عريس غني ولا خذوهم فقراء

[أبو حميد]

السؤال موجه للأخوات الفضليات اللي لسه ما تجوزوش أو للأباء والأمهات اللي عندهم بنات على وش جواز. الجواب بقى يهم الشباب اللي عاوزين يتجوزوا لكن المهم علشان الكل يستفيد نجاوب بصراحة تامة.

أيهما تختاري؟

عريس غني جاهز حتى لو كانت هناك ملاحظات على شخصيته وبنتكلم عن عيوب شخصية لا تمنع الجواز يعني أخلاقه مش فاسدة ولا بخيل بس ممكن بس مشكلته أنه مش شبه فتى الحلام أو أنه أبن امه أو مستقبله مالوش ملامح قصدي مش واضح أو شخصيته مهزوزة حبتين. يعني أبوه جابله كل حاجة شقة وعربية ومرتبه كبير علشان مركز أبوه ومتعبش في حاجة علشان ألخص لما شوفتيه ملفتش نظرك بس مكرهتهوش برضه .

ولا عريس فقير مقبول جدا ومستقبله مضمون بس على المدى الطويل وشخصيته جيدة بس لسه بقى هانستنى لما يجهز وهانطلع السلم من اوله وكل حاجة بجمعية ونبتدي صغيرين وهانركب أتوبيسات وميكروباصات في الأول والفرح على الضيق وهاتضطري تنزلي تشتغلي حتى لو مش عاوزة علشان تساعدوا بعض والقفة أم ودنين وهانبني بيتنا طوبة فضة من تعبنا وطوبة دهب من شقانا.

طبعا أنا مبتكلمش على العريس الغني الكويس الوسيم اللطيف الظريف ده لو جه ما تفكروش أقبلوا على طول.

عاوزين اجابات صريحة علشان الشباب يقرروا يقعدوا يحاربوا في مصر علشان يتجوزوا ولا ياخدوها من قصيرها وهجوا من البلد.

[رمضان]

موضوع جميل جدا يا استاذ احمد

بس بعد اذنك ممكن نطلب من البنات اللي هيردوا يردوا بالعقل وليس بالقلب يعني يكونوا في الواقع

[Folana]

لسلام عليكم ورحمة الله ....

ينفع أرد؟.....انا مش بنات طبعا ..ولكن عندى بنات....ده بالاضافة الى نقطة هامة جدا...انى ارفض ان واحدة فيهم تيجى تقولى "هو ده يا مامى اللى حاخده..يعنى هو ده"... :lol:

انا سيدة ديمقراطية وكلمتى هى اللى تمشى ...معظم البنات بيكونوامش مدركين خطورة سوء اختيارهم...وبيجروا ورا الاحلام الوردية..و"خذوهم فقراء يغنيكم الله..."

اختصارا ...انا عن نفسى لو اتقدم لبناتى عريس فقير...حأرفضه طبعا....مش علشان فقير..ولكن لاعتبارات كتير مش موضوع نقاشنا ...ولو كان غنى بس كده برضه حارفضه...

هناك اعتبارات كثيرة توضع فى الحسبان قبل الاقدام على اختيار العريس المناسب...بالنسبة لى اضع الالتزام الدينى فى المقام الاول ...وطالما ده متوفر يبقى ضمنا حسن الخلق..واتقاء الله فى معاملاته...

يلى ذلك...الوظيفة وضمان المستقبل وتوفير حياة كريمة..يمكن اول درجات الحياة دى...لكن مش اقل منها ابدا...يعنى يقدر يوفر مسكن مناسب ويقدر يصون كرامتها اثناء الانتقال من والى....يعنى مافيش اتوبيسات دى خالص....

يلى ذلك...مستوى الاسرة الثقافى والاخلاقى...يعنى يكونوا مناسبين على قدر المستطاع علشان يبقى فيه لغة حوار مناسبة بين الاسرتين...

بعد كده بقى ممكن نبدأ نتكلم عن التفاصيل الاخرى..

أم رزلة انا عارفة...بس وقتها ماحدش عارف ايه اللى ممكن يحصل ....

والميكروفون مع البنات ....اتفضلوا تكلموا...

[رمضان]

السلام عليكم

لاحظت في كلام الاخت فلانة كلمة شدت انتباهي كشاب مقبل على الزواج الا وهي ( يعنى مافيش اتوبيسات دى خالص....) يعني تقصدي حضرتك ان يكون عنده سيارة .

هل تعتقدي حضرتك ان شاب في مقتبل العمر يقدر انه يوفر شقة ويكون عنده وظيفة بمرتب كويس وسيارة ؟ اعتقد انه لو شاب محظوظ ممكن يكون عنده شقة واكيد هتكون عن طريق اهله لان اي شاب لا يستطيع شراء شقة لكن أعتقد موضوع سيارة ده مبالغ فيه شوية

رفقا بالشباب

لازم كل اب بيجوز بنته وجاي له شاب يتخيل ان ده ابنه

[أبو حميد]

رمضان لو سمحت بلاش بقى رفقا بالشباب والكلام اللي يقطع القلب أنت طلبت الناس ترد بالعقل مش عاوزين تأثير على الشهود قصدي على المحاورين.

الأخت فلانة أنتي بتقولي:

أختصارا ...انا عن نفسى لو اتقدم لبناتى عريس فقير...حأرفضه طبعا....مش علشان فقير..ولكن لاعتبارات كتير مش موضوع نقاشنا ...ولو كان غنى بس كده برضه حارفضه...

هناك اعتبارات كثيرة توضع فى الحسبان قبل الاقدام على اختيار العريس المناسب...بالنسبة لى اضع الالتزام الدينى فى المقام الاول ...وطالما ده متوفر يبقى ضمنا حسن الخلق..واتقاء الله فى معاملاته...

يعني لو فقير وملتزم دينيا هاتوافقي عليه ولا هاترفضي؟

تم تعديل 13 يناير 2007 بواسطة أبو حميد

[Folana]

السلام عليكم ورحمة الله ...

أخى الكريم ابو حميد...فقير بمعنى ايه ؟...ما الفقر درجات...وبعدين ماهو فيه الملتزمين دينيا برضه ويقدروا يفتحوا بيت..

لو فقير بالمعنى المتعارف عليه للفقر ..حارفضه اكيد...يمكن لو كنت سألتنى السؤال ده من سبعين سنة كنت حاقولك ..وماله الفقر مش عيب...نجاهد ونتعب ونبنى عشنا طوبة قشة وطوبة ورق...وبكرة نكبر...

لكن مع مرور الزمن وازدياد الخبرات...ما احبش انى اشوف بنتى عايشة فى مستوى اقل من اللى اتعودت عليه...ممكن اقل شوية صغيرة لاننا حنضع فى الاعتبار الفرق فى السن والخبرات بين والدها وبين عريسها...

لكن ماتبقاش هى عايشة تحسب المرتب بالمليم..وهى متعودة انها تأمر فتطاع فى بيت ابوها...

انا باتكلم بصراحة يا جماعة..وباتكلم عن حالة فردية..مش بأعمم كلامى...

اعتقد ان اى اسرة تتمنى لاولادها مواصفات ثابتة...متدين ...على خلق...يقدر يفتح بيت....

وحاروح اجيب بنتى من الامتحان واجى اكمل رد...وارد على رمضان برضه...

صباحكم جميل :lol:

[nancy]

بالنسبة لى انا اتجوزت كدة خدوهم فقراء يغنيكم ربنا

وكافحنا عشر سنين لما بانت ملامح لحياتنا واستقرينا ماديا واجتماعيا

بس الزمن اتغير وفية محددات بتفرض نفسها

الحكاية مش اتوبيسات وكفاح وبس

اولا انا عندى بنات بصرف عليهم كويس جدا وبربيهم كويس اوى ومستحيل حديهم لاى حد طيب وخلاص انما انا عندى شروط

اولا المستوى العائلى والثقافى والاجتماعى مماثل لنا

ثانيا اسرة العريس تكون مترابطة ومتحابة ومتدينة

ثالثا لازم العريس يكون عندة مستقبل بشهداته ووظيفتة

رابعا لازم يكون لة كبير محترم بيعملة حساب

خامسا تكون بتنى عوزاة مش لازم حب فظيع بس توافق وراحة وتفاهم

سادسا لا هو اهلة يجبولة كل حاجة ولا احنا حنجيب كل حاجة احنا نحط الاساس لحياتهم بس بشغلهم وكفاحهم سوى يرسموا حياتهم

[inas]

والله انا لو بنتي جت واقالتلي هو دا يا مامي هقول لجوزي هو ده ووافق عليه

بس على شرط

اشوفو واعرفو واتكلم معاه طبعا الان ليها نظره غير البنت الي عميها الحب

ولو متدين وعلى خلق وبار باهلو و مستواه المادي معقول وشهادتو توازي شهادتها فيبقى خلاص

مش مهم والله عندي موضوع السياره و الشقه خليهم يتعبو مع بعض ويبنو نفسهم وحده وحده دا احلى تعب

بيربي الموده والحب و التفاهم ويخلي قلوبهم على بعض لكن لو جوزتها لتوتو بابا جابلو شقه وعربيه و فرشهالو

مهو اول ما يزهق من بنتي هيقولها باي ويقول لبابا جوزني عيرها بمعنى لازم يكون راجل بمعنى الكلمه يتحمل المسئوليه

ودا كلام بجد مش كلام في الهوا مين عايز يتقدم لبنتي :lol:

عندها سنه وشهرين :lol:

[Folana]

السلام عليكم ورحمة الله ....

عدنا......بأقول لبنتى عملت ايه فى الامتحان انا بادعى من بدرى قالت لى طب يا مامى لو سمحت ماتدعليش تانى :lol:...

الاخ الفاضل رمضان....طبعا مافيش اتوبيسات..اذا كنت انا عمرى ما ركبت اتوبيس...لكن على اى حال...انا برضه باقول علشان رفقا بالشباب يبقى اللى يقدر يساعد بحاجة يساعد..يعنى انا عن نفسى مش حاسيب بنتى كده تتعب وتشقى علشان توفر تمن القطن مثلا ..:lol:

اللى باتكلم فيه هو ..مابعد عُنق الزجاجة.....يعنى بعد تجهيزات الزواج..لازم يكون قادر انه يفتح بيت مايقولهاش روحى شوفى باباك كده حيعمل ايه معانا.....فاهم قصدى..؟

ولو ماعندهوش عربية انا حاديها عربتى يا سيدى ولا تزعل..احنا بنشجع الشباب برضه ...:lol:

بس برضه مافيش اتوبيسات...

الحقيقة يا نانسى انا عكسك فى اخر نقطة...يعنى انا لو وجدت العريس المناسب ( وخلى بالك من كلمة أنا دى).....مش حامانع ابدا انى اساعدهم فى بداية حياتهم..ولو هو كويس فعلا وبيبذل قصارى جهده علشان يسعدها..برضه حاساعد بعد كده...المهم بنتى تبقى مرتاحة وعايشة فى مستوى قريب من اللى كانت عايشة فيه...احنا عايشين ليه يعنى الا علشانهم...

أنا باتكلم بمنتهى الصدق والامانة...مش عارفة كلامى حيعجبكم ولا لأ..

المهم ماسمعناش رأى البنات يعنى...

[the sad man]

طبعا انا اعتقد ان من يقرأ الردود من الشباب سوف يصدم و خصوصا رد الاخت فولانة مع احترامى الشديد لها و لكن...

علينا اولا ان نقسم المجنمع او الذين يقومون بالرد الى فئات كلا حسب و ضعه المادى و الاجتماعى

فمثلا لا يليق بابنة الاخت فلانة ان تركب الاتوبيس الذى عمرها ما ركبته و هذا عدل كل العدل و لا شك فى ذلك و يجب ان يكون زواجها من عريس فى نفس المستوى المادى

اما الذين بدؤا السلم من اول درجاته اعتقد انهم يرحبون بمن هم فى نفس مستواهم عند البداية بشرط الجدية و الالتزام و الخلق الحميد

وفى مجتمع مثل مجتمعنا المصرى لو انتظرنا العريس الجاهز فلن تتزوج البنات الا فى سن الخمسين فما فوق...

يا جماعة لازم التوافق و التقارب المادى و الاجتماعى ضرورى جدا

لان الاحساس بالنقص من ايا من الطرفين سوف يجعل الحب يولى بعيدا الا قليلا

و حياكم الله

[بنت النيل]

السلام عليكم

لازم كل اب بيجوز بنته وجاي له شاب يتخيل ان ده ابنه

السلام عليكم اسمحلى يا ابوحميد اشارك لانى بصراحة بحب مواضيعك الجميلة ورغم انى طبعا متزوجة وايضا معنديش بنات غير بنوته كتكوته عندها 7سنوات يعنى فى التأهيل :lol:

وبصراحة كمان كلمة رمضان هذه فكرنى بوالدى رحمة الله عليه عند طلبى للزواج من زوجى كان لا يملك سوى ثمن الشبكة وكان هنا بالكويت

يومها ان قلت ده لسه فى بداية حياته يعنى هنبتدى من الصفر كان رد والدى يابنتى خذوهم فقراء يغنيهم الله

وبعدين هو المستقبل قدامه مشرق وشوية شوية تكونوا مستقبلكم ومش كل حاجة بتيجى بسرعة اتعبوا ذيننا شوية وبعدين ترتاحوا

فستغربت بصراحة فى الاول وبعدين قالى انا مخليه فى مكانة ابنى يعنى اللى اطلبه واتمناه لابنى هو نفسه اللى بطلبه له

وفعلا الحمدلله نحمد ربنا على نعمه علينا وحتى الان وجدت اخويا الكبير بيقولو نفس كلام والدى وانه هيعمل مع بنته كدا اذا تقدم لها شخص مناسب لانه شاف تفكير والده ونتيجتها

يعنى يا ابو حميد ذى ما قلت اذا كان فقيرا وطبعا مش فقيرا لدرجة ابيض خالص يعنى :lol:

ولكن ذى ما قلت مثلا : عريس فقير مقبول جدا ومستقبله مضمون بس على المدى الطويل وشخصيته جيدة بس لسه بقى هانستنى لما يجهز وهانطلع السلم من اوله وكل حاجة بجمعية ونبتدي صغيرين وهانركب أتوبيسات وميكروباصات في الأول والفرح على الضيق وهاتضطري تنزلي تشتغلي حتى لو مش عاوزة علشان تساعدوا بعض والقفة أم ودنين وهانبني بيتنا طوبة فضة من تعبنا وطوبة دهب من شقانا.

لانك اشرت لحاجة ان مستقبلة مضمون يبقى ايه المانع وطبعا كل ده بيرجع لاختيار العروسة او النوعيه اللى هيختار منها لان مش كل البنات بتقبل ده للاسف دلوقت اصبحوا اقليه

دلوقت البنت بدور اهم حاجة على اللى معاه ويقدر يجيب ومستعدة تصرف نظر على اى عيوب تانية في العريس

[Folana]

طبعا انا اعتقد ان من يقرأ الردود من الشباب سوف يصدم و خصوصا رد الاخت فولانة مع احترامى الشديد لها و لكن...

علينا اولا ان نقسم المجنمع او الذين يقومون بالرد الى فئات كلا حسب و ضعه المادى و الاجتماعى

فمثلا لا يليق بابنة الاخت فلانة ان تركب الاتوبيس الذى عمرها ما ركبته و هذا عدل كل العدل و لا شك فى ذلك و يجب ان يكون زواجها من عريس فى نفس المستوى المادى

و حياكم الله

السلام عليكم ورحمة الله ...

يظهر ان ردى لم يلق ترحيبا لديك اخى الفاضل..او انك اسأت فهم كلماتى....أنا تكلمت بمنتهى الصراحة كأم..وبعيدا عن اى شبهة تكبر فى كلماتى..بس ده الواقع واللى لازم اوضحه من وجهة نظرى..

لكن ممكن اقول حاجات تانية كتير...اللى يقرأها ينبسط ويقول اهو كده..لكن الحقيقة حتكون غير كده...وزى ماحضرتك تفضلت..الموضوع مفتوح للجميع ليعبر عن وجهة نظره وعن واقعه..

وماحدش عارف يمكن بنتى لما تيجى تتجوز تتكون الامور اختلفت...:lol:

انا اسفة يا جماعة لو كلامى فيه حاجة مستفزة..او مش واضحة ....

[أبو حميد]

شكرا لكل من أدلى بدلوه في هذا الموضوع اللي أنا شايف أنه مهم لأنه أول خطوة في طريق تاثيث أسرة اللي هي نواة المجتمع والكلام الكبير اللي كلكم عارفينه.

طيب ألخص الكلام واللي معترض على التلخيص يتفضل:

فقير فقير ما يحاولش يعني لازم على الأقل زينا أو أقل درجة واحدة لكن درجتين يا أما هانفكر أو غالبا مش هانوافق ثلاث درجات ميجيش احسن. طبعا المقارنة هاتكون على أبوه وأبوها.

كمان اللي زينا او أقل درجة لازم يكون مطابق كل المواصفات يعني بيشتغل شغلانة في أمل يكبر فيها ويكون متدين ومقبول والبنت عاوزاه.

ممكن نتخلى عن صفة او أثنين من اللي فوق لو أغنى مننا. ما سبق شرحه كان كلام العقل وهو معقول ومقبول.

بس الخوف من الناس اللي لما بيجيلها عريسين بيفضلوا الجاهز أكتر حتى لو هايغضوا الطرف عن بعض العيوب الظاهرة علشان الطرف كان مبهور بالسيارة والشقة الحلوة اللي في المعادي الجديدة أو الحي المتميز.

أو الخوف ان بعض علامات الفقر البادي على العريس رغم الستر يخلينا ندور على عيوبه ونقلبه سرعة ونضيع فرصة عريس جيد جدا لأن جزمته صناعة مصرية أو جاب الحلويات وهو جاي من محل نص كم أو الكرافته بلدي وننسى أحنا كنا أيه من 30 سنة.

والخوف من بعض الأسر الغير زكية اللي طول ما البنت أقل من 28 سنة عمالة تتني وتتفرد وتضع الشروط التعجيزية ولما توصل 28 توافق على نص اللي كانوا رافضينه من خمس سنين ودول هما اللي رافعين سن الجواز وتاعبين العرسان ومزودين مشاكلنا الإجتماعية زيادة.

أيه رأيكم دام فضلكم.

[عادل أبوزيد]

مسألة فقير أو غنى مسألة هلامية تحتاج لمزيد من التعريف .

فى هذه الأيام أتصور أن العقبة الكبيرة هى طلب أهالى البنات أن من يتقدم لإبنتهم يجب أن يكون عنده شقة تمليك.

سؤال تانى هل الفقير هو الذى ليس عنده شقة تمليك و الذى يعمل بمرتب ثابت فى مصر فى شركة قطاع عام أو الحكومة ؟

هل الطبيب المبتدئ يعتبر من "خدوهم فقرا يغنيكم الله" .... هل مهندس مبتدئ يعتبر من هؤلاء.

أعتقد إن كلمة "فقرا يغنيكم الله" كلمة مطاطة صعب تحديد مدلولها لكن يبدو أن المقصود بها أن يكون الشاب واعدا من وجهة نظر أسرة الفتاة و كونه واعدا أو لا تختلف حسب أسرة الفتاة و القيم التى تحكم أسرة الفتاة.

مثلا شاب حرفى مثلا يجيد دهان الأثاث يمكن أن يكون واعدا بالنسبة لأسرة فتاه والدها تاجر موبيليا فى حين أن طبيب مبتدئ قد لا يكون واعدا بالنسبة لنفس الأسرة.

بالنسبة للشاب الواعد بالنسبة لأسرة معينة لا توجد مشكلة ، المشكلة مع الشاب الذى قد يبدو عليه أنه ليس من ضمن "خدوهم فقرا يغنيكم الله" مثل شاب عنده شقة تمليك و يعمل فى الخليج أو عنده شقة تمليك و مهندس أو طبيب مبتدئ و لكن ليس عنده أى طموح ، و أعتقد أن أغلب حيرة الفتاة و أسرتها تكون فى الحالة الأخيرة فقط أى حالة الذى لا يبدو فقيرا و لكن من الصعب أن يكون واعدا.

[رمضان]

السلام عليكم ورحمة الله

طبعا بعد مشاهدة بعض الردود وجدت اجابة سؤالي عن زيادة نسبة العنوسة في مصر

بالنسبة للاخت فلانة اعتقد ان من حقك تختاري لبنتك افضل عريس وده امنية اي ام انا مقدر ده كويس جدا

والنقطة التانية بتاعة تساعديه اعتقد ان مفيش اي راجل يقبل مساعدة من اهل مراته دي حاجة محسومة

بالنسبة للاستاذ عادل

ليه حضرتك بتعتقد ان اي شاب في الخليج ليس عنده هدف ؟ انا من وجه نظري لمجرد انه فكر في السفر فهذا في حد ذاته هدف ؟ واعتقد اننا شايفين نماذج كتيرة جدا من الشباب المصري واؤكد على كلمة شباب ناجحين جدا

[Siwa]

قال تعالى: "إن يكونوا فقراء يغنهم الله من فضله".

قال الرسول عليه الصلاة والسلام: "إذا جاءكم من ترتضون دينه وخلقه فزوجوه.."

انا مالقيتش غير كلام ربنا سبحانه وتعالى وكلام رسولنا الكريم صلوات الله عليه وسلامه ابدأ بيه كلامي....

اعتقد إن المقاييس الماديه لوحدها ماتبنيش حياه زوجيه سعيده...واعتقد إن كلنا متفقين على ده....

بس مع الاسف إن الكلام مابيطبقش خالص في الواقع....و دا واحد مش بس من اسباب نسبة العنوسه في مصر....لكن كمان إرتفاع نسبة الطلاق المخيفه....احنا بنشوف العريس الجاهزابو شقه وعربيه....ونقول ياسلام.... اهي ديه العرسان ولا بلاش.....

هتقولي لأ احنا بنبص على الدين والاخلاق كمان....هأقوكم آه صح بس كنقاط مكمله مش اساسيه... والله إني مابسمعش عبارة ياابني احنا بنشتري راجل غير في الافلام.....

ربنا يرزق البنات بالازواج الصالحين ويرزق الشباب بالزوجات الصالحات إن شاء الله

تم تعديل 13 يناير 2007 بواسطة Siwa

[أبو حميد]

أستاذ / عادل

الفقير هو اللي معندوش شقة تمليك طبعا وموضوع واعد أقصد أنه هايوصل لمستوى الفتاه بعد 20 سنة كفاح هايكون ساكن في شقة ايجار جديد والأثاث بسيط خالص والفرح مش في فندق والتلفزيون 14 بوصة ومفيش سيارة مفيش تكييف مفيش دش مفيش هدوم من المحلات الغالية والمولات مفيش حفلات عيد ميلاد فخمة والخضار نجيبها من السوق بعد الفصال مش من كارفور والفسح محدودة والمصيف مش مضمون وفي سقف للإنفاق لازم ما نتعدهوش. وللأسف الأسر ما بتحاولش تحكي لبناتها هما أبتدوا ازاي والبنات مش شايفة إلا مستوى والدها ومستوى زميلاتها وكمان المجتمع وعاداته أصبحوا عامل ضاغط يعني بنت خالتها فرحها كان في فندق خمس نجوم و بوفيه مفتوح وبنت عمتها راحت تركيا في شهر العسل وهي مش أقل منهم.

بالمختصر وعلشان توحيد المقاييس هل توافق الأسر على أن تخوض بناتها نفس المعاناة التي خاضوها هم أنفسهم حتى يصلوا لما وصولوا إليه أم في الغالب يفضلون العريس الجاهز ويختصروا الطريق على فتياتهم.

بالنسبة للاستاذ عادل

ليه حضرتك بتعتقد ان اي شاب في الخليج ليس عنده هدف ؟ انا من وجه نظري لمجرد انه فكر في السفر فهذا في حد ذاته هدف ؟ واعتقد اننا شايفين نماذج كتيرة جدا من الشباب المصري واؤكد على كلمة شباب ناجحين جدا

رمضان:

الأستاذ عادل ماقلش أنه بيعتقد أن أي شاب في الخليج ليس عنده هدف هو بيقول أن الشاب اللي بيعمل في الخليج والمهندس والطبيب واعد نظريا لكن ممكن ميكونش عنده هدف. وبعدين أنت مالك ومال العرسان الفقرا أنت راجل شغال في الكويت يعني جاهز من مجاميعه ومعندكش مشكلة روح أخطب أي عروسة وأكيد هايوافقوا.

سيوة عندك حق شراء الرجالة توقف منذ زمن طويل لبوار السلعة وشراء راحة البنت هو اللي ماشي اليومين دول.

ربنا يرزق البنات بالازواج الصالحين ويرزق الشباب بالزوجات الصالحات إن شاء الله

أمين

[Folana]

لسلام عليكم ورحمة الله ...

اسمحوا لى أرد مرة كمان ...

انا شايفة كده ان فيه اتهام خفى لأسر البنات بانهم السبب وراء ظاهرة العنوسة..لمغالاتهم فى الطلبات او بحثهم الدائم على العريس الجاهز...ماحدش سأل نفسه بصراحة...ليه ما يكونش السبب فى ارتفاع نسبة العنوسة هو احجام الشباب عن الزواج؟

لانهم ببساطة شديدة برضه عايزين عروسة جاهزة...اهلها يشيلوا الجهاز كله ....ويا حبذا لو ابوها جايب لها شقة كمان...تبقى فُرجت..

للاسف ..العروسة الفقيرة برضه مش بتتجوز بسهولة...لان يا ولداه اهلها مش معاهم يكملوا ثمن حجرة النوم...وعلى فكرة انا باتكلم برضه عن واقع..وباشوف حالات كتير جدا من اللى باتكلم عنها دى...

يعنى لو شاب عايز يتجوز...وظروفه يادوب على قده ومش معتمد على اسرته فى حاجة ( بلاش اقول معتمد على مامى وبابى لان فى الزمن ده كل الشباب بيعتمدوا على اهلهم من غير مايكونوا مدللين )...وامام الشاب ده...عروستين..واحدة بيحبها (مثلا )..ومش حتقدر تساهم فى تكاليف الزواج..ومؤدبة وجميلة وملتزمة

وعروسة تانية..جميلة وملتزمة ومؤدبة وعندها شقة...حيختار مين فيهم؟...وبصراحة ...

اخى ابو حميد...تعريفك للفقير ده برضه مش محدد..ليه..لان الكلام ده بينطبق على جميع المستويات على فكرة...

كل مستوى اجتماعى له سقف انفاق ما يقدرش يتخطاه....واللى بيعمل غير كده بيصنف على انه سفيه...او مش تعبان فى فلوسه...

يعنى ممكن انا ما اقدرش اعيش بالطريقة اللى بتوصفها دى..وما افكرش اعمل فرح لبنتى فى اوتيل خمس نجوم و..و.. الى اخره..

لكن فى نفس الوقت ما اقدرش ارمى بنتى مثلا فى جوازة مش كفء بالمرة..مش علشان انا متمردة وطبقية..ولكن لان بخبرتى فى الحياة اقدر اشوف المستقبل والايام الجاية عليها حيبقى شكلها ايه..

يعنى فرضا ان بنتى عندها الشقة والعربية ورصيدها فى البنك ( مثلا لان بنتى لسه صغيرة على كل الكلام ده )..تفتكر حضرتك لو اتقدم لها عريس...واحنا كاسرة مش محتاجين فلوسه ولا عربيته ولا شقته...حنقييمه على اى اساس؟

يعنى اتمنى اننا نناقش الموضوع بصراحة اكتر علشان يبقى فيه نتيجه ايجابيه...انا مش حابة انى ادخل انقل كلمتين ولا اقول كلمتين انشا واحصل على تصفيق ..لا ..انا فعلا باتكلم بالواقع...وخلينا نناقش الواقع ده...

[رمضان]

السلام عليكم

استاذ احمد انا لا اتكلم عن نفسي انا الحمد لله اموري تمام منتظر بنت الحلال بس لكناحنا بناقش مشكلة عامة تهم كل الشباب

اخت فلانة مع احترامي الشديد لكلام حضرتك بس الكلام فيه اتهام شديد للشباب وتناسي واضح للشباب المجتهد واللي عمل نفسه بنفسه بدون الاعتماد على احد وبدون ان يفكر ان الانسانة اللي هيتجوزها تساعده ومش منتظر منها حاجة

[nash]

أنا شخصيا هارد بما يتناسب ووجهة نظري كأم لشابين...وكخاله لفتاة مثل القمر....وكأنها أبنتي..

وسأقع في نفس المأزق في يوما ما....

أنا طبعا مقتنعه ....بالآيه القرآنيه(وخلقنا بعضكم فوق بعض درجات) فمثلا لن يتقدم أبني لإبنه ملك أو أمير مثلا....فالملك سيزوج أبنته لإبنه ملك أيضا...وهكذا....

فالأفضل لكل طبقه أجتماعيه..أن تزوج الشاب والفتاة من نفس هذه الطبقه...حتي لا تحدث مشاكل ...

أجتماعيه ..الجميع في غني عنها......

أنا طبعا مع رأي فولانه....فأنا لن أسمح أبدا لإبني ...أن يأخذ بنت الناس لتعاني معه....أو تتشعلق في أتوبيس..مثلا..أو يمتهن هو مهنه....مهما أدعينا التحضر لن نقبل بها..مثل سائق التاكسي..كما في موضوع الأخت نورا مثلا...أنا تكلمت بصراحه رغم أن كلامي لم يجد القبول أو التأييد...

فالذي لا أقبله علي نفسي لن أقبله علي بنات الناس....

واجب الأسرة مساعه شبابها..طالما الإمكانيات موجوده...لكن يجب توفير أيضا الحد الأدني ..من شروط النجاح للزواج....كأن يكون الشاب صاحب شهاده....لديه الإمكانيات لفتح بيت...وتوفير حد معقول..من الأسس الواضحه للمستقبل....

شخصيا لن أقبل بأي شاب والسلام لإبنه أختي...علي الأقل يجب أن تتوفر الشروط الأساسيه...للنجاح....والباقي ..بيد الله سبحانه وتعالي

وعلي العموم إذا فيه أمهات أو أسر ترفض الزوج الفقير هناك من توافق...وهذه ليست مشكلتي...