رحلة روخيوصة .. لزيارة معالم المحروسة

[se_ Elsyed]

والله الجزء الأخير جاهز معايا لكن أنا إبن كار وبأفهم في الأصول

فعندما وجدت إخواننا سكوربيون وموديست في بدايات حياتهم القصصية وكل واحد نزل بحته كوميدي .. قلت مش عايز أحرقهم في السوق وأشجعهم وأخليهم ما يكرهوش نفسهم لما يوضعوا في موضع مقارنة مع أديب عملاق زي سين سين ..

بس سكوربيون حالة خاصة لإن البرطمان بتاعه هاياخد وقت ... ده لسه يابا في بداية حياة عبدو بريمه وحليني على ما يخلص .

أما موديست فأمامه 24 ساعة لو ماخلصش خطة الندامة بتاعت سرقة المدرسة فهاضطر أنزل بالحتة بتاعتي ... ده أحنا لو كنا بنسرق وزارة التربية والتعليم كنا زماننا خلصنا ..

تحياتي لكل السميعة القدام وعشاق الفن الأصلاني

[se_ Elsyed]

الـ 24 ساعة خلصوا يا موديست

أنا أسف مضطر أحرق الفيلم بتاعك واخليه ما يجيبش تلاته جيني إيرادات في اليوم ... أنا حذرتك من اللعب مع الكبار ------------

خش عالتقيل

وبينما كانت موسيقى باند ام المصريين تصدح في أرجاء المكان ... والست ألمظ الشهيرة بسيوا تُغرد كانها بلبل نواح إذ بوليد يصرخ : إلحق يا اونكل ثين ثين ... إلحق يا أونكل ثين ثين .

سين سين : إيه يا وليد المركب غرقت ؟

وليد : يا ريت مانا بأعرف أعوم وماكانتش هاتبقى مشكلة ..

سين سين : أصيل يا وليد ... طب شكوكو مات ؟

وليد : التيتشر بتاع العلوم قال لنا إن الإنسان يموت مرةً واحدة .. و شكوكو أساساً ميت قبل كده

سين سين : إرحمني انا مش ناقصك وقول في إيه ؟

وليد : في مركب قراصنة رافع علم إسود بجنجنتين وجايه من بعيد .... آه وكتاب الله

سين سين : هأ هأ هأ ... يادي أفلام الكارتون وألعاب البلاي ستيشن اللي بوظت مخ الأولاد .

وليد : والله العظيم يا أونكل دول قراصنة ... وتعالى شوف بالنضارة المعضمة

سين سين : معضمة ؟!! آه والله دي معضمة صحيح ... يا نهار إسود يا نهار إسود .. دول قراصنة بحق وحقيق ... الله يخرب بيتك يا شكوكو إنت مودينا القناطر ولا الكاريبي ؟ إنزل إتأكد من البوصلة كده يا وليد وشوف إحنا فين دلوقت يا حبيبي ؟

وليد : بوصلة مين يا اونكل ده احنا ماشيين بالبركة .. هي المتلوفة دي فيها بوصلة ولا دفة حتى .

نورا : مش قلت لك يا إيناس " انا خيفه خيفه "

إيناس : تصدقي بالله يا نورا ؟ أنا لو أعرف إن تؤمتي معاكي هاتجيب لي البلاوي دي ماكنتش وافقت على إتفاقية التؤمة دي من الأول

سين سين ممسكاً بكوز السلمون المخروم وموجهاً كلامه للجميع : أرجو الإنتباه .. ألو 1 2 3 ... إخواننا بتوع المزيكا ياريت يبطلوا شويه او يدوقوا لنا حاجه حزايني ..... إحنا للأسف يا جماعة بنتعرض لمحنة طارئة تتمثل في وجود غزو قرصاني على مركبنا ... والقراصنة جايين بمركبهم ناحيتنا على بُعد 30 فرسخ ..

زُهيري : طب ومين اللي قالك إنهم جايين ناحيتنا ؟ يمكن رايحين مشوار او طالعين طلعة بعيد عننا .

سين سين : يا اخ مزاهيري لو سمحت مش عايز فلسفة ... النيل ما فيهوش مركب توحد ربنا غير بتاعتنا .. وبأقولك الناس جايين ناحيتنا ... تفتكر جايين يسلموا علينا أو يتشمسوا معانا في الكناطر ؟

ياسو : وهنا يندفع ياسوفيناس خارجاً من الحمام الذي كان بداخله من أول الرحلة .... بتقول إيه ؟ قراصنة ؟ أودييييكي فين يا صحة ... طب الله يكرمك يا سين سين ومن غير لوك لوك كتير .. إمسك الكوز المخروم بتاعك ده وأقف على حافة المركب زي تيتانك كده وقولهم بعلو حسك إن ياسو موجود على المركب دي ... وبس

سين سين مستغرباً : يعني سيادتك محمد أبو تريكه اول ما أقولهم إسمك هايخافوا ويكشوا وياخدوا بعضهم ويقولوا مش لاعبين يعني ولا نهارك لونه إيه بالظبط ؟ ياسو .. أنا مش ناقص فنجرت بؤ .. أنا معايا 50 راس عالمركب وأنا مسئول عنهم .

ياسو : يا سين سين باشا أنا بأكررها لك .. أقف على أول المركب وقول اللي بأقولك عليه .

ويئساً يمتثل سين سين ويفعل ما أمره به ياسو وإذ بالقراصنة يطلقوا في إتجاهه 21 طلقة مدفع ...

سين سين : الله يخرب بيت اللي يسمع كلام العيال .. عاجبك كده يا فقري .. كنت هاتعور أهو ياخويا ؟

ياسو : مالحظتش إن دول 21 طلقة يعني مش 22 ولا 20 ؟

سين سين : إنت هاتشتغلي تحليل وتفصيل .. ما تقول إنت عايز إيه ؟

ياسو : يابني أدم دول بيحييوك

سين سين : بيحييوني ؟!!! أومال لو كانوا عايزين يموتوني كانوا عملوا إيه ؟ ياسو مش عايز فلسفة كتير .. تقدر تعمل حاجه قوول .. مش هاتقدر البحر قدامك أهو وماتورنيش وشك .

ياسو : يا سين سين أني مش بنحبو نتكلمو عن نفسي كتير .. اللي قدامك ديه .. إسمه بيرعب القراصنة وبيخليهم يعملوا عيشه ..

فلانه : يا أخ ياسو بليييز ممكن تقولنا طريقة عمل العيشة ؟ أصل الأولاد طلبوها مني ديك النهار على أساسا ياكلوها وهما بيذاكروا فأتحرجت وماعرفتش اعمل إيه . روحت عملت لهم قرع عسلي ورسيت عليه شويه قرفة وجوز الهند وقلت لهم دي عيشه ياولاد ... بس إنت عارف إن البنت بنتي الصغيرة اللي في جريد سفن أروبه وعارفه كل حاجة - تعليم أمريكاني بقى عقبال أحفادك - فأول ما ضربت أول معلقه قالت لي : مامي يو ار شيتينج مي .. زيس إز نوت إيشه ... زيس إيز هوني كرع .. فاتحرجت ووشي بقى مالتي كلر ..

سين سين : فلانه ... إحنا مش في برنامج طبق اليوم إركني على جنب أو أستخبي لك ورا أي شكارة أسمنت مش ناقصاكي هي

فلانه : إنت دايماً مكسر مقاديفي كده .. إخص عليك

سين سين : أهو الحمد لله المر د ي اللي هايكسر مقاديفنا هما القرصنة ... إسكتوا شويه خلينا نسمع ابو اسكندر الله يكرمكو .

ياسو : اني مش هانعطلوك كتير وهانحكولك على حكاية على السريع حصلت الأسبوع اللي فات .. عشان تعرفو مين أبو أسكندر .

سين سين : قول يا عم البؤ ..

ياسو : ديك النهار جيت على العصرية كده وحسيت إني مخنوق وصدري طابق عليه وكإن في بنادورة رصيف مركونة على قفص صدري

زهيري : يا كبدي يابني ... كمل وبعدين

سين سين : يا عم زهيري الراجل مش بيحكي همسة عتاب .. سيبو يكمل وما تقطعوش في الليلة اللي مش فايته دي .. كمل يا عم الحساس

ياسو : قولت بس .. أني نعدو على الولا حمو إبن خالتي – مانت عارفو – ونطلعو بالفلوكة نتمشوا شوية في أبو قير

سين سين : حاسب يا أسطى ... أولاً أنا ما أعرفش حمو .. لسبب بسيط .. وهو إنه مش محافظ إسكندرية أو حتى مأمور قسم اللبان فيبقى شخصية عامة ومعروفة ... ثانياً .. تاخد الفلوكة إزاي وتتمشى في ابو قير ؟ هي الفلوكة دي إيه .. ضفدعة بتمشي في البحر والبر ؟

ياسو : عديها يابو الأسيان وسيبني اكمل ؟

سين سين : كمل يابا و أنا ماسكك .. بس إنجز الله يكرمك الناس قربوا خلاص

ياسو : المهم نزلنا البحر وفضلنا ناخد وندي في الكلام .. قول المغرب دخل علينا بأبص بطرف عيني كده لقيتنا قربنا من اليونان .. طب نعملو إيه ونسوو إيه خصوصاً وإني نسيت البازابورت في جيب الجاكت النبيتي – مانت عارفو – وكنت ماشي بوصل النور ... عنها و الولا حمو قالي احنا نلفو ونرجعو تاني ومش عايزين نعلو شبطه مع خفر السواحل وإنت عارف اني عليه مراقبة 3 سنين ... يادوب بنلفو يا سين سين إلا ونلاقو لك 3 مراكب قراصنة محوطينا من كل مكان آه وكتاب الله ...ولا لك عليه يمين يابو الأسيان أني ما تهز لي رمش .. روحت قايل للولا حمو : ولا يا حمو .. إمسك يا ولا مقداف وأنا مقداف واللي يقرب مننا نلوشه .. وفعلاً .. قدرنا نتفادى كام طلقة مدفع رموهم علينا .. ويادوب هما قربوا إلا وفين يوجعك طاخ طيخ طوووخ

سين سين : طووخ دي عارفها .. دي في القليوبية ... صح ؟

ياسو : إلا وخلال ربع ساعة بعون الله كومناهم زي الفرخ ورحنا رجعنا تاني بالسلاميه روحنا قعدنا على قهوة بحري وضربت لي حجرين معسل وروحت البيت نمت زي رجل البنطلون من كتر التعب ...

وجدي : أنا شوفت الفيلم ده قبل كده ... حتى بالامارة كان إسمه pirates in the darkness بطولة كيفن كوستنر والنجمة العالمية رونالد ودي كابريو ...

بنت النيل : مش عايزين تريقه وكلام كتير ... الجدع ديه بيتكلم صح واني شاهدة على كيده

سين سين : إزاي يا ست الكل وإنتي من بورسعيد وهو من إسكندرية ؟ قصدي إيه لم الشامي عالمغربي ؟

بنت الليل : أني نقولوا لك .. ديك النهار ..

سين سين : يادي ديك النهار ده ... هي العشة اللي عندكو وحابسين فيها فيها النهار دي كلها ديوك؟ يعني مافيش عتقية أو فراخ بياضه هأ هأ .. ده إحنا ليلتنا أسود من أيام مبارك ... كملي يالله إن شالله ماحد حوش بلا قراصنة بلا نيله

بنت الليل : المهم ديك النهار كنا قاعدين أني وإبن النيل في التراسينة بنشربوا الشي وفجاة راح قايل لي : يا بنت النيل أني نفسي هفتني على صينية شبار بالباربوني .... قلت له طب ونجيبولك الحاجات د ي منين والحلقة قفلت دلوقت .. قالي .. إتصرفي إن شالله تنزلي كارفور اللي في المعادي تشتري لنا سمك مجفف .. قلت له : فشر مش بنت النيل اللي تشتغل في المعلبات ... إيه رأيك ناخدو الفلوكة ونطلعو اليونان دلوقت سريع سريع ونستغل فرق التوقيت ونخطف لنا قد إتنين تلاتة كيلو شبار على نص براربوني .. وأهو إن شاء لله نلحق الوليا أم ماريكا اللي بتقعد في حلقة السمك بتاعت اتينا قبل ما تروح .. قالي لي: والله فكره .. يالها بينا .

رمضان : عفواً سؤال بس .. هي الفواليك اللي عندكو دي إيه .. أسرع من الصوت ولا إيه النظام ؟

بنت النيل وكأنها لم تسمع شيئاً : المهم نص ساعة تقديف وصلنا اليونان .. قلت لإين النيل خليك إنت هنا عشان المرور ما ياخدوناش مخالفة صف تاني واني هاننزلوا نخطفوا الحاجة ونرجعو قوام قوام ... ولا ليك عليه يمين يا سين سين .. لحقت الوليه أم ماريكا وهي بتلم الفرشة بتاعتها وأول ما شافتني هاتك يابوس ويا احضان المهم خطفت الحاجة وجري أحسن إبن النيل يستعوقني ..

سين سين : سيبك إنتي ده اللي بيحصل لك ده كله عشان نيتك طيبة وربنا مش عايز يخلي إبن النيل ينام وهو نفسه في الباربوني ... صحيح ياولاد ... ولاد الحلال ماخلوش لولاد الحلال التانيين حاجه ... كملي يابنت النيل أحسن كلامك خلا نفسي هفتني على القراميط ..

بنت النيل : المهم وإحنا راجعين ومعانا البربوني والشبار بأبص كيده بطرف يعني إلا وألاقي غبره وعفره في نص البحر ....مين ديه يا ولاد ؟.. إلا وألمح ياسو من قفاه وهو ماسك المقداف ونازل طحن في القراصنة يمين شمال وبالروسيات وبالشلاليت ...

سين سين : إنتي هاتقوليلي .. حاكم قفا ياسو الواحد يطلعه من بين 100 قفا ... كملي

بنت النيل : بس يا سيدي لقيت إبن النيل بيقولي .. ما تيجو نساعدو ياسو في العركة دي أهو برضوا إبن بلدنا ولازم نقف جمبو ... قلت له .. نساعد مين يا جدع ده ياسو ياكل 10 مراكب قراصنة بناسهم ... وبعدين إنت ناسي إنا السمك ماعلهوش تلج وممكن يبوظ لو ملحقناش نروحو بورسعيد قبل العتمة ؟

يُتبع

[بنت النيل]

السلام عليكم من مركب المعركة والدفاع

انا طول الرحلة وانا ساكته مش عوزة اكلم بس اعمل ايه كان لازم بقى اقول واقول واكلم

اومال يعنى اسيبهم يكدبوا ياسو فى حاجه انا شفتها بعينى لاء طبعا وحياتك يا ياسو ولك عليا يمين

انا هقول كل اللى حصل ولو على رقبتى اطمن انا كلمتى ما تنزلوش الارض ابدا

هو انا انسى ولا انكر وقفتك معايا ,, طب انا هقولكم على موقف من مواقف الجدعانه اوى اللى عملها معايا ياسو

يوم ما كنت بكلم مع الواد اللى عميلى فيها امريكانى ومسمى نفسه جورج

لما عزمناه على القهوة على واحد شاى فى الخمسينة وقلنا له احنا هنبسطوك على الاخر وبقوله تصدق ان الكرسى اللى انت قاعد عليه ده كان قاعد عليه من كام يوم عباس وشارون وبيشربوا الشاى معانا وكدبنى وساعتها قلت لك تعال يا ياسو حصل الكلام ده ؟؟

قلتلى حصل قدام عينايا واشهد على كدا

قلتله طب بلاش دى عارف بعد منها مين كان قاعد على نفس الكرسى ده ؟ قال مين ؟

قلت له الحاج مبارك والواد جمال بيتفقوا على الفرح والمعازيم ،، قالى لا مش معقول وكدبنى

قلت تعالى يا ياسو حصل الكلام ده ولا انا بكدب ؟ قلتلى حصل على يدى وقدام عينى

قلت طب مش مصدق كل ده ؟ طب ايه رأيك ان الكرسى ده كان قاعد عليه امبارح بس "ابولهب و صاحبه "

قالى لاء كدا وسعت مش معقول

قلت له مش مصدقنى طب تعالى يا ياسو حصل الكلام ده ولا لاء ؟

ساعتها رد ياسو وقالى بصراحة انا مشفتهمش بس شفت اتنين شبح ركنين بره القهوة مكتوب عليهم

" ملاكى قريش "

شفت بقى معقول كل ده وعوزنى اسكت وخلى حد يكدبك ؟ يا خراشى يا دى الكسوف

ده حتى تبقى عيبه

تم تعديل 4 أبريل 2007 بواسطة بنت النيل

[Ahmad Farahat]

يا عم سين سين.............

آخر مرة اديتني جملة واحدة...........

المرة دي كنت فين.........

مش ممكن كده بجد...........

بعدين أنا أجري على الحلقة صغير مش زي اللي بتقبضه لوليد وسيوة وياسو............

دي هيه كوباية عصير قصب..........

وكمان صغير.............

كبر دوري شوية............

[واحد تاني]

ياسو : المهم نزلنا البحر وفضلنا ناخد وندي في الكلام .. قول المغرب دخل علينا بأبص بطرف عيني كده لقيتنا قربنا من اليونان .. طب نعملو إيه ونسوو إيه خصوصاً وإني نسيت البازابورت في جيب الجاكت النبيتي – مانت عارفو – وكنت ماشي بوصل النور ... عنها و الولا حمو قالي احنا نلفو ونرجعو تاني ومش عايزين نعلو شبطه مع خفر السواحل وإنت عارف اني عليه مراقبة 3 سنين ... يادوب بنلفو يا سين سين إلا ونلاقو لك 3 مراكب قراصنة محوطينا من كل مكان آه وكتاب الله ...ولا لك عليه يمين يابو الأسيان أني ما تهز لي رمش .. روحت قايل للولا حمو : ولا يا حمو .. إمسك يا ولا مقداف وأنا مقداف واللي يقرب مننا نلوشه .. وفعلاً .. قدرنا نتفادى كام طلقة مدفع رموهم علينا .. ويادوب هما قربوا إلا وفين يوجعك طاخ طيخ طوووخ

سين سين : طووخ دي عارفها .. دي في القليوبية ... صح ؟

ياسو : إلا وخلال ربع ساعة بعون الله كومناهم زي الفرخ ورحنا رجعنا تاني بالسلاميه روحنا قعدنا على قهوة بحري وضربت لي حجرين معسل وروحت البيت نمت زي رجل البنطلون من كتر التعب ...

على يدي ... حصل الكلام ده ... ودم القراصنة طرطش عليا أني والسمك واحنا فوق البلانص فـ نص المالح :)

[Folana]

السلام عليكم ورحمة الله ....

لا حول ولا قوة الا بالله.....يعنى انت يا سيد سى السيد ماتفتكرنيش الا وهى المركب بتغرق..!!! :) عجبت لك يازمن..

نزلنى هنا....اركن المركب انا حانزل هنا.... :lol:

(احترس المركب ترجع الى الخلف...احترس المركب ترجع الى الخلف )....... :blink:

صباحكم جميل ....md2: :blink:

[se_ Elsyed]

الحتة الاخيرة

------

س س : يا اخ ياسو .... قصر الحوار في عرضك العدو عالابواب ..... وليد ... الاعداء على بُعد اد ايه دلوقت ؟

وليد : سيدي الكونت الاعداء على بُعد 80 فرسخ تحت الماء ...حووووووووووووووول

س س : من الاخر يا بو اسكندر ممكن تقدم ايه للمحاورات ؟

ياسو وهو يٌطرق رأسه لأسفل : المحاورات ؟!!!!!!!!! المحاورات ؟ انت ضربت عالوتر الحساس يا اخ سين سين ، المحاورات هي بيتي .................. المحاورات هي حياتي .... وهنا يقترب موديست ممسكاً نايه الحزين ويعزف مقطوعة تتناسب مع درامية الموقف ( بالتحديد كانت مقدمة برنامج العلم والايمان .. اصلي كنت كل ما بأسمعها اقعد اعيط ) .. ويستطرد ياسو في كلامه عى خلفية مقطوعة موديست ... أنا كنت مسافر في الصحرا ومشاوري طويل ... مشاوري طويل ... جت المحاورات عملت لي قيمة وبأبيع مناديل .. وبأبيع مناديل .... انا هاعمل اللي ماتعملش عشان المحاورات يا سين سين ... وبعون الله لوحدي ... يعني آلون

س س : لوحدك يا ياسو ؟

ياسو : لوحدي يا سين سين ومن غير غرور ... بس لو سمحت خد الناس كلها واستخبوا في اخر المركب عشان ما يشوفوش طرطشة الدم اللي هاتحصل .. واديني بس نص ساعة وتعالى شوف النتيجة

س س ممسكاً كوز السلمون موجهاً كلامه للمجاميع : لو سمحتو يا جماعة الكل يتجمع في اخر المركب ويستخبى له ورا أي ساتر

ومضت نصف ساعة واكثر

نانو : ايه يا عم سين سين .. يعني فاتت ساعة الا ربع واحنا مقرفصين ورا شكاير الاسمنت دي وولا حس ولا خبر من الاخ ياسو ؟

س س : مش عايز تقطيم يا ست نانو ... ان مش مغسل وضامن جنه ,,,, قوم يا وليد شوف ايه اللي بيحصل قدام

وليد : الله بقى يا آ بيه ... كل حاجة وليد وليد .. هو هاتبقى انت والبيت عليه ؟

س س : معليش يا وليد .. دي ضريبة الصغيرين يابني .. هما اللي يروحوا الفرن والبقالة ويجيبوا طفاية السجاير ... مرمطه يابني بعيد عنك .. ثم يذهب وليد لمدة 10 دقائق ويأتي بالخبر اليقين

وليد : الحق يا آبيه .. الحق يا آبيه

س س : ايه الوحش خلص عالجبابرة ؟

وليد : وحش مين وجبابرة مين .. ده انا دورت على اونكل ياسو في كل حته مالقتهوش .. المهم افتكرت ان ده ميعاد معجون السنان بتاعي ..فروحت الحمام اغسل سناني عشان مامي ماتزعلش مني لما اروح وتفتش على ضوافري وأسناني ... المهم ببص كده لقيت آبيه ياسو قاعد بيعيط في الحمام

س س : ده ياجماعة طبعاً متولد من شعوره بالذنب لكمية الدم اللي هاتطرطش أثناء معركته مع الجبابرة

وليد : لأ يا آبيه .. د هانا لقيته عمال يقول انا ايه اللي خلاني انسحب من لساني ... انا احسن حل ارمي نفسي من الشباك واخدها عوم لحد الشط لا من شاف ولا من دري ... كل ده يا اونكل من غير ما يعرف اني سامعه أصل كنتي مستخبي ورا الباب

رمضان : يا حلاوه يا حلاوه ... قابل يا حاج سين سين .. حلها يا حلال العُقد

س س : هاحلها يا رمضان وهاتشوف .... زهيري ... يا زهيري

زهيري : نعمين يابا الحاج

س س : اجمع لي مجلس الحرب حالاً دلوقت

زهيري : مجلس الحرب ؟!!!!!!! انا اكثر حاجه اعرفها يابا هي مجلس الاباء ..وده باروحوا لما بأكون متأخر في دفع مصاريف مدارس العيال

س س : يا اخي طب اسأل الناس اللي معانا مين فيهم دخل الجيش ؟

موديست : انا ....... انا بلا فخر كنت في فرقة الموسيقات العسكرية ، كتيبة الات النفخ لمدة سنيتن

رمضان : وانا ... انا قضيت 3 سنين تجنيد في كانتين الوحدة 9 في السويس لما وزني وصل 140 كيلو ...

زهيري : وانا مادخلتش الجيش بس شفتو فيديو

داروين : وانا زي مانت عارف كنت احد ابطال حرب 48

واحد تاني : أما انا فمابحبش أتكلم عن نفسي ... محسوبك قضى سنة جيش في السلوم كلها في خدمة السور .. الله الوكيل ما نزلت من عليه إلا عشان أسلم المخلة ...

آرسين روبين : انا لسه بأدرس في الجامعة لكن انا في فريق الكشافة بقى لي 3 سنين وياما خُضنا معارك شرسة ( في العاب البلاي ستشين ) ضد أعداء الوطن

س س : شيء هايل جداً ... احنا دلوقت في ظروف حرب .. وعشان انا المسئول عن الرحلة وواخد من كل واحد 5 جيني فهاكون انا كومندان المعركة .. ومش عايز حد يندهلي الا ويقولي : يا سعادة الكومندان المهم

زهيري : المهم ... هاتطلعنا من المصيبة دي ازاي .. يا عم الحكمدار ؟

س س : ..الأول لازم نظبط وضعنا الميداني في أرض المعركة ... وليد قرب من ودن شكوكو وزعق بصوت عالي وقوله يحود بالدفة 180 درجة يمين وبعدين يُرد 120 شمال ويمشي بسرعة 200 عقده في الثانية لمدة نص ساعة وبعدين ينزل الشراع .... وفي الأخر يرمي الهلب وينزل قوارب النجاة – اللي أساساً مش موجوده - فهمت حاجه ؟

وليد : لأ طبعاً

س س : عظيم ... داروين .. عايز تقرير فوري عن المؤن الحربية اللي عندنا والاسلحة والاغذية والحالة المعنوية .. ووضع الجبهة الداخلية والخارجية بشكل عام

ويغيب داروين 5 دقائق ثم يعود

داورين : سعادة الجنرال اركان حرب .. اليك التقرير التالي :

الاسلحة المتوفرة عبارة عن : عصايتين مقشة .. شبشبين فردة وفردة ... جزمة حريمي من غير رباط

التموين : ساندوتشين طعمية حمضانين .. شوية تفل شاي فاضلين في قعر كوباية .. وكيس سداني تعود ملكيته الى نورا وايناس

الحالة المعنوية : زفت ... الحريم في حاله هلع وبكاء ولطيم .. والرجالة عاملين زي اللي غرق غيطهم ومش عارفين يتصرفوا إزاي

س س : هايل .. دي بشاير النصر يا رجالة ... اندهلي بقى مجلس الحرب وتعالوا نقعد قعدة رجالة ندرس البدائل والحلول لمواجهة هذا الجيش المهول في ذلك اليوم الموحول خاصة ان معانا جيش مبلول ..

موديست : انا شايف اننا نقسم نفسنا نُصين .. نص حريمي ودول نسيبهم في المركب ... ونص رجالي واحنا معاهم وناخد بعضنا وننط من المركب ونسيب الحريم يواجهوا القراصنة

وهنا تتدخل فلانه التي كانت ترمي ودناً على الاجتماع : والله عال .. يعني الرجالة امات شنبات ينطوا من المركب وينفدوا بجلدهم ويسيبوا الستات الغلابة المكسورين الجناح يواجهوا الخطر ؟!!!!!! شيء عظيم وهي دي الرجولة فعلاً ... يا عيني على رجالتك يا مصر

موديست : يا اخت فلانة انتي فهمتيني غلط ... انا مش قصدي ان احنا نهرب .. انا قصدت اننا نحرج القراصنة فهما لما هايهجموا عالمركب ويلاقوا ان عليه ستات بس يقوموا يتكسفوا ويولوا الادبار ، نروح احنا راجعين ومروحين بالمركب وانتوا معانا

س س : موديست ... ممكن تسكت عشان سيادتك هاتشلني بأدبك الزايد عن الحد ده .. انت فاكر القراصنة دول هايهجموا عالمركب وهما لابسين اسمكون وبيدخنوا سيجار زي الجنتل مان وبعدين لما يشوفوا الستات هايتكسفوا ويقوموا ماشيين ؟

أرسين لوبين : إنتوا تاعبين نفسكو ليه ؟ أنا عندي الحل .. وحل أكيد كمان

س س : يا عم قول نشقت ريقنا .... أعمل حاجة حلوه في حياتك يا آرس ده أنت أيام في الحياة بقت معضوضه

أرس وهو يخرج غليونه العاجي ثم يملؤه تبغاً ثم يُشعل عود ثقاب ببطء شديد : في الحكيكة .. أنا شوفت فيلم سينيمائي إسمه " تمرد على السفينة باونتي " بالظبط كان نفس الأحداث ... وده كان في سنيما نورماندي الصيفي في شهر ايلول الماضي وساعتها كنت خارج أنا وأصحابي وأكلنا فشار وضربنا كبده و

س س : لا إله إلا الله .. يابا قصر بلا كبده بلا سجُق ... المهم حصل إيه ؟

أرس : أبداً .. القراصنة الشريرين هجموا على سفينة الناس الطيبين ودبحوهم بالسكاكين و

س س : بس ما تكلمش ... فال الله ولا فالك يا أخي ... أركن يا أرس على جنب ناشف هانحتاجك في سناريو تاني

داروين : يبقى ما فيش قدامنا حل غير .......... العمليات الاستشهادية ... احنا نستضنف واحد مننا ويقوم بعملية جرئية يفجر فيها القراصنة واللي جابوهم ... ثم يدور داروين بناظريه بين الحاضرين ناظراً اولاً في اتجاه حزب النساء

نانو : والله عال ... يا اخي عيب .. والله عندك حق يا فلانة .. يعني يبقى عندنا كوم رجالة يسدوا عين الشمس وبعدين في الاخر يدوروا على واحده ست هي اللي تقوم بالعملية

داروين : والله ما قصدي يا اخت نانو .. انا بس بابص ناحيتكو وعايزكو تدعوا لنا ... ثم يتجه بنظره الى وليد ...

وليد : لأ حرام عليكو .. ده انا لسه مادخلتش دنيا ,, وبعدين ماما تزعل مني لو مُت من غير ما أستأذنها ... حرام عليكو انا لس صغنن وقتل الاطفال حرام كمان طبقاً للدستور المتفصل جديد

وهنا تدمع عيني داورين ويتذكر أولاده الصغار والمستقبل الباهر الذي ينتظرهم ...... ثم يتجه بنظره نحو

نحو

زُهيري ... ويصيح داروين : على بركة الله .. إذاً ما إلها الا زُهيري

زهيري : ليه واشمعنى انا ؟ ولا عشان اطول واحد فيكو فهاتحقدكو عليه ؟

داروين : بص يا مزهوراتي يا حبيبي .. احسبها بالعقل وبالورقة والقلم ... انت خلاص اخدت التأشيرة ورايح ايران .. يعني ون واي .. واحتمالات تفييصك بتتعدى الـ 90 % .. يبقى تموت وسط اهلك وناسك وتلاقي اللي يدفسك .. قصدي يدفنك؟ .. ولا تموت في دولة الفُرس وتحت وطأة الضربات النووية وممكن مانلاقيش فيك حتة سليمة ندفنها ؟

زهيري : والله كلام معقول

داروين : وبصراحة إحنا كنا محضرين لك مفاجأة مش هاتصدقها

زهيري : ايه هــا .... ايه هـــا ؟ انا بأموت في المفاجأت

داروين : في حالة استشهادك يا سيدي ادارة المحاورات هاتهديك شقة اوضة وصالة في مساكن قلعة الكبش بإيجار رمزي

زهيري : مين رمزي ده ؟

داروين : ما تدقش ... قلت ايه ؟

س س : انا فعلاً حاسس ان زهيري هو اكتر واحد ملائم لتلك المُهمة ... بس هايفنجر نفسه ازاي يا داروين ؟

داروين : انا عامل حسابي ... الولا شكوكو بيشيل معاه دايماً جركن جاز عشان لو المركب شحطت منه في السكه .. إحنا نجيب الجركن ده ونلغم طبه زهيري ونحطه على أول المركب وأول ما مركب القراصنة تقرب نروح زقينه عليهم في نفس الوقت نكون مجهزين شُعلة نار نروح حادفنها عليه .. يقوم مولع في القراصنة وفي مركبهم ولا من شاف ولا من دري .

س س : الله عليك تسلم رجليك يا حبيب والديك ... على بركة الله .. هات الجركن يا وليد عشان نلغمط زهيري .

وليد : حاضر يا آبيه ..... يا نهار مش فايت .. الجركن ما فيهوش إلا بؤ جاز يادوب يكفي نلغم طبه دماغ آبيه مزهوراتي ...

س س : يادي الحظ ياربي ......

وفجأة .... تحدث جلبة وهرج ومرج وصريخ وعويل ...

شكوكو : إلحق يا أسطى سين سين اليهود هجموا عالمركب ..

س س : يهود !!!!! ما هي رحلة باينه من أولها يا أبا الحاج شكوكو أصلها وشوش وأعتاب بعيد عنك

وفجأة يقفز العديد من القراصنة على الباخرة المحروسة ... ثم يدور هذا الحوار

زعيم القراصنة : مساء الخير يا قمامير ... حذروا فزروا مين معاكو النهاردة ؟!!! ... أولاً أحب أعرفكم بنفسي ... أنا إسمي " برغوت البحر " عين أعيان قراصنة المحيط البسفيكي .. والاطلسيكي ونسيب عائلات بُرعي الاكوع زعيم قراصنة المحيط الهندي .... وقلت أخد الأولاد نفرجهم على مصر والكناطر الخيرية وأهرامات الجيزة وكده .. وعشان أجيب مصاريف الرحلة قلت أقلب لي كام سفينة وأمشي إيدي بدل ما تصدي ... قولوا لي بقى .. مين التخين هنا ؟

وبصوت يملؤه الغل والكبت ينطق الجميع في صوت واحد : هو الولا سين سين ده يا باشا أتخن واحد هنا وهو اللي منظم الرحلة ولامم مننا الفلوس ومعكمهم على قلبه وهو اللي مخطط لكل حاجه يا باشا وإحنا مالناش ذنب ...

س س : ونِعم الأصل ... ماشي يا محاورتيين .. طب كل واحد في الرحلة دي هاياخد إنذار عالريق .... أولاً يا سعادة البرغوت الكلام ده كله عارٍ تماماً من الصحة والدليل على ذلك ... بص لعودي كويس وشوف الجثة اللي قدامك هل هو اتخن واحد في القاعدة دي ؟ ثانياً : معانا في الحرلة يوجد ناس مثحرضين ولديهم ميول إنتحارية وبالتحديد هما يا فندم الاخ داروين زعيم الجناح العسكري في المنطقة الغربية وشهرته " ابو الدهماء " ... ويساعده أخ تاني من كتية الإنتحاريين إسمه مزهوراتي والإسم الكودي بتاعه " أبو زهره السُكره " والدليل على كلامي بما لا يدع مجال لأي شكة دبوس هو إن الأخ داروين وقدامنا جميعاً حرض الأخ أبو زهره على إنه يلغمط نفسه جاز ويروح داروين شاطط فيه عود كبريت ويخلي مزهوراتي يرمي نفسه عليكو يا باشا عشان تولعوا بجاز إنت واللي معاك ... حتى شمه يا باشا هاتلاقي ريحته جاز ...

زهيري وهو يصرخ : كداب ... كداب في أصل وشه يا باشا ... أينعم أنا ريحتي جاز .. لكن ده لأسباب طبية .. أنا عندي حشرات وحركات في شعري يا باشا وفروم تايم تو تايم بادهن شعري جاز عشان أتخلص من الحشرات دي .

برغوت : كويس خالص ... خدوه وفسحووووه

س س : أحسن يا مزهوراتي يا وحش يا بتاع الجاز ... فسحووه يا برغوت باشا وماتخلوش نفسه في حاجه ..

برغوت : أنا أقصد يفسحووووك إنت يا زعيم السنافر ...

س س مذهولاً : طب ليه ؟ ده أنا اعترفت لك على التنظيم وقلت لك كل التفاصيل .. أنا الراجل بتاعك يا باشا ومن إيدك دي لإيدك دي

برغوت : بأقول خدوه وعلقوه فوق الساري جنب العلم

س س : طب بلاش الساري .. حرام عليك أنا لابس خفيف وممكن أستهوا

ثم يقوم القراصنة بجرجرة سين سين ليُسدل الستار على قائد الرحلة

برغوت : هـــا في حد تخين تاني هنا .

نانو وفُلانه وهما ثائرتان ضد البرغوت : إسمع يا جدع إنت ... إنت تلم نفسك وتعرف حجمك .. إنت نزلت ولا طلعت حتة برغوت ممكن نفعصك ومالكش ديه ...

برغوت : عظيم قوي .. بقى عامليلني فيها صفية زغلول وصفية حلمي إنتوا الإتنين ؟... طب خدوا الإتنين دول عالمطيخ ويفضلوا يقشروا في بطاطس وبصل لحد ما يقولوا حقي برقبتي .. .. واد يا لظلظ يا واد يا لظلظ

لظلظ : نعيمن يا زعيم ... أأمرني

برغوت : عايزك تبعت إس إم إس لإدارة المحاورات وتطلب منهم 32 جيني على كل راس هنا وإن مادفعوش خلال 24 ساعة هانبتدي نسلخ راس كل 10 دقايق ... وهاتلي الجدع أبو قميص بمبى ده وواقف في اخر الصف كمشان ده ؟

ثم يُسرع لظلظ ويأتي بموديست يجره جراً وموديست رجليه لا تقوى على حمله

موديست : بونسوار عمو برغوت .. احب أقول لحضرتك إنا أنا فيري بيسفول مان .. ولا ليه في التعليق على السواري .. ولا تقشير الشيبسي والاونيون والحاجات دي

برغوت : أومال ليك في إيه ؟

موديست : حضرتك أنا ميوزيشن قد الدُنيا وتحديداً متخصص في آلات النفخ .

برغوت : كويس .. يعني مش هاتتعبنا ... لظلظ خدوه وظبطوه على 45 ... وروح هاتلي يا لظلظ الإتنين البنات القصيرين النحفانين اللي شبه بعض دول وواقفين على الشمال

نورا وإيناس : إسمع يا جدع إنت .. لو قربت مننا إحنا ممكن نبهدلك ... إحنا بابانا شغال في الكويت وعضمه جامده قوي ، ولينا واحد قريبنا أمين شُرطة وممكن يقلب عليك الدنيا

برغوت : في الكويت ؟!!!! يا مساء الدنانير .... حلو .. أدى صيد سمين أهو وقع في إيدنا .. لظلظ .. أطلب لي في الحتتين دول 120 جيني عالراس ..

ثم يلتزم الجميع الصمت من بعد كرت الإرهاب اللي عمله برغوت البحر ويؤثر الجميع السلامه

لظلظ : إلحق ريس برغوت ، الجدع اللي إسمه ملخبط ده اللي إحنا معلقينه فوق الساري عمال يصرخ ويلطم ويقول أنا عايز أتكلم مع الزعيم أنا عايز أتكلم مع الزعيم .

برغوت : طب نزلوه وهاتوه أما نشوف عايز إيه

س س : أنا عايز اقولك كلمتين توب كونفدينشل يا مستر flea ...

برغوت : قول وقصر عشان تطلع الساري تاني

ثم يقترب س س من أذنه ويُسر له بكلمات تنفرج بعدها اسارير برغوت ويصيح ويقول : ولا يا لظلظ .. جهز يالا اللنش النفاث الخصوصي بتاعي لعمك س س ومونه بنزين وأصرف له ساندوتش شاورما وعلبة عصير مستورد ووصله لحد الشط معزز مُكرم

لظلظ : ما عاش اللي يرد لك طلب يا زعيم ... بس لو مافيهاش ثقاله .. مونكن أعرف ليه ؟

برغوت : ثم يقترب منه برغوت ويرزعه على قفاه ويقول له : يا قفا ده عنده خطة جهنمية هايروح يجيب لنا 50 راس تاني من المحاورات .. نكومهم على اللي عندنا دول ونطلب فيهم هبره جامدة ...

تمت

اعتذر لجميع الاخوة اللي ما كانش لهم دور في القصة وبأوعدهم اني هاحاول ازنقهم في اي قصص جايه ان شالله يطلعوا كومبارس صامت .. او حتى غسيلهم يبقى منشور في اي بلكونه الكاميرا تيجي عليها بالصدفة

اخوكم الكاتب الكبير في السن سين سين

[badroora]

حلوة اوى تسلم ايديك بس كنت حابة اعرف المحاورات دفعولكم الديه ولا

[Ahmad Farahat]

بصراحة يا سين.سين...........

ندالة ما تتوصفشي

بس مش مهم.........

أنا مبسوط منك عشان كبرت دوري...........

وان شاء الله أحب أكون بطل الرواية الجاية.........

بس انت بصراحة هتحمسني أعمل مسلسل على غرار مسلسلاتك الشيقة............

وبرضه هيكون فيها أبطال من المحاورات...........

ووعد مني هيكون فيه دور للناشئين الصغيرين..........

نجفه ومحمد ميدو وأحمد تيتو............

بس مش عارف أعملها ازاي لسه.........

لما افكر.........

بس بصراحة إنت كاتب موهوب ولازم تبقى بدال عكاشة...........

[ahmed_tito91]

بصراحة يا سين.سين...........

ندالة ما تتوصفشي

عندك حق والله انا كنت اعتقد ان النهايه حتكون سعيده ولكن الكاتب الكبير س س غمنا وحرق دمنا فى الاخر بالنداله ديه

حلوة اوى تسلم ايديك بس كنت حابة اعرف المحاورات دفعولكم الديه ولا

دفعوا ايه يا نجفه دا ندل مع الاعضاء بس سؤال صغير ايه اللى حصل لموديست وايناس ؟

ووعد مني هيكون فيه دور للناشئين الصغيرين..........

نجفه ومحمد ميدو وأحمد تيتو............

شكرا يا ارسين على ردك الجميل ده

[رمضان]

اسجل اعجابي الشديد

[yasovinas]

سين سين

يا نور العين

ولو انك شحورتني وفعلت بي الافاعيل لكن دمك زي العسل وعيوني دمعت من كتر الضحك

حقيقي وحشتوني يا اهل المحاورات