بتتفرج على إيه ؟

[se_ Elsyed]

بالتأكيد كلنا أو مُعظمنا ما بيسيبش نفسه للريح أو مطرح ما ترسي دق لها وأهو الريموت في إيدي وبأقعد أفر في القنوات واللي الروليت يقف عنده أهو بنشوفه !!!

لإن لو ده حصل يبقى أكيد أكيد ده مضيعه للوقت ويبقى التليفزيون مجرد هزل وعبث ( الكلمتين الأخرنيتين دول بتوع أ عادل أبو زيد :rolleyes: (

تعالوا بقى نستفيد من بعض تليفزيونياً ونٌسلط الضوء على البرامج التي يُمكن أن نستفيد منها نحن وأبناءنا

------------

هابداُ بسم الله

- سبحان الله من حوالي 7 قول 8 شهور إهتديت كده لحتة قناة إنما حاجة ميت فل وتسعتاشر .. بس للأسف هي مُشفرة ولو إن سعر إشتراكها لا يُذكر على الأطلاق ( 10 جنيهات شهرياً ) ولكن تُعتبر تلك القناة نبع علمي وثقافي وترفيهي ليس له حل ...

" قناة ناشونال جيوجرافيك "

الظريف بقى في الموضوع إنها مُفيدة جداً لجميع أفراد الأُسرة يعني مش للكبار فقط ولكن الأطفال برضوا هايلاقوا برامج جيده مفيدة لهم وفعلاً يتقال عليها " مش هاتقدر تغمض عينيك "

اللي بيحزن بقى إني بأشاهد برامج في غاية القوة عن مصر وخصوصاً ما يتعلق بالتاريخ القديم وكل شويه ألاقي زاهي حواس ناطط لي في البرامج دي وهو يعتبر نجم شباك بالنسبة لهم .. وفعلاً إستفد مها معلومات تاريخية في غاية الاهمية ... واللي بيخليني آسف إن بلدي نفسها ما علمتنيش كده لإن فاقد الشيء لا يعطيه

القناة يا جماعة يُمكن إضافتها بمنتهى الشهولة لمالكي كرت النيل .. او مُشتركي الإيه آر تي

وللعلم أنا عندي قناتي " أنيمال بلانيت " و " ديسكفري " ولكن لا وجه للمقارنة

جربوها وإدعوا لي

( واحد صاحبي إسمه هاندي كرافت .. نصحته وراح إشترك ومن ساعتها عمال يدعي عليه لإنه ما بيقومش من قدامها )

وإلى اللقاء مع قناة أخرى

" مع سين سين مش هاتقدر تاكل سمين "

[عبده بيه]

تحية للكبير سي السيد

المشكلة يا بيه اننا في اوروبا من الصعب ان تلاقي القنوات دي وهنا عندك سلاح ذو حدين من ناحية ان فك التشفير مشكلة يعاقب عليها القانون والاخري ان ال ايه ار تي مثلا سعرها هنا ضعف سعر مصر ب20 مرة وده للاسف مفيش مقارنة بالمرة

فبالتلي ليس لدينا من القنوات المحترمة غير الجزيرة والجزيرة اطفال ودبي بعض الشيء

ولما نكون في مصر بنقول الحمد لله ان مش عندنا الكام الهائل من القنوات الفاضحة دي

وبكده فعلا مع سين سين مش هتقدر تغمض بالمرة

[darker19]

أنا بطلت أتفرج على التلفزيون من زماااااااااااااااااااان يمكن من سنتين, بسب مواعيد الشغل و الدراسة, بالإضافة لتفاهة البرامج.....

بس ووقت فراغي بقضيه هنا, بيتهيألي المنتدى ده أحلى من 100 تلفزيون....

[نانو]

عارف يا س س

انا وصلت للقناه ديه مره بمحض الصدفه

كان عندنا قناه في باقه الايه ار تي و فيها مشكله و مش بتظهر و البنت قالت لي هابدلهالك بقناه تانيه كويسه

و حطت القناه ديه

وفعلا لقيتها مممتازه ومفيده جدا

[MZohairy]

France 2

3

5

Rai 2

3

History

Animal planet

Sky news

قنوات افلام الأوربيت

قناة اليوم اوربيت

دريم

المحور

تونس :rolleyes:

جميع قنوات الأطفال اللي على الساتاليتات اللي في الدنيا

بالإضافه الى قنواتي المحبوبه الرابعه و السادسه و السابعه و الثامنه المصريه الأرضيه :)

[se_ Elsyed]

بالإضافه الى قنواتي المحبوبه الرابعه و السادسه و السابعه و الثامنه المصريه الأرضيه :rolleyes:

فضلت تنق فيها ياخويا لحد ما أتلغت من سنة أهو

طب تصدق بالله ولا لك عليه حلفان إني كنت بأستمتع بمشاهدة تلك القنوات بغض النظر عما تقدمه ... عارف ليه ؟

- لإنها زي مانت عارف تابعة للأقاليم الاخرى غير القاهرة ومنها بالطبع الريف .. وكانت بتجيب قنوات عن الريف والناس البسطاء وقنوات منها كانت بتروح تصور في الغيطان ومنازل الفلاحين فكنت بأستمتع بالمشاهدة لإني بأحس إن أنا من الناس دي وهما دول أهلي الحقيقين ..

طبعاً إنت إنسان أنوي أرستقراطي مش هاتقدر الشعور ده :)

-------------------------

عبدو بك

من ناحية ان فك التشفير مشكلة يعاقب عليها القانون

ده أحنا على كده في مصر مجرمين عتيدي الإجرام ... وصلات من أم 25 ج وإدي يابا

------------------

نانو

وفعلا لقيتها مممتازه ومفيده جدا

دعيتي لاونكل ثين ثين ولا لأ ؟

--------------

قاهر الظلام داركر

بالإضافة لتفاهة البرامج.....

لأ إسمح لي يا داركور .. اختلف معاك بوضع الجميع في سلة واحده .

---

[MZohairy]

والله العظيم اتلغوا؟؟ :rolleyes:

من البث الفضائي بس ولا من الأرضي كمان؟

[واحد تاني]

تعالوا بقى نستفيد من بعض تليفزيونياً ونٌسلط الضوء على البرامج التي يُمكن أن نستفيد منها نحن وأبناءنا

القناة الخامسة طبعا ... :closedeyes:

البرامج المفيدة كاتاتي :

- موجة وشمسية

- طلباتك ايه 100 مسا

- ابتسامة واحدة لا تكفي

- مغامرات الشاب فالح

- سباق المفاجآت

[MZohairy]

تعالوا بقى نستفيد من بعض تليفزيونياً ونٌسلط الضوء على البرامج التي يُمكن أن نستفيد منها نحن وأبناءنا

القناة الخامسة طبعا ... :closedeyes:

البرامج المفيدة كاتاتي :

- موجة وشمسية

- طلباتك ايه 100 مسا

- ابتسامة واحدة لا تكفي

- مغامرات الشاب فالح

- سباق المفاجآت

و برنامج (ماتيجوا نطبخ طبخه نضيفه) بتاع القناه الثامنه -_-

من البرامج الكلاس بصراحه

[se_ Elsyed]

زهيري

واحد تالت

إطعلوا لي بره إنتو الإتنين خصوصاً إنكم من منطقة واحده وهاخدكم وش واحد بالعرض

[darker19]

لأ إسمح لي يا داركور .. اختلف معاك بوضع الجميع في سلة واحده .

س س معاك حق طبعا, ويمكن يكون خانني التعبير ولكن ليس هذا ما أقصده تماما....

بما إني مش بتفرج على التليفزيون, فعشان ألاقي القنوات الهادفة و المحترمة لازم هامر (بضم الميم) على بلاوي في السكة....

وبما اني يوميا شغال من 9 صباحا ل 1 فلما برجع البيت يا دوب باتغدى عشان أناملي ساعة قبل دوام الليل الي بيبتدي من 4 ونص لغاية 10, ولما بوصل البيت الساعة 10 ونص ما بيكونش عندي دماغ اني أعد قدام التلفزيون أشاسا.....

وحتى ان وجد وقت فراغ بيكون معظمه في الشغل فا بقضيه في المنتدى, ولو بره الشغل فابخرج عشان ما عدش قدام التلفزيون وأعد اشوف في برامج مستفزة و تحرق الدم في طريقي للبحث عن قناه محترمة.....

[احمد هادي]

اتفق مع سين سين في قوة قناة national geografic والتي اتحيت لي فرصه مشاهدتها لعدة شهور - في السكن الذي منحته لي آخر شركة كنت اعمل فيها قبل ما اودعهم آخر وداع

القناة رائعة شكلا ومضمونا وتحسرك ان ال250 قناه عربية علي النايل سات مفيهومش برنامج علمي واحد يوحد الله.

وبما اني من انصار حملة مقاطعة التليفزيون - يعني مليش عين اتكلم - لكن هتكلم

هي مجرد نصيحة للشباب الصغير اللي ما عاشش المرحلة دي بحلوها ومرها وطبيخها

الشباب المتعطش للقدوه والمثل

الشباب الي ضاعت منه القيم في زحام الحياة

الشباب الي قفد الامل والرغبة في مواصلة الطريق

الشباب الذي يعاني من الفراغ النفسي

والضحالة الثقافية

لكل هؤلاء اقول

شاهدوا حلقات جرندايزر علي قناة المشكاة يوميا 6:30 بتوقيت السعودية

[محمود الشاعر]

شاهدوا حلقات جرندايزر علي قناة المشكاة يوميا 6:30 بتوقيت السعودية

بجد يا احمد هما لسه بيعرضوه انا كنت بحبه جدا وهحاول اتفرج عليه

تقريبا كل اللي سبق من قنوات بتفرج عليها ما عدا الاوربت واضيف قنوات الشو تايم

[أبو محمد]

أنا فى الحقيقة بابدأ أتفرج على التليفزيون إبتداء من الساعة العاشرة .. وهم محطتين اتنين .. دريم 2 (برنامج الساعةالعشرة) .. وقناة اليوم (أوربت) - برنامج القاهرة اليوم الذى يبدأ فى العاشرة والنصف .. وأفضل أتردد بين القناتين ... National Geographic قناة عظيمة بس باشوفها بالصدفة ..

لغيت الإيريال وبطلت اشوف قنواتنا الميمونة .. لأنها مازالت فى مستوى الريادة .. و7 آلاف سنة حضارة .. وتوجيهات الرئيس .. وقد تم بحث القضايا ذات الاهتمام المشترك :closedeyes:

[Sherief AbdelWahab]

الشغل المؤقت بياكل معظم وقتي ، وإن ما كانش دة بيمنعني من مطاردة الإعلام هنا وهناك .. معنتش full option زي زمان!

دة ما يمنعش إني كنت بأجيب الـ BBC أيام راس البر (هنا البي بي سي بتاعة سعيد صالح) .. باسمع النشرات وطبعاً التترات الجذابة جداً للنشرات الإخبارية في القناة البريطانية العريقة..

كانت بتيجي في الوصلة قناتين أخطر من بعض ، animal planet و discovery .. والأخيرة شديدة طحن على حق..

غير كدة القنوات الرياضية (الجزيرة ودبي وغيرها) ..

ولأغراض المتابعة والكتابة ورصد الظواهر بأعصر على نفسي ليمونة أضاليا وأشوف القنوات المحلية وبالذات برامج رفع الضغط مثل برنامج "مين كسر إيه دة" اللي بيعده حمدي رزق وبيقدمه الأختين الحلوين هناء وشيرين ، عفواً رشا مجدي وعاطف كامل.. :closedeyes:

خلص الكلام

[بنت النيل]

اولا شكرا يا س س على معلومات وعن القناة اللى قولت عليها

بس تصدق بقى انى انا عندى اكثر من 2000 قناة والشوتايم واى ار تى ،،، واوربت

وقناوت ممكن ماعرفش هى فين ولا منين

ومع ذلك مش بفتح التلفزيون غير الساعة 8 مساء عشان اتفرج على اعاده حلقات ليالى الحلميه

اصلى بحب اشوف سلمونتى ونظاكه :closedeyes:

غير كدا ممكن الاولاد الابرياء،، واخد بالك من الابرياء دى :mellow: اللى عندى يخلونى اتفرج على فيلم رعب الموفيى تشنل

على فيلم خيال علمى وان الله يحب المحسنين -_-

لكن انشاالله اشوف القناة اللى قولت عليها دى طلما بتشكر فيها اوى كدا على الاقل نلاقى حاجه مفيده بالتلفزيون

[se_ Elsyed]

نوسع الدائرة شوية ونتكلم عن البرامج المُفضلة التي يحرص كلاً منا على مشاهدتها لتعُم الفائدة

---------------------

بالنسبة لي برامج الدكتور عمر عبد الكافي .. حاجة ممتعة ومفيدة للغاية ربنا يبارك له في صحته ويزيده من علمه مثلما أمتعنا في رمضان الماضي هاهو يُطل علينا من شاشة قناة " الشارقة الفضائية " ليقدم لنا قصص الأنبياء برؤية جديدة وجميلة

1- البرنامج إسمه " صفوة الصفوة "

ويذاع على الهواء مباشرة على قناة الشارقة كل يوم جمعه في الساعة الـ 8 مساءً بتوقيت القاهرة ويُعاد بثه يوم الاحد في الـواحدة إلا رُبع ظهراً بتوقيت القاهرة ...

2- برنامج " رياض الجنة "

للشيخ الجليل أيضاً مع الدكتور وجدي غُنيم والدكتور صلاح سُلطان يعني لقاء العمالقة

ويُذاع كل يوم أربعاء على قناة البحرين الفضائية الساعة التاسعة إلا ربع بتوقيت القاهرة .

3- برنامج " الإنسان بين الشرع والطبع "

ويذاع كل يوم أربعاء الساعة السابعة وعشرة دقائق بتوقيت القاهرة على قناة الشارقة أيضاً

ولمزيد من المعلومات عن الحلقات يُمكن زيارة موقع الدكتور عمر عبد الكافي التالي

موقع الشيخ الدكتور / عمر عبد الكافي

[صبح]

نوسع الدائرة شوية ونتكلم عن البرامج المُفضلة التي يحرص كلاً منا على مشاهدتها لتعُم الفائدة

---------------------

بالنسبة لي برامج الدكتور عمر عبد الكافي .. حاجة ممتعة ومفيدة للغاية ربنا يبارك له في صحته ويزيده من علمه مثلما أمتعنا في رمضان الماضي هاهو يُطل علينا من شاشة قناة " الشارقة الفضائية " ليقدم لنا قصص الأنبياء برؤية جديدة وجميلة

1- البرنامج إسمه " صفوة الصفوة "

ويذاع على الهواء مباشرة كل يوم جمعه على قناة الشارقة في الساعة الـ 8 مساءً بتوقيت القاهرة ويُعاد بثه يوم الاحد في الـواحدة إلا رُبع ظهراً بتوقيت القاهرة ...

2- برنامج " رياض الجنة "

للشيخ الجليل أيضاً مع الدكتور وجدي غُنيم والدكتور صلاح سُلطان يعني لقاء العمالقة

ويُذاع كل يوم أربعاء على قناة البحرين الفضائية الساعة التاسعة إلا ربع بتوقيت القاهرة .

3- برنامج " الإنسان بين الشرع والطبع "

ويذاع كل يوم أربعاء الساعة السابعة وعشرة دقائق بتوقيت القاهرة على قناة الشارقة أيضاً

ولمزيد من المعلومات عن الحلقات يُمكن زيارة موقع الدكتور عمر عبد الكافي التالي

موقع الشيخ الدكتور / عمر عبد الكافي

فين؟؟

[MZohairy]

الشارقه

[se_ Elsyed]

برنامجي المُفضل والذي أحرص على متابعته على قدر الإمكان يومياً هو

" بلغوا عني ولو أية "

للشيخ الجليل أحمد عامر الذي يثعد من أعلام قراءة القرآن في العالم الإسلامي بدون مبالغة

والذي يُعلمنا فيه بطريقة سلسة وسهله كيف نقرأ القُرآن ومخارج الألفاظ

طول عمري مستتقل الموضوع ده وحاسس إنه زي علوم الطاقة النووية " ( إضغام وإخفاء وقلقلة وترقيق ... إلخ ) وبالرغم من إن الحمد لله زوجتي ضليعة في هذا المجال ودارسة الموضوع على اصوله إلا أنني لم اتجاوب معها في محاولاتها لتعليمي

ولكن بمتابعة برنامج هذا الرجل المُبارك إكتشفت إني كنت باعجن مش بأقرأ قرآن من كثرة الأخطاء اللغوية التي كنت أقوم بها

وما يجذبك في طريقته هو روح الدعابة وخفة الدم التي يتبعها ( مش عارف ليه كل ما باتفرج عليه بافتكر أختنا شهد أم يمن في طريقتها لشرح هذا الموضوع من قبل في المنتدى )

البرنامج يُذاع كل يوم الساعة السابعة بتوقيت القاهرة على قناة دريم 2

وأعتقد إن نفس البرنامج يّذاع على قناة إقرأ بإسم أخر وهو " كيف نقرأ القرآن " ولكن لا أعرف مواعيده

موقع الشيخ أحمد عامر هو أحمد عــــامر