هل اصبح المصريين اغنياء

[ابو ايمان]

نجد فى الاونه الاخيرة المسلسلات المصرية وايضا الافلام المصرية كلها تتجه نحو مشاكل رجال الاعمال والاثرياء وذو المقام الرفيع .

هل اصبحت مصر كلها اغنياء ومشاكلهم الان بسبب كثرة الفلوس والمنافسه على من الاقوى فى الساحة .

هل اصبح لا وجود لكل الفقراء واصحاب الدخل المحدود فى مصر .

اين الاعمال الفنية التى تنشر وقائع حياة الناس الغلابه فى مصر

ولا علشان الاعمال الفنية الان اصبحت بتنشر اى موضوع المهم الايراد والكسب منه

ولا تنشر الهدف من الموضوع وهى عرض مشاكل الناس البسطاء وليس مشاكل الاغنياء

هل فكر مؤلف او كاتب فى الذهاب الى اى دولة بها مصريين بكثرة وكتب قصة عن حياة المصريين فى الغربة ومشاكلهم

للاسف اصبحت الاعمال الفنية الان مثلها كمثل اى مادة اعلانية لا تريد نشر الحقيقة والمواجع فى مصر وكيفيه الحلول.

وللاسف الشعب المصرى المعروف بطيبة قلبه ينفعل بهذه الاعمال ويفرح بها المهم عاوز يتسلى ويشغل تفكيره فى هذه الاعمال الفنية ولا يريد من يوضح له مشاكله العادية بعمل فنى صحيح وجرئ .

مع تحياتى

ابو ايمان

[رمضان]

الاخ ابو ايمان

اساسا الفقراء في مصر غير معترف بهم من .... فمابالك بالكتاب والمخرجين

[أبو حميد]

أهلا بيك أبو أيمان في المنتدى ده أولا

ثانيا اللي بيحصل ده طبيعي علشان المشاكل الحقيقية لا تتم مناقشتها من خلال الأعمال الفنية في ظل وسائل الأعلام المملوكة للدولة لأن الأحوال زي الفل ومفيش فقراء والكل عايش وسعيد والعيش متوافر والأسعار رخيصة والسكن مرطرط وكله تمام.

يعني الموضوع تحول لمناظر وليست قصة وفي الحالة دي تبقى مناظر الناس الأغنياء (زمان الباشوات وحاليا رجال الأعمال) بتكون مشوقة أكتر للناس العاديين اللي بيتفرجوا لأنهم عاوزين يشوفوا الناس دي عايشة ازاي مش عاوزين يشوفوا العيشة اللي هما شايفينها كل يوم.

وبعدين هم لو عملوا مسلسل ولا فيلم عن حالة الفقراء وأصحاب الدخل المحدود في ظل الظروف المعيشية الصعبة هذه الأيام سيتحول المسلسل أو الفيلم إلى ميلودراما من النوع الثقيل. وده طبعا ضد شعارات المرحلة الحالية" العملية مش ناقصة غم والسبوبة وكبر دماغك ومشي حالك ".

ده تفسيري للظاهرة التي بتتكلم عنها مش رائي أنا الشخصي لأن الفن لازم يرفه عن الناس وكمان لازم يناقش القضايا الهامة ويحللها.