لو سمحت يا دادي عايز اشترك في نادي

[shawshank]

وهل هناك أي مكان بالععالم (أقصد أي دولة بالعالم) توفر الكماليات (إذا أن العضوية بالنوادي الإجتماعية من الكماليات) لكل أفراد الشعب ..

الأخ العزيز / أسد

أضم صوتي لصوت الفاضلة nash

و أقول إنه من متطلبات الآدمية أن تجد مكانًا محترمًا يلعب فيه أطفالك و يلهون ، ثم يمارسون رياضة ما عندما يكبرون قليلا ، و تلتقي فيه بأصدقائك و يلتقون هم بأصدقائهم كنشاط اجتماعي . كل ذلك ليس كماليًا بالمرة . النشاط الاجتماعي جزء إنساني في تركيبة كل بشر ، إن لم يجد مكانًا مناسبًا يمارسه فيه ، فلن يمنعه ذلك من ممارسته في مكان آخر ، لكنه لابد أن يخرج .

دول كثيرة في العالم توفر مثل هذا النشاط مجانًا في أماكن مثل State parks أو Public parks أو غيرها - مثلما أشار أستاذنا الفاضل / أبو محمد . هي أماكن توفر الحد الأدنى للآدمية . أما ما يفوقها فربما هو ما تسميه حضرتك كماليات . أما في مصر ، فحتى هذا الحد الآدمي غير موجود إلا لمن يدفع . فالآدمية في مصر للأغنياء فقط .

..لإننا نجد فئه غلبانه جدا..وهي فئه المتعلمين أصحاب الشهادات الشرفاء كالطبيب أوالمهندس...من ذوي الأصل والفصل..والمكانه الإجتماعيه المحترمه لا يجرؤون بالحلم في الإشتراك في أحدي هذه النوادي...

ربما بإمكانك إضافة فئة أساتذة الجامعة الشرفاء :wub:

تم تعديل 6 يناير 2007 بواسطة shawshank

[هيليوم]

حديقة الأزهر مش بطّاله بردو ؛ ماء و خضره و وجه حسن :wub:

تم تعديل 6 يناير 2007 بواسطة هيليوم

[أسد]

الإخوة الأفاضل ..

هذا ما قصدته ..

نعم .. ليس كل المصريين قادرون على الإشتراك في النوادي .. ولا يمكننا المطالبة بذلك ..

ولكن يمكن المطالبة بأماكن تستهدف الطبقات الأقل دخلاً .. والفقراء ..

ويمكننا أن ننادي بعودة أنشطة الساحات الشعبية .. ونوادي بالأحياء .. والنوادي الصيفية في المدارس ..

أن نطالب بتوفير أماكن مختلفة تستوعب كل الناس ..

ولكن أن نطالب بأن تكون كل النوادي متاحة لكل الناس ..

فهذا غير منطقي ..

شكراً ..

[nash]

أخي أسد

أعتقد أيضا...أننا يجب أن نطالب الدوله بالتدخل في مشكله الإرتفاع الجنوني في أسعار هذه النوادي...

حتي لا تبقي حكرا علي أصحاب الثروات فقط.....

مع أني واثقه أن الحكومه المبجله من أكبر راس فيها إلي أصغرها...لا تعير وزن ولا إهتمام للطبقه الكادحه...أصحاب الشهادات المحترمه...وأصبح النظام....هناك..للأسف..اللي معاة يلزمه..واللي معاهووش...يخبط دماغه في ..اي جدار...والحكومه غير مسؤوله عن أي شيء غير بس توفير الأمن والأمان للساده العظماء...

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

أخي الكريم شاوشينك...

أسفه فعلا نسيت طبقه أساتذه الجامعه........بس والله من القهر..علي الحال المتردي اللي عايشاة مصر

[أبو محمد]

أسد كتب :

ولكن أن نطالب بأن تكون كل النوادي متاحة لكل الناس ..

فهذا غير منطقى

لم يطالب أحد بأن توفر الحكومة النوادى لكل الناس .. ولكن الحكومة مطالبة بسياسات تجعل الأندية والملاعب متاحة بأسعار معقولة (بل ومتاحة أيضا لأطفال الشوارع) ..

أراضينا شاسعة والحمد لله .. فهل تشجع الحكومة على تعميرها ؟ ..

إذا خُلقت "مجتمعات" جديدة وابتعدت يد الفساد الحكومى عنها فإن تلك المجتمعات بتسهيلات حكومية كفيلة بتوفير النوادى وساحات التنزه والألعاب لأبنائها .. أظنك تعلم كيف أصبحت أمريكا أقوى دولة فى كرة السلة .. فى كل حى ساحات مسورة بشبك فيها ملاعب .. وليس ملعب واحد لكرة سلة .. أتدرى من يلعب فيها .. إنهم أبناء الطبقات الفقيرة وأطفال الشوارع .. وهذه الساحات ليست قطاع خاص بالطبع .. وهناك من يلتقط الموهوبين من أطفال الشوارع الذين يلعبون فى هذه الملاعب العامة ويصنعون منهم أبطالا يتعاقدون بملايين الدولارات ..

أتدرى لماذا يتطلع الجميع للحكومة ؟ لأن الحكومة تدس أنفها فيما يعنيها وفيما لا يعنيها .. النوادى العريقة فى مصر كانت نوادى أهلية .. بناها وطورها جماعات من الشعب .. ثم استولت عليها الحكومة .. وطبعا أنت تعلم الأداء الحكومى إذا سيطر على أى مؤسسة .. عندنا فى الإسكندرية كان هناك نادى سبورتنج وبالرغم من أن الانضمام إليه لا يكلف شيئا سوى الاشتراك السنوى (الذى كان مرتفعا نسبي) .. فإن إدارته كانت لا تسمح إلا لطبقة معينة من الأغنياء والمثقفين الغير أغنياء بالانضمام إليه فحافظت على مستوى معين إلى أن استولت عليه الحكومة ورويدا رويدا لم تعد به عضويات متاحة إلا بدفع مبلغ معين (حوالى 2000 جنيه فى السبعينات) تحت مسمى "إنشاءات" وأخذ فى الارتفاع إلى أن وصل إلى 70 ألف جنيه ... وعندما كان المبلغ الابتدائى ألفين جنيه لنادى سبورتنج كان نادى سموحة مجانا ولكنه أصبح الآن 40 ألف جنيه .. وقبل استيلاء الحكومة على الأندية كان هناك إلى جانب سبورتنج وسموحة أندية الأوليمبى والاتحاد والترام واليونانى وغيرها .. وإلى جانب تلك الأندية الكبيرة كانت هناك أندية شعبية فى الأحياء الشعبية خرج منها أبطال أوليمبيين فى الملاكمة والمصارعة ورفع الأثقال وكرة القدم ... وكان فى مدرستى (الحكومية) ملاعب من ضمنها ملعب للهوكى (تصدق ؟) .. وكانت الأندية العريقة تلتقط من المدارس لاعبين موهوبين للانضمام إليها ..أنا كنت أخوض مسابقات السباحة باسم نادى السكة الحديد (ولم يكن هناك أى فرد من أسرتى فى السكة الحديد) لأن أحد الكشافين شاهد مجموعة أطفال ينظمون مسابقات للسباحة فى الميناء الفرنساوى ( مطعم Sea Gul حاليا) فاختار بعضهم وضمهم إلى نادى السكة الحديد ومن السكة الحديد إلى أندية أخرى أهم .... كل هذا والحكومة بعيدة عن الأندية .. كانت فقط تنظم بطولات المدن والمحافظات والجمهورية وتشرف من بعيد على أنشطة الأندية كأى جمعية أهلية ...

أما الآن وبعد أن كان هناك وزارة للشباب قسموها إلى جهاز شباب وجهاز رياضة آخر ما يهتمون به هو الشباب والرياضة

مرة أخرى على الحكومة أن تضع السياسات الرشيدة (فعلا لا قولا) وتترك الجمعيات الأهلية تعمل فى إطار تلك السياسات .. وعلينا بالصبر .. فالوضع الآن وبرغم صيحات الاستنكار أفضل كثيرا عن أيام كانت الحكومة فيها تعمل فى بيع الفراخ والفلافل .. بدأت تظهر أندية جديدة راقية وشيك (لمن يقدر) وبأسعار تبلغ ربع أو سدس أسعار سموحة وسبورتنج .. ولكن مازال الأطفال لا يجدون حتى الآسفلت ليلعبوا عليه الكرة الشراب

[هيليوم]

عندنا فى الإسكندرية كان هناك نادى سبورتنج وبالرغم من أن الانضمام إليه لا يكلف شيئا سوى الاشتراك السنوى (الذى كان مرتفعا نسبي) .. فإن إدارته كانت لا تسمح إلا لطبقة معينة من الأغنياء والمثقفين الغير أغنياء بالانضمام إليه فحافظت على مستوى معين

استفسار لو تكرّمت حضرتك ؛

هل معنى هذا أن المطلوب إنشاء نوادى "شعبيه" و أخرى ذات مستويات راقيه تحتفظ لنفسها ب مستوى "معيّن" !! الواضح من حديث كثيرين بالموضوع أن حتى قبل قيام الثوره الاشتراك فى النوادى كان حكر على طبقه معيّنه يتم تحديدها سواء مادّيا او ثقافيا ولم تكن "النوادى للجميع" .. لكن ما أحب أن أتساءل عنه حقّا هو هل هذه الفكره الخاصه بقصر العضويه فى بعض الأنديه على طبقه معيّنه أو شريحه محدّده من المجتمع مقبول الآن؟

[أبو زياد]

لكن ما أحب أن أتساءل عنه حقّا هو هل هذه الفكره الخاصه بقصر العضويه فى بعض الأنديه على طبقه معيّنه أو شريحه محدّده من المجتمع مقبول الآن؟

فى نفس الوقت الذى كان فيه نادى سبورتنج و اندية الجزيرة و هليوبوليس

كان هناك نادى السكة الحديد و نادى الترام و كافة الأندية الأهلية التى ذكرها أخى أبو محمد

يبدو فى نظر البعض أن قصر العضوية على طبقة معينة ( عليا ) هو شىء لا أخلاقى ..

فماذا عن قصر العضوية على طبقة دنيا ؟

لابد أن نعترف بوجود طبقات للشعب تتفاعل و تتجاوب فيما بينها بدون صراعات ..

هناك الأندية الفئوية مثل اندية القوات المسلحة و المعلمين و المهندسين ..وهى مجتمعات مثل مجتمعنا هنا فى المحاورات مثلا لا يقبل احد منا ألا يكون أحدنا فى مستوى الحوار او الفكر المثار

الأندية هى مجتمعات صغيرة و تنوعها الفكرى و الأدبى و الطبقى يثرى جميع فئات المجتمع ..

فلنرجع إلى عنوان الموضوع وأظنه أن أحد الأبناء يعتقد أنه لابد لاكتمال الواجهة الإجتماعية ان يكون عضوا فى نادى ( كذا ) وهذا هو الفكر الخاطىء و الصراع الطبقى الذى لا نرجوه ..

هناك فكرة أرى انها تستحق المناقشة .. لماذا لا يفتح كل نادى فروعا له فى مناطق أخرى قد تكون مختلفة فى بيئتها و تكون إداراتها منبثقة من نفس الإدارة الأم فتستفيد من خبراتها ..

فمثلا فرع النادى الأهلى فى مدينة نصر لماذا لا يفتح أبواب عضويته لفئات أخرى من المجتمع وبشروط أخرى لا تنطبق على النادى الرئيسى ( الأم) ..

فكرتى هى الإستفادة من خبرة الأندية الكبرى العريقة و المطلوب هو نجاح النادى - اى نادى - فى الإستمرار والعطاء

[هيليوم]

أنا لا أجادل فى حقيقة وجود أنديه أخرى "شعبيه" للطبقات الأخرى يا أستاذ / أبو زياد و إن كنت لا أظن أنّها هى الأخرى كان متاح الاشتراك بها لجميع الطبقات فى أى زمن من الأزمنه ..

أنا أسأل هل هذا المنطق مقبول بشكل عام؟ يعنى نحن كأبناء طبقه متوسطه يمكن أن نتقبّل بدون غضاضه أن ترفض بعض النوادى اشتراكنا بها لأنّنا لسنا من الطبقه الأعلى و نكتفى بأن تنشئ الحكومه نوادى لطبقتنا نرفض بدورنا انضمام أبناء الحرفيين إليها و هكذا؟

[se_ Elsyed]

للرفع

---------

نسيت أقولكم إني الاجازة الصيفية اللي فاتت دي قلت عايز أفرح الواد عُمر وبدل ما ادخل البيت ومعايا كيس جوافه يفرح به ... روحت محود على سيتي كلوب ( كايرو - إيه سي ميلان ) اللي لازق جنبي في العبور وقلت أهي حاجه محدوفة وقريبة من البيت والواحد يشترك للأولاد ويسيب لهم حاجه للزمن

وإذ بي اخد خبطة على دماغي مش قادر أفوق منها لغاية دلوقت ...

أولاً : مستوى النادي في منتهى الروعة

ثانياً : هو متعاون مع نادي إيه سي ميلان وعدد كبير من اللعيبة كانوا هناك الصيف الماضي بمناسبة فوز ميلان بالدوري الإيطالي وكان معاهم الكاس كمان وعملوا إحتفالية هناك ..

ثالثاً : فيه مدربين من إيطاليا بيدربوا العيال على كرة القدم

كل كوم ولعبة الكروكية دي كوم تاني ....

دي لعبة الناس المبسوطين ( شوفتوا الست دي مبسوطة إزاي وعماله تضحك ) وبتتلعب بالمرزبة الخشب ولازم تدخل الكرة الحديد في الجون اللي قد الحوق وتفضل ترزع في الكورة لحد ما تدخلها الجون ... وتقريباً برضوا دي لعبة الناس بتوع المعاشات

إستمخيت قوي من اللعبة دي ... بالإضافة إلى لعبة الجولف .. وقلت هاتبيض لك في القفص يا سين سين وهاتركب الميكروباص اللي بيجرووا به ورا الكورة بتاعت الجولفت بين الحُفر

ما أطولش عليكو

أول ما دخلت انا والمدام وراسمين نفسنا قوي ... قابلتنا بنت لابسه شيك وبتتكلم من طرف لسانها زي ما يكون دايسة على حبتين قرنفل ... وقالت لنا :

الأول حضرتك قبل الرسوم .. لازم حضرتك تكون حاصل على مؤهل عالي ...

قلت لها : قشطة .... مودود وحياتك مودود وبكالوريوس تجارة قديم كمان من ايام التجارة ما كانت بخيرها

راحت قايلة : والمدام كمان لازم تكون حاصلة على مؤهل عالي ...

قلت لها : عامل حسابي ومظبط المسائل

بيني وبينكم خفت أحسن تقول والاطفال كمان لازم يكونوا حاصلين على مؤهل عالي ...

قالت : وحضرتك تاخد الأبليكيشن ده وتعبيه .. وده ثمنه 200 ج ... -

قلت ( في سري ) قديمة إلعبي غيرها ده أنا صايع ومتربي في الحواري يا ماما .... وبعد ما أعبيه يا مودمازيل ؟ ... قالت هانحدد لحضرتك إنت والمدام إنترفيو وإذا أجترتوا الأنترفيو بنجاح تقدر تدفع الرسوم ( ده أنا يوم ما اتجوزت ما أتعمليش إنترفيو وحمايا ما صدق وقالي ... شيل يا سين سين حلال عليك يابا ... والله ما هي راجعه )

قلت لها : هاتي من الأخر .. كام بالصلاتو عالنبي ؟

قالت والدمع في عينيها وهي تتأمل فنجاني المقلوب : 75 ألف جنيه للعيلة حضرتك والتجديد بـ 200 ج للفرد سنوياً حضرتك

فتملك الغيظ من الأسد وقلت لها : لييييييييييييييييييييييييييييييييييييييييييييه ؟ وكويس إني قلت ليه حاف بس من غير لا ضرب ولا قلة أدب

فقالت : حضرتك إنت محظوظ .. لإننا لسه عاملين حمام سباحة إسمه اليشمك وده خاص بالسيدات فقط عشان يستحموا براحتهم وكل المشرفين اللي عليه نساء فقط

إن شالله ما أستحموا ياختي ... خليهم كده زي ما هم بعبلهم ... 75 ألف ؟ يعني ثمن شقة في مشروع إسكان المستقبل بتاع آبية جمال ؟ حرام عليكو وعلى اللي جابوكو

فأخيراً فكرت في موضوع كيس الجوافة ده وقلت أهو الولد يحصل من خلال أكله الجوافه على فيتامين سي وعلى الأملاح المعدنية اللازمة لنموه وبلاها نوادي ..

ماله لعب البلي في الشوارع ... ولا الجري ورا عربيات الرش ؟

[م.سامح المصرى]

بالمناسبة ..

منذ عدة سنوات إشتركت بالنادي الأهلي برقم يعتبر اليوم مبلغاً زهيداً بالمقارنة بقيمة الإشتراك الحالي (أعتقد أنه يقرب من سبعون ألف جنيه 0 غير متأكد- ) ولكن هذا المبلغ الذي إشتركت به كان يعتبر مبلغ كبير جداً وقتها ....

المبلغ كان تقريباً 15000 جنيه

استاذى اسد دا من حوالى شهرين وهما كانوا ٧٠ الف جنيه

انما هما قالو هايغلقو الاشتراكات ويفتحوها بعد اسبوع وهاتكون بـ ٩٠ الف جنيه

راح بقي العم بتاع الشركة الي انا فيها (هوا مشترك في نادي الزمالك ) قال فرصة ابل ما يغلو الاشتراك

الحق اشترك في ابو ٧٠ الف جنية

وراح واشترك ابل ما يغلوها

لوله انه متكفل بدار ايتام وبيساعد فيها لكنت قولت عليه كلام تاني خالص بس اهوة بقي

وفي نوادي زي ما قلتو لازم مستوى معين علشان تدخلها بس بجد حاجة تيأس

البلد دي شعبها حاجة من اتنين

لا اغنيا اوي لدرجة انهم مش عارفين يودو فلوسهم فين لاما ناس بيقضو اليوم بيوهم وماشين بالتكال

سلامى لكم

[MemoG]

طيب حد يعرف اسم موقع نادي الصيد بالقطامية

او تليفونه او العضوية فيه بكام

[goodfaith]

يا س س

هو ده اللي هيموتني .....فيه اد ايه ناس في مصر معاها فلوس مش عايزاها بالالوف و ترميها في عضويه نادي....احتمال فساد اولاده بسببه

اكبر بكتير من احتمال تحقيقهم بطوله ما في لعبه ما

و الفرق القاتل في مستوي المعيشه في مصر و بالتحديد في القاهره ....

يعني لما يبقي موظف بسيط يقرا المبالغ ديه وهو عارفه انه هايعيش ويموت ومش هايحصل علي 1% من المبالغ ديه ممكن يحس بايه

هي مصر غنيه ولا فقيره ...و شعبنا شبعان و بيرمي الوفه في الارض ....و لا هيموت من الجوع وبالعافيه بيحصل قوت يومه

احنا رجعنا لايام قبل الثوره ... المجتمع يا فوق فوق يا تحت تحت .....لايام الاحتكار والباشوات....بس حتي باشاوات اليومين دول معظمهم فلصوا

نانسي كنت تخليكي واعيه من الاول ....انا مشتركه في نادي سبورتنج و جوزي في سموحه بس طبعا من زمان من يوم ما اتولدنا

والعمليه دلوقتي ماشي معاناه تمام التمام angl::

طب استني و الله احكيلكم حكايه ....ايام ما كنت باشتغل جات المديره بتاعتي قالت لي يا نانو يا حبيبتي ( وهي عمرها ما بتقولي يا حبيبتي)

عايزاكي في موضوع مهم

انا نفسي اوي اشترك في نادي سبورتنج و عارفه انك لو اتجوزتي... جوزك بياخد العضويه منك و حتي لو اتطلقتي مش بتتسحب منه

و طبعا انا مش فاهمه في ايه...و بعدين كملت كلامها

.ايه رايك في 10000جنيه

قلت لها بتوع ايه مش فاهمه

قالتلي جوزي يتجوزك علي الورق و ياخد العضويه وبعدين يطلقك و تاخدي انتي 10000جنيه (طبعا كنت وقتها لسه مخطوبه)

انا طبعا جالي اذبهلال و شلل خماسي و طرش وخرس وصم :wub:

شر البلية ما يضحك

الحمد لله على سلامتك من الموقف ده

[myusername]

الاخوة و الاخوات الافاضل... مع ان الموضوع قديم, بس شديد و الله.

اسمحوا لى اتحدث باسم اطفال الشوارع... طيب ما احنا طول عمرنا بنلعب فى الشارع, و الحمدلله محصلناش اى حاجة و بقينا زى الفل؟

بصراحة... معظم النوادى اليومين دول مسخرة... و الشباب البايظ فيها اكتر من المحترم, و بجد اللى يدفع مبلغ زى ده فى اى نادى يبقى مفترى و جاحد كمان.

علينا ان نعترف بأن النوادى حاليا فقدت الهدف الاساسى من انشائها, و لن اتحدث عن المصايب اللى بقت بتحصل فى النوادى.

عشان بس محدش يطلع و يقول انى بتكلم من منطلق الحقد الطبقى, ماديا حاليا... انا اقدر اشترك فى نادى.. و لكن بصراحة عمرى ما فكرت فى الموضوع ده, و مالهوش اولوية عندى اصلا. و كان والدى دايما يقول حكمة... مش كل حاجة نفسنا فيها نجيبها او نعملها حتى و لو كنا نقدر. (كان يقصد الامور اللتى تتعلق بالرفاهية)

و ربما علينا ان نسأل السؤال... هل لو جمعنا مبلغ قيمة 10 مشتركين فقط و اشترينا بيهم حتة ارض فى منطقة شعبية... و استغليناها.. هل ده يكون احسن ولا ايه؟ يعنى طالما انكم نفسكم قوى فى نوادى, خلاص بقى... يبقى لازم نعمل عدالة اجتماعية.

و اعتقد ان مبلغ 5 مليون جنيه كافيين جدا لاعداد نادى بدائى فى منطقة شعبية.... ده انا كده ببالغ بس.

و لو انى كنت افضل ان المبلغ ده يتعمل بيه مشروع... و المشروع ده يصرف على الغلابة و المحتاجين... و كمان يشغل الشباب العاطل بالمرة... بس مشكلتنا ان احنا مش بنشتغل بذمة طالما انه مش قطاع خاص... ده يمكن القطاع الخاص اتضرب كمان اليومين دول!!!

[engmido]

مثل هذه الاخبار المؤكده والأسعار الفلكية بتخلق نوع من انواع الحقد الطبقي .... بجد

يعني الفقير ده مش من حقه يلعب في نادي .. ولا يكتفي باللعب في مناخيره بس ؟

أنا لا أُطالب بإن الدولة تأسس أندية فاخرة فيها حمامات سباحة وجا كوزي وحركات والفقرا يدخلوا يستمتعوا ببلاش

ولكن على الأقل يا أخي نعمل زي دولة من دول العالم لاثالث وهي البرازيل ونوفر ساحات شعبية يُمارس الجميع فيها الرياضة بدون تكاليف وبدون فلسفة ولا حركات إلتفافية

واظن الساحة دي ما بتكلفش حاجة .. مكان فاضي وفيه جونين لكرة القدم وشبكتين للعب السلة وسلامو عليكم وحد يراعيها عشان ما تتحولش لأوكار للبلطجية والمتشردين ..

لكن للأسف يوم ما بتتوفر عندنا اماكن زي دي بنتصرف بمنتهى الغباء وبنهدر تلك المساحات على الفاضي ..

خدو عندكو ....

- المساحة المهولة التي تحتلها حديقة الميريلاند بمصر الجديدة والتي تحولت إلى اوكار لطالبي المتعة المحرمة ... هل مش ممكن نصغر المساحة بتاعت الجنينة ونعمل ساحتين تلاتة مفتوحين للجميع ولا مطلوب مننا نعدي وإحنا ساكتين جنب سور نادي هليوبليس أو الغابة أو هوليليدو أو نادي النصر ونبص للناس النضيفة اللي بتستحمى كل يوم وتحط كولونيا ونمصمص شفايفنا ونروح ندور على أتوبيس نجري وراه عشان نعرف نروح ؟

- المساحة المهولة التي كان يحتلها سوق السمك في غمره والذي تم نقله إلى سوق العبور وعملو فيه مستشفى اليوم الواحد والباقي جناين عبيطه ..

- المساحة المهولة التي كان يحتلها سوق الخضار بروضل الفرج وبرضوا لم يتم إستغلالها ...

هو في إيه .. وليه نظرتنا بتبقى دنيئة لمثل هذه الأشياء وممكن نقول : يا عم لما نبقى نوفر للناس الأكل نبقى نفكر في اللعب ...

وبعد ده كله نقول إرهاب وشباب متعطش جنسياً وممكن سلوكه يبقى منفلت في بعض الاحيان او إنتشار ظاهرة العنف والتلوث السمعي والبصري وانعدام تذوق الجمال

أنا شخصياً تخرجت من كلية التجارة سنة . . وخير اللهم اجعله خير روحت ازور الكلية بعدها ما فيش بسنيتن لقيت التتار أستولوا على ملعبي كرة القدم والسلة وحولوهم إلى كتل خرسانية ومدرجات إضافية لإستيعاب تلك الاعداد الضخمة من حملة الثانوية العام ... والله يا جماعة بقت كلية التجارة عاملة زي الغابات الإستوائية عالية الأشجار والتي لا تصل الشمس إلى أرضها أبداً .. وبقى المنظر العام عبارة عن مباني مُلاصقة لبعضها والطلبة بيعدوا من ممرات تحت المباني الشاهقة وكل واحد يلعب في كتف اللي جنبه .. وطبعاً تنضرب بالنار لو فكرت تروح تلعب في المدينة الجامعية وإنت هنا جاي وجايب معاك طاسة فول تاخد فيها العلم وبس ..

لعب إيه وكلام فارغ إيه جاتكو القرف

اما عن الملاعب في المدارس - الحكومية وكثير من المدارس الخاصة - فحدث ولا حرج ... وأساساً لو أتكلمت عن حاجه إسمها ملعب هناك هايبصوا لك بإستغراب ويقولوا عليك راجل جاي من القرون الوسطى .. طب فين يا جماعة مُدرس الألعاب ؟ ده سيادتك عنده حصة فرنساوي أصل أستاذ الجغرافيا غايب فدخل بداله يدي درس تربية قومية ....

الاجازة اللي فاتت دي روحت مدرسة " الشويفات " في التجمع الخامس - يا ترى إنت فين يا كليو يا بنتي - والله عيني كانت هاتدمع من منظر ملعب كرة القدم الذي يُضاهي في جماله ملعب ستاد القاهرة .. وقولت بإذن الله لما أستقر في مصر أبقى أحاول أقدم لأولاد إبني عُمر في المدرسة دي .. ما هو اعز من الولد .. ولد الولد .. ومش هايجيني اعز من ولاد إبني عمر لما يكبر ويتجوز إن شاء الله وأنا اكون لسه ما أخرجتش التخرج الكبير

الشويفات يا قادر mfb:

ايه ياريس ده

الشويفات مرة واحدة .........ده انا اعرف انها المصاريف بتاعتها بالاسترلينى ( او بالعملة الصعبة وخلاص)

ثم اي سى ميلان ايه

ياباشا انت كده عديت خط الفقر wst::

ياريس الكلام ده كله مايكفيهوش تحويشة العمر فى السعودية :lol: :lol:

بس عموما انا مبسوط انك فى السعودية ومتابع احوال البلد كانك لسه عايش

[miramikhail]

طيب أنا حبيت أقول لكم بعض الذكريات عشان تقدروا تعرفوا إية اللى حصل فى الدنيا

زمان كنت بلعب أنا و أخواتى فى نادى النصر عادى جدا بندخل من غير أشتراك ولا حاجة و كمان ما يسمى بنادى الغابة ده كان جنينة مفتوحة نروح نلعب فية و أفتكر أن كان فيها بسين حاجة زى الميرلاند كده

خدوا دية بقى أنا والدى كان من حقة يختار ما بين نادى هليوليدوا و هليوبليس وده مقابل أشترك رمزى مش فاكرة حاجة بسيطة جدا لكن والدى ربنا يدى له الصحة أختار هولوليدو على أساس أنه أقرب للبيت و نادى عائلات لأن هليوبليس كان كل أجانب مصر الجديدة بيروح فية و أحنا بنروح النادى لوحدينا وطبعا أنا لسة مشتركة فية مع أنى ساكنة بعيد عنه لكن مش حعرف أشترك فى نادى تانى حتى لو أقدر أستحرم بصراحة ده النادى بتاعنا سألت مرة لوحده صاحبتى من سبع تمن سنين فوجئت أن العضوية الجديدة ب 20ألف جنية و الأم والأب لازم جامعيين و مايكونشعندهم أكتر من عيلين ثلاثة ما ينفعش طبعا صحبتى أنطبق عليها كل الشروط ما عدا ال20ألف جنية دول .المهم بنتى كل ما تسمع الحكاية دية تزعل من جدها زعل ;)

طيب خدوا دية كمان أول ما نادى الشمس طلع عمى أتحايل على بابا يشترك وبدون أى فلوس مقدم مجرد الأشتراك والدى قال أحنا حنروح أزاى ده بعيد و هو على طول مسافر فمرضيش وواحد زميلى كان بيحكى ليا أنهم كانوا بيعدوا على الناس عشان تشترك و بكلام فاضى و أشترك و من ساعتها و هو فية

[ابو حودة]

لاداء اي مهمة يجب ان يكون هناك عاملين

الاول هو الرغبة

والثاني هو القدرة

ودائما تتذرع الحكومة المصرية ( حكومة الحزب الوطني ) بعدم القدرة

ولكن اذا نظرنا الى مسألة القدرة

فنحن نتكلم عن حالتين الاولى وهي الاراضي

والثاني هو الاموال الازمة لتنفيذ المباني والتجهيزات

وبالنظر الى الموضوع الاول نجد ان الظهير الصحراوي الملاصق لكل المدن المصرية بلا استثناء لا يبعد باكثر من خمسة كيلو مترات الى عشرة كيلو مترات

وهو ما يعني امكانية انشاء عدد كبير جدا من تلك الساحات والاندية بجوار المدن المصرية المختلفة في تلك الصحاري الملاصة

مع توفير خطوط نقل لتلك الاندية

ثانيا القدرة المالية بالنظر الى حالات الرشاوى والفساد والاموال الضائعة وموضوع

تخصيص الاراضي على رجال الاعمال ( محمد ابراهيم سليمان على سبيل المثال لا الحصر ) يعني

الفرق في الاموال الضائعة يكفي ويفيض لتغطية تكلفة تلك المنشآءات

لكن نقول ايه مفيش رغبة

[MemoG]

طيب حد يعرف اسم موقع نادي الصيد بالقطامية

او تليفونه او العضوية فيه بكام

ياريت لو حد عندو اي معلومات

يفدنى

تم تعديل 7 يناير 2010 بواسطة MemoG

[myusername]

طيب حد يعرف اسم موقع نادي الصيد بالقطامية

او تليفونه او العضوية فيه بكام

ياريت لو حد عندو اي معلومات

يفدنى

السلام عليكم...

دى نمر نادى الصيد فى الدقى:

37610124 - 33374678 - 33374464 - 33374333 - 33365291

ممكن تتصلى بيهم... و تسأليهم على نمرة فرع القطامية.

بالنسبة للاشتراك.. تقدرى تشتركى فى فرع القطامية - بس هيسمح لك بدخول فرع القطامية فقط.. و مش هتقدرى تدخلى الفرع الرئيسى او فرع اكتوبر.

بالنسبة لقيمة الاشتراك... الله اعلم

تم تعديل 7 يناير 2010 بواسطة myusername

[أختكم المصرية]

نادى الصيد بالدقى 150000 حاليا و العضوية مفتوحة

نادى الصيد بالقطامية 50000 و العضوية مقفولة

ارقام نادى صيد القطامية 29203794 ونفس الرقم بس اخره 5 او 6 او 7

[myusername]

نادى الصيد بالدقى 150000 حاليا و العضوية مفتوحة

نادى الصيد بالقطامية 50000 و العضوية مقفولة

ارقام نادى صيد القطامية 29203794 ونفس الرقم بس اخره 5 او 6 او 7

انا متهيقلى ان حضرتك قصدك العكس؟ ان العضوية مقفولة فى نادى الصيد فى الدقى, و مفتوحة فى فرع القطامية؟؟؟

لان على حد علمى... انهم بيقبلوا فى نادى الصيد فى الدقى حوالى 15 عضو كل سنة... و مش اى حد...