موقف عجيب جدا من سفارة الفلبين بالكويت

[Simba]

اكيد السادة المغتربين بالكويت عرفوا الحادثة البشعة التي قامت بها الخادمة الفلبنية بنحرها لطفل في السادسة من عمره وطعنها فتاة مرتين في سن السابعة عشر وبعدها قفزت من الطابق العلوي لترقد الآن داخل العناية المركزة

الغريب والملفت في الأمر أن سفارة الفلبين تعمل الآن علي توكيل خمسة من أكبر المحامين بالكويت للدفاع عنها ونقل عن جريدة السياسة قال السفير الفلبييني سنقف مع هذه الفتاة بكل ما لدينا وأتصل بها ليطمئن عليها في العناية المركزة

طبعا انا مع أن ما قامت به جرم تستحق عليه القتل الف مرة ويكفي لوعة الأم علي أبنها الصغير ولكني أندهشت لما تفعله السفارة الفلبنية تجاه جاليتها في الكويت

وأتمني ان لا يفهم احد من كلامي بأني اقول ان يفعل المصريون جرائم في الغربة وتدافع عنهم السفارة المصرية

لكن اليس لنا من الحق ان تقف معنا السفارة في الغربة وقفة اكبر واكثر من ذلك .

تم تعديل 10 يناير 2007 بواسطة سمبا

[عازفه على أوتار الذهب]

لاحول ولا قوة الا بالله ..

الخادمات مشكله كثيرآ مانعاني منها

وللأسف جميع الجنسيات لاتؤتمن على مجرد ان تتركها في المنزل وحدها..فما بالك ومعها اطفال...

دي وحشيه لازم تتعاقب عليها بس انا مش شايفه ان اهل الاطفال الكويتيين ممكن يتنازلزا عن حقهم...

وبعدين دي مش بس اجنبيه دي كمان خادمه...

في مقطع فيديو لخادمه تضرب طفل بوحشيه ولم تعلم بوجود الكاميرا...

هدورلك عليه وانزله عشان تشوفوه :rolleyes:

تم تعديل 10 يناير 2007 بواسطة عازفه على أوتار الذهب

[kokowawa1979]

مافعلته السفارة الفلبينية وضع طبيعي حتى ولو أجرمت الخادمة فيجب ألا نغفل هذه النقطة -لأننا للأسف الشديد نعاني من تجاهل جميع السفارات المصرية في الخارج بلا استثناء والتي لايهمها سوى جمع الفلوس من المغتربين المصريين بشتى الطرق فإن بحثت عن خدمة لاتجدها وهذه حقيقة .

جميع السفارات الأجنبيه تعمل جاهدة ليل نهار من أجل مصالح رعاياها إلا السفارات المصرية .

كم من أبرياء زج بهم في سجون الغربة ولم تحرك السفارة ساكن لنجدتهم ز

بالفعل هذه الخادمة وأمثالها تستحق الشنق في ميدان عام لكن كل اللوم يقع على ست البيت المحترمة التي تتفرغ للتسوق وإضاعة الوقت فيما لايفيد وترك الحبل على الغارب للخادمة فتصبح هي المربية والأم بل والزوجة في كثير من الأحيان !!!!!

السفارة الفلبينية لن يهدأ لها بال إلا بعد الحصول على البراءة أو سجن مخفف لهذه الخادمة فقد حدثت مثل هذه الحادثة في الإمارات ولكن مع رجل مسن حيث قامت الخادمة بطعنه حتى الموت وحكم عليها بالإعدام إلا أن السفارة الفلبينية أقامت الدنيا ولم تقعدها حتى وصل موضوع الخادمة للاتحاد الأوروبي ( أي والله) وضغطت فرنسا !!! بكل قوتها حتى أعيدت محاكمة الخادمة وتم الضغط على أولياء الدم ( عائلة القتيل) حتى تنازلوا مجبرين عن القضية وقبلوا بالدية فقط وسقط الحق العام أيضا وحصلت المجرمة على البراءة .

لهذا يجب عليكم عدم لوم السفارة الفلبينية على مافعلته بل يجب أن نلوم أنفسنا لإن سفاراتنا في الخارج ليس لها هم إلا الجباية وحضور الحفلات أي والله ولاتسألوا عن أعمال أخرى !!!

[رمضان]

هوه دلوقتي اصبح الصح بالنسبة لنا موقف عجيب ؟

ربنا ينتقم من اللي كان السبب

[أبو زياد]

مشكلة السفارة المصرية الأزلية ..

أن لديها تعليمات بعدم التعامل مع أى جهة أجنبية إلا من خلال وزارة الخارجية ..

يعنى يناموا و يشخروا لحد ما تيجى جهة رسمية من خارجية الدولة التى يعملوا بها و تقولهم تعالوا كلمونا ..

مش عارف أقول إيه حسبى الله و نعم الوكيل ..

هما فاكرين إن أى مصرى يتعرض لمشاكل ليس عليهم إلا النصيحة فقط

مهمتهم ان يكونوا مستشارين فقط .. هدى نفسك .. أصبر شوية ..

لا توجد أى مساعدة او عمل ملموس ليقوموا به ..

فعلا نحن كلنا كمصريين نغار و بشدة من كل من السفارتين الفلبينية و الهندية - للأسف - على ما تفعلاه من اجل بنى جنسيتهما ..

وما نتعرض له - جميعا - كمصريين - و كعرب المفروض أننا فى بلدنا الثانى -

ولكن حتى احتقار المواطن فى مصر ينال منا فى الغربة .

................

[sayed_ossman]

يا حبيبنا رئيس ديكتاتور

وحكومه فاسده - بيدو للناس اغذية بالداخل اغذية مسرطنه واكياس دم فاسده

مافيا بتحكم البلد

مستنيين من وزراة خاربتها (خارجيتها) ايه بس

انتو لسه بتحلموا؟

[se_ Elsyed]

الحكومة الفلبينية تُخصص مبالغ ثابتة من ميزانيتها لتكوين هيئة دفاع عن أي فلبيني خصوصاً في دول الخليج ...

ونحن ضد الذبح والكلام لافاضي اللي ممكن تفعله أي خادمه .. لكن يا جماعة مش في رُكن من أركان الجريمة إسمه " الدافع للجريمة " يعني بالله عليكو .. خادمه شغاله عند ناس مرتاحه وتمام التمام وفي ظروف جيده وفجاة تطق في دماغها تدبح العيال وتنتحر؟

لا أحد يستطيع أن يُنكر أن في دول الخيج هناك تجاوزات كثيرة ضد تلك الفئة المظلومة .. على إعتبار إنها ملكهم ويعملوا اللي هما عايزينه فيهم .. وبعضهم يتباهى بإن الخادمة بالنسبة له حاجه كده زي " ما ملكت يمينه " مع إن المقصود هنا بذلك المصطلح القرآني هم أسرى الحرب وما شابه .. لكن هناك من ينظر لهم على أنهم عبيد .. وليس أدل على ذلك في أننا كنا نقرأ حتى وقت قريب في أعلانات مكاتب إستقدام الخادمات " نقوم بإستبدال الخادمة في حالة الحمل " طب بالله عليكو .. أقل مدة للخادمة هنا هي عامين متواصلين وأكثر من 90 % منهم بيروحوا وما بيجوش وما فيش عيلة أساساً بتخلي الخادمة عندها لفترة كبيرة على اساس ما تبقاش مُطلعه على اسرار البيت وكده وبالتالي يُستحسن تغيررها .... يبقى الحمل هاييجي منين ؟

ما علينا ومش ده موضوعنا

فأرجو أن أوجه تحية للسفارة الفلبينية التي تقف بجانب رعاياها حتى لو كانوا مُخطئين .

وأناشد أي إنسان لديه ضمير في أن يُعامل منهم أقل منه درجه في الدنيا معاملة حسنه أو كما يُحب ان يعامله الناس

يعني مش عشان خادم ربنا مسخره يعمل لدي او عامل شاي أو سايس جراج يبقى أقهر اللي جابوه وأنظر له نظرة عبودية أو أنه ليس إنسان من لحم ودم ...

يا جماعة ده السواقين والخادمات هنا يكاودوا يعملوا 24 ساعة في الـ 24 ساعة .. في حين إن الواحد مننا لو إشتغل 10 ساعات متواصلة بيقول جاي وإلحقوني أنا هاموت

[نورت مصر!!!]

انتم بتنفخوا في قربه مقطوعه هيا الحكومه وفرت ليك اي شيء في مصر علشان توفره ليك في الخارج

الاصلاح لازم يكون من الداخل الاول

حسبنا الله ونعم الوكيل

هو لوكان الحال في مصر كويس كنا اتغربنا في بلاد الناس واصبحنا في ذيل كل الجنسيات الاخري

ياجماعه احنا ملناش اي وزن بين الجنسيات والحكومه هيا السبب واحنا الي مشجعينها تعمل فينا اكتر من كدهوالساكت عن الحق شيطان اخرص

[أبو حميد]

بالعكس أنا شايف أن ده "موقف طبيعي جدا من سفارة الفلبين بالكويت" لأنه حتى السفاحين والقتلة لازم وطبقا للقانون لازم يكون في محامي يدافع عنهم كونهم جابوا أكبر خمس محامين في الكويت لأنها قضية رآي عام والضغط هايكون شديد على المحكمة لجعلها عبرة لكل الخادمات. وكمان ممكن تضرب سوق العمل في الفلبين لو صورة الفلبينيات كخادمات أتهزت في الخليج كله.

الحادثة دي بالذات غريبة لأن الخادمة أعترفت بان السبب في اللي عملته أن مخدومتها تسئ معاملتها (لم تخصص غرفة لها وتتهمها بعدم النظافة وطالبتها بالإستحمام في نهاية كل يوم) ولما سألت زميلتها أخبرنها أنهم لا يتعرضون لهذه المعاملة فغضبت وأصرت على الإنتقام بنحر الأبناء الثلاثة لكنها لم تقتل سوى طفل واحد وجرحت الباقين. والغالب أنها مريضة نفسيا لأن لو الأسباب دي كافية لقتل 3 أطفال كان بقي عندنا 50 جريمة من النوع ده كل يوم.

بس واضح أن الموضوع هايكون موضوع الساعة في الكويت لفترة طويلة.

[رمضان]

هل وصل بنا الحال لان يصبح الموقف الصحيح بالنسبة الينا شيء عجيب ؟

على فكرة هذا ليس اول موقف للسفارة الفلبينية من هذا القبيل .

اما النقطة الاخرى بقيام سفارة هذه الخادمة بما قامت به فهذا ان يدل على شيء انما يدل على نزاهة القضاء الكويتي المعهودة

[Simba]

هوه دلوقتي اصبح الصح بالنسبة لنا موقف عجيب ؟

ربنا ينتقم من اللي كان السبب

الأخ رمضان انا معاك ان ده هو عين الصح نفسه يمكن مقدرتش اكتب عنوان يعبر اكتر عن اللي عايز اقوله

وحقيقي أنا أنبهرت بموقف السفارة الفلبنية بغض النظر عن الجريمة وظروفها وهو ده اللي كنت عايز اوصله

وبتمني لو حصلت لأي مصري مشكلة في الخارج السفارة المصرية تسانده

أحنا شكلنا بقي وحش قوي قدام نفسنا وقدام العالم

[bentmasria]

اما النقطة الاخرى بقيام سفارة هذه الخادمة بما قامت به فهذا ان يدل على شيء انما يدل على نزاهة القضاء الكويتي المعهودة

:) :wub: بجددددددددددددد

ادعوك لزيارة قسم الطوارىء بمستشفيات الجهرة واحيانا الفروانية ودخول قسم السيدات لو تستطيع لتشاهد مالن يصدقه عقلك من ضحايا التعذيب والاغتصاب والممارسات الوحشية والاجساد الملقاه على الطرق المهجوزة بعد ان ابرحت ضربا وغيره بانواعها واعتقد انك تعلم جيدا ما اعنيه وذكره سى السيد عن معاملة هذه الفئة هناك

ربما يجدر بسفارة الفلبين والهند وماليزيا واندونيسيا ومصر ربما فعل ذلك بل واكثر .........................

رحمنا الله بعدله

[se_ Elsyed]

لو لم أكن فلبينياً .. لوددت أن اكون فلبينياً

إقراوا الخبر ده وإتحسروا

" أصدرت وزارة العمل الفلبينية قراراً من جانب واحد يقضي بوضع حد أدنى لمرتابات الفلبينيين بالسعودية ليصبح 1500 ريال إعتباراً من تاريخ 25/12/2006 م "

لحد كده وعادي

لكن اللي مش عادي إنها ألزمت الحكومة السعودية بتعديل رواتب الناس اللي موجودين كمان لكي تتماشى مع الحد الذي وضعته !!!!!!!

الحكومة هاترفض بالتأكيد لإن ده سيُثير غضب باقي الجنسيات خصوصاً المطحونين زي النجلاديشين اللي مرتباتهم 400 ريال و500 ريال وطفحين الدم ...

لكن شوف المرجلة على رأي صدام ( هادي هي الرجولة )

واحده ست وزنها لا يزيد عن 35 ك ( أنا بتيهألي دي أخف واقصر رئيس دولة في العالم ) إسمها جلوريا أورويو لكن بت 100 رئيس هوزوء من العينات اللي اشيفينها

مع إن قرار زي ده ممكن يعمل رد فعل عكسي ويمنع قدوم العمالة من الفلبين اللي هي من أكبر الدول الطاردة للعمالة في العالم .. لكن ولو الكرامة أولاً ..

خدو الحتة دي كمان طالما دخلنا في العمالة

الحكومة الهندية أوقفت قدوم الخدامات الهنديات إلى السعودية إعتباراً من يناير 2007 وبرضوا عشان المرتبات ... أما اندونيسيا فكل سنة لازم تمارس هذا الضغط على دول الخليج ...

مش قولتلكو

أنا هاروح السفارة الفلبينية أطلب اللجوء يمكن يقبلوني

[بنت النيل]

ايه يا جماعة مالكم كدا جايين دايما علينا وعلى سفارتنا

ياريت دايما نحاول اننا ما نعمم فى كلامنا على كل شىء لان الكلام ده مش صحيح ومش دايما سفارتنا كدا ابدا

يعنى ما وصلتش لكدا ولا لوددت ان اكون فلبينيا يعنى محصلتش طبعا

والحمدلله على اننا مصريين وبكل فخر اقول انا مصرية وكلامى ده مش من فراغ ابدا انا حصل معايا عدة مواقف وكانت من السفارة بصراحة الناس مقصرتش ابدا معايا لدرجة انهم كانو بيتصلوا بينا للاطمأننا

وبعدين يعنى مش معقول اكون عمله جريمة باشعه ذى دى ولا ابشع منها وتيجى سفارتى تدافع عنى هو كل اللى حصل انهم لازم يكون موجودين مثلا اثناء التحقيق والمتابعة لكن مش اكثر من كدا ولا يقدرو يعملوا اى شىء اكثر من كدا وكويس اوى وكتر خير الكويت اللى سمحلهم بكدا

انا اخويا كان بالاردن وحصلت معاه مشكلة واخذو منه جوازه ولم يستطيع الحضور الى مصر وبدون اى فلوس معه وذهب الى السفارة المصرية عملت معاه كل مايمكن من مساعدة لغاية حجز تذكره سفر ورجوعه الى البيت

ايه مالكم كدا دايما قاسين على مصر

وبعدين بتتكلموا على رواتبهم تقدرو تقولى كام فى الميه منهم بياخد راتب متساوى مع رواتبنا كمصرين مش هنقول اى جنسية تانية نكلم فى اللى يخصنا مفيش اى وجه مقارنه

كام فلبينى فى الكويت بيتقاضى راتب 600 او 700 دينار وكام مصرى بيتقاضى هذا الراتب :) والعكس كام فلبينى راتبه لا يتعدى 120دينار او 150 بالكتير وكام مصرى بيتقاضى نفس الراتب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ذى ما بنكلم دايما ونقول على عبيوبنا وصورتنا الوحشة يا ريت برده نكلم ونقول على حسانتنا وصورتنا الكويسة

مصرية وبكل فخر

[kokowawa1979]

شوفي بقى يابنت النيل العزيزة : أنا هاحكي لك حكاية صغيرة قوي على سفارتنا بالخارج وإيه اللي بتعمله حينما يكون المصري في مأزق .

أثناء حرب الخليج الأولى كان لي مجموعة من الأصدقاء وجميعهم كانوا مهندسين الكترونيات - وكانوا جميعا يعملون في الدفاع - وحينما قامت الحرب بعد غزو العراق للكويت طلب من هؤلاء المهندسين أن يكونوا على خط النار في حفر الباطن ( ولم يتم إرسال أبناء البلد الأصليين لخط المواجهة) !!! لم يرفض هؤلاء المهندسون الأمر ولكن اشترطوا شرطا واحدا ألا وهو : أن يتم عمل جوازات مواطنة لهم كإماراتيين لكي يثبت أنهم إماراتيين حقيقة وحتى إذا اسروا في الحرب لايعاملون كمرتزقة وهذا حق طبيعى ويدل على مدى فهم ورجاحة عقل هؤلاء المهندسون .

لكن الذي حدث أن الحكومة الإماراتية رفضت ذلك لإن معنى إعطاء هذا الجواز لهم يعني حقوقا أخرى مستقبلية مترتبة على منح الجواز - وبالتالي رفض هؤلاء الشباب تنفيذ الأمر فتم وضعهم في السجن !!!!

ولما تم التحرك وعرض الأمر على السفارة المصرية لم تحرك ساكنا من أجل التوصل إلى حل لهذه المشكلة !!!

تعرفي بقى ياأختي بنت النيل ماذا حدث عندما عرضت الحومة الإماراتية الأمر بعد ذلك على السفارة تطوع السيد المبجل الملحق العسكري بإبداء الرأي القانوني في عدم تنفيذ هذا الأمر وقال لمسئولى الدفاع هناك :

الشباب دول لو عندنا في مصر ورفضوا تنفيذ هذا الأمر لقمنا على الفور بضربهم بالنار ( أي والله هذا حدث) .

هنا قال المسئولون شكرا لكم وتم إنهاء خدمات هؤلاء المهندسون بدون أن يحصلوا على مستقاتهم ومكافأء نهاية الخدمة التي كانت تتجاوز 100000 درهم لكل منهم في ذاك الوقت والفضل يعود للأخ الهمام الملحق العسكري بالسفارة الذي كان يبحث عن عقد عمل لآبن اخته !!!!!!

وحياتك ياشيخة ماتفتحي علينا المواجع !!!

أسوأ سفارات العالم سفارات مصر للأسف الشديد - ومن لاكرامة له في بلده فكيف يكون له كرامة في غيرها وهم يعلمون عنا كل كبيرة وصغيرة !!!!

[أبو حميد]

بنت النيل

أيه الكلام الكبير ده أهو علشان البنات المصريات الجدعات اللي زيك الواحد عمره ما هايروح سفارة دولة تانية يطلب الفيزا. وأنتي عارفة طبعا كلنا بنفخر بمصريتنا وأولنا سي السيد بس الراجل بيتكلم عن أهتمام الدولة (حكومة وسفارات) بشعبها المغترب ومحاولتهم تسهيل عمله. وبعدين هما مش هايرضوا يدولة الجنسية علشان عينيه مش ضيقين.

بس بجد انتي مش حاسة بالقهر وأنتي بتودي أولادك مدرسة فلبيني ولا هندي ولا باكستاني ويدرسوا تاريخ وجغرافية بلد ماتهمناش علشان مش عارفين يعملوا مدرسة مصري بمناهج مصرية. مش هاتكلم عن معاملة السفارة وشغل الجباية ولا تصاريح العمل ولا الجمارك ولا الضرايب اللي فلتنا منها. وبعدين الرواتب اللي بتقولي عليها دي علشان كفاءة الأفراد المصريين ونقدر نقول المثل على رواتب اللبنانيين اللي بياخدوا أكتر من المصريين لمجرد أنهم لبنانيين.

المهم أنتي عاملة ايه؟ وازاي أولادك؟

[Simba]

الأخت بنت النيل اكيد عندها واسطة كبيرة وأكيد شغالة في منصب مهم :)

وغالبا شغل الوزارت مش بيفرق في الرواتب بين فلبيني ومصري وهندي

[بنت النيل]

أسوأ سفارات العالم سفارات مصر للأسف الشديد - ومن لاكرامة له في بلده فكيف يكون له كرامة في غيرها وهم يعلمون عنا كل كبيرة وصغيرة !!!!

الاخ كوكو كرامه الانسان لا تصنعها حكومة ولا سياسية ولا حكام كرامة الانسان هو الذى يصنعها بنفسه واذا كنا معندناش كرامه فى بلدنا ذى ما بتقول ده لاننا راضين بذلك فعلا مش بسبب اى حد تانى :wub:

-------------------------------------------------------------------------------------------------------------

بنت النيل

أيه الكلام الكبير ده أهو علشان البنات المصريات الجدعات اللي زيك الواحد عمره ما هايروح سفارة دولة تانية يطلب الفيزا. وأنتي عارفة طبعا كلنا بنفخر بمصريتنا وأولنا سي السيد بس الراجل بيتكلم عن أهتمام الدولة (حكومة وسفارات) بشعبها المغترب ومحاولتهم تسهيل عمله. وبعدين هما مش هايرضوا يدولة الجنسية علشان عينيه مش ضيقين.

بس بجد انتي مش حاسة بالقهر وأنتي بتودي أولادك مدرسة فلبيني ولا هندي ولا باكستاني ويدرسوا تاريخ وجغرافية بلد ماتهمناش علشان مش عارفين يعملوا مدرسة مصري بمناهج مصرية. مش هاتكلم عن معاملة السفارة وشغل الجباية ولا تصاريح العمل ولا الجمارك ولا الضرايب اللي فلتنا منها. وبعدين الرواتب اللي بتقولي عليها دي علشان كفاءة الأفراد المصريين ونقدر نقول المثل على رواتب اللبنانيين اللي بياخدوا أكتر من المصريين لمجرد أنهم لبنانيين.

المهم أنتي عاملة ايه؟ وازاي أولادك؟

الاخ الفاضل ابوحميد عمو س.س مش هيرضوا يدولة الجنسية مش علشان عينيه لاء ده عشانه اهلوى

اما بالنسبة لموضوع المدارس او اى شىء تانى والله احنا رضينا بالغربه فى هذه البلد اى بلد عموما وبرضانا يبقى منجيش بعد كدا ونقولهم اعملولنا وغيرو نظامكم عشان خاطرنا هما الطالبه اللى بيجوا من البلاد دى للدراسة بمصر بيدروس ايه مش مناهجنا بمصر برده ولا بيطلبوا بمناهج بلدهم B) وبعدين اللى اسمع عنه ان المدارس اللى ذكرتها برده ملتزمه بمنهج للكويت هنا على سبيل المثال

اما عن رواتب اللبنانين ده موضوع له سبب تانى المصرين بتوع شغل على طول البنانين بتوع كلام اكثر وللاسف الخليجين بيحبوا بتوع الكلام واللى يبعوه عليهم ويفهمه انه الواد فتك ولكن فى الاخر بتظهر الحقيقة وبرده للاسف مش بيتعظوا

وبعدين كلامى ده مش معناه ان يعنى الحال على ما يرام من سفارتنا او حكومتنا ولكن اللى اقصده طلما بنذكر المساوء لابد برده من ذكر الحسنات يعنى ما نظهرش نفسنا على طول بصورة سيئة قدام الناس

على العموم ربنا يصلح حال الجميع من كل الجنسيات كلنا فى الاخر ايه عبيد عندالله

اما عن احوالى الحمدلله مستمرة على العلاج لحين رجوعى للمستشفى يوم السبت القادم باذن الله

واشكرك على سؤالك شفتوا بقى هما دول المصريين

الأخت بنت النيل اكيد عندها واسطة كبيرة وأكيد شغالة في منصب مهم :)

وغالبا شغل الوزارت مش بيفرق في الرواتب بين فلبيني ومصري وهندي

ايوا يا سمبا عندى واسطة كبيرة اوى عارف هى مين ( الله )

وحياتك لسه بدور على شغل من بعد ما تركت شغلى بقالى اكتر من سنة :o

الاقيش عندك انت واسطة :wub:

[kokowawa1979]

كرامه الانسان لا تصنعها حكومة ولا سياسية ولا حكام كرامة الانسان هو الذى يصنعها بنفسه

معلهش أختي الكريمة الظاهر إنك مش عايشة في مصر ماتزعليش مني !!!

والظاهر برضه إنك ماتعرفيش إنك لو اختلفت مع صبي مندوب شرطة ممكن يحصل لك إيه لو فكرت بس تقولي أرجوك ماتجرحش كرامتي !!!

قولي بالله عليك كيف يصنع الإنسان كرامته حينما تقطع ملابس النساء وتنتهك عفتهن أما دار القضاء العالي وهن لسن نساء عاديات بل صحفيات !!!

ماذا تقولين حينما تنتهك أعراض البنات في وسط البلد في عيد الفطر وتمزق ملابسهن وحينما يستغاث بالشرطة اللي هي بتمثل الحكومة في الشارع يقول الضابط دول عددهم كبير وماحناش قد العيال دي !!

أي كرامة نصنعها حينما تعتقل بنت وتعلق من يديها ورجليها في العروسة أو الفلكة وتنتهك آدميتها لتعترف بجريمة قتل ( هناك توبيك مفتوح بهذه الحادثة .

لقد ذكرت لك فقط ماتتعرض له النساء فقط في مصر .

الآن قولي لي بالله عليك كيف يصنع الإنسان كرامته بنفسه والجيش والشرطة الخاصة ببلده ضده !!!

[بنت النيل]

كرامه الانسان لا تصنعها حكومة ولا سياسية ولا حكام كرامة الانسان هو الذى يصنعها بنفسه

معلهش أختي الكريمة الظاهر إنك مش عايشة في مصر ماتزعليش مني !!!

والظاهر برضه إنك ماتعرفيش إنك لو اختلفت مع صبي مندوب شرطة ممكن يحصل لك إيه لو فكرت بس تقولي أرجوك ماتجرحش كرامتي !!!

قولي بالله عليك كيف يصنع الإنسان كرامته حينما تقطع ملابس النساء وتنتهك عفتهن أما دار القضاء العالي وهن لسن نساء عاديات بل صحفيات !!!

ماذا تقولين حينما تنتهك أعراض البنات في وسط البلد في عيد الفطر وتمزق ملابسهن وحينما يستغاث بالشرطة اللي هي بتمثل الحكومة في الشارع يقول الضابط دول عددهم كبير وماحناش قد العيال دي !!

أي كرامة نصنعها حينما تعتقل بنت وتعلق من يديها ورجليها في العروسة أو الفلكة وتنتهك آدميتها لتعترف بجريمة قتل ( هناك توبيك مفتوح بهذه الحادثة .

لقد ذكرت لك فقط ماتتعرض له النساء فقط في مصر .

الآن قولي لي بالله عليك كيف يصنع الإنسان كرامته بنفسه والجيش والشرطة الخاصة ببلده ضده !!!

الكثرة والمثل بيقو ايه الكثرة تغلب الشجاعة

ولو كلنا صحيح يد واحدة وقمنا واقفه واحدة ساعتها مش هتقدر علينا لا شرطة ولا حكومة ولكن للاسف الخوف سيظل مسيطر علينا واللى بيقول ياعم انا مالى خلينى فى حالى احسن وادينا عايشين يبقى عمرنا ما هنتغير وهنفضل على كدا بل اسوء من كدا

تقدر تقولى احنا ايه اللى وصلنا لكدا ؟؟؟؟؟؟؟؟؟؟؟ يافرعون مين فرعنك :)

نغير نفسنا الاول ونعرف احنا عوزين ايه واهم شىء نتفق

كلمة الله ايه ولكل ظالم نهاية