اسكندريه الى بجد الوجه الاخر للسكندريه

[القرموطى]

فسحه فى الاسكندريه

الوجه الاخر للاسكندريه

يمكن اول ما الواحد بيقول فسحه فى اسكندريه الناس هتقول على طول المعموره وبيانكى والمنتزه

انا هنا بقص الوجه الاخر لاسكندريه الوجه الحقيقى الجميل مش الوجه المليان بمساحيق التجميل وان كان ده برده لا يعنى ان هذه المناطق سيئه او قبيحه

انا هنا هتكلم على اسكندريه الحقيقيه واسكندريه القديمه وبعض الاحياء التى لم تذكر فى اى من الاعمال الدراميه او لم يتناولها اى احد فى اى موضوع من المواضيع

نبداوء من جوه

من كرموز

الحى الجميل الزحمه الى الناس فى كل شارع عارفه بعضها كويس اوى الى ظهرت فيه مصطلح ابن الحته وابن الحته هنا معناها ان كلنا اخوات لام واحده وهى المنطقه الى سكنين فيها كلنا هنا عائله كبيره والموضوع وصل لدرجه كبيره جدا من الترابط بين اهل المكان ده الناس كلها اصبحت عائله واحده فى الفرح والحزن والحلو والمر .....

لو نمشى هنلاقى الترام الصفره البطئه المليانه ذكريات جميله لطلبه الثنوى والاعدادى وللناس ال كانت تركبه كل يوم عشان يرحوا الجمرك

وعلى شريط الترام هتلاقى قهوه ابو دومه اكبر قهوه فيكى يا كرومز ملتقى الناس كلها طلبه ومعلمين ومثقفين وعامه هى دى المنتدى الاجتماعى للناس هنا فى كرموز ونمش شويه نروح على شارع ايزيس كله مبانى قديمه بس جميله وكله محلات قديمه اوى وحتى هتلاقى فيها بتارين قديمه وهتلاقى محلات كتير فيها اليفط بتاعتها مكتوبه بحروف من الخشب ولو رجعنا تانى لشريط الترام هنلاقى ساعه القماش المنطقه المشهوره ببيع القماش وكل انواع المنسوجات الصبح تلاقيها زحمه بطريقه فظيعه وباليل تلاقيها جميله جدا وهاديه اوى ....ولو مشينا دام شويه وسيبنا كرموز هنلاقى نفسها قربنا ندخل على منطقه

سوق العصافير /الطيور

المنطقه دى يوم الجمعه من الساعه 7 لصبح لحد 5 العصر بتكون عباره عن حيقه حيوان غريبه وجميله ومنتهى الروعه هتلاقى هنا كل انواع الحيوانات وكل انواع الغيات

الى هاوى نسور وحمام وعصافير بيربى ويبيع ويشترى ويبادل

الى هاوى كلاب بانواعها يروح يشترى ويبيع ويتاجر

الى غاو سمك وفرس النبى واكل عصافير

حتى الى غاوى تعابين وسحالف وتماسيح هيلاقى الى هوه عوزه منطقه غايه فى الروعه جدا جميله ولو دخلت هناك هتلاقى كل واى شىء ممكن تربيه او اى غيه او هوايه ...شفتوا كنا هننسى الحمام

اكبر هوايه عند شعب اسكندريه تربيه الحمام بأنواعه الشراب والشقلباظ وزى ما انته عاوز قول يا معلم

فى ناس بتيجى مخصوص من ليبيا عشان يشتروا من هناك حماك غيه

وبعد كد ندخل على سوق الجمعه

برده من بعد الصلاه تلاقى المنطقه دى زحمه جدا بس يترى هو ايه الى بيتباع هناك عشان تبقى زحمه كده

المنطقه دى يا سيدى منطقه لبيع كل ما هو قديم ومستعمل بدايه من الهدوم القيمه لحد الاجهزه الكهربائيه والعفش والخشب وكل واى حاجه ممكن تتصورها او لا تتصورها يعنى هتلاقى هناك اوقات صفقات مربحه جدا وااوقات هتروح هتلاقى ان المشوار كله جه على الفاضى بس من الاخر هو مغامره جميله لازم تجربها عشان تعرف ابيه فيها

وبعد كده نمشى مع بعض ...لاء مش هنمشى عشان المسافه كبيره

هنروحوا بحرى

اسكندريه الى بجد بدات من هناك من بحرى والسياله وراس التين الشباب الجدعان الى البحر صحبهم ورفيق مشوارهم وكمان البحر شغلتهم تلاقيه فى الشتا طالب فى الكليه وفى الصيف ينزل يغطس على بلح البحر عشان يجيب فلوس يعمل ايه بيحيب البحر ومش عارف يسيبه

الناس هناك تيمه تانيه خالص الجدعنه الاسكندرانى والموده والحب واللسان الى مش ساهل الناس هناك لمضه ولسنها بينقط عسل وبيعرف يقلب اى شىء لنكته

الناس هناك بتحب بعض اوى والفرح هناك بيبقى فرح والزفه زفه والحنه حنه وهنيجى فى وقت تانى نتكلموا على الزفه بتعتنا عماله ازاى

المهم نمشى شويه لحد ما نوصلوا لحلقه السمك بتاعت بحرى .....وهنشم ريحه سمك ,لاء مش الريحه الزفره الريحه الجميله بتاعت السمك الطازه ريحه الفسفور والسمك الى على كل نوع وكل شكل هتشوف هناك عالم البحار

مياس على محرات ومكرونه وانش وبورى وبطاطا وجمبرى وكبوريا واستاكوزه وحتى المحار والجلاجوله هتلاقيها هناك حتى تعابين السمك برده هناك

ونمشى شويه لحد ما نروح شارع فرنسا وقبل ما ندخل على هناك هنروح نقعد على قهوه فاروق اشهر قهوه فى العب ده كله والناس هناك تتنافس مع بعض مين قعد على القهوه دى الاول

القهوه دى مصدر تاريخى مهم للاسكندريه تقعد هناك هتلاقى ناس كانت من عهد الملك وتحكيلك على اسكندريه وتقعه هناك تلاقى عيال امبارح وبرده كلهم اشتركوا فى شىء واحد ...قهوه فاروق وممكن تلاقى راجل عنده 60 سنه بيلعب طوله مع شاب عنده 20 سنه وبيحكوا لبعض على الذكريات واد ايه كانت حلوه اسكندريه

وندخل على شارع فرنسا يعنى سوق الموبليا الى مفيش زيه الى انته عوزه هتلاقيه غالى رخيص حلو وحش هتلاقيه يا معلم متحولش دا انته هنا فى ابو الاسواق

وحتى ول عاوز قماش هتلاقيه انته بس ادخل ودور ودعبس وشوف انته عاوز ايه وهتلاقى الى انته عوزه

بصراحه انا تعبت وعاوز اخد واحد زبادى خلاط على قهوه فارق معلش ممكن يا جماعه اسيبكوا هنا واريح شويه ونكمل بعدين

[lonly in cold night]

يا سلام على جمال دى رحله

انا قضيت نص عمرى فى الاسكندريه

كان لينا شقه فى الاسكندريه

من وانا عندى 7 سنين يا دوب اخر يوم فى الامتحانات يفوت علا عمى فى المدرسه و نطلع على الاسكندريه

يا دوب ارجع يوم الخميس اللى قبل الدراسه علشان اشترى لبس المدرسه اللى حتبتدي يوم الاتنين

و لحد النهارده باعشق الاسكندريه و خاصة فى الشتا لما بتبقى بتاعة اهلها

ساعتها بتشوف الاسكنرانيه على حق

بتشوف الروح الحلوة و بتشوف الطيبه

حتى العركة عندهم ممكن تنفض لو جه كبير الحته و قال بس يا واد منك ليه احنا حانتعاركو مع بعض ولا ايه

الشباب بيسمع كلام الكبار و يعملولهم الف حساب كمل يا ريحة الحبايب

[inas]

اسكندريه دي اجمل حته بحسها في مصر ليها مكانه كبيره عندي يا جمالها في الشتا ودي حبت صور ليكي يا اسكندريه

يارب تعجبكم

[shazly]

و دى صور جميلة جدا لإسكندرية القديمة بروحها و ناسها و مبانيها

http://www.shazly.net/topic.php?t=130

http://www.shazly.net/topic.php?t=101

[واحد تاني]

استاذ القرموطي ...

انت صاحبي ... وحبيبي ... وكفاءة -_-

عجبني موضوعك وهساعد معاك بالرسومات التوضيحية :happy: ...

تحياتي ,,,

الحى الجميل الزحمه الى الناس فى كل شارع عارفه بعضها كويس اوى الى ظهرت فيه مصطلح ابن الحته ...

وابن الحته هنا معناها ان كلنا اخوات لام واحده وهى المنطقه الى سكنين فيها كلنا هنا عائله كبيره والموضوع وصل لدرجه كبيره جدا من الترابط بين اهل المكان ده الناس كلها اصبحت عائله واحده فى الفرح والحزن والحلو والمر .....

لو نمشى هنلاقى الترام الصفره البطئه المليانه ذكريات جميله لطلبه الثنوى والاعدادى وللناس ال كانت تركبه كل يوم عشان يرحوا الجمرك

مبانى قديمه بس جميله وكله محلات قديمه اوى وحتى هتلاقى فيها بتارين قديمه وهتلاقى محلات كتير فيها اليفط بتاعتها مكتوبه بحروف من الخشب

هنلاقى ساعه القماش المنطقه المشهوره ببيع القماش وكل انواع المنسوجات الصبح تلاقيها زحمه بطريقه فظيعه وباليل تلاقيها جميله جدا وهاديه اوى

ولو مشينا دام شويه وسيبنا كرموز هنلاقى نفسها قربنا ندخل على منطقه سوق العصافير /الطيور

يتبع

[واحد تاني]

المنطقه دى يوم الجمعه من الساعه 7 لصبح لحد 5 العصر بتكون عباره عن حيقه حيوان غريبه وجميله ومنتهى الروعه هتلاقى هنا كل انواع الحيوانات وكل انواع الغيات

الى هاوى نسور وحمام وعصافير بيربى ويبيع ويشترى ويبادل

الى هاوى كلاب بانواعها يروح يشترى ويبيع ويتاجر

الى غاو سمك وفرس النبى واكل عصافير

حتى الى غاوى تعابين وسحالف وتماسيح هيلاقى الى هوه عوزه منطقه غايه فى الروعه جدا جميله ولو دخلت هناك هتلاقى كل واى شىء ممكن تربيه او اى غيه او هوايه ...

شفتوا كنا هننسى الحمام

وبعد كد ندخل على سوق الجمعه

برده من بعد الصلاه تلاقى المنطقه دى زحمه جدا بس يترى هو ايه الى بيتباع هناك عشان تبقى زحمه كده

المنطقه دى يا سيدى منطقه لبيع كل ما هو قديم ومستعمل

بدايه من الهدوم القيمه لحد الاجهزه الكهربائيه والعفش والخشب وكل واى حاجه ممكن تتصورها او لا تتصورها يعنى هتلاقى هناك اوقات صفقات مربحه جدا وااوقات هتروح هتلاقى ان المشوار كله جه على الفاضى بس من الاخر هو مغامره جميله لازم تجربها عشان تعرف ابيه فيها

يتبع

[واحد تاني]

هنروحوا بحرى

[nancy]

وحشانى يا اسكندريه .. نفسى امشى على البحر فى الشتاء :happy:

[القرموطى]

Pاخى الفاضلو احد تانى الف شكر على انك دعمت الموضوع بالصور بجد انته كده عملت له بوح وخليته فعلا موضوع تشوف اسكندريه وانته بتقراه

وابصراحه انا مكنت هكمل الموضوع بس انته شجعتنى انى اكمله وان شاء الله هناخدوا اسكندريه فوقانى تحتانى يعنى لحد ما نوصولوا لابو قير

و ومره تانيه بشكرك على الصور وبشكر اخى العزيز وحيد فى ليله ساقعه ربنا يدفيه ويخليله عياله الامامير دول

والى ان نلتقى فى باقى الموضوع سلام

ال

[نانو]

واحد تاني بيك

انت رائع

ازاي عملت كده

زي ما تكون اخدت كاميرتك الخاصه و نزلت لفيت حته حته ورا كلام القرموطي

تسلم ايديكم..

قلبتوا علينا المواجع

و بيني وبينك المواجع مش ناقصه من كل ناحيه

اقبل تحياتي و اعجابي الشديدين

القرموطي كلامك جميل جدا.... كمل....و روح بقه شويه كده علي جليم خلينا نفتكر

[القرموطى]

وصلنا لحد شارع فرنسا وانا كنت تعبت منكم وريحنا شويه فى قهوه فاروق

وبعد كده تعالوا نروح الاول نصلوا الضهر فى.......

سيدى المرسى

الجامع الكبير الى واسع اوى لدرجه انك تتوه جواه سيبك من المقام ولا الى جواه اتفرج معايا على التراث والفن الاسلامى الجميل والمسجد الوسع اوى الى سقفه فووووق وفيه فى النص نجفه طوووويله اوى والناس الكبيره الى على المعاش تفضل هناك من بعد العصريه لحد ما يصلوا العشا يفضلوا يتكلموا مع بعض ويحكوا ويشوفوا ويتفرجوا ول حد هنا شاف الجامع ده منا كام سنه يعنى بتاع 18 سنه كده ولا حاجه كان فى راجل عجوز جوه المسجد كان شايل قربه ميه عليها مرود وكا يلف عشان يشرب الناس بس كان راجل طيب عجوز ووشه ابيض منور والميه من فربته كانت حلوه زى الشهد

الله يرحمه ويسقيه من شهد الجنه

المهم نطلعوا

..................... على سوق الفضه

بعد كده شارع مش واسع اوى بس من فين ما تبص هتلاقى محلات فضه وساغه وزى ما انته عاوز تقول قول الفن والجمال والشكل الحلو اتفرج بس وبلاش تشترى هتتبسط من الى انته شايفه وهنمشى مع بعض لحد ما نوصلوا لنهايه الشارع ده هلاقى روحنا فى المنشيه......

على يمينك زنقه الستات

شارع ضيق جدا يمكن عرضه حوالى متر او نص متر بس الى جواه .......جواه يمكن حوالى 100 محل كلها لاوزم حريمى من هدوم وخيوط واكسسوارات والازى منه الى غاوى يروح يتفرج هناك

وهنطلع من سوق زنقه الستات هنلاقى عندنا اربع اتجاهات لو مشيت يمين طوالى

هتلاقى نفسك رايح تانى على كرموز وبوابه 6 سوق الجزارين والسمكريه وهتلاقى هناك مصانع البسطرمه ولو بصيت كويس وانته ماشى هتلاقى بيوت اديمه اوى اوى اوى ومحلات عتيقه جدا هتخدك 100 سنه لورا وهشوف الجمال والحلاوه رغم ان لبيوت اديمه اوى بس حلوه اوى

ولو مشيت طوالى هتلاقى نفسك رايح الميدان وهناك هتلاقى سوق كبير فيه كل حاجه كله بياعه سريحه بيبيعوا من اول البنسه والابره لحد الدولار الامريكانى واليورو الاوربى وحدث ولا حرج انته فى المنشيه

بس نصيحه اوعى تتشاكل مع حد هناك الناس هناك جدعان اوى مع بعض ولو حد من اخر السوق عرف ان الواد حمو الى فى اول السوق بيتعارك هتلاقيه جه بسرعه عشان يجامل وعشان يحامى عن صحبه فخاف على نفسك يا حلو

المهم تعالوا نكملوا مشورانا ونروحوا لحد.......

الدلوعه بنت الاكابر محطه الرمل

ياه ياه يا جدعان ايه الحلاوه دى بيوت قديمه بس عظيمه عاليه وواسعه ونظيفه والمحلات الفخمه والناس الشيك هى دى قلب اسكندريه زمان سكنوها اليونان والارمن وكانت هى دى مقر الناس الجامده والموظفين بتوع بورصه القطن والمينا والناس الا فرانكا بجد.

هتلاقى هناك السينيمات ونادى اللوتارى (النادى السورى زى ما بنسموه احنا ) وهتلاقى هناك كنيسه دبانه ومعبد اليهود برده هلاقيه هناك وكما هتلاقى هناك جامع القائد ابراهيم اشهر جامع فيكى يا منطقه والى شهره مش انه جامع كبير ولا انه فى حته جامده لا الى شهره الشيخ احمد المحلاوى الله يطول عمره ده راجل اطنه على خير ولا يخاف فى الله لومه لائم بيحارب من فوق المنبر وبيقول للظالم انته ظالم فى وشه وميعرفش يجامل ويوم صلاه الجمعه تلاقى الجامع مليان ناس من اول الساعه 10 الصبح ما انته لازم تلحق لك مكان هناك عشان تعرف تقعد جوه مش بره فى الشمس يا حلو

طيب ماتيجوا نمشوا شويه ادام لحد ما نوصل لكليه الطيب

او مجمع الطب وده فيه مستشفى الميرى وكليه طب واسنان وصيدله وبشرى وهتلاقى هناك بلاطى طالعه وبلاطى داخله ناس شمال وناس يمين شباب زى الورد شكلهم يفرح القلب الحزين وطبعا حولين الجامعه دى تلاقى عشوميت محل بيبيع لوزم كليه الطب والصيدله انا فاكر كنا نروح هناك نجيب ورق عباد الشمس ...(الليتمس بيبر ) والسحاحه ....والمشارط وكنا نروح نتبضع زى ما الوحده من دول تروح كرفور اول الشهر كنا احنا نروح نتبضع اسبوعيا نجيب مشارط وسحاحات وبيكر وبروسولا وحاجات كتير نرح هناك عشان نفضى جيوبنا بس مش اكتر

المهم تعالوا نمد عشان الوقت اتأخر

الله احنا فين

دا احنا فى شارع سوتر .....

ودى قمه الرقى ايام زمان يسكن فيها الناس الجامده وعيال البشوات وولاد الاكابر على البحر على طول ادامك سرك كوته القديم وشايف البحر ادامك ومجمع كليات نظرى على شمالك والمكتبه اهه ادام عنيك يا عم ايه النعيم ده ....والى كان يسكن هناك كان معروف من عليه القوم يا جماعه بس سيبك انته ساعه المغربيه نطلع نقعد على البحر هناك ادام شارع سوتر البحر الى هو صاحب كل الاسكندرانيه الحته دى بالذات الى هى ادام سوتر حته ليها سحر عجيب تبص للبحر ومن غير ما تحس تلاقى نفسك عاوز

بتعيط .....ايوه تعيط وبتخرج كل الى جواك من غير ما تحس حته فعلا غريبه اوى وتلاقى هناك الموجه الكبيره تتكسر على صخره صغيره وتعرف وقتها ان مهما كان الى جواك من حزن ومشكال كبيره اوى هتتكسر على صخره الفرج وكنا نقوم من الحته دى بعد ما نكون خلاص اتخلصنا من كل المشاكل والمتاعب الى احان فيها يعنى تقدر تقول كده عملنا غسيل هموم

المهم تعالوا نتمشوا لحد جنينه الشلالات ....دى مش بعيده دى فى اخر الشارع اهه

جنينه كبيره اوى اوى ودى حكايتها حكايه يا عم

دى ملتقى للحبيبه الغلابه ....وملعب للشباب الى عوزين يتدربوا سواء كوره ولا كنج فو والى عاوز يصطاد عصافير برده بيجى هنا والى عاوز يفضفض ومخوق برده بيجى هنا يتكلم ويخرج الى جواه يا جماعه بجد دى دنيا تانيه كله كوم الشجر الى هناك كوم تانى شجر كبير وقدبم اوى يعنى الشجره من دول عمرها اطول من عمر جد جدى الله يرحمه يعنى يا جماعه الشجره دى ممكن تكون شهدت على جدك وهومزوغ من المدرسه ولا وهو بيعاكس يعنى عرفه فضايح اناس كلها بس من رحمه ربنا ان الشجر مش بيعرف يتكلم .........

وبعد ما نخرج من جنينه الشلالات هنلاقى نفسنا فى ارقى حته فى اسكندريه

وابور الميه ........

هدوؤ وجمال ونظافه متقلش بس مين الى يعرف يجيب مليون عشان يعرف يسكن هناك يا جماعه بس مجرد شكل المكان هناك حاجه تفرح ....بقول ايه انا تعبت وعاوز اريح شويه انا هروح اريح شويه فى جنينه الشلالات وانتوا برده خدوا نفسكوا وان شاء الله نكملوا بعدين سلام

[اسود وتعالب وارنب]

ايه ياعم القرموطي الحاجات الجميلة دي بتقلب علينا المواجع والحاجات الحلوة بتاعه زمان ليه كده والنبي لفه علي محرم بيه الله يكرمك وبعدين نبؤ نروحا بقي علي منطقة المصيف من أول جليم مرور بسيدي بشر وميامي العصافرة المندرة وابوقير والحر الميت الله يكرمك ومتنساش عصير المنجه

[واحد تاني]

Pاخى الفاضلو احد تانى الف شكر على انك دعمت الموضوع بالصور

العفو يافندم

الشكر لك انت على موضوعك الجميل ده...

وانا بكرة انشاءالله هكمل معاك الرحلة...

واحد تاني بيك

انت رائع

ازاي عملت كده

زي ما تكون اخدت كاميرتك الخاصه و نزلت لفيت حته حته ورا كلام القرموطي

تسلم ايديكم..

قلبتوا علينا المواجع

و بيني وبينك المواجع مش ناقصه من كل ناحيه

اقبل تحياتي و اعجابي الشديدين

نانو هانم رون بولانك

انت اروع ... :sad:

خالص تحياتي واحترامي ...

كمل....و روح بقه شويه كده علي جليم خلينا نفتكر

ايه الحكاية؟

هنطلع جيران والا ايه؟

[أبو محمد]

قرموطى .. إزاى يابلديات تطلع من سوق الحمام عالمنشية وتخش على محطة مصر من غير ما تعدى على شارع العطارين وتحكى عن بياصة العساكر إللى كان المجندين الغلابة بيروحوا يكملوا المخلة بتاعتهم منها .. من الصبح للمغرب وبعدين بقدرة قادر البياصة دى تتحول لمحلات مشويات من كل نوع وفى الخريف تلاقى أجدع سمان مشوى وتلاقى أفخم العربيات راكنة جنب البياصة من بعد المغرب .. فى حين إنها قبل المغرب كانت بتشغى مجندين ... وبعدين تطلع من بياصة العساكر .. يا إما تكمل فى شارع العطارين وتعدى شارع عبد المنعم وشارع سيدى المتولى (إمتداد شارع فؤاد) وانت نازل عالمنشية الصغيرة تلاقى عالصفين محلات الأقمشة والستاير والموبيليا لحد بتوع الورد ...

ولوانت طلعت من بياصة العساكر ودخلت شارع عبد المنعم تلاقى بتوع الفسيخ والبطارخ وام الخلول .. وبعدين على رأى صاحبة العصمة فولانة باشا ، رنجة .. رنجة .. (قصد عصمتها دنجة .. دنجة) تعديهم وتخش على البغدادى تجيب منه قرص فلافل يملا الطبق .. أو يملا رغيف بلدى سخن والقرص محشى نابالم تهبده من هنا وعلى بتاع الرز باللبن تطفى نار الفلافل

إنت لغاية دلوقت فى نص البلد وباين عليك حتطلع عالرمل (عشان نانو .. ونانسى وواحد تانى) مرورا بالشاطبى وكلية الهندسة (أجدع ناس) ومنها على كامب شيزار (معسكر قيصر بالعربى .. كامبو شيزارى بالطليانى) عالابراهيمية وسبورتنج وكليوباترة .. و .. و .. بس ما تنساش تغرّب عالقبارى والورديان والمكس والدخيلة والعجمى .. هه ؟

وإيد على إيد يابو اسكندر :sad:

وإوعى تنسى وتسيب الجدع بتاع الفوتوغرافيا (واحد تانى) من إيدك .. الجدع ده عنده كنوز صور اسكندرانى من اللى قلبك يحبها .. عايزين نعملوا جو ما حصلش ..

ياترى حضرت السيد حلال عليه يا قرموطى ؟؟؟؟ :closedeyes:

[واحد تاني]

عدنا

اسكندريه الى بجد بدات من هناك من بحرى والسياله وراس التين الشباب الجدعان الى البحر صحبهم ورفيق مشوارهم وكمان البحر شغلتهم تلاقيه فى الشتا طالب فى الكليه وفى الصيف ينزل يغطس على بلح البحر عشان يجيب فلوس يعمل ايه بيحيب البحر ومش عارف يسيبه

الناس هناك تيمه تانيه خالص الجدعنه الاسكندرانى والموده والحب واللسان الى مش ساهل الناس هناك لمضه ولسنها بينقط عسل وبيعرف يقلب اى شىء لنكته

الناس هناك بتحب بعض اوى والفرح هناك بيبقى فرح والزفه زفه والحنه حنه وهنيجى فى وقت تانى نتكلموا على الزفه بتعتنا عماله ازاى

المهم نمشى شويه لحد ما نوصلوا لحلقه السمك بتاعت بحرى .....

وهنشم ريحه سمك ,لاء مش الريحه الزفره الريحه الجميله بتاعت السمك الطازه ريحه الفسفور والسمك الى على كل نوع وكل شكل هتشوف هناك عالم البحار

مياس على محرات ومكرونه وانش وبورى وبطاطا وجمبرى وكبوريا واستاكوزه وحتى المحار والجلاجوله هتلاقيها هناك حتى تعابين السمك برده هناك

ونمشى شويه لحد ما نروح شارع فرنسا وقبل ما ندخل على هناك هنروح نقعد على قهوه فاروق اشهر قهوه فى العب ده كله والناس هناك تتنافس مع بعض مين قعد على القهوه دى الاول

القهوه دى مصدر تاريخى مهم للاسكندريه تقعد هناك هتلاقى ناس كانت من عهد الملك وتحكيلك على اسكندريه وتقعه هناك تلاقى عيال امبارح وبرده كلهم اشتركوا فى شىء واحد ...قهوه فاروق وممكن تلاقى راجل عنده 60 سنه بيلعب طوله مع شاب عنده 20 سنه وبيحكوا لبعض على الذكريات واد ايه كانت حلوه اسكندريه

[القرموطى]

السلام عليكم ورحمه الله وبركاته عمى اوعم الاسكندرانيه ...ابو محمد اخيرا جيت يا عم

عللاى فكره انا عامل الموضوع ده تقريبا كده عشان عاوز انكشك من الاخر وعاوزك تخرج الى عندك يا عم بجد الواحد بقه بيتنشق على ريحه اسكندريه القديمه يا عم بدورعليها وعلى حكويها وعشان كده عاوز منك مساعده فى الموضوع ده قياريت تدخل معانا انا والاخ واحد تانى ويبقى كده ميه ميه

وبالنسبه للسيد حلال عليك انا اعتقد انى سمعت عنه بس هل حضرته ولا لاء مش عارف بس انا واثق انك انته اكيد حضرته فهسيب لك الميكروفون شويه عشان تاخدنا وتلففنا شويه على كيفك فى الحبيه اسكندريه

[القرموطى]

السلام عليكم ورحمه الله وبركاته

نكمل شويه لف من الى كنا اتفقنا عليهم والاخ ابو محمد جزاه الله خير فكرنى ببياصه العساكر وانا من باب الشىء بالشىء يذكر

شارع العطارين ...........ياههه شارع ده ولا متحف شارع قديم بس جميل ولو مشيت فيه دلوقتى هتلاقى فيه نوعين من المحلات محلات القديم والمستعمل (كتب وملابس مستورده ومستلزمات شركات البترول )ومحلات لوح فنيه وتماثيل غايه فى الروعه بجد لو دخلت الشارع ده مش هتبقى عاوز تخرج منه

ونطلع بسرعه على شارع النب دنيال حبيب الطلبه والمثقفين وهناك هتلاقى صور الازبكيه بالظبط كتب قديمه ومجلات ومتب دراسه من اول ابتدائى لحد الجامعه الامريكيه يا معلم وزمان كان البيع بالكيلو كنت تروح تجيب شويه كتب من الرصيف وتوزنهم وعشان يكمل الميزان البياع يروح يحطلك كام مجله ميكى ولا حاجه عشان الكيلوا يكمل وانما دلوقتى بقت حاجه تانيه خالص البياع يقولك يا افندى دا كتاب بتاع شكسبير ده مقرر على 3 اداب انجليزى ورابعه السون وده ترجمه الدكتور .....تحس ان البياع النهارده عنده شهاده المنشىء بتاعت الكاب ده وسعره الحقيقىوسعرهخ مستعمل بس بجد الشارع ده حاجه تانيه خالص