كرسي الاعتراف

[memo2007]

مش مصدقه نفسى -_- كده موديست خد خمس اصوات يعنى هايقعد على الكرسي الكهربه :sad: قاعد يعنى قاعد -_- انا فرحانه قوىىىىىىىىىىىىى تنقى انت الكرسى ولا تسيبلنا احنا المهمه دى يلا ابدا بالأسئله................. سؤالى هو : اسمك ايه ؟وعندك كام سنه؟ ومتخرج من كليه ايه؟ وبتشتغل ايه وفين؟ وحبيت كام مرة فى حياتك واحكى عنهم؟واكيد كنت بتعمل مقالب فى اصحابك كلمنا عن بعض هذه المقالب؟ بص انا مش لاقيه اسئله تانيه اقولها بس جاوب بصراحه وبدون لف ودوران ومتنساش يا استاذ موديست انك تدعيلي بذمه مش تدعى عليا

جاوب بقي :unsure: :D

[Modest]

اهلا بك يا موديست :P على كرسى الاعتراف بص انا اسالتى ورا روح شوفها وجاوب عليها وبجد مش هزاااااار :angry:

مش مصدقه نفسى :P كده موديست خد خمس اصوات يعنى هايقعد على الكرسي الكهربه :angry: قاعد يعنى قاعد :angry: انا فرحانه قوىىىىىىىىىىىىى تنقى انت الكرسى ولا تسيبلنا احنا المهمه دى يلا ابدا بالأسئله................. سؤالى هو : اسمك ايه ؟وعندك كام سنه؟ ومتخرج من كليه ايه؟ وبتشتغل ايه وفين؟ وحبيت كام مرة فى حياتك واحكى عنهم؟واكيد كنت بتعمل مقالب فى اصحابك كلمنا عن بعض هذه المقالب؟ بص انا مش لاقيه اسئله تانيه اقولها بس جاوب بصراحه وبدون لف ودوران ومتنساش يا استاذ موديست انك تدعيلي بذمه مش تدعى عليا

جاوب بقي :angry:

و الله يا ميمو جاوبتك أول واحدة و هاتلاقي الإجابات في صفحة 15 و بتاريخ 04 يناير الساعة 4:20 am .... هالاقيها منك و لا من سي السيد :sad:

و عموماً و لا تتعبي نفسك .. هاروح أجيب لك الإجابات تاني هنا بدل ما تتمشوري لغاية هناك -_-

أسئلتك يا ميمو كانت قبل ما أتربط في الكرسي :angry: .. لكن علشان انتي بنتنا هارد عليكي -_-

اسمك ايه ؟

محمود

وعندك كام سنه؟

أكبر منك بشوية صغيرين ... و أوعي تبصّي على البروفايل بتاعي :angry:

ومتخرج من كليه ايه؟

الهندسة

وبتشتغل ايه وفين؟

باشتغل مهندس مدني ... في جدة

وحبيت كام مرة فى حياتك؟ واحكى عنهم؟

يووه بقى يا ميمو .. باتكسف انا من الأسئلة دي :)

حبيت كتيييييييييير يا ميمو يا بنتي (مع تنهيدة و وش مكسوف) :wub: .. بس أول ما واحدة رضيت تحبني اتجوزتها على طول قبل ما تهرب :wub:

واكيد كنت بتعمل مقالب فى اصحابك كلمنا عن بعض هذه المقالب؟

أنا وش ذلك برضه؟ عمري ما عملت مقالب في أصحابي طبعاً

بس كنت أنا و أصحابي بنعمل مقالب في الناس

بص انا مش لاقيه اسئله تانيه اقولها

ماتجيش هنا تاني يا ميمو :angry:

.

[Modest]

ماشي يا موديست

طب والله لأعذبك

ودعوني أعترف

بقى بصراحة يا رجالة أنا لما أتكتفت في الكرسي وأتكهربت قلت أول واحد هاختاره بعدي هو إبني " موديست " .. مع إني باحبه .. بس زي ما تقولوا كده إنتابتني حاله من السادية الشوزوفرينيه .. وعشان قلبي الطيب ده هو اللي موديني في داهيه قلت أستأذنه الاول .!!!!!

شوفتوا الخيبه ؟

عمركو شوفتوا سجان بيستأذن سجينه ويقوله : تسمح لي أنفخك ؟

ياريت كل الناس في طيبتك يابا الحاج سين سين :angry: ... غُلُبت أطلبك في التليفون أعيّد عليك بس لقيتك على طول منفض لي .. في الآخر عرفت إنك عامل بلوك في الموبايل على كل الزمالكاوية :wub:

خد نأ نأ في السؤال اللولبي ده لحد ما اخد حقنة شر وأرجعلك :

س1 : ما هو الشيء الذي حُرمت منه في الطفولة ونفسك تعوضه في أولادك ؟

ج1 : يا عمي قول إيه نفسك أولادك يعملوه من اللي انت عملته زمان .. تربيتهم هنا حرمتهم من معظم ما قمنا به زمان و انت سيد العارفين.

س 2 : هل ماما كانت بتضربك بعصاية الغلية وإنت صغير لما كنت بتاكل الجبنة البراميلي من وراها ؟

ج2 : لأ .. لإني كنت باخبي عصاية الغلية من ماما قبل ما أدخل برميل الجبنة :angry:

س 3 : كنت بتاخد مصروف قديش وإنت في المرحلة الإبتدائية وعلى ماذا كنت تنفقه ؟

ج3 : كنت باخد تلاتة ابيض و احوش منهم خمسة تعريفة اشتري بيهم دوم من على باب المدرسة :angry:

س 4 : لو رجع بك الزمان لورا 30 سنة .. إيه اللي نفسك تعمله وما عملتوش عشان ماقدرتش تعمله ؟

ج4 : و الله يا مسيو إس إس أنا باحمد ربنا و اشكر فضله إني مفيش حاجة كانت في نفسي و ماعملتهاش.

و لو فيه حاجة دلوقتي نفسي فيها من تلاتين سنة هي إني اشوفك تاني و إن شاء الله تتحقق آخر الشهر ده لما الرياض تنوّر بقدومي إليها .. فك البلوك عني في الموبايل او ادفع الفاتورة بقى الله يخليك علشان نرتب للزيارة :)

ده أنا هاعذبك عذاب ... ماشي يا موديست ويارب المحلة تغلب الزمالك النهاردة عشان يبقى خدو سته رايح وخدو اربعه جاي

بعد إذنكو يا جماعه .. سيبولي موديست الأسبوع ده .. وإعملوا اللي إنتو عاوزينه ومافيش إنذارات .. ده موديست ده حبيبي وأنا أولى به ...

يا جدعان حد ياخد الراجل ده بعيد عني .. كورة مش عاتقني .. كرسي اعتراف و مشحوَرني .. فيه حد موصّيك عليا يا جدع انت؟

[bentmasria]

يا هلا يا مرحبا

موديست قاعد ومستنيينه من زمان

بص انا معروف عنى انى هادية ومابعرفش اثير مشاكل ابدا ودايما بهدى النفوس حتى اسال سى السيد

الاسئلة بسيطة خالص

ياترى المدام بتحب النت واصحابه ولا لأه؟ :)

ياترى ممكن تتجوز على المدام يوما ما؟ :angry:

ياترى تخصص مدنى بيعرفوا جرافيك كويس ولا بس بيقطعوا علينا عشان همه شاطرين فى كل حاجة ده استفسار بس يا فندم؟

هو حضرتك ليه مالكش ولا بصمة فى باب الادب والشعر؟ هو احنا لا سمنح الله زعلناك فى حاجة؟؟ :angry:

وبجد بجد ماتزعلش انا بهرج معاك لك حق الاجابة او الامتناع انت عارف غلاوتك عندنا (ابقى سيبلى تليفون البيت) :wub:

يسعد صباحك يارب

ام محمد

[Modest]

موديست هنا يامرحبا يامرحبا

ممكن شوية اسئلة كدة على الماشي قبل ميستفرد بيك سى السيد شكل الموضوع انتقام الجبابرة مش كرسى الأعتراف

يا أهلاً و سهلاً بسمـ مصر ــا المُشرِقة

ممكن طبعاً تسألي .. ما هو كل واحد معَدِّي يقول أحدف له سؤالين يمزمز فيهم و ييجي بعدين يلم ورق الإجابة و أنا اللي محشور في الكرسي و محدش حاسس بيا :) .. ربنا يسامحك يا ناش :angry:

ماعلينا .00 نخش على الأسئلة

السؤال الأول أجبارى 00 من أنت ؟ ( فى حدود خمس أسطر أكتر من كدة سيتم شطب الأجابة وحذف السؤال ) :angry:

إيه حكاية السؤال ده؟ :angry: ..... هذا السؤال تم الرد عليه باستفاضة في الرد على الأخ الفاضل زهيري و في صفحتين كاملتين :wub:

2- أخر مرة وقفت فيها مع نفسك ولمتها ..متى ولما؟

لن أرد بالطريقة المعتادة و المُبالغ فيها في رأيي و هي " أقف مع نفسي كل يوم" و إنما كثيراً و الحمد لله .. أما عن اللوم فهذا يحدث في كل مرة اقف فيها مع نفسي لأنني مهما حاولت فأنا إنسان .. أي خطّاء ككل ابن آدم .. فقط أدعو الله أن ينير بصيرتي لأقلل من أخطائي.

3- لو كتبت رسالة عتاب ياترى لمن ترسلها ومافحواها ؟

لشخص حسبته صديقاً و أسررته بأمرٍ هام و لكنه أساء إليّ باستغلال هذا الأمر لمصلحته الشخصية .. كنت أحسبه صديقاُ و لكن هذه الإساءة و لله الحمد لم تضرني و إنما فقط كشفته أمامي .. أقول له فقط ... لماذا؟ .. و لا أنتظر رداً. -_-

4-هنا عايزة منك عضو أو عضوة تذكر لنا اسمة

أسئلتك تلخبط اللخبطان يا سما و صعبة جدا :angry:

عضو تتابع كل مايكتبة

بدون مجاملة و لا تهرب من الإجابة .. أتابع الجميع لأن كل الأعضاء ، ما شاء الله ، مميزين على اختلاف اهتماماتهم.

عضو ترتاح نفسياً لوجودة فى المحاورات

كثيرون و الله يا سما .. إيه اللخبطة دي :angry:

عضو قريب قوى لقلبك

و الله أكثر من واحد و من الجنسين.

عضو تتمنى أن تتعرف علية فى الحقيقة

مش هاتهرب من الإجابة و لكن حقيقي اتمنى التعرُّف شخصياً على الجميع .. و إذا بدأتي تتعصبي من إجاباتي و هاترميني بأقرب كوباية :angry: .. يبقى في هذه اللحظة في بالي ممكن لم أتشرف بلقائهم حتى الآن مثل أبو محمد و سكوربيون و زهيري و واحد تاني و و و و ... :angry:

عضو خفيف الظل

الكثيرين بزعامة كبير الرحيمية جبلي سين سين و حشيش كاتبي المُفضَّل في الكصص العاتفية :sad:

عضو مشاغب

مفيش

عضو مبدع

أعتبر كل عضو مُبدِع في مجاله.. هناك المُبدعون في مجال الأدب و آخرون في السياسة و كذا في الفنون و أيضاً في النقد الرياضي و هكذا .. و ما شاء الله المنتدى ذاخر بالمبدعين

عضو موهوب

موهوب في إيه بالضبط؟ ... شاوري على نوع الموهبة و أنا أقول على طول :wub:

عضو حكيم

أكثر من عضو و أعفيني من ذكر الأسماء كي لا أنسى أي من منهم.

عضو غائب ولكنك لا تنساة

كثيرون و الله يا سما .. يحضرني الآن اسماء عزيزة على قلبي جداً مثل: ياسو و كليو و كفاية (مش كفاية كده .. لأ .. أقصد أستاذي العزيز kfaya) و لايت هاوس و فيروز و بنت شعنونة و الأفوكاتو و د. رجب ... و ليعذرني باقي احبائي على عدم ذكر أسمائهم لإن الساعة داخلة على 4 و نصف صباحاً و يادوب شايف المونيتور بالعافية.

بروفوسير سى السيد..... بعد اذن عدالتكم...

سؤال ولو فيها ثقاله...

مين لورا دى؟؟؟؟؟؟.

صحيح ياسي السيد مين لورا دى ؟

إلا صحيح يا سي السيد.. مين لورا دي؟

[عازفه على أوتار الذهب]

بصي بقى يا إيناس .. اللي اوله شرط أخره نور :) .. العيلة كلها تتفق على سؤال واحد و تعينوا متحدث رسمي يقول السؤال.

يا تسألي انتي يا إما داركر يسأل يا إما نورا يا إما دهب .. آه .. مش عايزين زحمة هنا :angry:

يعني بالأسئلة دي يكون راح حق نورا و داركر و(( كمان دهب)) في إنهم يسألوا

دهب دهب دهب ددددددد دهب

جاوب هتكسب دهب دهب

من غير ما تحسب دهب دهب

اصل الاجابه تسوى الداهاااب

ايه اللي انت كتبه فوق ده يا موديست

بما انك بقى مش عايزني اسألك

فأناجمعت لك شوية أسئله وجيت..

اول سؤال

س:ايه اكتر الحاجات اللي بتحس انها انجازات فحياتك او نجاحات؟؟

س:لو حد ظلمك بتعاتبه ولا بتفضل الصمت؟؟

س:لما بيتوجهلك نقد بتضايق ويبان عليك ولا بتتقبله بروح رياضيه؟؟

س:لو حد طلب منك توصل خبر وحش لصديق عزيز عليك هتوصله بنفسك ولا تطلب من حد غيرك يوصله؟؟

س:ايه اكتر حاجه ممكن توصلك لدرجة الغضب؟؟

س:صفه فنفسك بتعتز بيها ؟؟ وصفه عايز تتخلص منها؟؟ :angry:

وكان هذا كما ذكرت سابقآ اول سؤال

يارب مكونش تقلت عليك يا موديست

انا لو مكانك اجاوب بكلمه واحده بس ..وانت مالك :wub:

:angry: :angry:

هرجعلك تاني بعد نقطتين :angry: --- دقيقتين :angry: ---ساعتين :angry:

المهم مش هتاخر ان شاء الله...

تم تعديل 5 يناير 2007 بواسطة عازفه على أوتار الذهب

[نانو]

تيب اذا كان الوضع كده و كله داخل يقول اللي في نفسه

انا بقي مضطره اقول ولو اني كنت مشفقتون عليك

1-عندما ينتابك صراع بين العقل والقلب من يفوز؟

2-هل لك ثوابت في تعاملك مع شخصيات الاخرين ام تتغير بتغير الشخص الذي تتعامل معه؟

3- هل تحب التعامل مع المراه الذكيه ولا اللي لا سمح الله يعني...؟ و ليه؟

4-قلبك ابيض ولا اسود ولا كاروهات؟

5-ليه مافيش لك مواضيع كتير باسمك تناقش فيها قضيه ما وراي معين و مواضيعك مقتصره علي الخدمات الخاصه بالكومبيوتر ...؟

6-متي احسست انك تريد ان تبكي في موقف يحتاج للصمود؟

كفايه كده...و معايا شريطين توسكافين وواحد بلهارزيد علشان الاسئله بتاعه النهارده :wub:

[memo2007]

ازيك يا موديست قلبى معاك :wub: :) :angry: اه روحت وشفت الاجابه معلش بأه العتب على النظر رغم انى دورت على الاجابه بس مالاقيتهاش .............. اصلى لابسه نظارة كعب كوبايه :angry: ............... سماح النوبه..................................سؤالى النهارده ......... هو موضوع مكتوب فى المواضيع الخفيفه ومحدش شارك فيه .......... وهو هل من الممكن ان تحب شخص لم تراه؟ eey:: جاوب بجد وياريت تاخد كل جوانب الموضوع اوكيه

[Diab]

صديقي مودست

كان الله في عونك وأنت تواجه تلك الذئاب البشرية الجائعة - خصوصاً عصابة الكويت بزعامة داركر-التي تريد أن تأكلك لحم وتتركك عظم بالأسئلة الطويلة جدا والشخصية جدا

سؤالي هو

1- يا تري بتحط ف عربيتك بنزين عادة91 ولا سوبر 95 ممتاز أم ستين هللة :wub:

تم تعديل 5 يناير 2007 بواسطة Diab

[مصرية يعني مصرية]

لا حول الله

إيه ده :)

كده هتطفشوه

يا عالم الرحمة mfb:

في كل مرة سؤالين بس

مش 3 جرايد ورا بعض إنتو إيه حرام عليكم

هو محمود ماوراهوش حاجة غيركم؟؟؟؟

مش هيلحق

و يبقا لازم له سنة على الكرسي :D

قلبي بيتقطع عليك يا خويا

طب سؤال واحد

إيه إللي مصبرك على الناس دول؟؟؟؟

[Modest]

أستاذ باشمهندس محمود

قلبي معاك

أتمنى لك إقامة مريحة على الكرسي

تحية واحترام لك

عزيزي د. فولان

أشكرك على تمنياتك الطيبة .. أما عن الإقامة فهي غير مريحة خالص و لكن حكم القوي على الضعيف :)

مع أرق تحياتي لشخصك الكريم

[Modest]

عم Modest... قلبي عندك....شفت الكوسه والحقد الاهلوي. :) ...حطوك على الكرسي ياحرام. -_- ... انا من هنا باهديك اغنيه اخي جاوز الظالمون المدى :D

بس دا ما يمنعش إني هسألك 3 اسئله مهمه...

1. معاك كارت احمر ممكن تطرد بيه عضو اهلاوي من المنتدى وعليك ان تختار واحد من تلاته

-اخونا واحد تاني الاهلوي الاسكندراني المنيري :P

-نواره المنتدى اللي حطتك على الكرسي من البدايه ناش ;)

-صاحب السعاده معالي لخديوي س س ...صاحب ال 8000 وشويه مشاركه :huh:

كارت واحد بس؟

بحبحي إيدك شوية يا سيوة .. دي فرصة لن تتكرر .. عموماً ، مادام أوكلتي لي هذه المسئولية أمام الأعضاء الموقرين هاحاول أخدمكم و أتصرف على الوجه اللي يرضيكم جميعاً

أخونا واحد بيه تاني .. و علشان أنا طيب و قلبي أبيض .. كفاية عليه كارت أصفر لأن له سابقه واحدة و لولا فيلم جعلوني مجرماً كنت إديته الكارت الأحمر و أنا مرتاح البال مطّمّن

صاحب السعاده معالي الخديوي س س .. كارت أحمر بلا تردد .. و لكن سيتم العفو عنه في حركة 1/7 باعتباره من أُسَر الشهداء

أمّا ناش نواره المنتدى .. ناش .. قلتي ناش؟!! ... هو أنا لي بركة إلا ناش .. بتقولي ناش؟!!!!!!! ناش اللي نجدت لي الكرسي بالمسامير و قالت لي اتفضل أقعد و على وجهها ابتسامة عريضة mfb: .... ناش يا ستي هالِف لها دستة كروت حُمر في لفة هدايا شيك كده و بعدين أتفق مع شركة من بتوع الحراسة تعيّن 6 حراس أمن على باب المحاورات و تبقى توريني هاتدخل تاني إزاي :D

2. إذا عينت رئيسا للوزراء ليوم واحد...ماهو اول قرار ستصدره!!!!!!!

أضحك عليكي إذا قلت لك هاقدر أعمل حاجة ... هو رئيس الوزراء في بلدنا في إيده حاجة يا سيوة؟ رئيس الوزراء ما يقدرش يتنفس بدون تعليمات سيّدُه القاطن في القصر الجمهوري... و تقولي لي أقرر؟!!!

إطلعي بالرتبة فوق شوية يا سيوة علشان اقدر أعمل حاجة

3. ماذا تمثل لك الاغاني التاليه ولمن تهديها!!!!!

اروح لمين لثومه

ذكريات لعبد الحليم

حبيب العمر لفريد

مخاصمني بقاله مده لشاديه

ياادي النعيم اللي انت فيه يا قلبي لعبد الوهاب وليلى مراد

لعبه الايام لورده

اوبريت العقلاء لسمعه

واخيرا وليس اخرا فات الميعاد لثومه تاني.... معلش اصل ثومه ديه جوه قلبي كده

إديني فرصة أفكر في من سأهديهم الأغاني يا سيوة .. و في قول آخر "إمنحني بعض الوقت" :P

وشد حيلك وكلنا لها :sad:

باشِد أهو

.

[Modest]

سلام عليكم

من ساعة ما إبتدا الموضوع ده و أنا بادخل أقرأبس

و خايفة لا أجي أقول كلمة كده أو كده

ألاقيني متجرجرة تاني يوم على الكرسي

زي أخويا مودست :D

إيه ده؟؟؟ :D

إيه إللي بتعملوه في الراجل ده؟؟؟

حرام عليكم

واحده واحده :)

بالراحة

هو هيطير... :P

الله يكون في عونك با خويا

قلبي معاك :huh:

أنا متأثر جداً يا مصرية من طيبة قلبك و حرصِك على أخوكي -_- .. لدرجة إني بافكر أكتب لك الكرسي و أنا باكتب وصيتي في نهاية الأسبوع mfb:

شفتي عاملين فيّا إيه؟

قومي بقى حمري لي شوية بطاطس أتقوِّت بيهم علشان أعرف أرد على باقي الأسئلة :sad:

.

[Modest]

سلام عليكووووو ( بصوت عوكل الجن )

انا بقالي اسبوع مدخلتش من ايام الست ناش ربنا يجذية خير بقى ( على التذنيبة الياهة :D )

المهم ..... عموا مودسيت هو الي قاعد يا حصرة علية ..... والادهى ان الكنج س س جي وسانن سكاكينة علية واهو لسى خارج من عيد الاضحى ربنا معاك يامدسيت

اسئلتي

1- هل تشتاق الان للحياة قبل الزواج( حياة العزاب ) والصحبة الحلوة ؟ ولا عجباك العيشة داخل قفص الزوجية ؟ ولماذا ؟

2- الى متى سوف تتمسك بانتمائك الى ( اللهم احفظنى ) نادي الزمالك ؟ وما هو الحد الذي سوف تقرر فية ان تتبراء منة كما تبرء منة حوالي 60 % من مشجعية :P ؟

3- اية الموقف الي لمى تفتكروة تعض تضحك ؟ واية الموقف الي لما تفتكرة يبقى هاين عليك تعيط ؟

كفاية كدة .... وربنا يعينك

أنا مش هاجاوب إلا في حضور المُترجِم بتاعي :huh:

أهلاً بديزل الساعة 12 :sad: ... هاحاول أفهم إنت كاتب إيه و أرد على هذا الاساس .. و إذا جاوبت على سؤال تاني خاااالص تبقى غلطة المترجم mfb:

1- هل تشتاق الان للحياة قبل الزواج( حياة العزاب ) والصحبة الحلوة ؟ ولا عجباك العيشة داخل قفص الزوجية ؟ ولماذا ؟

أشتاق و لا اشتاق .. بمعنى أنني أشتاق إلى صحبة ما قبل الزواج و لكن أين هم الآن؟!! .. الكل تزوج و تفرقنا لأسباب مختلفة كالعمل و السفر و الهجرة و و و .. إذاً هو اشتياق لذكريات جميلة مستحيل تكرارها.

عاجباني العيشة داخل قفص الزوجية؟!.. الحمد لله عاجباني و عقبال كل اللي بره القفص .. أخوك يا ديزل اتخطف بدري شوية و أحمد الله الذي رزقني زوجة صالحة و أبناء أفخر بهم و أدعوكم للدعاء لهم معي بالصلاح و النجاح بإذن الله.

2- الى متى سوف تتمسك بانتمائك الى ( اللهم احفظنى ) نادي الزمالك ؟ وما هو الحد الذي سوف تقرر فية ان تتبراء منة كما تبرء منة حوالي 60 % من مشجعية :P ؟

ماله الزمالك يا سيدي؟!! :) .. إحنا ممثلين طبقة الضعفاء المُمَثَّلين في جميع الأندية أمام نادي الحزب الأوحد.. عايزني أسيب الشعب يا ديزل؟... أسيب الشعب الكادح الغلبان و أنضم للحزب الوطني؟ :D

3- اية الموقف الي لمى تفتكروة تعض تضحك ؟ واية الموقف الي لما تفتكرة يبقى هاين عليك تعيط ؟

هاسأل لمى بنت طارق صديقي عن الموقف اللي تعض تضحك و هارد عليك -_-

استنى يا ديزل . باعدّل المداخلة علشان ما تمشيش زعلان بس .. إفتكرت موقف بعض اضحك عليه كل ما أفتكره

في يوم من ذات الأيام و اثناء عودتي من عملي حوالي الساعة الثالثة صباحاً بعد قضائي بالعمل حوالي 3 ايام بدون نوم لوجود مشكلة كبيرة اضطررت للبقاء حتى تم حلها .. و انا راجع يا سيدي وقفت في إشارة مرور و كنت لوحدي في الطريق و متهيألي كنت لوحدي في البلد كلها .. المهم ما طوّلش عليك رحت في النوم بعد ثواني من وقوفي في الإشارة حوالي 40 دقيقة و ما صحيتش إلا على صوت نقر على الشباك اللي جنبي .. واحد بيصحيني و هو بيضحك و يقول لي: أجيب لك لحاف؟ ;)

أما عن الموقف اللي لما أفتكره يبقى هاين عليا أعيط فبالتأكيد هذا الموقف اللي أنا فيه دلوقتي في الكرسي المنيل ده

كفاية كدة .... وربنا يعينك

كفاية يا ديزل و على مهلك عند مزلقان قليوب.

.

تم تعديل 6 يناير 2007 بواسطة Modest

[حسين]

منور يا باشا والله....

انا عندي سؤال واحد وعارف انك مش هترضي تجاوب عليه ..... ولقيت جزء من اجابة سابقة فعرفت الرد هيكون ايه .

لكن في سؤال تاني ويا ريت تجاوبني ..... امتي هنقول عفي الله عما سلف ؟ والمسامح كريم.

بجد وحشني جدا .... وان شاء الله نتقابل قريب ..... يا رب .

[إبن مصر]

أخى العزيز..

1- ما هو مفهومك عن الحريه.. ومتى تشعر بها... وما هى حدودها؟

2-اذا تضارب المبدا مع الموقف ولابد من قرار فاى منهم تضحى به ؟

3-متى تتوقف عن الرحيل والغربه وتستعذب الرجوع الى الوطن؟

4-ماذا يعنى لك الحب؟؟؟؟؟؟؟

أشكرك ..

بالشفا ان ان شاء الله..

وهاتجاوب بجد مش.. من عينه :

سؤال صعب مش فاهمه..

وبتاع..

وهاحاول..

وربا يوفق

ويالله حصل خير..

أحمد محمود

دكتوراه البراءه المقتعه من جامعه نيويورك ببولاق ابو العلا

و سحلاج فرن افرنجى

[Siwa]

تصدق يا استاذModest ....حضرتك حقيقي صعبت عليه من اللي بيعملوه فيك :sad: :) . عشان كده مش هسأل حضرتك اي اسئله تانيه لغايه ماتقضي المده على خير ونقول لحضرتك كفاره إن شاء الله :rolleyes: .

ربنا يعينك ويصبرك على الاهلويه الاعزاء :excl:

[Modest]

يا عينى عليك يا محمود :wub:

كل دى سؤلات

دول كانوا مستنينك ولا اية

عموما انا دخلة بس اشجعك وامشى لحسن حد يشفنى يفتكرنى على راى سهام

يلا شد حيلك وكلة بيعدى يا صاحبى mfb:

منورة يا نانسي .. ما تاخدي لفة بالكرسي الحلو ده ..مايغلاش عليكي أبداً اتفضليه من دلوقتي :rolleyes:

ماهو ما ينفعش كل واحد يعَدّي يقول يا حرااام .. يا عيني عليه .. كان طيب :sad:

تعاطفك لوحده مش كفاية .. تبرع و لو بـ 5000 جنيه

[se_ Elsyed]

كنت عايز أسألك نفس السؤال اللي سألهولك آبيه أحمد محمود :

س : قولي إلى أين الرحيل .. في غربة الليل الطويل ؟

بجد يا موديست بصفتك من الناس المخضرمين في الغُربة .. ده أنت من أيام الملك عبد العزيز مؤسس السعودية - هل حطيت لنفس جدول - ضرب - وفيه نهاية للغربة .. ولا مطرح ما ييجي في عيني النوم .. أنانم وأنا مرتاح البال وأهي أيام بتعدي ؟

س 2 : بإذن الله احمد لما ياخد الإي جي أوبستروف إس السنة دي .. هاتنزلة مصر يكمل تعلميه الجامعي هناك ... وهل ممكن تسفره بره - الزقازيق مثلاً - عشان يبقى متعلم بره ؟ وفي حالة الإجابة بنعم .. وهايجيلك قلب يا أسي ؟ خصوصاً إنه مش مخربش ومتربي في السعودية يعني من البيت للجامع ومن الجماع للبيت ؟

فاضل 3 أيام عبال ما يُفرج عنه .. عايز أستحضر جميع قوى الشر المزروعة بداخلي ... يا أبا الغضب .. الكرة النارية .. الصحن الدوار .. الأعصار المُدمر

[Modest]

يا هلا يا مرحبا

موديست قاعد ومستنيينه من زمان

بص انا معروف عنى انى هادية ومابعرفش اثير مشاكل ابدا ودايما بهدى النفوس حتى اسال سى السيد

اهلاً و سهلاً بالغالية أم محمد

معروف عنك إنك هادية و مش بثيري مشاكل؟!!! قصدك كااااان معروف عنك قبل ما تسأليني :sad:

يعني بدل ما تيجي زي مصرية و نانسي تشوفي أخوكي جعان و لا عطشان و لا محتاج قرشين تقومي تيجي تسألي زي بقية الأشرار؟؟ :ph34r:

عموماً أنا هاجاوب علشان خاطر مادا بس :wub:

الاسئلة بسيطة خالص

ياترى المدام بتحب النت واصحابه ولا لأه؟ :ph34r:

المدام كاانت في الأول ضد النت لإنه في رأيها disconnecting people على عكس نوكيا connecting people -_-

و ده طبيعي لأنها كانت شايفة النت واخده جوزها و أولادها لفترات طويلة شوية و كان الأمر ما يسلمش من زغرة كده و لا كده أثناء مرورها من أمامي و أنا قاعد على الكمبيوتر بس كنت باعمل مش واخد بالي :wub:

بعد بعض المحاولات نجحنا في تجنيدها كعميل مزدوج .. يعني خليناها تحب النت و بقينا ندخل سوى نتصفح مواقع بها اهتماماتنا المشتركة و في نفس الوقت قللت أنا نسبياً من وقت استخدامي للنت بمفردي خصوصاً لما أشعر إن "الزغر" سيتحول إلى ما لا يحمد عكباه :huh:

أيضاً كانت لا تعترف بالصداقة الافتراضية و لكن بعد أن تقابلنا على المستوى العائلي ببعض أصدقائي الذين تعرفت عليهم من خلال النت و وصل الأمر إلى قضاء أيام جميلة مع صديق عزيز جداً و عائلته في مارينا في أحد الصيفيات الماضية ، تغيرت نظرتها عملياً و اقتنعت بأنه لا فرق بين الصداقة عن طريق النت و الصداقة في الواقع مادام اختيار الصديق يتم بتأني و أن النت كأي مكان به النوعين ، الجيد و غيره.

الخلاصة أنها لا تكره في النت أكثر من إنه يقلل من أوقات اجتماع الأسرة ... عدا ذلك فهي نفسها تقوم بتصفح النت في الأمور الحريمي كالموضة و المطبخ و الديكور .. إلخ

ياترى ممكن تتجوز على المدام يوما ما؟ :blink:

يا نهار كوبيا!!!!!!

هو اللي يتجوز مرّة يتجوز تاني يا أم محمد :sad:

لأ حقيقي انا أحمد ربنا سبحانه و تعالى و أشكر فضله على توفيقي إلى هذه الزوجة الرائعة.

ياترى تخصص مدنى بيعرفوا جرافيك كويس ولا بس بيقطعوا علينا عشان همه شاطرين فى كل حاجة ده استفسار بس يا فندم؟

الأمر بالنسبة لي هواية جميلة وجدت الفرصة لأتعلمها بنفسي لأنها نوع من الفنون التي أحببتها و أحاول قدر إمكاني تعلُّم الجديد فيها.

أما لو شايفة إننا بنقطع عليكم يبقى أسيب الجرافيكس من النهاردة و أفتح كشك سجاير .. إحنا عندنا كام أم محمد يعني

هو حضرتك ليه مالكش ولا بصمة فى باب الادب والشعر؟ هو احنا لا سمنح الله زعلناك فى حاجة؟؟ B)

للأسف ليس فقط في باب الشعر و الأدب و إنما في أبواب أخرى كثيرة أشتاق للكتابة فيها و لكن لسبب ما يصيبني بعض التردد لدرجة إلغائي لردود كاملة قبل إدراجها مباشرةً.

هذا لا يعني عدم قرائتي للمواضيع القيمة المليء بها المنتدى ، على العكس تماماً أنا حريص على قراءة معظم إن لم يكن كل المواضيع المطروحة و برُدُودِها كاملة.

و بمناسبة باب الشعر و الأدب عايزك تبلغي تحياتي لأبيه أحمد محمود لما تشوفيه هناك علشان خواطره "كلمات فى العشق والهوى" ... رهيبة بصراحة و مكسوف أدخل أرد عليه فيها ببيتين شعر من تأليفي أحسن هايكتشف إني في الأدب و الشعر بالذات .. ما كملتش تعليمي :rolleyes:

وبجد بجد ماتزعلش انا بهرج معاك لك حق الاجابة او الامتناع انت عارف غلاوتك عندنا (ابقى سيبلى تليفون البيت) mfb:

يسعد صباحك يارب

ام محمد

يسعد صباحك يا مادا و قول لماما تقرأ بس و ماتضيفش أي سؤال تاني :ninja: