قالت لى انهاردة عشرين فى الشهر ..

[Salwa]

حرام عليكى نفسك...

حرام عليكى ....انا .

عارفة ان انهاردة عشرين ...وعارفة ان انهاردة الاربعاء ...زى مانا عارفة ان فات تلات شهور ..وكان برضه يوم عشرين وكان برضه يوم اربعاء ..

زى مانا عارفة اللى انتى فيه وزى مانا عارفة ان كل شئ بيمشى زى ماكان ناوى يمشى ...ومفيش اى حاجة اتغيرت .

الشمس لسا بتطلع كل يوم ...الصبح...والقمر بيطلع بالليل..

بتصحى الصبح وتاخدى حمامك وتصلى وتبتهلى لربك وتطلبى الرحمة لابنك..ولابويك ..

بتفطرى ...بتنشتغلى ..وتبكى ..

وتسرحى وترجعى تنشغلى ...وتبكى ..

بتفكرى .....حاتتغدوا ايه ؟؟

امر الله....وهى البطن بتحزن ؟؟ ...

ماهو ده اللى عاوزة اوصلهولك ....

ممكن برضه تنشغلى وتتكلمى فى التليفون ...مع اختك او مع اى حد يتصل بيكى ...

ممكن برضه تزعلى وتاخدى على خاطرك من اى حد عايش معاكى ...زوجك او بنتك او ابنك ...ما يمنعش .

لكن و(( للحلم )) اللى بتمتازى بيه ممكن برضه تلتمسى لهم العذر....وتبكى ..

كل واحد فيهم عايش جوة نفسه ...محدش بيفضفض...خصوصا الاب وابنه...

تبكى وانتى بتعملى شاى ...تشربى الشاى وتتفرجى على قناة الناس ....وتسيبى الشاى وتبكى ..

الشيخ حسان بيتكلم عليكى ....بيقول انك من الصالحات....ربنا يصبرك ..

زوجك اللى زعلتى منه فى الصباح....صعب عليكى فى المغرب .....وتبكى ....ربنا يصبره ...

وتقولى انا مؤمنة ....والا انا جوايا معترض ؟؟ طيب بتبكى ليه ؟؟

مش حاتوصلى لحاجة ...

عارفة والله ...

وتقررى ترضى بالمقسوم ....وتنوى تشاركى بنتك الرأى فى ديكور شقتها ..

.ربنا يتمم بخير ..

يارب ....

وتقولى بينك وبين نفسك ..( وهى ذنبها ايه ؟؟ ) ...

وتعدى اوراق النتيجة ......امتى حاتروح بيتها ؟؟

ممكن تروحى شقتها شوية علشان تثبتى حضور ...

ماهو ده اللى بيحصل .....الحسرة فى قلبى بس اعمل ايه ؟؟

ترجعى بسرعة وكأنك مستحرمة حتى تفرحى ثوانى ...ترجعى وفيه غصة جواكى ...مش قادرة تدارى دموعك...

وتعملى قهوة ...وتتفرجى على الرسومات اللى جوة الفنجان .....وتقولى ده حرام ...وترجعى تبصى فى الفنجان ...وتقولى بعد ايه ؟؟

حاشوف ايه ؟؟ ياخسارة عمره اللى ضاع..

وتسمعى انهم بيلموا الطلبة ...وتسمعى ان بيلموا عمال على بطال ....

وتسمعى رأى الجانى ....والمجنى عليه....

وتفتكرى ( مجنى عليه .....شاب فى عمر الزهور ....من شهور كتيرة راح ...ضاع من ضرب الهراوات .....فى مظاهرة ( خائبة ) ...لم تؤتى ثمارها ) ..وسمعتى ايامها الخبر واتحسرتى على شبابه ...واستغربتى على جرأة الطاغى ...وطلبتى الرحمة لوالديه ...

ربنا يصبرهم يارب ..

ولم يدر بخلدك انك ستمرى من نفس الطريق...وتضعى الزهور فى نفس المكان وان اختلفت اسباب وفاة كل منهما... تصلى وتقرئين القرآن ...

تفكرى ..حاتتعشوا ايه ؟؟

طيب حانعمل ايه ؟؟ اصومهم السنة بحالها ؟؟ مفيش نفس لكن لازم حناكل وحنعيش حانعمل ايه ؟؟ نصيب ...

تنشغلى بتحضير العشاء ....تنشغلى بحضور زوجك ...تصبريه...تحاولى احتواء الحزن....تحاولى تقنعيه بضرورة التحكم فى النفس ....بلاش بكاء ....انت قوى ...انت مؤمن ..فكر فى الشاب الاصغر ...احتضنه واشعره ان الحياة تسير ..

ينظر لك بلوم....يلومك....كيف طاوعك قلبك ؟؟ وهل انسى الابن الصالح ؟؟ وتؤكدين عليه...ليس نسيانا ولكنه صبر..

تبكى ...لبكائه...

غلبان....غلبان ...مش قادر يستوعب لحد انهاردة ضياع الولد الصالح ..وساعات يكلم ربه ويقول له ليه عملت فيا كدة ؟؟

الحياة تسير ...كل شئ كماهو ...لم يتغير شئ..

اليوم التالى كاليوم الماضى ...كاليوم...

الاخبار لم تتغير ......خمسون عاما ؟؟ ...حروب فى كل مكان ....شباب يضيع يضيع...

حمدالله ان الابن قابل ربه وهو بين احضان والديه....فى سلام وامان ..

خلاص الواحد زهد الدنيا ....

هى فيها ايه حلو ؟؟

شايفة وسامعة اللى بيحصل ؟؟ ....هنا وهناك ؟؟

كوارث الدنيا كثيرة ...

جبروت الطغاة ....

جبروت الفقر ...جبروت الادمان...جبروت انعدام الاخلاق .....جبروت الكوارث المتتالية ....غرق عبارة ....حرق قطار ..

وقوع طائرة ...استباحة اعراض الناس ..تعذيب فى سجون ومعتقلات واقسام...

خلاص...عليه العوض ومنه العوض ...

الناس بتهرب .....اللى بيهرب للدين واللى بيهرب للادمان ...واللى بيهرب جوة نفسه...بيبقى لامبالى ...

لنا الله....

كل عام وانتم بخير ...

يوم الجمعة اول ذى الحجة ...

كل عام وكلنا بخير ....

[nash]

مقوله لإحد الحكماء...

الموت هو المصيبه الكبيرة التي تهون بمرور الايام

..............................................................

يالله ..وكأني أعيش في هذه اللحظه ..داخل الأسرة....عشت جو الأم...ووجع الأب....

ربي يصبر كل من فقد عزيز غالي علي قلبه.....

كل جرح يندمل...إلا فقدان الضني....

ربي يرحم أمواتنا وأموات المسلمين جميعا

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

روعه سيدتي الكريمه

[Simba]

النهاردة بقي واحد وعشرين في الشهر وانا بكتب الرد

بس ايه الفرق

بصراحة انا كان نفسي افهم موضوعك ده عبارة عن دعوة للرفض والتمرد

ولا دعوة للصبر ...

[bentmasria]

وجعتينى ياسلوى ربنا يصبركم

اتخيلها تراه يجوب طرقات المنزل او يضع مفتاح فى الباب ويدخل باسما

ربما تردد صوته فى اذنها او خلفها لتلتفت خلفها ولا تجد سوى صداها يردد ايوه ياحبيبى

وربما لمس كتفها بحنو وقبل خدها فتشعر بمن لاتراه

انها تجتر الذكريات سيدتى

وتتألم لن تكون الايام مثلما كانت ولت تخرج البسمات من القلب صافية كما عهدتها ولن تبقى قوقعة الحزن للابد مغلقة ستفتح يوما لترى ملامح الضوء بتوجس شديد وتكتشف انها الوحيدة التى تذكره

ولانها من حملته فى بطنها تسعة اشهر

لن تستطيع ابدا التناسى او النسيان

لكنها ستمارس كل طقس يومى بحذافيره وربما ادعت السعادة

لن يستطيع احد ان يمسح من عينيها لمعة الحزن ودمعات يأبين النزول

دعيها تستعذب الحزن قليلا فهى تشعر انها تدين له به

ثم اسرقيها الى عالمك ربما خفف عنها هذا واعيديها لتشم رائحته فى كل مكان

دعى حزنها ينضج ويهدأ وانت خير من يحترمه وساعديها لتبرأ من جراح الفقد ولكن لا تدعيها تنسى فلن تسامح نفسها ابدا

اختك

العائدة من مراكب الاحزان

وحشتينى بجد

[nora]

ماما سلوى كلمات قمه في الروعه والجمال خلتي عنيا دمعت بجد كلماتك كلها احساس مش عرفه بجد الي انا حسيته مين صاحبت القصة يا ماما؟؟؟

مش عرفه اوصف بجد شعوري....

[lonly in cold night]

اللهم صبر كل اب و كل ام فقد ضناه

اللهم امين

[shahd]

ربنا يصبر كل مصاب ويكتب الأجر و الثواب بأذنه تعالى

يا سبحان الله كلما قرأت موضوع اليوم يشدني الى ذكريات احاول تناسيها ولو للحظات ولكن يبدو ان ذاكرة الألم لاتمحى ..

[نانو]

امي الغاليه ماما سلوي

كل حاجه بتخلص... كل حاجه

زمان كنت بفتكر ان فيه حزن ممكن يدوم العمر كله....صحيح عمري ما حسيت انه فيه فرح بيدوم العمر كله...لكن ايماني كان عميق بدوام الحزن ....

الحزن اللي بيقطع حته من القلب و ياخدها معاه كنت باقول يااااااه هو لسه فيه بكره....لسه هانام تاني علشان اصحي تاني اتالم تاني

هو مش كده كفايه....النوم عذاب في حد ذاته وعذاب لانه فيه بعد بكره ...و عذاب لانه فيه حرقه...و فيه .كوابيس

....حزن كتير ....دموع مالهاش حدود ....في اي وقت...و كل وقت...فوق المخده و فوق هدومي ...في المطبخ ...في الارض في الشارع حتي

ادام الناس الدموع ما كانتش بترحم....

تخيلي....خلاص ....خلص...كله بيخلص ....كللللللللللللللله بيخلص..... صحيح بعد سنين ....بعد علامات محفوره في الملامح .....لكن خلص

[The Professor]

لو أن هذه القصة تجربة شخصية وحقيقية فقلبي وجوارحي كلها مع صاحب هذه القصة وربنا يصبره او يصبرها. لكن احسب ان ما اكسب هذه القصة عمقا كبيرا يجعل الكلمات تتسلل إلى المشاعر وتدخل القلب والعقل دون استئذان هي تلك العفوية التي كتبت بها تلك القصة. تحياتي الكثيرة.

[Salwa]

اسعد الله صباحكم احبائى الكرام.

اليوم اول ايام عيد الاضحى ..كل عام وانتم بخير .

غدا...آخر ايام السنة الميلادية ...

بعد غد....اول ايام السنة الميلادية الجديدة .........كل عام جديد وانتم بألف خير .

وهكذا............

تأتى ايام....وتذهب ايام.....ونعيش ايام....وكل يوم له طعم ولون ومذاق يختلف عن يوم قبله او بعده وكأن سنة الحياة التغيير ...وبقاء الحال من المحال ....حتى لو سرنا والمرارة فى حلوقنا ....او الضحكة تتوارى خجلة والقلوب تعتصر لغياب الاحبة ..سنظل ندور كما عقارب الساعة دورتنا المعتادة ...وربما نقف ثوان معدودة نعلن دقات نصف دورة او ربع دورة ...ونستمر فى المسير الى ان نتوقف عن الدوران ...سواء دقت قلوبنا بعنف..وانفعال...او بضعف وهدوء....فالمصير واحد فى النهاية ..

ناش .....

كلماتك حقيقة واقعة ياعزيزتى الغالية ....لكنى لااعتقد ان قول الحكيم ( حقيقة اكيدة )....الموت مصيبة كبيرة تهون مع الايام ...ربما كان الامر كذلك مع فقدان الاب او الام او حتى الاخ لكن !!!! فقدان الابن ؟؟

وانت نفسك قلت ما اقصد..

الا فقد الابن.....الا فقد الابن ...الشاب الرائع..

تغمده الله برحمته واسكنه فسيح جناته ..والهم والديه الصبر والسلوان ..

شكرا عزيزتى ناش على مرورك الكريم ...

سمبا......

الموضوع....حقيقة ....ودعوة للصبر ..

الموت لم يكن ولن يكون ابداااااااا دعوة للتمرد !!!

بنت مصرية ....بنت مصرية .....بنت مصرية ..

ماذا اقول لك ؟؟

اعتقد انك لاتحتاجين منى لأى تعليق ...

وكأنك كنت معها تجوبين طرقات منزلها ...

تفترشين العشب فى حديقة منزلهم ...تنظرين الى نخلة (( القت ( جدته ) بذرتها عندما كان عمره عام واحد ....وضحكت وقالت سوف تكبر معه ..)) .

.تراها باسقة ترفع رأسها وكأنها تنظر لها ( بسخرية ) ...انا هنا وهو ....هناك.

اعاننا الله على تقبل ......الواقع.

دمت لنا اخت حنونة ..

نورا ..

حبيبة قلبى ( ام سيف )..

صاحبة القصة ....( شقيقتى الغالية )

ربنا يسعدك يانورا ويخللى لك حبايبك ...

lonly in cold night

اللهم صبر كل اب وكل ام فقد ضناه.........يارب .....يارب ..

شكرا للدعوات الصادقة ...

يارب احمى اولادنا واجعل يومنا قبل يومهم ..

ارحمنا يارب من مواجهة موقف مثل هذا ....ارحمنا وارحم ضعفنا ياذو الفضل العظيم ..

شهد..

شهد يابنيتى العزيزة ...

كأن ذاكرة الألم لاتمحى ......كأن......( ذاكرة الألم تتوراى فقط ياشهد لكنها ابدا ابدا ...لاتمحى )

ربنا يسعدك ياشهد...

نانو.....

نانو الغالية ....انت نفسك رددتيها ....كله بيخلص لكن ؟؟..ترك علامات محفورة فى الملامح...

خلص.... لما كان حواليكى وكأنه ثوب ثقيل من الريش ....ربما كان محملا ايضا بمياه ثقيلة ...وبدأتى تستردى انفاسك ...وبدأت دورة الحياة ...

تدورين...وتدورين....وتأتى رياح محملة بالسعادة ...ورياح محملة باحزان اخرى ....ومع سرعة الدوران تطير الريشات واحدة تلو اخرى ...وتجف....ويخف حمل الثوب ....وبدلا من يكون ما تحملينه ثوب ثقيل من الريش ....يكون غلالة تلتصق بها بضع ريشات .....لاتقع....مهما استمرت دورة حياتك ...فهى ملتصقة بك...لاتشعريها فى احيان كثيرة لكنها موجودة ...

هناك على الثوب الرقيق ...

the professor

الفاضل المحترم ...

ليتها كانت مجرد كلمات ...تحكى خيال ..

ليتها ...

هذا بعض من كل ...

مجرد نقطة فى محيط ...........احاسيس..( احب الناس ) .

مكالمات....مراسلات....محاولات لانتشال نفس انسانية على وشك الوقوع فى اعماق اللاشئ ...

لكن ؟؟ من وقت لآخر لابد من التنبيه....

وكأنك تفيق مريض عقب الاستيقاظ بعد عملية جراحية كبيرة .....

افق....انت هنا ...انت معنا ...انت تحيا ...

ربنا يخليكم ويسعدكم ....