هي الرشوه ....لسه حرااااااام؟؟؟؟

[عازفه على أوتار الذهب]

هي الرشوه ..لسه حرااام ؟؟؟؟

انا بسأل نفسي السؤال ده دائمآ...لأن الرشوه بقت شئ عادي جدآ ....

حتى لو الخدمه دي حقك وحتى لو مظلوم او عندك مشكله...ويا سلام لو وقعت في ورطه وكنت محتاج مساعده تلاقي الايادي بتتمد اولآ لأخذ المعلوم قبل اي مساعده....

(رشوه)انا مش بسميها غير كده يمكن في ناس كتير بتسميها مسميات تانيه...لكن انا مش لاقيه لها غير مسمى واحد....وهو الرشوه اللي حرمها الشرع ...

وحرمها رسول الله صلى الله عليه وسلم...(لعن الله الراشي والمرتشي والرائش)

وياسلام بقى لو مدفعتش او مخدتش بالك يبقى عشان تخلص حاجه لازم يتقطع نفسك...ويا تخلص يا متخلصش...

من احد المواقف اللي مريت بيها...

كنت في آخر سنه دراسيه في الكليه وسقطوني ظلم في احدى المواد العملي يعني لو حضرت تاخد درجات لو محضرتش تسقط وانا كنت عامله كل اللي عليه والماده دي سقوطها بالسنه كلها ؛ طلبت من احد الدكاتره المسؤلين عن الماده انه يساعدني قالي بمنتهى البساطه انت سقطتي خلاص...

المهم قلبت الدنيا رحت للعميد وطبعآ ده كان بعد تدخل (ناس كبيره) وانعقدت لجنه لحل مشكلتي وعلى هذا اكتشفوا سقوط 19 طالب بنفس الخطأ

المهم الدكتور اللي كان رافض انه يساعدني لماعرف ان المشكله اتحلت اتفاجأت انه جاب رقم تليفون بيتي واتصل بيه وقالي انا حليتلك المشكله بتاعتك خلاص(على اساس ان هو اللي يكون ظاهر فالصوره ومكانش يعرف اني جبت وسايط بالمعنى الصريح عشان يحلولي مشكلتي)وفهمني انه عايز مبلغ من المال لانه حللي مشكلتي وكان ده بعد شهر من وقت ما طلبت مساعدته.....

أنا بحكيلكم الموقف ده لأني مش عارفه لما رجل علم وقدوه زي ده يعمل كده يبقى فاضل ايه تاني؟؟؟

والمشكله أن ده بيواجهنا فكل مكان ويمكن كتير مننا واجهتهم المشكله دي....

الوضع مابين ازمه انت وقعت فيها ومابين الحلال والحرام او بطريقه ابسط مبادئك.....

وانا طبعآ مش بعمم كل الناس ورغم وجود الفئه دي برضه لسه في ناس طيبين...

ولسه موجود اللي تقوله شكرآ يقولك ((الشكر لله))....

هي دي العيون المصريه الطيبه...

بس ليه الناس دي قلت جدآ وتقريبآ بدأت تختفي....

السؤال هنا

طيب اللي معندوش فلوس ومعندوش واسطه يعمل ايه؟؟

وليه كل حاجه بقى داخل فيها سلم واستلم؟؟؟...

هل وصلنا لهذه المرحله بسبب السلبيه....؟؟؟

وهل يمكننا ان نسلم ان هذا نوع من الحق ام هو نوع من الاستغلال وإستكمالآ للفساد؟؟؟

ودمتم بكل خير...

تحياتي....

تم تعديل 23 يناير 2007 بواسطة عازفه على أوتار الذهب

[النسر المصري]

انا كنت فاكرك بتسألي سؤال ديني ياعازفه

لكن فاجئتيني انك سألتي السؤالي بداعي السخريه!!!

بصراحة انت عملت موضوع وقفلتيه في نفس الوقت......يعني انت جاوبتي الجواب المنطقي ...وهو جواب مصاحب بتساؤلات ععديده ذو علامة استفهام ضخمة؟؟!!!!

كنت اتعامل مع بعض المواقف الصغيره مع الموظفين في الدوائر الحكوميه..ولما احب اخلص اموري برمي عشره عشرتين عشان انجز.....ووكنت بقول اهم بردو غلابه ودي زي بقشيش.....وهيكون الفرق بينه وبين البقال او الجرسون في المطعم...ماهو اساسا بردو بياخد راتب..بس انت بتسيبله بقشيش عشان خدمك كويس...شمعنه مابنديش للموظفين الغلابة دول (وفي الحقيقة اني كثيرا ما أشك انهم غلابه)

أما فيما يخص بالمبالغ الكبيره ..او الرشوه الحقيقية اللي نديها للدكتور عشان انجح او لمدير المؤسسه عشان يديني الصفقه....او للشركه عشان المناقصه ترسى علي..وما إلى ذلك من تشبيهات......فانا ارفضها قطعا قاطعا مقطوعا

ومن قريب خسرت شركتي الخاصه بسبب اني (ماعرقتش الزبون) بلغة الحرفيين....فقد كنت اصرف على الشركه من جيبي الى اكسب الصفقه المراد أخذها لي.....ولكني فوجئت بان شركه أخرى دخلت منافسه ورمت رشوه من تحت الترابيزه .....ونصحوني الكثيريين بان أزايد عليه في اللي بيحصل تحت الترابيزه..واننا نسيب المكتب كله ونقعد بقى نتخانق تحت الترابيزه...

طبعا قسمت بالله العظيم ان لما يكون ايه يحصل وحتى لو هخسر اللي ورايا واللي قدامي... ولا يمكن حد ياخد مني حاجة غصب عني عشان آخد الحاجة غصبا عن ناس تانيين

وسلكت أمري لله...وخسرت الشركه.....وانشاءالله تتعوض..والله خير المعوضيين

[أبو زياد]

مرض مزمن ... و ابتلاء من بلايا هذا الزمان ...

إن الله قدر لنا فتن كثيرا لابد أن نمر بها و هى مغريات ( حفت الجنة بالشهوات ...)

عندما تدفع الرشوة تجد انها مفتاح سحرى لحل جميع المشاكل ...

ولكنك بذلك تكون وقعت فى الحرام و اللعن على كل من : الراشى و المرتشى ...

حتى لو سولت لك نفسك أو زين لك الشيطان فلن يبارك الله فى شىء لعنه أبدا ... وحاشا لله

وإذا تجنبتها و رفضتها ( معطيا أو قابضا ) وقعت فى مكاره و صعوبات كثيرة ( و حفت النار بالمكاره ...)

وهذه سنة الحياة و حكمة من حكم خالقنا نسأله أن يجنبنا من كل شر

أما عن انتشارها و كونها أصبحت شبه عامة فهو من انتشار الفتن الذى حذرنا منه ربنا على لسان نبيه ( ص )

فلا يجب لهذا الإنتشار أن يغرنا عن ثوابت ديننا بل أن يزيدنا تمسكا بثوابتنا و مبادئنا التى أنزلها الله علينا من فوق سبع سماوات ...

نسأل الله لنا و لكم العفو و العافية و النجاة من عذاب النار

وشكرا جزيلا للأخت كاتبة الموضوع وفقها الله ..

[Sherief AbdelWahab]

كان خالد يوسف غير موفق بالمرة في اختيار اسم "خيانة شرعية" للفيلم وتم استبداله للاسم الأدق والأصح : خيانة مشروعة..

انت ما بتحددش ما هو "شرعي" ، وما هو شرعي مطلق ، أما المشروع فدة شيء نسبي وانت اللي بتحدده..ممكن يكون الشيء المشروع شرعي وممكن ما يكونش..

أنا ماشفتش الفيلم ، لكن فكرته ببساطة إن بعض الناس بتدور على مبرر لعمل أشياء غير شرعية وبتصفها بإنها مشروعة..

ودة بينطبق على الرشوة..

ألف مبرر ومبرر للرشوة بكل أشكالها ، من رشوة الفرن علشان ينقي لك عيش ع الفرازة ، إلى الرشاوي الأكبر والأضخم.. وفيه ناس بتحللها وبتدور على فتاوى تحللها.. عادي خالص..

ولإن فيه ناس شايفين إن الرشوة مشروعة ، حتفضل مستمرة رغم إن كل الناس عارفة إنها فعل غير شرعي..

هذا والله أعلم..

خلص الكلام

[عازفه على أوتار الذهب]

النسر المصري...

ربنا يعوض عليك بالخير ان شاء الله ....

وصدقني بدل افتكرت ربنا مش هينساك ابدآ.....

صدقني لما الواحد بيتحط فأزمه وبيعمل اللي عليه في الحدود.....

ربنا بيفك ازمته وبيفرجها عليه....

ربنا يعوضك خير ان شا ءالله يا رب....

ومتضطرش تتخانق تحت الترابيزه ابدآ يا رب....

***************************

بس ايه موضوع قطعآ قاطعآ مقطوعآ ده :blush:

***************************************

[عازفه على أوتار الذهب]

الاخ الفاضل ابو زياد...

فعلآ هو للأسف نوع من انتشار الفتن اللي لازم نحذر منها جدآ....

وللأسف ان الناس بقت بتستغل اوقات الشده عشان يمتصوا دماء بعضهم...

وعلى ما اذكر انه هيجي وقت ان المؤمن اللي متمسك بدينه كأنه ماسك على جمره من النار...

ربنا يارب يعافينا ويعافيكم من كل شر.....

اتشرفت بمداخلتك جدآ ابو زياد...

وفقنا الله واياك لكل ما يحب ويرضى...

[عازفه على أوتار الذهب]

الأستاذ الفاضل شريف عبد الوهاب....

المشكله مش في اللي بياخد الرشوه...

المشكله في اللي ما بيعترضش على عمل زي ده...

للأسف عشان نوصل لأن الكل يعترض....

قدامنا مشوار طووووويل...وهتقول لمين ولا لمين الكل عايز يمشي حاله....

وده غير ان دي مشكله من 52456 مليون مشكله بنواجها ...

آسفه لو الرقم طلع صغير....

بس احنا مقدمناش غير نتكلم....

وخلص الكلام....

[الحاج فوزى]

فى خلافة امير المؤمنين عمر بن الخطاب جاء عام قحت وفقر ،فكان من الناس من يسرق ليطعم عياله وامرأته فأمر الخليفة بتجميد حد السرقة ( قطع اليد ) حتى مرت الفترة العصيبة

---

لست مع الرشوة بأى حال من الاحوال ، وان لم تكن حرام فلست مع اكل مال الناس بالباطل او اخذ حق غيرى اذا ملكت الثمن

ولكن

فى وقت ، بلغ معاش الموظف اقل من 300 جنيه مصرى .. بعد خصم الايجار والمواصلات والخصميات الثابتة والدروس الخصوصية.. لا يتبقى ما يسد به جوع اسرته

فى وقت ، يرى الموظف الصغير الموظف الكبير يرتشى بمئات الالاف من الجنيهات وهو يبحث عن من يقرضه ليكمل شهرة على خير

فى وقت ، يبلغ معاش عامل النظافة 60 او 80 جنية .. ثمن 2 كيلو لحم ( ان عرف معنى كلمة لحم ) ويجد كل وسائل الاعلام والمقالات الصحفية تنتقد قيام عمال النظافة بالتسول

فى وقت ، يرى الشاب عمره ينتقل من العشرون الى الثلاثون ويزداد عام بعد عام وهو يحلم بغرفة وصالة وفرش وعروسة ولكن احلام يقظة فقط لا غير

وفى وقت وفى وقت وفى وقت ....

المهم

ضع هذا المواطن المطحون والمعجون والـ ....... ، ضعه خلف مكتب وقل له ان فتحت درج المكتب ، قد يلقى لك بعض الناس بعض الجنيهات حتى تسرع فى انهاء معاملاتهم او تغض النظر عن ورقه ناقصة ام تحتاج الى توقيع ..

وقل له ايضاً ...ان الرشوة حرام

سيجيبك بكل بساطة ... "يعنى ايه حرام ؟؟؟!!! :blush: "

حسين

[Sherief AbdelWahab]

أجمل ما في فيلم "المحفظة معايا" مشهد لسمير صبري وهو يحكي لأصدقائه الفاسدين عن صديقه النشال "عادل إمام".. وقال ما معناه : دة بيسرق علشان محتاج ، إحنا بقى عندنا كل حاجة ، بنسرق ليه؟

ليه الكبار بياخدوا الرشاوي همة الأخرين؟

إنها خيانة مشروعة..

بالباء ولا بالنون ولا بالبون.. ما فرقتش..

خلص الكلام

[أبو زياد]

أكرر لك أخى الفاضل شريف أنها مرض

مثل مرض الخيانة - كما تفضلت ..

وليست شرعية أو مشروعة ولكن الكثيرين يحللونها لأنفسهم جهلا أو غفلة ..

فالكثير يقولون : نحن لم نجبر هذا الشخص ليدفع لنا - إنه عرف سائد ...

أعجبنى أحد المهندسين قريبا حين طلب لنفسه عمولة مقابل ترسيته أحد المشروعات على شركتنا ..فبدأنا نحن مراجعة أنفسنا و استقررنا على رفض هذا الإبتزاز و رفض الصفقة ولكن .. قبل أن نعلن له هذا الرفض فقد اعتذر و قال أنه كان يقصد فقط تقليل السعر من أجل شركته التى يعمل بها ....

سواء كان صادقا أو تسرب له أمرا ما فقد وجدت فى فكرته ما يجدر به التأمل وهو أنه كسب مركزا جديدا فى نظر الجميع - سواء من طرفه و من طرفنا و هذا المركز ربما يعوضه أكثر بكثير عما كان يمكن أن يكسبه ...

مجرد تأمل - الرشوة و العمولة ما هى إلا فراغة عين لا أكثر - و الإنسان الشريف لا يستوى أبدا مع الإنسان الخسيس مهما دارت و تغيرت الظروف و المسميات .

[عازفه على أوتار الذهب]

الاخ الفاضل حسين...

عجبني جدآ ذكرك لوقت خلافه امير المؤمنين عمر ابن ابي خطاب رضي الله عنه وارضاه...

وذلك تحقيقآ للشريعه الاسلاميه التي يمكنها أن تحد كثيرآ من المشكلات التي نمر بها بل هي حل قاطع لأي مشكله....

وقد كفيت ووفيت بذكرك للظروف العامه التي يمر بها مجتمعنا...وأزيد على ذلك غلاء الاسعار

الذي انهك قوى كثيرآ من الناس امام مغريات الحياه الماديه....

وللأسف ايضآ هنا لا اقدر ان اسميها مغريات ولكن يمكن ان نسميها (إستمرارآ للمعيشه).....

وكما ذكر الاخ شريف وابو زياد انها خيانه بكل ما تحمله من معنى وتحليلها اصبح شئ سهل...

لكن هل نقدر فعلآ على مواجهة هذا الطوفان الجارف انا وانت وغيرنا من آلآف المعترضين...

اللهم ازح الهم والغم عن الامه...اللهم فرج كروبنا....ولا حول ولا قوة الا بالله العلي العظيم...

[أبو زياد]

أختى العزيزة .. إخوتى الأعزاء

واجبنا للأسف - لأنه واجب صعب ..

أن نحفظ أنفسنا ..

وكما قلت انه مرض .. ربما تتطلب الوقاية منه اعتزال الناس أو الوقوف أمام التيار ...

ولكن لابد أن نفعل ذلك حتى لا نصاب بالمرض القاتل ..

نسأل الله أن يجعل لنا الوقوع فى الإثم كالوقوع فى النار ..

وأن يحبب إلينا طاعته كما يحببنا إلى الجنة ..

[الحاج فوزى]

الاخت عازفه على أوتار الذهب

اللهم امين

حسين

[عازفه على أوتار الذهب]

أختى العزيزة .. إخوتى الأعزاء

واجبنا للأسف - لأنه واجب صعب ..

أن نحفظ أنفسنا ..

وكما قلت انه مرض .. ربما تتطلب الوقاية منه اعتزال الناس أو الوقوف أمام التيار ...

ولكن لابد أن نفعل ذلك حتى لا نصاب بالمرض القاتل ..

اخي الفاضل ابو زياد...

أؤيد معك جدآ تسميتها بمرض وهو مرض العصر الذي يأخذ في الأنتشار دون توقف وللأسف دون علاج....

ولكن وكما قلت اننا يمكننا الوقايه منه واتمنى ان لو ان الجميع يعترض قولآ وعملآ....

نسأل الله أن يجعل لنا الوقوع فى الإثم كالوقوع فى النار ..

وأن يحبب إلينا طاعته كما يحببنا إلى الجنة ..

لنا ولكم ان شاء الله تعالى أخي أبو زياد والأخ حسين...

اللهم آ مين ...

تم تعديل 24 يناير 2007 بواسطة عازفه على أوتار الذهب