الصبي العاشق

[Simba]

الصبي :ايوووووووووة جاي

هنا واحد حلبة....... وهناك واحد شاي

انت يا عم........... ياللي معاك الجرنان

شوف كده اسم حبيبتي ........

لو عندك هتلاقي اسمها

حواليه ورد واغصان

الزبون : صبي القهوة اتجنن يا جدعان

البت لحست عقله

وشكل الواد راح في خبر كان

الصبي : ايوووووووة جاي

واحد شيشة هناك

تعرف يا حضرة

حلمت بيها امبارح .. واقفة في الشباك

بس كانت زعلانة

وشوية تانية الاقيها حيرانة

معلم القهوة : اخ يانا من ده صبي أخ يانا

انا عارف ايه جابه يشتغل ويانا

ناقصين احنا غرام ...وهيام

الصبي: لا يا معلمي مش اسمها هيام

ولا بسمة ولا احلام

دي حتة بنت سكر زيادة

يوماتي احبها حب فوق العادة

معلم القهوة : طيب يايلا شوف طلبات الزباين يا خفيف

عندك هناك طالب قهوة واتنين شاي سكر خفيف

الزبون : يا لطيف من الصبي ده يا لطيف

المعلم : بس انا بحبه اكمنه دمه خفيف

الصبي: ايوووووة جاي وعندك القهوة يا بيه

عارف حبيبتي مش عارف اقول عنها ايه ولا ايه

اشتغلها في عبد الحليم واغانيه

ولا اقولها قلبي داب ومش عارف ارويه

البيه : مالك كده صبي غلباوي

حط القهوة وروح فاضيلك انا

يتيجي منين دي البلاوي

المعلم : تعال هنا ايه حكايتك

مش ناوية تجيبها البر

ونخلص بقي من سيرة البت بتاعتك

الصبي : اجيبها البر ازاي

وأنا شايف صورتها

علي الصواني وكوبيات الشاي

بحبها ... وبحب روحها وشكلها

ويامان نفسي اعزف لها

علي الربابة ... ومرة علي الناي

الزبون : خد يا واد هنا تعالي

فاكر نفسك في محل بقالة

الصبي: بس براحة ... ده انا حالتي حالة

البيه : اخص علي دي سفالة

بيشغلوا ازاي هنا الحثالة

الصبي : يا بيه حلمك شوية

خد شفطة م الفنجان وروق علية

ياخوالنا بحبها وشايفها قدام عنية

معلم القهوة : يا واد روح شوف شغلك

مش عاجبك يايلا فارقنا وروح علي اهلك

الصبي: طيب يا معلمي بذمتك

لو فولانة بتندهلك

هتجري عليها

ولا هتروح علي مهلك

معلم القهوة : لا ده انت زودتها

بس تعال يا واد

ما تقولي ايه اسمها

[النسر المصري]

أوع تقولي خلصت كده ياسمبا....لا حلفتك بالله العظيم تكمل لحسن ده انت لحست مخي من كتر جمال ورشاقة كلامك

رائعه بكل المقاييس ...بس عيبها اني ماشبعتش.....كمل عشان خاطري ..كمل ده انا منكشح عالآخر ربنا يخليك

[bentmasria]

تسجيل متابعة وانبهار وانتظار ايضا

فلا يمكن كما قال نسرنا ان ينتهى الامر عند هذا الحد

اتمنى ان نرى معا تسلل الاحداث ونتمتع بالاوبريت

انتظر الجديد

البنت المصرية

[lonly in cold night]

وانا كمان بسجل متابعة

و باضرب لك تعظيم سلام

ومتين تحية و احترام

للراجل الهمام

اللي بيسمعنا احلى كلام

[عازفه على أوتار الذهب]

ما أجمل ماوصفت به مافي حنايا قلب

الصبي العاشق...

اعدت قراءتها اكثر من مره..

انا ايضآ متشوقه جدآ..

وفي انتظار المتابعه...

[Simba]

شكرا نسر ردك ظريف بس متحمس قوي

بنت مصرية كلمة انبهار دي كبيرة قوي علية

لونلي شاكر فعلا كل كلماتك المميزة

عازفة بيعجبني قوي النك نيم بتاعك وعجبني اكتر كلماتك الرقيقة

ودي محاولتي التانية لصياغة الاوبريت

الصبي : يا معلمي انا عشان بحبها .. مقدرش اقولك اسمها

حبة حبة تسألني علي عنوانها وسنها

وممكن كمان تقولي ايه شكلها

معلم القهوة : اما صحيح صبي لسانه طويل

وانا اللي بقول غلبان وخليه يسترزق

هيسوق في الهبل ويقول كلام أزرق

الزبون : معلش يامعلم شكله في الحب بيغرق

معلم القهوة : طيب وحياة شنبي هتنطق يعني هتنطق

الصبي : عايزني أنطق واقول

ياخوالنا ده برضه معقول

معلم القهوة : طيب روح شوف طلبات الشاب

الصبي : ايوة جااااااااااااي

أحلي صباح لاحلي شاب

شاي كشري ولا عناب

الشاب : اديني حاجة ساقعة

وعلي حسابك

ولا اقولهم علي اسمها ... والناس هنا سامعة

معلم القهوة : ايه يا حضرة انت تعرفها

الودا صدعنا ... عمال يكسر في دماغنا

الصبي : يعرفها منين بس

اسكت يا عم الشاب

هتفضحني

مش عايز اسمع منك خبر ولا حس

معلم القهوة : تعال يا واد يفضحك ليه

هو انت بتحب مين وخايف ليه

الصبي : يا معلم بهزر

هو انا بتاع حب ...

وامشي معاه في الشارع واتمختر

الشاب : فين طلبي يا بني

لو قلت علي اسمها

يبقي الذنب مش ذنبي

البيه : وحياة الغالين عندك هتقول

ده باين علي صبي مش مسئول

معلم القهوة : ايه رأيك يا حضرة الشاب

انت مش من هنا منقول

الا لما راح تقول

الزبون : يا عم قولهم وريحنا

وم الحكاية دي بقي خلصنا

الشاب : بصراحة بصراحة

بيحب بنتك يا معلم

انا ما كنتش عايز اتكلم

( بصراحة انا مش عارف لحد دلوقتي ايه رد فعل المعلم )

[عازفه على أوتار الذهب]

الله الله الله عليك يا سمبا

إنت فعلا عبقري ما شاء الله عليك

وعلى جمال وسلاسه وروعة ماكتبت

عجباني جدآ جدآ جدآ وبالفعل مستمتعه جدآ

وأنا بعيش جوه الحكايه مع الصبي العاشق

أنا حسيت إني قاعده معاهم عالقهوه :)

وهطلب كباية شاي وأقعد أسمع كمان وكمان

بجد رووووووووووعه أرجوك تكمل...

بجد تستاهل تسقيف جامد جدآ

تحياااااااااتي

[نانو]

الله يا سمبا عليك

ايه الجمال ده

بجد عبقريه و محبوكه حلوه اوي

تسلم ايديك ... :)