لا..لا..يا دكتور عاطف - المصريين مش مقاطف

[achnaton]

خبران رفعا ضغط الدم عندى النهاردة وكدت امام الحاح الطبيب ان اقول وانا مالى .. زودت جرعة الكنكور وقلت ابعت رسالة للأستاذ الدكتور رئيس مجلس الوزراء بعد ان سمعت انه كرر امام مجلس النوام يوم السبت الماضى حكاية شطارته فى التجارة وانه باع كسب بصفته مليار جنيه فى صفقة بيع شركات القطاع العام والحكاية دى اتكلمنا فيها فى موضوع آخر ومش حنتكلم تانى لأن الظاهر فيه ناس كتير مش عارفة تحسب واخوانا بتوع موافقون مازالوا نائمون ومش عاوزين يكسفوا الدكتور .. المهم فى جريدة الوفد النهاردة  صاروخ ارض أرض من صواريخ الأستاذ عبد العزيز النحاس تحت عنوان " خلع الملك فؤاد " بيقول فيه ان الدكتور عاطف - شوف انا ازاى الوقت لا باقول غراب الخراب ولا بطل الكساد عشان محدش يقول انى غاوى اهاجمه - الاستاذ الدكتوراصدر قرارا بخلع الملك فؤاد من قاعدته فى ميدان المعدية ببور سعيد - بعد ماخربها  - واعادته الى مخازن الحى بعد اسبوع واحد من وضعه فى الميدان باقتراح وموافقة المجلس المحلى .. ولن نعلق ولكننا نسأل .. ليه ؟؟ عمل فيك ايه يا عاطف بيه الملك فؤاد ومعظم المشاريع الناجحة تمت فى عهده اوعى تكون ناوى تحط مكانه تمثال وزير الصناعة قريبك واللى عمل فضيحة حديد اسوان وحط بذرة فضيحة المسابك المصرية اللى سعادتك كنت رئيسها بحكم المنصب كوزير قطاع اعمال ولا حاجزه لتمثال خبير تخريب الأقتصاد غراب الكساد ؟؟

الخبر الثانى .. اللى انيل ومنيل بستين نيله اللى نشره عادل حموده فى صوت الأمه تحت عنوان

عبيد يهدد " برهن قناة السويس " لا يامعالى رئيس الوزراء لسنا بمقاطف ولن نسكت .. وقد تتصور وانت تبيع ميراث الشعب وعرقه الذى دفعه عن طيب خاطر طوال نصف قرن تيجى حضرتك وتدلق ده كله وياريت على دماغنا عشان نفوق ولكن ورا ظهرنا بعد تخدير الشعب بالبيانات الكاذبة .. وقبل ما تواصل بيع البلد حتلاقى كل حجر فى مصنع بيزعق وينادى " يا ايها الدنيا اطلى واسمعى ..جيش الحيتان جاء يقضى مضجعى !! ويا ايها النائمون تحت قبه سيد قراره اصحوا واستردوا اموال الشعب من اللصوص

اخناتون     :)  ;)  :cry:

[freefreer]

ربنا يقويك يا أخ ناتون .. ..  :inlove:  :inlove:

[Mohd Hafez]

جرعة الكنكور

[b:post_uid0]الأخ العزيز أخناتون .. أبوس أيدك أيه وصفة الكنكور هذا . إليي  عرفك تكتب بالشكل ده .. أنا محتاج جرعة مركزة من هذا الصنف .. ياريت ترسل لي تركيبتها .. ولو فيها حاجة سر .. أرسلها على البريد الخاص

سلام

[/b:post_uid0]

[achnaton]

الأخ ايجبت 5

شكرا .. والكنكور حبوب لتخفيض ضغط الدم .. والسر فى كبسولة تحت الجلد اسمها حب مصر زرعتها تحت جلدى منذ اربعة عقود .. وتؤلمنى كلما مس مصر ضرر ما .. وربنا يكفيك شر آلام أحاسيس الأغتراب .. اما الكتابة فمرجععها التمسك بقراءة كل قصاصة بالعربى وقبلها تجويد القرآن من مصحف مشكلة حروفة .. ولكم جميعا حبى وتحياتى ..

اخناتون  :inlove:

[good_future]

هو عارف كويس اننا مش مقاطف

و لكن من كثر احتكاكه ومع اعضاء مجلس النوام و مجلس الوزراء ...افتكرنا زيهم .... جرادل

[تصحيح]

الإخوة الأعزاء

بعدما قرأت الموضوع وجدت أن بعض الأعراض التي ذكرتموها أو كلها من ارتفاع ضغط الدم و ما يصاحبه من صداع و ألم بمنطقة التفكير في الدماغ مصاحبة لي منذ أكثر من أربعة عقود  و فعلا لا  تظهر إلا  إذا  شككت بان شئ ما قد يضر بمصر و أخيرا زادت على الأعراض السابقة عرض جديد هو  ارتفاع في درجة حرارة الجسم كله  و انفعال شديد ثم انتقلت الآلام إلى منطقة القلب و بمراجعة الأطباء  و بعد عمل الأشعة و التحاليل وجدوا السبب في شريحة وراثية مولودة عند الكثير من المصريين و ملاصقة للقلب مكتوب عليها ( غصب عنى  بأحبك يا مصر ).

المهم جربت كل أنواع الأدوية من ( كتكور ) و (  منوماك )  و ( أخبط دماغك في الحيط )  و لا فائدة بل أن الأعراض تزداد مع التقدم في العمر و المعرفة .

و بالنسبة لموضوع  قناة السويس و محاولة الخديوي رهنها لتسديد فاتورة من فواتير الفساد فأنا عندي اقتراح أفضل من الرهن:

الاقتراح باختصار

قناة السويس وحدها ليست كافية لذا لابد من وضع (  نهر النيل مع قناة السويس و الاهرامات الثلاثة و الأزهر ) في سلة واحدة و نبيعهم لأمريكا أو بريطانيا العظمي أو إسرائيل الكبرى  مرة واحدة بدلا من الرهن و مشاكله و وجع الدماغ و مصاريف المحامين.

و حتى لا يعترض أحدكم سأوضح الفائدة العائدة من تنفيذ هذا الاقتراح

أ‌- السبوبة و البزنس حيكونا أكبر و مرة واحدة.

ب‌- المالك الجديد سيستخدم الأسلوب العلمي لتطوير و ادراة  تلك الثوابت.

ت‌- من الممكن تغيير اسم مصر إلى أي اسم أخر يراه و يختاره  المشتري الجديد.

ث‌- حيث أنه لا يوجد اسم مصر على خريطة العالم فان الشريحة الموجودة عندنا جنب القلب  لن تعمل و لن نشعر بأي ألم  و يكون الشفاء كاملا .

ج‌- شايف الحكومة و خايفة علينا ازاى .

مع أنى اشك في قدرة أي مشترك معنا في نفس المرض علي توصيل هذا الاقتراح لسمو الخديوي إلا انه من الواجب علينا المحاولة من اجل مصلحة الخديوي و إثبات الطاعة و الولاء و الشفاء من المرض اللذيذ.

و شكرا

[مصرى]

هل لدى أحد تفسير للجولات السياحية التى يقوم بها الدكتور عاطف هذه الأيام فى مصانع الاسكندرية ؟

[DARWEEN]

طبعا يا أخ مصري التفسير بسيييييييييط خالص

الدكتور عاطف لقى الأسكندريه شدت حيلها اليومين دول بفضل الراجل الجدع المحجوب

قالك وأشمعنى دي يعني .

والظاهر أنه ناويلها ..

ياتخرب .... ياتخرب

[متسائل]

بيصيف على حساب الحكومة.

[achnaton]

يا ريت يا أخ متسائل .. كانت تبقى سهلة ومعروفة .. ولكنها يبدو رائحة الغاز  " المسيل " او الغير مسيل اللى بيدعوا أنهم صدروا منه بستة مليار دولار .. وده طبعا مصدر فخيم .. وربك بالأمر عليم .. المهم أن يرجع المش والعدس والفول للأسواق .. والفقير يلاقى مسمار للبطن بدل من المسمار اللى عاطيه المستر عاطف للشعب كله .. غصب عنه ؟؟

مش با أقولك .. الضباع بتجرى على ريحة الجيف !!

اخناتون  :inlove:

[حشيش]

عبيد يهدد " برهن قناة السويس "

أخى أخناتون

معلهش مش فاهم هوه كان بيهدد مين..الشعب تقصد..وإفرض إنه نفذ تهديده..الشعب حيعمل إيه يعنى..مظاهرات معروف مصيرها مسبقاً..الأمن المركزى بيتدرب ليل نهار على كيفية قمع المظاهرات وليس على كيف يحمى الشعب ويوفر له الأمان...البلد بتاعتهم ياباشا..يبيعوا الهرم..أبو الهول..أم الخلول..كله عند الدكتور صابون  :xmas:  :xmas:  :xmas:

[achnaton]

ياه .. يا سيد حشيش .. فكرتنى بحركة الجيش .. إنت الظاهر ما تعرفش أن شرطة مصريين كلهم من المصريين .. ومفتش البوليس الأنجليزى راح من زمان .. وأنا أعرف ضباط شرطة وأعضاء فى أسرة الشرطة المصرية أكثر واعمق وطنية من آى مواطن آخر .. ولا تنسى أن 70% من المظاهرات يتسلل اليها مرتزقة وافاقيين وخاصة مظاهرات تلاميذ وطلبة اليوميين دول اللى بيكتفوا بقشور الأشياء دون البحث عن اللب والحقائق ولا أعتقد أو أتصور أن ضابط أو عسكرى شرطة مصرى حيرفع عصاية على من ينادى بحق مصر فى الحرية والحفاظ على شرفها وكرامتها .. ويوم ما يفكر عاطف الخراب فى تأجير او بيع القناة حتنفتح عليه ابواب جهنم حتى من رجال الشرطة أنفسهم فهم ليسوا أقل منا وطنية ..

اخناتون   :inlove:  :inlove:

[صلاح الدين]

[b:post_uid2]متخافوش يا جماعة الشعب المصرى من النوع فائق التحمل كل الى بيتعمل فيه دة من أيام الفراعنة و لسة فيه مصر على الخريطة[/b:post_uid2]