مغتربي الإمارات

[عبيد الله]

السلام عليكم ورحمة الله

ألف مبروك أخ محمد، وعقبال - إن شاء الله - لما تستلم وظيفتك وتستقر في عملك

أولاً: بالنسبة إلى عقد العمل فستوقع عليه لما تأتي إلى الإمارات إن شاء الله.. تخضع للفحص الطبي أولاً وتتم الإجراءات الأخرى ثم تقرأ عقد العمل الذي ستصدر منه ثلاث نسخ: واحدة لك، والأخرى لشركتك، والثالثة مع وزارة العمل.. بعدها توقع على العقد واقرأه أولاً جيداً حتى يكون مطابقاً لما اُتفق عليه..

وربما تجدر الإشارة هنا إلى أن الكشف الطبي سيتضمن: الصدر، وفيروس "إتش آي في"، وفيروس "بي" الكبدي، وفيروس "سي" الكبدي، وهذا الأخير ينطبق فقط على من سيعمل في مهن معينة، مثل الطب والتمريض والحلاقة والجزارة والمطاعم..

____________________________________________

ثانياًَ: تصريح العمل تستطيع استخراجه بناءً على التأشيرة التي وصلتك.. إطبع التأشيرة ألوان وخذها هي وجواز سفرك، وتذكرة الطائرة إن وجدت (لأني قرأت على يافطة معلقة أعلى مكتب العمل في محافظتي تشترط على المسافرين إلى ألإمارات خصوصاً إحضار تذكرة الطائرة معهم!، إلا أنهم لم يطلبوها مني، فربما المسألة روتين فقط..)، وبطاقتك الشخصية ثم توجه إلى مكتب العمل في محافظتك أو منطقتك.. إذا كان هناك شيء ناقص فهم سيبينون لك ذلك.. أنصحك اذهب مبكراً الآن، واكسب وقت..

ثالثاُ: شركات الطيران التي تصل إلى أبوظبي هي بشكلٍ أساسي مصر للطيران والاتحاد للطيران.. وهما الطيران الرئيس الذي ينقل بين القاهرة وأبوظبي بدون ترانزيت.. لو أنك ساكن في إسكندرية أو أسيوط أو الأقصر مثلا.. الأرخص لك أن تأخذ طيران العربية إلى الشارقة ثم بالمواصلات إلى أبوظبي.. نصيحتي لك لا تسترخص أبداً إذا كنت من القاهرة واركب إلى أبوظبي مباشرة، حتى ترتاح من هم التنقل بين مدن دولة لم تعرفها بعد..

هنا رابط موقع مصر للطيران وهنا رابط موقع الاتحاد للطيران... تستطيع من خلالهما معرفة الأسعار المتاحة يومياًَ للرحلات..

_____________________________________________

رابعاً: المناخ العام في الإمارات حالياً وسط بين الشتاء والصيف، لكن آخذ في الدخول في جو الصيف أكثر يوماً بعد يوم.. حتى أني لما ذهبت لصلاة ظهر الجمعة الأسبوع الماضي ما صدقت أن الحر أصبح لهذه الدرجة... إذن عليك التركيز على ملابس الصيف.. وإن كنت تريد نصيحتي تعالى اشتري من هنا كل شيء، خصوصا الملابس.. جميلة وسعرها معقول، ربما أرخص من مصر، وتناسب الذوق العام في البلد..

خامساً: نصيحة مهمة لك.. علّم إخوانك أو أخواتك أو والديك استخدام الانترنت الآن، إذا لم يكن لديهم خبرة في استخدامه.. لما تأتي إلا الإمارات إن شاء الله ستجد تكلفة الاتصالات الدولية باهظة وأفضل حل هو: الانترنت.. تكلمهم صوت وصورة يومياً إن أحببت..

بالتوفيق أخي

[د محمد]

السلام عليكم ورحمة الله وبركاته

عبيد الله

فينك ياراجل مفتقدينك

بالنسبة لتصريح العمل بيتعمل في مكتب العمل ولا مكتب تصاريح العمل؟

لان في مكتب القوي العاملة ومكتب تصاريح العمل ولا هما الاثنين واحد؟

بالنسبة لموضوع النت

الساعة في السيبر بكام؟

والشيء بالشيء يذكر

اسعار اللاب توب في الامارات الارخص ولا مصر؟

جزاك الله خيرا

:egyflag:

[mohamed abd el hamid]

السلام عليكم ورحمة الله وبركاته

أخي mohamed abd el hamid

اية الاخبار؟

عملت اية في تصريح العمل؟

الحمد لله يارداااااالة ........... روحت امبارح مكتب تصاريح العمل ... واخدت الورق معايا .... وبعد طابور طويل ... قالتلى لازم اصل الفيزايا اما اروح اختم الصورة من القوى العاملة فى مدينة نصر... طبعا اخوكم اتصدم ووشى جاب الواااااان :sad:

المهم ... انا قولت اعمل محاولة كده وياصابت يا خابت :blink:

قولت هاطبع صورة الفيزا الى مختوم عليها طبق الاصل ... طباعه الوان ... واروح اقلها ان ده هو الختم الحقيقى ;)

روحت النهارده بقى وانا كلى امل ..... قالتلى انت مش لسه كنت هنا امبارح وانا طردتك بره ... :unsure:

قولتلها ما انا جبت الاصل .... :blush2: والختم عندك اهو .... قالتلى ايوه كده

والحمد لله سلمت الورق وروحت دفعت المصاريف فى البنك .... و قالتلى تعالى بكره الساعه 1 تستلم التصريح

لولولولولولولولولولى

[mohamed abd el hamid]

السلام عليكم ورحمة الله

ألف مبروك أخ محمد، وعقبال - إن شاء الله - لما تستلم وظيفتك وتستقر في عملك

يااااااااااااه .... انت فين يا اخ عبيد الله .... طيب والله العظيم والله العظيم واحشنى جداااااا

انت فينك من زمان .... ده انا لو اعرف ان كلامى ده هايرجعك للمنتدى تانى ... كنت كدبت الفته من زمااااااان

الله يبارك فيك يارب ... وعقبال ما نتقابل على خير يارب

ثانياًَ: تصريح العمل تستطيع استخراجه بناءً على التأشيرة التي وصلتك.. إطبع التأشيرة ألوان وخذها هي وجواز سفرك، وتذكرة الطائرة إن وجدت (لأني قرأت على يافطة معلقة أعلى مكتب العمل في محافظتي تشترط على المسافرين إلى ألإمارات خصوصاً إحضار تذكرة الطائرة معهم!، إلا أنهم لم يطلبوها مني، فربما المسألة روتين فقط..)، وبطاقتك الشخصية ثم توجه إلى مكتب العمل في محافظتك أو منطقتك.. إذا كان هناك شيء ناقص فهم سيبينون لك ذلك.. أنصحك اذهب مبكراً الآن، واكسب وقت..

انت كنت فينك من زمان .... بس عيب عليك ... ابو عبد الحميد جابها لوحده

- الحمد لله الذى هدانى لهذا .. وما كنت اهتدى لو ان هدانى الله -

بس على فكرة ... مش مطلوب تذكرة طيراااان خالص .. سواء للاماررات او غيرها من البلاد

نصيحتي لك لا تسترخص أبداً إذا كنت من القاهرة واركب إلى أبوظبي مباشرة، حتى ترتاح من هم التنقل بين مدن دولة لم تعرفها بعد..

انا ان شاء الله هاحجز على المصرية للطيران ... لانه طيران مباشر .....انا ناقص بهدلة ووجع دماغ

إذن عليك التركيز على ملابس الصيف.. وإن كنت تريد نصيحتي تعالى اشتري من هنا كل شيء، خصوصا الملابس.. جميلة وسعرها معقول، ربما أرخص من مصر، وتناسب الذوق العام في البلد..

باذن الله هاجيب معايا لبسى الصيفى فقط وكمان مش كل اللبس ..... ومع اول راتب بأذن الله ..... هاظبط نفسى بقى smk:

"]خامساً: نصيحة مهمة لك.. علّم إخوانك أو أخواتك أو والديك استخدام الانترنت الآن، إذا لم يكن لديهم خبرة في استخدامه.. لما تأتي إلا الإمارات إن شاء الله ستجد تكلفة الاتصالات الدولية باهظة وأفضل حل هو: الانترنت.. تكلمهم صوت وصورة يومياً إن أحببت..

هههههههههه .... ده انا عاملهم كورس مكثف لاستخدام السكاى بى و الهوتميل .... ماقولكش .... ابدااااااااااع art:)

يارب ييسر الحال ويقدم الى فيه الخير يارب

[mohamed abd el hamid]

بالنسبة لتصريح العمل بيتعمل في مكتب العمل ولا مكتب تصاريح العمل؟

لان في مكتب القوي العاملة ومكتب تصاريح العمل ولا هما الاثنين واحد؟

:egyflag:

بيتعمل من مكتب تصاريح العمل ... وليست القوى العاملة .... والااوراق المطلوبة:

1- صورة جواز السفر

2- صورة البطاقة الشخصية

3- عدد 3 صور شخصية 4*6

4- صورة الفيزا ألوان لكن لو ابيض واسود.... حرااااااااام - صباح الروتين الغبى -

بالنسبة لموضوع النت

الساعة في السيبر بكام؟

والشيء بالشيء يذكر

اسعار اللاب توب في الامارات الارخص ولا مصر؟

:egyflag:

انا مستنى حبيب قلبى عبيد الله يجاوب على السؤالين دول ... وانا كمان لسه قاعد بحضرله شويه اسئلة كده على كيف كيفك

استعدوا يا مغتربى الامارات لهذا السيل الجارف من الاسئلة :sad:

[د محمد]

السلام عليكم ورحمة الله وبركاته

اتصل بي من شوية واحد صاحبي من دبي

سافر يوم 2 فبراير الماضي

قبل ما يسافر راح يعمل تصريح العمل ودفع الفلوس

تاني يوم كانت المصالح الحكومية قفالة بسبب المظاهرات

وسافر من غيره

سألته عمل اية في المطار؟

قالي محدش طلبه مني لافي مصر ولا دبي

:egyflag:

[mohamed abd el hamid]

السلام عليكم ورحمة الله وبركاته

اتصل بي من شوية واحد صاحبي من دبي

سافر يوم 2 فبراير الماضي

قبل ما يسافر راح يعمل تصريح العمل ودفع الفلوس

تاني يوم كانت المصالح الحكومية قفالة بسبب المظاهرات

وسافر من غيره

سألته عمل اية في المطار؟

قالي محدش طلبه مني لافي مصر ولا دبي

:egyflag:

الراجل ده بيقول كلام زى الفل .... bv:-

على فكرة الكلام ده صح ... ومش بس فى الفترة دى علشان يعنى انفلات نسبى فى الامن وكده ..... لاه خالص

موضوع ان ماحدش بيسألك على تصريح العمل ده من زمان .... وحتى لو سألك ... ممكن اصلا تعمل حوار عليه

وتقوله ماكنتش اعرف ... وهو عمره ما هايمنعك من السفر .... اقصى حاجه لو هو حب يمشى رسمى .. هايمضيك

على اقرار بأن المرة الجايه يا شاطر ... ماتعملش كده تانى ... وتجيب التصريح الظريف معاك

وانت تقوله حاضر يا عمو .... وتمضى وتسافر بالسلامة

بس الواحد بيقول .... لو ممكن يطلعه من هنا ... ونخلص ... وبلاش حوارات وواحد يتحكم فيك وكده .. ليه ماعملوش

وكما قال الشاعر المجهول :P - امشى عدل .... يحتار عدوك فيك - :P

وتحيا مصر

[لماضة مصرية جدا]

السلام عليكم و رحمة الله و بركاته

النهاردة باذن الله الجالية المصرية بأبو ظبي منظمة الندوة التالية

بحطلكم الدعوة لو حد حابب

ندوة بأبوظبي حول دعم الاقتصاد المصري

المصدر: ابوظبي-البيان

التاريخ: 17 مارس 2011

تستضيف أبوظبي مساء غد الجمعة ندوة حول آليات دعم القدرات الاقتصادية المصرية بحث سبل وضع حلول واتخاذ اجراءات لتنشيط الاقتصاد المصري بعد الاحداث الاخيرة التي تعرضت لها مصر. ويشارك في الندوة التي تنظمها مجموعة الجالية المصرية في الامارات على موقع الفيس بوك بفندق هوليداي ان المستشار عبد الرحمن عبد الرؤوف المستشار التجاري المصري لدى الدولة ومحمد نصر عابدين الرئيس التنفيذي لبنك الاتحاد الوطني والمستشار الدكتور مجدي إبراهيم قاسم رئيس محكمة الاستئناف رئيس الهيئة العلمية لمعهد الدراسات القضائية بأبوظبي.

الجالية المصرية موفرة اتوبيس هيطلع من قدام ماركس آند سبنسر الساعة خمسة و الساعة خمسة و نص

صباح حضراتكم.....نور من الجنة

و نسألكم صالح الدعوات في اليوم المبارك ده

[لماضة مصرية جدا]

السلام عليكم و رحمة الله و بركاته

استاذنا الفاضل محمد

مبارك علي حضرتك الخطوة باذن الله و تكون في طريق طاعة و يكون ربنا ميسرها لحضرتك

هقول لحضرتك حاجة واحدة في حوار الشنط...هآخد فيها إيه و اعبيها ايه...و الهدوم و اللبس و كده

انت دلوقتي طالع من مصر

صلي كتير

ادعي ربنا ان الخطوة اللي جاية دي تكون فعلا خطوة تقربك من ربنا....متكونشي تقربك من الدنيا

حط في شنطتك سؤال واحد.....انا مسافر ليه؟؟؟ ايه الهدف بتاعي؟؟؟

مسافر عشان تكون نفسك

عشان تتفرج ع الدنيا

عشان تعيش حياة مختلفة

ايا ما يكون الهدف

اكتبه في ورقة

و حطه...في مكان...عشان في يوم راح تحتاجله

بعد ما تكتبه اخلص النية لله انه مهما يكون الهدف ده...لازم يكون لله

و اعقد النية انه كل خطوة فيه تكون خطوة "سعي في ارض الله الواسعة"

قول لنفسك...."اني مهاجر إلي الله"

يمكن هي هجرة مش زي ما احنا متعودين عليها

بس هتلاقي فيها معاني الهجرة كلها....هتسيب اهلك....ووطنك....و احساسك....و دنيتك اللي تعرفها كويس....و تقابل صنوف البشر...و هتتحط في كثير من المواقف

و مش هينفعك.....تصريح العمل....هينفعك.....جهادك مع نفسك.....و هينفعك يقينك انك ابتديت المشوار ده بنية صالحة و ربنا هيكون معاك في كل خطوة

ربنا ييسر لحضرتك كل خير و باذن الله تنضم لاسرتنا في ابو ظبي بالسلامة

حضرتك سالت علي موضوع تصريح العمل

و كل ما ينفتح الموضوع دوت احس اني لازم اقول

مالوش لازمة....بس لازم تعمله

عملته مع اني مش بشتغل اصلا في مصر.....عاطلة....عاطلة...عاطلة

عملته.....مع اني اصلا محدش بيعبرني في المطار و يقولي يا بنتي انتي بتشتغلي.....ايه....سووووووواقة..(وش ماري منيب)

عملته...مع اني عارفة و متاكدة انه اصلا غير قانوني

عملته....مع اني بقي مش عارفة فلوسه بتروح فين.....انا بنزل زي الهانم...اعمله و دمتم....و ان شاء الله لما تيجي ممكن تبقي تعمله من السفارة هنا...من غير اي تعب...الا اذا لو وحشتك طوابير مصر و كده يعني

عملناها مرة واحدة كنا عايزين نعرف اخبار الحياة....هتعرفها في مصر من مصدرين...يا طابور...يا تركب تاكسي

ربنا يوفق حضرتك......و تكون رحلة "الهجرة"....انسانية جدا و في طاعة الله

في امان الله

و ابقي ادعيلنا علي الطيارة

و متنساش دعاء السفر

باذن الله كده حضرتك هتكسب ان كل فعل و لا قول بعد كده في الغربة هيبقي يا رب في ميزان حسناتك

[عبيد الله]

.. السلام عليكم ورحمة الله وبركاته

أولاً بالنسبة للتصاريح

تصريح العمل 1-: التصريح بحد ذاته مطلوب لأسباب إجرائية في المطار، ومادية متمثلة في الرسوم التي يدفعها المغترب للحكومة المصرية قبل سفره.. أنا مثلاً سافرت أول مرة بدون تصريح ولم يطلبه أحد مني في المطار، ثم لما نزلت مصر استخرجت تصريح العمل في شهر أكتوبر 2010 حتى يوليو 2011، يعني 10 شهور تقريباً - لأنه يجدد كل سنة في ميعاد سفرك الأصلي - ودفعت 490 جنيه..

لست أدرى معاييرهم في هذا أو لماذا أصلاً هذا التصريح الذي لا مثيل له في العالم.. لكن ليست عندي أدنى مشكلة في ذلك طالما هي ضرائب لمصلحة البلد.. بس أتمنى مستقبلاً لو نجد تعامل آدمي من الموظفين ومقاعد (ولو بلاستك) في مكتب العمل نجلس عليها بدل من الوقوف في الطوابير 6 ساعات وأكثر!

أهميته: لو نسيت أو تجاهلت استخراج تصريح العمل؟ أنت وحظك في المطار.. بعض ضباط المطار يتساهلون والبعض الآخر يعاندون وربما تتعطل مصالحك.. الأفضل طبعاً هو استخراجه وكسب راحة البال..

2- التصريح الأمني: هذا يكون للشباب بالتحديد، وخصوصاً من لم يؤدي الخدمة العسكرية منهم، أو من هو حاصل على تأجيل 3 سنوات ولم تنتهي هذه المدة بعد.. لما تنتهي يجب الحصول على شهادة الإعفاء ثم الختم البيضاوي على جواز السفر..

أهميته: التصريح الأمني هذا شرط أساسي للسفر، حسب ما رأيت، وبدونه لن يُسمح للشاب بمغادرة البلد

[عبيد الله]

ثانياً: الاتصالات والانترنت في الإمارات، تحديداً أبوظبي

الانترنت أفضل وسيلة ممكنة للحديث مع الأهل بالصوت والصورة في أي وقت تريده.. وسعره معقول.. يعني أنا مثلاً في شقتي عندي اشتراك انترنت بسرعة 1 مجيابايت بـ 270 درهم تقريباً شهرياً.. وحالياً يوجد عرض بسرعة 8 ميجابيت بزيادة رمزية جداً عن المبلغ الذي أدفعه..

كل المسنجرات تعمل، باستثناء الصوت في "ياهو".. فهو معطل أتوماتيكياً (أيقونة الصوت غير مفعلة) من شركة اتصالات نفسها، وهي شركة حكومية مملوكة لهيئة الإمارات للاستثمار والمزود الرئيس للانترنت في الدولة.. قِيل لي السبب أنها وجدت الياهو منافس قوي وانخفضت أرباحها من الاتصالات الدولية بقوة.. بل إنها قامت بحظر موقع "سكايب" (بالمناسبة هذا هو نطقه الصحيح، وليس سكاي بي).. لكن يمكنك تحميل مسنجر سكايب من أي موقع داونلود واستخدامه..

بالنسبة لسعر ساعة الانترنت في السايبر أو مقهى الانترنت:

السعر يبدأ من 5 درهم للساعة ويزيد بزيادة رقي المنطقة أو أهمية المكان، لأني عندما كنت أذهب إلى مقاهي الانترنت رأيت أسعار مختلفة بين 10 و20 و30 وأكثر.. لكن المتوسط في غالبية الأماكن هو 10 درهم للساعة..

الأماكن التي توفر سعر ساعة بـ 5 درهم، تجد عندهم 70 أو 100 كمبيوتر وحولك أناس من كل الجنسيات تزعق بلغات لا تعرفها ويصعب عليك الراحة مع الأهل في الكلام.. بل إن الخصوصية منتهكة في غالب الأحوال وأنت لا تدري، خصوصاً إذا كان بجوارك عرب أو كان هناك البعض يقف خلفك ينتظر دوره.. فالـ 5 درهم للساعة لا تجدها إلا في أماكن معدودة وعليها زحام شديد..

______________________________________

ثالثاً: بالنسبة لأسعار الكمبيوتر العادي واللابتوب

الكمبيوتر العادي سعره رخيص جداً لأن لم يعد أحد يشتريه في الغالب.. وذلك بسبب اعتدال أسعار اللابتوب، وكونها أجهزة عملية وسهلة الحمل..

سعر اللابتوب يختلف باختلاف ماركته وإمكانياته لكن سعره بالتأكيد أرخص من مصر، وفيه عروض يومية.. أنا لما جئت إلى الإمارات اشتريت من أول راتب لابتوب "ديل" انسبايرون 1525تصنيع الاتحاد الأوروبي (بولندا تحديداً) وكان سعره وقتها 2500 درهم ومعه تقريباً كل الكماليات الأخرى.. زميلي اشتراه في مصر وقتها بـ 4000 آلاف جنيه تصنيع صيني.. يعني سعره هنا أرخص من سعره في مصر تقريباً بألف جنيه..

توجد لابتوبات مستعملة كثيرة ورخصية جداً، بل أغلبها في حالة ممتازة.. لكني شخصياً لا أحب المستعمل أبداً، ولا أرتاح نفسياً له، لست أدري لماذا..

منذ 6 أشهر اشتريت لابتوب "توشيبا" وندمت ندماً كبيراً.. من أردأ أنواع اللابتوبات في العالم، والكاميرا فيه سيئة سوء لا يوصف.. كاميرا "ديل" كانت نقية نقاء الكريستال.. فأنصحك بشراء "ديل" أو "إتش بي"، هما الآن الأفضل مقارنة بغيرهما..

_________________________

نصيحة مهمة: لأن الاستقرار في جو العمل، وتنظيم الحياة في السكن، ثم شراء لابتوب والاشتراك في الانترنت يأخذ وقتاً.. فستضطر حتماً لاستخدام الموبايل وتتكلف اتصالات دولية..

بما أن هذا شرٌ لابد منه، فعليك بفعل الآتي: أول ما تشتري خط اتصالات فور وصولك الإمارات، اتصل بـرقم 125 واتبع التعليمات الصوتية واشترك في خدمة الاتصال الدولي المخفض.. خدمة أكثر من رائعة كثير من الناس لا يعرفونها..

نظامها كالآتي: الاتصال بين الساعة 2-4 عصراً = تخفيض 30% على المكالمات.. الاتصال بين الساعة 9-12 مساءً تخفيض 30%.. بينما الاتصال بعد 12 (أي الساعة 10 مساءً في مصر) حتى 7 صباحاً ستأخذ تخفيض 60% مرة واحدة!

بالتوفيق

[د محمد]

شكرا عبيد الله علي الشرح المفصل

جزاك الله خيرا

:egyflag:

[د محمد]

عبيد الله معلش نسيت اسألك

بالنسبة للاتصال الدولي المخفض لشركتين المحمول

ولا شركة اتصالات بس؟

واية سعر الاتصال الدولي قبل التخفيض؟

واية اسعار خطوط المحمول النهاردة؟

معلش ان زودتها اوي

بس من عشمي

[Karim Elbaz]

السلام عليكم د محمد

بخصوص الاتصالات هنا الاسعار المخفضه لاي شبكه في مصر بما فيها التليفون الارضي واسعار الخطوط في حدود من 50 75 درهم على ما اتذكر وكمان فيها رصيد مجاني في حدود 25 درهم

ساعات التخفيض زي ما الاخ عبيد ذكرها

ان شاء الله تنور الامارات

بخصوص تصريح العمل ممكن يسألو عليه وممكن لا انت ونصيبك بس اللي انا اعرفه ان مش هترجمع من المطار بسببه يعني لو مش معاك عادي بس هتكتب اقرار

لكن تصريح السفر من القوات المسلحه لاااااااااازم ومش هتسافر من غيره لو مش معاك دا في حاله ان في جوازم مش مذكور فيه غير مطلوب للتجنيد

صحيح يا جماعه طيران العربيه بيطلع دلوقتي من ابوظبي مباشر على مطار برج العرب في الاسكندريه

[د محمد]

وعليكم السلام ورحمة الله وبركاته

كريم

جزاك الله خيرا

بالنسبة لتصريح العمل

لو مضيت اقرار في المطار لازم المرة الجاية اعمله

ولا كل مرة امضي اقرار وهكذا؟

شكرا بارك الله فيك

:egyflag:

[mohamed abd el hamid]

وعليكم السلام ورحمة الله وبركاته

كريم

جزاك الله خيرا:egyflag:

ممكن انا ارد ...!!!؟؟ ......... ولا لازم الاخ كريم .. :sad:

بالنسبة لتصريح العمل

لو مضيت اقرار في المطار لازم المرة الجاية اعمله

ولا كل مرة امضي اقرار وهكذا؟

شكرا بارك الله فيك

:egyflag:

يا دكتور محمد ... هذا اجراء روتينى بحت ... لا يتم تسجيله .. او ادراجه فى اى قاعده بيانات ... ولو سافرت 1000 مرة .. وفى كل مره تمضى اقرار ..... ولا فى الدماغ ........ art:)

smk: تحياتى smk:

[mohamed abd el hamid]

لو مضيت اقرار في المطار لازم المرة الجاية اعمله

ولا كل مرة امضي اقرار وهكذا؟

:egyflag:

ممكن طلب من اخوك يعنى ....!!!؟؟؟ :blush2:

لو تعرف تطلع تصريح العمل .... اعمله وخلص نفسك وامشى فى السليم :closedeyes: .... ونتبع كلنا القوانين والقواعد ونبطل نتحايل عليها

انا مش قصدى انت تحديدا يا دكتور محمد .... بس انا بتكلم على كل المصريين بما فيهم انا كمان

البلد بتتغير ......... ويارب احنا كمان نتغير ونغير عاداتنا الى اكتسبناها من 30 سنه ذل وقمع لحرياتنا وتجميد لعقولنا

ويارب بقى هما كمان يكونوا موضوعيين ... ويبطلوا الروتين الغبى ده ... ويكون الموضوع اكثر كفاءة :malta:

bv:- و تحيا ايجيبت bv:-

:egyflag:

[mohamed abd el hamid]

بمانسبة هذا اليوم التاريخى ..... احب اسأل اخوانا الى فى الغربة

انتوا عملتوا ايه فى الاستفتاء..!!!؟؟

اتعمل ليكم استفتاء فى القنصلية او السفاره يعنى ... ولا اتنفضلكم ...!!!؟؟؟

[mohamed abd el hamid]

بجد يوم عالمى وتاريخى .... انا اول مرة فى حياتى اروح لجنة انتخابية .... او اى حاجه يعنى اقول رأيى فيها

يوم جميل ... والمعنويات مرتفعة جداا .....

الفاتحة على روح الشهداء - المسلمين طبعا - الى كانوا ثمن لان نشهد مثل هذا اليوم ... ... وجميع موتى المسلمين .. بأن يدخلهم الله فسيح جناته.

[د محمد]

السلام عليكم ورحمة الله وبركاته

أخي mohamed abd el hamid

جزاك الله خيرا

ايه الاخبار ؟ وصلت لحد فين؟

ناويت علي السفر امتي؟

:egyflag: