مشكلة إنحدار الذوق العام وكيف نحلها

[inas]

الحكايه ومافيها

النهرده ابني رجع من الحضانه واحنا طلعين على السلم لقيتو بيغني بيقول انهرده فرحي يا جدعان

وبعدها بشويه لقيتو بيقول قلعتو ولبستو :o

فقلتلوا جبت الكلام ده منين :)

فقالي عمو

قلت عمو مين

اتضح انو سواق العربيه الي بيجيبو ويوديه من الحضانه بيعد يغني للعيال

انا اعدت اسال اهل الخبره الا قلعتو ولبستو دي في اغنية مين طلع انها في اغنية العنب العنب لسعد الصغير

ومعرفش النهرده فرحي دي بتاعت مين

اعمل ايه ولحد فين وخدانا الاغاني دي

وازاي اقدر اسيطر على الناس الي بره ومايلقوه على مسامع اطفالنا من كلام معرفش بيوصل لحد فين

انا مره مشيا في الشارع فلقيت عيال في ابتدائي مروحين وبيشتمو بعض بالفاظ صعقت لها

وبجد وقتها فكرت ابني هيحتك بعيال زي دي هيسمع الكلام ده :o

طيب احميه ازاي؟ اقفل عليه الباب ؟اسد ودانو؟ اعاقب ؟

اعمل ايه وانا لما بقولوا عيب بيبصلي باستغراب وهو طفل عمرو ثلاث سنوات ونصف :)

ويقولي انا اسف يا ماما مكنش قصدي وهو فعلا مش فاهم

اعمل ايه

اريد حله :)

تم تعديل 11 ديسمبر 2006 بواسطة inas

[se_ Elsyed]

للأسف يا إيناس

وأقول للأسف وبكل أسى

الذوق العام والأداب العامة في إنحدار والكرف أو المُنحنى وصل تحت الأرض في هذه المرحلة

أستأذنك أولاً بصفتك صاحبة هذه الموضوع الخطير الذي يستحق التثبيت في أن نُغير عنوان الموضوع إلى " مشكلة إنحدار الذوق العام وكيف نحلها " وياريتها تبقى حملة او هدف تتبناه محاورات المصريين في المرحلة القادمة ونُقيم الدُنيا ولا نقعدها

فلقد وصل الأمر إلى إن راقصة ساقطة وإسطوانتها الجنسية تملأ الدُنيا في أن تقوم بالرقص شبه عارية في الشارع العام والناس تضرب بعض عشان تُلقي نظرة عليها فقط

ووصل الأمر كما أخبرنا أخونا شريف عبد الوهاب في إن هذا المطرب الذي لا تعرف إن كان راجل أم شيء أخر وهو سعد الصغير في أن يُحي إحتفالية مركز ثقافة المنصورة كرمز من رموز الثقافة

الأمر السائد الأن في الأفلام المعروضة هو " اللي تكسب به إلعب به " وأي حاجة بتجيب فلوس عبيها في شرايط وبيع .. تطلع أغنية تطلع فيلم تلطلع زي ما تطلع المهم تكسب وتهيص

كنا نستعجب عن حادثة التحرش الجنسي التي حدثت في العيد الماضي وقلنا إلى أين يذهب المجتمع المصري

ولكن شاهدت واقعة على الهواء مباشرة عرفت منها المجتمع رايح فين بالظبط

ففي يوم إفتتاح فيلم إسمه 8/1 دستة أشرارمن غسبوعين كده في نفس السيما اللي دينا رقصت قدامها .. كان حاضر الإفتتاح ممثل ناشيء والله العظيم ما أعرف إسمه .. لكن أعتقد إسمه شريف مش عارف إيه ... المهم تكدس مئات من الشباب والشابات أمام باب السنيما يريدون أن يسلموا عليه أو يلتقطوا صورة من الصور التي يقذفها في الهواء بالمئات في منظر قذر إختلط فيه الحابل بالنابل وكل متلزق في كله وهذا الممثل العملاق الغير معروف مُحاط بالعديد من البوديجاردات .. أقسم بالله من الأسلحة اللي شايلينها البوديجاردز تقول ده رئيس جمهورية وبعد ما خلص ركب سيارة مكشوفة وأخذ يطوف بها في الشوارع المُحيطة بالسنيما ....

حتى الأغاني أو المساخر التي كانت أذاننا تؤذا منها في التاكسيات والميكروباصات والأفراح البلدي .. اصبحت الأن قصائد شعرية وملاحم تُحشر في كل عمل فني .. وأصبحت القنوات العادية سواء الفضائية أو الأرضية تُفرد لها إعلانات لكي يتصل السفهاء على أرقام مخصصة وينزلوها كنغمة للموبيل بإعتبارها من الفنون الشعبية وحاجة فلكولورية مع إن فيها ألفاظ يُعاقب عليها القانون من أول جلسة ...

الموضوع كبير وخطير ..

إحنا خلاص كبرنا وأخدنا حصانة ومناعة ضد هذا

لكن أولادنا .. زي ما قالت إيناس الولد سمع الأغنية في باص المدرسة .. وممكن يسمعها في التليفزيون و و و ... أنا شخصياً إستغليت إن يوم الجمعة الماضي كان مشمساً والجو جميل وقلت نتغدا في احد الحدائق القريبة من منزلي وإذا بعائلة محترمة ومعاهم اصدقائهم وعيالهم الكبار مشغلين أغنية " العنب العنب " جنبنا بالظبط وكأنها قصيدة يفتخروا بسماعها ...

[inas]

اشكرك يا سي السيد على كلامك و انا غيرت اسم الموضوع زي ما تفضلت واقترحتو

انا تفاجات لما لقيت ان قراء الوضوع وصل لل 20 ومحدش رد قلت يبقى العيب فيا انا :)

بس بجد انا بستغرب من كلمات الاغاني ايه الردائة والوقاحه والاباحيه فين الرقابه

هنروح لفين و هيودونا لفين واطفلنا الي هما اباء وامهات المستقبل بينشاو على سماع كلمات زي دي

للاخت الفاضله بوسي سمير اغنيه جديده اخجل من ذكر كلامها :)

ايه الهدف منها وفين الرقابه لما طلعت واتصورت

انا في حالة دهشه من ساعت مسمعت ابني بيقول كده ولما عصبت وزعقت فيه

لقيتو بدل ابتسامتو الطفوليه الى دهشه واستغراب لان فعلا حصلوا زي تشتت

السواق بيقول كزا وماما بتزعق طيب ليه ( اكيد الست دي في فمخها حاجه :) )

غير الكلام الي بيتعلمو زي متوجعيش دماغي

كل مره يرجعلى بقاموس من الكلمات وحاول اصححلو ان ده عيب وميصحش تقولو لماما

وهو طفل بيقلد الي بيسمعو.........

[se_ Elsyed]

السواق بيقول كزا وماما بتزعق طيب ليه ( اكيد الست دي في فمخها حاجه :) )

ما هي دي مصيبة من مصايب واخطاء تربية الأولاد

إحنا مربيين عمر وعمالين نفهمه من صغره إن اللي بيدخن سجاير - لا مؤخذه لإخواننا المُدخنيين - بيبقى وِحش وبيضر صحته وكمان ربنا مش بيحبه

فالولد جاله إذبهلال وإنفصام في الشخصية .. لإن أخويا الصغير يمكن الوحيد في العائلة اللي بيدخن ... وحظه الإسود إنه معايا هنا في السعودية

فالولا عمر بيجيلي وبيعيط بالدموع ويقول : مش إنت قلت لي يا بابا إن اللي بيدخن سجاير بيبقى وحش وربنا مش بيحبه وإحنا كمان مش لازم نحبه ... ويبتدي العياط بقى ... طب عمو هاني بيدخن وأنا باحبه وبألعب معاه وهو بيحبني وبيجيب لي ألعاب وحاجات حلوه لكن هو بيدخن يبقى وِحش وربنا مش بيحبه وهايعذبه .. أعمل أنا إيه بقى ؟

طب قوليلي أرُد أنا إزاي عليه ؟

فاللي عايز أقوله إن

لا تنهى عن فعل وتأتي بمثله ........... عارٌ عليك إن فعلت عظِيم

ما أقعدش اتكلم عن العنب وهز الوسط وأبهدل في اللي بيعملوا كده وأنا بأشغل الاغاني دي ومخلي القنوات دي مُتاحه أمام الأطفال ... أو حتى ادندن بمثل هذه التفاهات أمام الأطفال

أو على الأقل لا أستطيع ان أوصل الفكرة للطفل بحيث ما يفهمش الموضوع حسب مرحلته السنية إعتقاداً مني إنه عبيط وممكن يفوت وما يفهمش مع إنه بيخزن كل ده في مخه ...

أسف للخروج عن موضوع الذوق العام .... لكن الأطفال برضوا جزء من المشكلة ومعانا فيها

[inas]

هو انا بشوف التلفزيون ابني طول اليوم يا دزني يا سبيس تون او عالم سمسم حتى افلام مبجبش :)

بس طبعا لما بنكون في شارع ولا فرح و لا نادي او مصيف بيسعو غصب عن الواحد

في تاكس في محل

انا كنت في مصيف السنادي كل المصيف وكل محل وكل خطوتين لا اسمع غير العنب وكاعبو يا كعبو وبانجو وانا سكران وانا لا مسطول كلمات قيمه لا عرف ايه الهدف منها الا هز الوسط على رايك :)

[nash]

الله يعينك بجد يا أيناس...

مرحله فعلا صعبه..وخصوصا أن إبنك ربي يحميه في مرحله التقليد...

وكل كلمه وكل تصرف هايكون تحت عينه...وفي رأسه..وصدقيني الطفل في المرحله دي..بيحاول يلاقي تفسير لكل شيء...

أنا من ضمن أقتراحاتي ليكي...وأكيد أنتي فكرتي فيها..بس أهو مش قادرة ما أشاركيش همومك مع أبنك

لو عندك عربيه خاصه بيكي حاولي توصليه أنتي بنفسك..وتبقي فرصه تتكلموا سوي..وتسمعيله حكاويه..ولو عندك صديقات في نفس عمرة تقريبا حاولي تقربيه منهم..أو حاولي تتعرفي علي صديقات عندهم أولاد في سن أبنك...وتتجمعوا سوي..والأولاد يرتبطوا في بعض أكثر

ومافيش غير أنك تدعي ربنا باستمرار يحميه ويحفظه

[se_ Elsyed]

ما هو ليه أنا بأقول إننا لازم نتصدى لهذا الإنحلال بقوة

لإن شوية شوية .. وجرعة بسيطة ورا جرعة بسيطة .. هايبقى ده العادي والسائد وغيره سيكون الإستثناء

فاكره يا إيناس لما كنا بنناقش بشكل طريف الجُمل والمصطلحات اللي كانت مُنتشرة في الأفلام القديمة وكن بنضحك عليها زي " نهارك سعيد " " أنا ممنون جداً يا باشا " ، " سعيدة يا نينا " ... إلخ

شوفتي وصلنا لحد فين دلوقت ...

إنت ما بتفهمش يا إبن الــ ..... وحطي بقى شتيمه زي مانتي عايزة بتتقال في شيء يُقال عليه عمل فني على أساس إنه بيخدم الحبكة الدرامية أو إعلانات الاعمال اللي المفروض يجذبوا بها الجمهور زي المسرحية الجديدة بتاعت مخترع لغة الأرداف " محمد سعد " وأشرف عبد الباقي عمال يقول له " إنت الواد الوسخ " التاني يقوله : ايوه انا الواد الوسخ .. وكإنها بقت مُصطلحات عادية الاطفال والكبار يسمعوها وتمر عليهم وكأن شيئاً لم يكُن ...

ومصداقاً لكلامي .. هاريينا اليومين دول بفيلم هايكسر الدنيا في السنيما إسمه " خيانة مشروعة "

لا أعرف قصته إيه ولا عايز أعرف .. لكن بالله عليكي ده إسم ؟

يعني قلنا الأسامي الهايفه زي عودة الندلة و غيره وغيره وأهي هيافه وتعدي ..

لكن كمان الأشياء التي تمس الشرف والأعراض أصبحت تُصنف على إنها مشروعة وغير مشروعة ؟

ورويداً رويداً أصبحنا نسمع ونرى مصطلحات أجنبية وخصوصاً إنجليزية بتُقال بشكل تلقائي في أفلامهم لإن ثقافتهم كده ومقياس العيب والغلط عندهم مختلف تماماً ... أصبحت تُنقل منهم في أعمالنا نقل مسطرة زي المُصطلح الصدمة اللي جاء على لسان بطل من أبطال فيلم " ليلة سقوط بغداد " - الممثل حسن حُسني - لما قال لو الأمريكان غزوا بلادنا وحيث إننا ما عندناش سلح ردع يبقى كلنا لازم نركع على رجلينا ونقول للجندي الأمريكي

:

Please Don't >>>>>>>> Me

مش محتاج اقول الكلمة إيه هي ..... شيء بشع مش كده ؟

تقليد أعمى .. زي الغُراب لما حب يقلد الكروان .. فلا هو بقى غراب ولا كروان .. لكنه أصبح مسخاً لا طعم له ولا رائحة ولا لون ...

حد يقدر يقول مافيش في الغرب أعمال فنية هابطة وأغاني زبالة ..أبداً ... لكن في نفس الوقت وبشكل دائم نرى لهم أعمالاً أنا شخصياً لا أخجل عندما أصطحب أسرتي لنشاهدها لأنها أعمال محترمه وتقول فكرة ...

أما احنا فبقى عندنا الزبالة بس - وكما قال الفنان الكبير عادل إمام : اعمالي تأريخ لمصر .... لا تعليق - ...

وسيبك يابا ونفض ودانك .. فكرة إيه وبتاع إيه هما أصحاب الأفكار اخدوا إيه ؟

الأفكار يابويا ما بتجبش فلوس ... أو لو إنت بتاع فكر يبقى تروح الأوبرا تسمع عمل أوبرالي وتدنك راجع ...

أما مسرح سنيما تليفزيون أغاني يبقى إيديني في الهايفه وأنا أحبك يا فنانس

مختصر كلامي هو

إن طول ما بقت الأشياء دي ( سيما ومسرح وتليفزيون وأغاني ) هي مصدر ثقافتنا الرئيسي والوحيد .. يبقى بالسلامة يا قلبي والمُنحنى سيظل ينزل تحت الأرض حتى يصل إلى القشرة الداخلية للكرة الأرضية ...

بنعيب على الغرب ونقول دول بتوع ثقافة الجينز والخمرة والشذوذ والإختلاط اللخبطيطة ............. وهما ضفرهم برقابتنا ...

لازم نعترف بكده لإنهم بيحركونا في كل حاجه حتى استغفر الله العظيم في الأمور اللي بتمس ديننا .. بقوا يشرعوا لنا ويحللوا ويحرموا وإحنا نقول آمين ...

فبالرغم من إنهم هم مخترعي القنوات الفضائية والفيديو كليب والأغاني الإباحية مش الأفلام كمان ..

إلا إن على المستوى شعوبهم تعالى نشوف غالبيتهم بيعملوا إيه :

- اللي بيسافر منا طيران نادراً ما سيجد أجنبي ما فيش في إيده كتاب إن شالله يكون كتاب أبله نظيرة .. أهم حاجة ما يقعدش فاضي ويضيع وقته ... أما إحنا فالواحد يا اما يدور على جيم يلعبه او يقرا مجلة هايفة أو جرنان للاخبار اللي فيها متكررة وبايته وتقرف ..

- اللي بيروح يصيف وعلى الشط او على حمام السباحة يبص على غالبية الاجانب كده يشوفهم ماسكين إيه في إيدهم حتى وهما بيتشمسوا ....

الواحد فيهم نازل قراية تقولش عنده إمتحان ثانوية عامة وهاري نفسه قرايه

اما أحنا فأخر حاجة نفكر فيها هي الكتاب او تخصيص ميزانية ولو 100/1 لشراء كتاب شهرياً إن شالله لو بجنيه واحد

أنا تعبت وداخل أقيل ساعة

[nancy]

فكرتينى من يومين اثار فى اوضتها وبتغنى انا ولا مسطول ولا بطوح

ابوها جرى وزعق اية دة يا اثار قالت ولا حاجة دى اغنية

فهو يقلاها عيب يا بنتى مش كدة

لازم نتعود ان كل وقت وله كلامة بس لازم يكون عندنا النفس الطويل لتصليح السىء من الكلمات عن الاولاد

[inas]

لو عندك عربيه خاصه بيكي حاولي توصليه أنتي بنفسك..وتبقي فرصه تتكلموا سوي..وتسمعيله حكاويه..ولو عندك صديقات في نفس عمرة تقريبا حاولي تقربيه منهم..أو حاولي تتعرفي علي صديقات عندهم أولاد في سن أبنك...وتتجمعوا سوي..والأولاد يرتبطوا في بعض أكثر

ومافيش غير أنك تدعي ربنا باستمرار يحميه ويحفظه

شكران يا ناش على كلامك بس للاسف انا ملياش علاقات هنا باي حد وبحس دا افضل نوعا ما من الاختلاط ومشاكلو انا من الناس الي قفلا بابها على نفسها :)

أنا تعبت وداخل أقيل ساعة

انا كمان تعبت كلامك صح كلو يا س س بصراحه احنا الي عملنا كده كمجتمع شرقي مقلد بغباء للاسف لانو مش عارف مصلحتو

فكرتينى من يومين اثار فى اوضتها وبتغنى انا ولا مسطول ولا بطوح

ابوها جرى وزعق اية دة يا اثار قالت ولا حاجة دى اغنية

فهو يقلاها عيب يا بنتى مش كدة

لازم نتعود ان كل وقت وله كلامة بس لازم يكون عندنا النفس الطويل لتصليح السىء من الكلمات عن الاولاد

انا خيفه اكتر من الي جي زي ما قال س س بقت الالفاظ القبيحه متداوله في المسرح والتلفزيون والسينما بيضحكو الناس بالشتيمه بيضحكوهم على خيبتنا

ولما طفل يكون متاح ليه الكلام ده في قلب بيتو وهو بالتلفزيون فا الواحد يسيطر على ايه ولا ايه

انا طول اليوم معلق رياضي على كلامو

كده عيب كده غلط متقلش كده عشان ربنا يحبك

وكل يوم كلمه جديده

[نانو]

ايناس

مشكلتنا تقريبا واحده لان بناتي برضه في نفس المرحله العمريه ....مرحله التقليد .....و السيطره علي الموضوع ده اصبح شئ مريب و صعب جدا

ولازم افضل طول النهار اقول حرام و عيب و بلاش

بس المشكله

ان هايجي يوم واولادنا يزهئوا من الكلمه ديه من كتر ما بيسمعوها

طيب تعالو نتخيل ...بعد كام سنه كده مستوي التليفزيون و السينيما و المسرح و ما الي ذلك من وسائل اعلام هيوصل لفين

يعني هيبقي دورنا ان احنا نحذر اولادنا من كل شئ في المجتمع حواليهم

انا مش قادره اتخيل ازاي ممكن ده يحصل و ايه هيكون رد فعل اولادنا

و انا من النوع اللي بكره خنقه الاطفال و الانغلاق الزائد...و بحس انه طمس لمعالم الشخصيه و انه هايجي يوم يحتكوا فيه بالمجتمع

فالازم يكون لهم خبره في التعامل مع الناس و المواقف المختلفه

انا كل يوم بعيد واكرر النصايح للولاد....بس علي فكره اكيد بتجيب فايده بدليل عمر س س لما اشتكي لباباه من عمه

و كمان بنتي النهارده قالت لي..... احمد يا مامي(مش احمد عبد الجواد يعني :) ) كان بيغش مني في الامتحان....قلتلها و انت عملتي ايه

قالتلي ...قلت له... ان ربنا شايفك ....و كده حرام و هتاخد ذنب كبير

يعني معني كده ان الولاد بيستوعبوا كويس اوي و بيخزنوا و بيخرجوا المعلومات ساعه الضروره

الخلاصه...ان احنا قدامنا جهاد من نوع خاص.....عايز نفس طويل و تكرار مرير و هو ده الحل الوحيد

الطفل لازم يفهم ان للاسف المجتمع مليانه حاجات وحشه و لازم كمان يعرف انه هيلاقي الحلو مثلا من ابناء اصدقائنا اللي بيحرصو علي اولادهم زينا

لان للاسف الاعلام ما اتغيرش....و مش بيتغير و مش هايتغير و هيفضل ياثر في المجتمع و يفسد في اجيال جايين من اهل مستسلمين تماما لهذا الانحدار الاخلاقي

[inas]

لان للاسف الاعلام ما اتغيرش....و مش بيتغير و مش هايتغير و هيفضل ياثر في المجتمع و يفسد في اجيال جايين من اهل مستسلمين تماما لهذا الانحدار الاخلاقي

نظره بائسه يائسه للمستقبل

وهيستمر في الانحدار للاسف وكل مادا بيزيد :)

[nora]

بصي يا ايناس انا خيفه برضو من المرحله دي جدا وانا عجبني جدا تعليق سي سيد

زمان لما كانت بتيجي شتيمه بابن كانت بتتقطع من كام يوم بتفرج على التلفزيون ببص لقيتهم سيبين الشتيمه عادي وكان خلاص دي بقت شتيمه عاديه عاديك ان فكرة فيلم عربي وكان فيه ممثل طول الوقت بيشتم بالانجليزي الشتيمه التي اشار ليها س س وكان دي معناها التقدم لما تشتم بيها او هتبقى امريكاني خلاص بجد كنت قرفانه اوي وانا بسمعها بس في شخص كنت عيزة ادافع عنه كريم عبد العزيز في فيلمه الاخير واحد من الناس كان فيلم جميل وعجبني قصته اه هي فيها نوع من الخيال بس صدقوني ممكن تحصل في ايامنا بس ده فيلم فلته اما باقي الافلام كلها هز الوسط والهبل الشديد بيعملو من نفسهم قرود علشان الناس تضحك وخاصة محمد هنيدي وكميت الانحطاط الي بيقدمه وخلاص بقى اساسي يطلع انه ست انا عمري مفكرت ادخله فيلم وبحزن جدا لما الاقي فنانين ليهم تاريخهم بيشاركو في كده واه لو تشوفو فيلم الاسفاف الاخير لسعد الصغير مش فكرة اسمه بس اغنيته العب العب وبدات اكتشف انهم بيعملو الفيلم تفصيل للاغاني والفيلم كله اغاني واصبح ولا الافلام الهنديه على الاقل مفهاش اسفاف

مش عرفه ايه الهدف فعلا من كل ده ولا الاغاني واذكر ان مرة كنت انا وجوزي وصحابه ومراتتهم خرجين وبنتغدى سوا الا وفجأه لقينه بنت من البنات قعدة تغني الاغنيه العريقه بوس الواوه والام زعقت في وسط الناس بس يابت وراحت بنت تنيه في نفس اللحظه بدأت تغني الاغنيه ببراعه شديده وتترقص عليها انا زهلت وللاسف كان تعليق الام خليهم يلعبو :o

ياترا هل اصبحت هذه الاغاني من مصنفات اغاني اطفال :o

ومن الاغاني التي صعقت لها احنا العيال البيئه الطحن خلاص اصبحنا نتفاخر بذلك :)

ولا الاعلانات بتاعت ميلودي الي بتتكلم على انها تتحدى الملل مش ممكن الي بيجبوة هو يعني مينفعش يعلنو غير بالطريقه دي واعلانات تنيه كتير اخجل ان اذكرها لدرجه ان لما شفت اعلان مرة منهم انا وجوزي تنحنا وقلنا هو خلاص وصلنا للمرحله دي اننا نعلن على الحجات دي بالوش المكشوف ده وعادي عادي وفعلا انا الان اصبحت لا ادير التلفزيون الا على سبيس تون والقرأن الكريم ويوم الثلاثاء فيلم الرعب :)

او القناه الرياضيه فهي ارحم من الاسفاف:) ( عرفت ليه يا س س انا بقيت من مشجعي القرويه )

[KANE]

اليوم كُتب لي الاستماع لأغنية العنب لعماد بعرور كاملة

بعد أن قررت البحث عنها على النت وسماعا

الصراحة بعد سماع أول 30 ث من الأغنية كنت في حالة :)

والسؤال هل سمعتم المقدمة ؟

كيف سمحت الرقابة المصرية بصدور مثل هذه المقدمة في أغنية

*******

أسف يا Kane

قمت بحذف الرابط من غير حتى ماعرف إيه الأغنية .. فخليك معانا نحارب الفساد مش نسمعه وبعدين نحاربه ...

سي السيد

[inas]

شكرا يانوره اولا على ردك و فعلا انا لاحظت الاعلانات المبتذله دي

دا ابني لما بيشوف كده بيكرر كلامي عيب ده يا ماما حوشي الكناه ( اغير يعني)

احنا للاسف بقيت الشهره هو الاسفاف وان تطلع وحده عريانه وتقول كلام فاضح وتترقص وتستعرض نفسها

و تبقى الفنانه المشهوره صاحبة الوجه الملائكي و مش عارف ايه وهي تلاقيها عملا مليون عملية تجميل وبتتجمل كمان بالمسخره الي بتعملها وللاسف الشباب بيقلدو يشوفو الفنانه فلانه لابسه كده يلبسو كلهم زيها

بعد مكان النص كم بقى الكت وبعد الكت بقى العريان بعد كده هيعملو ايه تاني

وطبعا ناهيكم عن الي بتطلع تغني بقميص النوم طيب ايه الفائده وممكن ميكنش الاغنيه ليها اي علاقه بالموضوع

وبوسي سمير واغانيها القيمه و نجلا وغيرهم الكثيييييير الي معرفلهمش اسماء زي بتاعت ام بلا نفسي اعرف ايه باقي الكلام

زمان كانت الممثله بتطلع بهدومها على المسرح دلوقتي بقميص النوم على السرير يانهار اسود

ولو مطرب لازم يجبلو كام وحده عريانه تترقص وراه عشان الاغنيه تضرب

والافلام على رايك بقيت زي الافلام الهنديه :unsure:

شكرا يا كاني على مرورك بنا

وفعلا انا سمعتها وكلامها مفخره للشعر العربي :angry2:

فين الرقابه بيعملوا ايه بالضبط ومين يحمينا من الجزو الفكري او اللا فكري ده

[النسر المصري]

مصيبة مصييييييبة وحلت علينا ياجماعة.....بس ايه اللي اقدر اقوله

عموما انا عملت حسابي للكلام ده من بدري ومن قبل ماتجوز

اولا اختياري للدولة والمكان الذي سينشأ فيه الطفل

فوجدت ان الكويت كبلد انا فيه مغترب وحيث ان طبيعة الحياة هنا الكل مشغول بعمله...وان الاصدقاء من مختلف الجنسيات... وانه من الصعب جدا على العادي ان يستقل مواصلات ...وانه عالساعة 10 مساءا بالكثير البلد تقفل وتروح......عوضا عن الانترنت المقفول من المواقع الاباحية...وعوضا عن قدرتي في التحكم في القنوات التي تبثها الفضائيات.... ثم توجيهات الاهتمامات للطفل ...وهي حفظ القرآن واختيار المدرسه المناسبه ....كل تلك البيئه ستساعدني على الحد من الانحدار في الذوق العام

مش بقول كده عشان ان الكويت يعني اخلاقهم هنا احسن..بالعكس ده في شوية (...) عاوزين حرق بالنار...وبتاع العنب ده اكتر ادبا منهم...لكن الجميل هنا انك عارف فين الاماكن اللي فيها الفساد..(طبعا المولات وبعض الاسواق)......اما بقى الشارع اللي تحت بيتك وفي مكان كله مغتربين....فده بقى غالبا مكان ذو بيئه صحية وسليمه وجيران محبوبين ..

وعفوا ..وهي ليست اهانه لمصر...ولكن بصراحة الحابل اختلط عالنابل في مصر......فشدة الازدحام في الشارع...وسهوله الاختلاط مع الناس...وحيث ان البلد صاحية مابتنمش اساسا..اذن فهي فرصه لان يقعل مايشاء...وابسط حجة....(يابابا ماالناس صاحية واحنا بنلعب)

ياجماعه انا فاكر بس من 16 سنه كنت ماقدرش اتأخر عن الساعة 9 برة البيت لان البلد عندي كانت سمع هس ولاحد في الشارع...فطبعا كان معظم وقتي مع اهلي اكتر من الشارع.....!!!....لكن النهارده الوضع اختلف.......ممكن تنزل الساعة اربعه الفجر تلاقي الناس ماشيه في الشارع والزحمة والعربيات وكأننا في عز الظهر!!!

اما العلاج لهذه الحالة المتفشية في مصر......فصدقوني ذلك لن يأتي الا عندما يشعر المواطن بالامان ....فاذا رأى حكومته تحترمه وتحافظ عليه ...وقتها سيتغير تلقائيا...وستجده قد ارتقى بأخلاقه من نفسه.....هذا رأي المتواضع والله أعلم!!

[inas]

صدقني يا نسر مش مصر بس دا غزو للوطن العربي ككل من شبه الجزيره العربيه الى المغرب وتونس :angry2:

[أبو زياد]

ما هو ليه أنا بأقول إننا لازم نتصدى لهذا الإنحلال بقوة

حد يقدر يقول مافيش في الغرب أعمال فنية هابطة وأغاني زبالة ..أبداً ... لكن في نفس الوقت وبشكل دائم نرى لهم أعمالاً أنا شخصياً لا أخجل عندما أصطحب أسرتي لنشاهدها لأنها أعمال محترمه وتقول فكرة ...

مختصر كلامي هو

إن طول ما بقت الأشياء دي ( سيما ومسرح وتليفزيون وأغاني ) هي مصدر ثقافتنا الرئيسي والوحيد .. يبقى بالسلامة يا قلبي والمُنحنى سيظل ينزل تحت الأرض حتى يصل إلى القشرة الداخلية للكرة الأرضية ...

بنعيب على الغرب ونقول دول بتوع ثقافة الجينز والخمرة والشذوذ والإختلاط اللخبطيطة ............. وهما ضفرهم برقابتنا ...

لازم نعترف بكده لإنهم بيحركونا في كل حاجه حتى استغفر الله العظيم في الأمور اللي بتمس ديننا .. بقوا يشرعوا لنا ويحللوا ويحرموا وإحنا نقول آمين ...

فبالرغم من إنهم هم مخترعي القنوات الفضائية والفيديو كليب والأغاني الإباحية مش الأفلام كمان ..

كيف نتصدى للغزو الفكرى و الثقافى ؟

بالنسبة للأبناء فلا أعتقد أن الفكرة سوداوية كما أوحت لى معظم المشاركات ..

فالطفل فى بداية حياته لا يستطيع أن يميز و لا أظن أنه سيفسد ذوقه إذا سمع بعض الأغانى و كررها

اعتقد أن تكوين الذوق يبدأبعد سن 7 سنوات و فى هذه المرحلة لا يجب ان نوجه له تقريعا او حتى نلفت نظره إذا كرر او تأثر بشىء سمعه و لكن علينا ان نضع له البديل - فلا زلت مصر على ان الطفل وعاء - مجرد وعاء ليس فيه إلا ما ملأناه به

ونحن جميعا كآباء نستطيع أن نملأ كيان الطفل بالمعانى الحلوة النبيلة و بكلمات و معانى القرآن الكريم فإذا امتلأ هذا الكيان بهذا لا أظن أنه سيحل محله ما هو أسوأ إلا بصعوبة جدا

لا تقلقوا يا إخوانى - فقط علينا أن نؤدى واجبنا نحو أطفالنا

أخى س س الطفل دائما اكبر مما نتخيله

فلو عرف منك أن شيئا ما خطأ - وليكن مثلا السجائر - لابد أن يقتنع بذلك ليس فقط منك أو من أحد الأقارب - بل من معرفة الأسباب و لماذا أنت قررت ذلك و غيرك وكيف فكرتم .

تعرف مثلا زياد إبنى قرأ ما هو مكتوب على العلبة - ضار جدا و يسبب أمراض وو - ثم رأى الناس يدخنون -

طيب ازااااى ؟؟؟ فضل الواد يفكر و يدبر و يتعجب وتوصل لحاجة بسيطة جدا كلنا عارفينها ..

إن ممكن الإنسان يعمل حاجة عارف إنها غلط و يندم عليها او يصبح أسير لها و لكنها فى النهاية خطأو يجب عليه ألا يفعله

حط عنده أساسيات التفكير و سيبه

دول عيال أكبر مننا يا عمى !! ربنا يستر علينا إحنا :wub:

[inas]

عندك حق يا ابو زياد في كلامك الخوف كمان على الكبير ودا بيتمثل في مقارنت الازواج لزوجاتهم بالي عملين مليون عملية تجميل و طول النهار عند الكوافير والجيم وووو وهي مراتو في المطبخ مما يسبب انقلاب اسري <_<

بس لما طفل يشوف ويسمع وينشأ على ان الكلام ده عادي من كل الي حواليه لكن ابوه وامو بيقولو غلط

اكيد الطفل هيحصلو تشتت ومش هيعرف يصدق مين زي بالظبط المراهق والسجاير

الاهل يفضلو يحرقو في قلبهم السجاير وحشه والسجاير مضره وفي الاخر يروح يشربها مع صحابو

ليييييييييه لان لقى الكل بيشرب يبقى مش غلط بالظبط الكلام والعري الي بنسمعو ونشوفو

احنا نقول عيب الكلام ده عيب اللبس ده

وفي الاخر من ورانا او قدمنا يقولو الكلام الي بيسمعوه ويقلدوهم في لبسهم لان معدش في مبدا

والتلفزيون وسيله ممتازه لزرع الافكار لانو في كل بيت وشارع ودي المصيبه mfb:

[نانو]

.

إ[ن ممكن الإنسان يعمل حاجة عارف إنها غلط و يندم عليها او يصبح أسير لها و لكنها فى النهاية خطأو يجب عليه ألا يفعله

حط عنده أساسيات التفكير و سيبه

دول عيال أكبر مننا يا عمى !! ربنا يستر علينا إحنا <_<

ابو زياد عجبتني الجزئيه ديه

لان طبيعي ان احنا بنغذي اولادنا بالمثاليات و نزينها جوه عقولهم بالجزاء الكبير عند ربنا و العقاب الشديد لتارك اوامر الله

لكن في الحقيقه كلنا ممكن نغلط حوالينا في المجتمع حاجات كتير حرام وغلط ...فاذا ما خليناش خط رجع في مخ اولادنا هايطلعوا مكفرين المجتمع بدونما نقصد

مثال بسيط حصل معايا بالفعل

بناتي لما كانوا بيشوفوا لبس البنات غير محتشم كنت تلقائيا بقول انه ده حرام و كده هيدخلوا النار

مره كنت في الشارع ....و شافوا واحده بتمر من جنبنا و طبعا بكل براه في و دنها ....مامي ديه هتروح النار....طبعا بقيت في ربع هدومي

من يوميها اتعلمت حاجه جديده لازم اضيفها في تفكيرهم...و هي فكره الاستغفار و التوبه و الرجوع الي الله و قد ايه الانسان اللي دايما يتوب الي الله يكون مقرب منه

معلش اذا كنت خرجت من الموضوع الاصلي....لكن اعتقد انه كل ده هيصب في مصلحه اولادنا

[inas]

انت نورتي يا نانو وتخرجي وتطلعي براحتك

نكمل الموضوع

بجد عجبتني الكلمه دي

من يوميها اتعلمت حاجه جديده لازم اضيفها في تفكيرهم...و هي فكره الاستغفار و التوبه و الرجوع الي الله و قد ايه الانسان اللي دايما يتوب الي الله يكون مقرب منه