كرسي الاعتراف

[shahd]

كلمة قلتها في لحظة غضب.. لحظة طيش.. مجرد هزار .. قلبت موازين حياتك .. ندمان عليها لحد النهاردة؟؟

[darker19]

إبننا داركر

تاني

س : وإنتا شاب كنت لعبي ولا كنت ماشي جمب الحيط؟

ج : بسم الله الرحمن الرحيم .. هاجاوبك على الخاص

إقتباس

( والله لا أوريك يا دراكر )

س س حبيب قلبي استنيت الرسالة ما وصلتش....

ما علينا مش عارف هاتعد تتهرب لغاية إمتى

س: وزنك كام بعد أكلة الباشمل و قبلها؟؟؟؟؟؟

سؤال يدوخ مش كده؟؟

-------------------------------------------------------------------------------------------

بنتنا نورا

س : إتغديت إيه النهاردة

ج : بسم الله الرحمن الرحيم : مكرونة بالباشمل وأشياء أخرى

س: إذكر بالتحديد ما هيا الأشياء الأخرى؟

------------------------------------------------------------------------------------------

أخر سؤال:

ولا أقلك كفاية عليك كده جاب دول على ما أجهزلك أسئله غيرها......

[shawshank]

سي السيد

عندي سؤالين غلسين و مش عارف الرقابة هتسمح بيهم و اللا ايه

س1 - لو دخلت المحاورات و وجدت مشاركة من الأستاذ الفاضل عادل أبو زيد (كعضو) و فيها خرق لقواعد محاورات المصريين ، ماذا تفعل كمشرف ؟

س2 - لو دخلت المحاورات و وجدت مشاركة من أحد الأعضاء (Member) و فيها خرق لقواعد محاورات المصريين ، ماذا تفعل كمشرف ؟

[Modest]

مين اللي على الكرسي ده :) ... سين سين حبيبي و ابن حبيبي :)

سؤال في السريع كده يا سيكو سيكو

من المعروف إنك بتعمل مقابلات شخصية - المعروفة بالفرنسية بإسم (إنترفيوز) :angry2: - للمتقدمين لشغل وظائف عندكم بالشركة... تمام كده؟

تعالى نقلب الموضوع و نفترض إنك رايح تعمل إنترفيو في شركة لتشغل إحدى الوظائف فيها .. يعني موظف شاي و قهوة ، عامل أسانسير ، مدير عام ، كده يعني.

يوم المقابلة لابس اللي على الحبل و مستلف مني كرافات لونفان سالفها من أخويا الكبير من 4 سنين من غير ما ياخد بالُه.

و مشمع الفتلة و مسبسب شعرك و ضارب فرشتين جيل منيّم بيهم القُصّة .. و حاجة 100 100 يعني :)

قبل دخولك إلى المقابلة و على الباب مباشرةً بصيت لقيت صباع رجلك الكبير طالع من الحذاء بيتفرج يشوف احنا فين بالضبط :unsure:

ما تأثير هذا على نفساويتك قبل المقابلة مباشرةً و كيف تتغلب على هازا (لا مؤاخذة يا نورا و إيناس و كل عيلة داركر بمنيا القمح) الشعور و كيف ترُد على أسئلة المقابلة و أنت تشعر أن عيون السائلين سايبين كووول أناقتك و شياكتك و بيبصوا على صباع رجلك اللي طالع من ، لا مؤاخذة ، الحذاء.. ؟؟؟؟؟؟؟؟

و مع السلامو عليكو :P

[نانو]

كمان سؤال يا س س افندي

مش عارفه ليه بعد ما عرفت طبيعه شغلك من مشاركه موديست حسيت انك س س افندي

المهم حضرتك في الغربه بقالك 8 سنين تقريبا...انت ناوي علي ايه .....انك تكمل اطول فتره ممكنه طالما ربنا كاتب لك رزق هناك

بحيث انك تعيش اسرتك في مكان مريح و تنتهي حياتك بانك هناك لغايه الثانويه العامه

ولا سيادتك من انصار انك تقضي فتره معينه لغايه ما توفر مبلغ معين تعيش بيه مستريح و ترجع تعيش وسط اهلك واخواتك و بقيه عيلتك

تم تعديل 14 ديسمبر 2006 بواسطة نانو

[se_ Elsyed]

سي السيد

عندي سؤالين غلسين و مش عارف الرقابة هتسمح بيهم و اللا ايه

س1 - لو دخلت المحاورات و وجدت مشاركة من الأستاذ الفاضل عادل أبو زيد (كعضو) و فيها خرق لقواعد محاورات المصريين ، ماذا تفعل كمشرف ؟

س2 - لو دخلت المحاورات و وجدت مشاركة من أحد الأعضاء (Member) و فيها خرق لقواعد محاورات المصريين ، ماذا تفعل كمشرف ؟

أنا شايف الأسئلة التانية وهاجاوبها والله بإذن الله النهاردة

لكن سؤال شاوشيسكو إستفزني إستفزاز إيجابي وخلاني اجاوب

بص يا شاوشنك :

- إتعلمنا زمان إن مبدء مهم من مباديء الإدارة هو : المحافظة على صورة وهيبة الإدارة امام الاخرين

أياً كان الأخرين دول ، موظفين ، طلبة ، عُمال مش عارف إيه .. المهم إن لو مجتمع في إدارة مُعينة وفي ناس يعملوا تحت تلك الإدارة يبقى من الغباء - وأسف يعني - أن ينتقد أعضاء الإدارة بعضهم البعض أمام الأخرين ..

وبعدين يا أخي ده إحنا بنقول بالبلدي ومثل مُشابه كده " اللي يقول لمراته يا عورا .. الجيران يلعبوا بيها الكورة "

يعني حتى لو أ / عادل أبو زيد او أي عضو من زملائي في الإشراف إرتكب خطأ او أنا حتى .. فالتنبية والمناقشة لا يتم على الملأ .. وإنت بتبقى عارف إنت بتكلم وتنصح مين .. يعني قصدي هما مش من الناس المتحكمة والمتمسكة برأيها حتى لو خطأ ...

وبالتالي لو أحد منهم أرتكب خطأً ما - ونحن بشر نُصيب ونُخطيء - فيتم التنبيه عليه ومناقشته في المكان المُخصص ... وليست مجاملةً لأحد .. فجميعهم يتقبلوا ذلك بصدر رحب وكثيراً ما نتعدى مرحلة الكلام المكتوب فقط ونقوم بالتنسيق تليفونياً أو اللقاءات الشخصية إذا أمكن ذلك .

ومن البديهي طبعاً إني مش هاجي أقول للادفايزر - وخلينا نتكلم بصراحة - إنت غلطت فإطلع بره او هاديك إنذار علني أمام الناس ..... فهذا سيُعيبني انا شخصياً ,,

ده في اللي أكثر من كده كمان ..

شوفت نماذج كتيرة في حياتي العملية

وزير مثلاً أو مسئول أو أي مركز مُشابه - زي عبد الحليم خدام بتاع سوريا كده - يبقى بقى له سنين طوييييييييييييييله في إدارة مُعينة ولما يحصل خلاف ولا حاجه ويسيبهم يبتدي بقى يفرش الملايه ويعمل نفسه الحَمل الوديع ويُهاجم الأخرين اللي هو كان في نفس المركب معاهم ، مع إنه شارك في قرارات تلك الحقبة .. لكن ده بيكون عيب في الشخصية نفسها...

هأقولك مثل تاني ... الأخر مرتضى منصور لما وصل لمنصب رئيس نادي الزمالك وقال بؤ حمضان شهير أثبت فيه إنه كُفتجي وكبيره قوي يبقى عرضحالجي على أي باب محكمة فقد قال : وإنطلاقاً من مبدء الشفافية فسوف أضع كاميرات في غرفة الإجتماعات الرئيسية لمجلس الإدارة وأذيع هذه الغجتماعات على شاشات تليفزيونية توضع في حديقة النادي ليشاهدها الأعضاء حيةً على الهواء "

بالذمة ده كلام ناس عاقلين ؟

يعني لما اجي أناقش تقصير مُدرب ما وطريقة تقويمه .. أقوم أذيع ده على الملاء والراجل نفسه اللي الإجتماع معمول عشانه يسمع ويشوف الكلام اللي بيقى مش معمولة مونتاج ده ؟

فهمت قصدي يا شوشو ؟

[se_ Elsyed]

نانو وسؤالها بتاع الـ 100 مليون

هأجل الإجابة شوية لإني بأقلوظ إجابة محترمة هاتعجبك

( يمكن يطلع لك فيها 100 باكو ولا حاجه )

وهاجاوب على سؤالك التاني

[الرافعي]

الأخ العزيز س.س

أشارك الزملاء الأعزاء في اهتمامهم بسؤالك .. انت شخص تستحق الإعجاب .. أنا كتبت سؤال في البداية أمزح معك .. ثم مسحته

تحياتي

تم تعديل 14 ديسمبر 2006 بواسطة الرافعي

[Eldisel]

س س على الكورسي يامرحبا يامرحبا .. :D انا لسة داخل دلوقتي وعارف .. وشخصية ثرية ذي حضرتك متسبش

هسالك عن شوية معلومات شخصية عقبال ما امخمخ سؤالين محترمين لحضرتك :closedeyes:

1- طولك اد اية؟ ( اختياري)

2- وزنك اد اية؟ ( اختياري)

3- سنك اد اية؟ ( اختياري)

4- اللون المفضل ليك اية ؟ (اجباري)

5- مسقط راسك فين ؟ (اجباري)

6- اجمل المدن ليك واحبهم الي قلبك ( غير مدينة المنشأ ) اية ؟ (اجباري)

7- هل تحب عملك ... ولو بتحبة اية الاعمال الي بتحب تقوم بيها غيرة ؟ ( شغل كهربا مثلاً مكانيكا غسيل صحون ..كدة يعني) (اجباري)

8- كم عدد اولادك وايهم احبهم الى قلبك البنين ام البنات ؟ ولو ربنا لسة مرزقش تعتقد الى اي منهم سيميل قلبك ؟ ( اختياري)

9-

10-

كفاية كدة

اة نسيت

11- هل انت فعال بهذا الشكل المرموق في منتذيات اخرى , ولو ايوة اية هي نشاطات هذة المنتديات الاخرى ؟(اجباري)

تم تعديل 14 ديسمبر 2006 بواسطة Eldisel

[صبح]

أنا كنت عمال أمسك نفسي قلت يمكن حد يعرف يجيب قرارك بس للأسف

خفة دمك خلت كل الناس بتحاول تنكشك من غير ما تسأل بحق وحقيقي

معلس بما إنك HR يعني هاف رات بلغتنا في الشغل :closedeyes: فدول شوية أسألة على ما قسم

س1 : من أي كلية تخرجت وما هي الأعمال التي قمت بها في مصر قبل السفر ؟

س2 : ما هو أصعب موقف واجهك في :

1- طفولتك

2- المدرسة

3- الجامعة

4- العمل (داخل مصر وخارج مصر)

س3 : ما هي ثقافتك ؟ العلمية والدينية؟

س4 : ما هو الشيء الذي تفخر بإنجازه وما هو الشيء - عفوا - الذي تخجل من ذكره؟ وتندم عليه؟

كفاية المرة دي :D

[فولان بن علان]

إلى س س عندما يعود ليستلقي على الشيزلونج

الأسلوب الساخر هو أسلوبك المفضل والذي تجيده

ألا ترى أنه يسبب لك أحيانا مواقف محرجة ؟؟

هل ترى أنك أحيانا تكون مندفع ؟؟

موقف تسرعت فيه ثم تبين لك خطأك

لا أريد أن أذكرك بموضوع عن زميلة عزيزة أثرته

ولكن هل تملك شجاعة الاعتراف بالخطأ ؟؟؟

هل يختل أحيانا الحد الفاصل بين الهزار والجد ؟؟

إلى ماذا يرجع تمكنك من السيطرة على السخرية من التجاوز ؟؟

وهل هذا ما يمنعك من تطوير واحتراف الكتابة الساخرة على شكل نصوص منشورة أو سيناريوهات لأعمال ؟؟

لست أقل من بلال فضل ولا حتى من الساخريين القدامى من وجهة نظري

متى نرى لك أعمال منشورة ؟؟

[واحد تاني]

هما عمالين يسألوا الراجل في اسئلة شخصية كده ليه... :D

انا بقى هاسأل في حاجات من المقرر ... :closedeyes:

اخويا وحبيبي سين شين ...

- عندك كام في البنك ؟ :P

[inas]

س س الدنيا اتلمت عليك انا اسفه زمانك بتدعي عليا :P

بس دلوقت معدش ينفع الهروب :closedeyes:

وخلص الي وراك وتعالا هنا شوف الناس عيزا ايه :D

انا باه عيزا اسالك جد

ايه اكثر قرار اخدتو في حياتك و ندمة عليه وما سبب الندم ؟

وايه اكثر قرار اخدتو وسعدت بيه ؟ وايه سبب السعاده؟؟

[se_ Elsyed]

آه .. النهاردة الخميس بقى واللي خلصت الغسيل اللي وراها واللي مآنتخ في البيت وبيحتسي قهوة الصباح وهاتشتغلوني وتعملوا عليه فته بالكوارع

إيه الأسئلة دي كلها

أنا كنت فاكر إني لما اقعد على الكرسي يبقى هاتسال أسئلة زي اللي بتتسأل للفنانين كده :

إيه هي أخر اعمالك السودا ؟

ما هي اكلتك المُفضلة ؟

ماشي يا بشر

بس دعوني أفكركم بحاجتين :

1- إن ربنا ما يرضاش بالزُلم ؟ :closedeyes:

2- من قدم السبت هايلاقي بقية الإسبوع قدام شويه .. يعني بكره هاتشرفوا على الخاز ... قصدي الكُرسي وهاحلق لكم كل الحلقات اللي إتعلمتها واللي لسه ما أتعلمتهاش ؟

------------------------

موديست

س : قبل دخولك إلى المقابلة و على الباب مباشرةً بصيت لقيت صباع رجلك الكبير طالع من الحذاء بيتفرج يشوف احنا فين بالضبط ؟

ج : هاقول يا أرض إنشقي وإبلعيني .. ماهو لو كان شراب كنا قلنا ماشي .. لكن جزمه وصابعي الصُغير طالع منها كمان ؟!!! يبقى بمنتهى البساطة قبل ما الجماعة ياخدو بالهم من صوباعي ممكن أروح عامل فيها عبدو العبيط وأتظاهر بالمرض وأأجل المُقابلة لحد ما أشتري جذمة جديدة ..

----------------

نورا :

ماشي يا أم سيف

هاشيلك الكرسي الكهرباتي ده لحد ما ييجي دورك وهاوريكي بقى شُغل الطاقة الغير متجددة يبقى إزاي

--------------

شهد

س : كلمة قلتها في لحظة غضب.. لحظة طيش.. مجرد هزار .. قلبت موازين حياتك .. ندمان عليها لحد النهاردة؟؟

ج : كلمة " إنتي طالق طالق طالق :D "... لأ والله بجد مافيش .. لإن الحمد لله حتى في لحظات الإنفعال الواحد لازم ياخد باله من الامور اللي هزلهُن جد وجدهُن جد "

شرفتينا وروحي ذاكري وتعالي إسألي أنا منتظرك .

--------------------

داركر

س: وزنك كام بعد أكلة الباشمل و قبلها؟؟؟؟؟؟

ج : أنا يابني بعيد عنك الميزان عندي رابط على الـ 65 ومش راضي يتحرك .. بس الحمد لله ده انا بأشوف كروش وناس ضاربه من كل حته فبأحمد ربنا إني زاوية قائمة ولست متساوي الأضلاع .

------------------

د / نانو

س 1 مش عارفه ليه بعد ما عرفت طبيعه شغلك من مشاركه موديست حسيت انك س س افندي؟

ج 1 : ممكن وناقص لي طربوش بزر ومنشه وبطيخة بلاستيك أروح وأجي بها الشغل كل يوم .. :P

س 2 المهم حضرتك في الغربه بقالك 8 سنين تقريبا...انت ناوي علي ايه .....انك تكمل اطول فتره ممكنه طالما ربنا كاتب لك رزق هناك

بحيث انك تعيش اسرتك في مكان مريح و تنتهي حياتك بانك هناك لغايه الثانويه العامه

ولا سيادتك من انصار انك تقضي فتره معينه لغايه ما توفر مبلغ معين تعيش بيه مستريح و ترجع تعيش وسط اهلك واخواتك و بقيه عيلتك ؟

ج 2 سدقيني يا نانو يابنتي إن قلت لك إن من كتر الغربة أنا مابقتش عارف أنا عايز إيه ومكتفي إن عيلتي معايا وكله تماما ومطرح ما ترسي دُق لها ...

أقولك على حاجه يا نانو :

إتعرض عليه من فترة ليست بالقصيرة أروح أشتغل في فرعنا بمصر ...

تخيلي يا مؤمنه لم أستطع ان اتخذ القرار

مش عارف نسمي الحالة دي إيه ؟

-------------------

ديزل إتناشر ونُص

1- طولك اد اية؟ ( اختياري) 173 سم

2- وزنك اد اية؟ ( اختياري) 65 كيلو متر مربع

3- سنك اد اية؟ ( اختياري) ما تفكرنيش .. إرجع لباب الإجتماعيات وانت تعرف

4- اللون المفضل ليك اية ؟ (اجباري) الإسود بأحس إنه أشيك لون زائد إنه بيريحني وأي حاجه بتليق عليه

5- مسقط راسك فين ؟ (اجباري) القاهرة

6- اجمل المدن ليك واحبهم الي قلبك ( غير مدينة المنشأ ) اية ؟ (اجباري) إستنجرية .. إسكندرية يعني

( إنت كنت شغال صحفي في جريدة البعكوكة يا ديزل ؟ )

7- هل تحب عملك ... ولو بتحبة اية الاعمال الي بتحب تقوم بيها غيرة ؟ جداً وكان نفسي أطلع ميكانيكي عشان أصلح عربيتي بنفسي ومافيش ميكانيكي يعمل عليه شُغل .

8- كم عدد اولادك وايهم احبهم الى قلبك البنين ام البنات ؟ ولو ربنا لسة مرزقش تعتقد الى اي منهم سيميل قلبك ؟ ( اختياري) 2 وكلهم أولادي ولو إني باحب الولا عمر أكتر - بس في الخباثة - ونفسي ربنا يرزقني ببنت عشان أشوط الذكور دول برجلي وأقعد أحب في حتت البت اللي حيلتي على روقان ...

11- هل انت فعال بهذا الشكل المرموق في منتذيات اخرى , ولو ايوة اية هي نشاطات هذة المنتديات الاخرى ؟(اجباري) لأ لإن مافيش وقت يا ديزل يابني واليوم 24 ساعة بس

وإرحم أهلي بقى كفاية 11 سؤال ..

ده إنت جبار

----------------------

إبننا الشيخ صُبح

س1 : من أي كلية تخرجت وما هي الأعمال التي قمت بها في مصر قبل السفر ؟

ج : تجارة عين سمس .. ما أشتغلتش في مصر بعد التخرج ولا يوم ... اللهم إلا بعض الأعمال أثناء الدراسة

س2 : ما هو أصعب موقف واجهك في :

1- طفولتك

2- المدرسة

3- الجامعة

4- العمل (داخل مصر وخارج مصر)

ج : راجع الريبورتاج اللي عملته لمجلة الشبكة اللبنانية سنة 1979

س3 : ما هي ثقافتك ؟ العلمية والدينية؟

ج : زي أي واحد مصري صالح .. كُتب تليفزيون راديو جرايد كده يعني .. تقدر تقول كوكتيل يعني

س4 : ما هو الشيء الذي تفخر بإنجازه ؟ إني قدرت أخلف عيلين في زمن الخلفة فيه بقت صعبه من قدر الأخبار الغم اللي بنسمعها واللي تخلي اجدعها راجل يقطع الخلف .

س4 : - عفوا - الذي تخجل من ذكره؟ وتندم عليه؟

ج 4 : هأقولك في نفس الرسالة الخاصة اللي هابعتها لداركر

( طب أقول له إيه ده .. عامة لما يعرف إنه إتوقف شهرين عن المشاركة هاتبقى دي هي الرسالة ... هي دي رسالتي في الحياة )

--------------

فولان بك بن علان

س :الأسلوب الساخر هو أسلوبك المفضل والذي تجيده

ألا ترى أنه يسبب لك أحيانا مواقف محرجة ؟؟

ج : أيوه وبالذات مع مراتي .. أصل إنت عارف الستات حساسين زيادة عن اللزوم وكده .. بس باحاول ما أستخدمش الاسلوب ده الا مع الناس اللي واخد عليهم

س : هل ترى أنك أحيانا تكون مندفع ؟؟

ج : كتير مش احياناً بس .. بس تخيل يا فلفل إني دربت نفسي في السنوات الأخيرة على إستخدام الفرامل وبأغير التيل كل فترة عشان إندفاعي ده ما يوقعنيش في مشاكل لا تُحمد عُقباها خصوصاً لما تكون عارف إنك عصبي ومُندفع ..

س : موقف تسرعت فيه ثم تبين لك خطأك

لا أريد أن أذكرك بموضوع عن زميلة عزيزة أثرته

ولكن هل تملك شجاعة الاعتراف بالخطأ ؟؟؟

ج : أملك الشجاعة والحمد لله ولم أكن في هذا الموقف مُخطئاً

س : هل يختل أحيانا الحد الفاصل بين الهزار والجد ؟؟

ج : لأ والحمد لله .. لأني بأستفيد من نماذج في الحياة وامامي المواضيع عندها بتبقى سايحه على بعضها فالإنطباع الأخير اللي بيؤخذ عنها بيبقى زبالة .. فمباحبش أبقى كده

س : إلى ماذا يرجع تمكنك من السيطرة على السخرية من التجاوز ؟؟

ج : إلى إني إتربيت في بيئة مصرية 100 % ومعظم المصريين كده ( إنت ما بتاكلش كرانشي ولا إيه ؟ )

س : وهل هذا ما يمنعك من تطوير واحتراف الكتابة الساخرة على شكل نصوص منشورة أو سيناريوهات لأعمال ؟؟

لست أقل من بلال فضل ولا حتى من الساخريين القدامى من وجهة نظري

ج : تصدق بالله .. لم يخطر ببالي ولو لحظه إني أبقى كده لإني أكتب بتلقائية وليس بهدف الربح مثلاً .. هأقولك حاجة أول مرة أقولها - بجد -

في أحيان كثير جداً أكتب موضوع او تعليق او مداخلة وتمر شهور او سنين ويتبعت لي الموضوع ده على الميل زي الحاجات اللي بتيجي لنا كل يوم دي ... وأُعجب جداً بالموضوع وأُفاجأ إني أنا اللي كاتبه

مثال : شفت موضوع زيارة جمال إبن مبارك الأخيرة لأمريكا ... أحد الزمالاء الجُدد وضعه عندنا هنا كموضوع اعجبه .. وأنا قراته وعجبني جداً وفوجئت بتعليق أحد الزملاء بإن ده موضوعي ... شُفت الخيبه ؟

أصل لا أقوم بتخزين اي موضوع من موضعاتي أو تحضيرة كتابة ُ .. فبالتالي بأكتب بشكل تلقائي وطازه بطازه

س : متى نرى لك أعمال منشورة ؟؟

ج : لما أموت ممكن ينشروا لي اعمالي في صفحة الوفيات

----------

واحد تاني اللئيم

س - عندك كام في البنك ؟

ج : أقل من اللي عندك بـ 100 ج

---------------------

جااااااااااااااااااااااااي

كفاية

حرام

كفايه

حرام

ايه اكثر قرار اخدتو في حياتك و ندمة عليه وما سبب الندم ؟

إني وافقت على اللعبة بتاعتك دي :huh:

وايه اكثر قرار اخدتو وسعدت بيه ؟ وايه سبب السعاده؟؟

قرار الزواج

وسبب السعادة

الحمد لله العيش كبير والمواصلات رايقة وكل حاجه تمام

سامع هناك يا عبد العال

آلو آلو

[inas]

تصدا صعبان عليا دا اكتر قرار ندمة عليه

رايح فين دا انا مصدات لقيتك

سؤالي

ولا حرام خد نفسك شويه وهرجعلك بسؤال معقرب وجد مش هزار

وعلى الاقل ادي فرصه للي واقفين

[Eldisel]

وإرحم أهلي بقى كفاية 11 سؤال ..

انت لسة شوفت حاجة دول يادوب فتح شهية .. لأ واية اللهم صلي على النبي حبيبك كتير وجين يكرموك بالقوي

انا شايف يااناس ان اسبوع قليل قوي على شخصية معروفة ذي س س لازم نزودلوا المدة شوية ( دا شيء كويس للدعاية والبروبجندا )

//////////////////////////////////////////////////////////////////////////////////////////////

هأقولك في نفس الرسالة الخاصة اللي هابعتها لداركر

( طب أقول له إيه ده .. عامة لما يعرف إنه إتوقف شهرين عن المشاركة هاتبقى دي هي الرسالة ... هي دي رسالتي في الحياة )

:D :closedeyes: دة تهديد دة ولا اية

نحن نطالب من الادارة برفع الحصانة عنك حتى ينتهي اعضاء المنتدى الموقر باتمام استجوابك :P

ياداراة ... يا ادارة ... انت فين يادارة

/////////////////////////////////////////////////////////////////////////////////////////////////

يتبع

[nancy]

سى السيد

انت بجد شخصية ممتعة وجر شكلك ممتع

بس مش عرفة اكتب اى سؤال لانك صعبت عليا من كتر الاسئلة

وماتمناش ان حد يخترنى لكرسى الاعتراف دة

وبما انك الى على الكرسى وبتتسال

من راى انك انت الى تختار الى يكون بعدك على الكرسى

وكمان يتغير الجالس علية كل اسبوع علشان منهلكش شخص واحد بس من ناحية

والموضوع مينامش كمان

وربنا يعينك يا س س :closedeyes:

[صبح]

:P :closedeyes: دة تهديد دة ولا اية

نحن نطالب من الادارة برفع الحصانة عنك حتى ينتهي اعضاء المنتدى الموقر باتمام استجوابك :P

ياداراة ... يا ادارة ... انت فين يادارة

/////////////////////////////////////////////////////////////////////////////////////////////////

يتبع

أنا موافق B)

يلزمنا اتنين من الإدارة كمان بس يكونوا بيعزوه

يا أحمد بك محمود :D

يا عصام بك شوقي :P

يا وليد بك صفوت :huh:

يا أم مادا :huh:

يا فولانة هانم :P

موافقة.....

[se_ Elsyed]

:) :wub: دة تهديد دة ولا اية

نحن نطالب من الادارة برفع الحصانة عنك حتى ينتهي اعضاء المنتدى الموقر باتمام استجوابك B)

ياداراة ... يا ادارة ... انت فين يادارة

/////////////////////////////////////////////////////////////////////////////////////////////////

يتبع

أنا موافق mfb:

يلزمنا اتنين من الإدارة كمان بس يكونوا بيعزوه

يا أحمد بك محمود :wub:

يا عصام بك شوقي :wub:

يا وليد بك صفوت :wub:

يا أم مادا :wub:

يا فولانة هانم B)

موافقة.....

يابني بنتده على مين الله لا يوريك

دول محبوسين في اوضه الفريراخ

طب بالله شوفت حد منهم هنا ؟

[bentmasria]

سى السيد

من اودة الفراخ تحياتى

بس على فكرة

انا رشحتك للكرسى وكلى ثقة انك ادها وادود

والواد محمد بيقولك كفاية حبسة فى الاوضة طيعنا بقه

ربنا يعينك

بص ياسيدى

ياترى ممكن تفكر تتجوز تانى ؟؟؟؟؟ :wub:

انا جاية اهدى النفوس بس