كرسي الاعتراف

[DARWEEN]

طب سؤال سياسي ....................

انت ليه اهلاوي:angry2:

الرد بسيط يا نورا

لأني مصري

:angry2: -_- :wub:

الأهلي هو النادي الذي أنشيء لمحافحة الأحتلال

هو النادي الذي أنشيء ليرسي مباديء الوطنية

هو النادي الذي خرجت منه ثورة 1919

لم يكن يوما نادي مختلط مع المحتل

لم يكن يوما نادي الملك

عاوز تكون مصراوي ؟؟؟؟ لازم تكون أهلاوي

[Scorpion]

بفهلوة الأهلوية دبلرتني في السؤال بتاع : من أنت ؟

طيب ....

امتي حسيت بخوف حقيقي ؟

و ما هي أصعب مشكلة واجهتك و ازاي قدرت تتخطاها ؟

و عفوآ للسؤال الشخصي :

هل تزوجت عن طريق العاطفة ... ام عن طريق العقل ... ام لا هذا و لا ذاك و تركت للأهل الأختيار ؟

[kokowawa1979]

داروين كتب :

لم يكن يوما نادي مختلط مع المحتل

لم يكن يوما نادي الملك

ياعم خلليك في اللي انت فيه ياساتر !!!!!!!

الملك ياعم داروين هو اللي طلب تغيير اسم المختلط اللي هو الزمالك حاليا إلى اسم الملك ( فاروق) والسبب طبعا إن الزمالك كان فاز على الأهلي 6/صفر في نهائي الكاس ودي حقيقة بعدها الملك طلب يكون اسم المختلط إلى اسم الملك ( فاروق ) يعني الملك اللي جري ورانا ياعم داروين مش احنا اللي جرينا وراه :angry2: وبعدين ياعم مانتم كل بطولة تاخدوها تنسوا الجمهور وتهدوها للملك الحالي :angry2:

دلوقت سؤال تاني :

ياترى إيه هي المشاريع أو المجالات التي تعمل بها الشركة والتي تتولى الاستشارات المالية لها - فربما نستفيد من مجال عملها

[yasovinas]

صديقي القريب الى القلب البعيد عن العين داروين باشا ابن الاسكندرية الغالي سؤال على السريع كده علشان انا مستعجل

حسب ما انا شامم في الجو من حوالي اسبوع او اسبوعين وبالتحديد من اول موضوع اخونا سكوب بتاع سن اليأس - قصدي سن الاربعين وانا شامم كده نوع من انواع التمرد العاطفي او نقول اعادة شحن بطاريات القلوب ،، سؤالي هل انت من انصار الزوجه الثانيه ام ضد هذا الموضوع

ايضا هل ترى ان من حق الانسان اعادة ترتيب حياته العاطفية حسب المتغيرات والاحداث المتغيرة على الساحه العاطفية

[bentmasria]

استاذ داروين

سؤالات كده ع الماشى

ياترى مخطط ترجع لمصر امتى ان شاء الله؟

وناوى على ايه بعد سنين الغربة؟

ياترى ايه الخطأ اللى عملته فى حياتك ونفسك يرجع الزمن وتغير اللى كان؟

كل الاسئلة اختيارى يافندم انا يادوب مشرفة خضراء :)

[DARWEEN]

امتي حسيت بخوف حقيقي ؟

و ما هي أصعب مشكلة واجهتك و ازاي قدرت تتخطاها ؟

و عفوآ للسؤال الشخصي :

هل تزوجت عن طريق العاطفة ... ام عن طريق العقل ... ام لا هذا و لا ذاك و تركت للأهل الأختيار ؟

أنت دايما أسئلتك معقربه ليه ..

عموما ... حاحاول

الخوف ... حسيت بالخوف على نفسي لما أفقت في العناية المركزة في أول أزمة قلبية مررت بها

حسيت بالخوف على مهنتي حين أجبرت على مقارعة أحد الجهلاء ذوي النفوذ في أحدى الشركات التي عملت بها

حسيت بالخوف على المستقبل حين رأيت أبني الكبير أول مره بعد خروجه من غرفة الولادة

أصعب مشكلة واجهتني حين أضطررت للتنازل عن كل مدخراتي فجأة ... وتغلبت عليها بأني أعلم أنها مجرد فلوس أنا من جلبها وأنا من أستطيع أن أجلب غيرها

أنا يا سيدي تزوجت بطريقة غريبة جدا ... لا عقل ولا أهل ... ربما قليل من العاطفة ... والكثير جدا جدا جدا من الصدفة

[DARWEEN]

كوكوواوا كتب :

الملك ياعم داروين هو اللي طلب تغيير اسم المختلط اللي هو الزمالك حاليا إلى اسم الملك ( فاروق) والسبب طبعا إن الزمالك كان فاز على الأهلي 6/صفر في نهائي الكاس ودي حقيقة بعدها الملك طلب يكون اسم المختلط إلى اسم الملك ( فاروق ) يعني الملك اللي جري ورانا ياعم داروين مش احنا اللي جرينا وراه وبعدين ياعم مانتم كل بطولة تاخدوها تنسوا الجمهور وتهدوها للملك الحالي

لأ لأ لأ .. أنت اللي جبته لنفسك كده ...

أولا ماتش 6/0 جه فخر للأهلي ... لأن حيدر باشا ( وما أدراك من هو حيدر باشا ومدى عمالته للأنجليز ) كان رئيس إتحاد الكره ورئيس نادي المختلط في نفس ذات الوقت ( واخد لي بالك مين هو نادي الحكومة ) قوم أيه ... قوم حيدر باشا أوقف فريق النادي الأهلي كله لأنهم لعبوا مباراة في فلسطين ( واخد بالك من الوطنية ) .. قوم الأهلي لعب بفريق من الأعضاء اللي مالهوش في الكوره خالص وبالأمر الملكي ... قوم الملك فرح بالمختلط وأعطاه أسمه ( عماله في عماله يعني )

أما كل بطولة بناخدها فبتسلب إجبارا للملك الحالي بمجرد الفوز بها بيعلن التليفزيون أهدائها له قبل اللاعيبه ما يستلموها حتى :) ;)

ياترى إيه هي المشاريع أو المجالات التي تعمل بها الشركة والتي تتولى الاستشارات المالية لها - فربما نستفيد من مجال عملها

سبق أن ذكرت أنها مجموعة شركات تعمل في مجالات متعددة لكن أهمها هو :

أنشاء ممرات المطارات

تصنيع غرف ولوحات التحكم الكهربائي

تصنيع وانشاء وإدارة لوحات الدعاية العادية والألكرونية

أستيراد معدات التحكم الكهربائي

دعاية واعلان

[DARWEEN]

صديقي القريب الى القلب البعيد عن العين داروين باشا ابن الاسكندرية الغالي سؤال على السريع كده علشان انا مستعجل

حسب ما انا شامم في الجو من حوالي اسبوع او اسبوعين وبالتحديد من اول موضوع اخونا سكوب بتاع سن اليأس - قصدي سن الاربعين وانا شامم كده نوع من انواع التمرد العاطفي او نقول اعادة شحن بطاريات القلوب ،، سؤالي هل انت من انصار الزوجه الثانيه ام ضد هذا الموضوع

ايضا هل ترى ان من حق الانسان اعادة ترتيب حياته العاطفية حسب المتغيرات والاحداث المتغيرة على الساحه العاطفية

حبيب قلبي يا ياسو والله من يوم ما أتشرفت بمعرفتك ودايما وانت قريب من القلب وغالي

يا عمي الفاضل ... ومين يقدر يوقف قلبه ولا عواطفه ؟؟ دي حاجات خارج مجال التحكم لا إراديه .. ولكن موضوع الزوجة التانيه ده له حسابات تانيه خالص ..

ما أقدرش أقولك أنا ضده لأن ده شرع ربنا

وما أقدرش أقولك أنا معاه على إطلاقه لأن ده يبقى جنان

بمعنى ... أن الزوجه الثانية شيء ممكن ومباح شرعا ... حتقولي له شروط .... وأنا موافق ... من الشروط الأساسية هو مرض الزوجة أو عجزها

لكن سؤالي أنا بقى ... هل عجز الزوجة يعني أنها لازم تكون مكسحة أو بتشوف طشاش ؟؟؟ بالعكس دي في الحالة دي تكون محتاجة الرأفة والحنان أكتر

أنا في رأيي أن عجز المشاعر والأحاسيس أقوى وأخطر ... تبلد الأحساس عجز رهيب

لما الزوج يشعر أن مجرد كريدت كارد .. أو أي تي أم كارد .... يااااااااااه أحساس قاتل بجد ... أيوه أنا جربته وعشته

لكن ترتيب الحياة العاطفية يتوقف في المقام الأول على خط الدفاع اللي بتشكله الزوجة المحبة ... لا يعني ذلك أن تراقب زوجها أو تفتش جيوبه .. لكن أن تغلفه بمشاعرها ليكون عنده حصانه ضد أي أختراق

ليه حيشوف واحده جميله إذا كانت زوجته دايما جميله أما عينيه

ليه حيشوف واحده عاطفيه إذا كانت زوجته مشحونه بالعاطفه دائما

ليه حيشعر بإهتمام واحدة تانيه إذا كان محور إهتمام زوجته الأول والأخير

لكن لو الست اطمأنت أنها أتجوزت وجابت العيال وخلاص كده مهمتها خلصت ... يبقى لا عتاب على الرجل لو أستطاع أن يقيم توازناته بشكل سليم وشرعي ومحترم

استاذ داروين

سؤالات كده ع الماشى

ياترى مخطط ترجع لمصر امتى ان شاء الله؟

وناوى على ايه بعد سنين الغربة؟

ياترى ايه الخطأ اللى عملته فى حياتك ونفسك يرجع الزمن وتغير اللى كان؟

كل الاسئلة اختيارى يافندم انا يادوب مشرفة خضراء :sad:

حاضر يا أم مادا .. أنتي تأمري

مخطط أرجع أمتى ... قلتها قبل كده ... مش محدده بمعيار زمني ولا حتى معيار مادي ... بس أكيد حارجع لما يكون لامفر من الرجوع ولا خيار آخر

ناوي على أيه بعد سنين الغربه .... حاتجوز واقعد في البيت :) ;) ( باهرج )

طبعا حيتوقف على الوضع ساعتها حيكون أيه بالظبط

ممكن تسألي أيه الصح اللي عملته في حياتك وحتكرره تاني .... وصدقيني قليل جدا جدا .. لكن أخطائي في الحياة كانت كتيره وأحيانا ساذجه

[Ahmad Farahat]

من غير زعل يا سيد داروين..........

لماذا داروين تحديدا؟؟؟؟؟؟؟؟؟

لماذا كان النيك نام الخاص بسيادتك منسوبا إلى هذا العالم الغبي تشارلز داروين؟؟؟؟؟؟

أعرف جيدا أن أرسين لوبين كان لصا ولكنه لم يكن غبيا...........

هذا هو السؤال............

سهل قوي :lol:

[DARWEEN]

سؤالك مكرر يا أرسين وجاوبته

أقولك يا سيدي ...

أنا شخصيا لا أحب العالم داروين كشخصية ولكني من أنصار البحث عن جذور الأشياء وأصولها ... أعجبت بأسم النظرية ولم أعجب بمحتواها

وحين إنضممت للمحاورات وددت أن أشير إلى أني لا آخذ بظواهر الأمور ولكن بأصولها

مش تذاكروا الأول وبعدين تسألوا

[Scorpion]

أحممم ... دستور .... قشطة مافيش حد .. اجري ارمي الأسئلة عالترابيزة و زووووو قبل ما يصحوا ...

السيد الفاضل داروين ...

عمت مساء سيدي الكونت ... هناك بضعة اسئلة في جعبتي ليتكم تجيبون عليها

لو في الشغل كنت متأكد ان رئيسك ( اللي لا يقبل النقد ) عمل غلطة .. حتلفت نظره و لا تكفي عالخبر ماجور ...

لو الزمن رجع بيك ايه الحاجة اللي حتكررها .. و ايه الحاجة الي مش حتعملها من اساسه ( في كلتا الحالتين الزواج خارج المقرر ... بمعني شوفلك اجابة تانية )

علي وزن من أنت ... اوصف نفسك في جملة واحدة ...

من ترك بصمة علي حياتك ...

هل أخطأت أبدآ في حكمك علي انسان سواء ايجابيآ او سلبيآ .. مع ذكر مثال واحد

و بس ... و وعد مش حسأل تاني

المعذبة زوزو ....

[نانو]

نونكن اسأل سوالين تلاته اربعه خمسه سته وخلاص :closedeyes:

ايه الحاجه اللي بتخليك تستشيط غيظا ( مش عارفه كتبت تستشيط ديه ازاي :ninja: ) ؟

هل انت روتيني في يومك و حياتك ولا عشوائي؟

لما بتكون متضايق اوي اندماجك مع الاسره والولاد بيخرجك من الضيق ولا بتفضل تبعد عنهم ؟

ايه اكتر حاجه بتهرب بيها من الضغط العصبي من الشغل او البيت ...يعني مثلا تقعد لوحدك....تتفرج علي فيلم كوميدي ...تسمع اغاني معينه....تخرج تقابل احد من اصحابك....او اي شئ تاني

لو عندك فرصه للسفر لفسحه هتأخد مين معاك مع العلم انك مش هاتتاخر و البيت والولاد هايكون في امان ؟

كل الاسكندرانيه بيحبوا اسكندريه اوي ...تفتكر ليه؟؟؟ وايه اكتر مكان بتحب تروحه...يعني ما ينفعش الاجازه تعدي غير لما تروحله؟؟

خلاص كفايه كده .... وهاوافيك بالتحليل الفوري لشخصيتك :unsure:

[DARWEEN]

جرى أيه يا سكوب هو أنت بتسأل كل الأسئله اللي في نفسك قبل ما تنسى :wub:

ماشي يا عم .. إسأل إنت ولا يهمك

لو في الشغل كنت متأكد ان رئيسك ( اللي لا يقبل النقد ) عمل غلطة .. حتلفت نظره و لا تكفي عالخبر ماجور ...

بالصدفة إنها حصلت قريب قوي ... وأنا مش بس لفت نظره ... أنا عملت مصايب سوده :o :lol: ولسه لحد دلوقتي في مشاكل بسبب ده بس مازلت مصمم أني على حق

لو الزمن رجع بيك ايه الحاجة اللي حتكررها .. و ايه الحاجة الي مش حتعملها من اساسه ( في كلتا الحالتين الزواج خارج المقرر ... بمعني شوفلك اجابة تانية )

ما قلنا بلاش أسئله مكرره ... بس برضه حاغيظك وأجاوب

الحاجه اللي حكررها أني أشترك في محاورات المصريين :wub: :wub:

الحاجه اللي مش حاعملها من أساسه ... كتير قوي ... بس أهمها أني كنت حأقبل منحة لدراسة الدكتوراه رفضتها بغباء شديد ... وأيضا كنت لن أحسن لكثيرين ممن أحسنت لهم وأساءوا لي

علي وزن من أنت ... اوصف نفسك في جملة واحدة ...

صعب يا سكوب الواحد يوصف نفسه ... عارف زي ماتكون بتتصور صورة ... المصور هو الوحيد للي يقدر يقولك شكلك أزاي لأنه الوحيد اللي شايفك

بس أقدر أوصفلك نفسي حسب رؤيتي الشخصية بجمله واحده ( الحالم في عالم الواقعية ) :wub: :huh:

من ترك بصمة علي حياتك ...

كثرين جدا ... أكثرهم تأثيرا .. جدي رحمة الله عليه ... لا أظن أنه إنسان قابل للتكرار

هل أخطأت أبدآ في حكمك علي انسان سواء ايجابيآ او سلبيآ .. مع ذكر مثال واحد

كثيرررررررررررررررررر جداااااااااااا ... آخرهم كانت إنسانة ساعدتها في العمل ووضعتها في مقام إبنة لي وكنت أظنها ملاك لا يعرف من الحياة سوى طيبة القلب وإتضح لي أني كنت على خطأ طوال الخط

و بس ... و وعد مش حسأل تاني

المعذبة زوزو ....

ياسيدي إسأل ولا يهمك ماهو أوكازيون :lol: :lol: ما عاش اللي يعذبك يا زوزو

[DARWEEN]

حتى أنت يا نانو

يال ماهي صيده بقى ووقعت لكم من السما :wub: :huh:

ايه الحاجه اللي بتخليك تستشيط غيظا ( مش عارفه كتبت تستشيط ديه ازاي ) ؟

يستشيط دي من الزمخشري :wub:

شوفي ياستي .. أكتر حاجات بتغيظني هي .. الإستهبال ... الإستنطاع ... الأستغباء .... ضباط الشرطة المصريين ( حتى إصحابي وقرايبي )

هل انت روتيني في يومك و حياتك ولا عشوائي؟

لا مش روتيني خالص بس كمان مش عشوائي ... تقدري تقولي مزاجي النزعه .. يعني باتصرف حسب المود الداخلي

لما بتكون متضايق اوي اندماجك مع الاسره والولاد بيخرجك من الضيق ولا بتفضل تبعد عنهم ؟

بابعد حتى عن نفسي .. مش علشاني لكن علشان ما أزعلش حد معايا

ايه اكتر حاجه بتهرب بيها من الضغط العصبي من الشغل او البيت ...يعني مثلا تقعد لوحدك....تتفرج علي فيلم كوميدي ...تسمع اغاني معينه....تخرج تقابل احد من اصحابك....او اي شئ تاني

أمشي على البحر وأسمع موسيقى هاديه جدا ... أو أنام

لو عندك فرصه للسفر لفسحه هتأخد مين معاك مع العلم انك مش هاتتاخر و البيت والولاد هايكون في امان ؟

طبعا بأروح لوحدي أو مع حد يكون قريب جدا جدا لنفسي ... بتقولي فسحه .. يبقى فسحه من كل حاجه

كل الاسكندرانيه بيحبوا اسكندريه اوي ...تفتكر ليه؟؟؟ وايه اكتر مكان بتحب تروحه...يعني ما ينفعش الاجازه تعدي غير لما تروحله؟؟

إسكندريه دي بقى حالة عشق خاص جدا ... حالة شجن مع البحر والصمت والذكريات ... أيام الجنان .. جلسات الأصدقاء ... مفيش حد يقدر ينكر إن إسكندريه دي حالة تميز ... حالة رقي وجمال وسط موضه من العشوائية

أكتر مكان أحب أروحه كل أجازه ... في إسكندريه ... المنتزه (حديقة السلاملك) .. المنشية .... قبر أبي وجدي ... حضن أمي

خلاص كفايه كده .... وهاوافيك بالتحليل الفوري لشخصيتك

مش تقولي أنه أمتحان ....... يارب أنجح يارب

[inas]

استاذ داروين اليوم المفروض ترشح ثلاث اعضاء

ويفتح باب التصويت

وذلك بعد ان تنتهي اجاباتك

[nora]

يا عالم الراجل نشف على الكرسي الرحمه

قبل ميفكوك سؤال صغير

شعورك ايه بعد كل هذا الكم من الاساله ندمان على المشاركه؟؟

[DARWEEN]

يا عالم الراجل نشف على الكرسي الرحمه

قبل ميفكوك سؤال صغير

شعورك ايه بعد كل هذا الكم من الاساله ندمان على المشاركه؟؟

آه والله يا نورا يا أختي .. نشفت من القعده اللي ما يعلم بها غير ربنا دي

شعوري أيه بعد الأسئله ؟؟؟ زي ما أكون كنت قاعد أحلق في الأستاد والبشر كلها بتتفرج عليا :huh: :o

يالا علقة تفوت ولا حد يموت

بس أنا ليا سؤال ... ليه ماحدش بيعقب على الإجابات ؟؟ :wub: :wub:

نفسي أعرف تحليلي النفسي يا نانو

أرشح من المشرفين ... فولانه

أرشح من المشاركين في الموضوع ... نانو

من غير المشاركين ... يحي الشاعر

[نانو]

بس أنا ليا سؤال ... ليه ماحدش بيعقب على الإجابات ؟؟ :ph34r: :ph34r:

نفسي أعرف تحليلي النفسي يا نانو

اعقب يا افندم حضرتك تأمر

واقولك ....انت شخصيه ....تقفز فوق ارض الواقع ....يعني مزيج من الواقعيه والخيال ..... وده يخليك بتتمتع بشئ من الاتزان النفسي

لان حضرتك لما بتصدم في الواقع بشكل ما ...بتهرب للعالم الاخر الذي تمكله و تعيش فيه لفتره ما ....زي فتره نقاهه كده تعيد بيها لنفسك وروحك حيويتها وتعود مره اخري الي ارض الواقع بما فيه من مشاكل وهموم .... وبالمناسبه العالم الاخر ده مش ضروري تكون فيه لوحدك ...يعني ممكن يشاركك فيه حد عزيز عليك ....لكن الفكره انه عالمك الخاص اللي انت بتحبه و بتستمد منه الطاقه لتكمل المسيره

كان معكم نانو محلله نفسيه ...مليانه عقد :ninja:

تم تعديل 12 فبراير 2007 بواسطة نانو

[nora]

ردي على كلمة مفيش حد بيعلق على ردك لان بمنتهى البساطه نكهربك وكمان نسلخك حرام:ph34r:

اما الترشيح باه طبعا مع احترامي للكل بس في حد نفسي اشوفو وهو منور الكرسي ...........

هو

هو

نانو :ph34r: معلش يا بسبوسه بكره تبقى كنافه :ninja:

[MZohairy]

من انت؟ :ninja: