مميزات الغربه

[abo 3ali]

اكيد زى ما كلنا اتكلمنا عن عيوب الغربه و اللى قتلنها بحثا عاوزين نتكلم من زاويه اخرى هى

ايه هى مميزات الغربه ( ليست الماديه ) يعنى ايه اللى الواحد استفاد بيه من الغربه حقيقى

هل شاف امور قبل كده مكنش شايفها لما كان عايش فى بلده خلته يغير قناعاته

اتعلم حاجه جديده مكنش عمره مايحيعملها لو كان فى بلده

لتعرف على ناس جديده و ثقافات مختلفه اثروا فيه و فى طريقه تفكيره

حس انه عايش فى مجتمع صحى و به نظام فابدع و اخلص فى عمله

بمعنى عاوزين نتكلم و نتناقش فى الجوانب الايجابيه فى الغربه كل من وجهه نظره

[رمضان]

السلام عليكم ورحمة الله

الحمد لله والله يا أخي كل شيء انت قلته

[abo 3ali]

السلام عليكم ورحمة الله

الحمد لله والله يا أخي كل شيء انت قلته

و عليكم السلام و رحمه الله

طبعا الحمد الله على كل شى بس احنا عاوزين نوضح بشكل اكبر كل واحد على مستواها الشخصى استفاد بايه

اولا علشان كل الناس اللى مقدمين على الغربه و بيفكروا فيها يقرواء و جهه النظر الايجابيه فى الغربه اللى بتغير حاجات فى البنى ادام و بتخليه احسن او بيحس بالفرق بين بلده و الغربه

و احب اوضح و اعيد و ازيد احنا هنا فى حديثنا لا يهمنا الناحيه الماديه اطلاقا

طيب خلونى ابتدى بنفسى

انا اتعرفت على ناس كتيره و قدرت اطلع منهم باصدقاء حقيقين لباقى عمرى . رجاله بجد و بيحترموا الصداقه و عارفين معناها استفدت منهم و حبيتهم و انا واثق انهم كمان حبونى و صارت بينا مواقف و ذكريات جميله بدافع ان الغربه بتفرز معادن الرجال .. و الصداقه اللى بينا مستمره فى الغربه و عند العوده لام الدنيا و الصداقه و معرفه الرجال فى حد ذاتها كنز بالنسبه لى

ثانيا اصبحت اعتمد على نفسى فى كل شى من اكل و غسيل و اداره شئونى و حسيت قد ايه مراتى كانت بتتعب و عزمت عند العوده انى اكون اكثر ايجابيه معاها و اساعدها فى شئون البيت و مبقاش حمل زايد عليها و كفايه الاولاد

رجعت لهواياتى القديمه القراءه و الرسم احيانا

شفت ان احنا مش اقل من اى جنسيه فى العالم من حيث المهارات و الابداع شرط ان يتوافر لنا الجو المناسب

ابتديت ارجع امارس الرياضيه الذهنيه و البدنيه

تقسيم الوقت و اعطاء كل شى حقه بدون صربعه او عدم تنظيم زى مصر

اتعلمت اكلات جديده و مهارات المطبخ و نويت انافس مراتى لما ارجع ..

حاجات زى كده مثلا . ياريت كل واحد يحكى الجوانب الايجابيه فى غربته علشان الكل يستفيد

تحياتى

[الرافعي]

شكراً يا أخي الكريم أبو علي على طرح هذا الموضوع، وكمشاركة مبدئية ، تحضرني أبيات الإمام الشافعي رحمه الله، في ديوانه الشهير، والتي قال فيها

تَغَرَّبْ عَن لأَوْطَانِ في طَلَبِ الْعُلُى …… وَسَافِرْ فَفِي الأَسْفَارِ خَمْسُ فَوَائِدِ

تَفَرُّجُ هَمٍّ، وَاكْتِسابُ مَعِيشَةٍ …… وَعِلْمٌ، وَآدَابٌ، وَصُحْبَةُ مَاجِد

إذاً الفوائد الخمس :

1- تفريج هم

2- اكتساب معيشة ... يعني تحسين الظروف المعيشية بتعبير معاصر

3- علم ... والعلم يشمل العلم الديني والدنيوي وكل ما يكتسبه الإنسان من معلومة نافعة مفيدة ..

4- آداب .. فلكل قوم أدبهم، ومن حسن الفطنة اقتباس العلم

5- صحبة ماجد، وهو خير الرفيق ... وليس صاحب السوء

وعلى كل حال .. هذا الموضوع ينظر إلى الإيجابيات بشكل عام، وفي هذا كلام كثير ممكن يقال ... وكنت قد فتحت موضوعاً سابقاً باسم نظرات إيجابية في الاغتراب، لكنه كان يركز على الاغتراب في دول الغرب ... يعني بصفة خاصة

تحياتي

[abo 3ali]

شكراً يا أخي الكريم أبو علي على طرح هذا الموضوع، وكمشاركة مبدئية ، تحضرني أبيات الإمام الشافعي رحمه الله، في ديوانه الشهير، والتي قال فيها

تَغَرَّبْ عَن لأَوْطَانِ في طَلَبِ الْعُلُى …… وَسَافِرْ فَفِي الأَسْفَارِ خَمْسُ فَوَائِدِ

تَفَرُّجُ هَمٍّ، وَاكْتِسابُ مَعِيشَةٍ …… وَعِلْمٌ، وَآدَابٌ، وَصُحْبَةُ مَاجِد

إذاً الفوائد الخمس :

1- تفريج هم

2- اكتساب معيشة ... يعني تحسين الظروف المعيشية بتعبير معاصر

3- علم ... والعلم يشمل العلم الديني والدنيوي وكل ما يكتسبه الإنسان من معلومة نافعة مفيدة ..

4- آداب .. فلكل قوم أدبهم، ومن حسن الفطنة اقتباس العلم

5- صحبة ماجد، وهو خير الرفيق ... وليس صاحب السوء

وعلى كل حال .. هذا الموضوع ينظر إلى الإيجابيات بشكل عام، وفي هذا كلام كثير ممكن يقال ... وكنت قد فتحت موضوعاً سابقاً باسم نظرات إيجابية في الاغتراب، لكنه كان يركز على الاغتراب في دول الغرب ... يعني بصفة خاصة

تحياتي

عمنا و اخوانا الاكبر الرافعى

مشاركتك مبدئيه زى ماقولت . بس انا عاوز مشاركه متعمقه زادت او قلت عن الجوانب الايجلبيه التى اثرت على الفرد نفسه من الغربه

يعنى عاوزين كل واحد يحكى اكتشف ايه من جماليات و ايجابيات الغربه بعد سنه مثلا و بعد ماعدى مرحله الحنين للوطن و ابتدى ينظر فى الجوانب المضيئه لغربته و تاثيرها على شخصه و اد ايه حتكون نافعه له فى مستقبله

احكيلنا مثلا انت برقى لغتك و ارجوك دع قلمك يستفيض و لا تبخل علينا

و تعقيبا ان الموضوع ينظر للايجابيات بشكل عام فده لازم برضه نوفيه حقه من النقاش لكى نشعر معنا بالنعمه و الرضا و السعاده الداخليه و لكى نكون اكثر ايجابيه فى المستقبل . فقد مللنا الحديث عن السلبيات

انا بالظبط اكتشفت الحاجات ديه فيا بعد مرور سنه بالظبط . عن طريق تغير الزاويه اللى ببص منها للغربه و استبعاد العاطفه و الاشتياق لرويه الوطن و الاهل و الاصدقاء لقيت حاجات كتيره لا يصح ان اغفلها فحمدت ربى

فى انتظار الجزء المليان من الكوبايه زى مابيقولوا علشان زهقنا من النص الفاضى بصراحه

تحياتى

[inas]

انا شيفا اننا بنتعرف على عادات وتقاليد ناس

بنشوف ونتعلم ونغير من نفسنا

نشوف بلاد تانيه ومعالم بلاد ونتعرف على تاريخهم

نوع من التغير شامل للمجرى الحياه في رايي

[abo 3ali]

انا شيفا اننا بنتعرف على عادات وتقاليد ناس

بنشوف ونتعلم ونغير من نفسنا

نشوف بلاد تانيه ومعالم بلاد ونتعرف على تاريخهم

نوع من التغير شامل للمجرى الحياه في رايي

ايناس هانم الله ينور عليكى

بس احنا عاوزين نعرف اكتر عن الجمله التانيه اللى انت كاتبها ( بنشوف ونتعلم ونغير من نفسنا )

ايه تجربتك الشخصيه فى الجزئيه دى مثلا علشان نستفيد ( يعنى ايه اللى شفتيه و اتعلمتى منه فاتغيرتى )

يا جماعه احنا عاوزين نعرف الجوانب الايجابيه للغربه على الشخصيه نفسها و اللى مكنتش موجوده كليا او موجوده و اعيد اكتشافها فى الغربه

يعنى مثلا احكيلك حاجه بسيطه جدا انا و مراتى لما نكون فى البيت مثلا و هى شغاله مثلا بتغسل ة بتنشر و بتطبق الغسيل . انا كنت قاعد معاها اكنى اجنبى و لا باساعدها و نقعد نتكلم و نحكى .. بس لاحظت انى عقلى الباطن قام بتخزين اللى بتعمله و لما جيت هنا قعدت شهور طويله اغسل بره فى اللاوندرى لحد ماقررت انى اتعلم الغسيل اولا لاكتساب مهاره جديده ثانيا توفير و لو بسيط فى الميزانيه .. لقيت نفسى بدون شعور باطبق نفس خطوات مراتى اللى كنت خزنتها قبل كده منها . و بعدين قدرت تعبها . و لما ارجع قررت انى اشاركها علشان هى كمان بتتعب فى حاجات تانيه .. يعنى الغربه غيرتنى فى جزئيات للاحسن..

مثلا كنت ارجع البيت بعد الشغل باشا ارمى لبسى و بدلتى و اخد دش اطلع الاقى الاكل متحضر اكل و اخش انام

هنا لا ارجع اوضب لبسى و اعلقه و انزل اعمل الاكل بنفسى و اغسل اطباقى بنفسى و بعدين اطلع انام...

انا باكلمك عن حاجات بسيطه الغربه غيرتها فيا ..

ياريت نحكى من الزوايه ديه

تحياتى

[nancy]

شوف يابوا على

عن تجربة غربة بدات من 14 سنة

انا اول ماتغربت كنت متخيلة انى اول ما ولادى يدخلو المدرسة حارجع مصر على طول وقلت اتحمل 6سنوات وانزل بعد كدة

واول ما وصلت السعودية كنت متحاملة على اهل البلد ومش باحب الاختلاط بيهم واتعاملت مع الحياة انها مرحلة مؤقتة وتخلص

من وجودى فى البلد اكتشفت حاجات كتير

ان مش علشان انا مصرية يبقى لازم كل معارفى يبقى مصريين لان ممكن تقع فى نوعية مصريين لا دعى لذكر اسم نوعيتهم هنا

ان عن طريق وجودك ببتعرف على جنسيات كتير

بتتقبل لهجات الاخرين وتفهمها

بتعرف عادات وتقاليد باقى الشعوب العربية

واكتشفت اننا فى مصر منغلقين على ثقافتنا الشخصية من دون داعى واننا معروفن بلهجتنا وعادتنا واسلوبنا عند كل الدول العربية وهما لا

لية بسبب هيمنة الاعلام المصرى كافلام واغانى وسياسة

طبعا دة من اول عبد الناصر لحد 10 سنين فاتت بس

حاجه كمان مهمة من مميزات الغربة ان عندك فرصة تركز على شريك حياتك بشكل اكبر وتعشق معاه اكثر لان مفيش غركم لبعض

كمان .. بتقدر تركز فى تربية الاولاد بدون وجود اهل تبوظ وتدلع وتخرب ترتيباتك

بترجع مشتاق للاهل والاقارب والاصحاب

بتتعلم تقيم الناس احسن لما تنزل مصر نتيجة لخروجك من الصورة

بتبعد عن الخلافات العائلية

اهم حاجة اتعلمتها ان اخلاق الناس ملهاش جنسية كل الناس وكل شعب فية الصالح والطالح والجيد والسيىء والى متعلم والجاهل

مفيش صفات عامة مؤكدة

ودلوقت عندى اصحاب ومعارف من كل الجنسيات

وبتعامل فى شغلى مع كل الجنسيات

وان العالم اوسع مما نتخيل ولازم نتقبل ونتعلم من الاخير مهما كان مستوى ثقافتهم اكيد عندهم حاجة انا معرفهاش

اتمنى انى اكون اعطيتك رؤيا واضحة عن الغربا الى مبقاش عندى اى استعداد لانهائها

لانى بحب السعودية وبتوحشنى لما اكون فى مصر

[nora]

انا في حاجه اتعلمتها من الغربه يمكن هتكون غريبه بس اتعلمتها

اتعلمت ازاي احب مصر انا اتولدت وعشت كل عمري بره بس لما جيت فكرت ابدأ حياتي قلت ابدأ في مصر مش معنى كده اني بكرة الكويت بالعكس انا بحبها جدا لان بمنتهى البساطه كل ذكرياتي هناك

اتعلمت ازاي اقف على رجلي لوحدي ومحتجش لحد اتعلمت اني مزعلش لما اكون لوحدي اتعلمت ان في حجات حلوة كتير زي مفي وحش كتير سواء في البشر او في الايام وزي ما ننسي قالت ان الحلو والوحش ملهوش دعوه بالجنسيات كل واحد مسؤول عن ذاته مش جنسيتنا هي الي بتحكمنا

اتعلمت ازاي افهم الناس من عيونها واعرف ازاي اتعامل معاهم بس بجد كان نفسي اتعلم ازاي اعرف ارد على اسائه الناس

اتعلمت ازاي اود الناس وازاي احافظ على معرفتهم لان ده صعب جدا مع الجنسيات المختلفه

ده بالاضافه لكل الي قالو الي قبلي

[otaka]

ما معنى الغربه

و هل الغربه هى ان تعيش خارج بلدك فى رايكم

انا لم اشعر بالغربه ابدا فهل انا طبيعى و لا كما تطلق على امى انى ارفض ان ارتبط بالاشياء

المطرود من الكون

المرفوض من الطبيعة

المعادي للاشياء

لانه يرفض ان يتشيأ

اذا وجدت اناس يحبونك فى اى مكان فلا مكان للغربه الا فى دولاب منزلك لتعلق عليها همومك كنوع من تعزيه الذات قبل ان تنام

[inas]

اذا وجدت اناس يحبونك فى اى مكان فلا مكان للغربه الا فى دولاب منزلك لتعلق عليها همومك كنوع من تعزيه الذات قبل ان تنام

طيب والاهل والمكان الي عشت حياتك فيها وذكرياتك وطفولتك كل ده مش بتفتقدو

انا اتعلمت من الغربه قيمة الام و الاب عرفت ان مهما الواحد بعد واتغرب ان مش هيلاقي زيهم ولا في حنانهم

اتعلمت ازاي اسيطر على اعصابي و افكر كويس قبل متكلم

شفت واتعرضت كتير للبيحبنا كشعب والي بيكرهنا

اتعلمت لما اصادق حد كل شيء له حدود وكمان يجب ان تتوخى الحذر

لان في الغربه بتشوف وتتعرف على بيئات وطبايع مختلفه من الناس والبشر

الي بيختلفو في المعتقدات والتقاليد والتربيه

اتعلمت برضو من غربة زوجي ان افتح مجال من سعة الصدر و فرصه للنقاش اكبر

والصبر و اني اتسامح كمان عشان النهرده معانا بكره هتمنى يوم او ساعه يكون فيها معانا

اتعلمت ازاي اقدرها وحبها وعطف عليها وخاف على زعلها ويارب ابرها واحاول اردلها عشر الي بتعملو معايا

الام يا جماعه اغلى حاجه في الدنيا بجد ربنا يقدركم كلكم على ارضائها

[abo 3ali]

ايناس

الله يفتح عليكى

كلامك معبر و صادق و اكيد ناس كتير ممكن تستفيد ( و انا منهم طبعا ) لنظرتك الايجابيه ديه . و حقيقى ده اللى كان نفسى اعرفه و نعرفه للناس و ده كان هدفى من الموضوع ...

احييك على كل كلمه و اللى اضاءت لى زاويا كتير مهمه فى النظره الكليه للموضوع و بشكل رائع

تحياتى

ما معنى الغربه

و هل الغربه هى ان تعيش خارج بلدك فى رايكم

انا لم اشعر بالغربه ابدا فهل انا طبيعى و لا كما تطلق على امى انى ارفض ان ارتبط بالاشياء

المطرود من الكون

المرفوض من الطبيعة

المعادي للاشياء

لانه يرفض ان يتشيأ

اذا وجدت اناس يحبونك فى اى مكان فلا مكان للغربه الا فى دولاب منزلك لتعلق عليها همومك كنوع من تعزيه الذات قبل ان تنام

معلش انا حارد عليك بكلمات اغنيه عن الغربه اعتقد لو بصينالها ككلام حنلاقييه بيمس حاجات كتيره جوه كل واحد فينا و اعتقد ان انت منهم

يعنى ايه كلمه وطن . يعنى ايه كلمه وطن

يعنى ارض ... حدود ... مكان .. و لا حاله من الشجن

و لا ايه و لا ايه و لا ايه

نشع الرطوبه فى الجدار . و لا شمس مغرقه برد النهار

و لا امك .. و لا اختك .. و لا عساكر دفعتك ... و الرمله نار

يعنى ايه كلمه وطن

يعنى ريحه .. يعنى صوت

ايام بتشبه بعضها .. و سنين تفوت

و اما نسافر و الحدود .. يفصل ما بينا الف ميل

بنسيب سنين الحب و العمر الجميل

و لا ايه و لا ايه و لا ايه

و لا بناخد كله دول

هزه فرح

او غيم هموم

و احنا بنحلم فى الوصول حتى فى عرقنا فى الهدوم

بتهزنا حاله شجن

هو ده معنى الوطن هو ده معنى الوطن

و عوده لجمله (اذا وجدت اناس يحبونك فى اى مكان فلا مكان للغربه الا فى دولاب منزلك لتعلق عليها همومك كنوع من تعزيه الذات قبل ان تنام )

فالناس يحبونك اكثر فى مكانك لانك منهم . اما ما استطيع ان اعزى به نفسى قبل انا انام انى حتما سوف اعود يوما لما يسمى لى وطنا

[ابن الصعيد]

احسن شئ بالغربة

أنك بتعرف ان بلدنا مصر فيها أمكانيات كثير وان مشكلتنا بالادارة فقط والتعليم

هتعرف ان المصريين فى قمة الذكاء والعبقرية

وانا الخبرا الاجانب خبرا لان بشرتهم بيضا وبيتكلموا انجليزى فقط

انا باقول لكل اللى بيعيشوا فى مصر

مصر حلوة وهتقول عليها الكلام دة لو سبتها ونظرت عليها من الخارج

والشئ التانى فى الغربة كويس

انك بتعرف حدود الصداقة وانك وصديقك شيئان مختلفان في اشياء كتير ولكن تنفعوا تكونوا اصدقاء

على فكرة الغربة كلها فوائد ما عدا افتقادى لامى

والسلام

[otaka]

الاستاذ ابو على و الاخت ايناس

انا مش معترض على كلامكم و بحتاج لامى و لابويا و لصحابى بس فى نفس الوقت انا عارف انى موجود هنا لسبب و انى اذا محققتش الهدف من وجودى يبقى امى و ابويا و اصحابى هيزعلوا منى لانى انا لو نجحت بيكون نجاح ليهم و لو فشلت بيكون فشل ليهم

اما مخزون الذكريات فده باعث على الفرحه لانى بيورى قد ايه انت مخلص لذكرى لكن مش باعث على الكئابه و لا الاحساس انك هنا بتعمل ايه و المشاكل اللى بسمعها من اقرانى هنا

مش عارف انا بعتقد ان اللى مش عايش فى بلده لظروف معينه بيحس بالغربه لكن اللى عنده اختيارات بيكون مختلف الى حدما

صراحه كمان النت و التليفونات و الزيارات الكتير بتخلى الواحد مش حاسس بالبعد بس صراحه اكتر وقت بحس انى فيه زعلان لما اكلم اصدقائى و الاقيهم مع بعض

و يقولولى يا ريتك معانا