تشتغل سواق تاكسي؟؟؟

[nora]

يا تري لو انت كان معاك تجارة او حقوق او ترجمه لغاة غريبه زي الماني مثلا لو ملقتش فرصة شغل كويسه تقبل تشتغل سواق تاكسي او مني باص او حتى اتوبيس؟؟؟

كتير هيقول ملها دي اشمعنا الاسأله دي ؟؟؟

ببساطه كنت ركبه تاكسي امبارح وكان معاه صديق ليه والاتنين بيتكلمو ان الراجل ده مش لاقي شغل وخلاص جاب تاكسي وقرر يشتغل عليه وسواق التاكسي عمال ينصحو يجرب يشتغل في مجاله فاعد يقول ده فلان خريج حقوق وبيشتغل على تاكسي وعلان خريج ترجمه الماني واسباني لبلب وشغال على مكروباص ولما سالته ليه قال انا لما جيت اشتغل ترجمان قالو هيدوني 600 جنيه انا بعملها في ورديه وحده:o

خلاصة الكلام ان مفيش حد فيهم صبر لحد ميلاقي وظيفه حلوة ...............

طب اسال سؤال تاني لو بنتك او اختك اتقدملها سواق تاكسي ومعاه شهاده تقبل تجوزهالو؟؟؟-_-

سيبونا من الشعرات بتاعت الشغل مش عيب ولا حرام انا عيزة رد بجد!!!

[darker19]

يا تري لو انت كان معاك تجارة او حقوق او ترجمه لغاة غريبه زي الماني مثلا لو ملقتش فرصة شغل كويسه تقبل تشتغل سواق تاكسي او مني باص او حتى اتوبيس؟؟؟

ليه لأ الشغل فعلا مش عيب و لا حرام.... بس الكلام ده مش في مصر أو بالأصح مش في المجتمعات العربية...

على فكرة اسمها لغات مش لغاة.....

طب اسال سؤال تاني لو بنتك او اختك اتقدملها سواق تاكسي ومعاه شهاده تقبل تجوزهالو؟؟؟

ده بفرض اني متجوز و عندي بنت عروسة على وش جواز ممكن أجوزهاله, بس برضه لو كنت في مجتمع مش عربي....

سيبونا من الشعرات بتاعت الشغل مش عيب ولا حرام انا عيزة رد بجد!!!

أنا معاكي إنها شعارات (مش شعرات) بس لو عايزة رأي بصراحة العيب مش في سواق التاكسي ولا في سواق الميكروباص.....

العيب فينا إحنا, دايما بننظر للسواقيين و السباكين و ما إلى ذلك من مهن بسيطة و حرفية من منظور متكبر, مش عارف التكبر ده ليه, تلاقي الواحد مش لاقي ياكل وبيتنطط على الناس دي, قلت يمكن عشان الأغلبية العظمى بيكونوا جهلة, بس لقيت إن في جهلة كتير بيتكبروا عليهم برضه....

يبقى العيب فينا, أنا مش بعترض على الموضوع بذاته, بس أنا بعترض على تفكيرنا كمجتمع ونظرتنا للمهن دي على انها مهن تعبانة حتى وإن كانت شريفة, معترض على تقديرنا للناس تقدير مادي....

يعني عايز أسأل سؤال و عايز جواب بصراحة ومن غير شعارات برضه....

لو تقدم لبنتك عريس غني جدا, هل هاتهتم/ي بالتأكد من مصدر أمواله ولا هاتكتفي بإنه هايقولك أنا عندي شركة كذا و انتهى الموضوع على كده؟

سبق وقلت ان بناء العمارة قد يستغرق عامين ولكن الهدم لن يستغرق أكثر من ساعتين....

واحنا أفكارنا اتهدت من زمان, السباك بره ما بشتغلش من غير شهادة في مجال شغلة و النقاش و الحداد و النجار و..و.. و.... و السواق برضه. وفي معاهد كتير بتدرسهم و تدربهم عشان لما يشتغل في مجاله يشتغل و هوا فاهم هوا بيعمل ايه, وعشان ما يبقاش أقل من الدكتور ولا من المهندس.

واحنا عشان نبقى زي الناس دي عايزين سنين.... وبرضه مش هانبقى زيهم...

لأننا ببساطة عندنا دينا إلي بيأمرنا بالعلم و مش عايزين نتعلم و بيأمرنا بالعمل وبيقولنا ان العمل عباده وانه مش عيب ومع ذلك مستعيبين الأعمال دي, ونهانا عن التكبر و مع ذلك بنتكبر....

يعني هايكون عندنا دافع أكتر من الدين, إلي مش قادرين نطبقه....

يمكن يكون كلامي فيه تحامل بس اعذروني أنا مش قادر أشوف الموضوع الا بالطريقة دي ومش لاقي تفسير غير ده....

تم تعديل 22 ديسمبر 2006 بواسطة darker19

[واحد تاني]

واحد صاحبي مهندس ميكانيكا ...

كان عنده تاكسي وكان بيشتغل عليه بنفسه...

في نيويورك... -_-

[هيليوم]

الحقيقه موقفنا كمصريين من اعمال مثل "سائق تاكسى" او "نجّار" او غيرها من المهن

هو ما يستحق بجداره وصف "فقر و عنطظه"

نحن لا نمانع ان يجلس الابن فى المنزل ليصرف عليه الاب رغم انه صار "شحط" و نستنكف ان يقف فى محطة بنزين الى ان يفرجها ربنا بوظيفه محترمه ؛

لا مانع لدينا من الاستماع الى قصص الكفاح او قراءتها فى الجريده و ذرف الدموع مع ابطالها لكن لا نتصوّر يوما ان يكون ابناؤنا او اخوتنا احد هؤلاء الابطال !!

اليوم مثلا اعلان بجريدة الاهرام عن طلب عمّال نظافه بمرتب "400 جنيه شهريا" ؛ ترى كم من خرّيجى الجامعات على استعداد للتقدّم لهذه الوظيفه؟!!

ما يهم مجتمعيا ان يكون لدى العريس وظيفه مكتبيه نقدّمه بها لاقاربنا و معارفنا ؛ حتى لو كان دخلها تلت تعريفه ؛ ولا مانع من ان يكون لديه وظيفه فى الظل -كسائق تاكسى- لزوم الممّ و أكل العيش .. وهذه طبعا لا نشير إليها حين نقدّم العريس لمعارفنا ؛

لهذا اقترح عكس التساؤل : لو خيّرت بين مهنة سائق تاكسى و بين الجلوس على القهوه فى انتظار وظيفة مكتبيه ؛ ماذا تختار؟ فقط من قبيل شحذ الذهن وليس لتغيير مسار الموضوع ؛

ختاما أترككم مع هذا المقال

«فليحيا عرفة»

سمير عطا الله

أمضيت المساء الأخير في القاهرة في حديقة «الماريوت» التي عرفها جيلي بحديقة عمر الخيام ـ الزمالك، وفي الماضي كان كل شيء في الزمالك، نادي الجزيرة هناك، وعبد الحليم حافظ هناك. وشم النسيم هناك، والحب الضائع هناك ايضا. ولمن يهمه كيف يتذكر الشباب شبابهم في عمر الخيام ونسائم الزمالك، عليه ان يقرأ «المجلة»، ومن لا يهمه الأمر، يجب ان يقرأها ايضا، لأن فيها اموراً كثيرة اخرى، وفيها جورج جرداق ونبضه الصاعق ابدا، ولغته الأصمعية وخفة ظل مثل نسائم النيل في انتقالها من الضفة اليسرى الى الضفة اليمنى. وعاد إلى «المجلة» الطيب صالح بأعماقه وتجاربه الانسانية والادبية، ما بين ضفاف النيل قبل «الهجرة الى الشمال» وضفاف «التيمز» بعد الهجرة من الجنوب، وفيها خالص جلبي، الذي له في مباضع الحبر أكثر بكثير مما يصرف في مباضع الدماء.

ولكن ليست «المجلة» موضوعنا، فهذا المساء النسمة باردة في حديقة عمر الخيام ـ الزمالك، وأنا الف عنقي بشال شتوي كما كان البدو ايام الفاقة يرخون شعرهم اتقاء لظلم الشمس وتماديها. وقد ترفق الله ورحم عندما جعل نهار الصحراء قصيراً بعكس نهارات الدول الباردة، حيث تطول احيانا بلا نهاية.

منذ ان جئت القاهرة هذه المرة وانا آتي الى حديقة عمر الخيام كلما تسنى لي. أولاً من أجل أن امشي، ذهابا وايابا. وثانياً من أجل رفقة النيل في المساء. ثم من اجل تفقد اشجار الزمالك التي هرمت وتضخمت مثل بائعات الخبز على الأرصفة، في الأزبكية، ثم لا ادري لماذا فالحديقة هنا لها حكايات، ولها ظلال. ولها اغان. ومنذ ان جئت في المساء الأول، يقوم على العناية بطاولتنا نادل يدعى عرفة. وعرفة مصري 24 قيراطاً. يرد الممازحة بأدب ويقدم الأشياء بكرم وعندما تحاول ان تتجاوز قليلا مألوف المزاح، يهزمك باللكمة القاضية، قائلاً: «أنا تحت أمرك»؟.

وكنت اسأل عرفة في بعض الأشياء والتواريخ وجغرافية مصر، ويجيب بتواضع، وفي هذا المساء لا أدري لماذا جاء ذكر رواية «أولاد حارتنا» ووقف عرفة يعرض ويناقش. ثم جئنا على حديث المحاولة التي تعرض لها، فراح عرفة يشرح «ما قاله لنا استاذنا الكبير الدكتور أحمد سامح. وأحمد سامح هو الطبيب الذي اكتشف العرق سبب النزف في كتف نجيب محفوظ. وقلت في نفسي وأنا اتناول «الهامبورغر» الذي احضره عرفة، من اين لهذا الرجل ان يعرف «أولاد حارتنا» اكثر بكثير مما اعرف. ثم لماذا يشير الى الدكتور أحمد سامح على انه «استاذنا الكبير». ماذا يجمع بين نادل في «الماريوت» وبين استاذ في الطب.

وقلت في نفسي انه الادعاء. لا احد في هذه الدنيا يرضى بما هو فيه. كل رجل يريد ان يكون شيئاً آخر، وقاطعت عرفة في حديثه عن «شطحات نجيب محفوظ» في «أولاد حارتنا» لأطلب منه المزيد من البصل المحروق مع الهامبورغر. وذهب وعاد بالبصل المحروق. وقلت له، يبدو يا عرفة انك تقرأ كثيراً، لكنني لم افهم حكاية أحمد سامح «واستاذنا». لماذا هو استاذك. وضحك عرفة، وقال ان احمد سامح كان استاذه في كلية الطب. وابلغني انه هو، عرفة، طبيب اطفال في النهار ونادل في الليل. ولم اصدق لكنه اوضح ان على المرء ان يختار احيانا بين ان يكون طبيباً غير قادر على تأمين حياة عائلته وبين ان يكون طبيباً قبل الظهر ونادلا في المساء من اجل اهله وكرامته. وقلت له، عرفة «فلتحيا يا عرفة».

الرابط

[nash]

الإجابه ياستي

بسم الله الرحمن الرحيم

,,,,,,,,,,,,,,,,,,,,,,,,,,,,,,,,

لأ لن أقبل أن أزوج أبنتي لسائق تاكسي...مع كامل إحترامي لكل السواقين..وكلهم علي رأسي

ثانيا ...لا لن أقبل أن يمتهن أبني هذه المهنه.....

وربي يكتب الخير لكل المسلمين يارب

اهلا يا هيليوم منورانا والله

إن شاءالله تنبسطي معانا

,,,,,,,,,,,,,,,,,,,,,,,,,,,,,,,,,,,,,,

برحب بضيوفك أهو يا نورا.....

أيدك علي المعلوم

[نانو]

يا نورا يا بنتي

حرام عليكي انا ....برضه اجوز بنتي سواق تاكسي

انا شايفه ان التوافق الاجتماعي من اهم القيم اللي بيقوم عليها الزواج الناجح

و غيابها ....بيؤدي الي انهيار الزواج

و بعدين حتي لو هو بيعمل كده لفتره معينه علشان يكون نفسه فيها برضه مش هوافق...

لما يروح (يكوم) نفسه الاول.... و يشتغل مهنه مناسبه لينا اجتماعيا ممكن ساعتها ابقي اوافق عليه

و حتي لو شغال نفس المهنه في امريكا ..برضه مش هوافق -_-

حتي لو ده تحجر ....فهو ده الواقع اللي احنا بنعيشه

و ديننا مش بيقلل من شان الاعمال البسيطه او الحرفيه ...لكن كمان بيامرنا بالتفكير والتمعن عند اختيار الزوج و كما ذكرت من قبل التوافق الاجتماعي

مليون مره من اهم القيم .

[عبده بيه]

الاخت الفاضلة نورا بعد التحية

موضوعك غايه في الاهمية والاخ داركار قدم صورة واضحة لمجتمعنا

واريد ان الفت نظرك الي شيء بيسط وهو هل الشاب عندما يتخرج ولا يحصل علي شغل ماذا سيفعل هيروح النادي او علي المقاهي او علي الناصية او اصدقاء السوء ماذا سيفعل هذا الشاب مع هؤلاء ومن اين جاؤا تجار المخدرات من قلة الشغل والملل وانه بنظر لغيره اللي معاه فلوس وعربية وشركة واستيراد وتصدير و و و و و غصب عن ابننا الخريج الجديد لازم وان يفكر في الكسب الغير مشروع وعمره ما هيفكر انه هيكون سائق تاكسي لانه مش هيقدر علي الشغل وهو عايز الفلوس السريعة وللاسف هذه النوعية بكثرة في وسط مجتمعنا

هل هتقبل الاخوات عريس زي ده ولا سائق تاكسي

يا اخواننا سواق التاكسي مفتش تموين رفض الحرام وقال هشتغل سواق تاكسي بالحلال

فعلا مجتمعنا بتاع مظاهر فارغة وكدابة

[nora]

داركر :

انا معاك ان دي مهن شريفه وصدقني انا برضو هقول نفس الكلام بتاعك اه هوافق اجوز بنتي سواق تاكسي بس لو مكنتش في بلاد عربيه واه هقبل ان ابني يشتغل سواق بس مش في بلاد عربيه

بس احنا كده بناقض نفسنا لو جينا لوقت الجد هتقول لاه .........

انا عرفه والله ان مش عيب طب انا افتكرتلكم سواق تاكسي تاني انا وجوزي كنا ركبين معاه والراجل كان كبير في السن فجوزي بيقولو يا اسطى -_-

لقينا الراجل قالو والله يا ابني انا ابن ناس ولولا الحوجه لولا اني اشتغلت على تكسي بعد الظهر .....تصدق بالله انا مدير في شركة......... وقالنا اسمه علشان لو عزنا حاجه من الشركه البسكوت دي نروح نخدها .

ولما سالناه ليه ؟؟؟

فقال بنتي عيزة تتجوز ومصاريف العيال والمدارس مش احسن مسرق ....

وقفت عند الكلمه دي فعلا مش احسن ما يسرق هو اختار الحلال في نظر الله لكن يا ترى نظر الناس ايه ؟؟؟

واحد تاني :

انت قلت في نيويورك اخويا الكبير في استرليا اشتغل كل حاجه ....لان للاسف بره مش عيب معلش في ناس كتير مبتخجلش ان عيلها يسافرو برة ويتمرمطو يغسلو صحون يمسحو عربيات ارض اي حاجه بس اسمها بيغسلو لخوجات!!!! لكن هنا ياي لاه طب ليه مكلها اطباق على الاقل الاكل الي فيها حلال !!!

هيليوم :

اولا نورت المنتدي ويارب نرى مشاركاتك دايما

ثانيا انا معاك فعلا احسن من قعده القهاوي الي بتجر رجل شبابنا للفساد وبتعرفهم على ناس فاسده ربنا يستر على شبابنا

ناش :

شكرا ياستي على ترحيبك بضيوفنا الجداد نردهالك في مواضيعك يا نونوش:o

نونوش انت قلتي لاه بس مذكرتيش الاسباب ؟؟؟

نانو :

انا معاكي ان التوافق الاجتماعي مهم منا قلت معاه شهاده كويسه وابن ناس ومستواه الاجتماعي كويس بس مش لاقي شغل فاشتغل سواق ايه المشكله؟؟

ولا تخدي واحد لبنتك معاه شهاده معلقها على الحيطه !! وقاعد جمب بنتك في البيت!!!

وعرفه هتقولي هديه لواحد شغال :ph34r:

طب لو جه بعد الجواز وقالك انا هشتغل سواق تاكسي هتعملي ايه هتطلقيهم ولا هتسبيهم !!!

عبدو بيه

انا معاك في كل الي قلته 100%

[Hi All]

طاب الموضوع له شق تاني بعيد عن الوظائف دي داخل مصر او الوطن العربي اللي بينظر لها من فوق

ايه رأيكوا لو جلكوا عريس لبنتكوا من بره كان مسافر بره وقعد كام سنه هناك وجاب اللي جابة وجيبه مليان

ودخل يخطب بنتك حد بيسألة هو كان شغال ايه بره او بيهتم بالسؤال

مع ملاحظة او فرض انها شغلانه حلال

بس اللي انا اعرفه ان معظم اللي بيشتغلوا في دول غربيه بيشتغلو يغسلوا صحون ويمسحوا حمامات

الاجابه الاكيده هتوفقوا وتنصحوه انه يبدء مشروع له في مصر عشان يستقر

طاب لو هو شغال نفس الشغله في مصر بيغسل صحون في احد الفنادق ( مع العلم انه معاه شهاده كبيره برده )

وحوش فلوس كويسه برده هتقبلوا وتخلوه يبدء مشروع

ولا هترفضوا ممن مبدء انت بره تشتغل اي حاجة انما هنا لازم تشتغل وظيفه محترمه

طاب ايه هي الوظيفه المحترمة من وجهه نظرنا وظيفه علي مكتب

ولا ذات دخل كبير طاب هي حلال ولا حرام

ولا لازم يكون موظف طاب الموظف مرتبه صغير

هو المنطق بيقول ان العريس في مصر من فلوسه بس مش مهم هي منين ولا وظيفته ايه طالما ان مرتبه كبير

ولا ايه

[رمضان]

السلام عليكم ورحمة الله

طبعا اشتغل سواق تاكسي احيانا ممكن الانسان يضطر يشتغل في ما هو أقل من سواق التاكسي وانا لا اقلل من سواقين التاكسي نهائي انها مهنة

مشكلتنا كعرب اننا ننظر للمظهر وليس الى الجوهر

فيه كلمة معروفة بتقول الشغل بيجيب شغل يعني ايه يعني انا مثلا خلصت الجامعة ومنتظر الوظيفة اللي تناسب تخصصي لو انا انتظرت في البيت الوظيفة دي عمري ما هشتغل اللي انا عاوزه لكن لو اشتغلت سواق تاكسي او في اي مجال سأتعرف على اناس اخرين يمكن ان يفتحوا لي مجال عمل في المكان الذي اتطلع اليه وهكذا يتدرج الانسان حتى يصل باذن الله الى ما لم يكن يتطلع اليه بل أكثر بكثير بفضل من الله سبحانه وتعالى

[lonly in cold night]

انا تجربتي مختلفه شويه

احنا عيلتنا كلها تجار

بمعنى انهم اصحاب محلات

محلات كل حاجه بدءا من الحلويات مرورا بالجملة و البارفانات و لعب الاطفال وصولا الى الساعات و الملابس

لينا محلات في شارع فؤاد و الزمالك و ش الشواربي

طبيعي جدا ان طموحي كان يتجه للتجارة و اني افكر ابتدي بمحل و احاول اتوسع فيه لحد ما يبقى تجارة كبيرة

يوم ما اتقدمت لزوجتى و طلبت ايدها

جلس معى اخيها الكبير الضابط بمباحث امن الدولة و السيدة والدتها و كان السؤال انت معاك فلوس منين و حا تصرف عليها ازاي لما تتجوزوا و ما الى ذلك

( ملحوظة : انا كنت ساعتها طالب في الجامعة و زوجتى برضه و كان شرط حماتى انى ما اعملش الخطوبة اساسا الا بعد انهاء الدراسة الجامعية لكلا منا )

المهم بعد ما وضحت ليهم مصدر الدخل الخاص بيا و ان الحمد لله متوسط الدخل حوالي 3000 جنيه شهريا

و الكلام ده من حوالى 10 سنين

يعني ثروة يا محترمين

كان الرد

لا

اسفين جدا

جوز بنتنا ما ينفعش يكون بيشتغل في محل

يا بشر ما هو جدي ابتدى بمحل و مات و هو عنده 8 محلات

و اولاده و من ضمنهم والدي كل واحد ورث محل و اللى باعه و اللى كبره و عمل لنفسه مجموعة محلات

يعنى ايه اللى يمنع انكم تقولوا جوز بنتى تاجر

كان الرد انك لازم تلاقى وظيفة محترمة تشتغل فيها

و لو على كده اخوها يا سيدي يجيب لك وظيفة في البورصة

و اشتغلت في البورص.....ه و كان مرتبي 300 جنيه

اللي هما ما يكفوش اني اعمل منهم فرح

و بعد الجواز فتحت محل انترنت كافيه و منه محل تاني و بعديها شركة تسويق و بعديها شركة استيراد و تصدير

يعنى رجعت تاني من الصفر و ابتديت بمحل و انتهيت بان طموحي وصلنى اني يبقى عندي شركتين و برضه محلين

بس احنا دايما ماشيين على مبدأ " ان فاتك الميري اتمرمغ في ترابه "

[nash]

اهلا يا لونلي

تجربتك ممتازة

لكن السؤال عن سواق التاكسي...بس أحب أوضح..شيء

سواق التاكسي المجتمع اللي بيعيشه..غير تماما..والبيئه كمان غير

أغلب مش جميع...السائقين ..لما بتركب معاهم...بتسمع ألفاظ غريبه وبتحس أنك في عالم آخر...

وبعدين ممكن غيري وأحسن مني..يقبل ...بالسائق..لكن أنا لا أقبل...

[Eldisel]

اولاً: تعالوا منحددش شغلانة بعينها لا سواق تاكسي ولا سواق ميكروباص ويائع في محل ولا عتال في مينا ولا .. ولا ياريت منحددش مهنة شريفة بعنها

ثانياً: انتم خلطوا بين امرين مستوى المهنة الاجتماعي ومستوى الشخص الاجتماعي

يعني لما نتكلم على شغلانة التكسجي مثلاً فهي في رئي شغلانة لذيذة للبيحبوا السواقة والتجول ذي حلاتي وشريفة في نفس الوقت ومربحة ( انا ناوي اطلع رخصة درجة تلاتة واشتري تاكسي واشتغل علية في اوقات فراغي :ph34r: اهو منة بتفسح ومنة بكسب فلوس :P ) .,. لكن لو اتكلمنى عن سواق التكس او الميكروباص فهتلاقي اختلاف تام بين السواقين من نحية الطبقة والثقافة والمكانة فهناك من لا يستطيع ان يبداء عملة الا بعد ان يعمر الطاسة :o وهؤلاء ليسوا موضوعنى وهناك من هو طبيب او مدرس او وكيل مدرسة او مدير شركة من مَن لا يرضون الذل للاحتياج مما قد يدفعهم الي الكسب غير المشروع كما تبين من المداخلات السابقةفيتجهون الي تلك الاعمال لسد حاجتهم وللعيش عشة كريمة وهؤلاء انا اقف امامهم وقفة اجلال واحترام وتقدير ولو راجل جالي بالظروف دي طالب ايد اختي انا لا امانع علية بتاتن وهكون مستريح وهي معاة ( بعد موفقتها طبعن ) بعكس لو جالي ولد حبت عين نانوس امة ابن ميمي هانم وابوة توتو بية وعندهم ملاين في البنوك وعماير وشقق وهذا الشخص ( نانوس عين امة ) لاشىء ولايعلم شئ الا انة عندما يحتاج اي شئ يجدة دة لو اتنطط قدامي .,. لو عملي قرد بسديري واختي كمان لو عملت ذية عشان يتجوزوا دة لا يمكن يحصل ابداً.,. وهنا لا اعني اعطرادي على غناة الفاحش ابداً والله كما اني لن اعطرد على عملة كسائق تاكسي ... انما اعطرد على شخصية من هو متقدم الي اختي او بنتي وشخصية عائلتة هل هي عائلة محترمة , مترابطة , ودودة .... ولا متأنعرة متكبرة ..

وتجربتي الشخصية هي اني فعلن بعد ماتخرجت بثلاث ايام بالضبط عملت بائع في مكتبة ( مع العلم اني خريج حاسبات ومعلومات .,. وكنت متخصص اياميها في البرمجة ) بس انا شفت اني لازم اصطدم بالحياة وان مهمة ولدي قد انتهت هنا وعلي الاعتماد على نفسي دون مساعدة الاخرين .,. هل الي انا عملتوا دة كان غلط والصح اني اقعد جمب ماما تهشك في وتدلع في واخر كل اسبوع اقولها المصروف ياماما ( كدة يبقى انا بحافظ على وضعي الاجتماعي ) لغاية ماربنا يرزق بشغلانة على مكتب وقدامي كمبيوتر طبعن لا وهو انا من بياع في مكتبة الي كاشير الي سيبر نت الي اداري في شركة كمبيوتر الي ما وصلت الية الان Sestem Administrator في مكان محترم جداً وقاعد على المكتب والكمبيوتر قدامي وعمال ابلطج على الناس -_- ولسة الي انا وصلطلة دة مش مرادي ولا طموحي دة 1 في الاف من الي انا عاوزة وهو انا باخد كوسات عشان احسن مستوايا بردة وكلة بفضل الله ثم والدتي و والدي والحمد لله.

بس لو كنت قعدت من الاول جمب ماما كان ذماني دلوقت لسة قاعد جمبها وبقشر جمبهبا بصل

تم تعديل 23 ديسمبر 2006 بواسطة Eldisel

[عبده بيه]

الاخوات العزيزات نورا نانو ناش ارجوا الرد والتعليق علي كلام الاخوة لان الموضوع فعلا مشكلة ولابد من التقييم الاجتماعي مع خالص تحياتي

[nora]

استاذ الديزل ولونلي

بجد تجربتكم جميله جدا انا معاكم ان الشغل مش عيب والله بس مجتمعنا هو الي رافض المفروض ان نغير الفكرة دي في نظر الناس لان طول ما احنا بنبص للمهن البسيطه دي بانها اقل من المستوى بجد عمرنا مهنتقدم ....(لولي ممكن اشاركك في مشروع :))

انا لحد دلوقتي بسال كل الي اقابلو من الناس الي حولايا تقبل تشتغل سواق؟؟طب تقبل تجوز بنتك او اختك لسواق ؟؟؟ ( او اي مهنه اخرى بيغسل اطباق ) كان الرد لاه

واول ما اقول برة يقولو اه !!!:)

ولا اسال ليه يقولو ممكن يكون اتزنق بره ممكن يكون محتاج مش لاقي شغل !!! يعني هنا مش نفس الظروف :)

ناش انا معاكي ان الفاظهم صعبه بس مش سعات بتركبي مع سواق تاكسي وتلقيه ابن ناس وفي ناس ركبه ملاكي وبتشتم شتايم افظع من اي حد !!!

عبده بيه ....

شكرا على اهتمامك وانا مستنيه اسمع ارائ المزيد لان حسه ان ممكن كتير يقول الي عنده او تجربته

[عبده بيه]

الاخت نورا بعد التحية

المدرس لما يخرج بعد المدرسة احسن له واشرف ان يشتغل علي تاكسي ولا يجبر التلاميذ علي الدروس الخصوصية

مفتش التموين بعد الشغل هل يروح المخابز والمحلات لاخذ اتاوة ولا يشتغل سائق علي التاكسي

الموظف هل يرتشي او يشتغل علي تاكسي

خريج الجامعات هل بتسرمحوا علي الطرقات او يشتغلوا شغل شريف

يا اختي الامثلة كثيرة

لكن عريس لاختي يشتغل سواق تاكسي والله انا ما عندي مشكلة لكن هي لازم تكون مقتنعة بدورها في المجتمع علي الرغم ان بغصب علي اختي ان تعمل الماجيستير وفعلا كل واحد بياخد نصيبه

مع تحياتي

[Diab]

نورا أسمعي

انا أكرم لي ألف مرة أشتغل سواق تاكسي ولا امد ايدي لحد

ولو جه حد لبنتي مريم ( بإعتبار ما سيكون في المستقبل إن شاء الله علما بإني لسة ما أتجوزتش )

لكن بقلب جاااااااااااااااامد حأقبل لو كان راااجل رااااااجل

أ

[nash]

أهلا يا دياب يا خويا... :lol:

هاشوف رأيك يا كابتن ...لما تيجي مريومه الأول....

ونفرح فيك....يوة بيييك...وأنت عريس يارب

صدقني الضني غالي...وتخيل لما تكون بنوته

ربي يوفقك

[nora]

ياريت يا دياب ناس كتير تغير طريقه تفكرها بجد لاني شيفه ان في ناس غلابه اوي وكويسين بيشتغلو الشغالنه دي وناس بتتبطر على النعمه وفي ادها الحل بس مستكبرين ربنا يهدي

[Eldisel]

استاذ الديزل ولونلي

بجد تجربتكم جميله جدا انا معاكم ان الشغل مش عيب والله بس مجتمعنا هو الي رافض المفروض ان نغير الفكرة دي في نظر الناس لان طول ما احنا بنبص للمهن البسيطه دي بانها اقل من المستوى بجد عمرنا مهنتقدم ....(لولي ممكن اشاركك في مشروع )

الاخت العزيزة نورا منورة المحاورات

فكرة ان المجتمع رافض ولاذم نغير الفكرة دي عند الناس .... دى فكرة الناس الي بيستخدموا الناس والمجتمع كشماعة يعلقوا عليها معتقداتهم الغلط

انا واحد من المجتمع دة وانا واحد من الناس دي ... ( لاذم نغير الفكري دي عند الناس ) ماشي ابشري الفكرة دي اتغيرت عندي :rolleyes: .,.انا شايف ان فكرة الاعمال البسيطة مش عيب ولا حرام خلاص ميهمنيش حد من الي شايف غلط , يبقى يكتشف الحقيقة دي بعدين هو حر انا مش هستنا المجتمع يغير فكرتوا وبعدين ابقى اغيرها انا .,. لاني مؤمن بحاجة اني يجب الا اتاثر بسلبيات المجتمع الي انا عايش في بالعكس انا لازم ائثر في المجتمع دة بايجابياتي

يعني مثلاً لو انا رحت مجتمع غربي وعشت فية هل لان المجتمعات دي شايفة ان العلاقة بين الولد والبنت من غير جواز هي علاقة حتمية وان الي ميعملش كدة يبقى معقد نفسياً اروح انا اقول دة المجتمع هو الي فارض علي دة ولما نظرة المجتمع تتغير ابقى اتغير انا .. وابقى تابع للافكارالغلط للمجتمع دة .,.

انا شايف اني لاذم اكون مستقل بتفكيري وراي حسب ما الدين والاخلاق بيوجهوني ولاذم يكون عندي ثوابت في معتقداتي تفضل معي ثابتة مهما تغيرت معتقدات المجتمع الي انا عايش فية

يعني لو رجعنا لموضوعنا هل شغلانة التاكسي دي ( او اي شغلانة بسيطة ) هل هي حلال .,. هل هي هتمنع احتياجي من الناس .,. هل هي شريفة خلاص يبقى اتوكل على الله

وكمان عاوز اوضحلكم حاجة في ناس كتير كانو اغنية واصحاب شركات وجار عليهم الزمن وفقدوا كل دة وعجذوا عن العيش في المستوى الجديد المتادني هذا واصبحوا يعيشوا على الاعانات ( فانا شايف ان الحرفة البسيطة او العمل البسيط قد يكون هو السند الوحيد في اوقات صعبة ممكن تعدي على الواحد وتخلية يعيش بكرمتة بين الناس احسن مايعيش على الاعنات والذل )

معلش طولت عليكم