إلى الباحثين عن العمل عن طريق اﻹنترنت...احذروا

[الباشمهندس ياسر]

للامانة سمعت انهم بستغلوا اي بيانات عنك وخاصة صورتك في موضوع السحر وتسخير الجان

وللعلم الافارقة اساتزة في الحاجات دي

نسال الله العافية

سمعتي فين

و ازاي دخل دماغك؟

يا خبر ابيض تسخير جن وعفاريت لا اله إلا الله ...

هوه حد ممكن يسخر جن او يعمل عمل عن طريق صورة شخص !!!

برجاء التوضيح ,,

فرق كبير جدا بين ((يسخر جن)) و بين ((عمل سحر لشخص))

المهم

بعض السحرة عندهم القدرة انهم يعملوا السحر لفلان بعينه بالصورة و معرفة اسم الام

[elshafey]

انا حصل معايا موضوع شبه ده بس كان الشغل في اسبانيا واللي حصل هو:

- جالي ايميل من شكره اسمها فولتاسول مقرها في مدريد وجابوا السي في بتاعي من علي مونستر (خلي بالكم كويسمن الموقع ده لأنه في ناس بتستغله كتير بناء علي شهرته) وكان مطلوب ابعت بيانات اولية ورديت عليهم وبعد كده بعتولي مجموعة اسئلة من بتاعة الانترفيوهات ورديت عليهم

بعدها خبط لزق بعتولي عقد مش ممكن حد يحلم بيه 12000 يورو وفيلا وعربية بسواق و تعليم للإطفال وتأمين صحي في ارقي مستشفيات اوروبا وكان ناقص يقولولي عروسة كمان

المهم انا قلقت من الموضوع ده لأن العرض خيالي - علي الرغم من ان الحمد لله خبراتي و مؤهلاتي تؤهلني لعروض حلوة بس مش كده ومش من أول شغلانة في أوروبا -

وبعد كدهرحت متصل بالسفارة الاسبانبة في الرياض ردت عليا واحدة لبنانية - زي العسل - وكانت المكالمة كاتالي:

- سألت : طلبوا منك فلوس

رديت : لأ لسه وده اللي محيرني ومخليني مهتم بالموضوع

سألت : طيب حولوك علي اي وسيط عشان يخلص الاجراءات

قلتلها : ايوة وكانو كاتبين انها مؤسسة تابعة لوزارة العمل الاسبانية

قالتلي : كده النصب هيبدأ و هتلاقيهم هيطلوا منك فلوس لأي سبب

وراحت مكملة : هقولك علي حاجة.... ابعتلهم وخليهم يكلموك وخلي بالك لو الموضوع جد هيطلبوا منك شوية اوراق تخلصها في السفارة عندنا والمفروض انك ماتتحملش أي مبالغ لأي حاجة ليها علاقة بالسفر

قلتلها : شكرا

المهم بعتت ايميل ليهم عشان يكلموني ماحدش رد عليا من يومها والكلام ده بقاله 8شهور

الخلاصة: لازم تاخد بالك من الاتي لما يجيلك عرض عمل علي الايميل :

1- تأكد ان الميل مبعوت من ايميل رسمي للشركة أو من موقع أو توظيف معرفة ( وده مش بيأكد الموضوع بس لو لقيت ميل جايلم من هوت ميل ولا ياهو يبقي في الغالب نصبه)

2- تأكد ان الوظيفة لها علاقة من قريب او من بعيد بخبرتك ( مش تبقي حضرتك محاسب ويطلبوك لو ظيفة مهندس مثلا)

3- تأكد ان خبرتك تكون مناسب للوظيفة ( ممكن تكون خبرتك تنفع مشرف مبيعات ويبعتولك علي وظيفة مدير عام المبيعات مثلا)

4- مش ضروري ان اللي بيبعتلك يكون صادق لو قال في اول الميل انه جاب السي في من علي مونستر وبيت لأن الشركات دي بتبيع خدماتها للي يدفع فلوس يعني اي حد عنده سجل تجاري ممكن يبعت يقولهم انا عايز موظفين بيفتحولو حساب علي طول

خلي بالكم عشان انا بيجيلي ايميلات كتبر من الشكل ده و بطنش الموضوع ...... بس ربنا يسترها من الطناش اسيب حاجة تكون حقيقية

[محمد عبدالعزيز]

وصلنى رسالة SMS اليوم وفيها:

مبروك لقد ربح خط جوالك 50000$ نقداً يرجى الاتصال للاستعلام عن التفاصيل

والرقم الذى أرسلها هو 23222291093+

أول شئ يتبادر إلى ذهنى فى مثل هذه الحالات هو النصب.

وبناءً على ذلك بحثت عن الرقم فى جوجل ووجدت هذا الموضوع: احترسوا من النصب عن طريق الموبيل

أهم التعليقات من وجهة نظرى كانت:

تنبيه كويس أوى و الموضوع قديم جدا

و على فكرة الشركات دى بتكون شركات كبيرة و مبتذكرش أسمها و بتحقق أرباح عاليه أوى بتوصل لألاف لأن الرسالة الواحدة بمبلغ كبير زى 5 جنيه أو أكتر و بمساعدة الشبكات كمان

الطريقة القديمة كانوا بيستعملوا ايميلات كمان ياباشا.

المشكلة مش فى الرسالة بس المشكلة الاكبر لو حد اتصل بيهم يبقى مهتم بالموضوع ورجله جت فى الفخ. بعد كده بيبعتوا صورة من شهادة وعليها اختام بأن المبلغ موجود فى البنك وعلشان يبعتلك اصل الشهادة لتحصل على المبلغ بعد تحويلة لازم تحولهم مبلغ 1000 دولار على حساب بنك هما حيبتعهولك وفى ناس كتير وقعت فى الفخ ده وراح عليهم 1000 دولار زى السلام عليكم.

برجاء ان نكون حريصين.

برجاء الحذر من الجميع, وربنا يبعد عنكم ولاد الحرام.

[عادل أبوزيد]

الحذر دائما مطلوب

[حسين امبابي]

شكرا جزيلا لصاحب الموضوع القديم نسبيا رغم ابدية وجود النصابين في كل مكان وزمان ولي قصة قصيرة مع النصب والنصابين ليس من خلال الايميلات لانني ببساطة اجدها ساذجة ومفضوحة ولا تنطلي على اي عاقل كما تفضل الاساتذة هنا بالتنويه ان الشركات الكبري لا تطلب اي مبالغ للتعيين وخلاف ذلك فهو نصب .

الموضوع عبارة عن اعلان من شخص مقيم بالقاهرة ويعرف نفسه للمتصل على انه وكيل احد ملاك فندق في دبي واتذكر انه قال لي اسم الفندق " Orange" والعرض طبعا سخي جدا الراتب وكنا بـعام2009 مبلغ 3000 الاف دولار والسكن مؤمن والعمل شئون قانونية !!

وتقابلنا في احد فروع محل  سلينترو  بالدقي وطلب مني مبلغ 700 درهم او ما يعادله بالجنيه المصري لاتمام اجراءات العمل بالسفارة ! طبعا كذب مفضوح ونصاب عبيط وربنا يسامحني لاني في اليوم دا اصطحبت معي 2 من اصدقائي الرياضيين ذوي البنية القوية واحسست بتوتر صاحبنا النصاب ذو البنية النحيفة مثلي . ولما واجهته بكذبه تلعثم وتغير الكلام وأنتهى الامر بعد بكائه واستعطافه لنا " قلمين حلوين " . انتهي

تم تعديل 24 يوليو 2015 بواسطة حسين امبابي

[HanyAhmed]

السلام عليكم و رحمة الله وبركاته

 

احب اشارك فى الموضوع المهم ده

 

انا شغال فى نيجيريا و كتير من اصحابى لما بيجيلهم عروض كده بيسألونى

المهم انا الحد الفاصل عندى هوة هل طلبو منك فلوس ؟ او حولوك لوسيط وبردو حياخد فلوس؟

 

اى شركة بتطلب اجانب المفروض انها بتتكفل بكل حاجة ومافيش حاجة اسمها ادفع فلوس لاى حد ولا اديله رقم حسابى فى اى بنك

 

المهم ان حتى لو جالك عرض و مش حتدفع حاجة فلازم تتاكد من الشركة إما من حد شغال فى البلد اوانك تدخل على موقعهم على النت و تسألهم عم مصداقية العرض

انا بقول كدة لان هنا الخطف منتشر وغالبا حد ممكن يبعتلك ومن غير ما تدفع فلوس ولا حاجة بس اول ما تيجى البلد يخطفوك و يساومو اهلك على فلوس او يقتلوك و يتاجرو بالاعضاء

 

لسة قريب الحكومة قبضت على ناس بيعملو كده ولقت عندهم جثث كتير وطبعا كل جثة متاخد منها حاجة 

 

خلاصة الكلام

- مش اى عرض تجرى وراه بالذات فى افريقيا يعنى دور كويس وخد وقتك

- لو اى حد طلب منك فلوس او رقم حسابك لاى سبب اوعى تديله حاجة

- اوعى تدوس على اى لينك جاتلك على الايميل حتى لو من البنك بتاعك او من حد من اصحابك(لان ممكن يكون هوه كمان حد عمله هاك و بيبعت من ايميله من غير ما يعرف ) بس الحل انك تكتب بنفسك اللينك على المتصفح بتاعك

- اهم حاجة اعرف ان رزقك حايجيلك حايجيلك بس كل اللى عليك انت تجتهد و ماتخليش الظروف الصعبة تدفعك تقبل باى اعرض مهما كان فلازم تفكر كويس جدا