مبارك لشعب مصر : قاعد على قلبكو لطالون

[se_ Elsyed]

ولو إني ماعرفش معنى طالون بالظبط .. لكن هي تُعطي معنى إلى ما شاء الله .. او بالبلدي لحد ما واحد مننا يموت .. يالشعب ... يالشعب برضوا .. أصل الحاكم في العالم الثالث مُخلد ولا يموت

إدخل علينا بالاخبار اللي تفرح يا سين سين يا وش الخير

مبارك‏:‏ تحديد مدد الرئاسة حق أصيل للشعب وتخلو منه دساتير دول كبري

وحول الجدل الدائر بشأن إمكان تعديل المادة‏77‏ من الدستور‏,‏ الخاصة بتحديد فترة رئيس الجمهورية‏,‏ قال الرئيس مبارك‏:‏ إن تحديد مدد الرئاسة حق أصيل للشعب الذي يختار رئيسه بحرية كاملة‏,‏ ويجب ألا يتم الحجر علي هذا الحق‏,‏ مشيرا إلي أن هذا المنصب الرفيع يتطلب إمكانات وخبرات ومواصفات معينة‏,‏ ومسئولياته كبيرة‏,‏ ولابد لمن يتحملها أن يكون علي مستوي المسئولية نفسها‏,‏ حتي يمكنه أن يحمل الأمانة ويرعي مصالح الأمة‏.‏

( بس حضرتك نسيت تقول إن الدستور بينص يا ربع يا تُمن وبيقول إن المنصب الروفيع ده اللي بيتطلب حد عنده خبره وبيتحمل المسئولية ... إلخ لازم يكون إسمه مبارك او حد من عيلته )

أما لهؤلاء المطالبين بتعديل المادة 77 وعايزين يحجروا على رأي الشعب .. فبنقولهم : حرام عليكو يا ظلمه عايزين تحجروا عالشعب وتحددوا مدة الرئاسة .. منكم لله يا ظلمه .. منكم لله يا ظلمه ( وش حسين رياض وهو مشلول في فيلم رد كلبي )

والله العظيم عندما أقرأ الكلام ده لمبارك أتذكر الكلام الذي جاء على لسان فرعون في القرآن الكريم وأنه بيوري الشعب ما يرى ومُلك مصر خالصاً له وحتى أنه يملك الأنهار التي تجري فيها - بيع وشرا يعني - ويقلب الحق باطل والباطل حق ...

اللي خلى مبارك يقول لما أسأل عن قانون الطواريء فأجاب إن دول كثيرة من العالم - المتخلف - بتطبقه ... ده حتى اليابان بتطيق قانون الطواريء ( قال ذلك بالحرف )

وبالتالي ممكن نلاقي الشرطة اليابانية القصيرين دول بيسحلوا مواطن ياباني قصير برضوا وياخدوه ورا الشمس طبقاً لقانون الطواريء...

يا أخي اليابانيين دول فعلاً أبهروا العالم وماخلوش حاجه لحد

[kokowawa1979]

ياعم سي السيد البلد بلدهم ويعملوا فينا اللي هما عايزينه - بصراحة إحنا أدمناهم !!!!

وأنا لي رأي في موضوع الماد 77 الخاصة بمدة الرئاسة ياريت ترزية تعديل الدستور يخللوا بالهم منها وهي كالآتي :

مدة رئاسة الرئيس هي قرنين فقط من السنوات - وطرح هذه المادة للاستفتاء ونظرا للثقافة الشديدة لنسبة العمال والفلاحين اللي زلينا بيها بين الأمم صدقني سيتم الموافقة على التعديل لإن أغلب الشعب مايعرفش يعني إيه قرنين - لكن يعرف أبو قرنين صم :)

[drhouba]

سى السيد :

أولا هو بيقول الكلام ده من منطلق إن محدش بيشوف نشرات أخبار غير نشرة الساعه 9 و بالتالى أى حاجه حيقولها حنصدقها لأن نشرة 9 مفيهاش غير أخباره هو و الوزراء .

ثانيا إنت و إحنا و همه تاعبين نفسك و نفسنا و نفسهم ليه اللى هم عاوزينه حيحصل و إتكلم بقى للقرن اللى جاى و خد راحتك .

ثالثا ألف سلامه عليك من رد كلبى إحنا لسه عاوزينك فى الدورى و الكاس دى الحاجه الوحيده اللى بتلهينا و بنفش غلنا فى بعض فيها خللينا فى الكوره و سيب لهم بلدهم يعملوا فيها اللى هم عاوزينه و أنا ناديت من زمان الشعب المصرى يلم بعضه و يعزل لحته تانيه و يسيب لهم البلد بس الخوف لما يلاقوا البلد فاضيه و مش لاقيين حد يطلعوا عينه ييجوا ورانا فى البلد الجديده ياااااااااااااااه إنت ليه كده بتقلب علينا المواجع منك لله كرويا و سياسيا

تم تعديل 9 يناير 2007 بواسطة drhouba

[أبو محمد]

se_ Elsyed كتب :

أصل الحاكم في العالم الثالث مُخلد ولا يموت

أستغفر الله العظيم .. ما دايم إلا الله ..

الموضوع يا س.س. وما فيه إن الحاكم فى أمريكا وأوروربا والدول المتقدمة (إدينى ربع كباب من غير إرهاب) فى الغالب بيخرج من الحكم فى الوضع الرأسى .. أما عندنا فلازم يطلع أفقى

[نورت مصر!!!]

احنا مش شاطرين الي في الفرجه بس لا يغير الله ما بقوم حتي يغيروا مابانفسهم وانا عندي قصيده حلوه لاحمد مطر ماشيه مع الموضوع ده اسمها:

شاهد اثبات

لا تطلـبي حُريّـةً أيّتها الرّعيـّهْ

لا تطلُبي حُريّـــةً ..

بلْ مارسـي الحُريّـهْ.

إنْ رضـيَ الرّاعـي .. فألفُ مرحَبـا

وإنْ أبـى

فحاولي إقناعَـهُ باللُطفِ والرّويّـهْ ..

قولـي لهُ أن يَشـرَبَ البحـرَ

وأنْ يبلَـعَ نصفَ الكُـرةِ الأرضيّـهْ !

ما كانتِ الحُريّـةُ اختراعَـهُ

أوْ إرثَ مَـنْ خَلّفَـهُ

لكـي يَضمَّها إلى أملاكـهِ الشّخْصيّـهْ

إنْ شـاءَ أنْ يمنعهـا عنكِ

زَواهـا جانِبـاً

أو شـاءَ أنْ يمنحهـا .. قدَّمهـا هَديّـهْ

قولـي لَهُ : إنّـي وُلِـدتُ حُـرَّةً

قولي لـهُ : إنّي أنـا الحُريّـهْ.

إنْ لـمْ يُصـدِّقْكِ فهاتـي شاهِـداً

وينبغـي في هـذه القضيّـهْ

أن تجعلـي الشّاهِـدَ .. بُنـدقيّـهْ

******

طبعا اخونا البعده هيقولوا عليه ارهابي وبيحاول قلب الحله وبضرب كرسي في الكلوب

[hamadh]

يا ريت حد يقوله

لو دامتلك ما وصلت لغيرك

ولا اقولك خليه قاعد احسن انا مش متخيل اشوف رئيس غيره

دى عشرة عمر 25 سنه