هتعمل ايه لما تنزل مصر مصدر دخلك كام ومنين سؤال بيحير الاغلبيه في الغربه

[نورت مصر!!!]

سؤال محيرمعظم المصرين في الغربه........

هعمل ايه لما انزل مصر وامتي هنزل ؟؟؟؟ ودي بعض وجهات النظر التي تدور بين المغتربين علي اختلاف تخصصاتهم

1- انزل وهرجع الوظيفه الي بدفع لها كل سنه فلوس علشان احافظ عليها علشان الوضع الاجتماعي بين الناس .رغم مرتبها الضعيف الذي لايثمن من جوع .واحط القرشين في البنك علشان الفائده تساعد مع المرتب بس البنك حرام بس المفتي احله ؟ والاسعار في زياده والجنيه قيمته بتقل؟؟

2- انزل مليش وظيفه ولاتعين رغم اني جامعي ومفيش وظايف !!! هعمل مشروع صغير( عياده .مكتب هندسي .محل .سوبر ماركت.شركه. الخ....... كلا حسب تخصصه) !و هو ايه المشروع الصغير وهنصرف من رأس المال لما المشروع يقف علي حيله ؟ واحنا اتعودنا علي المصاريف والرغد؟؟؟

3- مش هنزل دلوقتي واعمل مشروع يديره او يشركني بعض الاهل او الاخوه او الاصدقاء وانا لسه هنا علشان المشروع يكبر وانا اساعد واناهنا علشان راس المال يزيد بس مين الي هيهتم ويحافظ علي مال غيره والشيطان شاطر ؟؟

4-انسى فكره النزول دلوقتي واتنيل علي عيني واخليني هنا لما الوضع يتحسن شويه وشويه تجر شويه وشويه تجر شويه والمسؤليات تزيد ونبقي عملين ذي الي رجليه غرزت في الوحل ومش عارف يطلعها وكل ما يمشي يغرز اكتر ؟؟؟؟؟؟؟؟؟؟؟

5-بلاش اضايق نفسي بالسؤال ده وانسي الموضوع ورب هنا رب هنا ومقطعش عيشي بيدي وكلها بلاد الله

واهي ماشيه وبتعدي صدمه في اطمه في لطمه

ارجوا من الاخوه المشاركه لنوضع اجابه علي هذا السؤال الي محير معظم المغتربين والي مش متحير ميتعبناش لان لايحس بالنار الا الي ماسكها ؟؟؟؟؟؟؟؟؟؟؟؟؟؟؟

نورت مصر!!!!!!!!!!!!!

[hamadh]

-انسى فكره النزول دلوقتي واتنيل علي عيني واخليني هنا لما الوضع يتحسن شويه وشويه تجر شويه وشويه تجر شويه والمسؤليات تزيد ونبقي عملين ذي الي رجليه غرزت في الوحل ومش عارف يطلعها وكل ما يمشي يغرز اكتر ؟؟؟؟؟؟؟؟؟؟؟

انت جبت المفيد

هاننزل نعمل ايه فى مصر

اذا ماكانش الواحد عنده مهنه معينه زى دكتور او مهندس او صيدلى يقدر يعمل بيها مشروع يفهم فيه يبقى مالوش لازمه النزول

انا شخصيا فكرت كتير فى الموضوع ده واقول لما انزل مصر اشوف مشروع صغير على قدى اعمله او حتى اخططله الاقى نفسى مش عارف حاجه فى البلد والاقى كل المشاريع موجوده وبكثره

الناس ماسابتش حاجه ماعملتهاش فعلى رايك بتنيل على عينى واقول خلينى هنا لحد ما تفرج

تم تعديل 17 يناير 2007 بواسطة hamadh

[dodo]

صباح الخير،،

ازيكو، انا اول مرة اكتب هنا، بس الفكرة، ان الموضوع بجد مستاهل ان الواحد يرد عليه

أنا اتربيت في الغربة، مع ان الغربة دي في دولة عربية، الفكرة ان بابا و ماما لما سافروا و انا في خامسة ابتدائي، كان هدفهم يجيبوا شقة بس و يرجعو مصر

و اسعار الشقق بتغلى، و الرواتب برة ماهياش ان الواحد قاعد يلم في فلوس بس، دول عيلة، و عيلة بتكبر، يعني محتاجين فلوس

ناهيكم طبعا عن الهدايا اللي كانت شبه واجب علينا كل سنة ننزل،أو كل اربع او خمس سنين لما العيشة بقت اصعب

و بعدين انا كبرت، و خدت الثانوية، و بعدين نزلت مصر، و طبعا اهلي ما نزلوش عشان لسة اختي تاخد الثانوية، و دخلت الجامعة و اتخرجت و رجعت تاني

اتجوزت و عندي دلوقتي ابن

الفكرة بقى

امتى هاننزل

البلد اللي احنا فيها ما عادتش زي زمان، بس لما اتربيت انا برة بقيت احس بالغربة الحقيقية في بلدي

اهلي اللي من لحمي و دمي مش عارفين عن بعض غير المظاهر اللي بينا، هما فاكرينا ملوك الخليج و عندنا الأرصدة بالآلاف

و احنا مش عارفين عنهم غير المشاكل اللي بيحوشوها علشانا طول السنة

هارجع لمين

و بعدين انا ابتديت افكر بالضبط زي ابويا و امي

انزل ليه

ما العيشة هنا كويسة، على الأقل هنا أعامل معاملة بني ادمين

مش زي بلدنا، و انتو طبعا عارفين

طب و ابني، هايكبر و يتربى هنا هو كمان

و ينزل و يعيش نفس التجربة،

اعتقد ان الانسان كان المفروض يسافر و هو عنده هدف

و الا بقى نستنى زي ما كل اللي هنا مستنين، و كل واحد يقول مش هاقطع عيشي بإيدي، خليهم هم اللي يقولولنا مع السلامة

بس اللي انا مؤمنة بيه تمام الإيمان، ان بجد الرزق بإيد ربنا، و ربنا عمره ما بيضيع حد

سامحوني على الإطالة

تحياتي

أم علي

[CAMPS]

كيف الحال :closedeyes: السؤال ده راودني كتير

انا طبعاً ضد فكرة ادينا قاعدين وواحد اتربى هنا يبقى خلاص بقى ابن هنا .. لا ... انا رغم اني من فتره هنا ومعاى اسرتي لكني مفتقد لكل شىء خصوصا اني تربيت في احدى قرى الصعيد لآن الحياه عندنا لها طعم تاني غير حياة المدن ولكن الحمد لله طبعا ......افتقدت حاجات كتير ... مفتقد الماء بدون فلتر.. الهواء الجميل بدون تكييف ...الاكل اللى الطازة من غير تجميد..... الشجر... الطيور " كنت اصحى كل يوم على صوت طائر اسمه القمري " التراب ... النجوم والقمر " كنت دايما انام في فناء بيتنا وافضل اتأمل السماء حتى يغلبني النوم ... بعيدا عن هذه الاسقف المنخفضة ......

افتقدت النيل والقطار .. المزارع والترعة وعصير القصب .... افتقدت الناس الطيبة اللى كلها حب ومتعرفش العنصرية " ده وافد وده مقيم "

افتقدت اصدقائي اللى كانوا بيحبوني بجد لما ماكانش عندي حاجة .....

افتقدت اخواتي اللى تربينا مع بعض على طبلية واحدة ...ابويا اللى كان بيملى البيت امان ودفء ...امي نبع الحنان المنهمر ....

[اسود وتعالب وارنب]

حنعمل ايه يعني هنا زفت وهناك ازفت مع اني بقالي 10 سنين هنا لكن مفيش اي ايده يعني الواحد عايش وخلاص انا لو عندي وظيفه في مصر مع دخل معقول من بكرة انزل لكن المشكلة فين الشغل

[الحازم حسن]

يا صاحب الموضوع الاحتمالات كلها منطقية جدا لكن حضرتك نسيت احتمال واحد

هوه انك تنسى مصر خالص ومتنزلش الا للضرورة القصوى

جرب تبعد نفسك عن أي مؤثرات جانبية وقولي النتيجة

صدقني لو شلتها من تفكيرك حترتاح ع الآخر

[الحاج فوزى]

تشيلها من تفكيرك ايه يا عم الحازم !! مصر التى فى خاطرى احبها يا سيدى

الاخت ام على ، كلامك بيلخص كلام كتيير قوى ممكن كتير يكتبوه

يا عم CAMPS ، كلامك بيقلب المواجع ، بالله عليك يا شيخ تخفف من كلامتك شويتين :closedeyes:

بالنسبة للسؤال المعضلة ده ... كل ما بفكر فيه .. مابفكرش

مش هروب ، استسلام للامر الواقع

حسين

[MZohairy]

صباح الخير

عندي واحد صاحبي مش مصري

و نازل يشتغل في مصر لمدة سنتين

عنده اسره مكونه من 4 اشخاص بالاضافه له شخصيا

ممكن حد يقولي تكاليف المعيشه التاليه (مطلوبه مني حرفيا وانقلها كما هي للأمانه)

1- شقه مفروشه في الزمالك محترمه باعتدال

2- رسوم سياره تريبتك معاه من هنا(4*4 )

3- مصروف الحياه العامه لواحد متريش وابن عز شامله الترفيه :closedeyes:

4- المدارس معروفه بالنسباله

5- خادمه منزليه

6- سائق خاص

بس

شكرا <_<

[otaka]

ممكن حد يقولي تكاليف المعيشه التاليه (مطلوبه مني حرفيا وانقلها كما هي للأمانه)

1- شقه مفروشه في الزمالك محترمه باعتدال 8000LE

2- رسوم سياره تريبتك معاه من هنا(4*4 )

3- مصروف الحياه العامه لواحد متريش وابن عز شامله الترفيه 3000$

4- المدارس معروفه بالنسباله

5- خادمه منزليه 1000-1500LE

6- سائق خاص 800LE

----------------------------------

Total 30,000 LE

تم تعديل 19 يناير 2007 بواسطة otaka

[أبو حميد]

نورت مصر

سيظل سؤالك دائما يحير ملايين المصريين المغتربين وغالبا لن نجد له إجابة واحدة صحيحة لأن الإجابة ستكون بحسب ظروف كل مغترب ظروفه في مصر وظروفه في الغربة والمشكلة الأكبر أن هذه الظروف كمان بتتغير مع الزمن.

dodo

أهلا بيك في أول مشاركاتك.

Camps

قلبت علينا المواجع فعلا.

الحازم حسن

من غير مصر سيصبح ما حققته في الغربة كدقيق فوق شوك نثروه ... ثم قالوا لحفاة في يوم ريح إجمعوه

[الحازم حسن]

الحازم حسن

من غير مصر سيصبح ما حققته في الغربة كدقيق فوق شوك نثروه ... ثم قالوا لحفاة في يوم ريح إجمعوه

اذا عجزت عن حل مشاكلك ، تجاهلها واسخر منها

[أبو حميد]

أخي الحازم حسن

أرجو ألا تكون متسرعا في الحكم فأستعارتي لجزء من توقيعك يعني اعجابي بالكلمات ليس السخرية. أرجو منك قراءة ردي مرة أخرى فرائي أنك لو نسيت مصر وحققت كل النجاح الذي تحلم به خارجها. فلن تتمتع به وسيضيع منك طالما بلدك وأهلك لا يشعرون به

تم تعديل 20 يناير 2007 بواسطة أبو حميد

[الحازم حسن]

أخي الحازم حسن

أرجو ألا تكون متسرعا في الحكم فأستعارتي لجزء من توقيعك يعني اعجابي بالكلمات ليس السخرية. أرجو منك قراءة ردي مرة أخرى فرائي أنك لو نسيت مصر وحققت كل النجاح الذي تحلم به خارجها. فلن تتمتع به وسيضيع منك طالما بلدك وأهلك لا يشعرون به

يبدو أنك اسئت فهمي أستاذ أبو حميد أنا لم اقل انك سخرت مني حضرتك من الاخوة الأفاضل ذو العقول النيرة هنا انا كنت أوضح لك وجهة نظري في معالجة الأمور ... هذا ما أردته

[أبو حميد]

أخي الحازم حسن

الحمد لله مفيش مشاكل بس انا بخاف جدا من الفهم الخاطئ لحد ما وقعت فيه أنا كمان وكويس أن كل واحد مننا يوضح كلامه منعا للخلاف.

ونرجع لموضوعنا وأسألك بذمتك أنت قدرت تنسى مصر؟؟؟

لو كنت نسيتها مكنتش دخلت هنا معانا تشارك برأيك علشان نحاول نوضح أيه الغلط وايه الصح ونقول رأينا ونشرح أحلامنا لمصر جديدة كان نفسنا نعملها بأيدينا ومعرفناش أضطريتنا الظروف نسيبها فقلنا نشارك ولو بكلمة.

[الحازم حسن]

لو كنت نسيتها مكنتش دخلت هنا معانا تشارك برأيك

:happy:

[CAMPS]

اخويا " ابوحميد "

انت asmg وغيرت اسمك ولا ايه ؟

ان كان كده قولي وشكرا

[نورت مصر!!!]

شكر خاص لكل من فتح قلبه وشارك في الاجابه علي هذا السال المحير واحب اقولكم

كل سنه وانتم طيبين بمناسبه السنه الهجريه الجديده ويارب تكون فاتحه خير علي كل المسلمين وربنا يحقق احلام وطموحات كل الناس والي عاوز شقه كبيره والي عاوز يتجوز والي عاوز عربيه حلوه والي عاوزمشروع كويس والي والي والي عاوز بنا يكرمكم جميعا وعلشان مطولش عليكم احنا ملناش غير مصر

رغم كل الي بتعمله فينا ملناش الاهيا

ومنير بيقول زمان :

قلب الوطن مجروح 000000

----------------------

----------------------

قلب الوطن مجروح

لا يحتمل اكتر

نهرب و فين هنروح

لما الهموم تكتر

نحمي غصون الورد

من دمع سال عالخد

اه يا حبيبه الروح

قلب الوطن مجروح

لو حتي قلبي تاه

بين الشجن و الاه

ياللي لقاكي حياه

انا حبي ليكي صلاه

يا مطيره العصافير

رجع الهوا بالخير

لو قلبي هتضميه

اديه حنان و داديه

ده الصمت مش لينا

فين الولد ما يروح

لازم يعود اسمر

قلب الوطن مجروح

لا يحتمل اكتر

لو ينطق الموال

لازم يروق الحال

محتاجه ليا

دراع

و شراع و راحه بال

محتاج اليكي نجوم

هايمه في حضن هلال

لو بحرنا نسقيه

صحيه و بوسي عينيه

ياما بكره يسقينا

خلي طريق البوح

يصبح طريق مرمر

قلب الوطن مجروح

لا يحتمل اكتر 0000 نهرب و فين هنروح لما الهموم تكتر 0000

[أبو حميد]

اخويا " ابوحميد "

انت asmg وغيرت اسمك ولا ايه ؟

ان كان كده قولي وشكرا

فعلا يا كمبس انا asmg70 والإسم اتغير ل "أبو حميد" مش كده أحسن؟

نورت مصر

شكرا على كلمات منير فعلا في مكانها.

[نورت مصر!!!]

اشكرك اخي ابو حميد بصراحه انا متابع معظم مداخلاتك الجميله وجزاك الله خير

[kokowawa1979]

حقيقة الواحد مش عارف عاوز إيه من الغربة تاني - فالحمد لله أصبح عندي مزرعة كبيرة نسبيا-تم زراعتها بالكامل - وكذلك بيت للأبناء كل له شقة مستقلة ( وهم ما زالوا صغارا ) وكذلك السيارة - ولدينا زوجة هي نعم الزوجات بحق

يعني بفضل الله ودعا الوالدين وصلت إلى هذه المرحلة من بحبوحة العيش ( وأما بنعمة ربك فحدث) .

المشكلة التي أعانيها الآن أنني أرغب في العودة النهائية إلى مصر لكن المشكلة في باقي أفراد العائلة الذين يصرون على أن تستكمل البنت المرحلة الثانوية في الغربة على أمل أن تحصل على مجموع كبير يدخلها كلية مرموقة على حد قولهم !!! ثم ماذا بعد الكلية المرموقة !!!

والمشكلة الثانية أنني وبفضل الله تعالى ودعاء الوالدين أحتل منصبا مرموقا في إحدى أكبر شركات دبي بمرتب يعتبر كبير نسبيا مع مميزات عديدة أهمها على الإطلاق البونس السنوي - وهذا يجعلك تفكر مليون مرة قبل اتخاذ قرار العودة وهذا سبب آخر يجعل الجميع يدفعك دفعا على استكمال ماتبقى لك من حياة هناك !!!!!!!

أما أهم مشكلة تصادفني على الإطلاق فهي أن الأولاد أصبحوا يفضلون الغربة على العودة على الرغم من أن أكبرهم في الأول الثانوي لدرجة أنهم يقولون بأنهم لايرغبون في قضاء الأجازة الصيفية في مصر وهذه كارثة بحق - نعم جميعهم ولدوا هنا - ولا أجد سببا واحدا يجعلهم يفضلون هنا عن هناك خاصة أنهم في الأجازة الجميع يحتفل بهم ويحاولون الترفيه عنهم بشتى الطرق ولكن في النهاية السؤال التقليدى : هو احنا هانرجع إمتى الإمارات !!!!

لقد حاولت مرارا ربطهم بمصر بطرق عديدة - كان أبسطها إذاعة الأغاني الخاصة بمصر داخل السيارة مثل أغاني : عليا وشادية وداليدا - ووجدت استجابة فترة لكن يبقى الوضع كما هو عليه حتى اشعار آخر !!!

من هنا نقول أن الأهل والأولاد يلعبون الدور الكبير في استمرارية الغربة وفي النهاية الغربة كربة!!!