مغتربي الإمارات

[mohamed abd el hamid]

mohamed abd el hamid

ازيك يا باشمهندس؟

اية الاخبار؟

والله الحمد لله يا دكتور .... ماشى الحال .. بس اخوك مش عارف يعمل ايه مع الأخوة الصعايدة - قصدى الهنود - .. اصل دول الصعايدة بتوع الامارات

لا انا عارف اكلمهم عربى ولا انجليزى .... ده تقريبا كمان الهندى مش بيفهموه !!!

اية موضوع الاقامة ده؟

في الطبيعي يتأخذ وقت ولا علشان الظروف الحالية؟

ياريت تكتب لنا اخبارك اول باول

موضوع الاقامة ده مالوش علاقة بالاوضاع الحالية .. التأخير من الشركة فى تقديم الاوراق وكده يعنى ... تقريبا كانوا بيجربونى ... وبيشاوروا عقلهم !!

بس الحمد لله الأوراق خلصت واتقدمت وفى انتظار ان يتم دق - وماحدش يفهمنى صح - الأقامة على الجواز

انا زميلي اللي إن شاء الله مسافرين معايا

اتصلوا بي وعايزنا نروح نسحب فلوسنا من مكتب التوظيف

بس انا مش مؤيد كده طالما التأخير والعطلة مش من عندهم

ولا انت اية رأيك؟

وإن شاء الله ربنا ييسرك أمورك سريعا

اصبر ... اصبر ... اصبر .... والكلام ده انا قولته ليك قبل كده

انا يا دكتور اخدت 4 شهور علشان الفيزا تتعمل .... وده كا فى ايام العز واكل الوز ..... مش فى الايام ال - تيييت - دى

وخليك ورا مكتب السفريات لحد مطار ابو ظبى - او دبى يعنى - .... وان شاء الله ربنا يكتبلك الخير فى اى مكان

واوعى تيجى ومانتقابلش .... هازعل بجد

وميغسى كتييييغ على سؤالك

فى حفظ الله

[mohamed abd el hamid]

ما فيش حد يجيب لنا خبر حلو عن تأشيرات الإمارات للمصريين

فى خبر حادق كده على الماشى :unsure: ... تحب عرفه ... ولا خلاص غسلت اسنانك بسيجنال مكافح النكد bv:-

[أبو عادل]

ما فيش حد يجيب لنا خبر حلو عن تأشيرات الإمارات للمصريين

فى خبر حادق كده على الماشى :unsure: ... تحب عرفه ... ولا خلاص غسلت اسنانك بسيجنال مكافح النكد bv:-

إيه ياد خفة الدم دى .

[انسانه]

السلام عليكم

انا اختكم مصريه وعندى شويه اسئله

انا وزوجى فكرنا اننا نجيب فيزتين سياحه للامارات وندور على شغل سوا هناك

ودا لظروف انه مينفعش يسيبنى ويروح هو الاول

انا بكالريوس هندسه معمارريه

وهو بكالريوس تجاره

عايزة اسأل كام سؤال من فضلكم وياريت حد يجاوبنى باستفاضه لانى محتاجه للاجابات دى

1- ايه افضل اماره ننزل عليها من حيث فرض الشغل للمؤهلات دى

2-وبالنسبه للسكن اذا كنا عايزين ناخد اوضه واحده بس بحمام انا وهو لمده الشهر الاول عشان ندور على شغل

هتتكلف كام

3- اذا انا لقيت شغل قبله او هو لقى شغل قبلي ينفع يطلعله فيزا مرافق ومصاريف الفيزا دى تكون علينا

4- اخر سؤال ممكن هو يشتغل اى حاجه تانيه غير محاسب باعتبار ان جواز السفر بتاعه مكتوب فيه محاسب

واعذرونى على الاطاله

شكرا جزيلا

[عادل أبو عمر]

السلام عليكم

انا اختكم مصريه وعندى شويه اسئله

انا وزوجى فكرنا اننا نجيب فيزتين سياحه للامارات وندور على شغل سوا هناك

السلام عليكم و رحمة الله و بركاته

خالص الدعوات لحضرتك و لزوج حضرتك بالتوفيق و البركة في الرزق

أرجو ان تسمحي لي بإبداء رأيي في الجزء الأول فقط وهو ان الأفضل لو كان لابد من السفر أن يكون السفر عن طريق عقد عمل حتى لا يتم المخاطرة بكل هذه التكاليف و المشقة النفسية لكما على احتمالات في الغالب ضعيفة و ليست معدومة فهذا شيء لا يعلمه إلا الله .

أعتقد إذا كانت احتمالات الحصول على عمل مناسب ضعيفة في السفر فهي في المقابل ستكون في مصر أحسن و أفضل

أرجوكي فكروا كويس مبلغ تكاليف السفرية دي ممكن تعيشكم في مصر كام شهر و لو ضغطوا نفسكم شوية ( مقابل شويتين تلاتة خمسة في الغربة ) أعتقد هذا المبلغ ممكن يكفي معاكم سنة في مصر أكيد خلالها بإذن الله انتم الاتنين أو حد منكم يكون لقى وظيفة مناسبة تكفي للتفكير في عدم السفر أو على الأقل للحصول على عقد عمل مناسب .

ربنا يوفقكم لكل خير

وتقبلي كل التحية و الاحترام

(مغترب في الإمارات)

[Rosea]

المعلومات اللى اقدر اقولها لحضرتك هى دى من غير مانا اقيم خطتك لان ميعرفش ظروفك و طموحاتك غيرك :

اولا:

الامارة اللى اعتقد عملي جدا تقعدى فيها و رخيصة و قريبه و فيها وسائل مواصلات لباقى الامارات هى الشارقة لانها 10 دقايق من دبى و فى نفس الوقت ارخص وفيها مواصلات لابوظبى و اعتقد امارات تانيه

ثانيا :

كل حاجة بتتعمل عن طريق الانترنت..كل حاجه من اول حجز الفنادق لحد البحث عن شغل لحد ايجار الشقق..انا قدمت على شغلى عن طريق الانترنت على ايجيريك و البحث عن فنادق او شقق للايجار برده موجود على المواقع بتاعة مبوبة خليج تايمز مثلا و وسيط الامارات و دوبيزل فممكن حضرتك تعرفى هتاجرى فين من وانت فى مصر و تعرفى مكانه على الخريطة جنب محطات الاتوبيسات ولا لا و الشقه اللى بتقولى عليها اسمها استوديو

ثالثا :

اعتقد انه ممكن طبعا ان الفيزا بتاعته تتغير عليكى او العكس...يعنى انا شفتها و معملتهاش

رابعا:

ميمنعش بردهلغاية ما تيجى تقدمى فى مكاتب التمثيل اللى فى مصر لان اللى لاحظته ان انا مثلا عمالة ادور على شغل فى الحكومه و هما نزلوا عملوا لجنه فى مصر...زمايلى كانوا بيدوروا فى السعوديه و دكتور سعودى قالى احنا نزلنا مصر و دورنا و معرفناش نلاقى العدد اللى عايزينه..لان الناس بتدور بالجنسيات هنا فاسهل يروحوا يجيبوهم من بلدهم عشان بيبقى ارخص

خامسا :

مادام هيبقى فى تحرك كتير فمنصحكيش بالتاكسى...جد فيكوا يعمل رخصة دوليه و يبص على قواعد المرور هنا بصة مفصلة على موقع هيئة الطرق و المواصلات دبى ...و اجروا عربيه لان الايجار للشهر ممكن يبقى ارخص من التاكسيات ...الحل التانى المترو فى دبى و الاتوبيسات فى كم امارة تانيين بس فى امارات مفيهاش حتى اتوبيسات

بس و ربنا يوفقك

[Rosea]

اه نسيت و موضوع شغلانته فى الباسبور ميفرقش خالص

[hany ashour]

السلام عليكم

احب اسلم على كل المصريين الموجودين فى الامارات وكمان اللى لسة موجودين فى مصر ومستنيين التاشيرة زيى كدا

مبسوط اوى انى هكون فى تواصل مع ولاد بلدى اللى فى الغربة لانى من دلوقتى محتاج اتكلم معاكم واخد رايكم فى حاجات كتيرة .. بم انى هكون موجود انا كمان فى الامارات قريب

احب اعرفكم بنفسى الاول

انا هانى .. 22 سنة .. بكالوريوس سياحة وفنادق .. ظيفتى هى مساعد مدير مطعم وجبات سريعة .. مش عارف انا هكون موجود فى امارة ايه .. بس هعرفكم اكيد اول اما اعرف

اتمنى يكون فيه حد موجود هنا شغال ف نفس المجال

طبعا انا زيى زى مصريين كتير .. فكرة انتقالى من مصر الى الامارات مرتبطة بفكرة التاشيرات الموقوفة للمصريين حاليا.. بس اتمنى طبعا انها قريب تتحل سواء بزيارة د.عصام شرف او باى وسيلة

اللى يحب يقولى حاجة كدا فى الاول .. سواء نصيحة او حكمة او مبدا هو ماشى بيه او باى حاجة يتفضل يقولها طبعا

ولكم التحية

[نوران]

السلام عليكم جميعا

سعيده بانضمامي اليكم وعندي سؤال عن فرصة عمل لاخي بالامارات

لخريج حقوق حديث بمرتب 4500 درهم والشركه عليها السكن والمواصلات والتامين والطيران

فهل ده عرض كويس؟

هو حاليا شغال في مصر فى شركه قطاع خاص بمرتب حوالي 1500 جنيه وطالع عينه

وهو متزوج وعنده بنتين فهل يسافر وللا الموضوع مش جايب همه يفضل في مصر احسن؟

وهل ممكن لو سافر يعمل استقدام لاسرته وللا لا؟ويا تري ساعتها المرتب كله هيتصرف علي الاكل والشرب والملابس وللا ممكن يحوش منه حاجه؟

وسؤال اخير ايه حكاية المشاكل فى تاشيرات الامارات ؟

وشكرا جزيلا ارجو منكم الرد والافاده

جزاكم الله خيرا

[أبو العز]

السلام عليكم جميعا

سعيده بانضمامي اليكم وعندي سؤال عن فرصة عمل لاخي بالامارات

لخريج حقوق حديث بمرتب 4500 درهم والشركه عليها السكن والمواصلات والتامين والطيران

فهل ده عرض كويس؟

هو حاليا شغال في مصر فى شركه قطاع خاص بمرتب حوالي 1500 جنيه وطالع عينه

وهو متزوج وعنده بنتين فهل يسافر وللا الموضوع مش جايب همه يفضل في مصر احسن؟

وهل ممكن لو سافر يعمل استقدام لاسرته وللا لا؟ويا تري ساعتها المرتب كله هيتصرف علي الاكل والشرب والملابس وللا ممكن يحوش منه حاجه؟

وسؤال اخير ايه حكاية المشاكل فى تاشيرات الامارات ؟

وشكرا جزيلا ارجو منكم الرد والافاده

جزاكم الله خيرا

الأستاذة نوران

اعتقد الوظيفة لاخيك بالراتب المذكور مش بطال وخاصة مع توافر السكن والمواصلات على حساب الشركة ولابد ان يكون ذلك مذكور صراحة فى العقد وخصوصا انك كما ذكرتى انه حديث التخرج وخبرته ليست كبيرة

لكن انا لى رأى شخصى اذا كان يحصل على راتب 1500 جنيه فى مصر ليه يفكر فى السفر من اساسه وخاصة انه ممكن مايقدرش يدخر مثل ذلك المبلع هنا

واذا كان كما تفضلتى انه حديث التخرج وراتبه 1500 جنيه معناه ان يعمل فى مؤسسة محترمة وله مستقبل باهر فيها كما وان راتبه ممكن يتضاعف فى فترة قصيرة ويترقى فى المناصب بعكس لو سافر بره مصر ففرصته فى الترقية تكاد تكون شبه منعدمه

استخيروا الله والقرار لكم اولا واخيرا

تحياتى

[د محمد]

أبو العز

السلام عليكم

فينك مش باين من زمان لية؟

تصور ان التأشيرة من اول ديسمبر لحد دلوقتي لسه ماجتش؟

والمكتب مش عارف اي حاجة خالص

لدرجة بعض الاطباء سحبوا فلوسهم الاسبوع اللي فات

في 4 اطباء معهم دكتوارة سافروا يوم الثلاثاء الماضي

بس هم وضع مختلف لان شغلهم في ديوان وزارة البيئة والمياة

لكن احنا في شركة توظيف في ابوظبي وسيط بينا وبين الوزارة

حتي انا راسلت واحد من الاطباء اللي سافروا يوم الخميس

وقالي محدش في الوزارة يعرف حاجة عنا

وقالي عيسأل تاني النهاردة ويكلمني

[أبو العز]

أبو العز

السلام عليكم

فينك مش باين من زمان لية؟

تصور ان التأشيرة من اول ديسمبر لحد دلوقتي لسه ماجتش؟

والمكتب مش عارف اي حاجة خالص

لدرجة بعض الاطباء سحبوا فلوسهم الاسبوع اللي فات

في 4 اطباء معهم دكتوارة سافروا يوم الثلاثاء الماضي

بس هم وضع مختلف لان شغلهم في ديوان وزارة البيئة والمياة

لكن احنا في شركة توظيف في ابوظبي وسيط بينا وبين الوزارة

حتي انا راسلت واحد من الاطباء اللي سافروا يوم الخميس

وقالي محدش في الوزارة يعرف حاجة عنا

وقالي عيسأل تاني النهاردة ويكلمني

د محمد

أسف على الغياب كان عندى ظروف اخى الاكبر توفاه الله ومررنا بظروف صعبة شوية

بالنسبة للتاشيرات على حد علمى كانت متوقفة شوية ولكن الامور عادية الان وده امر طبيعى

ولكن الغير طبيعى ان تتاخر تاشيرتك من ديسمبر للان اعتقد العيب فى المؤسسة اللى انت رايح عليها تابع مع مكتب التوظيف او اسحب فلوسك التاشيرة هنا مابتاخدش يومين مش زى السعودية

بالتوفيق باذن الله

[د محمد]

أبو العز

البقاء لله

جزاك الله خيرا

[نوران]

السلام عليكم

استاد ابوالعز البقاء لله

جزاكم الله خيرا على الرد ان شاء الله نستخير

اسال لكم الله الصبر وللمتوفى الرحمة والمغفرة

[hany ashour]

استاذ ابو العز

البقاء لله

وعسى ان تكرهو شيئا وقد جعل الله لكم فيه خيرا كثيرا

[عادل أبو عمر]

الأخ الفاضل أبو العز

البقاء لله

ربنا يغفر له و يرحمه و يجعل مثواه الجنة في الفردوس الأعلى بإذن الله

و ندعو الله أن يعفو عنا و يحسن ختامنا جميعا برحمته

[walid tawfik]

السلام عليكم ياشباب

انا وليد من مصر من اسكندرية

انا بشتغل فى بنك رأس الخيمة الوطنى

يجماعة اللى حابب يأخد قرض شخصى ويكون مهتم بالموضوع انا فى الخدمة

رقمى للتواصل

0567052577 - 042139160

[hany ashour]

ايه يا جماعة الصحرا دى ؟؟؟؟

وحدووووووه

على العموم انا حابب بس اقول لكل اللى عنده مشكلة فى تاخير تاشيرته للامارات اننا عملنا جروب على الفيس بنحاول نجمع كل اللى تاشيراتهم واقفة عشان لو هنقوم باى اجراء يبقو معانا

واحنا جبنا تليفون مكتب د.عصام شرف وهنحاول ناخد ميعاد ونقابله

ياريت كل اللى عنده مشكلة يشرفنا فى الجروب

ودا اللينك بتاعه

http://www.facebook.com/pages/%D9%86%D8%B1%D9%8A%D8%AF-%D8%AD%D9%84-%D9%84%D9%88%D9%82%D9%81-%D8%AA%D8%A7%D8%B4%D9%8A%D8%B1%D8%A7%D8%AA-%D8%A7%D9%84%D9%85%D8%B5%D8%B1%D9%8A%D9%8A%D9%86-%D8%A8%D8%A7%D9%84%D8%A7%D9%85%D8%A7%D8%B1%D8%A7%D8%AA/208877822484584

[نوران]

السلام عليكم

تسجيل متابعه

اين انتم يا معشر المغتربين :blink:

يا رب الكل يكون بخير

[رباب مغربي]

ازيك و يا رب تتحل المشكله زي ما بتقول فعلا بس أول نصيحهأقولهالك اوعي تسيب شغلك في مصر غير لما تيجي هنا و تتأكد من انك أكيد هتستمر هنا و ده طبعا لوينفع انك تفضل علي ذمة الشغل في مصر.

والله مش عايزه ازهقك بس الواضح يا هاني يا أخويا ان المشكله مش هتتحل و ان كانت اقصي المشاكل في إمارة ابو ظبي يليها الشارقه و عجمان ثم باقي الإمارات الشماليه لكن الحمد لله الموضوع تمام لغاية دلوقتي في دبي.

كمان لازم جدا تعرف مرتبك هيكون كام و اوعي و حاسب حاسب حااااااااسب من انك تحسبه بالمصري يبقي كام لأن المشكله هنا أكبر من كده يعني لازم تعرف السكن عليك و لا عليهم الكهرباء المواصلات و لا هتكون مضطر تشتري سياره و ده معناه انك هتقعد مده طوييييله علي ما تاخد الرخصه لأن القوانين هنا مش زي مصر خالص يا معلم.

بص أنا هنا بقالي 6 سنيين و تحت أمرك و أمر أي واحده وواحد من أخواتي المصريين في أي س}ال و حتي لو إجابته مش عندي هفضل وراه لما اجيبلكم إجابته من حد موثوق فيه

تم تعديل 11 يونيو 2011 بواسطة رباب مغربي