هل أعيد المحاوله ...؟ إقناع زوجى بشراء سيارة لإبنى الشاب

[nora]

والله يا نونش انا اعدت افكر كتير في الموضوع ده وحولت اني احط نفسي في موقفك اه هو لسه بدري اوي بس اعدت افكر لان اكيد اليوم ده هيجي ووصلت للاتي

ان لو ضروري العربيه ليه جدا وده على حسب الظروف اه هخلي ابني يسوق بس بشروط وظوابط اولها ان دايما احسسه ان العربيه هي فقط وسيله نقل مش وسيله فخر وتنطيط لاني شيفه ان شباب الايام دي بيستغلو النعمه دي غلط انا لما جيت اخدت الرخصه ماخدتهاش الا لما لقيت اني فعلا محتجاها وخاصة في دول الخليج لانها ضرورة من ضروريات الحياه هناك وصعب جدا الحياة من غير عربيه هناك

لكن المشكله مش فيكي المشكله في جوزك

لازم تقنعيه وانا لاحظت ان الكل قال رايه في السواقه نفسها لكن مقلوش ازاي تقنعي جوزك

اهم حاجة علشان تقنعيه انك تفهميه الحجات دي واهمها ان السواقه بتدي ثقه في النفس للي بيسوق وغير كده انها بتعلمه المسؤوليه والسرعه اتخاذ القرار من الاخر لو استغلت كويس هدعم من شخصيته جدا فده الوتر الي لازم تلعبي عليه غير كده ان هو خلاص كبر فلازم تدولو الثقه في نفسه ومعدش صغير علشان بابا وماما يوصلوة والا هيكون مسخه وسط زمايله وخاصة في الخليج لانهم بيعتبرو العربيه من مظاهر الرجوله

فلازم يكون عنده عربيه و ان هو مش فاضي له ومواعيد كليته مش زي المدرسه من كذا لكذا لاه دي مواعيد مختلفه فهيعمل ايه هو في الحاله دي هل يعد في الكليه من الصبح لحد معاد المحاضرة ويعد لحد لما حد يقدر يجيبه مينفعش كده مضيعه لوقته جامد ..

بس ده راي ويارب اكون افدت

[أبو زياد]

طيب ملاحظة صغيرة جدا

ليه هو ما يسوقش لحد الجامعة و بجانبه والده ثم ينزل و يأخذ أبيه السيارة

وعند العودة ينزل أبيه ليقود هو و أبيه بجواره ؟

معلش تحملوا رأيى فربما كان فيه بعض الفائدة

الخلاصة هى الإستفادة من جميع الآراء

كما تفضل أستاذنا مشكلة القيادة الآن فى الدول العربية تستحق أن نفرد لها موضوع قائم بذاته

فمن أول استعمال الموبايلات وإهمال الطريق كله بمن فيه إلى مشكلة السرعة

لقد أصبحت أقود سيارتى مسرعا رغما عنى حتى أتفادى أخطاء الآخرين

وشكرا على معلومة رؤية إطارات السيارة التالية

المهم أن تعلم القيادة لابد ان يكون بالتدريج وهذا هو ما يراه الوالد

[nash]

اهلا يا موديست....

منورني والله

,,,,,,,,,,,,,,,,,,,

فعلا هو الظاهر أهالينا كانوا بايعنا....

مش ممكن ده أحنا كنا جبابرة....وكنا برضه زي الفل..ولا عمرنا أتعرضنا لمواقف سيئه..أو حتي لحادث عرضي..

لكن بيتهيألي زمان المحروسه كانت غير...والأمان كان عالي المستوي...الأن نسمع عن أشياء رهيبه...أو يمكن الحوادث بتتضخم لينا أحنا بس علشان عايشيين في الغربه...

أنت بتقول فيها...وربي من ساعه ياسر ماينزل يروح الدرس ..قبل مايركب التاكسي بتاع 2 أتصال موبايل...وأحلفه بالغالي بس أول ما يوصل...رنه...وبس...أخر مرة بتصل بيه شخط فيه يقولي...ايه ياماما يوة.... :) ..قولته ماشي لما توصل بالسلامه ليلتك كوبيا...

بس هنا في الغربه....نوعية الجرائم مرعبه....والإنغلاق خلانا بنخاف علي الولد أكثر من البنت...هنا حاجات كثير ضايعه....وأولها إختلاف العادات... :blink: بينا وبينهم شاسع.....ومرات بحس أننا مباحين ليهم...وأكيد فاهمني....

الغريبه أن معظم مشاكلي مع أبو ياسر تتلخص في أني مش هاعمل منهم رجاله طول ما أنا بخاف عليهم..بالشكل ده... :o ....طيب أشمعني يعني لما قلتله لازم الولد دلوقتي يسوق ...أكلني....وهو عارف أساسا أنا بخاف عليهم إزاي....ده حسسني أني بايعاهم.. :blink:

سيادتك ماقلتليش برضه أقنع سي السيد إزاي؟؟

طب أنت معايا ولا عليهم؟؟

أهلا يا إيناس

منوراني يا قمر

............................

للأسف نظرتهم التافهه..هي سبب مشاكلنا أحنا هنا

الولد هنا أول ما يوصل لعمر ال14...يفكر نفسه راجل وماحدش مالي عينه...ده طبعا مش ولادنا والحمدلله....

ده الراجل جارنا بدأ يعلم ولاده السواقه علي عربيه نص نقل..وهما لسه في الإبتدائي....تخيلي....بس الحمدلله الولاد عندي ماعندهمش وقت يتعرضوا للسخريه منهم...

للأسف السيارة هنا وربي ماهي وجاهه ولا يحزنزن....لكن ضرورة ملحه وملحه جدا.....

وخاصه أني بكون زي المشلوله لا عارفه أتصرف ولا عارفه أجي..والعربيه واقفه في الجراج...وماقدرش أحط رجلي فيها..

وده أخر موقف حصل معايا عندما دخل زوجي للمستشفي...وهاتي أتصلي بفلان وعلان يوصلك...وأتجرجري لإخر الدنيا وأتبهدلي...ليه ؟؟ علشان حرام السواقه....حسبي الله ونعم الوكيل

[Tafshan]

انا شخصياً والدى جاب لى سياره لما كنت في الجامعه .. و النتيحه انى كنت باعمل حادثه كل 4 ساعات تقريباً :blink: و بقيت زبون و صديق لكل السمكريه و ميكانيكيه اللى في مصر ..

المهم ما اطولش عليكِ ...

طبعاً السياره الفارهه (كانت مو 1981 و الكلام ده سنة 1992 ) اتفصصت و اتبهدلت و بقى مالهاش لازمه .. و لما اشتغلت اضطررت اجيب سياره غيرها لانها ما كانتش بتمشى اساساً :blink:

السياره الجديده لأنى فهمت قيمتها و طلع عينى في اقساطها كنت باقعد اعيط لما الاقيها متوسخه ..

المهم ما اطولش عليكِ ...

المفتاح السحري هو قيمة السياره عند ابنك .. لو قيمتها انه يطلبها تيجي .. ح يعمل زيي .. لو اقترحتِ عليه يشتغل في الصيف مثلاً او يشتغل مع الجامعه عشان يجيب سياره ح تستفيدي الاتى :

1- ح يشغل وقته في حاجه مفيده (الشغل) و بالتالى ح يبعد عن الحاجات التانيه اللى بنخاف منها

2- ح يحافظ على السياره و بالتالى ح يحافظ على حياته لانه مش ح يخاطر بمجهوده :)

3- ح يكتسب خبره عمليه في الحياه و ده مهم جداً و ح يفيده بعد التخرج

اما عن الوظيفه فممكن والده يشوف له حاجه و طبعاً تساعدوه في ثمن السياره ان امكن .. ربنا يخليه لكِ

[صبح]

الأستاذ عادل أبو زيد جاب 70% من أفكاري و100% من أفكار والدي متعه الله بالصحة وال30% من أفكاري الباقية كملها طفشان

بمعنى أنني بالرغم من عدم موافقتي لوالدي وأنا شاب صغير ورضائي بقراره بالرغم من عدم إقتناعي إلا أنه أثبت صحته مع الوقت إلا أنه كان هناك جزئية بسيطة ما زالت تلح على عقلي وهي أنه ربانا كويس وكان من الممكن أن يساعدنا ويرشدنا زي ما قال طفشان.

وكنت أذهب من شبرا ل 6 أكتوبر وأعود (من 7 صباحا إلى 7 مساءا) في أول عمل لي بعد الجيش بالمواصلات بالرغم من وجود السيارة تحت المنزل وعدم إستعمال والدي لها يعني كنت أضطر للنزول فجرا وأعود تقريبا الساعة 10 مساءا

كان دائما رأيه هو إبني إبنك وما تبنيلوش

المشكلة هي إختلاف الظروف هنا عن السعودية

بمعنى أنه هنا السيارة بالرغم من ضرورتها إلا أنها كماليات وكنا نجد العديد من أصدقائنا في المواصلات مثلنا بل ولم نكن نركب أي تاكسيات مث إبن الأستاذ عادل حيث أن الظروف المادية لم تكن تسمح وكنا أحيانا نشعر بالضيق ولكن حبنا لأهلنا وحسن التربية وقبلهم توفيق الله جعلنا نجتاز هذه المرحلة حتى التخرج والإعتماد على النفس

[nash]

أخي الكريم عادل أبو زيد

ربنا يباركلك في ولادك يارب

أكيد لازم تشعربالفخر والزهو..والسعاده..لإنك ربيت رجاله....محترمين...ماشاءالله ولا قوة إلا بالله

ويارب تشوفهم دايما رجاله حواليك.....وقلبك يفرح بيهم وربي يبعد عنهم كل شر...آآآآمين

طبعا أي واحد بيسوق برة المحروسه بيكون واخد تعليمات وطرق صح الصح

لكن في المحروسه نظام تاني خالص.....نظام القرون الوسطي....واللي يقدر يكسر علي التاني تبقي قمه الفهلوة.... وماتسألش عن فانوس فرامل ولا مرايه ولا حاجه كله ماشي بالبركه..قصدي يعني بركة دعا الوالدين..ولعلمك هنا كمان....ممكن في لحظه تشوف أسوأ سواقين علي وجه البسيطه...وياويلك لو أعترضت علي واحد...بتشوف أخلاق قمه في السوء...

جزئيه أن السيارة ليست مكمله للأناقه..جزئيه رائعه...فعلا وتعد أضافه جميله.....

كمان لو نظرنا للفئات التي تمتلك سيارة في المحروسه....سنجد أغلبها شرائح عجيبه..وهؤلاء مهما امتلكوا من نعيم الدنيا لا تزال عقدة النقص متجزرة فيهم...وبتظهر ساعه السواقه ..

بالنسبه للثقه في النفس...فأنا عندي مبدأ.......كلما أذدادت ثقه السائق في نفسه...كلما أقترب أجله....بعد الشر عنا وعن ولادنا جميعا...

مأساة سماع قصه لشاب حديث السن...تثير الحزن والشجن ربي يرحمه وأموات المسلمين ....

دمت أخي الكريم وكل أسرتك في رعايه الله وحفظه

تم تعديل 10 ديسمبر 2006 بواسطة nash

[nash]

أخي الكريم عبده

أهلا وسهلا في موضوعي

أنا عارفه أن كلام زوجي فيه الكثير من المنطق...

هو بالفعل بدأ بالخروج معهم إلي الشارع

بس هو مبدأ أن الولد ياخد العربيه لوحده..أصلا مرفوض تماما

ويمكن بعد الردود دي..يغير رأيه ولو بشكل جزئي

ربنا يسهل لينا جميعا

[nash]

أهلا يا فولانه

مبروك الأول علي وسام الأستحقاق..تستاهليه والله

ربي يباركلك في بنتك يارب وتشوفيها عروسه جميله..

.........................................................

والله أنا مش واخداها أبدا موضوع برستيج..وربي العالم...

مش هاقولك عن الحياة هنا من غير عربيه...صعبه جدا....

برافوا عليكي أنك بدأتي بسرعه...العربيه والله من أساسيات الحياة....

والله هنا مافيش أمان أطلاقا..هنا تصدقي بالله ممكن يكسروا علي شاب لوحده بالعربيه..ويخطفوة....ومش هاقولك علي الباقي...

لكن برضه تعتبر أأمن من أنه يركب ليموزين لوحده هنا...أكيد قرأتي مداخلة موديست...

صدقيني عبر عن كل اللي بيدور في عقلي أنا وزوجي...

المشكله هنا دلوقتي......إزاي أقدر أفتح الموضوع مع أبو ياسر.....أول مرة أشوفه عامل كده.....ورافض المبدأ اساسا ...

لا ويقولوا الراجل بيتعب أكثر !!! ده بيتعب بمزاجه بس....هو الصراحه راجل طيب ..وأبن حلال....

وإن شاءالله يشوف ردودكم..وربنا يفتح علي قلبه

[عادل أبوزيد]

المشكله هنا دلوقتي......إزاي أقدر أفتح الموضوع مع أبو ياسر.....أول مرة أشوفه عامل كده.....ورافض المبدأ اساسا ...

لا ويقولوا الراجل بيتعب أكثر !!! ده بيتعب بمزاجه بس....هو الصراحه راجل طيب ..وأبن حلال....

وإن شاءالله يشوف ردودكم..وربنا يفتح علي قلبه

سيدتى الفاضلة يبدو أن إهتمامك أكثر هو تنفيذ فكرة طرأت على بالك و هى شراء سيارة لإبنك و تفرحى أنه بلغ مبلغ الرجال بصرف النظر عن تبعات هذا القرار ....

سيدتى الفاضلة بصدق و إخلاص و بأمانة أتركى الأمر بالكامل للوالد و لا تضغطى فى إتجاه شراء سيارة لإبنك ... و هو الأمر الذى أتعجب له

دعى الأب يتخذ قراره بعيدا عن كل الضغوط و تأكدى أنه فى لحظة معينة - ربما بعد فترة - سيصل إلى قناعة و إطمئنان أن إبنه يمكن أن يتحرك بالسيارة بطريقة آمنة أكرر بطريقة آمنة

و أؤكد لكى أن تعليم القيادة فى الخليج لا يركز ما فيه الكفاية على عوامل الأمن و السلامة و يبدو أنك تعتقدين أن قيادة السيارة مسألة بسيطة لأن كل من تعرفين يقود سيارة كما أنها - من وجهة نظرك - من ضرورات الحياة فى الخليج

رجاء البحث فى google عن defensive driving rules و حاولى قراءتها و ستجدين أن جل كوارث السيارات تأتى من عدم إتباع قواعد القيادة الآمنة هذه !!

ليتك تتركين زوجك الفاضل يتخذ قراره دون أى ضغط أو إلحاح من جانبك بل أتمنى أن يكون دورك هو دفعه لمزيد من التروى قبل أن يسمح للأبناء بالقيادة وحدهم

[أبو زياد]

أؤيد ما قاله الأستاذ عادل مئة بالمئة

ولا توجد أى إضافة عليه

أختى العزيزة كما تذكرين طبائع بلاد الخليج التى أنا بها فأظن أن الرجل بحكم عمله و احتكاكه هنا أكثر إلماما بجوانب الأمور أليس كذلك ؟

لذلك لا تضغطى عليه و دعى الظروف هى التى تفرض نفسها

كان لابد من هذه النصيحة

و قد أسعدنا موضوعك لأنه يمسنا جميعا !! :blink:

[nash]

أخي الكريم طفشان

.....................

هذا رأي زوجي

أن يشتري الولد سيارة بنفسه أو يلتزم بمصاريفها بالأول شيء هايكون في صالحه....

وذكر كل الأسباب التي قلتها...بس حابه أذكر أنه حتي الأن يقود سيارته بشيء من التهور...ورأيه أنه لو معملش كده هايتسبب بحادث لنا جميعا...لإن من وجهه نظرة هنا السائقين بايعنها....

أنا أبدا لا أضغط علي زوجي في أي شيء...لكنه يعلم أهمية قياده الصبي...لإنه سيحل مشكله كبيرة لنا...

طبعا بعد أنتهاء الردود وتوضيح وجهه نظري أنا كطرف معارض لزوجي......

سأتناقش معه..وأعده هنا إن ماسيقوله سيؤخذ بعين الإعتبار

[أسد]

السيارة إحدى أدوات الحياة ..

وليست أحد متع الحياة ..

السيارة وجدت لتؤدي وظيفة .. ولم توجد لنسعى من أجلها ..

إذا كانت السيارة ضرورية .. فالحكمة تقول إذا كنا نستطيع .. فلم لا ..

والسيارة ليست كالموبايل ... أوافق وبشده أن يحمه إبني بمنجرد أنه قادر على إستيعابه وإستعماله وفهم وظائفه ..

ولكن السيارة بالنسبة للشاب والمراهق .. حلم .. ومن الصعب كبح جماح الشباب إلا بالسلطان عليهم ..

إذا كانت هناك ضرورة ملحة لأن تشتروا لإبنكم سيارة فلا مانع على أن يكون تحت الرقابة والسيطرة اللازمين .. والتأكد من حسن إستخدامه لها ..

إذا لم تكن ضرورة ملحة .. فلا حاجة لها الآن ..

وفي النهاية .. لا تحاولي إقناع زوجك .. ولا تلحي عليه .. فبالتأكيد هو يدرك مدى أهميتها وضرورتها ...

إذا كان ذلك ..

أنا شخصياً .. أول سيارة إمتلكتها كان عمري 26 عاماً .. وكانت بالكامل نتاج جهدي وعرقي ..

ولم يكن أبي يملك سيارة أصلاً ..

تحياتي ..

[أبو محمد]

الأخت الفاضلة nash

تعليم الشباب فى سن أبنائك قيادة السيارات أمر ضرورى .. ولكن شراء سيارة لهم فى تلك السن فهو الخطأ بعينه .. كما قال لك الأستاذ عادل .. أرجو أن يقرأ زوجك الفاضل قواعد القيادة الوقائية (Defensive Driving) .. ويبدأ فى تعليم الأولاد تلك القواعد

هل تعلمين أن الشركة التى كنت أعمل بها فى الكويت (شركة أجنبية) .. قامت بتنظيم دورات فى القيادة الوقائية لكل العاملين بها بصورة إجبارية .. وسألت مدير التدريب وقتها لماذا هذه الدورة وما شاء الله أغلب الموظفين إللى معاهم عربيات شركة من البالغين الناضجين الذين لهم خبرة لا تقل عن 25 سنة فى قيادة السيارات .. فكان رده لازم الكل يتعلم ال Defensive Driving .. لإن الناس هنا لا يعرفون إلا ال Offensive Driving يعنى القيادة العدائية

وقانا الله ووقى أبناءنا شر ذلك النوع من القيادة

[nash]

أخي الكريم عادل

سيدتى الفاضلة يبدو أن إهتمامك أكثر هو تنفيذ فكرة طرأت على بالك و هى شراء سيارة لإبنك و تفرحى أنه بلغ مبلغ الرجال بصرف النظر عن تبعات هذا القرار ....

أبدا والله لست من النوع المتهور..أو التي تجري وراء فكرة تريد تنفيذها..نعم قد أفعل ذلك مع نفسي..لكن مع أولادي لا يمكن..

فقط أريد أن أوضح وجهه نظري....لسبب بسيط..السيارة هنا ليست والله كماليات....هي من ضروريات الضروريات..وزوجي يعلم ذلك جيدا....وفي ظروف معينه..تصيب حياتنا الشلل..نتيجه عدم تدريب الولدين جيدا....أنا ماعنديش مانع أبدا بعدم شراء سيارة..ولكن علي الأقل يتقنوا قيادتها..ويستخرجوا رخصه ولو مؤقته....

أنا بالفعل وبمنتهي الأمانه..أترك كل القرارات المصيريه في حياة أسرتي لزوجي.....نتناقش نعم..نتجادل أيضا نعم...لكن القرار النهائي له..وهذا شيء لا يضيرني بل العكس..أتفهم حكمته ووزنه للأمور

والله أخي الكريم شعرت بكلامك هذا نابع من قلبك....ومن قلب أب ...يحب أولاده..ربي يجزاك الجنه.....

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

ليتك تتركين زوجك الفاضل يتخذ قراره دون أى ضغط أو إلحاح من جانبك بل أتمنى أن يكون دورك هو دفعه لمزيد من التروى قبل أن يسمح للأبناء بالقيادة وحدهم,,,

نعم سأتركه...وليفعل الله كل الخير لنا ولكل المسلمين

[nash]

أهلا بك أخي الكريم صبح

,,,,,,,,,,,,,,,,,,,,,,,,,,,,,,,,,,,,,,,,,,,,,

المشكلة هي إختلاف الظروف هنا عن السعودية

هذا ما أريد أن أوضحه وزوجي يعلم ذلك

هنا حتي ركوب تاكسي للمرأة شيء خطر جدا..أو بمعني أدق نسبه الخطورة فيه والمجازفه عاليه

أنا مع النقاط التي ذكرتها..أنا لا..أريد أن يحصل إبني علي الأشياء بسهوله..أريده أن يتعب ..ويتعرف علي القيم الحقيقيه للحياة....وواثقه أن هذه التجارب لن تزيده إلا قوة بإذن الله

دمت في رعايه الله وحفظه

[otaka]

انا فعلا مريت بالموضوع ده و خرجت منه بحيله ظريفه جدا

اخدت الفلوس من ابويا و حططهم فى البنك

و اخدت عربيه ماما و رحت بيها الجامعه

و بهذا عملت الف به اقتصاد

تعظيم المنفعه :closedeyes: