هل أعيد المحاوله ...؟ إقناع زوجى بشراء سيارة لإبنى الشاب

[nash]

عايزة رأيكم :huh:

بصراحه ..والحمدلله ..لم أخذ رأي أحد في طريقة تربيه أولادي..

كنت أربيهم بوحي من حس الأمومه العالي..وبالتالي كنت قريبه منهم في كل مراحل حياتهم..وبسم الله مشاءالله

الأن أبني الكبير علي مشارف أبواب الجامعه..ربي يوفقه ويوفق كل أولاد المسلمين..

طبعا أنا فرحه به..ولا أصدق أن الأيام مضت بهذه السرعه ..ومن كان يعتمد علي بالأمس في كل شؤن حياته..أصبح الأن رجل..يحاول أن يخطو خطواته بعيدا عني ..أو عن والده..يحاول أن يفرض رأيه..وتكون له شخصيته...مرات أشعر بالرعب عليه..ومرات أشعر بالفخر..

من حوالي عام..دار بيني وبين زوجي نقاش عن أهميه تدريب الشابين علي قياده السيارة..وافق زوجي وبدأ بالفعل..وبدأت المحاولات في الباركينج وأنتهت بالخروج إلي الشارع....طبعا لم يتمكنوا من القياده ببراعه...حتي الأن.....

ولكن من حوالي أسبوعين دار نقاش أخر حول أهميه وجود سيارة خاصه لهم...وخاصه أن من الممكن أن يلتحق أبني بالجامعه هنا..,وهي علي أطراف مدينه الرياض.....وهنا فوجئت برفض زوجي التام..ووصل النقاش لطريق مسدود تماما..فهو يرفض أن يقود أحد منهم الأن ويرفض أن تكون لإي واحد منهم سيارة خاصه..ومنطقه في ذلك..عليهم أن يتعبوا بالأول ....وبعدها سيقدرون معني كلمه سيارة..,معني المحافظه عليها...ومسؤليتها...

أنا مقتنعه نوعا ما بكلام زوجي..ولكن هنا القوانين ترفض قياده المرأة للسيارة..وبالتالي لا يستطيع زوجي في أي وقت أن يخلي لنا وقته ليتفرغ لنا.....ولمشاويرنا..رغم أنه من الرجال المتفهمين..والحمدلله...

هل أواصل الضغط والزن عليه..رغم أني أكرة هذه الطريقه....؟؟؟ ....وأيضا بالرغم من خبر أتاني عن أبن جارتي..وهو بنفس الكليه التي قد يلتحق بها أبني..حيث أنقلبت به السيارة عدة مرات..وكانت من نوع إنفينيتي...يعني قويه ولولا ستر الله كان الولد ضاع فيها هو وثلاث من أصحابه..منذ هذا الخبر..وأنا حقيقه لا أدري...قلبي يحدثني بأن أتكلم مع زوجي ثانيه..,عقلي يقول لي أصبري..وكل تأخيرة وفيها خيرة...

ما رأيكم..هل أنا علي صواب؟؟؟من يوافقني في إعاده المناقشه عليه أن يرتب النقاط.......أصلي ممكن أتوة mfb:

تم تعدير جزئى للعنوان ليعبر عن محتوى الموضوع

تم تعديل 9 ديسمبر 2006 بواسطة عادل أبوزيد

[darker19]

ناش- بجد الموضوع محير وبصراحة أنا ماقدرش أقلك ده صح أو ده غلط أو اعملي كده و ما تعمليش كده, بس عندي رأي أحب أقولهوك يمكن يفيدك في إتخاذ قرارك...

رأي زوج حضرتك في موضوع إنه لازم يتعب فيها عشان يقدر المسؤلية و يحافظ عليها صح, بس أنا شايف ان الكلام ده ممكن لو كان في مصر, بس الواقع إنكم في السعودية على حد علمي, و بيتهيألي مسألة إن والده يوصله الجامعه دي هاتكون وحشة و غير مريحة له, خصوصا ان كل زملائه هايكون عندهم سيارات...

أما بخصوص الحوادث لا قدر الله - دي حاجة من عند ربنا ولو ربنا أراد حدوث شئ ليا أنا على سبيل المثال هاتحصلي غصب عني, ومهما اتخذت من احتياطات مش هاقدر أمنعها, فأتمنى إنك تشيل الفكرة دي من بالك...

قال تعالى بسم الله الرحمن الرحيم " قل لن يصيبنا الا ما كتب الله لنا هو مولانا وعلى الله فليتوكل المؤمنون "

صدق الله العظيم

[نانو]

عويناتنا يا ناشنوش مش بس رأينا

ياسيدتي....انتي بداتي مرحله جديده في تربيه ابنك و حياه تربيه شاب

و اكيد المرحله ديه تختلف عن اللي قبلها ....في طرق تعاملك معاه و خوفك عليه....لازم الشاب في التفره ديه ياخد مساحه كافيه من الحريه و الثقه

ما ينفعش يحس انكم خايفين عليه ....او خايفين منه

لازم يحس انه اصبح رجل و مسئول عن نفسه ولابد ات يتعود انه يدير حياته و يعتمد علي نفسه

العربيه ممكن تاجليها بعد مرور سنه من دخوله الجامعه و ساعتها هاتحسي انك مضطره فعلا

لما يحس انه كل زمياله معاهم وهو لا....ساعتها ولا انتي هاتستحملي ولا هو هايسكت

و بعدين هو لو ما اتعلمش دلوقتي ما هو لازم يتعلم بعد سنه او اتنين او ربعه او عشره ....طيب و بعدين

انتي مستيه ايه...

انتي اللي تقدري تحمكي هل ابنك و شخصيته مهيئه لمسئوليه زي ديه و لا هو متهورو ممكن تكون سبب مشاكل ليه مش فايده و لسه محتاج ثقل في شخصيته

انا مع مبدا اني ما اخفش علي عيالي زياده عن اللزوم لازم التجربه و الاحتكاك و المحاوله

و بالنسبه للحوادث لا قدر الله ....ربنا يكفينا و اولادنا شرها ....فرد داركر واضح جدا ووافي

و ربنا يهدي للي فيه الخير ....

[nash]

أهلا ياداركر

أصلا موضوع أن يكون لهم سيارة في مصر مرفوض شكلا وموضوعا... :huh:

وأيضا المنطق في ذلك..وجود أصدقاء السوء..والأخ تربيه هنا..يعني مايفهمش الوجه الأخر للشباب والإنحلال الخلقي هناك..طبعا لبعض الفئات..ربنا يحفظ شباب مصر..

طبعا لو قام زوجي بتوصيله ..للجامعه..سيوضع في موقف لا يحسد عليه بين أصدقاءة....وللأسف هنا معيار الرجوله..ببعض التصرفات الغريبه من الشباب..وأكرة بشده أن يقال عليه...دلوعه ماما..أو هذا الكلام الفارغ....

لكن لازلت مقتنعه بفكرة حتميه السيارة

شوكرن

[Diab]

بصي يا ناش

أعتقد إن زوجك عنده حق لأنه في فترة المراهقة دي بتغريه العربية إنه يجري بطريقة رهيبة

اعرف واحد هنا كان معاه ميني كوبر وماشي في وسط البلد علي 150 كيلو عمل حادثة وربنا ستر ( برضه علي مشارف الجامعة )

يرضه دي حصلت قدام عيني عربية جيب سايقها شباب صغير 18 سنة تقريبا" والكبوت بتاعها مولع مش عارفين يعملوا أيه أحتاسوا

شوفتي بقي

[أبو زياد]

ما ينفعش يحس انكم خايفين عليه ....او خايفين منه

لازم يحس انه اصبح رجل و مسئول عن نفسه ولابد ات يتعود انه يدير حياته و يعتمد علي نفسه

العربيه ممكن تاجليها بعد مرور سنه من دخوله الجامعه و ساعتها هاتحسي انك مضطره فعلا

و ربنا يهدي للي فيه الخير ....

أختى العزيزة

لقد احترت بين المشاركة أو الإكتفاء بالمشاهدة

فلا شىء يضاف إلى ما قاله إخوتى الأعزاء

أهم ما يمكن ان نناقشه هو تربية أولادنا فلذات أكبادنا و نستفيد معا

وأظن أن هناك نقطة صغيرة تتعلق بعنوان الموضوع وهى كيفية إقناع الأب العزيز

وأرى أن هناك دائما حل وسط ويرضى جميع الأطراف و أظن أنه هو نفسه يفكر فيه الآن

هذا يتفق مع ما قاله الإخوة وهو أن تؤجل مناقشة الموضوع لفترة أقصاها سنة حتى يصبح موضوعا ملحا

هناك بالطبع خطورة من رعونة أولادنا فى سن الشباب . هذا أكيد

الحل الوسط أن يقوم بالتوصيل شخص ما حتى لو بأجر وأظن أنه سيوجد من يماثل حالتكم و يمكن أن يشارك معكم

وهذا فقط على سبيل التجربة - و التجربة خير برهان - و الصورة سوف تتضح بهذه التجربة

وفى هذه الفترة يمكن ان يؤخذ الموضوع بالتدريج ولابد أن يصل من يمتلك سيارة او حتى يقودها إلى درجة معينة من إجادة القيادة - مش حكاية رخصة

أرجو أن أكون قد أفدت و فى انتظار أى استفسارات

أنا باحتار كتيير فى اشياء من هذا القبيل فأرجو منكم الدعاء والمشورة

[nash]

أهلا يا نانو..ويا دياب ويا أبو زياد.....

نورتم الموضوع والله

إن شاءالله هارجع أرد

وربنا يسهل

أختكم ناش

[se_ Elsyed]

بنتنا العزيزة ناش

أولاً : أنا مع حضرتك تماماً في إن الولد لو وصل مرحلة ممكن يستخرج فيها رُخصة قيادة .. فلا مانع من شراء سيارة له إذا إستلزم الأمر .. وما فيش إستلزام أكثر من دخوله الجامعة ... وبعدين إنتي ممكن تدخلي لزوجك العزيز من مدخل إ إبنك هايشيل عنه عبء كبير في توصيلك للأسواق وقضاء طلبات البيت و و و .

ثانياً : الشاب المتربي واللي أهله دائماً على تواصل معه .. ما يتخافش عليه سواء معاه عربية او ما معهوش

وبعدين تعالي هنا .. إنتي فكرك يعني إن إمتلاك عربية من عدمه هو سبب البوظان ؟

يا سلام !!! .. يعني لو في عيل فاسد مش ممكن يصيع وهو راكب ليموزين .. ويعمل نفسه رايح الجامعه الصُبح وبعدين الله أعلم هايروح فين ومع مين ؟

أما حكاية إنه ممكن يمشي بسُرعة والخوف من الحوادث .. فده لا مبرر له .. لإن الواحد لو ماشي على رجله ممكن برضوا يعمل حادثة وحاجة تخبطه تجيب اجله .. كمان إذا كنا شوفنا حادثة لشاب أو إثنين فهناك عشرات الحوادث لناس بلغوا من العمر أرذله وخبرة في السواقة ... فهي مالهاش دعوة بالسن ولا بالمرحلة السعمرية على قدر مه هي مسألة سلوك وتربية وطريقة تفكير ..

الخلاصة :

طالما متأكدة من تربية وتنشأة إبنك .. فلا تخافي .. وإعطيه الثقة .. وخلي عنيكي عليه .. وإنت هاتلاقي أمامك راجل يُعتمد عليه ...

وربنا يخليهولك ...

إبقي قوليله أونكلك سين سين هو اللي قال كده يا ياسر

[Modest]

الموضوع على قد ما شكله الخارجي بسيط و الإجابة "أه" تشتري له عربية أو "لأ" و تتفقي له مع سائق تاكسي مثلاً يوصله يومياً مثلما اقترح أخي أبو زياد

و لكن هذا الموضوع أعادني إلى تربيتنا احنا زمان و تربيتنا لأولادنا الآن و خصوصاً بعيداً عن مصر و الخوف الزائد عليهم و تربيتهم تربيه "شبه" مغلقة هنا في السعودية بالذات .. جَعَلَت ثقتنا مهتزة بعض الشيء في تحملهم المسئولية .. و ربما كانت ثقتنا مهتزة في أنفسنا و ليس فيهم من ناحية قدرتنا على تحمُّل القلق عليهم .. يعني على فرض شرائكم سيارة له فلن يهدأ لكي بال من وقت نزوله من البيت إلى وصوله إلى الكلية و العكس.. هاتلاقي نفسك متابعاه بالموبايل "وصلت يا حبيبي؟ طيب طمّني أول ما تخلص محاضراتك.. كلمني أول ما تركب العربية و انت راجع البيت .. علشان انتي عارفة إن المشوار ياخد 25 دقيقة فتجهزي نفسك للقلق عليه إبتداءاً من الدقيقة 26.... بصراحة بنعمل كده و أكتر من كده لما يكون أحمد رايح درس بتاكسي.

تذكري بقى تربيتنا أو تربية العديد منّا و كيف كان أهلنا بيعطونا الجرأة حتى للسفر لوحدنا في سن أصغر من سن أبنائنا الآن و ايضاً المقتدر من أبائنا كان لا يتوانى عن شراء سيارة لإبنه بمجرد حصوله على رخصة قيادة لأن هذا السن هو سن بداية الاعتماد على النفس بعدما انتهت "تقريباً" مرحلة التربية و معرفة الحلال و الحرام.. لما بافكر في كده بأقول مش معقول أهلنا كانوا بيرمُونا يعني و لا كان قلبهم مش علينا ... طيب ليه إحنا مش كده مع أبنائنا؟!!!

عقلي بيقول إشتري له سيارة و قلبي مش مطاوعني لإن إيدي في النار زيك بالضبط.

و الخلاصة أنا محتار زيك و ياريتني ما كنت كتبت المداخلة دي علشان حاسس إني حيّرتك معايا أكتر :huh:

.

تم تعديل 9 ديسمبر 2006 بواسطة Modest

[inas]

ماشاء الله وربنا يباركلك فيه اولا

ثانيا موضوعك خلاني بجد افكر في الغد والي هيجي يوم وهنتعرض كلنا للمواضيع دي

ثالثا مش هضيف كتير بس فعلا انا عشت في مجتمع الخليج وعارفه نظرتهم التافهه للامور البسيطه الي زي دي

فانا اول متخرجت وشتغلت مكنش معايا سياره وكان الطلبه بتوعي معاهم فكان الواحد بيتعرض لكلامهم التافهه

فما بالك لو كان راجل!!!!

والله انا شايفه ان السياره في السعوديه من ضروريات الحياه خصوصا مع منع المراه من القياده واما بالنسبه للحوادث فرايي زي معظم المشاركين

[nash]

عدت والعود أحمد

منوريني يا جماعه...اتفضلوا شاي ..قهوة ...ميه...كله موجود

..................................................................

نانو يا عمري...فاكرة حوارنا علي الماسينجر.؟؟؟

فاكرة مقدار قربي منهم...علاقتي بيهم مرعبه بخاف عليهم...يمكن من لمسة الهوا...وربي ولا كأنهم بنات..

ويمكن لما أتكلمنا ...قعدت مع نفسي وحاولت أشجعها..زي ما أتفقنا...وأقنعت نفسي أن الرب واحد والعمر واحد...

للأسف ياسر الوحيد تقريبا اللي مش معاه سيارة..طبعا أنا بقول للأسف مش لإنه لا يملك...ولكن لإنه ممكن ينظر إليهم..حتي ولو لم يتكلم...

لإن أحلي حاجه فيه أن عنده حياء أن يطلب أي شيء..سواء مني أو من والده....

بالنسبه لشخصيه الكابتن...الحمدلله هو ليس متهور ..ولكن مرات تأتيه شطحات عجيبه.....لذلك مش قادرة أحكم علي شخصيته بشكل جازم

ربنا يهديني ويهدي أبو ياسر...ويعمل اللي فيه الخير....

بس تصدقي..خايفه أفتح معاه الموضوع دلوقتي...شكله هاياخد الوش البلاستيكي بتاع سي السيد

ربنا يستر

[nash]

أهلا دياب

منورني والله

...............

أبو ياسر...أستاذ ورئيس قسم في الحوادث

ويمكن هو هايقرأ اللي أنا كاتباه وردودكم عليه..

يعني لو شوفت صور أول حوادثه بعربيه دودج..تقدر تقول..سبحان من أخرج صاحبها سليم معافي....

ولليوم...سواقته من النوع الخطر...وكذا مرة أحلف ما أخرج معه..وبرضه في كل مرة يقولي...خلاص النهارده سواقة كبار الزوار...لكن مين ...هي أول ربع ساعه وبعد كده بالسلامه...

الغريب كل مرة أنوي أفتح الموضوع بشكل جدي..يجيني خبر سيء...عن حوادث لشباب ولاد أصحابنا..ومنه هو شخصيا

أخر مرة شاب في أولي هندسه ومتربي معانا وهو يمكن باللصف الثاني الإبتدائي....قتل رجل بسيط بالخطأ في المحروسه...الأهل دفعوا للأسرة 150 ألف جنيه..والولد من تأنيب ضميرة صام شهرين....

الحادثه الثانيه لشاب برضه بالجامعه ولكن في طريق 6أكتوبر دخل تحت تريلا..الولد تقريبا وجهه تشوة ..ولولا ستر رب العالمين...كان زمانه في عداد الأموات.....

الحديث في الحوادث طويل..ولن ينتهي.....

زوجي كان في حديثه يقولي لو الجامعه في وسط البلد..كان ممكن أفكر..لكن طريق هاي واي...أنسي يا ماما

الغريب هو عارف أنا أساسا بترعب عليهم..والغريب أكثر أنه بيفكرني أتجننت

شوفت بقي؟

[nash]

أهلا يا أبو زياد منورني والله

.................................

والله يا أبو زياد الموضوع ملح الأن

ياسر الحمدلله رعونته تتركز في أشياء بسيطه....يعني لما كنت بسوق في مصر...كان بيترعب مني...وده طمني أنه مش متهور بعكس أخوة الأصغر....نظامه طيري يا طيارة...

بالنسبه لموضوع سيارة بسواق ستظل نفس النقطه...التي أدور حولها...بمعني يا عيني باباة مش بيخليه يسوق..ياحرام أهله خايفين عليه...وتعليقات غبيه..أكرة أن أضعه فيها...طبعا زوجي ولا همه...يقولي يتريقوا عليه أحسن مانندم العمر كله...

الأن هو يستطيع أن يستخرج رخصه مؤقته...لكن خوفي أن أبو ياسر يزعل مني مخليني مأجله الموضوع...بس قربت أزهق..وأشغل سلاح الزن....

[se_ Elsyed]

نانو يا عمري...فاكرة حوارنا علي الماسينجر.؟؟؟

أيوه أنا فاكر اليوم ده كويس

بس إيه علاقة كلامك إنتي ونانو عن محشي ورق العنب بموضوعنا ده ؟

شكله هاياخد الوش البلاستيكي بتاع سي السيد

يا نهار أبيض

وانا عمال أقول الوش فين الوش فين وفاكر إني سلفته لحد وما رجعهوش

لو سمحتي يا ناش ترجعيه بسرعة أحسن سلفو من واحد صاحبي

بليز

[nash]

أخي وابي العزيز سي السيد أخويا

بفرح قوي لما حد يقولي يابنتي...

....................................

طبعا كلامك مقنع....ومتوافق مع رأيي الشخصي...

يعني الكابتن ياسر..ماشاءالله والله محترم..وتربيته إن شاءالله كويسه..والأهم أن فيه تواصل بينا..مع أنه شويه كتوم...

بيقولك يا أونكل أحمد ..ربنا يخليك.....هو....واقف جنبي ومبتسم..وسعيد وبيبصلي نظام شايفه الناس الجامده..

وجهة نظر أبو ياسر...أن لو دخل جامعه في مصر..ومعاه عربيه..هايتلموا عليه الولاد البايظين..ويصاحبوة نظام مصلحه..وبما أنه غشيم شويه ...الصراحه كثير علشان ما أكونش كذابه..هايكون عرضه للإنفلات...

ياسي السيد ياخويا..كلامك متناسب وماشي جدا مع رأيي..ومستريحاله .....وطبعا القضاء والقدر أحكام رب العالمين..مالناش دخل فيه نهائيا

أنا عايزة أجمد قلبي..وأدخل النقاش تاني مع زوجي....والأول هاخليه يقرأ الردود وبعدين نتناقش....

إذا أتأخرت عليكم أبقوا أطمنوا عن طريق نانو ونورا...

سلام تاني من ياسر والله

[عبده بيه]

الاخت السائلة السلام عليكم

الموضوع هام للغايه وعلي ما اعتقد كل الاخوة والاخوات ردوا باحسن اساليب فكرية وحضرتك انتي الان صاحبة اللمسة الاخيرة

اولا ماشاء الله يبارك الله فيهم واولادنا جميعا زي ما تفضلتي عايز يشيل مسئولية او يكون شخصية خاصة به ممتاز

الوالد راءيه مظبوط طبعا وده اساسي ومن ناحية تانية الحافظ هو الله

من الطبيعي في الاوقات التي الوالد بيرتاح فيها ممكن تاخدي ابن حضرتك وتروحوا تعملوا الشوبنج ومرة مرة يبدء الموضوع ياخد الوضع الطبيعي وان كان راءي من راءي زوج خضرتك

وربنا يبارك لكي فيهم وتشوفيهم في اعلي المنازل ان شاء الله مع تحياتي

[nash]

يوة ياسي السيد؟؟ :sad: ;)

إمتي حطيت ردك؟؟؟

والله أتخضيت...

معليش أصبر علي الوش شويه ...أسبوع كده وأرجعهولك

[نانو]

نانو يا عمري...فاكرة حوارنا علي الماسينجر.؟؟؟

أيوه أنا فاكر اليوم ده كويس

بس إيه علاقة كلامك إنتي ونانو عن محشي ورق العنب بموضوعنا ده ؟

محشي ورق العنب بنتكلم فيه واحنا في مائده الرحمن....لكن علي الماسنجر يا لورد س س بنتكلم كلام علي مستوي القاعده....حيث الخطط السريه للسيطره علي العالم

(وش بينكي وبرين فئران يسعيان للسيطره علي العالم )

[عادل أبوزيد]

المسألة فعلا هامة و يجب أن تأخذيها بجدية ..

عندى من الأبناء محد و أحمد 28 و 26 سنة على التوالى و الإثنان خريجى هندسة عين شمس و يعملون معا فى شركة محترمة أدعو الله أن ترى أبنائك مثلهم.

إبنى الأكبر محمد قمت أنا بتعليمه قيادة السيارات تماما كما تعلمت أنا و قد تعلمت أنا قيادة السيارات فى لندن حيث كمية كبيرة من تعليمات الحرص و السلامة .... ماذا تفعل قبل ركوب السيارة و ماذا تفعل بعد ركوب السيارة ... تعديل الكرسى و التأكد من سلامة وضع القيادة تضبيط المرآة كل مرة تركب فيها السيارة النظر فى المرآة النظر خلف السيارة ربط الحزام تشغيل السيارة النظر فى المرآة مرة أخرى

تعليمات و آليات قد تكون مملة و لكنها تقلل قدر الإمكان من إحتمال الحوادث و عند القيادة ترك مسافة بينك و بين السيارة التى أمامك يجب أن ترى العجل الخلفى للسيارة التى أمامك و إعطاء إشارة قبل تغيير الإتجاه و النظر فى الإتجاه العكسى قبل أن تبدأ تغيير إتجاهك

و لقد تعلمت كل هذه القواعد و علمتها لإبنى أما أهم شئ علمته إياه بالنسبة لقيادة السيارة هى أن السيارة ليست "برستيج" و القيادة ليست شجاعة و أن الحرفية فى القيادة هى الإلتزام بقواعد السلامة لدرجة الملل و أن كبريائك و مهارتك هى فى القيادة السلسة الهادئة الآمنة - عذرا على الإطالة - و حذرته بشدة من القيادة بطريقة أنور وجدى و عليه أن يقبض على عجلة القيادة بقوة و يتأكد أن أى تغيير إتجاه يتم من خلال عجلة القيادة فقط و عليه أن يسيطر على عجلة القيادة تماما.

إبنى الثانى لم أعلمه القيادة أنا و لكن أخوه الذى قام بهذا الدور

دخل إبنى الكبير كلية الهندسة عين شمس و بيتنا فى مدينة نصر و فى العامين الأولين كان محمد يستخدم ميكروباص حتى العباسية و منها يأخذ تاكس حتى الكلية - هذا رغم وجود سيارتين فى البيت - و أحيانا كان يأخذ الأتوبيس الأحمر

أهم شئ علمته لأبنائى أنها ليست رجولة و لا شطارة و لا كفائة أن تقود السيارة بسرعة و أن أى كائن (إستخدمت معه لفظة حمار ) يستطيع أن يضغط على البنزين فتزيد سرعة السيارة

و أن إحتمالات الحوادث تأتى أساسا من المستخدمين الآخرين للطريق لأنه فى أيامنا هذه من يقود سيارة ليس بالضرورة عنده أى عمق ثقافى.

فى ثالث سنة فى الكلية بدأ محمد يستخدم السيارة الصغيرة له و لأخيه معه

و الآن محمد و أحمد يقودون السيارة بأمان - حدثت حادثة لمحمد و لولا عناية الله و حزام الأمان لكانت العواقب وخيمة - و رغم أن بإمكانهم شراء سيارة بسهولة إلا أنهم ما زالوا يستخدمون السيارة الصغيرة فى الذهاب إلى العمل و العودة و كذا فى مشاورهم الخاصة و أحيانا يفكرون فى شراء سيارة و لكنى أقول لهم فقط عندما تشعر بحاجة ماسة للسيارة

أهم شئ أن الشاب يؤمن أن إمتلاك أو قيادة سيارة ليس فيها أى نوع من البرستيج و أننا نستعمل السيارة فقط فى الإنتقال من مكان إلى مكان إذا أمكنك زرع هذه القيمة فى أعماق أبنائك فأنت فى أمان و الباقى على الله

لى صديق كان يفخر و يتيه زهوا بأنه يقود السيارة فوق ال 180 كيلو بل ربما ال 200 و كان لا يلقى بالا إلى كلماتنا عن ضرورة التأنى و الأخذ بقواعد السلامة ... و للأسف بعد سنوات كان إبنه الكبير - كان وقتها فى العشرين من عمره - يقود السيارة و إلى جانبه أخوه الأصغر منه و بدون حزام أمان و إصطدم بعمود إنارة فى طريق صلاح سالم و توفى الأخ الأصغر.

سيدتى الفاضلة أشعر أننى أطلت و لكننى أشعر بسعادة عن الحديث عن تجربتى مع أبنائى

تقبلى تحياتى و تحياتى لأبنائك و زوجك الفاضل و دعواتى القلبية بالتوفيق

[Folana]

السلام عليكم ورحمة الله ....

يا سلام يا استاذ عادل..ربنا يبارك لك ويحفظ اولادك يارب..كلام جميل ..شمل الموضوع من جميع النقاط....

وفعلا ..اهم حاجة يا ناش انك تقفى على مدى احتياج ابنك للعربية..انا بصراحة لا افضل انى اجيب حاجة لاولادى لان اصحابهم عندهم منها...وزى ماقال الاستاذ عادل هى مش بريستيج..ومش مهم ابدا الاصحاب حيقولوا ايه...لان لو اتبعنا المبدأ ده حيقودنا لما هو اسوأ...وربنا يحفظهم جميعا..

تعرفى انا باعلم بنتى الكبيرة السواقة من دلوقت...( 16 سنة)..علشان لما تطلع الرخصة تكون اتقنت السواقة...ومش علشان اصحابها حيكون عندهم عربيات او علشان الجو اللى موجودة فيه يحتم عليها التباهى بركوب عربة مثل بنت انكل فلان..او جارتها او صديقتها..ولكن لانى اخشى عليها من ركوب المواصلات او التاكسى..واخشى عليها ايضا من ان تكون بمفردها مع السائق..

تصورى السواق لما يروح يجيبها من المدرسة بابعت معاه الدادة...شفتى جنان اكتر من كده... :sad:

المهم فعلا زى ما قال الاستاذ عادل...الموضوع مش موضوع وجاهة اكثر منه احتياج ومهارة ....ربنا يحفظهملك واولادنا جميعا من كل سوء......