مقتطفات من تاريخ نادي الأوقاف ( الزمالك زمان )

[se_ Elsyed]

أعزاء مُحبي الرياضة

كم هو مُحزنٌ أن تفقد مصر قلعة من قلاع الرياضة بها

هذه القلعة ليست قلعة الكبش ولا قلعة قايتباي ولا قلعة صلاح الدين القليوبي بتاع قليوب

ولكنها

قلعة نادي الزمالك

نعم هو نادي الزمالك بتاع زمان اللي كلنا كنا عارفينه الأبيض أبو خطين حمر بتاع مية عُقب - والعقبة ده هو جوز العُقبة -

ففي يوماً أسوداً تم الحجز على ممتلكات نادي الزمالك من قِبل وزارة الأوقاف

لماذا ؟

لأنهم وكعادتهم ما دفعوش الإيجار المستحق عليهم حتى تراكم ووصل 15 مليون جنيه

نعم 15 مليون جنيه

قد يقول قائل - وهو كوكو واوا رئيس رابطة مشجعي نادي الأوقاف - أصل بتوع الأوقاف عايزين يتشهروا ويطلعوا في الجرايد

طب وبتوع الميه اللي وصلت مديونتهم عندكم 300 ألف جنيه عايزين يتشهروا برضوا ؟

والمكوجي وبتاع اللاندري - والله العظيم زي ما بأقولك كده يا كوكو وهاتشوفوا في الفيلم الوثائقي أحد أعمدة النادي وهو فاروق جعفر وهو بيقول بعضمة لسانه إن المغسلة ما بقتش تغسل ملابس اللعيبه عشان ما فيش رابسو وماحدش بيدفع فلوس ولذلك اللعيبة بقت ريحيتها قبر وتقرف -

عيب يا كوكو

إوعى تقولي الزمالك في ازمة

إوعى تقول زي محمود معروف وتطالب بإضافة جنية على تذاكر السنيما والمسرح

او ربع جنيه على تذاكر المترو - لا مترو دي أنفاق ( بالفرنساوي -

أوعى تقولي إحنا هانبيع هدومنا عشان النادي أو هانمسك صفايح سمنه فاضية ونطلع الاتوبيسات والقوطورات - بس حاسب من التوربيني - ونلم ونشحت على النادي إوعى تقولي إحنا كتبنا للرئيس أبو قلب حنين عشان يرفع عننا الزولم .. لإن الريس أهلاوي يا كوكو .. نعم أهلاوي ودايماً يبعت ولاده ويقفوا في المطار يستنوا اللعيبة بتاعت الأهلي وهما راجعين شايلين إشي كؤوس وإيش ميداليات

أنا مستعد أكلم لك حسن بيه حمدي يبيع الاتوبيس المكشوف ويبيع كأسين تلاته من بتوع الأهلي

بس المُحضر ما يجيش يحط إيه على النادي

وأخيراً وليس أخراً

إليك هذه الأفلام التسجيلية عن تاريخ النادي المُفضل إلي - باللبناني -

نادي الزمالك مدرسة الفن والللعب والهندس والبلطجة وأكل الحقوق

إليك أُهدي يا كوكو إنت وهوبا واوتاكا الشهير بأبو رُكبه وإلى اي زملكاوي

أي زملكاوي إيه ؟ .. دا ما فضلش غيركو في مصر بعد ما سبتوها وطلعتو الجبل لإن الزملكاويه التاتنيين عرفوا طريق الهداية برضاهم أو غصبٍ عنهم بعد ما الناس أكلت وشهم

او كما قال أحد الزملكاويه.. أنا ما بقاليش وش أقعد تاني على القهوة من اللي بيعملوا في الزملكاوية

إليك أهدي هاتان المادتان الفيلميتان وهارجع تاني

هارجع عشان أغني يا كوكو

أيوه هأغني يا هوبا

راجعلك يا اوتاكا وكل امل ان تتركوا الجبال وتعودوا مواطنين صاليحن

والسلام عليكم ورحمة الله وبركاته

اللي يحب النبي يسقف وطفي النور عشان نتفرج على الأفلام بمزاج ومعننه

إديها يا سين سين يا كايدهم

فيلم نادي الاوقاف .. كلاكيت 65 مره .. سكوت هانصوت

مدرسة الأوقاف الثانوية بنين

لأ

لأ

نعيد المشهد ده من تاني مش عاجبني

طب بالصلاتو عالنبي

67 تاني مره والله ماطولك يا روح .. إسكت يابني هناك

أحد الزملكاوية وهو يهذي من كتر الهزائم

[se_ Elsyed]

لن أبخل عليكم جميعاً على مختلف إنتمائتكم بالضوحك حتى النخاع

وكما أمتعتكم بالصورة والصوت .. فسوف أمتعكم بالمقالات النادرة من جميع المواقع

من أول زمالك تي في

إلى مجلة البعكوكة

سكوت

عايزين نقرا بمزاج يابني هناك

---------------------------------

كلهم باعوك يا زمالك ( هو اللي بيقول مش انا )

شبعنا من الكلام المعسول . التصريحات الوردية .الخداع والوعود الوهمية. من الضحك على الذقون وكذب العيون . هل يمكن ان نصدق ان هناك لاعبون يحبون الزمالك . لديهم انتماء او حمية او خوف على مستقبل النادى . الاجابة سهلة وبسيطة وتعرفونها جميعا .

انهم يلهثون وراء الاموال ,وراء من يدفع اكثر , يضحكون علينا قبل ان يخدعوا انفسهم بجشعهم ونكرانهم للجميل للنادى الذى صنع منهم ابطالا وجعلهم نجوما ووضعهم فى الكادر بعد ان كانوا أقزاما لاحول لهم ولاقوة

أنا كنت اكثر من خدعوة بكلامهم وتصريحاتهم بحكم عملى وقربى منهم وتعالوا احكى لكم الحوار الذى اجريتة مع طارق السعيد قبل ان ينتقل الى الاهلى فى مقر جريدة زملكاوىواكد خلالة ان الزمالك فى دمة ولايمكن ان يفكر فى الانتقال الى نادى اخر الا خارج مصر وانة مستعد للتوقيع فورا باسبوع تقريبا وقع للاهلى وقرأتم عن تصريحاتة بان ابن الاهلى وكلمات الاشادة وحماسة الذى نشاهدة على الشاشة ومحمد صديق الذى تربطنى بة علاقة وطيدة ولايمكن ان انكر حبى الكبير لة الا انة اقسم بحياة ابنة عمر انة لم يوقع للاخوة اياهم ثم كانت المفاجأة التى هزتني داخليا لمدة 3 اشهر حتى نسيت ماحدث والأخ اينو الذى لم نكن نسمع عنة وتم تصعيده للفريق الاول بعد تدخلات والدة عدة مرات وتوسط الكابتن احمد رفعت مدير الكرة مع فينجادا وعندما شد حيلة شوية شاهدنا تمرده وذهابه طالبا القرب من الاهلى الذى قام بتقبيضة مبلغ معتبر من تحت الترابيزة ويا بجاحة تقبيلة لفانلة الزمالك وخداعة للجماهير وهو الذى كان ينهار مع كل هجمة خطرة للمقاولون امام مرمى عصام الحضرى حتى اللاعبين الذين كان مجلس الاداراة يفاوضهم .

اسألوا المحاسب عمرو الجناينى ماذا قال لة احمد عادل لاعب الاوليمبي عن عشقه للزمالك وحلمة فى ارتداء الفانلة البيضاء ومطالبته بالضغط على مجلس اداراة الاوليمبي لانهاء المفاوضات سريعا وانظروا ماذا قال بعد ارتدائه الفانلة الحمراء .

انهم لاعبين بلا ضمير ماتت قلوبهم قبل ان تموت ذاكرتهم واذكرهم باللاعبين الذى خدعوا الزمالك وهرولوا الى النادى المنافس اذكرهم بسعيد عبد العزيز ورامى سعيد واسلام الشاطر وعلى ماهر وعمرو سماكة ومحمد عبد اللة واحمد صديق وغيرهم ومعظمهم ذهب مع الريح

واؤكد لكم ان السيناريو بحذافيرة يتكرر مع طارق السيد والذى لم تتبقى ساعات وينتقل للاهلى بداية من الموسم المقبل بعد ان يوقع عقد رسميا لمدة ثلاثة مواسم.

السؤال الذى اريد ان اطرحة من المسئول هل مجلس الاداراة الذى يواجة حرب يهودية اهلاوية فى خطف اللاعبين واغرائهم بمبالغ فوق وتحت الترابيزة أم اللاعبون الذين لايحبون الا انفسهم واصبحوا لايخجلون من نكران الجميل للنادى الذى صنعهم ام الاعلام الذى حول الاهلى الى اسطورة ومملكة يتمنى اى لاعب الانتماء إليها انها بحق ازمة انهيار قادم لامحالة يصيبنا جميعا بالاحباط الشديد ولاندرى من يتحرك من ياخذ بيد هذا النادى العريق من يستطيع ان يعيد البسمة الى الجماهير الوفية

من يبحث عن لاعبين لديهم انتماء حقيقى يبحثون عن الدفاع عن ناديهم لا ان يتعاملون كمرتزقة فى الحروب يتعاملون مع نادى الزمالك كبيت وكيان لا مجرد محطة انتظار .

اين حازم وعبد الواحد وجمال وحليم وابو العلا وكنت اتمنى ان اقول طارق ولكن فات الاوان وانضم الى الركب المهاجر تحركوا انة نادى الزمالك ياسادة تحركوا برجاء من الجماهير تحركوا قبل يضيع كل شئ

اين الدكتور صبرى ابو علم وعمرو الجناينى واحمد توفيق

اين ممدوح باشا عباس ألستم جميعا قبل ان تكونوا اعضاء فى المجلس تعشقون تراب الزمالك تحركوا لانهم باعوا الزمالك باعة اللاعبون ويريدون ان يسلبوه ارضة وكل شئ تحركوا ياسادة تحركوا قبل ان نردد جميعا كلهم باعوك يازمالك؟

بقلم مصطفى جويلي من موقع زمالك تي في لا أخفيه

[رمضان]

صباحك فك يا سي السيد بجد رائعة واشكرك جدا عليها

هل من مزيد علشان الجيل الجديد يعرفوا اكتر عن الزمالك

والله نفسي ابوسك

[kokowawa1979]

أنا كتبت مداخلة ومالقيتهاش إيه ياأهلوية انتم بتعملوا إيه بالضبط :wub: وكانت مداخلة مفبش فيها أي حاجة -بالعكس كانت بعيدة عن التهريج تماما !!!

عموما ياعم السيد إنت راجل زي العسل والله من كل قلبي بتفكرني باخونا الله يصبحه ويمسيه بالخير الدكتور رجب -ياترى فاكره :blink:

عموما ياعم السيد كل اللي انت كتبته : الأوقاف - الكهرباء - دول سبب علو صوتهم له سبب واحد وبس وهو عدم وجود المر على راس النادي -

وبعدين الأوقاف كفاية عليهم صندوق النذور اللي بيسرقوه في جميع مساجد مصر :wub:

أما فاروق افندي فده ابن عاق زيه زي شوشو :wub:

وبعدين ياعم احنا نفضل برائحة الملابس الغير زكية من غير غسيل لإن عدم نظافة الملابس أحسن وأفضل من عدم نظافة الذمم وعندك اللول وباجنيد بتاع البنك الأهلي- يعني حظكم في رجليكم خزائن الأهرام وخزائن البنك الأهلي لأ وكملت النائب العام كمان :wub:

أنا شخصيا بكل ماأملك فداءا للإسلام والزمالك ودي بجد مش بهزار .

حلال عليكم ياعم الريس والأنجال والست والأهلي اللي خللوا الأهلي فوق الجميع - وكفاية علينا احنا طوابير العيش والسكن في عزب الصفيح :wub:

بكرة تندم ياجميل :wub:

آه نسيت اقول لك إوعى تدخل الزمالك تي في لاحسن اخونا داروين ياخدك مخالفة ويعتبرك من جماهير الدرجة التالتة :wub:

مش باقول لكم الأهلوية دول زي العسل يخشوا يتمتعوا وبعدين يخرجوا يعيبوا فينا - وأظن نقلك من زمالك تي في يوريك إن احنا ناس ديموقراطيين مش نمنع شوشو من دخول النادي :wub: يعني ببنقد ذاتنا بنفسنا ولو إني أنصحك ماتدخلش الزمالك تي في تاني ليمسكوك وساعتها لا كوكو واوا ولا هوبا هاينفعوك لإن انت عارف الأهلاوي اللي يتمسك في موقع الزمالك تي في بيعملوا فيه إيه ؟ :wub:

تم تعديل 17 يناير 2007 بواسطة kokowawa1979

[kokowawa1979]

وبمناسبة الضحك والفرفشة خد دي عندك :

http://www.swahl.com/up/m60/swahlcom_706d.gif

ملعوبة مش كدة :D

[بنت النيل]

معلش ياعمو س. س

بصراحة كدا الموضوع بقى بايخ شويتين مش مسئلة بقى هزار وفرفشة يعنى مش معقول المواضيع دى ولا الكلام ده وترجعوا تقول يا جماعة احنا بنهزر وفين الروح الرياضية وشوية الكلام ده اللى لا بيودى ولا بجيب وان جاب بيجيب مشاكل وان الاعضاء بتزعل من بعضها ولو حتى فى نفوسها

فاعتقد ان ده مايرضيش اى حد

فياريت مواضيع السخرية اللى بتخدوها على اعتبارها دعوة للابتسام للاسف فهو ابتسام ساخر يكون له حـد نقف عنده

ياريت الادارة تنظر للموضوع ده لعدم خلق المشاكل بين الاعضاء او لاضطرارهم لكتابة مالا يعجب بعض الاعضاء والادارة

شكرا

[Siwa]

اتفق تماما معكي اختي العزيزه.....

واعتقد إن المواضيع ديه دايما تنتهي باثارة مشاكل.....

مش ضحك ولا إبتسام زي ماهي المفروض تعمل.....

معلش ياعمو س. س

بصراحة كدا الموضوع بقى بايخ شويتين مش مسئلة بقى هزار وفرفشة يعنى مش معقول المواضيع دى ولا الكلام ده وترجعوا تقول يا جماعة احنا بنهزر وفين الروح الرياضية وشوية الكلام ده اللى لا بيودى ولا بجيب وان جاب بيجيب مشاكل وان الاعضاء بتزعل من بعضها ولو حتى فى نفوسها

فاعتقد ان ده مايرضيش اى حد

فياريت مواضيع السخرية اللى بتخدوها على اعتبارها دعوة للابتسام للاسف فهو ابتسام ساخر يكون له حـد نقف عنده

ياريت الادارة تنظر للموضوع ده لعدم خلق المشاكل بين الاعضاء او لاضطرارهم لكتابة مالا يعجب بعض الاعضاء والادارة

شكرا

تم تعديل 17 يناير 2007 بواسطة Siwa

[kokowawa1979]

ياريت الادارة تنظر للموضوع ده لعدم خلق المشاكل بين الاعضاء او لاضطرارهم لكتابة مالا يعجب بعض الاعضاء والادارة

الفاضلة بنت النيل- الفاضلة سيوا - أنتم معاكم حق بصراحة بس المشكلة إن اللي مسيطرين ومعاهم المقص كلهم أهلاوية :D منهم واحد صدعنا بعدم انتماؤه للأهلي لكن كل كلامه ضد الزمالك على طول الخط والآخر يقول أنا محايد - ويوم مانحاصر الأهلوية شويه نتهم بأننا نخرج على الروح الرياضية - ويقفلوا الموضوع بسرعة بتعبيرات برضه غير رياضية بالمرة بحجة إننا بنتجاوز الحدود:D لكن أمانه أخونا السيد أهلاوي صحيح لكن باله طويل .

عم السيد علشان خاطر الأختين الفاضلتين بنت النيل وسيوا نقفل على المواضيع دي لإن صدقني إنت والأهلوية مش هاتسدوا - مش عافية لكن بحقائق إنت عارفها وياما هربت من التعليق عليها :D

الله يرحمك يامشير كان زمانا مرتاحين من الأهلوية وكانوا ارتاحوا في السبنسة مش كدة واللا إيه :D

أنا شخصيا أعتذر لكما أيتها الأختين الفاضلتين وباعتبارك مشرف عام أخونا السيد قفل بقى على موضوعك اللي انت فتحته :D