مراتك... ولا... شغلك؟!

[المدهش]

مراتك... ولا... شغلك

تتهم كل نساء العالم الرجال بأنهم بيحبوا شغلهم اكتر ما بيحبوهم كزوجات أو كخطيبات أو كحبيبات

وأنا بالنيابة عنى أعترف بأن هذا صحيح... صحيح... صحيح ليه بقى؟؟؟؟؟؟؟

لي أسبابي ومبرراتي التي أرجو منكم التفكير فيها بعين العقل :

1. الشغل بيصرف عليا... بس أنا اللي بصرف عليها !!!

2. في الشغل ممكن تزعق براحتك و زعيقك يجيب نتيجة ... مع مراتك صعب انك تزعق براحتك... ومهما زعقت مش هييجى بنتيجة

3. ممكن تزوغ من الشغل في أي وقت من غير ماحد ياخد باله أوحد من الزملاء يغطيك... أنما تزوغ من مراتك... هيهات... أنسى...

4. في الشغل عندك مدير ممكن ترضيه لو أشتغلت كويس ...... إنما مراتك لو عملت قرد... مش ممكن ترضيها !!! وإذا رضيت...عندك حماتك عمرها ما ها ترضى أبدا

5. في الشغل من حقك تاخد أجازه... عندك عارضه...واعتيادي...ومرضى دا غير يوم الجمعة... والعطلات الرسمية... بصراحة الشغل ريحه خفيف ع القلب... أنما مع مراتك... مش ممكن تاخد أجازه...بالعكس دانت لازم تلزقلها يوم الأجازة بتاعتك و إلا يبقى نهار اهلك مالوش ملامح...ليك أجازه واحده فقط... وطويلة جداً !!!!...

6. في الشغل ممكن تترقى و تاخد منصب بيه... وباشا كمان ويبقى لك مكتب لوحدك ... وفراش... و سكرتيره خاصة... والكل يضرب لك تعظيم سلام...في البيت هاتعيش زوج... وتموت زوج...واللقب الوحيد اللي ممكن تاخده لما تنادى عليك مراتك وتقولك... يابو العيال...أو يا حاج...ولما تعجز وتسلم النمر... تقولك ......يا بركه

7. الشغل لو زهقت منه ممكن تسيبه بدون مشاكل...أنما مع مراتك... لو روحك طلعت... لازم تحط ف بقك كوتشى وتفكر مليون مره... في المحاكم والمؤخر والنفقة... والعيال...وتلاقى نفسك في الآخر بتغني أنا اللي أستاهل كل اللي يجرالي... الغالي بعته رخيص...ولا أحسبوووووش غاااااالى... العزوبية طبعا.

8. في الشغل...لو سبته أو سويت معاشك... أو بلغت سن المعاش بتاخد مكافأة كبيره... ومعاش... وحفله تكريم...، أما مراتك لو سبتها قبل ما تموت... أنت اللي هاتدفع مكافأة ومؤخر ونفقه... وشقه كمان...وتتحبس لو مادفعتش...

9. ممكن تغير شغلك وتتنقل لغيره لو لقيت شغل أحسن منه...في حين أنك طوووول الوقت بتشوف بنات أحلى ميت مره من مراتك بس ماتقدرش تغيرها...

10. في الشغل... متأمن عليك عشان لو حصل لك حاجه...ولو حصل لك حاجه... مراتك هي اللي هاتقبض التأمين في النهاية...

بتهوى مين أكتر... مراتك ولا شغلك.. .

الإجابة... أكيد مراتي طبعا !!!!!!

حاجه تفقع لكن هنقول ايه... ربنا كريم

(هذا الموضوع منقول)

[nancy]

كويس ان الموضوع دة منقول يا مدهش

يعنى مش كله رايك الشخصى :rolleyes:

الشغل مش حيدى الحب والحنان

مش حيخليك سعيد اوى من جواك انما مراتك ايوة

لو مشتغلتش مش حتقبض انما زوجتك حتحبك وترعيك مهما حصل

لو عيت حتاخد مرضى وتروح...لو عيت مراتك الى حترعيك

فى شغلك ممكن تبقى مدير وفى بيتك حتبقى تاج الراس وحبيب القلب

فى شغلك بتتجامل وتجامل فى بيتك حتحب من قلبك وحتتحب من القلب

فى شغلك ممكن تزعق وتخسر كتير انما فى بيتك ممكن تزعق والزوجة تستوعبك

فى شغلك ممكن يغيروك انما فى بيتك مكانك مش ممكن يتغير

فى الشغل ممكن يبقى عندك فراش وسكرتير

فى بيتك عندك زوجة وصديقة وحبيبة وام وبنت

فى شغلك متامن عليك وفى بيتك مراتك بتامن عليك بروحها

بعد كل دة حتهوى مين اكتر؟؟؟

مرتك ولا شغلك :blink:

اسمع كلامى ومشيها مراتك :angry2:

[عبده بيه]

المهندسة نانسي الاخ المدهش برافوا عليكم

الزوجة احسن من الشغل الف مرة والا لوكانت بقولك يا نصلي ركعتين او نقراء قران يا عيني عليك لوكانت كده لكم تحياتي

[Hi All]

مراتك ولا شغلك

انا في إعتقادي ان الزوجة اهم من اكثر من جانب

بس نشوف مين اللي ليه الفضل في التاني

لو معندكش شغل اكيد مش هيكون عندك زوجة

لو عندك شغل وعندك زوجة هتكون عشتكوا كلها سعيده

لو عندك زوجة ومعندكش شغل اكيد هتكون عشتكوا كلها مشاكل

عشان تحصل علي زوجة كويسة وبنت ناس لازم يكون عندك شغل كويس ومحترم

عشان تحافظ علي حياتك الزوجية لازم تحافظ علي شغلك

من هنا نجد ان الشغل هو اهم عشان تحافظ علي الاهم منه

يعني الواحد لازم يهتم بشغلة اكتر من مراته عشان يعرف يهتم بمراتة

هي عمليه مركبة شوية وصعب فهمها

بس بالشغل ممكن تصرف علي مراتك وامك واهلك كلهم واهلها كمان

انما مراتك مش عوزه غير نفسها وممكن اهلها بس اهلك لا ( مش الكل عشان الضرب )

يعني العملية نسبية

ولا اية

[المدهش]

أنا شخصيا مش شايف تعارض بين الاثنين..

لانك بشتغل في النهاية علشان نفسك ومراتك وعيالك..

لكن الزواج أحيانا بيعطلك ..

يعني ممكن تضطر تشتغل شغل تاني وتالت لتحسين مستوى أسرتك المادي على حساب حاجات كتير بتحبها وتضطر لانك تهجرها علشان مش فاضي ومش فاضي ليه..علشان تجيب فلوس ..رغم انك ممكن تكون عندك حاجات تانية ممتعة اكتر بكتير من مجرد انك تجمع فلوس..يعني انا مثلا قبل الجواز كنت باصرف معظم اللي باكسبه على السفر والكتب وغيرها من الاشياء اللي باستمتع بيها والان الوضع مختلف والاولويات مختلفة..

طبعا الخطأ ليس في الزواج والزوجة لا ذنب لها في ذلك..لكنها الظروف الاقتصادية والحياة المعقدة التي تجعلك تضطر للتنازل عن أشياء كثيرة تحبها من أجل ناس بتحبهم!

[عازفه على أوتار الذهب]

عجبني جدآ رأي نانسي

وكمان الشغل مبيضحيش علشانك باي حاجه

ولو غلطت ممكن بكل بساطه تترفد

لكن الزوجه بتضحي بعمرها عشانك

ولو غلطت بتسامحك...

والموضوع مينفعش فيه مقارنه

يعني العمليه نسبيه زي مقالHi All

بس ده مش معناه ان الراجل يهتم بشغله

اكتر من مراته

بس تعرف يا مدهش

حسستني إن الرجل مغلوب على امره :sad:

بعض الاحيان طبعا مش على طول

يعني متكلمتش عن الراجل لو رجع من الشغل

وملقاش كل طلباته مجابه

هيبقى ملاك؟؟؟

لا طبعآ هيتحول لوحش كاسر :angry:

بس الطرفين لو فكروا فالموضوع

بشكل ان الحياه مشاركه

وان كل واحد بيتعب عشان التاني

واستمروا عالمبدأ ده

الحياه اكيد هيكون فيها موده وتراحم

ومش هيكون الموضوع مرهق لاي من الطرفين

ومتهيألي الراجل يحب مراته اكثر اسلمله :ph34r:

[nora]

طبعا مراته يعني بعد ده كله تقولو ايه

طب اضيف كمان

في الشغل بتاخد على دماغك في البيت انت الي بتديها على دماغها:angry:

من الاخر الي طالع عليك في الشغل بطلعو على البيت كله:ph34r: