال عاديين في شركة مقاولات (براتب 800 درهم فقط للأسف شامل كل شيء) قالوا لي إنهم دفعوا لمكتب التوظيف 13 ألف جنيه لكل منهم، أي 26 ألف.. على العموم اطلب منهم إيصال بهذا المبلغ لتطمئن نفسك

______________________________________

سادساً: الراتب المعروض عليك جيد جداً كبداية لك هنا في الدولة، خصوصاً لو كان في دبي والشارقة. أضف إلى ذلك أن البدلات المتوفرة أعجبتني جداً: شغلك سيعطيك راتب 4000 آلاف درهم كراتب أساسي وسيوفر لك السكن + المواصلات + التأمين الصحي + تذاكر الطيران.. عايز ايه تاني يا دكتور؟!

على فكرة، الرواتب في الوزارات الاتحادية دائماً تكون أقل من الهيئات المحلية داخل الإمارات.. وعموماً نصيحتي لك لو قالوا نبدل ونعطيك راتب 12 ألف درهم شامل أي بدون تلك المميزات فلا تقبل.. السكن لوحده سيلتهم الجزء الأكبر من دخلك، خصوصاً وبوادر الإنتعاش تعود إلى دبي وربما أسعار العقارات ترفع خلال السنوات القادمة.. والمواصلات "النااار" في دبي إذا كان شغلك بعيد عن خط المترو.. لو ركبت تاكسي ونزلت منه بعد دقيقة فستدفع 10 درهم! لأنها هي الحد الأدني لركوب التاكسي

سابعاً: بالنسبة لأيام العمل: هناك عدد غير قليل من الهيئات الحكومية تعمل السبت، وكل إمارة لها نظام خاص بها في تنظيم هذه المسألة.. أكيد العمل يوم السبت في الخدمات الصحية أو البيطرية له سبب عندهم ستعرفه لما تأتي إن شاء الله.. لكن اطمأن ستجد هنا أجهزة وخدمات ورعاية على أعلى مستوى وفرق السماء من الأرض بالنسبة لمصر

رأيي هو: توكل على الله واقبل.. امشي في الإجارءات كما هو مطلوب وقدّم حسن النية، وإن شاء الله سيكرمك الله ويبارك لك في رزقك

________________________________________

أخيراً: قبل أن أنسى.. أحب أن أنبهك لأمرين غاية في الأهمية

1- قبل أن تدفع الفلوس لمكتب التوظيف وتبدأ في الإجراءات.. اذهب الآن وفوراً إلى أي معمل تحاليل طبية قريب منك لتطمئن على نفسك بخصوص الآتي: فيروس "سي" الكبدي، فيروس "بي" الكبدي، فيروس "إتش آي في" ذو الصلة بمرض الإيدز، وفحص الصدر.. خصوصاً أنك يا دكتور ستعمل في هيئة طبية بيطرية، وفيها تشديد على هذه التحاليل

2- استخرج رخصة قيادة من مصر قبل سفرك لأنك حتماً ستحتاج لسيارة لما تأتي إلى الإمارات.. هذه الرخصة ستوفر عليك طول الإجراءات وبعض المصاريف (أنا لم تكن عندي رخصة من مصر فكلفتني هنا في أبوظبي 8 آلاف درهم)..ا

بالتوفيق يا بطل

السلام عليكم ورحمة الله وبركاته

أخي عبيد الله

جزاك الله خيرا علي الرد الوافي الكافي

بارك الله فيك وجعلك زخرا

أولا أسلوبك أكثر من رائع في الشرح والتوضيح

ولا أستاذ جامعة والواضح أن الله حباك موهبة

والحمد لله بتستغلها في مساعدة الناس

جعله الله في ميزان حسناتك

ثانيا الشركة طلبت مني فعلا تحليل فيرس س فقط من أي معمل خاص

والحمد لله كان سالب

ثالثا انا معي رخصة من 2006 بس الوظيفة فيها طالب لاني كنت

لسه في الكلية هل المفروض اروح المرور أغير الوظيفة ولا مش مهم؟

رابعا انا سلمت اوراقي لمكتب التوظيف يوم 13 ديسمبر وقالوا الورق

سوف يرسل الي الامارات بـ DHL يوم السبت 25 ديسمبر وينتظروا حوالي

اسبوعين علي الرد

هل الكلام ده مظبوط؟

علي فكرة الاوراق اللي اخدتها الشركة:

الباسبور+12 صورة شخصية

شهادة تخرج موثقة أصل

شهادة دبلوم دراسات عليا موثقة أصل

إفادة قيد ماجيستير أصل + تحليل فيرس س

فيش جنائي+ صورة رخصة القيادة+3000 جنيه

خامسا اية نظام الاكل مع العلم معرفش اطبخ

هل اكل المطاعم كويس ولا عك؟

هل الاكل مصري ولا مختلف؟وغالي ولا لا؟

وصرف في حدود كام علي الاكل في حدود المعقول؟

انا تقلت عليك قوي

وشكرا لسعة صدرك

جزاك الله خيرا

السلام عليكم ورحمة الله وبركاته

[عبيد الله]

سلاُم الله عليك أخي محمد

بالنسبة لرخصة القيادة

حسب ما رأيت هنا.. الرخصة التي ستصدر لك من الإمارات ستكون مبنية على جواز سفرك وبطاقة الهوية الوطنية الإماراتية، ورخصة مصر ستفيدك فقط في تسريع بعض الإجراءات هنا (مثلا لا حاجة لانضمامك لحصص تعليم القيادة).. وجودها معك لا يعني نجاحك وحصولك على الرخصة الإماراتية، إنما يعني أنه عندك الأساس والمعرفة بالقيادة وقواعد المرور.. أعرف مهندساً مصرياً معه رخصة من مصر ربما من ربع قرن، ورخصة من السعودية منذ خمسة عشر عاماً.. جاء الإمارات وامتحن ورسب، ببساطة لأنه يعرف القيادة لكن لا يعرف القانون

هذا رابط لمقال مفيد نُشر على موقع جريدة الشروق المصرية بخصوص هذه المسألة كيف تحصل على رخصة قيادة فى دبى والقاهرة؟

بالنسبة إلى إرسال الأوراق عبر الـ دي إتش إل

أنا حصل معي ذلك.. ذهبت وأرسلت أوراقي إلى الإمارات عبر شركة دي إتش إل (هنا في الإمارات يفضلونها لأنها تسلم المظاريف يداً بيد)، ثم انتظرت فترة قريبة من التي قيلت لكن للأسف لا أتذكر الأوراق أو الصور أو الشهادات التي طُلب مني

بالنسبة للمطاعم والأكل..

للأسف ليست عندي فكرة عن المطاعم في الشارقة ودبي. لكني مثلك لا أعرف أطبخ وفي الغالب أعيش على المطاعم وفي مرة حسبت إنفاقي على المطاعم هنا في أبوظبي فوجدته تقريباً 2000 درهم في الشهر (مثلا: وجبة ساندويتش من صب واي مع زجاجة ماء صغيره ثمنها 35 درهم! أما إذا تجرّأت وذهبت إلى مطعم جاد وطلبت "جوز حمام" فستدفع 75 درهم تقريباً!).. الأخوة هنا ربما يفيدونك أكثر عن هذه النقطة مع ما يقال بأن الشارقة كل شيء فيها رخيص، وخصوصاً مطعم فرحات الذي أسمع عنه هنا أساطير يرويها "الأكّيلة" الذين يسافرون إليه خصيصاً من أبوظبي

_______________________________________________

أخيراً: هناك شيء مهم تذكرته يتعلق بالشهادات

لاحظت عدد متزايد من المؤسسات الحكومية تشترط معادلة الشهادة الجامعية (نعم حتى لو كنت حصلت عليها من مصر).. لذلك من الأفضل لك أن تأتي بالورقتين التاليتين معك:

1- بيان درجات المواد خلال جميع سنوات الدراسة مختوم بختم الكلية (يعني تقدير جميع المواد بدرجاتها في جميع السنوات)

2- شهادة الثانوية الأصل

خلاص كده وأوعى تسأل عن حاجة تاني :P

!!

[عادل أبو عمر]

سلاُم الله عليك أخي عبيد الله

جزاك الله خيرا على ردوك على أخونا محمد

أنا مبسوط أوي من الحوار لأن محمد بيسأل الأسئلة اللي أنا عاوز أسألها

يعني حضرتك كدة بتاخد ثواب دوبل بإذن الله دا غير إنها صدقة جارية

ربنا ييسر لينا الأمور ونتقابل كلنا بإذن الله عن قريب في الإمارات

جعل الله لقائنا في الدنيا على طاعته و في الآخرة في مستقر رحمته في الفردوس الأعلى ...اللهم آمين

اتفضل كمل أسئلتك يا دكتور محمد .... متخليش حاجة في نفسك :P

[د محمد]

السلام عليكم ورحمة الله وبركاته

أخي عبيد الله

جزاك الله خيرا علي الرد

جعله الله في ميزان حسناتك

شكرا علي نصايحكك الكريمة

ومعلش انا عارف اني زوتها خالص

وعلي رأي المثل:"ان كان حبيبك عسل ....."

شكرا للافاضة والتوضيح

جزاك الله خيرا

السلام عليكم ورحمة الله وبركاته

[د محمد]

السلام عليكم ورحمة الله وبركاته

أخي عادل

جزاك الله خيرا

شرفني تعليقك ومرورك الكريم علي الموضوع

اسيب عبيد الله يرتاح مني شوية

حتي أكون فكرت في كام سؤال عليهم القيمة

ممكن حضرتك تكمل أسئلة بدالي

بس متقولش لـ"عبيد الله" لحسن ممكن يحدفني بحاجة

تقبل تحياتي

جزاك الله خيرا

السلام عليكم ورحمة الله وبركاته

[عادل أبو عمر]

السلام عليكم ورحمة الله وبركاته

أخي عادل

جزاك الله خيرا

شرفني تعليقك ومرورك الكريم علي الموضوع

اسيب عبيد الله يرتاح مني شوية

حتي أكون فكرت في كام سؤال عليهم القيمة

ممكن حضرتك تكمل أسئلة بدالي

بس متقولش لـ"عبيد الله" لحسن ممكن يحدفني بحاجة

تقبل تحياتي

جزاك الله خيرا

السلام عليكم ورحمة الله وبركاته

كدة يا محمد بتحطني في وش الأستاذ بعد ما خلاص سخن إيده ومستني حد فينا يرفع رقبته ...

بس أنا مش هخاف و هسأل سؤالي و أمري لله ..

بس السؤال جامد شوية

السؤال بيقول علل ...

ليه أخونا عبيد الله لما فكر يروح عند جاد طلب جوز حمام و ليه ما طلبش نص بطة ولا تلت مشكل مثلا :P

[عبيد الله]

ياااااااه يا أخ عادل فكرتني بالذي مضي.. لو تعرف أد ايه أنا بحب البط! وشوربة البط امممم! وطبيخ البط وخصوصا السبانخ اللي كنت أحسبها زمان مش من طعام البني آدمين!

الوالدة عارفة كده كويس فكل ما بروح أجازة وأدخل من الباب ألاقيها مجهزة حبايبي البط في استقبالي!.. ولما سكنت 5 سنين في المدينة الجامعية كنت كل ما أروح البيت تجهز أرض المعركة وتقعد جنبي وتقول بكل براءة وعفوية: كُل يا ضناي انت وشك صفّر.. هو من إمتى أكل بره بيطلع رجالة؟!.. ياريت كان بإيدي كنت أدبحلك كل يوم وأوديلك بس احنا فين ومصر فين!.. طمني يا حبيبي هم في المدينة بيأكلوك كويس؟! أنا طبعا تايه في اللي قدامي ومش فاضي أرد! بس بحرك دماغي إن كله تمام والأمن مستتب!

الجديد في الموضوع إني اكتشفت إن خطيبتي الهانم - وشريكة المستقبل إن شاء الله - لسة يدوبك بدأت تتعلم الطبخ.. قال ايه كانت مركزة في الدراسة وعايزة "ترتّب"، يعني تطلع من أوائل الدفعة، وفي الآخر طلعت "التالتة"!.. امبارح طقرت في دماغي وقلت أمارس سلطاتي من دلوقتي ورحت متصل بيها وقلت بصوت فيه وعيد وتهديد: احم احم.. اسمعي يا أستاذة: يا تتعلمي الطبيخ يا مفيش جواز!

هي طبعا اترعبت وارتبكت! وردت علي بصوت مهزوز خايف: لأ طبعا أنا مقدرش أستغنى عنك بوتاتا!! وعشانك بدأت أقتحم عالم المطبخ.. طيب تصدق إني أنا اللي عملت الغداء في البيت إمبارح؟! طبعاً أنا هزيت راسي من ورا الموبايل وبقول هصدق لما أشوف بعيني!

_______________________

لما بدأت أكون زبون دائم عند مطعم جاد في الخالدية.. اكتشتفت عنده أكلة جميلة: فتة بالموزة الضااااااني! وكنت أول مرة في حياتي آكل الفتة.. الحمد لله إن فيه مطاعم مصرية عاملة ليها فر ع هنا.. وإلا كنا ناكل في مطاعم الهنود ونروح مصر واحنا بنهز راسنا!

___________________

إلى الدكتور محمد.. اسأل براحتك أنا كنت بهزر معاك.. بالنسبة للمهنة في رخصتك الحالية فغيرها من طالب إلى حاصل على مؤهلك الحالي أحسن

بمناسبة الأكل، وبمناسبة إنك طبيبي بيطري: ليه يا أخ محمد الفراخ مبقاش ليها أي طعم..؟ هل صحيح غالبية المزارع في مصر حالياً بتحقن الكتاكيت بحقن هرومنات ضارة للإنسان؟ أنا أعرف إن الأطباء البيطريين لهم باع طويل وخبرة في الموضوع ده

[د محمد]

السلام عليكم ورحمة الله وبركاته

أخي عادل

جزاك الله خيرا

كلامك انت وعبيد الله عن البط والحمام جوعني

عشان كده

عروح اتغدة

اتفضل معانا-في سمك رنجة

[د محمد]

السلام عليكم ورحمة الله وبركاته

أخي عبيد الله

انا كمان احب البط وجميع انواع الطيور(مش بيطري)

والسبانخ كمان

بس للاسف البط ممنوع عندنا من سنين لان اخواتي ما بيحبوش البط

بالنسبة للفراخ معظم اصحاب المزارع معندهمش ضمير الا من رحم ربي

انا كنت شغال في مجزر دواجن الفراخ البيضاء عمرها 28يوم ووزنهافوق الكيلو ونص

انا كنت سألت دكتور في الكلية عن الموضوع ده قالي انها اضافات اعلاف فيها مسحوق دم

ومسحوق عظم ومسحوق ريش ومسحوق امعاء(مسحوق مخالفات مجازر)طبعا بعد معاملات خاصة في مصانع العلف

وده طبعا بروتين حيواني يرفع القيمة الغذائية للعلف وخصوصا الكتاكيت الصغيرة

المشكلة في الادوية والتحصينات مفروض في حاجة اسمها فترة سحب الدواء في الجسم

بمعني فترة لازمة لخروج الدواء من جسم الحيوان أو الطائر ويبقي آمن للاستهلاك الآدمي

بس للاسف مفيش التزام بالامر ده

بس الفراخ البيضاء نوعها كده تاكل كويس ترمي وزن كويس في اقل مدةغير الفراخ البلدي خالي

هل في الامارات مزارع ولا بيعتمدوا علي الاستيراد؟

هل في تدوال حي للدواجن(محل فرارجي) ولا مجمد؟

انت خريج اية؟انا عارف انك خريج 2007

وقلت خمس سنين يبقي انت خريج هندسة صح؟

[لماضة مصرية جدا]

السلام عليكم و رحمة الله بركاته

اخواتي....المصريين....اللي لسه عن السفر مش مقررين....او اللي وصلوا بالسلامة و اخدوا لقب متغربين

ميرسي كتير علي كل اللي سأل عليا....

الحقيقة انا مش كنت مخاصمة التوبيك هنا و لا حاجة.....بس حسيت اني عاملة زي العيل العبيط اللي مش قادر يمسك ايد اي حد و يعديه للبر التاني

و ده طبعا لان اللي بيجي التوبيك هنا بيسال اسئلة عميقة اوي عن المعيشة....و الحقيقة مبقدرشي افيد تير فبربع ايدي و بقعد ساكتة

حمد لله ع السلامة استاذ عبيد الله.....و زعل كبير جدا جدا جدا......لأن حضرتك كده مريت بظروف المفروض ان كلنا كنا نقف جنبك فيها...لكن انت الظاهر بخلت علينا بالثواب

ربنا يعافيك يا رب.....و باذن الله تكون حاجة فدت حاجة تانية

انا ليه بقي جاية النهاردة يا ولاد

عندي خبر حلوووووووووو

الي افراد الجالية المصرية بأبو ظبي

اجمع هنا حالا

ماما زمانها جاية

جاية بعد شوية

جايبة لعب و حاجات

فاكرين الاغنية دي

مبحبهاش ع فكرة.....بس بحب المقطع بتاع...."جايبة معاها شنطة فيها وزة و بطة"

اهي وزة و بطة دي.....هما حدث الليلة و كل ليلة

و حيث اني اتكعبلت في المداخلات السابقة عن حوار عن "البط"...."اكل ماما"

احب اقدم العرض الحصري دوت.....عشان تعرفوا اد ايه انتو غاليين عليا

الفرجة علي صورة للبطة الفقيدة.......25 درهم

التصوير مع البطة المحمر..............35 درهم

شم ريحة البطة و هي متربعة في الصينية و حواليها الصوص كده بيعوم.......45 درهم

اما لو حد اتهور بقي...و استبيع و حب يمد ايده علي البطة..............100 درهم

و احب افكركم ان العرض دي حصري.....للجالية في ابو ظبي

كان معكم لماضة

مراسل مطعم

كل و اشكر

ع جنب بقي

لو حد عايز اي حاجة.......اي حاجة.....اي حاجة من مصر يا ريت يقولي....و باذن الله بخلي ماما تجيبها معاها....بس الله يكرمكم حاجة تتطبق و تتحشر في الشنطة

صباحكم.......حلا....زي حلا شنطة ماما اللي مليانة لعب و حاجات...و بطااااات

[عادل أبو عمر]

أخونا الغالي عبيد الله ...

اسمتعت فعلا بحكايتك عن البطة

ربنا يخلي الوالدة و يبارك لها في عمرها و فيك .... و ربنا يتمم فرحتكم عن قريب بإذن الله ...

أكيد هتعزمنا في الفرح بإذن الله إنت مش هتكون فاضي طبعا لأكل البط و الحاجات دي .. سيب لينا احنا الدور ده ...

الدكتور الفاضل محمد ...

كدة يبئى احنا مجمعين في حاجات كتير بفضل الله ...

بط و سبانخ ..... و إمارات إن شاء الله ....

و يبقى الحب في الله قبل كل شيء

أختنا الغالية الفاضلة لماضة ....

إيه التسعيرات الجامدة دي .. و كمان لأهل أبو ظبي فقط .. يعني عشان حضرتك تأكلينا بط عاوزين لينا 200 درهم ...

ع العموم حضرتك ممكن تصوريها وتنزليها مجانا على هذا التوبيك ... لحين ميسرة

مش عارف موضوع البط ده كأنه كلمة السر عند المغتربين المصريين ... كنت في الكويت من 6 شهور ... وواحد صاحبي عزمني في مطعم أبو شقرة ... العزومة على بط .. أنا بحب البط طبعا ... صراحة كانت القعدة جميلة كانت عاوزاكم ...

مطعم أبو شقرة مخلي المصريين كأنهم بياخدوا أازة لمصر إثناء فترة تناول البط ... صاحبي مقابلته مع البطة كانت مع مقابلة العزيز الغالي ... مع إنه المفروض عامل دايت عشان يخس ... بس مع البط مفيش كلام ..

ربنا يجمعنا دائما على طاعته

[عبيد الله]

إلى الدكتور محمد

نعم الإمارات فيها مزارع لكن محدودة، والدولة تعتمد في الغالب على الاستيراد. ما يميز الإمارات هو قوة القانون وفاعلية جهاز الرقابة الغذائية.. هل تعرف أن هذا الجهاز شمّع مطعم أبو شقرة المصري في أبوظبي قبل ذلك وأغلق إلى الأبد "مجمع الأغذية المصرية" لأنهما لم يلتزما بالمعايير الصحية..؟ وبعدهما أنزل غرامات رادعة على مطعم جاد لأن مفتشي الصحة لاحظوا، في زيارة مفاجأة، أن الشيف الذي كان يعمل الساندويتشات للناس لم يلبس "جاونتي" في يديه!..

لا يوجد طبعا فراخ حية في الإمارات.. كله مجمد. الغريب أني لم أرى أي حيوان "حي يرزق" في أبوظبي على الإطلاق، لا أليف ولا مفترس ولا حتى ضال في الشوارع، إلا في أقفاص محلات "البيتس" أو بيع الحيوانات الأليفة.. واستغربت: مفيش حتى كلب هنا يهوهو ويعمل جو في الشوارع؟!

______________________________

بالنسبة للدراسة والعمل، أنا مش مهندس.. نعم درست خمس سنين لأنه كان عندنا سنة إعدادي وأربع سنين دراسة.. بإذن الله لما تنور الإمارات أعزمك على "فتة" عند جاد ونحكي بتفاصيل التفاصيل عن أيام الجامعة وكتب الدكاترة ومكرونة المدينة الجامعية.. لحد ما تزهق وتقول رجعوني عنيك! قصدي رجعوني مصر تاني!

[عبيد الله]

لماضة.. صباحك نور وسرور وسعادة أبدية إن شاء الله

جزاك الله خيراً أختنا العزيزة جداً والغالية على قلبونا لدعائك الجميل.. لو كان بيدي كنت عينتك مساعد أول سكرتير مكتب السفير.. لأنك حنينة وقلبك على كل المصريين "اللي لسه عن السفر مش مقررين....او اللي وصلوا بالسلامة و اخدوا لقب متغربين ".. بس ليه المنصب ده مش عارف.. إن شاء الله تشرفينا هناك وترفعي راس المحاوراتية..

أنا قرأت مداخلة ليك في موضوع آخر واكتشفت إنك حاصلة على ماجستير.. فرحت والله جداً وأتمنى أن تكملي المشوار.. أنا ركزت على النقطة دي لأني شخصياً حلم حياتي هو الحياة الأكاديمية. وقد راسلت جامعة سالفورد البريطانية العام الماضي وبدأت في إجراءات السفر لكن في آخر لحظة رجعت القهقرى وقررت شراء شقة في مصر، وبالفعل هذا ما حدث. أسعار العقارات ترفع يومياً في المحروسة وقلت: ناكل الأول، قصدي الشقة الأول!..

____________

ع جنب بقى

إن شاء الله والدتك تنوّر الإمارات، وتملى حياتك بهجة وسعادة.. هتحسي بالفرق وإن الدنيا هنا ممكن يكون لها طعم، مش شغل بس..

أنا سبقتك من 10 أيام وجئت بأختي الكبيرة، التي أعتبرها أمي الثانية لأنها ربتني ولها الأيادي البيضاء علىّ. زوجها توفى فجأة العام الماضي وترملت، وما أدراكم ما حياة الأرملة. دعوتها لزياراتي فلبّت.. ووالله منذ جاءت كأني أعيش أيام طفولتي بين يديها مرة ثانية.. هي هي لم تتغير بحنانها وعطفها واهتمامها وقلبها الكبير..

ربنا يخليلك والدتك ويبارك فيها.

_________

بالنسبة لعرض مطعم "كل واشكر"، فأنا مش معاكم.. خلاص بقى دلوقتي بقيت آكل "أكل بيتي"!..

استني لسة ما خلصتش: الصورة الرمزية بتاعتك حلوة أوي.. بتفكرني بأيام زمان اللي معشتهاش.. بشوفها بس من خلال اليوتيوب، لأني من مدمني متابعة أيام عصر مصر الملكية.. أظن الزِي ده هو زي المصريات ولاد البلد في عشرينات القرن الماضي؟

[عبيد الله]

أخي العزيز عادل.. إن شاء الله تشرفني وتنورني وتكترني.. بس ادعيلي وأنا أعزمك، وإلا مفيش عزومة!

[د محمد]

السلام عليكم ورحمة الله وبركاته

أخي عبيد الله

جزاك الله خيرا شكرا علي العزومة

بمناسبة الحيوانات الأليفة pets انا عندي خبرة فيهم

هل الامارات فيها عيادات خاصة بالـ pets

موضوع بتكلم عن الفراخ البيضاء والهرمونات

[hakeem]

نداء عاجل إلى حكيم وشريف.. احضرا فوراً لنطمئن عليكما وإلا ذنبك على جبنك انت وهو

تمام يا أفندم..علم وينفذ

الف حمد لله على سلامتك اخى الفاضل عبيد الله.ويارب متغيب عننا ابدا.

مرة تغيب عننا وترجع نعرف انك كنت بتخطب..وطبعا كلت علينا البط مش الحلاوة خلى بالك

ومره تانية تغيب ونعرف انك كنت عامل حادثه .وحتى منقدرش نطمن عليك..

لازم تشارك معانا هنا لان غيابك ده احد اسباب اننا مش متواجدين ديما

اطمن انا بخير بس انشغلت شوية فى توثيق شويه اوراق..يمكن تفرج المرة دى ونفك من هنا..بعد ما خلصت الورق جالى دور برد قاتل.بس الحمد لله عدت على خير..وقلت مش هدخل المنتدى وانا تعبان بدل ما حد يتعدى منى ولا حاجة

دعواتك ربنا يتمها على خير المرة دى..اصل انت شايف وعارف ايه اللى حصل معايا

والله من قبل ما أعرف انك كييف بط زيى كنت مظبط انى لو سافرت لازم أخد معايا بط..بس واحد قالى بلاش لحوم احسن يأخدوها منك فى المطار..وده لو حصل مش هتنازل عن البطه ابدا.

دعواتك بس تتم على خير ..ولو ربنا يسر معمول حسابك فى البطه بتاعتى bv:- bv:-

والف سلامة عليك مرة تانية

[د محمد]

السلام عليكم ورحمة الله وبركاته

أخي العزيز إسلام(حكيم)

ألف سلامة شفاك الله وعفاك

ربنا ييسر لك امورك

ناوي علي فين؟

ياجماعة كفاية بقي

بلاش سيرة البط الناس جاعت

[عبيد الله]

السلام عليكم ورحمة الله وبركاته

عوداً حميداً يا حكيم.. نورتنا وكتّرتنا.. عقبال لما نشوف شريف إن شاء الله هو كمان ونطمئن عليه..

ربنا ييسر لك الحال يا أخي ويرزقك من حيث لا تحتسب.. طالما أنك تأخذ بالأسباب وتسعى في طلب الرزق، فاعلم أن الله لن يخذلك أبداً..

كان هذا تعقيب سريع، ولنا عودة إن شاء الله عن قريب..

[عادل أبو عمر]

[يمين]

أخي العزيز عادل.. إن شاء الله تشرفني وتنورني وتكترني.. بس ادعيلي وأنا أعزمك، وإلا مفيش عزومة!

[/يمين]

يارب تتجوز يا عبيد الله .... يارب

تم تعديل 30 ديسمبر 2010 بواسطة عادل أبو عمر